Ekaviṃśaḥ praśnaḥ — Āpastambaśrautasūtram

Kaṇḍikā	Sūtras
Prathamā kaṇḍikā	20
Dvitīyā kaṇḍikā	20
Tṛtīyā kaṇḍikā	13
Caturthī kaṇḍikā	18
Pañcamī kaṇḍikā	16
Ṣaṣṭhī kaṇḍikā	19
Saptamī kaṇḍikā	17
Aṣṭamī kaṇḍikā	12
Navamī kaṇḍikā	15
Daśamī kaṇḍikā	14
Ekādaśī kaṇḍikā	13
Dvādaśī kaṇḍikā	11
Trayodaśī kaṇḍikā	22
Caturdaśī kaṇḍikā	15
Pañcadaśī kaṇḍikā	24
Ṣoḍaśī kaṇḍikā	21
Saptadaśī kaṇḍikā	19
Aṣṭādaśī kaṇḍikā	12
Ekonaviṃśī kaṇḍikā	20
Viṃśī kaṇḍikā	8
Ekaviṃśī kaṇḍikā	18
Dvāviṃśī kaṇḍikā	14
Trayoviṃśī kaṇḍikā	14
Caturviṃśī kaṇḍikā	12
Pañcaviṃśī kaṇḍikā	13

Prathamā kaṇḍikā

dvādaśāhena praiva jāyate'bhi svargaṃ lokaṃ jayatyeṣu lokeṣu pratitiṣṭhati

||1||

sāgnicityo bhavati

||2||

sattramahīnaśca

||3||

dīkṣitamadīkṣitā yājayeyurahīne | eta evartvijo yajamānaśca sattre

||4||

tasmāddvādaśāhena na yājyaṃ pāpmano vyāvṛttyā iti vijñāyate

||5||

ṛdhnoti yo dvādaśāhena yajate

||6||

ṛdhnoti yaḥ pratigṛhṇātītyeke

||7||

ṛtvijo yajamānaṃ cādhikṛtya vadati

||8||

pīvā dīkṣate | kṛśo yajate | yadasyāṅgānāṃ mīyate juhotyeva taditi vijñāyate

||9||

yo'tapasvī syādasaṃśliṣṭo'sya yajñaḥ syāt | tapasvī syāt | yajñameva tatsaṃśleṣayata iti vijñāyate

||10||

eko dvādaśāhena yajeta | trayaḥ ṣaḍ dvādaśa trayodaśa vā

||11||

teṣāmupasatsu trayodaśaṃ dīkṣayanti

||12||

tasmāddvādaśāhe trayodaśena na brahmaṇā bhavitavyamityeke

||13||

||14||

aparimitā dīkṣerannityantato vadati

||15||

ye'nye saptadaśabhyo vādā ahīna eva te sthāninaḥ

||16||

saptadaśānāmeva yāthākāmī

||17||

sarve yājamāne sthāninaḥ

||18||

sarve yājamānaṃ kuryuryatkiṃcārtvijyenāvibādhakam

||19||

vibādhamāna ārtvijyaṃ balīyaḥ

||20||

Dvitīyā kaṇḍikā

sarva iṣṭaprathamayajñāḥ | api vā gṛhapatireva

||1||

gṛhapatereva parārthāni yathā yūpāñjanamṛtuyājyeti

||2||

gṛhapatereva sāmidhenīkalpenāvadānakalpeneti prakrāmeyuryāni cānyānyevaṃrūpāṇi syuḥ

||3||

tvaṃ varuṇa iti vasiṣṭharājanyānāṃ paridhānīyā

||4||

ājuhotetītareṣāṃ gotrāṇām

||5||

nārāśaṃso dvitīyaḥ prayājo vasiṣṭhaśunakānām

||6||

tanūnapāditareṣāṃ gotrāṇām

||7||

śiśire dīkṣante vasanta uttiṣṭhanti

||8||

śiśire vā etasya prayāṇaṃ vasanta utthānam

||9||

ṛdhnoti ya evaṃvidvāñśiśire dīkṣate vasanta uttiṣṭhata iti vijñāyate

||10||

ṣaḍ vyuṣṭāścaitrasyāpūryamāṇapakṣasyātha dīkṣeran

||11||

sāvitrāṇi hoṣyamāṇā nirmathya saṃnivaperan | tato vinivaperan

||12||

pañcapaśubhiryakṣyamāṇāḥ saṃnivaperan | tato vinivaperan

||13||

dīkṣiṣyamāṇāḥ saṃnivaperan

||14||

teṣāmetatsaṃnyuptā evāgnayo bhavantyodavasānīyāyāḥ

||15||

adhvaryurgṛhapatiṃ dīkṣayitvā brahmāṇaṃ dīkṣayati | tata udgātāram | tato hotāram

||16||

tatastaṃ pratiprasthātā dīkṣayitvārdhino dīkṣayati

||17||

tatastaṃ neṣṭā dīkṣayitvā tṛtīyino dīkṣayati

||18||

tatastamunnetā dīkṣayitvā pādino dīkṣayati

||19||

tatastaṃ pratiprasthātā dīkṣayati

||20||

Tṛtīyā kaṇḍikā

anyo vā brāhmaṇaḥ

||1||

dīkṣita ā tantrībhāvādekaikamapavarjayati

||2||

evamanupūrvā evaiṣāṃ yājamānā dharmā ye kecāvibhavinaḥ

||3||

nānāgotravyavāyādeva samānagotrāṇāmārṣeyavaraṇamabhyāvartetetyekam | vyavete'pi tantramevetya param

||4||

sadyo dīkṣāmeke samāmananti | anvahaṃ dīkṣāmeke

||5||

dvyahe dīkṣeta tryahe dīkṣetetyevaṃ krāmatyā dvādaśāhāt

||6||

upadīkṣamāṇe sarvaṃ sadīkṣaṇīyamāvartetetyāśmarathyaḥ

||7||

agnīnupanyupyātmasaṃskāreṇaiva pratipadyeta tantramāhutayaḥ syurityālekhanaḥ

||8||

patnīnāmeva sthāne patnīrdīkṣayanti

||9||

tāsāṃ yājamānaireva dharmānupūrvyaṃ vyākhyātam

||10||

adhvaryuṃ dīkṣitā anvārabhante | dīkṣitānpatnayaḥ

||11||

atha samanvārabdheṣu gārhapatye juhotyapaitu mṛtyuramṛtaṃ na āganvaivasvato no abhayaṃ kṛṇotu | parṇaṃ vanaspaterivābhi naḥ śīyatāṃ rayiḥ | sacatāṃ naḥ śacīpatiḥ svāheti

||12||

ṛte patnībhya itarayoḥ

||13||

Caturthī kaṇḍikā

paraṃ mṛtyo anu parehi panthāṃ yaste sva itaro devayānāt | cakṣuṣmate śṛṇvate te bravīmi mā naḥ prajāṃ rīriṣo mota vīrāniti dakṣiṇāgnau

||1||

idamū nu śreyo'vasānamāganma yadgojiddhanajidaśvajidyat | parṇaṃ vanaspaterivābhi naḥ śīyatāṃ rayiḥ | sacatāṃ naḥ śacīpatiḥ svāhetyāhavanīye

||2||

dvādaśāhaṃ dīkṣitā bhavanti

||3||

na sanīhārānprahiṇvanti sattre

||4||

prāyaṇīyayā pracarya rājānaṃ krītvopanahya nidadhāti dvādaśāhāyāptam

||5||

ṣoḍaśivatsomakrayaṇī

||6||

upasatsu dvādaśāhe saṃbhārayajūṃṣi vyācaṣṭe

||7||

yajamānaṃ vācayatītyeke

||8||

dvādaśopasadaḥ

||9||

caturahaṃcaturahamekaikenopasanmantreṇa juhoti

||10||

anūpasadamagniṃ cinoti

||11||

dvyahaṃdvyahamekaikā citiḥ

||12||

caturahamuttamā

||13||

catustanaṃ tristanaṃ dvistanamekastanamiti tryahaṃ tryahaṃ vratāni

||14||

ya eṣāṃ vratamicchedabhipūrayituṃ dadhna ekaṃ sruvamunnīya nāparamunnayeta

||15||

ekaviṃśaticchadiḥ sadaḥ

||16||

saṃtṛṇe adhiṣavaṇa phalake bhavataḥ

||17||

ṛjurupavasathaḥ

||18||

Pañcamī kaṇḍikā

śvo bhūte pratāyate jyotiṣṭomaḥ

||1||

vaiśvānaraḥ prāyaṇīyo'tirātraḥ

||2||

samānamā rājña upāvaharaṇāt

||3||

yāvantamekasmā ahna āptaṃ manyate

||4||

tamanyasminvāsasyupanahya pratyupanahyetaramupāvaharati

||5||

evamaharahastantramagneryogavimokau

||6||

prathame'hani yunakti | uttame vimuñcati

||7||

anvahameke yogavimokau samāmananti

||8||

dakṣiṇākāle'nvahaṃ dvādaśāni śatāni dadātyahīne

||9||

sattre tu dākṣiṇau homau hutvedamahaṃ māṃ kalyāṇyai kīrtyai svargāya lokāya dakṣiṇāṃ nayāmīti yajamānāḥ kṛṣṇājināni dhūnvanta udañco dakṣiṇāpathenātiyanti

||10||

evamaharahaḥ

||11||

uttama evāhani sakhyāni visṛjante

||12||

kṛṣṇaviṣāṇāśca pravidhyanti

||13||

pūrvasminnevāhanyuttarasmā ahne vasatīvarīryajñāyajñiyaṃ prati gṛhṇāti

||14||

vartamāna evātirātra uttarasmā ahne payāṃsi viśāsti

||15||

yatra maitrāvaruṇasyābhijānāti śvaḥsutyāmindrāgnibhyāṃ viśvebhyo devebhyo brāhmaṇebhyaḥ somyebhyaḥ somepebhyaḥ somaṃ prabrūtātsubrahmaṇya subrahmaṇyāmāhvayeti

||16||

Ṣaṣṭhī kaṇḍikā

tadāgnīdhra āgnīdhrāgāraṃ praviśya saṃpreṣyati śvaḥsutyāmindrāgnibhyāṃ viśvebhyo devebhyo brāhmaṇebhyaḥ somyebhyaḥ somapabhyaḥ somaṃ prabravīmi subrahmaṇya subrahmaṇyāmāhvayeti

||1||

sa vai khalu śvaḥsutyāmiti brūyādityāśmarathyaḥ | adyasutyāmityālekhanaḥ

||2||

tata ūrdhvaṃ śvaḥsutyāmityeva brūyāt

||3||

patnīsaṃyājāntamahaḥ saṃtiṣṭhate

||4||

saṃsthite'hani brahmā vācaṃ visṛjate

||5||

pariharanti patnībhya udakam

||6||

yanti samiddhārāḥ

||7||

etyāhavanīye'bhyādadhati

||8||

evamaharahaḥ

||9||

tadānīmeva trivṛtamagniṣṭomaṃ rathaṃtarasāmānamupayanti

||10||

rathaśabdena māhendrasya stotramupākaroti

||11||

śabdo mantrasthāne bhavati

||12||

śvo bhūte pañcadaśamukathyaṃ bṛhatsāmānamupayanti

||13||

dundubhiśabdena māhendrasya stotramupākaroti

||14||

yadyu vai stanayitnuḥ syātsa eva syācchabdo mantrasthāne

||15||

śvo bhūte saptadaśamukathyaṃ vairūpasāmānamupayanti

||16||

barhiḥ sthāna ādhāvena māhendrasya stotramupākaroti

||17||

upākṛtaṃ sāmāprastutaṃ bhavati

||18||

athodgātādhāvenādhūnute

||19||

Saptamī kaṇḍikā

śvo bhūta ekaviṃśaṃ ṣoḍaśinaṃ vairājasāmānamupayanti

||1||

nyūṅkhyametadaharbhavati

||2||

barhiḥsthāne'raṇībhyāṃ māhendrasya stotramupākaroti

||3||

upākṛtaṃ sāmāprastutaṃ bhavati

||4||

athodgāturdakṣiṇamūrumavakābhiḥ pracchādya tasminnagniṃ manthati

||5||

taṃ jātamudgātābhihiṅkṛtya prastotre prayacchati | taṃ so'dhvaryave

||6||

tamadhvaryuruttareṇa dhiṣṇiyānparyāhṛtyāhavanīye prahṛtya preddho agne dīdihīti virājābhijuhoti

||7||

śvo bhūte triṇavamukathyaṃ śākvarasāmānamupayanti

||8||

barhiḥsthāne'dbhiravakāvāstābhirmāhendrasya stotramupākaroti

||9||

upākṛtaṃ sāmāprastutaṃ bhavati

||10||

atha tisraḥ saharṣabhā agreṇa sado'pareṇāgnīdhramudīcīnaṃ dakṣiṇāpathenātiyanti

||11||

śvo bhūte trayastriṃśamukathyaṃ raivatasāmānamupayanti

||12||

nyūṅkhyametadaharbhavati

||13||

svayamadhvaryurṛtuyājaṃ yajati | svayaṃ gṛhapatiḥ

||14||

adhvaryū yajataṃ gṛhapate yajetyabhijñāyādhvaryurhavirdhānaṃ praviśya praiṣottarayarcā yajati | ṛguttareṇa vā praiṣeṇa

||15||

aśvinā pibataṃ sutaṃ dīdyagnī śucivratā | ṛtunā yajñavāhasā | ṛtunā somaṃ pibataṃ vauṣaḍiti yadyavyūḍhaḥ

||16||

byūḍhe tvarvāñcamadya yayyaṃ nṛvāhaṇaṃ rathaṃ yuñjāthāmiha vāṃ vimocanam | pṛṅktaṃ havīṃṣi madhunā hi kaṃ gatamathā somaṃ pibataṃ vājinīvasū | ṛtunā somaṃ pibataṃ vauṣaḍiti tasya pracaritaṃ marutvatīyairbhavati

||17||

Aṣṭamī kaṇḍikā

agṛhīto māhendraḥ

||1||

atha pratiprasthātottareṇāgnīdhramudīcīṃ tantiṃ vitatya tasyāṃ vatsānbadhnāti

||2||

dakṣiṇena mārjālīyaṃ mātṝruparundhanti

||3||

barhiḥsthāne 'dbhirdūrvāvāstābhirmāhendrasya stotramupākaroti

||4||

upākṛtaṃ sāmāprastutaṃ bhavati

||5||

athaitānvatsānmātṛbhiḥ saṃsṛjya sāṃvāśinaṃ kurvanti

||6||

tā agreṇa sado'pareṇāgnīdhramudīcīnaṃ dakṣiṇāpathenātivicchayanti

||7||

saṃtiṣṭhate pṛṣṭhyaḥ ṣaḍahaṇ

||8||

saṃsthite ghṛtaṃ madhu vā prāśnanti

||9||

yathohuṣo vahaṃ pratyañjyāttādṛktaditi vijñāyate

||10||

tatastrīṃśchandomānukathyānanvahamupayanti | caturviṃśaṃ catuścatvāriṃśamaṣṭācatvāriṃśamiti

||11||

rathaṃtarasāmā prathamaḥ | bṛhadrathaṃtarasāmā dvitīyaḥ | bṛhatsāmā tṛtīyaḥ

||12||

Navamī kaṇḍikā

tato daśamamaharavivākyamupayanti | caturviṃśamagniṣṭomaṃ rathaṃtarasāmanam

||1||

nātra kaścana kasmaicanopahatāya vyāhate

||2||

ye bāhyā dṛśīkavaḥ syuste vibrūyuḥ

||3||

yadi tatra na vindeyurantaḥsadasādvyucyam

||4||

yadi tatra na vindeyurgṛhapatinā vyucyam

||5||

tadvyucyamevetyantato vadati

||6||

anuṣṭubhā vyāheti vijñāyate

||7||

anuṣṭubhamuktvātha tadbrūyāt

||8||

yasminnupahataḥ syādanuṣṭubhā vā etatsaṃpādayati

||9||

dvayīretadahaḥ samidha āharanti | nityā audumbarīśca

||10||

abhyādadhati nityāḥ

||11||

uttareṇāhavanīyamaudumbarīrupasādayanti

||12||

atha samanvārabdheṣu dvābhyāṃ gārhapatye juhoti | amūryā upa sūrye yābhirvā sūryaḥ saha | tā no hinvantvadhvaram | iha ratiriha rantiriha ramatiriha ramadhvamiha vo ramatiḥ svāheti

||13||

upasṛjandharuṇamityetābhyāmathāhavanīyaṃ gatvā

||14||

aticchandasopatiṣṭhante'yaṃ sahasramānavo dṛśaḥ kavīnāṃ matirjyotirvidharmā | bradhnaḥ samīcīruṣasaḥ samairayat | arepasaḥ samokasaḥ sacetasaḥ saretasaḥ svasare manyumantaścidākoriti

||15||

Daśamī kaṇḍikā

tataḥ prājāpatyāya manograhāya saṃprasarpanti

||1||

prasṛpteṣūpāṃśupātreṇa gṛhṇātyanayā tvā pṛthivyā pātreṇa samudraṃ rasayā prajāpataye juṣṭaṃ gṛhṇāmīti

||2||

ākāśādgṛhṇīyādityekam | tārtīyasavanikasya somasya pariśāyayedyāvantamekasmai camasagaṇāya sagrahāyāptaṃ manyetetyaparam

||3||

manasā stotropākaraṇaḥ prastāva udgīthaḥ pratihāraśca

||4||

manasā tisṛṇāṃ sarparājñīnāṃ ṣaṭkṛtvaḥ pratigṛṇāti yadyardharcaśaḥ śaṃsati | navakṛtvo yadi pacchaḥ

||5||

hotā caturhotṝnvyācaṣṭe

||6||

omiti daśahotuḥ pratigaraḥ | tatheti caturhotuḥ | omiti pañcahotuḥ | tatheti ṣaḍḍhotuḥ | arātsma hotariti saptahotuḥ

||7||

manasāśrutapratyāśrute yājyā vaṣaṭkārānuvaṣaṭkārau ca

||8||

manasā hutvā harati bhakṣam

||9||

te yatsamīkṣante sa samupahavaḥ

||10||

manasā bhakṣayanti

||11||

brahmavādyaṃ vadantīti vijñāyate

||12||

viniviśya kathā syādityekam | gṛhapatimeva mahartvijaḥ paryupaviśya pṛccheyurityaparam

||13||

tamadhvaryuḥ pṛcchati

||14||

Ekādaśī kaṇḍikā

yaddaśahotāraḥ sattramāsata kena te gṛhapatinārdhnuvankena prajā asṛjanteti

||1||

prajāpatinā vai te gṛhapatinārdhnuvaṃstena prajā asṛjanteti prativacanaḥ

||2||

brahmā pṛcchati yaccaturhotāraḥ sattramāsata kena te gṛhapatinārdhnuvankenauṣadhīrasṛjanteti

||3||

somena vai te gṛhapatinārdhnuvaṃstenauṣadhīrasṛjanteti prativacanaḥ

||4||

hotā pṛcchati yatpañcahotāraḥ sattramāsata kena te gṛhapatinārdhnuvankenaibhyo lokebhyo 'surānprāṇudanta kenaiṣāṃ paśūnavṛñjateti

||5||

agninā vai te gṛhapatinārdhnuvaṃstenaibhyo lokebhyo'surānprāṇudanta tenaiṣāṃ paśūnavṛñjateti prativacanaḥ

||6||

hotrakāḥ pṛcchanti yatṣaḍḍhotāraḥ sattramāsata kena te gṛhapatinārdhnuvankenartūnakalpayanteti

||7||

dhātrā vai te gṛhapatinārdhnuvaṃstenartūnakalpayanteti prativacanaḥ

||8||

udgātā pṛcchati yatsaptahotāraḥ sattramāsata kena te gṛhapatinārdhnuvankena suvarāyankenemāṃllokānsamatanvanniti

||9||

aryamṇā vai te gṛhapatinārdhnuvaṃstena suvarāyaṃstenemāṃllokānsamatanvanniti prativacanaḥ

||10||

api vā yade vaitattuṣṇīkaṃ mānasaṃ tasyaiṣa vādaḥ

||11||

yadvā hotā caturhotṝnvyācaṣṭe

||12||

prajāpatiṃ parivadantīti vijñāyate

||13||

Dvādaśī kaṇḍikā

akuśalo vā ayaṃ prajāpatiryo daṃśamaśakānsasṛje ya stenāniti prajāpatiparivādaḥ

||1||

api vā prajāpatiparivādānmantrānadhīyate

||2||

te pratyetavyāḥ | yadaraṇyāni prajāpatiḥ puraśca sasṛje girīn | kartāni ca na tadbhadraṃ yadbhadraṃ tanma āsuva | yadūṣā tamasā yuktā dine tekṣṇiṣṭhamātapat | ambhaścātyati gharmaśca tathā tapte prajāpateḥ | yatstenānyadvṛkāndaṃśānmaśakānyadaghāyavaḥ | tadu te vṛjinaṃ tvetadvratametanna me matam | prajāpatiṃ daśamamaharbhajadhvaṃ matiṃ kavīnāmṛṣabhaṃ janānām | sa suṣṭutiṃ sudraviṇaṃ dadhānaḥ pūto vipāpmā vijahāti loka iti

||3||

atha varaṃ vṛṇīte'do no'stviti yatkāmayate | uta vai brāhmaṇo'nekakāmo bhavati

||4||

bhūrbhuvaḥ suvaḥ suprajāḥ prajayā bhūyāsaṃ suvīro vīraiḥ suvarcā varcasā supoṣaḥ hpoṣairityetadvidadhāti

||5||

caturhotṝnvyākhyāya dvārau saṃvṛtya yathādhiṣṇiyaṃ patnīrvyāsādyāthābhyo vācamupākaroti

||6||

iha dhṛtiriha svadhṛtiriha rantiriha ramatirityaudumbarīṃ pariṣvajyodarairupaspṛśanto vāgyatāstiṣṭhanti

||7||

adhivṛkṣasūrye prāñcaḥ samanvārabdhāḥ sarpanti

||8||

yuvaṃ tamindrāparvatā puroyudhā yo naḥ pṛtanyādapa taṃtamiddhataṃ vajreṇa taṃtamiddhatam | dūre cattāya chantsadgahanaṃ yadinakṣat | asmākaṃ śatrūnpari śūra viśvato darmā darṣīṣṭa viśvata ityuttareṇa havirdhānaṃ dakṣiṇairhastaiḥ kaṭāṃstejanīrvā niṣevamāṇāḥ prāñco gatvā pañca vacāṃsi vyāharanti vāgvāgaitu vāgupaitu vāk samaitūpa maitu vāgbhūrbhuvaḥ suvariti

||9||

ahnā rātriṃ dhyātvādhivṛkṣasūrye subrahmaṇyayā vācaṃ visṛjyaudumbarīḥ samidha ādadhāti

||10||

saṃtiṣṭhate daśamamahaḥ

||11||

Trayodaśī kaṇḍikā

prāyaṇīyavadudayanīyamupayanti

||1||

nātrāhīnasaṃtatayo bhavanti

||2||

yatpūrvasminnahanyuttarasmā ahne kriyate tā ahīnasaṃtatayaḥ

||3||

sattraṃ cedvapanakāle saśikhāni vapante

||4||

udavasānīyayeṣṭvānyānṛtvijo vṛtvā pṛṣṭhaśamanīyena yajante jyotiṣṭomenāgniṣṭomena sahasradakṣiṇena

||5||

atha grahakḷptiḥ

||6||

prāyaṇīyodayanīyayordaśame'hanniti pṛśniprāṇagrahāngṛhṇāti | vyatiṣaṅgaṃ somamānaiḥ

||7||

prākṛtaṃ yajurmānamanudrutya vāyurasi prāṇo nāmeti daśabhiḥ pṛśnigrahāṇāṃ mantrairdaśa mānāni mimīte

||8||

uttaraṃ yajurmānamanudrutyāyaṃ puro bhuva iti daśabhiḥ prāṇagrahāṇāṃ mantrairdaśa mānāni mimīte

||9||

evamuttarāṇi mānāni vyatiṣajati

||10||

navanavāṃśavo daśa mantrāḥ

||11||

api vā navabhirnavabhirmimīte

||12||

avaśiṣṭā vikalpārthāḥ

||13||

api vā mānamanudrutya pṛśnī atha prāṇena nivapet

||14||

atha prāṇaṃ mānaṃ pṛśnibhyāṃ nivapet

||15||

atha pṛśnī prāṇaṃ mānena nivapet

||16||

evaṃ vihitāvuttarau paryāyau

||17||

yaḥ prathamaḥ sa caturthaḥ | yo dvitīyaḥ sa pañcamaḥ

||18||

navanavāṃśūngṛhṇāti

||19||

uttareṣu triṣu pṛṣṭhāhaḥsu trīnatigrāhyāngṛhṇāti āgneyamekaviṃśa aindraṃ triṇave sauryaṃ trayastriṃśe

||20||

pūrvasmiṃstryahe vājasaneyinaḥ samāmananti

||21||

yatra gaurivītaṃ sāma tadbahūnatigrāhyāngṛhṇāti

||22||

Caturdaśī kaṇḍikā

tryanīkāṃ vyākhyāsyāmaḥ

||1||

aindravāyavāgnau prāyaṇīyodayanīyau daśamaṃ cāhaḥ

||2||

athetareṣāṃ navānāmaindravāyavāgraṃ prathamamahaḥ | atha śukrāgram | athāgrayaṇāgram

||3||

evaṃvihitā tristryanīkā parivartate yadyavyūḍhaḥ

||4||

||5||

atha paśukḷptiḥ

||6||

āgneyaṃ prāyaṇīya ālabhante | śvo bhūte sārasvatīṃ meṣīm

||7||

evaṃvihitānaikādaśinānanvahamālabhante

||8||

āgneyamudayanīye | aindrāgnaṃ vā

||9||

sauryaṃ brahmavarcasakāmaḥ

||10||

yadi yūpaikādaśinī syādanvahamekaikaśo yūpānsaṃminuyāt | sarvānvaupavasathye

||11||

aharaharupaśaya upāvartate

||12||

agniṣṭha udayanīye paśumupākaroti

||13||

dvādaśāgniṣṭomā rathaṃtarasāmānaḥ

||14||

sa bharatadvādaśāhaḥ

||15||

Pañcadaśī kaṇḍikā

gavāmayanena prajāṃ bhūtiṃ bhūmānaṃ gacchantyabhi svargaṃ lokaṃ jayantyeṣu lokeṣu pratitiṣṭhanti

||1||

tasya dvādaśāhena sattrabhūtena kalpo vyākhyātaḥ

||2||

saptadaśaike dīkṣāḥ samāmananti

||3||

saṃvatsarāya dīkṣiṣyamāṇā ekāṣṭakāyāṃ dīkṣerannityuktam

||4||

caturahe purastātpaurṇamāsyai dīkṣeran

||5||

māghyā ityāśmarathyaḥ | caittryā ityālekhanaḥ

||6||

samānamā prāyaṇīyāt

||7||

prāyaṇīyamatirātramupetya caturviṃśamukathyamārambhaṇīyamupayanti

||8||

te dve śaye ahanī bhavataḥ

||9||

||10||

evaṃvihitāṃścaturo'bhiplavānupayanti | pṛṣṭyaṃ ṣaḍahaṃ samāse

||11||

evaṃ vihitānpañca māsānupayanti

||12||

tataḥ saṃbhāryam

||13||

trīnabhiplavān | pṛṣṭyaṃ ṣaḍaham | abhijitamagniṣṭomam | trīnparaḥsāmna ukthyānagniṣṭomānvā | pare dve śaye ahanī

||14||

iti ṣaṇmāsāḥ

||15||

tato viṣuvantamupayantyekaviṃśamagniṣṭomaṃ divākīrtyasāmānam

||16||

tasyodita āditye prātaranuvākamupākaroti

||17||

divākīrtyametadaharbhavati

||18||

uttare pakṣa āvṛttā gaṇā anyatra dvādaśāhīyāddaśarātrāt

||19||

tatastrīnarvāksāmna ukthyānupayanti | agniṣṭomānvā

||20||

viśvajitamagniṣṭomam

||21||

tāni catvāri śayānyahāni

||22||

āvṛttaṃ pṛṣṭyaṃ ṣaḍahamupetya caturo'bhiplavānāvṛttānsamāse

||23||

evaṃvihitānpañca māsānupayanti

||24||

Ṣoḍaśī kaṇḍikā

tataḥ saṃbhāryam

||1||

dvāvabhiplavau | goāyuṣī | dvādaśāhasya daśāhāni | parāṇi catvāri śayānyahāni | mahāvratamatirātraśca

||2||

iti dvādaśa māsāḥ

||3||

iti śāṭyāyanakam

||4||

atha tāṇḍakam

||5||

uttarasya pakṣasa upariṣṭādviśvajita āvṛttaṃ pṛṣṭyaṃ ṣaḍahamupetya trīnabhiplavānāvṛttān

||6||

tāni saha pūrvairaṣṭāviṃśatiḥ śayānyahāni

||7||

āvṛttaṃ pṛṣṭhyaṃ ṣaḍahamupetya caturo'bhiplavānāvṛttānsamāse

||8||

evaṃvihitāṃścaturo māsānupayanti

||9||

tataḥ saṃbhāryau

||10||

trayo'bhiplavā āyurgaurdvādaśāhasya daśāhāni

||11||

parāṇyaṣṭāviṃśatiḥ śayānyahāni mahāvratamatirātraśca

||12||

iti dvādaśa māsāḥ

||13||

iti tāṇḍakam

||14||

atha bhāllavikam

||15||

pūrvasya pakṣasaḥ purastāduttamātpṛṣṭhyādabhijitamagniṣṭomam

||16||

uttarasya pakṣasa upariṣṭātprathamātpṛṣṭhyādviśvajitamagniṣṭomam

||17||

samānamitaracchāṭyāyanakena

||18||

api vā saṃvatsaraṃ saṃpādyottame māsi dvādaśāhīye daśarātre sakṛtpṛṣṭhānyupeyuḥ

||19||

tatra pṛṣṭhyānāṃ sthāne'bhiplavā nidhīyeran

||20||

upariṣṭāddvādaśāhīyāddaśarātrānmahāvratam

||21||

Saptadaśī kaṇḍikā

tato mahāvratamupayanti pañcaviṃśamagniṣṭomam

||1||

anu ślokena stuvate

||2||

navabhiraindrībhirapratihṛtābhiradhvaryurudgāyati | na vā

||3||

bhadraṃ sāma patnaya upagāyanti

||4||

tasya pracaritaṃ marutvatīyairbhavati

||5||

agṛhīto māhendraḥ

||6||

atha pratiprasthātā mahāvratikāni śilpāni vyāyātayati

||7||

audumbarasya vīṇādaṇḍasya daśātimathitāni

||8||

ekaikasminnatimathite daśadaśa mauñjāṃstantūnpravayati

||9||

sa vāṇaḥ śatatantuḥ

||10||

athaikeṣām | bhūstrayastriṃśattantava iti trayastriṃśatamadhvaryuḥ pratanoti | bhuvastrayastriṃśattantava iti trayastriṃśataṃ hotā | suvastrayastriṃśattantava iti trayastriṃśatamudgātā | gṛhapatiruttamam

||11||

audumbarīmāsandīmudgātra upanidadhāti mauñjavivānāmadhyadhi hotṛṣadane

||12||

audumbaraṃ pleṅkhaṃ hotre prabadhnāti mauñjyā rajjvā

||13||

audumbare phalake adhvaryava upanidadhāti | kūrcau vā

||14||

kūrceṣu hotrakā upagātāraḥ patnaya ityāsate

||15||

nikalpante patnayo'pāghāṭalikāstambalavīṇāḥ piccholā iti

||16||

nikalpante vīṇāvādāḥ śaṅkhānnāl̤īstūṇavāniti

||17||

nikalpete brahmacārī puṃścalī cāgreṇa sadaso dakṣiṇāṃ dvārbāhumārtiṣyamāṇau

||18||

uttarasyāṃ vediśroṇyāṃ puṃścalyai māgadhāya ca pariśrayanti

||19||

Aṣṭādaśī kaṇḍikā

dikṣu dundubhīnprabadhnanti | sraktiṣu vā mahāvedeḥ

||1||

apareṇāgnīdhraṃ bhūmidundubhimavaṭaṃ khananti | ardhamantarvedyardhaṃ bahirvedi

||2||

tamārdreṇa carmaṇottaralomnābhivitatya śaṅkubhiḥ pariṇihatyātraitatpucchakāṇḍamāhananārthaṃ nidadhāti

||3||

agreṇāgnīdhraṃ śūdrāryau nikalpete carmakarte vyāyaṃsyamānau

||4||

uttareṇāgnīdhraṃ kaṭasaṃghāte tejanasaṃghāte vārddraṃ carma vyadhanārthaṃ vitatyocchrayanti

||5||

agreṇāhavanīyaṃ ratheṣu kavacinaḥ saṃnahyante

||6||

mārjālīyanyante'ṣṭau dāsakumārya udakumbhairnikalpante

||7||

vāgbhadraṃ mano bhadraṃ māno bhadraṃ tanno bhadramiti triḥ parvayet

||8||

kaṭaśalākayekṣukāṇḍena veṇukāṇḍena vetasakāṇḍena vā vāṇaṃ saṃhrādya tena māhendrasya stotramupākaroti

||9||

udgātā vādayatīti vijñāyate

||10||

tamudgātā prastotre prayacchati | taṃ so'dhvaryave | tamadhvaryuranyasmai

||11||

taṃ so'greṇa sadaso dakṣiṇāṃ dvārbāhuṃ prativādayannāste

||12||

Ekonaviṃśī kaṇḍikā

upākṛte māhendrasya stotre sarvā vāco vadanti

||1||

utkrodaṃ yajamānāḥ kurvate

||2||

apāghāṭalikāstambalavīṇāḥ piccholā iti patnayo vādayanti

||3||

saṃpravadanti vīṇāvādāḥ śaṅkhānnāl̤īstūṇavāniti

||4||

ṛtīyete brahmacārī puṃścalī ca dakṣiṇāṃ dvārbāhumāśliṣyamāṇau

||5||

saṃvarttete puṃścalīmāgadhaśca

||6||

ājiṃ dhāvanti

||7||

dundubhīnsamāghnanti | pucchakāṇḍena bhūmidundubhim

||8||

śūdrāryau carmakarte vyāyacchete ārdre śvete parimaṇḍale | antarvedi brāhmaṇo bahirvedi śūdraḥ

||9||

ākrośati śūdraḥ | praśaṃsati brāhmaṇaḥ

||10||

ime'rātsurime subhūtamakranniti brāhmaṇaḥ | ima udvāsīkāriṇa ime durbhūtamakranniti śūdraḥ

||11||

taṃ brāhmaṇaḥ saṃjityāgnīdhre carmādhyasyati

||12||

vipariyāntyetaccarma kavacinaḥ

||13||

teṣāmekaikaṃ saṃśāsti māparātsīrmātivyātsīriti

||14||

tate viddhyā nātipātayanti

||15||

rājaputrā vidhyantītyekeṣām

||16||

udañco'parimitamadhvānaṃ yātvā pratyāyāya vimuñcanti

||17||

atraitā dāsakumārya udakumbhānadhinidhāya triḥ pradakṣiṇaṃ mārjālīyaṃ parinṛtyanti dakṣiṇānpado nighnantīridaṃmadhuṃ gāyantyaḥ

||18||

idameva sāraghaṃ madhvayaṃ somaḥ suto iha | tasyeha piba tātṛpurhaimahā idaṃ madhvidaṃ madhvityeva gāyeyurityāśmarathyaḥ

||19||

athālekhanaḥ

||20||

Viṃśī kaṇḍikā

hillukāṃ dve gāyetām | himbinīṃ dve | hastāvārāṃ dve | saṃvatsaragāthāṃ dve

||1||

||2||

||3||

haimahā idaṃ madhu hillu hillviti sarvāsāmṛganteṣu samayaḥ

||4||

atraitā dāsakumārya udakumbhānupaninīya yathārthaṃ gacchanti

||5||

māhendrasya stutamanu ghoṣāḥ śāmyanti

||6||

arkaḥ pavitraṃ rajaso vimānaḥ punāti devānāṃ bhuvanāni viśvā | dyāvāpṛthivī payasā saṃvidāne ghṛtaṃ duhāte amṛtaṃ prapīne | pavitramarko rajaso vimānaḥ punāti devānāṃ bhuvanāni viśvā | suvarjyotiryaśo mahadaśīmahi gādhamuta pratiṣṭhāmiti phalake kūrcau vādhiruhyādhvaryuḥ śastraṃ pratigṛṇāti

||7||

saṃtiṣṭhate mahāvratam

||8||

Ekaviṃśī kaṇḍikā

vyākhyāta udayanīyaḥ pṛṣṭhaśamanīyaśca

||1||

atha grahakḷptiḥ

||2||

triṣu paraḥsāmasu trīnatigrāhyāngṛhṇāti

||3||

upayāmagṛhīto'syadbhyastvauṣadhībhyo juṣṭaṃ gṛhṇāmīti prathame'hani gṛhṇāti | oṣadhībhyastvā prajābhya iti dvitīye | prajābhyastvā prajāpataya iti tṛtīye

||4||

etānevāvṛtānarvāksāmasu

||5||

tānūrdhvānāvṛttāṃśca viṣuvati

||6||

teṣāṃ madhye sauryamudu tyaṃ jātavedasamiti

||7||

etasminnevāhani vaiśvakarmaṇamatigrāhyāṇāmaṣṭamaṃ gṛhṇāti vācaspatiṃ viśvakarmāṇamūtaya iti

||8||

śvo bhūta ādityaṃ mahīmū ṣu mātaramiti

||9||

tāvevameva vyatyāsaṃ gṛhṇātyā mahāvratāt

||10||

tau saha mahāvrate | prājāpatyaṃ ca pañcapātram

||11||

trayastriṃśatametadaharatigrāhyāngṛhṇāti

||12||

daśāgneyā daśaindrā daśa sauryā vaiśvakarmana ādityaḥ pañcapātra iti trayastriṃśat

||13||

atigrāhyāyatane catvāryatigrāhyapātrāṇi pratidiśaṃ nihitāni bhavanti | madhye pañcamam

||14||

pūrvārdhe gṛhṇāti

||15||

indramidgāthina ityanudrutyopayāmagṛhīto'sīndrāya tvārkavate juṣṭaṃ gṛhṇāmīti gṛhītvaiṣa te yonirindrāya tvārkavata iti sādayati

||16||

evaṃ sarvatra grahanasādanau saṃnamati

||17||

abhi tvā śūra nonuma iti dakṣiṇārdhe

||18||

Dvāviṃśī kaṇḍikā

imā nu kaṃ bhuvanā sīṣadhemendraśca viśve ca devāḥ | yajñaṃ ca nastanvaṃ ca prajāṃ cādityairindraḥ saha sīṣadhātu | ādityairindraḥ sagaṇo marudbhirasmabhyaṃ bheṣajā karaditi paścārdhe

||1||

tvāmiddhi havāmaha ityuttarārdhe

||2||

tadidāsa bhuvaneṣu jyeṣṭhaṃ yato yajña ugrastveṣanṛmṇaḥ | sadyo jajñāno ni riṇāti śatrūnanu yaṃ viśve madantyūmā iti madhyame

||3||

tānanyasminpātra ānīya sarvānmadhyame gṛhṇāti tve kratumapi vṛñjanti viśva iti

||4||

athaikeṣām | yannānā juhuyādātmano 'ṅgāni vicchindyāt | yatsamāhṛtyāhutīḥ saṃrundhyāttadanu yajamānāḥ saṃrundhyeran | stokā evātmanpratyānīya hotavyāḥ | pratyahāṅgāni dadāti nāhutīḥ saṃruṇaddhi na yajñaṃ vicchinattīti vijñāyate

||5||

taṃ bhakṣayati mahaste bhakṣayāmi bargaṃ te bhakṣayāmi bhujaṃ te bhakṣayāmyannādyaṃ te bhakṣayāmīti

||6||

tryanīkāṃ vyākhyāsyāmaḥ

||7||

aindravāyavāgraṃ prathamamaharatha śukrāgramathāgrayaṇāgram

||8||

evaṃvihitā tryanīkā parivartata ita ūrdhvā prāgviṣuvataḥ

||9||

ūrdhvaṃ viṣuvata āvṛttāvṛtteṣu

||10||

śukrāgro viṣuvān

||11||

atha paśukḷptiḥ

||12||

āgneyaṃ prāyaṇīya ālabhante | śvo bhūte sārasvatīṃ meṣīm

||13||

evaṃvihitānaikādaśinānanvahamālabhante

||14||

Trayoviṃśī kaṇḍikā

sauryaṃ viṣuvatyupālambhyam

||1||

teṣāmevamupākurvatāṃ dvādaśāhīyasya daśarātrasya saptadaśa ukthye dvātriṃśatamekādaśinyo'pavṛjyante

||2||

navāhānyatiricyante

||3||

||4||

iti pāliṅgāyanikāḥ

||5||

atha kāṭhakāḥ

||6||

aikādaśinānprativibhajyāprativibhajya vā prāyaṇīyodayanīyayorālabhante

||7||

āgneyamantardhau rathaṃtarapṛṣṭheṣvaindraṃ bṛhatpṛṣṭheṣu

||8||

api vāgnendraṃ rathaṃtarapṛṣṭheṣvaindrāgnaṃ bṛhatpṛṣṭheṣu

||9||

teṣveva navasu gavyān

||10||

tatra vikāraḥ

||11||

bārhaspatyaṃ śitipṛṣṭhaṃ trayastriṃśe | vāce pṛśnimuttame | vaiśvakarmaṇamṛṣabhaṃ tūparaṃ mahāvrate dvirūpamubhayataetam

||12||

kratupaśūneva samabhyuccayavadanvahamālabheranyadi vibhavaḥ paśavaḥ syuḥ | aikādaśinānvā vihṛtāniti vājasaneyakam

||13||

aindrāgnaṃ vā sarvatra

||14||

Caturviṃśī kaṇḍikā

utsargiṇāmayanaṃ gavāmayanaṃ guṇavikṛtam

||1||

utsṛjyāṃ3 notsṛjyā3 mityuktam

||2||

yadyahānyutsṛjeyuḥ prathamaṃ pṛṣṭhyaṃ saṃsthāpyāparasmā ahne vasatīvarīḥ parihṛtya vasatīvarīṣu mṛtpiṇḍamavadhāyaindraṃ sāṃnāyyaṃ nirupyopavasanti

||3||

śvo bhūte'harutsṛjya prājāpatyaṃ paśumālabhante

||4||

tasya yathākālaṃ vapayā pracaryāgnaye vasumate puroḍāśamaṣṭākapālaṃ nirvapatyaindraṃ ca dadhi

||5||

tayoḥ samānaṃ sviṣṭakṛdiḍam

||6||

upahūtāyāmiḍāyāṃ sāṃnāyyaṃ samupahūya bhakṣayanti

||7||

mādhyaṃdina kāle paśupuroḍāśena pracaryendrāya marutvate puroḍāśamekādaśakapālaṃ nirvapatyaindraṃ ca carum

||8||

havirāhutiprabhṛtīḍāntaṃ saṃsthāpya tṛtīyasavanakāle paśunā pracarya vaiśvadevaṃ dvādaśakapālaṃ nirvapati vaiśvadevaṃ ca carum

||9||

pūrvavaddhaviṣī saṃsthāpayet

||10||

api vā savanīyāneva puroḍāśāneteṣāṃ haviṣāṃ sthāne | adhvarakalpānvā

||11||

agnīdaupayajānaṅgārānāharetyetadādi pāśukaṃ karma pratipadyate

||12||

Pañcaviṃśī kaṇḍikā

evamata ūrdhvaṃ ṣaḍahairmāsānsaṃpādya saptamamutsṛjyaitatkurvanti

||1||

pañca jyotīṃṣi prāgviṣuvata utsṛjyante

||2||

catvārastrayastriṃśā upariṣṭādekaṃ ca jyotiḥ saṃbhārye

||3||

prathamasaptamayoreva notsṛjeyurityeke

||4||

athaikeṣām | yānyahānyutsargaprāptānyekatrikastotrāṇyeva syuḥ

||5||

ekaikāṃ vaiṣāṃ stotrīyāmutsṛjeyuḥ | ukthāni vā

||6||

saṃvatsarasyottame'hannekāmeva stotrīyāmutsṛjeyuḥ | tadutsṛṣṭaṃ cānutsṛṣṭaṃ ca bhavatīti

||7||

athaikeṣām | yadaharutsṛjeyustadeva śvo bhūta upeyuḥ

||8||

tadu tathā na kuryāt vikastiḥ sā saṃvatsarasya bhavatīti

||9||

avabhṛthādudetya tānyevopeyuḥ

||10||

dvādaśa yadyamāvāsyāyāmutsṛjeyuḥ | yadyubhayatra caturviṃśatiḥ

||11||

tadetatpautrīyaṃ paśavyamāyuṣyaṃ svargyam

||12||

saṃtiṣṭhata utsargiṇāmayanamutsargiṇāmayanam

||13||