Śaṅkara by tradition
manonivṛttiḥ paramopaśāntiḥ
sā tīrthavaryā maṇikarṇikā ca |
jñānapravāhā vimalādigaṅgā
sā kāśikāhaṃ nijabodharūpā ||
||1||yasyāmidaṃ kalpitamindrajālaṃ
carācaraṃ bhāti manovilāsam |
saccitsukhaikā paramātmarūpā
sā kāśikāhaṃ nijabodharūpā ||
||2||kośeṣu pañcasvadhirājamānā
buddhirbhavānī pratidehageham |
sākṣī śivaḥ sarvagato'ntarātmā
sā kāśikāhaṃ nijabodharūpā ||
||3||kāśyāṃ hi kāśyate kāśī kāśī sarvaprakāśikā |
sā kāśī viditā yena tena prāptā hi kāśikā ||
||4||kāśīkṣetraṃ śarīraṃ tribhuvana-jananī vyāpinī jñānagaṅgā |
bhaktiḥ śraddhā gayeyaṃ nijaguru-caraṇadhyānayogaḥ prayāgaḥ |
viśveśo'yaṃ turīyaḥ sakalajana-manaḥsākṣibhūto'ntarātmā
dehe sarvaṃ madīye yadi vasati punastīrthamanyatkimasti ||
||5||iti śrīmad śaṅkarācāryaviracitaṃ kāśīpañcakaṃ samāptam |