matsyapurāṇāntargatam
kṣīrodamathanodbhūtaṃ divya-gandhānulepanam |
sudhā-kalaśa-hastaṃ taṃ vande dhanvantariṃ harim ||
||1||namo loka-tryādhyakṣa tejasā jita-bhāskara |
namo viṣṇo namo jiṣṇo namaste kaiṭabhārdana ||
||2||namaḥ sarga-kriyā-kartre jagat pālayate namaḥ |
namaḥ smṛtārti-nāśāya namaḥ puṣkara māline ||
||3||divyauṣadhi-svarūpāya sudhā-kalaśa-pāṇaye |
śaṅkha-cakra-gadā-padma-dhāriṇe vanamāline ||
||4||devendrādi-sureḍyāya namaḥ kṣīrābdhi-janmane |
nirguṇāya viśeṣāya haraye brahma-rūpiṇe ||
||5||jagat pratiṣṭhitaṃ yatra jagatāṃ yo na dṛśyate |
namaḥ sūkṣmātisūkṣmāya tasmai devāya śaṅkhine ||
||6||yaṃ na paśyanti paśyantaṃ jagadapyakhilaṃ narāḥ |
apaśyadbhirjagad yaśca dṛśyate hṛdi saṃsthitaḥ ||
||7||yasmin vanāni parvatā nadyaścaivākhilaṃ jagat |
tasmai namo'stu jagatām ādhārāya namo namaḥ ||
||8||ādya-prajāpatiryaśca yaḥ pitṝṇāṃ paraḥ patiḥ |
patiḥ surāṇāṃ yastasmai namaḥ kṛṣṇāya vedhase ||
||9||yaḥ pravṛttau nivṛttau ca ijyate karmabhiḥ svakaiḥ |
svargāpavarga-phala-do namastasmai gadā-bhṛte ||
||10||yaścintyamāno manasā sadyaḥ pāpaṃ vyapohati |
namastasmai viśuddhāya parāya hari-medhase ||
||11||yaṃ buddhvā sarvabhūtāni deva-deveśamavyayam |
na punarjanma-maraṇe prāpnuvanti namāmi tam ||
||12||yo yajñe yajña-paramairijyate yajña-saṃjñitaḥ |
taṃ yajña-puruṣaṃ viṣṇuṃ namāmi prabhumīśvaram ||
||13||gīyate sarva-vedeṣu veda-vidbhirvidāṃ gatiḥ |
yastasmai veda-vedyāya viṣṇave jiṣṇave namaḥ ||
||14||yo viśvaṃ samutpannaṃ yasmiṃśca layameṣyati |
viśvodbhava-pratiṣṭhāya namastasmai mahātmane ||
||15||brahmādi-stamba-paryantaṃ yena viśvamidaṃ tatam |
māyā jālaṃ samuttarttaṃ tamupendraṃ namāmyaham ||
||16||viṣāda-toṣa-roṣādyairyo'jasraṃ sukha-duḥkhajam |
nṛtyatyakhila-bhūta-sthastamupendraṃ namāmyaham ||
||17||yamārādhya viśuddhena karmaṇā manasā girā |
tarantyavidyām akhilām ādi-vaidyaṃ namāmyaham ||
||18||yaḥ sthito viśva-rūpeṇa bibharti hyakhilauṣadhīḥ |
taṃ ratna-kalaśodbhāsi-hastaṃ dhanvantariṃ numaḥ ||
||19||viśvaṃ viśva-patiṃ viṣṇuṃ taṃ namāmi prajāpatim |
mūrtyā cāsuramayyā tu tadvidhān vinihanti yaḥ ||
||20||rātri-rūpaṃ sūrya-rūpaṃ bhajettaṃ sāndhya-rūpiṇam |
hanti vidyā-pradānena yo vā ajñāna-jaṃ tamaḥ ||
||21||yastu bheṣaja-rūpeṇa jagadāpyāyayet sadā
yasyākṣiṇī candra-sūryau sarva-loka-śubhaṅkaraḥ
paśyataḥ karma satataṃ taṃ ca dhanvantariṃ numaḥ ||
||22||yasmin sarveśvare vaśyaṃ jagat sthāvara-jaṅgamam |
ābhāti tamajaṃ viṣṇuṃ namāmi prabhumavyayam ||
||23||iti matsya-purāṇāntargataṃ dhanvantari-stotraṃ sampūrṇam