bhaviṣyapurāṇam
śatānīka uvāca
nāmnāṃ sahasraṃ savituḥ śrotumicchāmi he dvija |
yena te darśanaṃ yātaḥ sākṣād devo divākaraḥ ||
||1||sarvamaṅgalamaṅgalyaṃ sarvapāpapraṇāśanam |
stotrametanmahāpuṇyaṃ sarvopadravanāśanam ||
||2||na tadasti bhayaṃ kiñcid yadanena na naśyati |
jvarādyairmucyate rājan stotre'smin paṭhite naraḥ ||
||3||anye ca rogāḥ śāmyanti paṭhataḥ śṛṇvatastathā |
sampadyante yathā kāmāḥ sarva eva yathepsitāḥ ||
||4||ya etadāditaḥ śrutvā saṅgrāmaṃ praviśennaraḥ |
sa jitvā samare śatrūnabhyeti gṛhamakṣataḥ ||
||5||vandhyānāṃ putrajananaṃ bhītānāṃ bhayanāśanam |
bhūtikāri daridrāṇāṃ kuṣṭhināṃ paramauṣadham ||
||6||bālānāṃ caiva sarveṣāṃ graharakṣonivāraṇam |
paṭhate saṃyato rājan sa śreyaḥ paramāpnuyāt ||
||7||sa siddhaḥ sarvasaṅkalpaḥ sukhamatyantamaśnute |
dharmārthibhirdharmalubdhaiḥ sukhāya ca sukhārthibhiḥ ||
||8||rājyāya rājyakāmaiśca paṭhitavyamidaṃ naraiḥ |
vidyāvahaṃ tu viprāṇāṃ kṣatriyāṇāṃ jayāvaham ||
||9||paśvāvahaṃ tu vaiśyānāṃ śūdrāṇāṃ dharmavardhanam |
paṭhatāṃ śṛṇvatāmetad bhavatīti na saṃśayaḥ ||
||10||tacchṛṇuṣva nṛpaśreṣṭha prayatātmā bravīmi te |
nāmnāṃ sahasraṃ vikhyātaṃ devadevasya dhīmataḥ ||
||11||dhyānam
dhyeyaḥ sadā savitṛmaṇḍalamadhyavartī
nārāyaṇaḥ sarasijāsanasanniviṣṭaḥ |
keyūravān makarakuṇḍalavān kirīṭī
hārī hiraṇmayavapurdhṛtaśaṅkhacakraḥ ||
||12||stotram
oṃ viśvavid viśvajit kartā viśvātmā viśvatomukhaḥ |
viśveśvaro viśvayonirniyatātmā jitendriyaḥ ||
||13||kālāśrayaḥ kālakartā kālahā kālanāśanaḥ |
mahāyogī mahāsiddhirmahātmā sumahābalaḥ ||
||14||prabhurvibhurbhūtanātho bhūtātmā bhuvaneśvaraḥ |
bhūtabhavyo bhāvitātmā bhūtāntaḥkaraṇaṃ śivaḥ ||
||15||śaraṇyaḥ kamalānando nandano nandavardhanaḥ |
vareṇyo varado yogī susaṃyuktaḥ prakāśakaḥ ||
||16||prāptayānaḥ paraprāṇaḥ pūtātmā prayataḥ priyaḥ |
nayaḥ sahasrapāt sādhurdivyakuṇḍalamaṇḍitaḥ ||
||17||avyaṅgadhārī dhīrātmā savitā vāyuvāhanaḥ |
samāhitamatirdātā vidhātā kṛtamaṅgalaḥ ||
||18||kapardī kalpapād rudraḥ sumanā dharmavatsalaḥ |
samāyukto vimuktātmā kṛtātmā kṛtināṃ varaḥ ||
||19||avicintyavapuḥ śreṣṭho mahāyogī maheśvaraḥ |
kāntaḥ kāmārirādityo niyatātmā nirākulaḥ ||
||20||kāmaḥ kāruṇikaḥ kartā kamalākarabodhanaḥ |
saptasaptiracintyātmā mahākāruṇikottamaḥ ||
||21||sañjīvano jīvanātho jayo jīvo jagatpatiḥ |
ayukto viśvanilayaḥ saṃvibhāgī vṛṣadhvajaḥ ||
||22||vṛṣākapiḥ kalpakartā kalpāntakaraṇo raviḥ |
ekacakraratho maunī suratho rathināṃ varaḥ ||
||23||sakrodhano raśmimālī tejorāśirvibhāvasuḥ |
divyakṛd dinakṛd devo devadevo divaspatiḥ ||
||24||dīnanātho haro hotā divyabāhurdivākaraḥ |
yajño yajñapatiḥ pūṣā svarṇaretāḥ parāvaraḥ ||
||25||parāparajñastaraṇiraṃśumālī manoharaḥ |
prājñaḥ prājñapatiḥ sūryaḥ savitā viṣṇuraṃśumān ||
||26||sadāgatirgandhavaho vihito vidhirāśugaḥ |
pataṅgaḥ patagaḥ sthāṇurvihaṅgo vihago varaḥ ||
||27||haryaśvo haritāśvaśca haridaśvo jagatpriyaḥ |
tryambakaḥ sarvadamano bhāvitātmā bhiṣagvaraḥ ||
||28||ālokakṛllokanātho lokālokanamaskṛtaḥ |
kālaḥ kalpāntako vahnistapanaḥ sampratāpanaḥ ||
||29||virocano virūpākṣaḥ sahasrākṣaḥ purandaraḥ |
sahasraraśmirmihiro vividhāmbarabhūṣaṇaḥ ||
||30||khagaḥ pratardano dhanyo hayago vāgviśāradaḥ |
śrīmānaśiśiro vāgmī śrīpatiḥ śrīniketanaḥ ||
||31||śrīkaṇṭhaḥ śrīdharaḥ śrīmān śrīnivāso vasupradaḥ |
kāmacārī mahāmāyo mahogro'viditāmayaḥ ||
||32||tīrthakriyāvān sunayo vibhakto bhaktavatsalaḥ |
kīrtiḥ kīrtikaro nityaḥ kuṇḍalī kavacī rathī ||
||33||hiraṇyaretāḥ saptāśvaḥ prayatātmā parantapaḥ |
buddhimānamaraśreṣṭho rociṣṇuḥ pākaśāsanaḥ ||
||34||samudro dhanado dhātā māndhātā kaśmalāpahaḥ |
tamoghno dhvāntahā vahnirhotā'ntaḥkaraṇo guhaḥ ||
||35||paśumān prayatānando bhūteśaḥ śrīmatāṃ varaḥ |
nityo'dito nityarathaḥ sureśaḥ surapūjitaḥ ||
||36||ajito vijito jetā jaṅgamasthāvarātmakaḥ |
jīvānando nityagāmī vijetā vijayapradaḥ ||
||37||parjanyo'gniḥ sthitiḥ stheyaḥ sthaviro'tha nirañjanaḥ |
pradyotano rathārūḍhaḥ sarvalokaprakāśakaḥ ||
||38||dhruvo meṣī mahāvīryo haṃsaḥ saṃsāratārakaḥ |
sṛṣṭikartā kriyāheturmārtaṇḍo marutāṃ patiḥ ||
||39||marutvān dahanastvaṣṭā bhago bhargo'ryamā kapiḥ |
varuṇeśo jagannāthaḥ kṛtakṛtyaḥ sulocanaḥ ||
||40||vivasvān bhānumān kāryaḥ kāraṇastejasāṃ nidhiḥ |
asaṅgagāmī tigmāṃśurgharmāṃśurdīptadīdhitiḥ ||
||41||sahasradīdhitirbradhnaḥ sahasrāṃśurdivākaraḥ |
gabhastimān dīdhitimān sragvī maṇikuladyutiḥ ||
||42||bhāskaraḥ surakāryajñaḥ sarvajñastīkṣṇadīdhitiḥ |
surajyeṣṭhaḥ surapatirbahujño vacasāṃ patiḥ ||
||43||tejonidhirbṛhattejā bṛhatkīrtirbṛhaspatiḥ |
ahimānūrjito dhīmānāmuktaḥ kīrtivardhanaḥ ||
||44||mahāvaidyo gaṇapatirdhaneśo gaṇanāyakaḥ |
tīvrapratāpanastāpī tāpano viśvatāpanaḥ ||
||45||kārtasvaro hṛṣīkeśaḥ padmānando'tinanditaḥ |
padmanābho'mṛtāhāraḥ sthitimān ketumān nabhaḥ ||
||46||anādyanto'cyuto viśvo viśvāmitro ghṛṇirvirāṭ |
āmuktakavaco vāgmī kañcukī viśvabhāvanaḥ ||
||47||animittagatiḥ śreṣṭhaḥ śaraṇyaḥ sarvatomukhaḥ |
vigāhī veṇurasahaḥ samāyuktaḥ samākratuḥ ||
||48||dharmaketurdharmaratiḥ saṃhartā saṃyamo yamaḥ |
praṇatārtiharo vāyuḥ siddhakāryo janeśvaraḥ ||
||49||nabho vigāhanaḥ satyaḥ savitātmā manoharaḥ |
hārī harirharo vāyurṛtuḥ kālānaladyutiḥ ||
||50||sukhasevyo mahātejā jagatāmekakāraṇam |
mahendro viṣṭutaḥ stotraṃ stutihetuḥ prabhākaraḥ ||
||51||sahasrakara āyuṣmān aroṣaḥ sukhadaḥ sukhī |
vyādhihā sukhadaḥ saukhyaṃ kalyāṇaḥ kalatāṃ varaḥ ||
||52||ārogyakāraṇaṃ siddhirṛddhirvṛddhirbṛhaspatiḥ |
hiraṇyaretā ārogyaṃ vidvān bradhno budho mahān ||
||53||prāṇavān dhṛtimān gharmo gharmakartā rucipradaḥ |
sarvapriyaḥ sarvasahaḥ sarvaśatruvināśanaḥ ||
||54||prāṃśurvidyotano dyotaḥ sahasrakiraṇaḥ kṛtī |
keyūrī bhūṣaṇodbhāsī bhāsito bhāsano'nalaḥ ||
||55||śaraṇyārtiharo hotā khadyotaḥ khagasattamaḥ |
sarvadyoto bhavadyotaḥ sarvadyutikaro mataḥ ||
||56||kalyāṇaḥ kalyāṇakaraḥ kalyaḥ kalyakaraḥ kaviḥ |
kalyāṇakṛt kalyavapuḥ sarvakalyāṇabhājanam ||
||57||śāntipriyaḥ prasannātmā praśāntaḥ praśamapriyaḥ |
udārakarmā sunayaḥ suvarcā varcasojjvalaḥ ||
||58||varcasvī varcasāmīśastrailokyeśo vaśānugaḥ |
tejasvī suyaśā varṣmī varṇādhyakṣo balipriyaḥ ||
||59||yaśasvī tejonilayastejasvī prakṛtisthitaḥ |
ākāśagaḥ śīghragatirāśugo gatimān khagaḥ ||
||60||gopatirgrahadeveśo gomānekaḥ prabhañjanaḥ |
janitā prajano jīvo dīpaḥ sarvaprakāśakaḥ ||
||61||sarvasākṣī yoganityo nabhasvānasurāntakaḥ |
rakṣoghno vighnaśamanaḥ kirīṭī sumanaḥpriyaḥ ||
||62||marīcimālī sumatiḥ kṛtābhikhyaviśeṣakaḥ |
śiṣṭācāraḥ śubhācāraḥ svacārācāratatparaḥ ||
||63||mandāro māṭharo veṇuḥ kṣudhāpaḥ kṣmāpatirguruḥ |
suviśiṣṭo viśiṣṭātmā vidheyo jñānaśobhanaḥ ||
||64||mahāśvetaḥ priyo jñeyaḥ sāmago mokṣadāyakaḥ |
sarvavedapragītātmā sarvavedalayo mahān ||
||65||vedamūrtiścaturvedo vedabhṛd vedapāragaḥ |
kriyāvānasito jiṣṇurvarīyāṃśurvarapradaḥ ||
||66||vratacārī vratadharo lokabandhuralaṅkṛtaḥ |
alaṅkārākṣaro vedyo vidyāvān viditāśayaḥ ||
||67||ākāro bhūṣaṇo bhūṣyo bhūṣṇurbhuvanapūjitaḥ |
cakrapāṇirdhvajadharaḥ sureśo lokavatsalaḥ ||
||68||vāgmipatirmahābāhuḥ prakṛtirvikṛtirguṇaḥ |
andhakārāpahaḥ śreṣṭho yugāvarto yugādikṛt ||
||69||aprameyaḥ sadāyogī nirahaṅkāra īśvaraḥ |
śubhapradaḥ śubhaḥ śāstā śubhakarmā śubhapradaḥ ||
||70||satyavān śrutimānuccairnakāro vṛddhido'nalaḥ |
balabhṛd balado bandhurmatimān balināṃ varaḥ ||
||71||anaṅgo nāgarājendraḥ padmayonirgaṇeśvaraḥ |
saṃvatsara ṛturnetā kālacakrapravartakaḥ ||
||72||padmekṣaṇaḥ padmayoniḥ prabhāvānamaraḥ prabhuḥ |
sumūrtiḥ sumatiḥ somo govindo jagadādijaḥ ||
||73||pītavāsāḥ kṛṣṇavāsā digvāsāstvindriyātigaḥ |
atīndriyo'nekarūpaḥ skandaḥ parapurañjayaḥ ||
||74||śaktimāñjaladhṛg bhāsvān mokṣaheturayonijaḥ |
sarvadarśī jitādarśo duḥsvapnāśubhanāśanaḥ ||
||75||māṅgalyakartā taraṇirvegavān kaśmalāpahaḥ |
spaṣṭākṣaro mahāmantro viśākho yajanapriyaḥ ||
||76||viśvakarmā mahāśaktirdyutirīśo vihaṅgamaḥ |
vicakṣaṇo dakṣa indraḥ pratyūṣaḥ priyadarśanaḥ ||
||77||akhinno vedanilayo vedavid viditāśayaḥ |
prabhākaro jitaripuḥ sujano'ruṇasārathiḥ ||
||78||kunāśī surataḥ skando mahito'bhimato guruḥ |
graharājo grahapatirgrahanakṣatramaṇḍalaḥ ||
||79||bhāskaraḥ satatānando nandano naravāhanaḥ |
maṅgalo'tha maṅgalavān māṅgalyo maṅgalāvahaḥ ||
||80||maṅgalyacārucaritaḥ śīrṇaḥ sarvavrato vratī |
caturmukhaḥ padmamālī pūtātmā praṇatārtihā ||
||81||akiñcanaḥ satāmīśo nirguṇo guṇavāñchuciḥ |
sampūrṇaḥ puṇḍarīkākṣo vidheyo yogatatparaḥ ||
||82||sahasrāṃśuḥ kratumatiḥ sarvajñaḥ sumatiḥ suvāk |
suvāhano mālyadāmā kṛtāhāro haripriyaḥ ||
||83||brahmā pracetāḥ prathitaḥ prayatātmā sthirātmakaḥ |
śatavinduḥ śatamukho garīyānanalaprabhaḥ ||
||84||dhīro mahattaro vipraḥ purāṇapuruṣottamaḥ |
vidyārājādhirājo hi vidyāvān bhūtidaḥ sthitaḥ ||
||85||anirdeśyavapuḥ śrīmān vipāpmā bahumaṅgalaḥ |
svaḥsthitaḥ surathaḥ svarṇo mokṣado baliketanaḥ ||
||86||nirdvandvo dvandvahā sargaḥ sarvagaḥ samprakāśakaḥ |
dayāluḥ sūkṣmadhīḥ kṣāntiḥ kṣemākṣemasthitipriyaḥ ||
||87||bhūdharo bhūpatirvaktā pavitrātmā trilocanaḥ |
mahāvarāhaḥ priyakṛd dātā bhoktā'bhayapradaḥ ||
||88||cakravartī dhṛtikaraḥ sampūrṇo'tha maheśvaraḥ |
caturvedadharo'cintyo vinindyo vividhāśanaḥ ||
||89||vicitraratha ekākī saptasaptiḥ parātparaḥ |
sarvodadhisthitikaraḥ sthitistheyaḥ sthitipriyaḥ ||
||90||niṣkalaḥ puṣkalo vibhurvasumān vāsavapriyaḥ |
paśumān vāsavasvāmī vasudhāmā vasupradaḥ ||
||91||balavān jñānavāṃstattvamoṅkārastriṣu saṃsthitaḥ |
saṅkalpayonirdinakṛd bhagavān kāraṇāpahaḥ ||
||92||nīlakaṇṭho dhanādhyakṣaścaturvedapriyaṃvadaḥ |
vaṣaṭkārodgātā hotā svāhākāro hutāhutiḥ ||
||93||janārdano janānando naro nārāyaṇo'mbudaḥ |
sandehanāśano vāyurdhanvī suranamaskṛtaḥ ||
||94||vigrahī vimalo vindurviśoko vimaladyutiḥ |
dyutimān dyotano vidyud vidyāvān vidito balī ||
||95||gharmado himado hāsaḥ kṛṣṇavartmā sutājitaḥ |
sāvitrībhāvito rājā viśvāmitro ghṛṇirvirāṭ ||
||96||saptārciḥ saptaturagaḥ saptalokanamaskṛtaḥ |
sampūrṇo'tha jagannāthaḥ sumanāḥ śobhanapriyaḥ ||
||97||sarvātmā sarvakṛt sṛṣṭiḥ saptimān saptamīpriyaḥ |
sumedhā medhiko medhyo medhāvī madhusūdanaḥ ||
||98||aṅgiraḥpatiḥ kālajño dhūmaketuḥ suketanaḥ |
sukhī sukhapradaḥ saukhyaṃ kāmī kāntipriyo muniḥ ||
||99||santāpanaḥ santapana ātapastapasāṃ patiḥ |
umāpatiḥ sahasrāṃśuḥ priyakārī priyaṅkaraḥ ||
||100||prītirvimanyurambhotthaḥ khañjano jagatāṃ patiḥ |
jagatpitā prītamanāḥ sarvaḥ kharvo guho'calaḥ ||
||101||sarvago jagadānando jagannetā surārihā |
śreyaḥ śreyaskaro jyāyān mahānuttama udbhavaḥ ||
||102||uttamo merumeyo'tha dharaṇo dharaṇīdharaḥ |
dharādhyakṣo dharmarājo dharmādharmapravartakaḥ ||
||103||rathādhyakṣo rathagatistaruṇastanito'nalaḥ |
uttaro'nuttarastāpī avākpatirapāṃ patiḥ ||
||104||puṇyasaṅkīrtanaḥ puṇyo heturlokatrayāśrayaḥ |
svarbhānurvigatānando viśiṣṭotkṛṣṭakarmakṛt ||
||105||vyādhipraṇāśanaḥ kṣemaḥ śūraḥ sarvajitāṃ varaḥ |
ekaratho rathādhīśaḥ pitā śanaiścarasya hi ||
||106||vaivasvatagururmṛtyurdharmanityo mahāvrataḥ |
pralambahārasañcārī pradyoto dyotitānalaḥ ||
||107||santāpahṛt paro mantro mantramūrtirmahābalaḥ |
śreṣṭhātmā supriyaḥ śambhurmarutāmīśvareśvaraḥ ||
||108||saṃsāragativicchettā saṃsārārṇavatārakaḥ |
saptajihvaḥ sahasrārcī ratnagarbho'parājitaḥ ||
||109||dharmaketurameyātmā dharmādharmavarapradaḥ |
lokasākṣī lokagururlokeśaścaṇḍavāhanaḥ ||
||110||dharmayūpo yūpavṛkṣo dhanuṣpāṇirdhanurdharaḥ |
pinākadhṛṅmahotsāho mahāmāyo mahāśanaḥ ||
||111||vīraḥ śaktimatāṃ śreṣṭhaḥ sarvaśastrabhṛtāṃ varaḥ |
jñānagamyo durārādhyo lohitāṅgo vivardhanaḥ ||
||112||khago'ndho dharmado nityo dharmakṛccitravikramaḥ |
bhagavānātmavān mantrastryakṣaro nīlalohitaḥ ||
||113||eko'nekastrayī kālaḥ savitā samitiñjayaḥ |
śārṅgadhanvā'nalo bhīmaḥ sarvapraharaṇāyudhaḥ ||
||114||sukarmā parameṣṭhī ca nākapālī divisthitaḥ |
vadānyo vāsukirvaidya ātreyo'tha parākramaḥ ||
||115||dvāparaḥ paramodāraḥ paramo brahmacaryavān |
udīcyaveṣo mukuṭī padmahasto himāṃśubhṛt ||
||116||sitaḥ prasannavadanaḥ padmodaranibhānanaḥ |
sāyaṃ divā divyavapuranirdeśyo mahālayaḥ ||
||117||mahāratho mahānīśaḥ śeṣaḥ sattvarajastamaḥ |
dhṛtātapatrapratimo vimarṣī nirṇayaḥ sthitaḥ ||
||118||ahiṃsakaḥ śuddhamatiradvitīyo vivardhanaḥ |
sarvado dhanado mokṣo vihārī bahudāyakaḥ ||
||119||cārurātriharo nātho bhagavān sarvago'vyayaḥ |
manoharavapuḥ śubhraḥ śobhanaḥ suprabhāvanaḥ ||
||120||suprabhāvaḥ supratāpaḥ sunetro digvidikpatiḥ |
rājñīpriyaḥ śabdakaro graheśastimirāpahaḥ ||
||121||saiṃhikeyaripurdevo varado varanāyakaḥ |
caturbhujo mahāyogī yogīśvarapatistathā ||
||122||anādirūpo'ditijo ratnakāntiḥ prabhāmayaḥ |
jagatpradīpo vistīrṇo mahāvistīrṇamaṇḍalaḥ ||
||123||ekacakrarathaḥ svarṇarathaḥ svarṇaśarīradhṛk |
nirālambo gaganago dharmakarmaprabhāvakṛt ||
||124||dharmātmā karmaṇāṃ sākṣī pratyakṣaḥ parameśvaraḥ |
merusevī sumedhāvī merurakṣākaro mahān ||
||125||ādhārabhūto ratimāṃstathā ca dhanadhānyakṛt |
pāpasantāpahartā ca manovāñchitadāyakaḥ ||
||126||rogahartā rājyadāyī ramaṇīyaguṇo'nṛṇī |
kālatrayānantarūpo munivṛndanamaskṛtaḥ ||
||127||sandhyārāgakaraḥ siddhaḥ sandhyāvandanavanditaḥ |
sāmrājyadānanirataḥ samārādhanatoṣavān ||
||128||bhaktaduḥkhakṣayakaro bhavasāgaratārakaḥ
bhayāpahartā bhagavānaprameyaparākramaḥ
manusvāmī manupatirmānyo manvantarādhipaḥ ||
||129||phalaśrutiḥ
etat te sarvamākhyātaṃ yanmāṃ tvaṃ paripṛcchasi |
nāmnāṃ sahasraṃ savituḥ pārāśaryo yadāha me ||
||130||dhanyaṃ yaśasyamāyuṣyaṃ duḥkhaduḥsvapnanāśanam |
bandhamokṣakaraṃ caiva bhānornāmānukīrtanāt ||
||131||yastvidaṃ śṛṇuyānnityaṃ paṭhed vā prayato naraḥ |
akṣayaṃ sukhamannādyaṃ bhavet tasyopasādhitam ||
||132||nṛpāgnitaskarabhayaṃ vyādhito na bhayaṃ bhavet |
vijayī ca bhavennityamāśrayaṃ paramāpnuyāt ||
||133||kīrtimān subhago vidvān sa sukhī priyadarśanaḥ |
jīved varṣaśatāyuśca sarvavyādhivivarjitaḥ ||
||134||nāmnāṃ sahasramidamaṃśumataḥ paṭhed yaḥ
prātaḥ śucirniyamavān susamṛddhiyuktaḥ |
dūreṇa taṃ pariharanti sadaiva rogāḥ
bhūtāḥ suparṇamiva sarvamahoragendrāḥ ||
||135||iti śrī-bhaviṣyapurāṇe saptamakalpe śrībhagavatsūryasya sahasranāmastotraṃ sampūrṇam