cāturvarṇyeṣu sarveṣu hitāṃ vakṣyāmi niṣkṛtim
agamyā gamane caiva śuddhyai cāndrāyaṇaṃ caret
||1||ekaikaṃ hrāsayedgrāsaṃ kṛṣṇe śukle ca vardhayet
amāvāsyāṃ na bhuñjīta hyeṣa cāndrāyaṇo vidhiḥ
||2||kukkuṭāṇḍapramāṇaṃ tu grāsaṃ vai parikalpayet
anyāthā bhāvadoṣeṇa na dharmo na ca śudhyati
||3||prāyaścitte tataścīrṇe kuryādbrahmaṇabhojanam
godvayaṃ vastrayugmaṃ ca dadyādvipreṣu dakṣiṇām
||4||caṇḍālīṃ vā śvapākīṃ vā hyabhigacchati yo dvijaḥ
trirātramupavāsitvā viprāṇāmanuśāsanam
||5||saśikhaṃ pavanaṃ kṛtvā prājāpatyadvayaṃ caret
godvayaṃ dakṣiṇāṃ dadyācchuddhiṃ pārāśaro'bravīt
||6||kṣatriyo vātha vaiśyo vā caṇḍālīṃ gacchato yadi
prājāpatyadvayaṃ kuryāddadyādgomithunadvayam
||7||śvapākīṃ vātha caṇḍālīṃ śūdro vā yadi gacchati
prājāpatyaṃ caretkṛcchraṃ caturgomithunaṃ dadet
||8||mātaraṃ yadi gacchettu bhaginīṃ svasutāṃ tathā
etāstu mohito gatvā trīṇi kṛcchrāṇi saṃcaret
||9||cāndrāyaṇatrayaṃ kuryācchiśnacchedena śudhyati
mātṛṣvasṛgame caivamātmameḍhranikartanam
||10||ajñānena tu yo gacchetkuryāccāndrāyaṇadvayam
daśa gomithunaṃ dadyācchuddhiṃ pāraśaro'bravīt
||11||pitṛdārānsamāruhya māturāptāṃ tu bhrātṛjām
gurupātnīṃ snuṣāṃ caiva bhrātṛbhāryāṃ tathaiva ca
||12||mātulānīṃ sagotrāṃ ca prājāpatyatrayaṃ caret
godvayaṃ dakṣiṇāṃ dadyācchudhyate nātra saṃśayaḥ
||13||paśuveṣyādigamane mahiṣyuṣṭrīkapīstathā
kharīṃ ca sūkarīṃ gatvā prājāpatyavrataṃ caret
||14||gogāmī ca trirātreṇa gāmekāṃ brāhmaṇe dadan
mahiṣyuṣṭrīkharīgāmī tvahorātreṇa śudhyati
||15||ḍāmare samare vāpi durbhikṣe vā janakṣaye
bandigrāhe bhayārtā vā sadā svastrīṃ nirīkṣayet
||16||caṇḍālaiḥ saha saṃparkaṃ yā nārī kurute tataḥ
viprāndaśa varānkṛtvā svakaṃ doṣaṃ prakāśayet
||17||ākaṇṭhasaṃmite kūpe gomayodakakardame
tatra sthitvā nirāhārā tvahorātreṇa niṣkramet
||18||saśikhaṃ vapanaṃ kṛtvā bhuñjīyādyāvakaudanam
trirātramupavāsitvā tvekarātraṃ jale vaset
||19||śaṃkhapuṣpīlatāmūlaṃ patraṃ vā kusumaṃ phalam
suvarṇaṃ pañcagavyaṃ ca kvāthayitvā pibejjalam
||20||ekabhaktaṃ caretpaścādyāvatpuṣpavatī bhavet
vrataṃ carati tadyāvattāvatsaṃvasate bahiḥ
||21||prāyaścitte tataścīrṇe kuryādbrāhmaṇabhojanam
godvayaṃ dakṣiṇāṃ dadyacchuddhiṃ pārāśaro'bravīt
||22||cāturvarṇyasya nārīṇāṃ kṛcchraṃ cāndrāyaṇaṃ vratam
yathā bhūmistathā nārī tasmāttāṃ na tu dūṣayet
||23||bandigrāheṇa yā bhuktā hatvā baddhvā balādbhayāt
kṛtvā sāṃtapanaṃ kṛcchraṃ śudhyetpārāśaro'bravīt
||24||sakṛdbhuktā tu yā nārī necchantī pāpakarmabhiḥ
prājāpatyena śudhyeta ṛtuprasravaṇena ca
||25||patatyardhaṃ śarīrasya yasya bhāryā surāṃ pibet
patitārdhaśarīrasya niṣkṛtirna vidhīyate
||26||gāyatrīṃ japamānastu kṛcchraṃ sāṃtapanaṃ caret
gomūtraṃ gomayaṃ kṣīraṃ dadhi sarpiḥ kuśodakam
||27||ekarātropavāsaśca kṛcchraṃ sāṃtapanaṃ smṛtam
jāreṇa janayedgarbhaṃ mṛte'vyakte gate patau
||28||tāṃ tyajedapare rāṣṭre patitāṃ pāpakāriṇīm
brāhmaṇī tu yadā gacchetparapuṃsā samanvitā
||29||sā tu naṣṭā vinirdiṣṭā na tasyāgamanaṃ punaḥ
kāmānmohāttu yā gacchettyaktvā bandhūnsutānpatim
||30||sā tu naṣṭā pare loke mānuṣeṣu viśeṣataḥ
madamohagatā nārī krodhāddaṇḍāditāḍitā
||31||advitīyā gatā caiva punarāgamanaṃ bhavet
daśame tu dine prāpte prāyaścittaṃ na vidyate
||32||daśāhaṃ na tyajennārīṃ tyajennaṣṭaśrutāṃ tathā
bhartā caiva caretkṛcchraṃ kṛcchārdhaṃ caiva bāndhavāḥ
||33||teṣāṃ bhuktvā ca pītvā ca ahorātreṇa śudhyati
brāhmaṇī tu yadā gacchetparapuṃsā vivarjitā
||34||gatvā puṃsāṃ śataṃ yāti tyajeyustāṃ tu gotriṇaḥ
puṃso yadi gṛhe gacchettadaśuddhaṃ gṛhaṃ bhavet
||35||patimātṛgṛhaṃ yacca jārasyaiva tu tadgṛham
ullikhya tadgṛhaṃ paścātpañcagavyena secayet
||36||tyajecca mṛṇmayaṃ pātraṃ vastraṃ kāṣṭhaṃ ca śodhayet
saṃbhārānśodhayetsarvāngobālaiśca phalodbhavān
||37||tāmrāṇi pañcagavyena kāṃsyāni daśa bhasmabhiḥ
prāyaścittaṃ caredvipro brāhmaṇairupapāditam
||38||godvayaṃ dakṣiṇāṃ dadyātprājāpatyadvayaṃ caret
itareṣāmahorātraṃ pañcagavyaṃ ca śodhanam
||39||upavāsairvrataiḥ puṇyaiḥ snānasaṃdhyārcanādibhiḥ
japahomadayādānaiḥ śudhyante brāhmaṇādayaḥ
||40||ākāśaṃ vāyuragniśca medhyaṃ bhūmigataṃ jalam
na praduṣyanti darbhāśca yajñeṣu camasā yathā
||41||