śrīpatañjalimunipraṇītam
sadañcita-mudañcita-nikuñcita-padaṃ jhalajhalañcalita-mañju-kaṭakaṃ
patañjali-dṛgañjana-manañjana-macañcalapadaṃ janana-bhañjana-karam |
kadambarucimambaravasaṃ paramamambuda-kadambaka-viḍambaka-galaṃ
cidambudhi-maṇiṃ budha-hṛdambuja-raviṃ-para-cidambara-naṭaṃ hṛdi bhaja ||
||1||haraṃ tripura-bhañjanam anantakṛtakaṅkaṇam akhaṇḍadaya-mantarahitaṃ
viriñcisurasaṃhatipurandhara-vicintitapadaṃ taruṇacandramakuṭam |
paraṃ pada-vikhaṇḍitayamaṃ bhasita-maṇḍitatanuṃ madanavañcana-paraṃ
cirantanamamuṃ praṇavasañcitanidhiṃ para-cidambara-naṭaṃ hṛdi bhaja ||
||2||anantamakhilaṃ jagadabhaṅga-guṇatuṅgamamataṃ dhṛtavidhuṃ surasarit
taraṅga-nikuramba-dhṛti-lampaṭa-jaṭaṃ śamanadambasuharaṃ bhavaharam |
śivaṃ daśadigantara-vijṛmbhitakaraṃ karalasanmṛgaśiśuṃ paśupatiṃ
haraṃ śaśidhanañjayapataṅganayanaṃ para-cidambara-naṭaṃ hṛdi bhaja ||
||3||anantanavaratnavilasatkaṭakakiṅkiṇijhalaṃ jhalajhalaṃ jhalaravaṃ
mukundavidhi-hastagatamaddala-layadhvanidhimiddhimita-nartana-padam |
śakuntaratha-barhiratha-nandimukha-śṛṅgiriṭi-bhṛṅgigaṇa-saṅghanikaṭaṃ
sanandasanaka-pramukha-vandita-padaṃ para-cidambara-naṭaṃ hṛdi bhaja ||
||4||anantamahasaṃ tridaśavandya-caraṇaṃ muni-hṛdantara-vasantamamalaṃ
kabandha-viyadindvavani-gandhavaha-vahnimakha-bandhuravimañju-vapuṣam |
anantavibhavaṃ trijagadantara-maṇiṃ trinayanaṃ tripura-khaṇḍana-paraṃ
sananda-muni-vandita-padaṃ sakaruṇaṃ para-cidambara-naṭaṃ hṛdi bhaja ||
||5||acintyamalivṛnda-ruci-bandhuragalaṃ kurita-kunda-nikuramba-dhavalaṃ
mukunda-suravṛnda-balahantṛ-kṛtavandana-lasantam-ahikuṇḍala-dharam |
akampamanukampita-ratiṃ sujana-maṅgalanidhiṃ gajaharaṃ paśupatiṃ
dhanañjayanutaṃ praṇata-rañjanaparaṃ para-cidambara-naṭaṃ hṛdi bhaja ||
||6||paraṃ suravaraṃ puraharaṃ paśupatiṃ janita-dantimukha-ṣaṇmukhamamuṃ
mṛḍaṃ kanaka-piṅgala-jaṭaṃ sanakapaṅkaja-raviṃ sumanasaṃ himarucim |
asaṅghamanasaṃ jaladhi-janmakaralaṃ kavalayanta-matulaṃ guṇanidhiṃ
sananda-varadaṃ śamitamindu-vadanaṃ para-cidambara-naṭaṃ hṛdi bhaja ||
||7||ajaṃ kṣitirathaṃ bhujagapuṅgavaguṇaṃ kanaka-śṛṅgi-dhanuṣaṃ karalasat
kuraṅga-pṛthu-ṭaṅka-paraśuṃ rucira-kuṅkuma-ruciṃ ḍamarukaṃ ca dadhatam |
mukunda-viśikhaṃ namadavandhya-phaladaṃ nigama-vṛnda-turagaṃ nirupamaṃ
sacaṇḍikamamuṃ jhaṭiti saṃhṛtapuraṃ para-cidambara-naṭaṃ hṛdi bhaja ||
||8||anaṅgaparipanthinamajaṃ kṣiti-dhurandharamalaṃ karuṇayantamakhilaṃ
jvalantamanalaṃ dadhatamantakaripuṃ satatamindramukha-vanditapadam |
udañcadaravindakula-bandhuśata-bimbaruci-saṃhati-sugandhi-vapuṣaṃ
patañjalinutaṃ praṇavapañjara-śukaṃ para-cidambara-naṭaṃ hṛdi bhaja ||
||9||iti stavamamuṃ bhujagapuṅgava-kṛtaṃ pratidinaṃ paṭhati yaḥ kṛtamukhaḥ
sadaḥ prabhupada-dvitayadarśanapadaṃ sulalitaṃ caraṇa-śṛṅga-rahitam |
saraḥprabhava-sambhava-haritpati-haripramukha-divyanuta-śaṅkarapadaṃ
sa gacchati paraṃ na tu janurjalanidhiṃ paramaduḥkhajanakaṃ duritadam ||
||10||iti śrīpatañjalimunipraṇītaṃ caraṇaśṛṅgarahita-naṭarājastotraṃ sampūrṇam