śrīprativādibhayaṅkarāṇṇaṅgarācāryakṛtam
kausalyā suprajā rāma pūrvā sandhyā pravartate |
uttiṣṭha naraśārdūla kartavyaṃ daivamāhnikam ||
||1||uttiṣṭhottiṣṭha govinda uttiṣṭha garuḍadhvaja |
uttiṣṭha kamalākānta trailokyaṃ maṅgalaṃ kuru ||
||2||mātaḥ samastajagatāṃ madhukaiṭabhāreḥ
vakṣovihāriṇi manoharadivyamūrte |
śrīsvāmini śritajanapriyadānaśīle
śrīveṅkaṭeśadayite tava suprabhātam ||
||3||tava suprabhātamaravindalocane
bhavatu prasannamukhacandramaṇḍale |
vidhiśaṅkarendravanitābhirarcite
vṛṣaśailanāthadayite dayānidhe ||
||4||atryādisaptaṛṣayaḥ samupāsya sandhyām
ākāśasindhukamalāni manoharāṇi |
ādāya pādayugamarcayituṃ prapannāḥ
śeṣādriśekharavibho tava suprabhātam ||
||5||pañcānanābjabhavaṣaṇmukhavāsavādyāḥ
traivikramādicaritaṃ vibudhāḥ stuvanti |
bhāṣāpatiḥ paṭhati vāsaraśuddhimārāt
śeṣādriśekharavibho tava suprabhātam ||
||6||īṣatpraphulla-sarasīruha-nārikela-
pūgadrumādi-sumanoharapālikānām |
āvāti mandamanilaḥ saha divyagandhaiḥ
śeṣādriśekharavibho tava suprabhātam ||
||7||unmīlya netrayugamuttamapañjarasthāḥ
pātrāvaśiṣṭakadalīphalapāyasāni |
bhuktvā salīlamatha keliśukāḥ paṭhanti
śeṣādriśekharavibho tava suprabhātam ||
||8||tantrīprakarṣamadhurasvanayā vipañcyā
gāyatyanantacaritaṃ tava nārado'pi |
bhāṣāsamagramasakṛtkaracāraramyaṃ
śeṣādriśekharavibho tava suprabhātam ||
||9||bhṛṅgāvalī ca makarandarasānuviddha-
jhaṅkāragīta ninadaiḥ saha sevanāya |
niryātyupāntasarasīkamalodarebhyaḥ
śeṣādriśekharavibho tava suprabhātam ||
||10||yoṣāgaṇena varadadhnivimathyamāne
ghoṣālayeṣu dadhimanthanatīvraghoṣāḥ |
roṣātkaliṃ vidadhate kakubhaśca kumbhāḥ
śeṣādriśekharavibho tava suprabhātam ||
||11||padmeśamitraśatapatragatālivargāḥ
hartuṃ śriyaṃ kuvalayasya nijāṅgalakṣmyā |
bherīninādamiva bibhrati tīvranādaṃ
śeṣādriśekharavibho tava suprabhātam ||
||12||śrīmannabhīṣṭavaradākhilalokabandho
śrīśrīnivāsa jagadekadayaikasindho |
śrīdevatāgṛhabhujāntaradivyamūrte
śrīveṅkaṭācalapate tava suprabhātam ||
||13||śrīsvāmipuṣkariṇikā''plavanirmalāṅgāḥ
śreyo'rthino haraviriñcasanandanādyāḥ |
dvāre vasanti varavetrahatottamāṅgāḥ
śrīveṅkaṭācalapate tava suprabhātam ||
||14||śrīśeṣaśaila-garuḍācala-veṅkaṭādri-
nārāyaṇādri-vṛṣabhādri-vṛṣādri-mukhyām |
ākhyāṃ tvadīya vasateraniśaṃ vadanti
śrīveṅkaṭācalapate tava suprabhātam ||
||15||sevāparāḥ śiva-sureśa-kṛśānu-dharma-
rakṣo'mbunātha-pavamāna-dhanādhināthāḥ |
baddhāñjali-pravilasannijaśīrṣa-deśāḥ
śrīveṅkaṭācalapate tava suprabhātam ||
||16||dhāṭīṣu te vihagarāja-mṛgādhirāja-
nāgādhirāja-gajarāja-hayādhirājāḥ |
svasvādhikāra-mahimā'dhikamarthayante
śrīveṅkaṭācalapate tava suprabhātam ||
||17||sūryendu-bhauma-budha-vākpati-kāvya-sauri-
svarbhānu-ketu-diviṣatpariṣatpradhānāḥ |
tvaddāsa-dāsa-caramāvadhi-dāsadāsāḥ
śrīveṅkaṭācalapate tava suprabhātam ||
||18||tvat pādadhūlibharitasphuritottamāṅgāḥ
svargāpavarganirapekṣa-nijāntaraṅgāḥ |
kalpāgamā''kalanayā''kulatāṃ labhante
śrīveṅkaṭācalapate tava suprabhātam ||
||19||tvadgopurāgraśikharāṇi nirīkṣamāṇāḥ
svargāpavargapadavīṃ paramāṃ śrayantaḥ |
martyā manuṣyabhuvane matimāśrayante
śrīveṅkaṭācalapate tava suprabhātam ||
||20||śrībhūmināyaka dayādiguṇāmṛtābdhe
devādhideva jagadekaśaraṇyamūrte |
śrīmannananta-garuḍādibhirarcitāṅghre
śrīveṅkaṭācalapate tava suprabhātam ||
||21||śrīpadmanābha puruṣottama vāsudeva
vaikuṇṭha mādhava janārdana cakrapāṇe |
śrīvatsacihna śaraṇāgata-pārijāta
śrīveṅkaṭācalapate tava suprabhātam ||
||22||kandarpadarpaharasundaradivyamūrte
kāntākucāmburuha-kuḍmala-loladṛṣṭe |
kalyāṇanirmalaguṇākara divyakīrte
śrīveṅkaṭācalapate tava suprabhātam ||
||23||mīnākṛte kamaṭha kola nṛsiṃha varṇin
svāmin paraśvatha tapodhana rāmacandra |
śeṣāṃśarāma yadunandana kalkirūpa
śrīveṅkaṭācalapate tava suprabhātam ||
||24||elā-lavaṅga-ghanasāra-sugandhi-tīrthaṃ
divyaṃ viyatsariti hemaghaṭeṣu pūrṇam |
dhṛtvā'dya vaidikaśikhāmaṇayaḥ prahṛṣṭāḥ
tiṣṭhanti veṅkaṭapate tava suprabhātam ||
||25||bhāsvānudeti vikacāni saroruhāṇi
sampūrayanti ninadaiḥ kakubho vihaṅgāḥ |
śrīvaiṣṇavāḥ satatamarthita-maṅgalāste
dhāmā''śrayanti tava veṅkaṭa suprabhātam ||
||26||brahmādayaḥ suravarāḥ samaharṣayaste
santaḥ sanandana mukhāstava yogivaryāḥ |
dhāmāntike tava hi maṅgalavastuhastāḥ
śrīveṅkaṭācalapate tava suprabhātam ||
||27||lakṣmīnivāsa niravadyaguṇaikasindho
saṃsāra-sāgara-samuttaraṇaikaseto |
vedāntavedya nijavaibhava bhaktabhogya
śrīveṅkaṭācalapate tava suprabhātam ||
||28||itthaṃ vṛṣācalapateriha suprabhātaṃ
ye mānavāḥ pratidinaṃ paṭhituṃ pravṛttāḥ |
teṣāṃ prabhātasamaye smṛtiraṅgabhājāṃ
prajñāṃ parārthasulabhāṃ paramāṃ prasūte ||
||29||iti śrī-veṅkaṭeśa suprabhātam sampūrṇam