pāramparikam
aṣṭottaraśatasthāneṣvāvirbhūtaṃ jagatpatim |
namāmi jagatāmīśaṃ nārāyaṇamananyadhīḥ ||
||1||śrīvaikuṇṭhe vāsudevamāmode karṣaṇāhvayam |
pradyumnaṃ ca pramodākhye sammode cāniruddhakam ||
||2||satyaloke tathā viṣṇuṃ padmākṣaṃ sūryamaṇḍale |
kṣīrābdhau śeṣaśayanaṃ śvetadvīpetu tārakam ||
||3||nārāyaṇaṃ badaryākhye naimiṣe harimavyayam |
śālagrāmaṃ harikṣetre ayodhyāyāṃ raghūttamam ||
||4||mathurāyāṃ bālakṛṣṇaṃ māyāyāṃ madhusūdanam |
kāśyāṃ tu bhogaśayanamavantyāmavanīpatim ||
||5||dvāravatyāṃ yādavendraṃ vraje gopījanapriyam |
vṛndāvane nandasūnuṃ govindaṃ kāliyahrade ||
||6||govardhane gopaveṣaṃ bhavaghnaṃ bhaktavatsalam |
gomantaparvate śauriṃ haridvāre jagatpatim ||
||7||prayāge mādhavaṃ caiva gayāyāṃ tu gadādharam |
gaṅgāsāgarage viṣṇuṃ citrakūṭe tu rāghavam ||
||8||nandigrāme rākṣasaghnaṃ prabhāse viśvarūpiṇam |
śrīkūrme kūrmamacalaṃ nīlādrau puruṣottamam ||
||9||siṃhācale mahāsiṃhaṃ gadinaṃ tulasīvane |
ghṛtaśaile pāpaharaṃ śvetādrau siṃharūpiṇam ||
||10||yogānandaṃ dharmapuryāṃ kākule tvāndhranāyakam |
ahobile gāruḍādrau hiraṇyāsuramardanam ||
||11||viṭṭhalaṃ pāṇḍuraṅge tu veṅkaṭādrau ramāsakham |
nārāyaṇaṃ yādavādrau nṛsiṃhaṃ ghaṭikācale ||
||12||varadaṃ vāraṇagirau kāñcyāṃ kamalalocanam |
yathoktakāriṇaṃ caiva parameśapurāśrayam ||
||13||pāṇḍavānāṃ tathā dūtaṃ trivikramamathonnatam |
kāmāsikyāṃ nṛsiṃhaṃ ca tathāṣṭabhujasajñakam ||
||14||meghākāraṃ śubhākāraṃ śeṣākāraṃ tu śobhanam |
antarā śitikaṇṭhasya kāmakoṭyāṃ śubhapradam ||
||15||kālameghaṃ khagārūḍhaṃ koṭisūryasamaprabham |
divyaṃ dīpaprakāśaṃ ca devānāmadhipaṃ mune ||
||16||pravālavarṇaṃ dīpābhaṃ kāñcyāmaṣṭādaśasthitam |
śrīgṛdhrasarasastīre bhāntaṃ vijayarāghavam ||
||17||vīkṣāraṇye mahāpuṇye śayānaṃ vīrarāghavam |
totādrau tuṅgaśayanaṃ gajārtighnaṃ gajasthale ||
||18||mahābalaṃ balipure bhaktisāre jagatpatim |
mahāvarāhaṃ śrīmuṣṇe mahīndre padmalocanam ||
||19||śrīraṅge tu jagannāthaṃ śrīdhāme jānakīpriyam |
sārakṣetre sāranāthaṃ khaṇḍane haracāpaham ||
||20||śrīnivāsasthale pūrṇaṃ suvarṇaṃ svarṇamandire |
vyāghrapuryāṃ mahāviṣṇuṃ bhaktisthāne tu bhaktidam ||
||21||śvetahrade śāntamūrtimagnipuryāṃ surapriyam |
bhargākhyaṃ bhārgavasthāne vaikuṇṭhākhye tu mādhavam ||
||22||puruṣottame bhaktasakhaṃ cakratīrthe sudarśanam |
kumbhakoṇe cakrapāṇiṃ bhūtasthāne tu śārṅgiṇam ||
||23||kapisthale gajārtighnaṃ govindaṃ citrakūṭake |
anuttamaṃ cottamāyāṃ śvetādrau padmalocanam ||
||24||pārthasthale parabrahma kṛṣṇākoṭyāṃ madhudviṣam |
nandapuryāṃ mahānandaṃ vṛddhapuryāṃ vṛṣāśrayam ||
||25||asaṅgaṃ saṅgamagrāme śaraṇye śaraṇaṃ mahat |
dakṣiṇadvārakāyāṃ tu gopālaṃ jagatāṃ patim ||
||26||siṃhakṣetre mahāsiṃhaṃ mallāriṃ maṇimaṇḍape |
nibiḍe nibiḍākāraṃ dhānuṣke jagadīśvaram ||
||27||mauhūre kālameghaṃ tu madhurāyāṃ tu sundaram |
vṛṣabhādrau mahāpuṇye paramasvāmisajñakam ||
||28||śrīmadvaraguṇe nāthaṃ kurukāyāṃ ramāsakham |
goṣṭhīpure goṣṭhapatiṃ śayānaṃ darbhasaṃstare ||
||29||dhanvimaṅgalake śauriṃ balāḍhyaṃ bhramarasthale |
kuraṅge tu tathā pūrṇaṃ kṛṣṇāmekaṃ vaṭasthale ||
||30||acyutaṃ kṣudranadyāṃ tu padmanābhamanantake |
etāni viṣṇoḥ sthānāni pūjitāni mahātmabhiḥ ||
||31||adhiṣṭhitāni deveśa tatrāsīnaṃ ca mādhavam |
yaḥ smaretsatataṃ bhaktyā cetasānanyagāminā ||
||32||sa vidhūyātisaṃsārabandhaṃ yāti hareḥ padam |
aṣṭottaraśataṃ viṣṇoḥ sthānāni paṭhatā svayam ||
||33||adhītāḥ sakalā vedāḥ kṛtāśca vividhā makhāḥ |
sampāditā tathā muktiḥ paramānandadāyinī ||
||34||avagāḍhāni tīrthāni jñātaḥ sa bhagavān hariḥ
ādyametatsvayaṃ vyaktaṃ vimānaṃ raṅgasajñakam
śrīmuṣṇaṃ veṅkaṭādriṃ ca śālagrāmaṃ ca naimiṣam ||
||35||totādriṃ puṣkaraṃ caiva naranārāyaṇāśramam |
aṣṭau me mūrtayaḥ santi svayaṃ vyaktā mahītale ||
||36||iti śrīviṣṇoraṣṭottaraśatadivyasthānīyanāmastotraṃ sampūrṇam