darśapūrṇamāsayoryājamānam
Prathamā kaṇḍikā
yājamānaṃ vyākhyāsyāmaḥ
||1||yajñamānasya brahmacaryaṃ dakṣiṇādānaṃ dravyaprakalpanaṃ kāmānāṃ kāmanam
||2||pratyagāśiṣo mantrāñjapatyakaraṇānupatiṣṭhate'numantrayate
||3||parvaṇi ca keśaśmaśru vāpayate
||4||apyalpaśo lomāni vāpayata iti vājasaneyakam
||5||vidyudasi vidya me pāpmānamṛtātsatyamupaimīti yakṣyamāṇo'pa upaspṛśati
||6||tadidaṃ sarvayajñeṣūpasparśanaṃ bhavati
||7||agniṃ gṛhṇāmi surathaṃ yo mayobhūrya udyantamārohati sūryamahne | ādityaṃ jyotiṣāṃ jyotiruttamaṃ śvoyajñāya ramatāṃ devatābhyaḥ | vasūn rūdrānādityānindreṇa saha devatāḥ | tāḥ pūrvaḥ parigṛhṇāmi sva āyatane manīṣayā | imāmūrjaṃ pañcadaśīṃ ye praviṣṭāstāndevānparigṛhṇāmi pūrvaḥ | agnirhavyavāḍiha tānāvahatu paurṇamāsaṃ haviridameṣāṃ mayyāmāvāsyaṃ haviridameṣāṃ mayīti yathāliṅgamāhavanīye'nvādhīyamāne japati
||8||antarāgnī paśavo devasaṃsadamāgaman | tānpūrvaḥ parigṛhṇāmi sva āyatane manīṣayetyantarāgnī tiṣṭhañjapati
||9||iha prajā viśvarūpā ramantāmagniṃ gṛhapatimabhisaṃvasānāḥ | tāḥ pūrvaḥ parigṛhṇāmi sva āyatane manīṣayā | iha paśavo viśvarūpā ramantāmagniṃ gṛhapatimabhisaṃvasānāḥ | tānpūrvaḥ parigṛhṇāmi sva āyatane manīṣayeti gārhapatyam
||10||Dvitīyā kaṇḍikā
ayaṃ pitṝṇāmagniravāḍḍhavyā pitṛbhya ā | taṃ pūrvaḥ parigṛhṇāmyaviṣaṃ naḥ pituṃ karaditi dakṣiṇāgnim | ajasraṃ tvā sabhāpālā vijayabhāgaṃ samindhatām | agne dīdāya me sabhya vijityai śaradaḥ śatamiti sabhyam | annamāvasathīyamabhiharāṇi śaradaḥ śatam | āvasathe śriyaṃ mantramahirbudhniyo niyacchatvityāvasathyam
||1||idamahamagnijyeṣṭhebhyo vasubhyo yajñaṃ pravravīmi | idamahamindrajyeṣṭhebhyo rudrebhyo yajñaṃ prabravīmi | idamahaṃ varuṇajyeṣṭhebhya ādityebhyo yajñaṃ prabravīmītyanvāhiteṣu japati
||2||payasvatīroṣadhaya iti purā barhiṣa āhartorjāyāpatī aśnītaḥ | purā vatsānāmapākartoramāvāsyāyām
||3||paurṇamāsāyopavatsyantau nātisuhitau bhavataḥ
||4||amāṣamamāṃsamājyenāśnīyātāṃ tadabhāve dadhnā payasā vā
||5||barhiṣā pūrṇamāse vratamupaiti | vatseṣṭyapākṛteṣṭhyamāvāsyāyām
||6||praṇītāsu praṇīyamānāsvāsanneṣu vā haviḥṣu vratamupaitītyubhayatra sādhāraṇam
||7||aśanamagnyanvādhānaṃ vratopāyanamityeke | vratopāyanamaśanamagnyanvādhānamityeke | agnyanvādhānaṃ vratopāyanamaśanamityeke
||8||payasvatīroṣadhaya ityapa ācāmatyupaspṛśati vā
||9||apareṇāhavanīyaṃ dakṣiṇātikrāmati
||10||eṣa evāta ūrdhvaṃ yajamānasya saṃcaro bhavati
||11||Tṛtīyā kaṇḍikā
dakṣiṇenāhavanīyamavasthāya vratamupaiṣyansamudraṃ manasā dhyāyati
||1||atha japatyagne vratapate vrataṃ cariṣyāmīti brāhmaṇaḥ | vāyo vratapata āditya vratapate vratānāṃ vratapate vrataṃ cariṣyāmīti rājanyavaiśyau
||2||sarvānvā brāhmaṇaḥ
||3||athādityamupatiṣṭhate samrāḍasi vratapā asi vratapatirasi tatte prabravīmi tacchakeyaṃ tena śakeyaṃ tena rādhyāsamiti
||4||yadyastamite vratamupeyādāhavanīyamupatiṣṭhannetadyajurjapet
||5||ubhāvagnī upastṛṇate devatā upavasantu me | ahaṃ grāmyānupavasāmi mahyaṃ gopataye paśūniti sāyaṃ paristīryamāṇeṣu japati
||6||āraṇyaṃ sāyamāśe'śnātyamāṣamamāṃsam
||7||api vā kāmamā mārgādā madhuna ā prāśātikāt
||8||apo vā | na vā kiṃcit
||9||na tasya sāyamaśnīyādyena prātaryakṣyamāṇaḥ syāt
||10||āraṇyāyopavatsyannapo'śnāti na vā
||11||jañjabhyamāno brūyānmayi dakṣakratū iti
||12||amāvāsyāṃ rātriṃ jāgarti
||13||api vā supyādupari tveva na śayīta
||14||api vopari śayīta brahmacārī tveva syāt
||15||ubhayatra jāgaraṇameke samāmananti
||16||āhavanīyāgāre gārhapatyāgāre vā śete
||17||Caturthī kaṇḍikā
devā deveṣu parākramadhvaṃ prathamā dvitīyeṣu dvitīyāstṛtīyeṣu trirekādaśā iha māvata idaṃ śakeyaṃ yadidaṃ karomyātmā karotvātmane | idaṃ kariṣye bheṣajamidaṃ me viśvabheṣajā aśvinā prāvataṃ yuvamiti japitvā śvobhūte brahmāṇaṃ vṛṇīte
||1||bhūpate bhuvanapate mahato bhūtasya pate brahmāṇaṃ tvā vṛṇīmaha ityuktvāpareṇāhavanīyaṃ dakṣiṇātikramyopaviśati
||2||pūrvo brahmāparo yajamānaḥ
||3||bhūśca kaśca vāk cark ca gauśca vaṭ ca khaṃ ca dhūṃśca nūṃśca pūṃścaikākṣarāḥ pūṃrdaśamā virājo yā idaṃ viśvaṃ bhuvanaṃ vyānaśustā no devīstarasā saṃvidānāḥ svasti yajñaṃ nayata prajānatīrbrahmapūtā stha | ko vo yunakti sa vo yunaktu viśvebhyaḥ kāmebhyo devayajyāyai | yāḥ purastātprasravantyupariṣṭātsarvataśca yāḥ | tābhī raśmipavitrābhiḥ śraddhāṃ yajñamārabha iti praṇītāḥ praṇīyamānā anumantrayate | yajamāna havirnirvapsyāmītyucyamāna oṃ nirvapetyuccairanujānāti
||4||agniṃ hotāramiha taṃ huva iti havirnirupyamāṇamabhimantrayate
||5||havirnirvapaṇaṃ vā pātramabhimṛśatyabhi vā mantrayate
||6||taduditvā vācaṃ yacchati
||7||atha yajñaṃ yunakti
||8||kastvā yunakti sa tvā yunaktviti sarvaṃ vihāramanuvīkṣate
||9||Pañcamī kaṇḍikā
catuḥśikhaṇḍā yuvatiḥ supeśā ghṛtapratīkā bhuvanasya madhye | marmṛjyamānā mahate saubhagāya mahyaṃ dhukṣva yajamānāya kāmāniti vediṃ saṃmṛjyamānām
||1||yo mā hṛdā manasā yaśca vācā yo brahmaṇā karmaṇā dveṣṭi devāḥ | yaḥ śrutena hṛdayeneṣṇatā ca tasyendra vajreṇa śiraśchinadmīti stambayajurhriyamāṇam
||2||idaṃ tasmai harmyaṃ karomi yo vo devāścarati brahmacaryam | medhāvī dikṣu manasā tapasvyantardūtaścarati mānuṣīṣvityutkaramabhigṛhyamāṇam
||3||yajñasya tvā pramayābhimayā pratimayonmayā parigṛhṇāmīti vediṃ parigṛhyamāṇām
||4||yadudghnanto jihiṃsima pṛthivīmoṣadhīrapaḥ | adhvaryavaḥ sphyakṛtaḥ sphyenāntarikṣaṃ moru pātu tasmāt | yadudghnanto jihiṃsima krūramasyā vediṃ cakṛmā manasā devayantaḥ | mā tena heḍa upagāma bhūmyāḥ śivo no viśvairbhuvanebhirastvityuddhanyamānām | bhūmirbhūtvā mahimānaṃ pupoṣa tato devo vardhayate payāṃsi | yajñiyā yajñaṃ vicayanti śaṃ cauṣadhīrāpa iha śakvarīśceti kriyamāṇām | iḍenyakratūrahamapo devīrupabruve | divā naktaṃ ca sasruṣīrapasvarīriti prokṣaṇīrāsādyamānāḥ | ūrṇāmṛdu prathamānaṃ syonaṃ devebhyo juṣṭaṃ sadanāya barhiḥ | suvarge loke yajamānaṃ hi dhehi māṃ nākasya pṛṣṭhe parame vyomanniti barhirāsādyamānam
||5||adbhirājyamājyenāpaḥ samyak punīta savituḥ pavitraiḥ | tā devīḥ śakvarīḥ śākvareṇemaṃ yajñamavata saṃvidānā ityājyaṃ prokṣaṇīścotpūyamānāḥ
||6||ubhāvājyagrahāñjapataḥ
||7||Ṣaṣṭhī kaṇḍikā
aśiśrema barhirantaḥ pṛthivyāṃ saṃrohayanta oṣadhīrvivṛkṇāḥ | yāsāṃ mūlamudavadhīḥ sphyena śivā nastāḥ suhavā bhavantu | sumanaso yajamānāya santvoṣadhīrāpa iha śakvarīśca | vṛṣṭidyāvā parjanya enā virohayatu hiraṇyavarṇāḥ śatavalśā adabdhā ityantarvedi barhirāsannam
||1||catuḥśikhaṇḍā yuvatiḥ supeśā ghṛtapratīkā vayunāni vaste | sā stīryamāṇā mahate saubhagāya sā me dhukṣva yajamānāya kāmān | śivā ca me śagmā caidhi syonā ca me suṣadā caidhyūrjasvatī ca me payasvatī caidhi | iṣamūrjaṃ me pinvasva brahma tejo me pinvasva kṣatramojo me pinvasva viśaṃ puṣṭiṃ me pinvasvāyurannādyaṃ me pinvasva prajāṃ paśūnme pinvasveti stīryamāṇām
||2||dhruvo'sītyetaiḥ pratimantraṃ paridhīnparidhīyamānān | asminyajña upa bhūya innu me'vikṣobhāya paridhīndadhāmi | dhartā dharuṇo dharīyānagnirdveṣāṃsi nirito nu dātā iti ca
||3||yunajmi tvā brahmaṇā daivyenetyāhavanīyam | tejiṣṭhā te tapanā yā ca rocanā pratyoṣantīstajvo yāste agne | tābhirvarmāṇyabhito vyayasva mā tvā dabhanyajñahanaḥ piśācā iti ca
||4||vicchinadmi vidhṛtībhyāṃ sapatnāñjātānbhrātṛvyānye ca janiṣyamāṇāḥ | viśo yantrābhyāṃ vidhamāmyenānahaṃ svānāmuttamo 'sāni devāḥ | viśo yantre nudamāne arātiṃ viśvaṃ pāpmānamamatiṃ durmarāyum | sīdantī devī sukṛtasya loke dhṛtī stho vidhṛtī svadhṛtī prāṇānmayi dhārayataṃ prajāṃ mayi dhārayataṃ paśūnmayi dhārayatamiti vidhṛtī āsādyamāne
||5||Saptamī kaṇḍikā
ayaṃ prastara ubhayasya dhartā dhartā prayājānāmutānūyājānām | sa dādhāra samidho viśvarūpāstasminsruco adhyāsādayāmīti prastaramāsādyamānam
||1||āroha patho juhu devayānānyatrarṣayaḥ prathamajā ye purāṇāḥ | hiraṇyapakṣājirā saṃbhṛtāṅgā vahāsi mā sukṛtāṃ yatra lokāḥ | juhūrasi ghṛtācī gāyatrīyāmnī kavibhirjuṣāṇā | avyathamānā yajñamanuyacchasva sunītī yajñaṃ nayāsyupa devānāgneyena śarmaṇā daivyeneti juhūm | avāhaṃ bādha upabhṛtā sapatnāñjātānbhrātṛvyānye ca janiṣyamāṇāḥ | dohai yajñaṃ sudughāmiva dhenumahamuttaro bhūyāsamadhare matsapatnāḥ | subhṛdasyupabhṛddvṛtācī traiṣṭubhena chandasā viśvavedāḥ | avyathamānā yajñamanuyacchasva sunītī yajñaṃ nayāsyupa devānaindreṇa śarmaṇā daivyenetyupabhṛtam | yo mā vācā manasā durmarāyurhṛdārātīyādabhidāsadagne | idamasya cittamadharaṃ dhruvāyā ahamuttaro bhūyāsamadhare matsapatnāḥ | dhruvāsi dharaṇī dhanasya pūrṇā jāgatena chandasā viśvavedāḥ | avyathamānā yajñamanuyacchasva sunītī yajñaṃ nayāsyupa devānvaiśvadevena śarmaṇā daivyeneti dhruvām | syono me sīda suṣadaḥ pṛthivyāṃ prathayi prajayā paśubhiḥ suvarge loke | divi sīda pṛthivyāmantarikṣe'hamuttaro bhūyāsamadhare matsapatnāḥ | ayaṃ sruvo abhijiharti homāñchatakṣaraśchandasānuṣṭubhena | sarvā yañjasya samanakti viṣṭhā bārhaspatyena śarmaṇā daivyeneti sruvam | iyaṃ sthālī ghṛtasya pūrṇācchinnapayāḥ śatadhāra utsaḥ | mārutena śarmaṇā daivyenetyājyasthālīm
||2||Aṣṭamī kaṇḍikā
tṛptirasi gāyatraṃ chandastarpaya mā tejasā brahmavarcasena tṛptirasi traiṣṭubhaṃ chandastarpaya maujasā vīryeṇa tṛptirasi jāgataṃ chandastarpaya mā prajayā paśubhiriti puroḍāśānajyamānān
||1||yajño 'si sarvataḥ śritaḥ sarvato māṃ bhūtaṃ bhaviṣyacchrayatāṃ śataṃ me santvāśiṣaḥ sahasraṃ me santu sūnṛtā irāvatīḥ paśumatīḥ prajāpatirasi sarvataḥ śritaḥ sarvato māṃ bhūtaṃ bhaviṣyacchrayatāṃ śataṃ me santvāśiṣaḥ sahasraṃ me santu sūnṛtā irāvatīḥ paśumatīrityāgneyaṃ puroḍāśamāsannamabhimṛśati sarvāṇi vā havīṃṣi
||2||idamindriyamamṛtaṃ vīryamanenendrāya paśavo cikitsan | tena devā avatopa māmiheṣamūrjaṃ yaśaḥ saha ojaḥ saneyaṃ śṛtaṃ mayi śrayatāmiti prātardoham | yatpṛthivīmacarattatpraviṣṭaṃ yenāsiñcadbalamindre prajāpatiḥ | idaṃ tacchukraṃ madhu vājinīvadyenopariṣṭādadhinonmahendraṃ dadhi māṃ dhinotviti dadhi
||3||ayaṃ yajñaḥ samasadaddhaviṣmānṛcā sāmnā yajuṣā devatābhiḥ | tena lokānsūryavato jayemendrasya sakhamamṛtatvamaśyāmiti sarvāṇi havīṃṣi
||4||yo naḥ kanīya iha kāmayātā asminyajñe yajamānāya mahyam | apa tamindrāgnī bhuvanānnudetāmahaṃ prajāṃ vīravatīṃ videyetyaindrāgnam
||5||mamāgne varco vihaveṣṭyastvityanuvākena sarvāṇi havīṃṣyāsannānyabhimṛśedaṣṭābhirvā
||6||caturhotrā paurṇamāsyāṃ havīṃṣyāsannānyabhimṛśetprajākāmaḥ pañcahotrāmāvāsyāyāṃ svargakāmo nityavadeke samāmananti
||7||Navamī kaṇḍikā
daśahotāraṃ vadetpurastātsāmidhenīnām
||1||aṅgiraso māsya yajñasya prātaranuvākairavantviti ptāmidhenīnāṃ pratipadi japati
||2||anūcyamānāsu daśahotāraṃ vyākhyāyocchuṣmo agna iti samidhyamānam | samiddho agnirāhutaḥ svāhākṛtaḥ pipartu naḥ | svagā devebhya idaṃ nama iti samiddham
||3||mano'si prājāpatyamiti srauvamāghāryamāṇam
||4||srucyamanvārabhya vāgasyaindrītyanumantrayate
||5||devāḥ pitaraḥ pitaro devā yo'hamasmi sa sanyaje yasyāsmi na tamantaremi svaṃ ma iṣṭaṃ svaṃ dattaṃ svaṃ pūrtaṃ svaṃ śrāntaṃ svaṃ hutam | tasya me'gnirupadraṣṭā vāyurupaśrotādityo'nukhyātā dyauḥ pitā pṛthivī mātā prajāpatirbandhurya evāsmi sa sanyaja iti hotṛpravare'dhvaryupravare ca pravriyamāṇe
||6||caturhotāraṃ vyākhyāya vasantamṛtūnāṃ prīṇāmītyetaiḥ pratimantraṃ prayājānhutaṃhutam
||7||eko mamaikā tasya yo'smāndveṣṭi yaṃ ca vayaṃ dviṣmo dvau mama dve tasya trayo mama tisrastasya catvāro mama catasrastasya pañca mama na tasya kiṃcana yo 'smāndveṣṭi yaṃ ca vayaṃ dviṣma ityetaiśca pratimantram
||8||agnīṣomayorahaṃ devayajyayā cakṣuṣmānbhūyāsamityājyabhāgau
||9||vihṛtānumantraṇau vā
||10||agninā yajñaścakṣuṣmānagnerahaṃ devayajyayā cakṣuṣmānmūyāsam | somena yajñaścakṣuṣmām̐ somasyāhaṃ devayajyayā cakṣuṣmānbhūyāsamiti vihṛtau
||11||pañcahotāraṃ vadetpurastāddhaviravadānasya
||12||agnerahaṃ devayajyayānnādo bhūyāsamityāgneyaṃ hutamanumantrayate dabdhirasītyupāṃśuyājamagnīṣomayorityagnīṣomīyamindrāgniyorityaindrāgnamindrasyetyaindraṃ sāṃnāyyaṃ mahendrasyeti māhendramagneḥ sviṣṭakṛta iti sauviṣṭakṛtam
||13||purastātsviṣṭakṛto'nyadevatānyeke samāmananti
||14||Daśamī kaṇḍikā
indrasya vaimṛdhasyāhaṃ devayajyayāsapatno vīryavānbhūyāsamindrasya trāturahaṃ devayajyayā trāto bhūyāsaṃ dyāvāpṛthivyorahaṃ devayajyayobhayorlokayorṛdhyāsaṃ | bhūmānaṃ pratiṣṭhāṃ gameyamityeke | pūṣṇo'haṃ devayajyayā prajaniṣīya prajayā paśubhiḥ sarasvatyā ahaṃ devayajyayā vācamannādyaṃ puṣeyaṃ viśveṣāṃ devānāmahaṃ devayajyayā prāṇaiḥ sāyujyaṃ gameyamaryamṇo'haṃ devayajyayā svargaṃ lokaṃ gameyamadityā ahaṃ devayajyayā pra prajayā ca paśubhiśca janiṣīyendrasyendriyāvato'haṃ devayajyayendriyāvyannādo bhūyāsamiti yathāliṅgaṃ vaikṛtīḥ
||1||agnirmā duriṣṭātpātviti prāśitramavadīyamānam
||2||surūpavarṣavarṇa ehītīḍām
||3||bhūyasyehi śreyasyehi vasīyasyehi citta ehi dadhiṣa ehīḍa ehi sūnṛta ehītīḍāyā upāṃśrūpahave sapta devagavīrjapati | cidasi manāsi dhīrasi rantī ramatiḥ sūnuḥ sūnarītyuccairupahave sapta manuṣyagavīḥ | devīrdevairabhi mā nivartadhvaṃ syonāḥ syonena ghṛtena mā samukṣata nama idamudaṃ bhiṣagṛṣirbrahmā yaddade samudrādudacanniva srucā vāgagre viprasya tiṣṭhati śṛṅgebhirdaśabhirdiśanniti ca
||4||upahūyamānāyāṃ vāyaviḍā te māteti hotāramīkṣamāṇo vāyuṃ manasā dhyāyet
||5||sā me satyāśīrityāśiḥṣu | āśīrma ūrjamiti ca
||6||iḍāyā ahaṃ devayajyayā paśumānbhūyāsamityupahūtām | iḍā dhenuḥ sahavatsā na āgādūrjaṃ duhānā payasā prapīnā | sā no annena haviṣota gobhiriḍābhyasmām̐ āgāditi bhakṣāyāhriyamāṇām
||7||ukta iḍābhakṣo mārjanī ca
||8||bradhna pinvasva dadato me mā kṣāyi kurvato me mopadasaddiśāṃ kḷptirasi diśo me kalpantāṃ kalpantāṃ me diśo daivīśca mānuṣīścāhorātre me kalpetāmardhamāsā me kalpantāṃ māsā me kalpantāmṛtavo me kalpantāṃ saṃvatsaro me kalpatāṃ kḷptirasi kalpatāṃ ma iti barhiṣi puroḍāśamāsannamabhimṛśati
||9||Ekādaśī kaṇḍikā
athainaṃ pratidiśaṃ vyūhatyāśānāṃ tvāśāpālebhyaścaturbhyo amṛtebhyaḥ | idaṃ bhūtasyādhyakṣebhyo vidhema haviṣā vayam | brahmapā hi bhajatāṃ bhāgī bhāgaṃ mābhāgo bhakta nirabhāgaṃ bhajāmaḥ | apaspinvauṣadhīrjinva dvipātpāhi catuṣpādava divo vṛṣṭimeraya | brāhmaṇānāmidaṃ haviḥ somyānāṃ somapīthinām | nirbhakto'brāhmaṇo nehābrāhmaṇasyāstīti
||1||upahūto dyauḥ pitopa māṃ dyauḥ pitā hvayatāmagnirāgnīdhrādāyuṣe varcase jīvātvai puṇyāyopahūtā pṛthivī mātopa māṃ mātā pṛthivī hvayatāmagnirāgnīdhrādāyuṣe varcase jīvātvai puṇyāyetyāgnīdhrabhāgasya vaiśeṣikam
||2||bradhna pinvasvetyantarvedyanvāhāryamāsannamabhimṛśati | iyaṃ sthālyamṛtasya pūrṇā sahasradhāra utso akṣīyamāṇaḥ | sa dādhāra pṛthivīmantarikṣaṃ divaṃ ca tenaudanenātitarāṇi mṛtyumiti ca
||3||uktaḥ saṃpraiṣo'nvāhāryasya ca dānam
||4||eṣā te agne samidityānūyājikīṃ samidhamādhīyamānām | yaṃ te agna āvṛścāmyahaṃ vā kṣipitaścaran | prajāṃ ca tasya mūlaṃ ca nīcairdevā nivṛścata | agne yo no'bhidāsati samāno yaśca niṣṭyaḥ | idhmasyeva prakṣāyato mā tasyoccheṣi kiṃcana | yo māṃ dveṣṭi jātavedo yaṃ cāhaṃ dveṣmi yaśca mām | sarvāṃstānagne saṃdaha yāṃścāhaṃ dveṣmi ye ca māmityāhitāyāmagnim
||5||vedirbarhiḥ śṛtaṃ haviridhmaḥ hparidhayaḥ srucaḥ | ājyaṃ yajña ṛco yajuryājyāśca vaṣaṭkārāḥ | saṃ me saṃnatayo namantāmidhmasaṃnahane huta iti saṃmārgānhutān
||6||saptahotāraṃ vadetpurastādanūyājānāmupariṣṭādvā
||7||Dvādaśī kaṇḍikā
barhiṣo'haṃ devayajyayā prajāvānbhūyāsamityetaiḥ pratimantramanūyājānhutaṃhutam
||1||ubhau vājavatyau japataḥ
||2||vasūndevānyajñenāpiptreṃ rudrāndevānyajñenāpipremādityāndevānyajñenāpipremiti pratimantraṃ paridhīnajyamānān | samaṅktāṃ barhirhaviṣā ghṛtena samādityairvasubhiḥ saṃ marudbhiḥ | samindreṇa viśvebhirdevebhiraṅkāṃ divyaṃ nabho gacchatu yatsvāheti prastaramajyamānam
||3||agnerahamujjitimanūjjeṣamiti yathāliṅgaṃ sūktavāk devatāḥ
||4||yadā cāsya hotā nāma gṛhṇīyādatha brūyādemā agmannāśiṣo dohakāmā iti
||5||sā me satyāśīrdevāngamyājjuṣṭājjuṣṭatarā paṇyātpaṇyatarāreḍatā manasā devāngamyādyajño devāngacchatvado ma āgacchatviti sūktavākasyāśiṣu yatkāmayate tasya nāma gṛhṇāti
||6||rohitena tvāgnirdevatāṃ gamayatvityetaiḥ pratimantramagnīdhā prastaraṃ prahriyamāṇam
||7||divaḥ khīlo'vatataḥ pṛthivyā adhyutthitaḥ | tenā sahasrakāṇḍena dviṣantaṃ śocayāmasi | dviṣanme bahu śocatvoṣadhe mo ahaṃ śucamiti prastaratṛṇe prahriyamāṇe
||8||vi te muñcāmīti paridhiṣu vimucyamāneṣu
||9||viṣṇoḥ śaṃyoriti śaṃyuvāke | yajña namaste yajña namo namaśca te yajña śivena me saṃtiṣṭhasva syonena me saṃtiṣṭhasva subhūtena me saṃtiṣṭhasva brahmavarcasena me saṃtiṣṭhasva yajñasyarddhimanu saṃtiṣṭhasvopa te yajña nama upa te nama upa te nama iti ca | iṣṭo yajño bhṛgubhirdraviṇodā yatibhirāśīrdā vasubhirāśīrvān | atharvabhistasya meṣṭasya vītasya draviṇehāgameriti saṃsrāvaṃ hutam
||10||Trayodaśī kaṇḍikā
somasyāhaṃ devayajyayā suretā reto dhiṣīyeti yathāliṅgaṃ patnīsaṃyājānhutaṃhutam
||1||rākāyā ahaṃ devayajyayā prajāvānbhūyāsaṃ sinīvālyā ahaṃ devayajyayā paśumānbhūyāsaṃ kuhvā ahaṃ devayajyayā puṣṭimānpaśumānbhūyāsamiti kāmyāḥ
||2||rākāyā ahaṃ devayajyayā prajāvatī bhūyāsaṃ sinīvālyā ahaṃ devayajyayā paśumatī bhūyāsaṃ kuhvā ahaṃ devayajyayā puṣṭimatī paśumatī bhūyāsamiti patnyanumantrayate
||3||iḍāsmānanu vastāṃ ghṛtena yasyāḥ pade punate devayantaḥ | vaiśvānarī śakvarī vāvṛdhānopa yajñamasthita vaiśvadevītyājyeḍām
||4||antarvedi vedaṃ nidhāyābhimṛśati vedo'sīti
||5||purā videyeti yadyadbhrātṛvyasyābhidhyāyettasya nāma gṛhṇīyāt | tadevāsya sarvaṃ vṛṅkta iti vijñāyate
||6||yā sarasvatī viśobhagīnā tasyāṃ me rāsva tasyāste bhaktivāno bhūyāsmeti phalīkaraṇahome hute mukhaṃ vimṛṣṭe
||7||vasuryajño vasumānyajñastasya mā yajñasya vasorvasumato vasvāgacchatvado ma āgacchatviti samiṣṭayajurhutamanumantrayate | yatkāmayate tasya nāma gṛhṇāti
||8||saṃ yajñapatirāśiṣeti yajamānabhāgaṃ prāśnāti
||9||Caturdaśī kaṇḍikā
dadhikrāvṇo akāriṣamiti sāyaṃdoham | idaṃ haviriti prātardoham
||1||nābrāhmaṇaḥ sāṃnāyyaṃ prāśnīyāt
||2||antarvedi praṇītāsvadhvaryuḥ saṃtatāmudakadhārāṃ srāvayati | sadasi sanme bhūyā ityānīyamānāyāṃ japati
||3||prācyāṃ diśi devā ṛtvijo mārjayantāmityetairyathāliṅgaṃ vyutsi cya samudraṃ vaḥ prahiṇomi svāṃ yonimapigacchata | acchidraḥ prajayā bhūyāsaṃ mā parāseci matpaya ityantarvedi śeṣaṃ ninīya yadapsute sarasvati goṣṭhaśveṣu yanmadhu | tena me vājinīvati mukhamaṅgdha sarasvati | yā sarasvatī vaiśambalyā tasyāṃ me rāsva tasyāste bhakṣīya tasyāste bhūyiṣṭhabhājo bhūyāsmeti mukhaṃ vimṛṣṭe
||4||ubhau kapālavimocanaṃ japataḥ
||5||viṣṇoḥ kramo'sīti dakṣine vedyante dakṣiṇena padā caturo viṣṇukramānprācaḥ krāmatyuttaramuttaraṃ jyāyāṃsamanatiharansavyam
||6||nāhavanīyamatikrāmati
||7||avasthāya caturthaṃ japati
||8||viṣṇukramānviṣṇvatikramānatīmokṣāniti vyatiṣaktāneke samāmananti | vinirūḍhāneke
||9||agninā devena pṛtanā jayāmīti viṣṇvatikramāḥ | ye devā yajñahana ityatīmokṣāḥ
||10||aganma suvaḥ suvaraganmetyādityamupatiṣṭhate
||11||Pañcadaśī kaṇḍikā
udyannadya mitramahaḥ sapatnānme anīnaśaḥ | divainānvidyutā jahi nimrocannadharānkṛdhi | udyannadya vi no bhaja pitā putrebhyo yathā | dīrghāyutvasya heśiṣe tasya no dehi sūrya | udyannadya mitramaha ārohannuttarāṃ divam | hṛdrogaṃ mama sūrya harimāṇaṃ ca nāśaya | śukeṣu me harimāṇaṃ ropaṇākāsu dadhmasi | atho hāridraveṣu me harimāṇaṃ nidadhmasi | udagādayamādityo viśvena sahasā saha | dviṣantaṃ mama randhayanmo ahaṃ dviṣato radham | yo naḥ śapādaśapato yaśca naḥ śapataḥ śapāt | uṣāśca tasmai nimrukca sarvaṃ pāpaṃ samūhatāmiti ca
||1||aindrīmāvṛtamanvāvarta iti pradakṣiṇamāvartate
||2||yadyabhicaredidamahamuṣyāmuṣyāyaṇasya prāṇaṃ niveṣṭayāmīti dakṣiṇasya padaḥ pārṣṇyā nimṛdnīyāt
||3||puṇyā bhavantu yā lakṣmīḥ parābhavantu yāḥ pāpīrityuktvā samahaṃ prajayā saṃ mayā prajeti punarupāvartate
||4||samiddho agne me dīdihi sameddhā te agne dīdyāsamityāhavanīyamupasaminddhe | vasumānyajño vasīyānbhūyāsumityupatiṣṭhate
||5||Ṣoḍaśī kaṇḍikā
yo naḥ sapatno yo'raṇo marto'bhidāsati devāḥ | idhmasyeva prakṣāyato mā tasyoccheṣi kiṃcaneti ca
||1||agna āyūṃṣi pavasa ityāgnipāvamānībhyāṃ gārhapatyamupatiṣṭhate | agne gṛhapata iti ca
||2||putrasya nāma gṛhṇāti tāmāśiṣamāśāse tantava ityajātasya | amuṣmā iti jātasya
||3||jyotiṣe tantave tvāsāvanu mā tanvacchinno daivyastanturmā manuṣyaśchedi divyāddhāmno mā cchitsi mā mānuṣāditi priyasya putrasya nāma gṛhṇāti
||4||agne vahne svaditaṃ nastanaye pituṃ paca | śaṃ tokāya tanuve syona iti dakṣiṇāgnim
||5||jyotiṣe tantave tvetyantarvedyupaviśati | pūrvavannāmagrahaṇam
||6||jyotirasi tantava ityupaviśya japati
||7||vedamupastha ādhāyāntarvedyāsīno'tīmokṣāñjapati
||8||atra vedastaraṇaṃ yajamānabhāgasya ca prāśanameke samāmananti
||9||kastvā yunakti sa tvā vimuñcatviti yajñaṃ vimuñcati
||10||agne vratapate vratamacāriṣamiti vrataṃ visṛjate
||11||yajñā babhūveti yajñasya punarālambhaṃ japati
||12||gomāniti prāṅudetya gomatīṃ japati
||13||atra vā yajamānabhāgaṃ prāśnīyāt
||14||yajña śaṃ ca ma upa ca ma āyuśca me balaṃ ca me yajña śivo me saṃtiṣṭhasva yajña sviṣṭo me saṃtiṣṭhasva yajñāriṣṭo me saṃtiṣṭhasveti darśapūrṇamāsābhyāṃ somena paśunā veṣṭvā japati
||15||vṛṣṭirasi vṛśca me pāpmānamṛtātsatyamupāgāmitīṣṭvāpa upaspṛśati | tadidaṃ sarvayajñeṣūpasparśanaṃ bhavati
||16||brāhmaṇāṃstarpayitavā iti saṃpreṣyati
||17||pravasankāle vihāramabhimukho yājamānaṃ japati
||18||prāco viṣṇukramānkrāmati
||19||prāṅudetya gomatīṃ japati japati
||20||