śrīagastyamuniproktam
yā kundendutuṣārahāradhavalā yā śubhravastrāvṛtā
yā vīṇāvaradaṇḍamaṇḍitakarā yā śvetapadmāsanā |
yā brahmācyutaśaṅkaraprabhṛtibhirdevaiḥ sadā pūjitā
sā māṃ pātu sarasvatī bhagavatī niḥśeṣajāḍyāpahā ||
||1||dorbhiryuktā caturbhiḥ sphaṭikamaṇinibhairakṣamālāṃ dadhānā
hastenaikena padmaṃ sitamapi ca śukaṃ pustakaṃ cāpareṇa |
bhāsā kundenduśaṅkhasphaṭikamaṇinibhā bhāsamānā'samānā
sā me vāgdevateyaṃ nivasatu vadane sarvadā suprasannā ||
||2||surāsurasevitapādapaṅkajā
kare virājatkamanīyapustakā |
viriñcipatnī kamalāsanasthitā
sarasvatī nṛtyatu vāci me sadā ||
||3||sarasvatī sarasijakesaraprabhā
tapasvinī sitakamalāsanapriyā |
ghanastanī kamalavilolalocanā
manasvinī bhavatu varaprasādinī ||
||4||sarasvati namastubhyaṃ varade kāmarūpiṇi |
vidyārambhaṃ kariṣyāmi siddhirbhavatu me sadā ||
||5||sarasvati namastubhyaṃ sarvadevi namo namaḥ |
śāntarūpe śaśidhare sarvayoge namo namaḥ ||
||6||nityānande nirādhāre niṣkalāyai namo namaḥ |
vidyādhare viśālākṣi śuddhajñāne namo namaḥ ||
||7||śuddhasphaṭikarūpāyai sūkṣmarūpe namo namaḥ |
śabdabrahmi caturhaste sarvasiddhyai namo namaḥ ||
||8||muktālaṅkṛta-sarvāṅgyai mūlādhāre namo namaḥ |
mūlamantrasvarūpāyai mūlaśaktyai namo namaḥ ||
||9||mano maṇimahāyoge vāgīśvari namo namaḥ |
vāgbhyai varadahastāyai varadāyai namo namaḥ ||
||10||vedāyai vedarūpāyai vedāntāyai namo namaḥ |
guṇadoṣavivarjinyai guṇadīptyai namo namaḥ ||
||11||sarvajñāne sadānande sarvarūpe namo namaḥ |
sampannāyai kumāryai ca sarvajñe te namo namaḥ ||
||12||yogānārya umādevyai yogānande namo namaḥ |
divyajñāna trinetrāyai divyamūrtyai namo namaḥ ||
||13||ardhacandrajaṭādhāri candrabimbe namo namaḥ |
candrādityajaṭādhāri candrabimbe namo namaḥ ||
||14||aṇurūpe mahārūpe viśvarūpe namo namaḥ |
aṇimādyaṣṭasiddhāyai ānandāyai namo namaḥ ||
||15||jñāna-vijñāna-rūpāyai jñānamūrte namo namaḥ |
nānāśāstra-svarūpāyai nānārūpe namo namaḥ ||
||16||padmadā padmavaṃśā ca padmarūpe namo namaḥ |
parameṣṭhyai parāmūrtyai namaste pāpanāśini ||
||17||mahādevyai mahākālyai mahālakṣmyai namo namaḥ |
brahmaviṣṇuśivāyai ca brahmanāryai namo namaḥ ||
||18||kamalākarapuṣpā ca kāmarūpe namo namaḥ |
kapāli karmadīptāyai karmadāyai namo namaḥ ||
||19||sāyaṃ prātaḥ paṭhennityaṃ ṣaṇmāsāt siddhirucyate |
coravyāghrabhayaṃ nāsti paṭhatāṃ śṛṇvatāmapi ||
||20||itthaṃ sarasvatīstotram agastyamunivācakam |
sarvasiddhikaraṃ nṝṇāṃ sarvapāpapraṇāśanam ||
||21||iti śrī-agastyamuni-proktaṃ śrī-sarasvatīstotraṃ sampūrṇam