śrīśaṅkarabhagavatpādakṛtam
śriyāśliṣṭo viṣṇuḥ sthiracaragururvedaviṣayo
dhiyāṃ sākṣī śuddho harirasurahantābjanayanaḥ |
gadī śaṅkhī cakrī vimalavanamālī sthiraruciḥ
śaraṇyo lokeśo mama bhavatu kṛṣṇo'kṣiviṣayaḥ ||
||1||yataḥ sarvaṃ jātaṃ viyadanilamukhyaṃ jagadidaṃ
sthitau niḥśeṣaṃ yo'vati nijasukhāṃśena madhuhā |
laye sarvaṃ svasmin harati kalayā yastu sa vibhuḥ
śaraṇyo lokeśo mama bhavatu kṛṣṇo'kṣiviṣayaḥ ||
||2||asūnāyamyādau yamaniyamamukhyaiḥ sukaraṇaiḥ
niruddhyedaṃ cittaṃ hṛdi vilayamānīya sakalam |
yamīḍyaṃ paśyanti pravaramatayo māyinamasau
śaraṇyo lokeśo mama bhavatu kṛṣṇo'kṣiviṣayaḥ ||
||3||pṛthivyāṃ tiṣṭhan yo yamayati mahīṃ veda na dharā
yamityādau vedo vadati jagatāmīśamamalam |
niyantāraṃ dhyeyaṃ munisuranṛṇāṃ mokṣadamasau
śaraṇyo lokeśo mama bhavatu kṛṣṇo'kṣiviṣayaḥ ||
||4||mahendrādirdevo jayati ditijān yasya balato
na kasya svātantryaṃ kvacidapi kṛtau yatkṛtimṛte |
balārātergarvaṃ pariharati yo'sau vijayinaḥ
śaraṇyo lokeśo mama bhavatu kṛṣṇo'kṣiviṣayaḥ ||
||5||vinā yasya dhyānaṃ vrajati paśutāṃ sūkaramukhāṃ
vinā yasya jñānaṃ janimṛtibhayaṃ yāti janatā |
vinā yasya smṛtyā kṛmiśatajaniṃ yāti sa vibhuḥ
śaraṇyo lokeśo mama bhavatu kṛṣṇo'kṣiviṣayaḥ ||
||6||narātaṅkoṭṭaṅkaḥ śaraṇaśaraṇo bhrāntiharaṇo
ghanaśyāmo vāmo vrajaśiśuvayasyo'rjunasakhaḥ |
svayambhūrbhūtānāṃ janaka ucitācārasukhadaḥ
śaraṇyo lokeśo mama bhavatu kṛṣṇo'kṣiviṣayaḥ ||
||7||yadā dharmaglānirbhavati jagatāṃ kṣobhakaraṇī
tadā lokasvāmī prakaṭitavapuḥ setudhṛgajaḥ |
satāṃ dhātā svaccho nigamagaṇagīto vrajapatiḥ
śaraṇyo lokeśo mama bhavatu kṛṣṇo'kṣiviṣayaḥ ||
||8||iti śrīmatparamahaṃsaparivrājakācāryasya śrī-govinda-bhagavatpūjya-pāda-śiṣyasya śrīmacchaṅkarabhagavataḥ kṛtau śrī-kṛṣṇāṣṭakaṃ sampūrṇam