vṛkaśvānasṛgālādyairdaṣṭo yastu dvijottamaḥ
snātvā japetsa gāyatrīṃ pavitrāṃ vedamātaram
||1||gavāṃ śṛṅgodakaiḥ snānaṃ mahānadyostu saṃgame
samudradarśanādvāpi śunā daṣṭaḥ śucirbhavet
||2||vedavidyāvratasnātaḥ śunā daṣṭo dvijo yadi
sa hiraṇyodakaiḥ snātvā ghṛtaṃ prāśya viśudhyati
||3||savratastu śunā daṣṭo yastrirātramupāvaset
ghṛtaṃ kuśodakaṃ pītvā vrataśeṣaṃ samāpayet
||4||avrataḥ savrato vāpi śunā daṣṭo bhaveddvijaḥ
praṇipatya bhavetpūto vipraiścakṣurnirīkṣitaḥ
||5||śunā ghrātāvalīḍhasya nakhairvilikhitasya ca
adbhiḥ prakṣālanaṃ proktamagninā copacūlanam
||6||śunā tu brāhmaṇī daṣṭā jambukena vṛkeṇa vā
uditaṃ grahanakṣatraṃ dṛṣṭvā sadyaḥ śucirbhavet
||7||kṛṣṇapakṣe yadā somo na dṛśyeta kadācana
yāṃ diśaṃ vrajate somastāṃ diśaṃ vāvalokayet
||8||asadbrāhmaṇake grāme śunā daṣṭo dvijottamaḥ
vṛṣaṃ pradakṣiṇīkṛtya sadyaḥ snātvā śucirbhavet
||9||caṇḍālena śvapākena gobhirviprairhato yadi
āhitāgnirmṛto vipro viṣeṇātmahato yadi
||10||dahettaṃ brāhmaṇaṃ vipro lokāgnau mantravarjitam
spṛṣṭvā voḍhvā ca dagdhvā ca sapiṇḍeṣu ca sarvathā
||11||prājāpatyaṃ caretpaścādviprāṇāmanuśāsanāt
dagdhāsthīni punargṛhya kṣīraiḥ prakṣālayeddvijaḥ
||12||punardahetsvāgninā tu svatantreṇa pṛthakpṛthak
āhitāgnirdvijaḥ kaścitpravasankālacoditaḥ
||13||dehanāśamanuprāptastasyāgnirvasate gṛhe
pretāgnihotrasaṃskāraḥ śrūyatāmṛṣipuṅgavāḥ
||14||kṛṣṇājinaṃ samāstīrya kuśaistu puruṣākṛtim
ṣaṭśatāni śataṃ caiva palāśānāṃ ca vṛntataḥ
||15||catvāriṃśacchire dadyācchataṃ kaṇṭhe tu vinyaset
bāhubhyāṃ śatakaṃ dadyādaṅgulīṣu daśaiva tu
||16||śataṃ tu jaghane dadyāddviśataṃ tūdare tathā
dadyādaṣṭau vṛṣaṇayoḥ pañca medhre tu vinyaset
||17||ekaviṃśatimūrubhyāṃ dviśataṃ jānujaṅghayoḥ
pādāṅgulīṣu ṣaḍdadyādyajñapātraṃ tato nyaset
||18||śamyaṃ śiśne viniḥkṣipya araṇīṃ muṣkayorapi
juhūṃ ca dakṣiṇe haste vāme tūpabhṛtaṃ nyaset
||19||karṇe colūkhalaṃ dadyātpṛṣṭhe ca musalaṃ nyaset
urasi kṣipya dṛṣadaṃ taṇḍulājyatilānmukhe
||20||śrotre ca prokṣaṇīṃ dadyādājyasthalīṃ tu cakṣuṣoḥ
karṇe netre mukhe ghrāṇe hiraṇyaśakalaṃ nyaset
||21||agnihotropakaraṇamaśeṣaṃ tatra nikṣipet
asau svargāya lokāya svāhetyekāhutiṃ sakṛt
||22||dadyātputro'thavā bhrātāpyanyo vāpi ca bāndhavaḥ
yathā dahanasaṃskārastathā kāryaṃ vicakṣaṇaiḥ
||23||īdṛśaṃ tu vidhiṃ kuryādbrahmalokagatiḥ smṛtā
dahanti ye dvijāstaṃ tu te yānti paramāṃ gatim
||24||anyathā kurvate karma tvātmabuddhyā pracoditāḥ
bhavantyalpāyuṣaste vai patanti narake'śucau
||25||