skandapurāṇam
agastya uvāca
vinā snānena gaṅgāyāṃ nṛṇāṃ janma nirarthakam |
upāyāntaramastyanyad yena snānaphalaṃ labhet ||
||1||aśaktānāṃ ca paṅgūnāmālasyopahatātmanām |
dūradeśāntarasthānāṃ gaṅgāsnānaṃ kathaṃ bhavet ||
||2||dānaṃ vātha vrataṃ vātha mantraḥ stotraṃ japo'thavā |
tīrthāntarābhiṣeko vā devatopāsanaṃ tu vā ||
||3||yadyasti kiñcit ṣaḍvaktra gaṅgāsnānaphalapradam |
vidhānāntaramātreṇa tad vada praṇatāya me ||
||4||tvatto na veda skandānyo gaṅgāgarbhasamudbhava |
paraṃ svargataraṅgiṇyāṃ mahimānaṃ mahāmate ||
||5||skanda uvāca
santi puṇyajalānīha sarāṃsi sarito mune |
sthāne sthāne ca tīrthāni jitātmādhyuṣitāni ca ||
||6||dṛṣṭapratyayakārīṇi mahāmahimabhāñjyapi |
paraṃ svargataraṅgiṇyāḥ koṭyaṃśo'pi na tatra vai ||
||7||anenaivānumānena buddhyasva kalaśodbhava |
dadhre gaṅgottamāṅgena devadevena śambhunā ||
||8||snānakāle'nyatīrtheṣu japyate jāhnavī janaiḥ |
vinā viṣṇupadīṃ kvānyat samarthamaghamocane ||
||9||gaṅgāsnānaphalaṃ brahman gaṅgāyāmeva labhyate |
yathā drākṣāphalasvādo drākṣāyāmeva nānyataḥ ||
||10||astyupāya iha tvekaḥ syād yenāvikalaṃ phalam |
snānasya devasarito mahāguhyatamo mune ||
||11||śivabhaktāya śāntāya viṣṇubhaktiparāya ca |
śraddhālave tvāstikāya garbhavāsamumukṣave ||
||12||kathanīyaṃ na cānyasya kasyacit kenacit kvacit |
idaṃ rahasyaṃ paramaṃ mahāpātakanāśanam ||
||13||mahāśreyaskaraṃ puṇyaṃ manorathakaraṃ param |
dyunadīprītijanakaṃ śivasantoṣasantatiḥ ||
||14||nāmnāṃ sahasraṃ gaṅgāyāḥ stavarājeṣu śobhanam |
japyānāṃ paramaṃ japyaṃ vedopaniṣadāṃ samam ||
||15||japanīyaṃ prayatnena mauninā vācakaṃ vinā |
śucisthāneṣu śucinā suspaṣṭākṣarameva ca ||
||16||dhyānam
śailendrādavatāriṇī nijajale majjadjanottāriṇī
pārāvāravihāriṇī bhavabhayaśreṇī samutsāriṇī |
śeṣāheranukāriṇī haraśirovallīdalākāriṇī
kāśīprāntavihāriṇī vijayate gaṅgā manohāriṇī ||
||17||oṃ namo gaṅgādevyai
oṃkārarūpiṇyajarā'tulā'nantā'mṛtasravā |
atyudārā'bhayā'śokā'lakanandā'mṛtā'malā ||
||18||anāthavatsalā'moghā'pāṃyoniramṛtapradā |
avyaktalakṣaṇā'kṣobhyā'navacchinnā'parā'jitā ||
||19||anāthanāthā'bhīṣṭārthasiddhidā'naṅgavardhinī |
aṇimādiguṇā'dhārā'gragaṇyā'līkahāriṇī ||
||20||acintyaśaktiranaghā'dbhutarūpā'ghahāriṇī |
adrirājasutā'ṣṭāṅgayogasiddhipradā'cyutā ||
||21||akṣuṇṇaśaktirasudā'nantatīrthā'mṛtodakā |
anantamahimā'pārā'nantasaukhyapradā'nnadā ||
||22||aśeṣadevatāmūrtiraghorā'mṛtarūpiṇī |
avidyājālaśamanī hyapratarkyagatipradā ||
||23||aśeṣavighnasaṃhartrī tvaśeṣaguṇagumphitā |
ajñānatimirajyotiranugrahaparāyaṇā ||
||24||abhirāmā'navadyāṅgyanantasārā'kalaṅkinī |
ārogyadā''nandavallī tvāpannārtivināśinī ||
||25||āścaryamūrtirāyuṣyā hyāḍhyā''dyā''prā''ryasevitā |
āpyāyinyāptavidyākhyā tvānandā''śvāsadāyinī ||
||26||ālasyaghnyāpadāṃ hantrī hyānandāmṛtavarṣiṇī |
irāvatīṣṭadātrīṣṭā tviṣṭāpūrtaphalapradā ||
||27||itihāsaśrutīḍyārthā tvihāmutraśubhapradā |
ijyāśīlasamijyeṣṭhā tvindrādiparivanditā ||
||28||ilālaṅkāramāleddhā tvindirāramyamandirā |
idindirādisaṃsevyā tvīśvarīśvaravallabhā ||
||29||ītibhītihareḍyā ca tvīḍanīyacaritrabhṛt |
utkṛṣṭaśaktirutkṛṣṭoḍupamaṇḍalacāriṇī ||
||30||uditāmbaramārgosroragalokavihāriṇī |
ukṣorvarotpalotkumbhā upendracaraṇadravā ||
||31||udanvatpūrtihetuścodārotsāhapravardhinī |
udvegaghnyuṣṇaśamanī hyuṣṇaraśmisutāpriyā ||
||32||utpattisthitisaṃhārakāriṇyuparicāriṇī |
ūrjaṃ vahantyūrjadharorjāvatī cormimālinī ||
||33||ūrdhvaretaḥpriyordhvādhvā hyūrmilordhvagatipradā |
ṛṣivṛndastutarddhiśca ṛṇatrayavināśinī ||
||34||ṛtambhararddhidātrī ca ṛksvarūpā ṛjupriyā |
ṛkṣamārgavaharkṣārcirṛjumārgapradarśinī ||
||35||edhitākhiladharmārthā tvekaikāmṛtadāyinī |
edhanīyasvabhāvaijyā tvejitāśeṣapātakā ||
||36||aiśvaryadaiśvaryarūpā hyaitihyaṃ hyaindavīdyutiḥ |
ojasvinyoṣadhīkṣetramojodaudanadāyinī ||
||37||oṣṭhāmṛtaunnatyadātrī tvauṣadhaṃ bhavarogiṇām |
audāryacañcuraupendrī tvaugrī hyaumeyarūpiṇī ||
||38||ambarādhvavahāmbaṣṭhāmbaramālāmbujekṣaṇā |
ambikāmbumahāyonirandhodāndhakahāriṇī ||
||39||aṃśumālā hyaṃśumatī tvaṅgīkṛtaṣaḍānanā |
andhatāmisrahantryandhurañjanā hyañjanāvatī ||
||40||kalyāṇakāriṇī kāmyā kamalotpalagandhinī |
kumudvatī kamalinī kāntiḥ kalpitadāyinī ||
||41||kāñcanākṣī kāmadhenuḥ kīrtikṛt kleśanāśinī |
kratuśreṣṭhā kratuphalā karmabandhavibhedinī ||
||42||kamalākṣī klamaharā kṛśānutapanadyutiḥ |
karuṇārdrā ca kalyāṇī kalikalmaṣanāśinī ||
||43||kāmarūpā kriyāśaktiḥ kamalotpalamālinī |
kūṭasthā karuṇā kāntā kūrmayānā kalāvatī ||
||44||kamalā kalpalatikā kālī kaluṣavairiṇī |
kamanīyajalā kamrā kapardisukapardagā ||
||45||kālakūṭapraśamanī kadambakusumapriyā |
kālindī kelilalitā kalakallolamālikā ||
||46||krāntalokatrayā kaṇḍūḥ kaṇḍūtanayavatsalā |
khaḍginī khaḍgadhārābhā khagā khaṇḍendudhāriṇī ||
||47||khekhelagāminī khasthā khaṇḍendutilakapriyā |
khecarī khecarīvandyā khyātiḥ khyātipradāyinī ||
||48||khaṇḍitapraṇatāghaughā khalabuddhivināśinī |
khātainaḥ kandasandohā khaḍgakhaṭvāṅga kheṭinī ||
||49||kharasantāpaśamanī khaniḥ pīyūṣapāthasām |
gaṅgā gandhavatī gaurī gandharvanagarapriyā ||
||50||gambhīrāṅgī guṇamayī gatātaṅkā gatipriyā |
gaṇanāthāmbikā gītā gadyapadyapariṣṭutā ||
||51||gāndhārī garbhaśamanī gatibhraṣṭagatipradā |
gomatī guhyavidyā gaurgoptrī gaganagāminī ||
||52||gotrapravardhinī guṇyā guṇātītā guṇāgraṇīḥ |
guhāmbikā girisutā govindāṅghrisamudbhavā ||
||53||guṇanīyacaritrā ca gāyatrī giriśapriyā |
gūḍharūpā guṇavatī gurvī gauravavardhinī ||
||54||grahapīḍāharā gundrā garaghnī gānavatsalā |
gharmahantrī ghṛtavatī ghṛtatuṣṭipradāyinī ||
||55||ghaṇṭāravapriyā ghorāghaughavidhvaṃsakāriṇī |
ghrāṇatuṣṭikarī ghoṣā ghanānandā ghanapriyā ||
||56||ghātukā ghūrṇitajalā ghṛṣṭapātakasantatiḥ |
ghaṭakoṭiprapītāpā ghaṭitāśeṣamaṅgalā ||
||57||ghṛṇāvatī ghṛṇinidhirghasmarā ghūkanādinī |
ghusṛṇāpiñjaratanurghargharā ghargharasvanā ||
||58||candrikā candrakāntāmbuścañcadāpā caladyutiḥ |
cinmayī citirūpā ca candrāyutaśatānanā ||
||59||cāmpeyalocanā cāruścārvaṅgī cārugāminī |
cāryā cāritranilayā citrakṛccitrarūpiṇī ||
||60||campūścandanaśucyambuścarcanīyā cirasthirā |
cārucampakamālāḍhyā camitāśeṣaduṣkṛtā ||
||61||cidākāśavahā cintyā cañcaccāmaravījitā |
coritāśeṣavṛjinā caritāśeṣamaṇḍalā ||
||62||cheditākhilapāpaughā chadmaghnī chalahāriṇī |
channatriviṣṭapatalā choṭitāśeṣabandhanā ||
||63||churitāmṛtadhāraughā chinnaināśchandagāminī |
chatrīkṛtamarālaughā chaṭīkṛtanijāmṛtā ||
||64||jāhnavī jyā jaganmātā japyā jaṅghālavīcikā |
jayā janārdanaprītā juṣaṇīyā jagaddhitā ||
||65||jīvanaṃ jīvanaprāṇā jagajjyeṣṭhā jaganmayī |
jīvajīvātulatikā janmijanmanibarhiṇī ||
||66||jāḍyavidhvaṃsanakarī jagadyonirjalāvilā |
jagadānandajananī jalajā jalajekṣaṇā ||
||67||janalocanapīyūṣā jaṭātaṭavihāriṇī |
jayantī jañjapūkaghnī janitajñānavigrahā ||
||68||jhallarīvādyakuśalā jhalajjhālajalāvṛtā |
jhiṇṭīśavandyā jhaṅkārakāriṇī jharjharāvatī ||
||69||ṭīkitāśeṣapātālā ṭaṅkikaino'dripāṭane |
ṭaṅkāranṛtyatkallolā ṭīkanīyamahātaṭā ||
||70||ḍambarapravahā ḍīnarājahaṃsakulākulā |
ḍamaḍḍamaruhastā ca ḍāmaroktamahāṇḍakā ||
||71||ḍhaukitāśeṣanirvāṇā ḍhakkānādacalajjalā |
ḍhuṇḍhivighneśajananī ḍhaṇaḍḍhuṇitapātakā ||
||72||tarpaṇī tīrthatīrthā ca tripathā tridaśeśvarī |
trilokagoptrī toyeśī trailokyaparivanditā ||
||73||tāpatritayasaṃhartrī tejobalavivardhinī |
trilakṣyā tāraṇī tārā tārāpatikarārcitā ||
||74||trailokyapāvanī puṇyā tuṣṭidā tuṣṭirūpiṇī |
tṛṣṇācchetrī tīrthamātā trivikramapadodbhavā ||
||75||tapomayī taporūpā tapaḥstomaphalapradā |
trailokyavyāpinī tṛptistṛptikṛttattvarūpiṇī ||
||76||trailokyasundarī turyā turyātītaphalapradā |
trailokyalakṣmīstripadī tathyā timiracandrikā ||
||77||tejogarbhā tapassārā tripurāriśirogṛhā |
trayīsvarūpiṇī tanvī tapanāṅgajabhītinut ||
||78||taristaraṇijāmitraṃ tarpitāśeṣapūrvajā |
tulāvirahitā tīvrapāpatūlatanūnapāt ||
||79||dāridryadamanī dakṣā duṣprekṣā divyamaṇḍanā |
dīkṣāvatī durāvāpyā drākṣāmadhuravāribhṛt ||
||80||darśitānekakutukā duṣṭadurjayaduḥkhahṛt |
dainyahṛdduritaghnī ca dānavāripadābjajā ||
||81||dandaśūkaviṣaghnī ca dāritāghaughasantatiḥ |
drutā devadrumacchannā durvārāghavighātinī ||
||82||damagrāhyā devamātā devalokapradarśinī |
devadevapriyā devī dikpālapadadāyinī ||
||83||dīrghāyuḥ kāriṇī dīrghā dogdhrī dūṣaṇavarjitā |
dugdhāmbuvāhinī dohyā divyā divyagatipradā ||
||84||dyunadī dīnaśaraṇaṃ dehidehanivāriṇī |
drāghīyasī dāghahantrī ditapātakasantatiḥ ||
||85||dūradeśāntaracarī durgamā devavallabhā |
durvṛttaghnī durvigāhyā dayādhārā dayāvatī ||
||86||durāsadā dānaśīlā drāviṇī druhiṇastutā |
daityadānavasaṃśuddhikartrī durbuddhihāriṇī ||
||87||dānasārā dayāsārā dyāvābhūmivigāhinī |
dṛṣṭādṛṣṭaphalaprāptirdevatāvṛndavanditā ||
||88||dīrghavratā dīrghadṛṣṭirdīptatoyā durālabhā |
daṇḍayitrī daṇḍanītirduṣṭadaṇḍadharārcitā ||
||89||durodaraghnī dāvārcirdravaddravyaikaśevadhiḥ |
dīnasantāpaśamanī dātrī davathuvairiṇī ||
||90||darīvidāraṇaparā dāntā dāntajanapriyā |
dāritādritaṭā durgā durgāraṇyapracāriṇī ||
||91||dharmadravā dharmadhurā dhenurdhīrā dhṛtirdhruvā |
dhenudānaphalasparśā dharmakāmārthamokṣadā ||
||92||dharmormivāhinī dhuryā dhātrī dhātrīvibhūṣaṇam |
dharmiṇī dharmaśīlā ca dhanvikoṭikṛtāvanā ||
||93||dhyātṛpāpaharā dhyeyā dhāvanī dhūtakalmaṣā |
dharmadhārā dharmasārā dhanadā dhanavardhinī ||
||94||dharmādharmaguṇacchetrī dhattūrakusumapriyā |
dharmeśī dharmaśāstrajñā dhanadhānyasamṛddhikṛt ||
||95||dharmalabhyā dharmajalā dharmaprasavadharmiṇī |
dhyānagamyasvarūpā ca dharaṇī dhātṛpūjitā ||
||96||dhūrdhūrjaṭijaṭāsaṃsthā dhanyā dhīrdhāraṇāvatī |
nandā nirvāṇajananī nandinī nunnapātakā ||
||97||niṣiddhavighnanicayā nijānandaprakāśinī |
nabho'ṅgaṇacarī nūtirnamyā nārāyaṇī nutā ||
||98||nirmalā nirmalākhyānā nāśinī tāpasampadām |
niyatā nityasukhadā nānāścaryamahānidhiḥ ||
||99||nadī nadasaromātā nāyikā nākadīrghikā |
naṣṭoddharaṇadhīrā ca nandanā nandadāyinī ||
||100||nirṇiktāśeṣabhuvanā niḥsaṅgā nirupadravā |
nirālambā niṣprapañcā nirṇāśitamahāmalā ||
||101||nirmalajñānajananī niḥśeṣaprāṇitāpahṛt |
nityotsavā nityatṛptā namaskāryā nirañjanā ||
||102||niṣṭhāvatī nirātaṅkā nirlepā niścalātmikā |
niravadyā nirīhā ca nīlalohitamūrdhagā ||
||103||nandibhṛṅgigaṇastutyā nāgā nandā nagātmajā |
niṣpratyūhā nākanadī nirayārṇavadīrghanauḥ ||
||104||puṇyapradā puṇyagarbhā puṇyā puṇyataraṅgiṇī |
pṛthuḥ pṛthuphalā pūrṇā praṇatārtiprabhañjanī ||
||105||prāṇadā prāṇijananī prāṇeśī prāṇarūpiṇī |
padmālayā parāśaktiḥ purajitparamapriyā ||
||106||parā paraphalaprāptiḥ pāvanī ca payasvinī |
parānandā prakṛṣṭārthā pratiṣṭhā pālinī parā ||
||107||purāṇapaṭhitā prītā praṇavākṣararūpiṇī |
pārvatī premasampannā paśupāśavimocanī ||
||108||paramātmasvarūpā ca parabrahmaprakāśinī |
paramānandaniṣyandā prāyaścittasvarūpiṇī ||
||109||pānīyarūpanirvāṇā paritrāṇaparāyaṇā |
pāpendhanadavajvālā pāpāriḥ pāpanāmanut ||
||110||paramaiśvaryajananī prajñā prājñā parāparā |
pratyakṣalakṣmīḥ padmākṣī paravyomāmṛtasravā ||
||111||prasannarūpā praṇidhiḥ pūtā pratyakṣadevatā |
pinākiparamaprītā parameṣṭhikamaṇḍaluḥ ||
||112||padmanābhapadārghyeṇa prasūtā padmamālinī |
pararddhidā puṣṭikarī pathyā pūrtiḥ prabhāvatī ||
||113||punānā pītagarbhaghnī pāpaparvatanāśinī |
phalinī phalahastā ca phullāmbujavilocanā ||
||114||phālitainomahākṣetrā phaṇilokavibhūṣaṇam |
phenacchalapraṇunnaināḥ phullakairavagandhinī ||
||115||phenilācchāmbudhārābhā phaḍuccāṭitapātakā |
phāṇitasvādusalilā phāṇṭapathyajalāvilā ||
||116||viśvamātā ca viśveśī viśvā viśveśvarapriyā |
brahmaṇyā brahmakṛd brāhmī brahmiṣṭhā vimalodakā ||
||117||vibhāvarī ca virajā vikrāntānekaviṣṭapā |
viśvamitraṃ viṣṇupadī vaiṣṇavī vaiṣṇavapriyā ||
||118||virūpākṣapriyakarī vibhūtirviśvatomukhī |
vipāśā vaibudhī vedyā vedākṣararasasravā ||
||119||vidyā vegavatī vandyā bṛṃhaṇī brahmavādinī |
varadā viprakṛṣṭā ca variṣṭhā ca viśodhanī ||
||120||vidyādharī viśokā ca vayovṛndaniṣevitā |
bahūdakā balavatī vyomasthā vibudhapriyā ||
||121||vāṇī vedavatī vittā brahmavidyātaraṅgiṇī |
brahmāṇḍakoṭivyāptāmburbrahmahatyāpahāriṇī ||
||122||brahmeśaviṣṇurūpā ca buddhirvibhavavardhinī |
vilāsisukhadā vaśyā vyāpinī ca vṛṣāraṇiḥ ||
||123||vṛṣāṅkamaulinilayā vipannārtiprabhañjanī |
vinītā vinatā bradhnatanayā vinayānvitā ||
||124||vipañcī vādyakuśalā veṇuśrutivicakṣaṇā |
varcaskarī balakarī balonmūlitakalmaṣā ||
||125||vipāpmā vigatātaṅkā vikalpaparivarjitā |
vṛṣṭikartrī vṛṣṭijalā vidhirvicchinnabandhanā ||
||126||vratarūpā vittarūpā bahuvighnavināśakṛt |
vasudhārā vasumatī vicitrāṅgī vibhāvasuḥ ||
||127||vijayā viśvabījaṃ ca vāmadevī varapradā |
vṛṣāśritā viṣaghnī ca vijñānormyaṃśumālinī ||
||128||bhavyā bhogavatī bhadrā bhavānī bhūtabhāvinī |
bhūtadhātrī bhayaharā bhaktadāridryaghātinī ||
||129||bhuktimuktipradā bheśī bhaktasvargāpavargadā |
bhāgīrathī bhānumatī bhāgyaṃ bhogavatī bhṛtiḥ ||
||130||bhavapriyā bhavadveṣṭrī bhūtidā bhūtibhūṣaṇā |
bhālalocanabhāvajñā bhūtabhavyabhavatprabhuḥ ||
||131||bhrāntijñānapraśamanī bhinnabrahmāṇḍamaṇḍapā |
bhūridā bhaktasulabhā bhāgyavaddṛṣṭigocarī ||
||132||bhañjitopaplavakulā bhakṣyabhojyasukhapradā |
bhikṣaṇīyā bhikṣumātā bhāvā bhāvasvarūpiṇī ||
||133||mandākinī mahānandā mātā muktitaraṅgiṇī |
mahodayā madhumatī mahāpuṇyā mudākarī ||
||134||munistutā mohahantrī mahātīrthā madhusravā |
mādhavī māninī mānyā manorathapathātigā ||
||135||mokṣadā matidā mukhyā mahābhāgyajanāśritā |
mahāvegavatī medhyā mahā mahimabhūṣaṇā ||
||136||mahāprabhāvā mahatī mīnacañcalalocanā |
mahākāruṇyasampūrṇā maharddhiśca mahotpalā ||
||137||mūrtimanmuktiramaṇī maṇimāṇikyabhūṣaṇā |
muktākalāpanepathyā manonayananandinī ||
||138||mahāpātakarāśighnī mahādevārdhahāriṇī |
mahormimālinī muktā mahādevī manonmanī ||
||139||mahāpuṇyodayaprāpyā māyātimiracandrikā |
mahāvidyā mahāmāyā mahāmedhā mahauṣadham ||
||140||mālādharī mahopāyā mahoragavibhūṣaṇā |
mahāmohapraśamanī mahāmaṅgalamaṅgalam ||
||141||mārtaṇḍamaṇḍalacarī mahālakṣmīrmadojjhitā |
yaśasvinī yaśodā ca yogyā yuktātmasevitā ||
||142||yogasiddhipradā yājyā yajñeśaparipūritā |
yajñeśī yajñaphaladā yajanīyā yaśaskarī ||
||143||yamisevyā yogayoniryoginī yuktabuddhidā |
yogajñānapradā yuktā yamādyaṣṭāṅgayogayuk ||
||144||yantritāghaughasañcārā yamalokanivāriṇī |
yātāyātapraśamanī yātanānāmakṛntanī ||
||145||yāminīśahimācchodā yugadharmavivarjitā |
revatī ratikṛd ramyā ratnagarbhā ramā ratiḥ ||
||146||ratnākarapremapātraṃ rasajñā rasarūpiṇī |
ratnaprāsādagarbhā ca ramaṇīyataraṅgiṇī ||
||147||ratnārcī rudraramaṇī rāgadveṣavināśinī |
ramā rāmā ramyarūpā rogijīvānurūpiṇī ||
||148||rucikṛd rocanī ramyā rucirā rogahāriṇī |
rājahaṃsā ratnavatī rājatkallolarājikā ||
||149||rāmaṇīyakarekhā ca rujārī rogaroṣiṇī |
rākā raṅkārtiśamanī ramyā rolambarāviṇī ||
||150||rāgiṇī rañjitaśivā rūpalāvaṇyaśevadhiḥ |
lokaprasūrlokavandyā lolatkallolamālinī ||
||151||līlāvatī lokabhūmirlokalocanacandrikā |
lekhasravantī laṭabhā laghuvegā laghutvahṛt ||
||152||lāsyattaraṅgahastā ca lalitā layabhaṅgigā |
lokabandhurlokadhātrī lokottaraguṇorjitā ||
||153||lokatrayahitā lokā lakṣmīrlakṣaṇalakṣitā |
līlā lakṣitanirvāṇā lāvaṇyāmṛtavarṣiṇī ||
||154||vaiśvānarī vāsaveḍyā vandhyatvaparihāriṇī |
vāsudevāṅghrireṇughnī vajrivajranivāriṇī ||
||155||śubhāvatī śubhaphalā śāntiḥ śantanuvallabhā |
śūlinī śaiśavavayāḥ śītalāmṛtavāhinī ||
||156||śobhāvatī śīlavatī śoṣitāśeṣakilbiṣā |
śaraṇyā śivadā śiṣṭā śarajanmaprasūḥśivā ||
||157||śaktiḥ śaśāṅkavimalā śamanasvasṛsammatā |
śamā śamanamārgaghnī śitikaṇṭhamahāpriyā ||
||158||śuciḥ śucikarī śeṣā śeṣaśāyipadodbhavā |
śrīnivāsaśrutiḥ śraddhā śrīmatī śrīḥ śubhavratā ||
||159||śuddhavidyā śubhāvartā śrutānandā śrutistutiḥ |
śivetaraghnī śabarī śāmbarīrūpadhāriṇī ||
||160||śmaśānaśodhanī śāntā śaśvacchatadhṛtistutā |
śālinī śāliśobhāḍhyā śikhivāhanagarbhabhṛt ||
||161||śaṃsanīyacaritrā ca śātitāśeṣapātakā |
ṣaḍguṇaiśvaryasampannā ṣaḍaṅgaśrutirūpiṇī ||
||162||ṣaṇḍhatāhārisalilā styāyannadanadīśatā |
saridvārā ca surasā suprabhā suradīrghikā ||
||163||svaḥ sindhuḥ sarvaduḥkhaghnī sarvavyādhimahauṣadham |
sevyā siddhiḥ satī sūktiḥ skandasūśca sarasvatī ||
||164||sampattaraṅgiṇī stutyā sthāṇumaulikṛtālayā |
sthairyadā subhagā saukhyā strīṣu saubhāgyadāyinī ||
||165||svarganiḥśreṇikā sūmā svadhā svāhā sudhājalā |
samudrarūpiṇī svargyā sarvapātakavairiṇī ||
||166||smṛtāghahāriṇī sītā saṃsārābdhitaraṇḍikā |
saubhāgyasundarī sandhyā sarvasārasamanvitā ||
||167||harapriyā hṛṣīkeśī haṃsarūpā hiraṇmayī |
hṛtāghasaṅghā hitakṛddhelā helāghagarvahṛt ||
||168||kṣemadā kṣālitāghaughā kṣudravidrāviṇī kṣamā |
||169||gaṅgeti nāmasāhasraṃ gaṅgāyāḥ kalaśodbhava |
kīrtayitvā naraḥ samyaggaṅgāsnānaphalaṃ labhet ||
||170||sarvapāpapraśamanaṃ sarvavighnavināśanam |
sarvastotrajapācchreṣṭhaṃ sarvapāvanapāvanam ||
||171||śraddhayābhīṣṭaphaladaṃ caturvargasamṛddhikṛt |
sakṛjjapādavāpnoti hyekakratuphalaṃ mune ||
||172||sarvatīrtheṣu yaḥ snātaḥ sarvayajñeṣu dīkṣitaḥ |
tasya yatphalamuddiṣṭaṃ trikālapaṭhanācca tat ||
||173||sarvavrateṣu yatpuṇyaṃ samyakcīrṇeṣu vāḍava |
tatphalaṃ samavāpnoti trisandhyaṃ niyataḥ paṭhan ||
||174||snānakāle paṭhedyastu yatra kutra jalāśaye |
tatra sannihitā nūnaṃ gaṅgā tripathagā mune ||
||175||śreyo'rthī labhate śreyo dhanārthī labhate dhanam |
kāmī kāmānavāpnoti mokṣārthī mokṣamāpnuyāt ||
||176||varṣaṃ trikālapaṭhanācchraddhayā śucimānasaḥ |
ṛtukālābhigamanādaputraḥ putravān bhavet ||
||177||nākālamaraṇaṃ tasya nāgnicorāhisādhvasam |
nāmnāṃ sahasraṃ gaṅgāyā yo japecchraddhayā mune ||
||178||gaṅgānāmasahasraṃ tu japtvā grāmāntaraṃ vrajet |
kāryasiddhimavāpnoti nirvighno gehamāviśet ||
||179||tithivārarkṣayogānāṃ na doṣaḥ prabhavettadā |
yadā japtvā vrajedetat stotraṃ grāmāntaraṃ naraḥ ||
||180||āyurārogyajananaṃ sarvopadravanāśanam |
sarvasiddhikaraṃ puṃsāṃ gaṅgānāmasahasrakam ||
||181||janmāntarasahasreṣu yatpāpaṃ samyagarjitam |
gaṅgānāmasahasrasya japanāttatkṣayaṃ vrajet ||
||182||brahmaghno madyapaḥ svarṇasteyī ca gurutalpagaḥ |
tatsaṃyogī bhrūṇahantā mātṛhā pitṛhā mune ||
||183||viśvāsaghātī garadaḥ kṛtaghno mitraghātakaḥ |
agnido govadhakaro gurudravyāpahārakaḥ ||
||184||mahāpātakayukto'pi saṃyukto'pyupapātakaiḥ |
mucyate śraddhayā japtvā gaṅgānāmasahasrakam ||
||185||ādhivyādhiparikṣipto ghoratāpapariplutaḥ |
mucyate sarvaduḥkhebhyaḥ stavasyāsyānukīrtanāt ||
||186||saṃvatsareṇa yuktātmā paṭhan bhaktiparāyaṇaḥ |
abhīpsitāṃ labhetsiddhiṃ sarvaiḥ pāpaiḥ pramucyate ||
||187||saṃśayāviṣṭacittasya dharmavidveṣiṇo'pi ca |
dāmbhikasyāpi hiṃsrasya ceto dharmaparaṃ bhavet ||
||188||varṇāśramapathīnastu kāmakrodhavivarjitaḥ |
yatphalaṃ labhate jñānī tadāpnotyasya kīrtanāt ||
||189||gāyatryayutajapyena yatphalaṃ samupārjitam |
sakṛtpaṭhanataḥ samyaktadaśeṣamavāpnuyāt ||
||190||gāṃ dattvā vedaviduṣe yatphalaṃ labhate kṛtī |
tatpuṇyaṃ samyagākhyātaṃ stavarājasakṛjjapāt ||
||191||guruśuśrūṣaṇaṃ kurvan yāvajjīvaṃ narottamaḥ |
yatpuṇyamarjayettadbhāgvarṣaṃ triṣavaṇaṃ japan ||
||192||vedapārāyaṇātpuṇyaṃ yadatra paripaṭhyate |
tatṣaṇmāsena labhate trisandhyaṃ parikīrtanāt ||
||193||gaṅgāyāḥ stavarājasya pratyahaṃ pariśīlanāt |
śivabhaktimavāpnoti viṣṇubhakto'thavā bhavet ||
||194||yaḥ kīrtayedanudinaṃ gaṅgānāmasahasrakam |
tatsamīpe sahacarī gaṅgādevī sadā bhavet ||
||195||sarvatra pūjyo bhavati sarvatra vijayī bhavet |
sarvatra sukhamāpnoti jāhnavīstotrapāṭhataḥ ||
||196||sadācārī sa vijñeyaḥ sa śucistu sadaiva hi |
kṛtasarvasurārcaḥ sa kīrtayedya imāṃ stutim ||
||197||tasmiṃstṛpte bhavet tṛptā jāhnavī nātra saṃśayaḥ |
tasmātsarvaprayatnena gaṅgābhaktaṃ samarcayet ||
||198||stavarājamimaṃ gāṅgaṃ śṛṇuyādyaśca vai paṭhet |
śrāvayedatha tadbhaktān dambhalobhavivarjitaḥ ||
||199||mucyate trividhaiḥ pāpairmanovākkāyasambhavaiḥ |
kṣaṇānniṣpāpatāmeti pitṝṇāṃ ca priyo bhavet ||
||200||sarvadevapriyaścāpi sarvarṣigaṇasammataḥ |
ante vimānamāruhyaṃ divyastrīśatasaṃvṛtaḥ ||
||201||divyābharaṇasampanno divyabhogasamanvitaḥ |
nandanādivane svairaṃ devavatsa pramodate ||
||202||bhujyamāneṣu vipreṣu śrāddhakāle viśeṣataḥ |
japannidaṃ mahāstotraṃ pitṝṇāṃ tṛptikārakam ||
||203||yāvanti tatra sikthāni yāvanto'mbukaṇāḥ sthitāḥ |
tāvantyeva hi varṣāṇi modante svapitāmahāḥ ||
||204||yathā prīṇanti pitaro prīṇanti gaṅgāyāṃ piṇḍadānataḥ |
tathaiva tṛpnuyuḥ śrāddhe stavasyāsyānusaṃśravāt ||
||205||etatstotraṃ gṛhe yasya likhitaṃ paripūjyate |
tatra pāpabhayaṃ nāsti śuci tadbhavanaṃ sadā ||
||206||agaste kiṃ bahūktena śṛṇu me niścitaṃ vacaḥ |
saṃśayo nātra kartavyaḥ sandegdhari phalaṃ nahi ||
||207||yāvanti martye stotrāṇi mantrajālānyanekaśaḥ |
tāvanti stavarājasya gāṅgeyasya samāni na ||
||208||yāvajjanma japedyastu nāmnāmetatsahasrakam |
sa kīkaṭeṣvapi mṛto na punargarbhamāviśet ||
||209||nityaṃ niyamavānetadyo japetstotramuttamam |
anyatrāpi vipannaḥ sa gaṅgātīre mṛto bhavet ||
||210||etatstotravaraṃ ramyaṃ purā proktaṃ pinākinā |
viṣṇave nijabhaktāya muktibījākṣarāspadam ||
||211||gaṅgāsnānapratinidhiḥ stotrametanmayeritam |
sisnāsurjāhnavīṃ tasmādetatstotraṃ japetsudhīḥ ||
||212||iti śrīskandapurāṇe ekāśītisāhasryāṃ saṃhitāyāṃ caturthe kāśīkhaṇḍe pūrvārdhe gaṅgāsahasranāmakathanaṃ nāma ekonatriṃśattamo'dhyāyaḥ