brahmāṇḍapurāṇam
oṃ asya śrīkṛṣṇāṣṭottaraśatanāmastotrasya śrīśeṣa ṛṣiḥ| anuṣṭup-chandaḥ| śrīkṛṣṇo devatā| śrīkṛṣṇaprītyarthe śrī-kṛṣṇāṣṭottaraśatanāmajape viniyogaḥ|
dhyānam
śikhimukuṭaviśeṣaṃ nīlapadmāṅgadeśaṃ
vidhumukhakṛtakeśaṃ kaustubhāpītaveśam |
madhuraravakaleśaṃ śaṃ bhaje bhrātṛśeṣaṃ
vrajajanavaniteśaṃ mādhavaṃ rādhikeśam ||
||1||śrīśeṣa uvāca
vasundhare varārohe janānāmasti muktidam |
sarvamaṅgalamūrdhanyamaṇimādyaṣṭasiddhidam ||
||2||mahāpātakakoṭighnaṃ sarvatīrthaphalapradam |
samastajapayajñānāṃ phaladaṃ pāpanāśanam ||
||3||śṛṇu devi pravakṣyāmi nāmnāmaṣṭottara śatam |
sahasranāmnāṃ puṇyānāṃ trirāvṛtyā tu yatphalam ||
||4||ekāvṛtyā tu kṛṣṇasya nāmaikaṃ tatprayacchati |
tasmātpuṇyataraṃ caitatstotraṃ pātakanāśanam ||
||5||nāmnāmaṣṭottaraśatasyāhameva ṛṣiḥ priye |
chando'nuṣṭubdevatā tu yogaḥ kṛṣṇapriyāvahaḥ ||
||6||stotram
śrīkṛṣṇaḥ kamalānātho vāsudevaḥ sanātanaḥ |
vasudevātmajaḥ puṇyo līlāmānuṣavigrahaḥ ||
||7||śrīvatsakaustubhadharo yaśodāvatsalo hariḥ |
caturbhujāttacakrāsigadāśaṅkhāmbujāyudhaḥ ||
||8||devakīnandanaḥ śrīśo nandagopapriyātmajaḥ |
yamunāvegasaṃhārī balabhadrapriyānujaḥ ||
||9||pūtanājīvitaharaḥ śakaṭāsurabhañjanaḥ |
nandavrajajanānandī saccidānandavigrahaḥ ||
||10||navanītaviliptāṅgo navanītanaṭo'naghaḥ |
navanītanavāhāro mucukundaprasādakaḥ ||
||11||ṣoḍaśastrīsahasreśastribhaṅgī madhurākṛtiḥ |
śukavāgamṛtābdhīndurgovindo yogināṃ patiḥ ||
||12||vatsavāṭacaro'nanto dhenukāsurabhañjanaḥ |
tṛṇīkṛtatṛṇāvarto yamalārjunabhañjanaḥ ||
||13||uttālatālabhettā ca tamālaśyāmalākṛtiḥ |
gopagopīśvaro yogī koṭisūryasamaprabhaḥ ||
||14||ilāpatiḥ parañjyotiryādavendro yadūdvahaḥ |
vanamālī pītavāsāḥ pārijātāpahārakaḥ ||
||15||govardhanācaloddhartā gopālaḥ sarvapālakaḥ |
ajo nirañjanaḥ kāmajanakaḥ kañjalocanaḥ ||
||16||madhuhā mathurānātho dvārakānāyako balī |
vṛndāvanāntasañcārī tulasīdāmabhūṣaṇaḥ ||
||17||syamantakamaṇerhartā naranārāyaṇātmakaḥ |
kubjākṛṣṇāmbaradharo māyī paramapūruṣaḥ ||
||18||muṣṭikāsuracāṇūramallayuddhaviśāradaḥ |
saṃsāravairī kaṃsārirmurārirnarakāntakaḥ ||
||19||anādibrahmacārī ca kṛṣṇāvyasanakarṣakaḥ |
śiśupālaśiraśchettā duryodhanakulāntakaḥ ||
||20||vidurākrūravarado viśvarūpapradarśakaḥ |
satyavāk satyasaṅkalpaḥ satyabhāmārato jayī ||
||21||subhadrāpūrvajo viṣṇurbhīṣmamuktipradāyakaḥ |
jagadgururjagannātho veṇunādaviśāradaḥ ||
||22||vṛṣabhāsuravidhvaṃsī bāṇāsurakarāntakaḥ |
yudhiṣṭhirapratiṣṭhātā barhibarhāvataṃsakaḥ ||
||23||pārthasārathiravyakto gītāmṛtamahodadhiḥ |
kālīyaphaṇimāṇikyarañjitaśrīpadāmbujaḥ ||
||24||dāmodaro yajñabhoktā dānavendravināśakaḥ |
nārāyaṇaḥ parabrahma pannagāśanavāhanaḥ ||
||25||jalakrīḍāsamāsaktagopīvastrāpahārakaḥ |
puṇyaślokastīrthapādo vedavedyo dayānidhiḥ ||
||26||sarvatīrthātmakaḥ sarvagraharūpī parātparaḥ |
ityevaṃ kṛṣṇadevasya nāmnāmaṣṭottaraṃ śatam ||
||27||kṛṣṇena kṛṣṇabhaktena śrutvā gītāmṛtaṃ purā |
stotraṃ kṛṣṇapriyakaraṃ kṛtaṃ tasmānmayā śrutam ||
||28||kṛṣṇapremāmṛtaṃ nāma paramānandadāyakam |
atyupadravaduḥkhaghnaṃ paramāyuṣyavardhanam ||
||29||dānaṃ vrataṃ tapastīrthaṃ yatkṛtaṃ tviha janmani |
paṭhatāṃ śṛṇvatāṃ caiva koṭikoṭiguṇaṃ bhavet ||
||30||puttrapradamaputtrāṇāmagatīnāṃ gatipradam |
dhanāvahaṃ daridrāṇāṃ jayecchūnāṃ jayāvaham ||
||31||śiśūnāṃ gokulānāṃ ca puṣṭidaṃ puṇyavardhanam |
bālarogagrahādīnāṃ śamanaṃ śāntikārakam ||
||32||ante kṛṣṇasmaraṇadaṃ bhavatāpatrayāpaham |
asiddhasādhakaṃ bhadre japādikaramātmanām ||
||33||kṛṣṇāya yādavendrāya jñānamudrāya yogine |
nāthāya rukmiṇīśāya namo vedāntavedine ||
||34||imaṃ mantraṃ mahādevi japanneva divāniśam |
sarvagrahānugrahabhāk sarvapriyatamo bhavet ||
||35||putrapautraiḥ parivṛtaḥ sarvasiddhisamṛddhimān |
niṣevyabhogānante'pi kṛṣṇasāyujyamāpyunāt ||
||36||iti śrībrahmāṇḍe mahāpurāṇe vāyuprokte madhyabhāge tṛtīya upodghātapāde bhārgavacarite ṣaṭtriṃśattamo'dhyāyāntargata śrīkṛṣṇāṣṭottaraśatanāmastotraṃ sampūrṇam