ataḥ paraṃ gṛhasthasya karmācāraṃ kalau yuge
dharmaṃ sādhāraṇaṃ śaktyā cāturvarṇyāśramāgatam
||1||taṃ pravakṣyāmyahaṃ pūrvaṃ parāśaravaco yathā
ṣaṭkarmasahito vipraḥ kṛṣikarma ca kārayet
||2||kṣudhitaṃ tṛṣitaṃ śrāntaṃ balīvardaṃ na yojayet
hīnāṅgaṃ vyādhitaṃ klībaṃ vṛṣaṃ vipro na vāhayet
||3||sthirāṅgaṃ nīrujaṃ tṛptaṃ sunardaṃ ṣaṇḍhavarjitam
vāhayeddivasasyārdhaṃ paścātsnānaṃ samācaret
||4||japyaṃ devārcanaṃ homaṃ svādhyāyaṃ caivamabhyaset
ekadvitricaturviprānbhojayetsnātakāndvijaḥ
||5||svayaṃkṛṣṭe tathā kṣetre dhānyaiśca svayamarjitaiḥ
nirvapetpañca yajñāṃśca kratudīkṣāṃ ca kārayet
||6||tilā rasā na vikreyā vikreyā dhānyatatsamāḥ
viprasyaivaṃvidhā vṛttistṛṇakāṣṭhādivikrayaḥ
||7||brāhmaṇaścetkṛṣiṃ kuryāttanmahādoṣamāpnuyāt
saṃvatsareṇa yatpāpaṃ matsyaghātī samāpnuyāt
||8||ayomukhena kāṣṭhena tadekāhena lāṅgalī
pāśako matsyaghātī ca vyādhaḥ śākunikastathā
||9||adātā karṣakaścaiva sarve te samabhāginaḥ
vṛkṣaṃ chittvā mahīṃ bhittvā hatvā ca kṛmikīṭakān
||10||karṣakaḥ khalayajñena sarvapāpaiḥ pramucyate
yo na dadyāddvijātibhyo rāśimūlamupāgataḥ
||11||sa cauraḥ sa ca pāpiṣṭho brahmaghnaṃ taṃ vinirdiśet
rājñe dattvā tu ṣaḍbhāgaṃ devānāṃ caikaviṃśakam
||12||viprāṇāṃ triṃśakaṃ bhāgaṃ sarvapāpaiḥ pramucyate
kṣatriyo'pi kṛṣiṃ kṛtvā devānviprāṃśca pūjayet
||13||vaiśyaḥ śūdrastathā kuryātkṛṣivāṇijyaśilpakam
vikarma kurvate śūdrā dvijaśuśrūṣayojjhitāḥ
||14||bhavantyalpāyuṣaste vai nirayaṃ yāntyasaṃśayaṃ
caturṇāmapi varṇānāmeṣa dharmaḥ sanātanaḥ
||15||