Pañcadaśaḥ praśnaḥ — Āpastambaśrautasūtram

Kaṇḍikā	Sūtras
Prathamā kaṇḍikā	14
Dvitīyā kaṇḍikā	14
Tṛtīyā kaṇḍikā	20
Caturthī kaṇḍikā	13
Pañcamī kaṇḍikā	21
Ṣaṣṭhī kaṇḍikā	23
Saptamī kaṇḍikā	9
Aṣṭamī kaṇḍikā	17
Navamī kaṇḍikā	12
Daśamī kaṇḍikā	13
Ekādaśī kaṇḍikā	16
Dvādaśī kaṇḍikā	13
Trayodaśī kaṇḍikā	10
Caturdaśī kaṇḍikā	13
Pañcadaśī kaṇḍikā	1
Ṣoḍaśī kaṇḍikā	10
Saptadaśī kaṇḍikā	12
Aṣṭādaśī kaṇḍikā	17
Ekonaviṃśī kaṇḍikā	11
Viṃśī kaṇḍikā	21
Ekaviṃśī kaṇḍikā	15

Prathamā kaṇḍikā

pravargyaṃ saṃbhariṣyannamāvāsyāyāṃ paurṇamāsyāmāpūryamāṇapakṣasya vā puṇye nakṣatre tūṣṇīṃ kāṇṭakīṃ samidhamādhāya yuñjate mana iti caturgṛhītaṃ juhoti

||1||

atha yadi dīkṣitaḥ kāṇṭakīmevaitayā samidhamādadhyāt | yajureva vadedityeke

||2||

devasya tvā savituḥ prasava ityabhrimādāyābhrirasi nārirasītyabhimantrayate

||3||

sāgnikyā vyākhyātā

||4||

uttiṣṭha brahmaṇaspata iti brahmāṇamānantrayate

||5||

upottiṣṭhati brahmā | ubhāvuttaramardharcaṃ japataḥ | ādadate kṛṣṇājinam | anunayantyajāṃ puṃśchagalāmaśvaṃ vṛṣāṇamiti

||6||

praitu brahmaṇaspatiriti prāñco'śvaprathamā abhipravrajanti yatra mṛdaṃ khaniṣyantaḥ syuḥ

||7||

api vāsyaite saṃbhārāḥ pariśrite'bhyudāhṛtā bhavanti

||8||

agreṇāhavanīyaṃ mṛtkhanaḥ | pūrvaḥpūrva itaraḥ

||9||

uttareṇa mṛtkhanaṃ kṛṣṇājinaṃ prācīnagrīvamuttaralomāstīrya devī dyāvāpṛthivī iti mṛtkhanamabhimantrayate | ṛdhyāsamadyeti mṛtkhane'bhriyā prahṛtya makhasya śira ityapādāya makhāya tveti harati | makhasya tvā śīrṣṇa iti kṛṣṇājine nivapati

||10||

evaṃ dvitīyaṃ ca harati

||11||

tūṣṇīṃ caturthaṃ yāvatīṃ mṛdaṃ pravargyapātrebhya āptāṃ manyate

||12||

evamitarānsaṃbhārān

||13||

abhimantraṇe vikāraḥ

||14||

Dvitīyā kaṇḍikā

iyatyagra āsīriti varāhavihatam | devīrvamrīriti valmīkavapām | indrasyaujo'sīti pūtīkānajalomāni kṛṣṇājinalomāni ca saṃsṛjyāgnijā asi prajāpate reta iti

||1||

āyurdhehi prāṇaṃ dhehītyaśvenāvaghrāpya madhu tvā madhulā karotvityajayābhidohayati

||2||

abhidohanameke'vaghrāpaṇātpūrvaṃ samāmananti

||3||

bahava āryāḥ parigṛhya haranti

||4||

uttareṇa vihāramuddhate'vokṣite sikatopopte pariśrite nidadhati

||5||

madhu tvā madhulā karotviti madantīrupasṛjati

||6||

ye cokhāsaṃsarjanāḥ saṃbhārā yaccānyaddṛḍhārtha upārdhaṃ manyate

||7||

athātyantapradeśaḥ

||8||

yatkiṃca pravargya udakakṛtyaṃ madantībhireva tatkrayate | nainaṃ strī prekṣate na śūdraḥ

||9||

na kurvannabhiprāṇiti

||10||

apahāya mukhamanabhiprāṇanveṇunā karoti

||11||

na pravargyamādityaṃ ca vyaveyāt

||12||

yatra kvaca viprakrānte pravargyaṃ ādityo'stamiyāt kṛtāntādeva viramet | śvobhūte śeṣaṃ samāpnuyāt

||13||

saṃprakliśya mṛdaṃ makhasya śiro'sīti piṇḍaṃ kṛtvā yajñasya pade stha ityaṅguṣṭhābhyāṃ nigṛhya mahāvīraṃ karoti vyuddhiṃ pañcoddhimaparimitoddhiṃ vā prādeśamātramūrdhvasānumupariṣṭādāsecanavantaṃ madhye saṃnataṃ vāyavyaprakāram

||14||

Tṛtīyā kaṇḍikā

gāyatreṇa tvā chandasā karomīti prathamam | traiṣṭubheneti dvitīyam | jāgateneti tṛtīyam

||1||

api vā sarvairekaikam

||2||

makhasya rāsnāsītyupabilaṃ rāsnāṃ karoti

||3||

aditiste bilaṃ gṛhṇātviti veṇuparvaṇā bilaṃ karoti

||4||

tṛtīyavelāmatinayati

||5||

yāvaddevatāya sauviṣṭakṛtāyāgnihotrāya bhakṣāyāptaṃ manyetetyaparam

||6||

sūryasya harasā śrāyetyuttarataḥ sikatāsu pratiṣṭhāpya makho 'sītyanuvīkṣate

||7||

evaṃ dvitīyaṃ tṛtīyaṃ ca karoti

||8||

tūṣṇīmitarāṇi

||9||

etasyā eva mṛdo dogdhre karoti hastyāṣṭhye prasecanavatī yathā srugadaṇḍaivam

||10||

varṣīya ādhvaryavaṃ pratiprasthānāt

||11||

ājyasthālīṃ rauhiṇakapāle ca parimaṇḍale ghoṭaprakāre

||12||

gharmeṣṭakāṃ kulāyinīmiti yadi sāgnicityo bhavati

||13||

nāpravargye syātāmityaparam

||14||

ślakṣṇīkaraṇaiḥ ślakṣṇīkurvanti

||15||

ahatacaṇḍātakairgavīdhukaiḥ klītakābhirveṇupavebhirājyeneti

||16||

vṛṣṇo'śvasya śakṛdgārhapatye pradīpya prathamakṛtaṃ mahāvīraṃ śaphābhyāṃ parigṛhya dhūpayati vṛṣṇo aśvasya niṣpadasīti

||17||

evaṃ dvitīyaṃ tṛtīyaṃ ca dhūpayati | tūṣṇīmitarāṇi

||18||

śaphābhyāmevāta ūrdhvaṃ mahāvīrānādatte

||19||

agreṇa gārhapatyamavaṭaṃ khātvā lohitapacanīyaiḥ saṃbhārairavastīrya teṣu mahāvīrānupāvaharati

||20||

Caturthī kaṇḍikā

arcirasīti prathamam | śocirasīti dvitīyam | jyotirasi tapo'sīti tṛtīyam

||1||

tūṣṇīmitarāṇyanvavadhāya lohitapacanīyaiḥ saṃbhāraiḥ pracchādya gārhapatye muñjānādīpyopoṣatyarciṣe tvetyetaiḥ pratimantraṃ pratidiśam

||2||

api vā sarvaiḥ sarvataḥ

||3||

pacyamānānmaitryopacaratyabhīmaṃ mahinā divamiti

||4||

uttarayā vā

||5||

pakveṣu siddhyai tveti ghṛṣṭī ādāya bhasmāpohya prathamakṛtaṃ mahāvīraṃ śaphābhyāṃ parigṛhyodvāsayati

||6||

devastvā savitodvapatvityudvāsyāpadyamānaḥ pṛthivyāmāśā diśa āpṛṇetyuttarataḥ sikatāsu pratiṣṭhāpya sūryasya tvā cakṣuṣānvīkṣa ityanuvīkṣate

||7||

evaṃ dvitīyaṃ tṛtīyaṃ codvāsayati | tūṣṇīmitarāṇi

||8||

athainānpradakṣiṇaṃ sikatābhiḥ paryūhatīdamahamamumāmuṣyāyaṇaṃ viśā paśubhirbrahmavarcasena paryūhāmīti | viśeti rājanyasya | paśubhiriti vaiśyasya

||9||

athainānprabhūtenājāpayasā chṛṇatti | gāyatreṇa tvā chandasā chṛṇadmītyetaistribhistribhirekaikam

||10||

api vā sarvairekaikam | tūṣṇīmitarāṇi

||11||

athainānpṛṣṇājina upanahyāsajati deva puraścara saghyāsaṃ tveti

||12||

upariṣṭātkāla eṣa mantro bhavatītyaparam

||13||

Pañcamī kaṇḍikā

pravargyeṇa pracariṣyantaḥ saṃvṛṇvanti dvārāṇi

||1||

pariśrayanti patnyāḥ

||2||

paścāddhotopaviśati | purastādadhvaryuḥ | dakṣiṇato brahmā yajamānaḥ prastotā ca | uttarataḥ pratiprasthātāgnīdhraśca

||3||

madantīrupaspṛśya prathamenānuvākena śāntiṃ kṛtvāgreṇa gārhapatyaṃ darbhānsaṃstīrya teṣu mahāvīrānupāvaharati deva puraścara saghyāsaṃ tveti

||4||

upariṣṭātkāla eṣa mantro bhavatītya param

||5||

atraiva sarvaṃ parigharmyam

||6||

athaudumbarāṇi | samrāḍāsandīṃ nitarām | rājāsandyā varṣīyasīmeke samāmananti | mauñjībhī rajjubhirekasarābhirvyutām

||7||

catasraḥ srucaḥ

||8||

dve aniṣṭubdhe

||9||

niṣṭubdhayorvarṣīyasyupayamanī prokṣaṇīdhānyāḥ

||10||

sruvau śaphau mahāvīrasaṃmitāvraskhau dhṛṣṭī methīṃ mayūkhānṣaṭ śakalānkāṇḍakīṃ ca samidhaṃ trayodaśa vaikaṅkatānparidhīnvaikaṅkatāni gharmendhanāni | khādirāṇi pālāśānyaudumbarāṇyarkamayāṇi kārṣmaryamayāṇi vaiṇavāni śamīmayāni vā

||11||

trīṇi kārṣṇājināni dhavitrāṇi śuklakṛṣṇalomāni

||12||

teṣāṃ vaiṇavā daṇḍā bāhumātrā bhavantīti vijñāyate

||13||

audumbaradaṇḍānītyaparam

||14||

dvau rukmau rajatasuvarṇau

||15||

śatamānau bhavataḥ

||16||

atha mauñjāni

||17||

vedau

||18||

tayoranyataraḥ parivāsitaḥ

||19||

abhidhānīṃ nidāne trīṇi viśākhadāmāni prabhūtānmuñjapralavān | rauhiṇayoḥ piṣṭānyaphalīkṛtānām | kharebhyaḥ sikatāḥ | mauñje pavitre | darbhamaye ityaparam

||20||

prokṣaṇīnāmāvṛtā prokṣaṇīḥ saṃskṛtya brahmāṇamāmantrayate

||21||

Ṣaṣṭhī kaṇḍikā

brahmanpravargyeṇa pracariṣyāmaḥ | hotardharmamabhiṣṭuhi | agnīdrauhiṇau puroḍāśāvadhiśraya | pratiprasthātarvihara | prastotaḥ sāmāni gāyeti

||1||

yajuryuktaṃ sāmabhirāktakhamityupāṃśūktvomindravantaḥ pracaratetyuccairanujānāti

||2||

pracarateti vā

||3||

yamāya tvā makhāya tveti sarvaṃ parighamyamabhipūrvaṃ triḥ prokṣati

||4||

prokṣitāni vyāyātayati

||5||

adhiśrayatyāgnīdhro rauhiṇau puroḍāśau tūṣṇīmupacaritau

||6||

etasminkāle pratiprasthātā darvihomasaṃskāreṇājyaṃ saṃskaroti

||7||

naitasya saṃskāro vidyata ityaparam

||8||

atra dadhyadhiśrayati

||9||

athaitāṃ samrāḍāsandīmādāyāgreṇāhavanīyaṃ paryāhṛtya purastādrājāsandyāḥ sādayati

||10||

tasyāṃ kṛṣṇājinaṃ prācīnagrīvamuttaralomāstīrya tasminnapracaraṇīyau mahāvīrāvupāvaharati deva puraścara saghyāsaṃ tveti

||11||

upariṣṭātkāla eṣa mantro bhavatītyaparam

||12||

athaitāṃ methīṃ mayūkhānviśākhadāmānītyādāyāgreṇa hotāraṃ jaghanena gārhapatyaṃ dakṣiṇayā dvāropanirhṛtya dakṣiṇena dakṣiṇaṃ dvāraṃ methīṃ nihanti hotuḥ samīkṣāyai

||13||

etasyaiva dvārasya pūrvasyai dvāryāyai dakṣiṇato vatsāya śaṅkum

||14||

etasyaivāparasyai dvāryāyai dakṣiṇato'jāyā abhyantaram

||15||

uttarato barkarāya

||16||

teṣu viśākhadāmāni vyāyātayati

||17||

tānyeva vyāyātitāni bhavantyodvāsanāt

||18||

tairenānkāle badhnanti

||19||

tataḥ kharānupavapati

||20||

uttareṇa gārhapatyamekam | uttareṇāhavanīyamekam

||21||

uttarapūrvaṃ dvāraṃ pratyucchiṣṭakharaṃ karoti bāhyato niḥṣecanavantam

||22||

uttareṇāhavanīyaṃ śṛtadadhyāsādayati

||23||

Saptamī kaṇḍikā

śakalānkāṇṭakīṃ ca samidham

||1||

athaitaṃ pracaraṇīyaṃ mahāvīraṃ śaphābhyāṃ parigṛhyāpracchinnāgreṇa vedenopariṣṭātsaṃmārṣṭi deva puraścara saghyāsaṃ tveti

||2||

prāṇāya svāhā vyānāya svāheti sruveṇāhavanīye saptaikādaśa vā prāṇāhutīrhutvā devastvā savitā madhvānaktviti sruveṇoparyāhavanīye mahāvīramaktvā pṛthivīṃ tapasastrāyasvetyaparasminkhare rājataṃ rukmaṃ nidhāya pratiṣṭhāpya mahāvīramanyasmai vā prada ya dvayānmuñjapralavānādāya dakṣiṇeṣāmagrāṇi gārhapatye pradīpayatyarciṣe tveti | teṣāmagrairuttareṣāṃ mūlāni śociṣe tveti | teṣāṃ mūlairdakṣiṇeṣāṃ mūlāni jyotiṣe tveti | teṣāṃ mūlairuttareṣāmagrāṇi tapase tveti

||3||

tānvyatyastānupari rukme nidadhātyarcirasi śocirasi jyotirasi tapo 'sīti

||4||

saṃsīdasva mahām̐ asīti teṣu mahāvīraṃ pratiṣṭhāpyāñjanti yaṃ prathayanta iti sruveṇa mahāvīramanakti | abhipūrayati vā

||5||

adhyadhi mahāvīramasaṃspṛśanyajamānaḥ prāñcaṃ prādeśaṃ dhārayamāṇo japatyanādhṛṣyā purastādityetairyathāliṅgam

||6||

manoraśvāsi bhūriputretyuttarataḥ pṛthivīmabhimṛśati

||7||

siddhyai tveti dhṛṣṭī ādatto'dhvaryuḥ pratiprasthātā ca

||8||

tapo ṣvagne antarām̐ amitrāniti gārhapatyādudīco'ṅgārānnirūhya citaḥ stha paricita iti pradakṣiṇamaṅgāraiḥ paryūhya

||9||

Aṣṭamī kaṇḍikā

vaikaṅkataiḥ paridhibhiḥ paridhattaḥ

||1||

mā asīti prāñcāvadhvaryurnidadhāti | pramā asītyudañcau pratiprasthātā

||2||

evamavaśiṣṭānāṃ pūrveṇapūrveṇa mantreṇādhvaryuḥ | uttareṇottareṇa pratiprasthātā

||3||

adhvaryureva dakṣiṇatastrayodaśaṃ nidadhātyantarikṣasyāntardhirasīti

||4||

divaṃ tapasastrāyasveti sauvarṇena rukmeṇāpidhāyābhirgīrbhiriti tisṛbhirabhimantrya dhavitrāṇyādatte | gāyatramasīti prathamam | traiṣṭubhamasīti dvitīyam | jāgatamasīti tṛtīyam

||5||

tairenaṃ trirūrdhvamupavājayati madhu madhviti

||6||

teṣāmekaṃ pratiprasthātre prayacchati | ekamāgnīdhrāya

||7||

āgnīdhraprathamāstriḥ pradakṣiṇamūrdhvaṃ dhūnvantaḥ pariyanti

||8||

tamabhimukhāḥ paryupaviśanti | purastādadhvaryuḥ | dakṣiṇataḥ pratiprasthātā | uttarata āgnīdhraḥ

||9||

avyatiṣaṅgamūrdhvaṃ dhūnvantaḥ praṇavaiḥ saṃrādhayanta indhānāḥ samañjanto vāgyatā āsate

||10||

prajvalite rukmamapādatta iti vijñāyate

||11||

yatrābhijānāti yabhirvartikāṃ grasitāmamuñcatamiti tadadhvaryurmahāvīramabhimantrayate daśa prācīrdaśa bhāsi dakṣiṇetyanuvākena

||12||

yatrābhijānātyapnasvatīmaśvinā vācamasme iti tadupottiṣṭhannadhvaryurāha rucito gharma iti

||13||

adhvaryuprathamā anabhidhūnvantastriḥ pratipariyanti

||14||

dhavitrāṇyādāyādhvaryuḥ pratiprasthātre prayacchati | tāni pratiprasthātāgreṇāhavanīyaṃ paryāhṛtya samrāḍāsandyāṃ sādayati

||15||

yathālokamavasthāya sarva ṛtvijo yajamānaścādhīyanto mahāvīramavekṣante'paśyaṃ gopāmiti

||16||

anuvākaśeṣaṃ tu pariśrite pratiprasthātā patnīṃ vāca yati tvaṣṭīmatī te sapeyeti

||17||

Navamī kaṇḍikā

tataḥ saṃpreṣyatyagnīdrauhiṇau puroḍāśāvāsādayeyi

||1||

aniṣṭubdhayoḥ srucorupastīrṇābhighāritau puroḍāśāvāsādayati | dakṣiṇaṃ paridhisaṃdhimanvekam | uttaraṃ paridhisaṃdhimanvitaram

||2||

sāvitreṇa raśanāmādāyādityai rāsnāsītyabhimantrya pūrvayā dvāropaniṣkramya trirupāṃśu gharmadughamāhvayatīḍa ehyadita ehi sarasvatyehīti

||3||

pratyetya dogdhre nidāne ityādāya dakṣiṇayā dvāropaniṣkramya triruccairasāvehyasāvehīti yathānāmā bhavati

||4||

adityā uṣṇīṣamasīti raśanayā gharmadughamabhidadhāti | vāyurasyaiḍa iti vatsam

||5||

pūṣā tvaupāvasṛjatvityupāvasṛjya yasta stanaḥ śaśaya iti gharmadughamabhimantrayate

||6||

usra gharmaṃ śiṃṣosra gharmaṃ pāhi gharmāya śiṃṣeti nidāya vatsaṃ bṛhaspatistvopasīdatvityupasīdati

||7||

dānavaḥ stha perava iti stanānsaṃmṛśyāśvibhyāṃ pinvasva sarasvatyai pinvasva pūṣṇe pinvasva bṛhaspataye pinvasvendrāya pinvasvendrāya pinvasveti varṣīyasi dogdhre dogdhi

||8||

tūṣṇīṃ pratiprasthātā hrasīyasyajām

||9||

yatrābhijānātyuttiṣṭha brahmaṇaspata iti tadupottiṣṭhantāvagnīdhe payasī pradāya pūrvāvatidutya śaphopayamānādadāte | gāyatro'sīti prathamam | traiṣṭubho'sīti dvitīyam | jāgatamasītyupayamanaṃ pratiprasthātā

||10||

yatrābhijānātyupadrava payasā godhugiti tadāgnīdhro'nuprapadyate

||11||

sahorjo bhāgenopa mehīti paya āhriyamāṇaṃ pratīkṣate

||12||

Daśamī kaṇḍikā

indrāśvinā madhunaḥ sāraghasyeti mahābīre gopaya ānayati

||1||

svāhā tvā sūryasya raśmaye vṛṣṭivanaye juhomītyudyantamūṣmāṇamanumantrayate

||2||

madhu havirasītyajāpayaḥ

||3||

ajāpayasa ānayanameke pūrvaṃ samāmananti

||4||

sūryasya tapastapetyūṣmāṇam

||5||

dyāvṝpṛthivībhyāṃ tvā parigṛhṇāmīti śaphābhyāṃ mahāvīraṃ parigṛhya pracchinnāgreṇa vedena bhasma pramṛjyāntarikṣeṇa tvopayacchāmītyupayamanena pratiprasthātopayacchati

||6||

devānāṃ tvā pitṝṇāmanumato bhartuṃ śakeyamityādāyotthāya tejo'si tejo'nuprehīti harati

||7||

vrajannanavānaṃ pañca vātanāmāni vyācaṣṭe samudrāya tvā vātāya svāheti

||8||

apānya pañcottarāṇyagnaye tvā vasumate svāheti

||9||

etasminkāle pratiprasthātā dakṣiṇaṃ rauhiṇaṃ pratiṣṭhitaṃ juhotyaharjyotiḥ ketunā juṣatāṃ sujyotirjyotiṣāṃ svāheti

||10||

apareṇāhavanīyaṃ dakṣiṇātikrāmanviśvā āśā dakṣiṇasaditi brahmāṇamīkṣate | viśvāndavānayāḍiheti hotāram | svāhākṛtasya gharmasyeti gharmamabhimantryāśrāvya pratyāśrāvite saṃpreṣyati gharmasya yajeti | aśvinā gharmaṃ pātamiti vaṣaṭkṛte juhoti | svāhendrāvaḍityanuvaṣaṭkṛte

||11||

gharmamapātamaśvinetyanuvākaśeṣeṇopasthāyoparyāhavanīye dhāryamāṇaṃ pratiprasthātā śṛtadadhnābhipūrayati

||12||

iṣe pīpihyūrje pīpihīti vikṣarantamanumantrayate

||13||

Ekādaśī kaṇḍikā

athainaṃ diśo'nu prahāvayati tviṣyai tvā dyumnāya tvendriyāya tvā bhūtya tveti

||1||

pratyākramyopayamane śeṣamānīyāntarvedyupayamanaṃ nidhāya pūrvasminkhare rājataṃ rukmaṃ nidhāya tasminmahāvīraṃ pratiṣṭhāpayati dharmāsi sudharmāmenyasme brahmāṇi dhārayeti | kṣatrāṇi dhārayeti rājanyasya | viśaṃ dhārayeti vaiśyasya

||2||

nettvā vātaḥ skandayāditi

||3||

yadyabhicaredamuṣya tvā prāṇe sādayāmīti sādayet

||4||

atra pratiprasthātā pūrvavaduttaraṃ rauhiṇaṃ juhoti

||5||

athaitāñchakalānupayamane'ñjañjuhoti pūṣṇe śarase svāhetyetaiḥ pratimantram

||6||

ṣaṣṭhaṃ śakalaṃ sarveṣu lepeṣvaktvānanvrīkṣamāṇa udañcaṃ nirasyati rudrāya rudrahotre svāheti

||7||

purastādrauhiṇahomācchakalāneke samāmananti

||8||

athāpa upaspṛśya tūṣṇīṃ kāṇṭakīṃ samidhamādhāyaitasmādeva śeṣādupayamanenāgnihotraṃ juhoti bhūḥ svāheti | tūṣṇīṃ vā

||9||

upayamane śeṣaṃ sarve samupahūya bhakṣayanti

||10||

asāvasāvupahvayasveti karmanāmadheyenāmantrayate | upahūta iti prativacanaḥ

||11||

hotādhvaryurbrahmā pratiprasthātāgnīdyajamānaśca

||12||

sarve pratyakṣam

||13||

api vā yajamāna eva pratyakṣam | avaghreṇetare

||14||

hutaṃ havirmadhu haviriti bhakṣayitvopayamanaṃ pratiprasthātre prayacchati

||15||

taducchiṣṭakhare prakṣālyāntarvedyupayamanaṃ nidhāya tasminrukmāvavadhāya madantīrānīyāpohiṣṭhīyābhirmārjayitvā ninīyāpo'traiva sarvaṃ parigharmyaṃ mamavadhāya

||16||

Dvādaśī kaṇḍikā

gharmāya saṃsādyamānāyānubrūhīti saṃpreṣyati | saṃsādyamānāyānubrūhīti vā

||1||

ā yasminsapta vāsavā ityabhijñāyāgreṇāhavanīyaṃ paryāhṛtya samrāḍāsandyāṃ sādayati svāhā tvā sūryasya raśmibhya iti prātaḥ | svāhā tvā nakṣatrebhya iti sāyam

||2||

yatrābhijānātyaddhi tṛṇamaghnye viśvadānīmiti tadgāmavasṛjya madantīrupaspṛśyottamenānuvākena śāntiṃ kurvanti

||3||

evaṃ sāyaṃprātaḥ pravargyopasadbhyāṃ caranti

||4||

tryupasatke ṣaṭkṛtvaḥ | ṣaḍupasatke dvādaśakṛtvaḥ | dvādaśopasatke caturviṃśatiḥkṛtvaḥ

||5||

etāvannānā

||6||

uttareṇa mantreṇa sāyaṃ rauhiṇaṃ juhoti | apīparo māhno rātriyai mā pāhi | eṣā te agne samittayā samidhyasva | āyurme dā varcasā māñjīriti sāyaṃ samidhamādadhāti | apīparo mā rātriyā ahno mā pāhīti prātaḥ

||7||

agnirjyotirjyotiragniḥ svāheti sāyamagnihotraṃ juhoti | sūryo jyotirjyotiḥ sūryaḥ svāheti prātaḥ

||8||

saṃsṛṣṭahomaṃ vā

||9||

agniṣṭome pravṛṇakti

||10||

nokthye pravṛñjyāt

||11||

viśvajiti sarvapṛṣṭhe pravṛṇakti

||12||

tena pravṛjya saṃvatsaraṃ na māṃsamaśnīyāt | na rāmāmupeyāt | na mṛnmayena pibet | nāsya rāma ucchiṣṭaṃ pibet | teja eva tatsaṃśyatīti vijñāyate

||13||

Trayodaśī kaṇḍikā

pravargyamudvāsayiṣyannajāmagnīdhe dadāti | paṣṭhauhīṃ brahmaṇe | dhenuṃ hotre | rukmāvadhvaryave

||1||

aparaṃ kharaṃ pūrvasminkhare nyupyocchiṣṭakharaṃ saṃkṛṣyottareṇāhavanīyaṃ samrāḍāsandīṃ pratiṣṭhāpya tasyāṃ sarvaṃ parigharmyaṃ samavadhāyaudumbaryāṃ sruci caturgṛhītaṃ gṛhītvā gharma yā te divi śugityetairyathāliṅgaṃ juhoti

||2||

api vā pratiprasthātā trīnsaṃnakhāñchalākāmuṣṭīnādāya teṣāmekamāhavanīye pradīpyāsyadaghne dhārayati | tamadhvaryurabhijuhoti gharma yā te divi śugiti | tasminnaparaṃ pradīpyāhavanīye pūrvaṃ prahṛtya nābhidaghne dhārayati | tamadhvaryurabhijuhoti gharma yā te'ntarikṣe śugiti | tasminnaparaṃ pradīpyāhavanīye pūrvaṃ prahṛtya jānudaghre dhārayati | tamadhvaryurabhijuhoti gharma yā te pṛthivyāṃ śugiti

||3||

āhavanīya evainamanupraharati

||4||

anu no'dyānumatiriti pariśrite pratiprasthātā patnīmudānayati

||5||

anvidanumata ityupaniṣkrāmanti

||6||

anuharanti methīmabhriṃ mayūkhānviśākhadāmāni kharāviti

||7||

dakṣiṇata ucchiṣṭakharaṃ pariharati

||8||

samrāḍāsandyā dvāvantarvedi pādau dvau bahirvedi pratiṣṭhāpya saṃpreṣyati prastotaḥ sāma gāyeti

||9||

sarve sahapatnīkāstriḥ sāmno nidhanamupayanti | adhādhye dvitīyam | prāpyāpareṇottaravediṃ tṛtīyam | sarvatra saṃpreṣyati

||10||

Caturdaśī kaṇḍikā

divastvā paraspāyā iti prathame'bhipravrajanti | brahmaṇastvā paraspāyā iti dvitīye | prāṇasya tvā paraspāyā iti tṛtīye

||1||

uttareṇottaravediṃ samrāḍāsandīṃ pratiṣṭhāpya saṃpreṣyati prastotarvāṣauharaṃ sāma gāyeṣṭāhotrīyaṃ sāma gāyeti | iṣṭāhotrīyasya sāmno nidhanamupayanti | na vārṣāharasya

||2||

yadyupariṣṭātpariṣiñcettatra vārṣāharaṃ codayet

||3||

udakumbhamādāyādhvaryurvalgurasi śaṃyudhāyā iti triḥ pradakṣiṇamuttaravediṃ pariṣiñcanparyeti | nidhāya kumbhaṃ śaṃ ca vakṣi pari ca vakṣīti trirapariṣiñcanpratiparyeti

||4||

catuḥsraktirnābhirṛtasyetyuttaravedimabhimṛśya sado viśvāyurityuttareṇottaranābhiṃ kharau nyupyānuvyūhati

||5||

apa dveṣo apa hṛra iti mārjālīyadeśa ucchiṣṭakharam

||6||

uttareṇottaranābhiṃ mkhare hiraṇyaṃ nidhāya tasmin pracaraṇīyaṃ mahāvīramupāvaharati

||7||

atraivetarau pūrvāparau dakṣiṇottarau vā

||8||

atraiva sarvaṃ parigharmyaṃ sarvataḥ parimaṇḍalamādityasya rūpaṃ karoti

||9||

mahīnāṃ payo'sīti mahāvīre gopaya ānayati | jyotirbhā asi vanaspatīnāmoṣadhīnāṃ rasa iti madhu | vājinaṃ tvā vājino'vanayāma iti dadhi

||10||

evaṃ dvitīyaṃ tṛtīyaṃ ca pūrayati

||11||

api vājyameva prathama ānayet | madhu dvitīye | dadhi tṛtīye

||12||

gharmaitatte'nnametatpurīṣamiti dadhnā madhumiśreṇa pā trāṇi pūrayati yānyāsecanavanti | abhyukṣatītarāṇi | ariktatāyā iti vijñāyate

||13||

Pañcadaśī kaṇḍikā

||1||

Ṣoḍaśī kaṇḍikā

uttaravedyāmudvāsayettejaskāmasya | uttaravedyāmannādyakāmasya

||1||

paro vā paścādvodvāsayet | apāṃ madhya udvāsayet | nadidvīpa udvāsayet

||2||

yadi nadidvīpa udvāsayenna pariṣiñcet

||3||

yaṃ dviṣyādyatra sa syāttasyāṃ diśyaudumbaryāṃ śākhāyāmudvāsayet | ūrgvā udumbaro'nnaṃ prāṇaḥ śuggharmaḥ | idamahamuṣyāmuṣyāyaṇasya śucā prāṇamapidahāmīti śucaivāsya prāṇamapidahati | tājagārtimārchatīti vijñāyate

||4||

yatra darbhā upadīkasaṃtatāḥ syustadudvāsayedvṛṣṭikāmasya

||5||

uttaravedyāṃ nityaṃ kalpaṃ bruvate

||6||

nainamudvāsitaṃ vayāṃsi paryāsīrannāgneḥ praṇayanāt

||7||

atraike pariṣecanaṃ samāmananti

||8||

athainamupatiṣṭhante rantirnāmāsi divyo gandharva iti

||9||

etattvaṃ deva gharma devo devānupāgā ityabhimantryedamahaṃ manuṣyo manuṣyāniti pradakṣiṇamāvṛtya sumitrā na āpa oṣadhaya iti mārjālīyadeśa ucchiṣṭakhare mārjayitvodvayaṃ tamasasparītyādityamupasthāyodu tyaṃ citramiti dvābhyāṃ gārhapatye juhoti | upatiṣṭhanta ityeke | imamū ṣu tyamasmabhyamityāhavanīye juhoti | upatiṣṭhanta ityeke

||10||

Saptadaśī kaṇḍikā

yadi gharmaḥ skandedaskāndyauḥ pṛthivīmiti dvābhyāmenamabhimantrayeta

||1||

yadi gharmeṇa caratsu vidyudāpatedyā purastādvidyudāpatadityetairyathāliṅgaṃ juhuyāt

||2||

yadi sarvataḥ sarvā juhuyāt

||3||

prāṇāya svāhā pūṣṇe svāhetyetāvanuvākau gharmaprāyaścittāni

||4||

gharmeṣṭakāmupadadhātyudasya śuṣmādbhānurnātatyanuvākena | kulāyinīṃ yāste agna ārdrā yonaya ityanuvākena | aiḍikyā cityādhvaryuragnimabhimṛśaṃtyagnirasi vaiśvānaro'sītyanuvākena

||5||

bhūrbhuvaḥ suvariti sarvaprāyaścittāni

||6||

yadi mahāvīraḥ padyetordhva ū ṣu ṇa ūtaya iti dvābhyāmenamucchrayīta

||7||

yadi bhidyeta vidhuṃ dadrāṇamiti saṃdadhyāt | tato yāni dṛḍhārthe saṃśleṣaṇāni syustairenamabhidihyādyadanyanmāṃsānmāṣebhyaśca yadṛte cidabhiśriṣa iti

||8||

yadi gharmamatiparīyurna vā pratiparīyuḥ punarūrjā saha rayyetyetābhyāmenaṃ pratiparīyuḥ

||9||

mā no gharma vyathita ityaṣṭau gharme vyathite prāyaścittāni

||10||

api vā gharmameva vyathitametāsāṃ catasṛbhirabhimantrayeta

||11||

yadi gharmeṇa caratsvādityo'stamiyādaparasyāṃ dvāri darbheṇa hiraṇyaṃ prabadhyodvayaṃ tamasasparītyupasthāyodu tyaṃ citramiti dvābhyāṃ gārhapatye hutvā pravṛjya śvo bhūte vayaḥ suparṇā ityādityamupatiṣṭhante

||12||

Aṣṭādaśī kaṇḍikā

yadi gharmadhugdohakāle nāgacchedanyāṃ dugdhvā pravṛjya tāṃ sutyāyāṃ brāhmaṇāya dadyādyamanabhyāgamiṣyansyāt

||1||

yadi gharmadhugi payo na syāddṛteścaturthaṃ pādaṃ stanaṃ kṛtvā pinvayet

||2||

yadi dadhi duhīta bārhaspatyaṃ śaṃset

||3||

yadi paya āśvinaṃ sodarkam

||4||

yadyu vai lohitaṃ duhīta raudryaco juhuyāt

||5||

yadi naśyeddhāturṛgbhyāṃ juhuyāt

||6||

yadyasyai vatso vāyorniyutvata ṛcā juhuyāt

||7||

yadyamedhyamayajñiyaṃ vābhiniṣīdedāgneyyarcā juhuyāt | āgnivāruṇyetyeke

||8||

yadyenāṃ vayo'bhivikṣipedāśvinyarcā juhuyāt

||9||

yadyudvā patetsaṃ vā vijeta śārdūlo vā hanyādarkakṣīramajākṣīra āścotya tena precaret

||10||

sutyāyāṃ pravṛñjanameke samāmananti

||11||

tatra mīmāṃsā

||12||

yadā purastādaruṇā syādatha pravṛjyaḥ | upakāśa upavyuṣaṃ samayāviṣita uditānudita udite vā | prātaḥ saṃgave mādhyaṃdine vā pavamāne stute

||13||

āgnīdhrāgāre pravṛjyaḥ

||14||

sakṛdeva pravṛjya iti vijñāyate

||15||

tānyetānyaupasadaiḥ pravṛñjanairvikalperan

||16||

dadhigharmaṃ bhakṣayanti bhūrbhuvaḥ suvarityanuvākena

||17||

Ekonaviṃśī kaṇḍikā

vyākhyātā ghorāstanvo'raṇye'nuvākyo gaṇa uttarau cānuvākau

||1||

yadi gharmeṇa carastvekasṛka uttiṣṭhedvi gā indra vicaranspāśayasvetyetamabhimantryobhayata ādīpyolmukamasmai pratyasyedagne agninā saṃvadasveti

||2||

athainamupatiṣṭhante sakṛtte agne nama ityanuvākaśeṣeṇa

||3||

||4||

yadi gharmadhukkrimiṇā syādatriṇā tvā krime hanmītyanuvākenāsyāḥ krimīnhanyāt

||5||

api vā sārvatrikametatprāyaścittaṃ kriyeta

||6||

yamabhicarettasya lohitamavadānaṃ kṛtvāharāvadya śṛtasyetyanuvākena juhuyāt

||7||

yamabhivyāhariṣyansyāttrirātrāvaraṃ brahmacaryaṃ caritvā gatvainamabhivyāharedbrahmaṇā tvā śapāmītyanuvākena

||8||

yaṃ dviṣyāttasya goṣṭhe svajamoṣadhīṃ nikhameduttuda śimijāvarītyanuvākena

||9||

api vā goṣṭhasyaiva dakṣiṇāṃ dvārbāhumetenaiva vicālayet

||10||

yadyudgātā puruṣasāma na gāyedadhvaryurevaitena sāmnodgāyedbhūrbhuvaḥ suvarityanuvākena

||11||

Viṃśī kaṇḍikā

avāntaradīkṣāṃ vyākhyāsyāmaḥ

||1||

parvaṇyudagayana āpūryamāṇapakṣasya vā puṇye nakṣatre keśaśmaśru vāpayitvāparāhṇe prācīmudīcīṃ vā diśamupaniṣkramya khile'cchadirdarśe'gnimupasamādhāya saṃparistīrya pūrvavadupākṛtya madantīrupaspṛśya prathamenānuvākena śāntiṃ kṛtvā catasra audumbarīḥ samidho ghṛtānvaktā abhyādadhāti pṛthivī samidityetairmantraiḥ

||2||

atha devatā upatiṣṭhate'gne vratapate vrataṃ cariṣyāmīti

||3||

athainaṃ sarveṣāmanuvākānāṃ prabhṛtīrabhivyāhārayati | prathamottamayorvā

||4||

uttamenānuvākena śāntiṃ kṛtvā tataḥ saṃmīlayati vācaṃ ca yacchati

||5||

athāsyāhatena vāsasā pradakṣiṇaṃ saṃmukhaṃ śiro veṣṭayitvāstamite grāmaṃ prapādayati

||6||

vāgyata etāṃ rātriṃ tiṣṭhatyāste vā

||7||

śvo bhūte khile'cchadirdarśe'gnimupasamādhāya saṃparistīryāthāsya ṣaṭtayamabhividarśayati | saptatayamityeke | agnimādityamudakumbhamaśmānaṃ vatsaṃ mahānagnām | hiraṇyaṃ saptamam

||8||

api vāditastrīṇi vidarśayitvā yathopapātamitarāṇi

||9||

atraitadvāso gurave dattvā vayaḥ suparṇā ityādityamupatiṣṭhate

||10||

athāsya brahmacaryamadhi

||11||

nitye

||12||

na naktaṃ bhuñjīta

||13||

yadi bhuñjītāpajvalitam

||14||

na mṛnmayaṃ prati dhayīta

||15||

na striyā na śūdreṇa saṃbhāṣeta

||16||

nopānahau na chattram

||17||

na cakrīvadārohet

||18||

na gatāsumīkṣet | na snāyāt

||19||

aṣṭamyaḥ parvāṇi copavasedvāgyataḥ

||20||

na ca saṃviśet

||21||

Ekaviṃśī kaṇḍikā

saṃvatsarametadvrataṃ caret | etasminneva saṃvatsare'dhīyīta

||1||

yadyetasminsaṃvatsare nādhīyīta yāvadadhyayanametadvrataṃ caret

||2||

saṃvatsare paryavete khile 'cchadirdarśe'gnimupasamādhāya saṃparistīrya pūrvavadvisṛjya madantīrupaspṛśya prathamenānuvākena śāntiṃ kṛtvāvṛttairmantraiḥ samidha ādhāyāvṛttairdevatā upasthāyottamenānuvākena śāntiṃ kṛtvā gurave varaṃ dattvā keśaśmaśru vāpayate

||3||

athāsya svādhyāyamadhi nitye

||4||

nānutsṛṣṭādhyāyo'dhīyīta

||5||

na naktam

||6||

nātidoṣamabrahmacaryamāpadya na māṃsaṃ khāditvā na keśaśmaśrulomanakhāni vāpayitvā na keśānprasādhya na dataḥ prākṣālya

||7||

nākto nābhyakto nārdro nārdre nānavavṛṣṭe nābhre na chāyāyāṃ na paryāvṛtta āditye na haritayavānprekṣamāṇo na grāmyasya paśorante nāraṇyasya nāpāmante

||8||

nāśṛtamutpatitaṃ na lohitaṃ dṛṣṭvā | na harmyāṇi na śarīrāṇi na śavaṃ nāpapātram

||9||

adhyeṣyamāṇaḥ prācīmudīcīṃ vā diśamupaniṣkramya khile'cchadirdarśe'gnimupasamādhāya saṃparistīrya madantīrupaspṛśya prathamenānuvākena śāntiṃ kṛtvāpareṇāgniṃ darbheṣvāsīno darbhāndūrvā vā dhārayamāṇaḥ parācīnamadhīyīta

||10||

varaṃ vā dattvopāsane

||11||

adhyeṣyamāṇo nānyā vāco vadet

||12||

yatra kvacāśāntikṛtaṃ paśyetpunareva śāntiṃ kṛtvādhīyīta

||13||

adhītya cottamena

||14||

na pravargyāyopaniṣkramyāpraviśyānyadadhīyītānyadadhīyīta

||15||