Śrīśaṅkarabhagavatpādakṛtā
acakṣuṣṭvān na dṛṣṭirme tathāśrotasya kā śrutiḥ |
avāktvān na tu vaktiḥ syādamanastvān matiḥ kutaḥ ||
||1||aprāṇasya na karmāsti buddhyabhāve na veditā |
vidyāvidye tato na staścinmātrajyotiṣo mama ||
||2||nityamuktasya śuddhasya kūṭasthasyāvicālinaḥ |
amṛtasyākṣarasyaivamaśarīrasya sarvadā ||
||3||jighatsā vā pipāsā vā śokamohau jarāmṛtī |
na vidyante'śarīratvād vyomavad vyāpino mama ||
||4||asparśatvān na me spṛṣṭirnājihvatvād rasajñatā |
nityavijñānarūpasya jñānājñāne na me sadā ||
||5||yā tu syān mānasī vṛttiścākṣuṣkā rūparañjanā |
nityamevātmano dṛṣṭyā nityayā dṛśyate hi sā ||
||6||tathānyendriyayuktā yā vṛttayo viṣayāñjanāḥ |
smṛtī rāgādirūpā ca kevalāntarmanasyapi ||
||7||mānasyastadvadanyasya dṛśyante svapnavṛttayaḥ |
draṣṭurdṛṣṭistato nityā śuddhānantā ca kevalā ||
||8||anityā sāviśuddheti gṛhyate'trāvivekataḥ |
sukhī duḥkhī tathā cāhaṃ dṛśyayopādhibhūtayā ||
||9||mūḍhayā mūḍha ityevaṃ śuddhayā śuddha ityapi |
manyate sarvaloko'yaṃ yena saṃsāraṃ ṛcchati ||
||10||acakṣuṣṭvādiśāstroktaṃ sabāhyābhyantaraṃ hyajam |
nityamuktamihātmānaṃ mumukṣuścet sadā smaret ||
||11||acakṣuṣṭvādiśāstrāc ca nendriyāṇi sadā mama |
aprāṇo hyamanāḥ śubhra iti cātharvaṇe vacaḥ ||
||12||śabdādīnāmabhāvaśca śrūyate mama kāṭhake |
aprāṇo hyamanā yasmādavikārī sadā hyaham ||
||13||vikṣepo nāsti tasmān me na samādhistato mama |
vikṣepo vā samādhirvā manasaḥ syād vikāriṇaḥ ||
||14||amanaskasya śuddhasya kathaṃ tat syād dvayaṃ mama |
amanastvāvikāritve videhavyāpino mama ||
||15||ityetad yāvadajñānaṃ tāvat kāryaṃ mamābhavat |
nityamuktasya śuddhasya buddhasya ca sadā mama ||
||16||samādhirvāsamādhirvā kāryaṃ vānyat kuto bhavet |
māṃ hi dhyātvā ca buddhvā ca manyante kṛtakṛtyatām ||
||17||ahaṃ brahmāsmi sarvo'smi śuddho buddho'sitaḥ sadā |
ajaḥ sarvaga evāhamajaraścāmṛto'kṣayaḥ ||
||18||madanyaḥ sarvabhūteṣu boddhā kaścin na vidyate |
karmādhyakṣaśca sākṣī ca cetā nityo'guṇo'dvayaḥ ||
||19||na sac cāhaṃ na cāsac ca nobhayaṃ kevalaḥ śivaḥ |
na me saṃdhyā na rātrirvā nāharvā sarvadā dṛśeḥ ||
||20||sarvamūrtiviyuktaṃ yad yathā khaṃ sūkṣmamadvayam |
tenāpyasmi vinābhūtaṃ brahmaivāhaṃ tathādvayam ||
||21||mamātmāsya ta ātmeti bhedo vyomno yathā bhavet |
ekasya suṣibhedena tathā mama vikalpitaḥ ||
||22||bhedo'bhedastathā caiko nānā ceti vikalpitam |
jñeyaṃ jñātā gatirgantā mayyekasmin kuto bhavet ||
||23||na me heyaṃ na cādeyamavikārī yato hyaham |
sadā muktastathā śuddhaḥ sadā buddho'guṇo'dvayaḥ ||
||24||ityevaṃ sarvadātmānāṃ vidyāt sarvaṃ samāhitaḥ |
viditvā māṃ svadehasthaṃ ṛṣirmukto dhruvo bhavet ||
||25||kṛtakṛtyaśca siddhaśca yogī brāhmaṇa eva ca |
yadaivaṃ veda tattvārthamanyathā hyātmahā bhavet ||
||26||vedārtho niścito hyeṣa samāsena mayoditaḥ |
saṃnyāsibhyaḥ pravaktavyaḥ śāntebhyaḥ śiṣṭabuddhinā ||
||27||