pāramparikam
|| śrīmate ramaṇāya namaḥ ||
prātassmarāmyaruṇaśailanitambadīvya-
tpuṇyāśrame ruciramañcavare śayānam |
prāvārakā''vṛtatanuṃ mukulīkṛtākṣa-
mantarmukhaṃ ramaṇamātmasamādhilīnam ||
||1||prātarnamāmyaruṇaśailavihāralola-
masparśayogasahajātmasamādhivaśyam |
āvirbhavannijasukhānubhavaikatṛpta-
mavyājabhūtakaruṇaṃ ramaṇaṃ śaraṇyam ||
||2||prātarbhajāmyapariluptanigūḍhaśaktiṃ
jñānāgnidagdhasahakāraṇajanmabījam |
lokaṃ samastamapi yojayituṃ sukhena
līlāgṛhītavapuṣaṃ ramaṇaṃ munīndram ||
||3||prātasstuve stutipathātigamaprameya -
māsevināmamṛtabhāvavidhānadakṣam |
āsecanaṃ nayanayoranavadyaśīla-
mahmonivāraṇacaṇaṃ ramaṇaṃ yatīndram ||
||4||prātarbruve ramaṇapāvananāmadheyaṃ
yadbhāgadheyamakhilasya tanoti jantoḥ |
āmreḍitaṃ harati yadvṛjinaṃ samastaṃ
yena kramādbhavatiso'hamiti prabodhaḥ ||
||5||yaḥ ślokapañcakamidaṃ paṭhati prabhāte
saubhāgyadaṃ bhagavato ramaṇeśvarasya |
tasmai samastajanakarmaphalapradātā
śreyassa eva ramaṇassakalaṃ dadāti ||
||6||iti śrīramaṇaprātassmaraṇastotraṃ samāptam