śrībudhakauśikaviracitam
dhyāyedājānubāhuṃ dhṛtaśaradhanuṣaṃ baddhapadmāsanasthaṃ
pītaṃ vāso vasānaṃ navakamaladalaspardhinetraṃ prasannam |
vāmāṅkārūḍha-sītāmukhakamalamilallocanaṃ nīradābhaṃ
nānālaṅkāradīptaṃ dadhatamurujaṭāmaṇḍanaṃ rāmacandram ||
||1||caritaṃ raghunāthasya śatakoṭi-pravistaram |
ekaikamakṣaraṃ puṃsāṃ mahāpātakanāśanam ||
||2||dhyātvā nīlotpalaśyāmaṃ rāmaṃ rājīvalocanaṃ
jānakīlakṣmaṇopetaṃ jaṭāmukuṭamaṇḍitam
sāsitūṇadhanurbāṇapāṇiṃ naktañcarāntakaṃ
svalīlayā jagattrātum āvirbhūtam ajaṃ vibhum
rāmarakṣāṃ paṭhetprājñaḥ pāpaghnīṃ sarvakāmadām||
||3||śiro me rāghavaḥ pātu bhālaṃ daśarathātmajaḥ |
kausalyeyo dṛśau pātu viśvāmitrapriyaḥ śrutī ||
||4||ghrāṇaṃ pātu makhatrātā mukhaṃ saumitrivatsalaḥ |
jihvāṃ vidyānidhiḥ pātu kaṇṭhaṃ bharatavanditaḥ ||
||5||skandhau divyāyudhaḥ pātu bhujau bhagneśakārmukaḥ |
karau sītāpatiḥ pātu hṛdayaṃ jāmadagnyajit ||
||6||madhyaṃ pātu kharadhvaṃsī nābhiṃ jāmbavadāśrayaḥ |
guhyaṃ jitendriyaḥ pātu pṛṣṭhaḥ pātu raghūttamaḥ ||
||7||vakṣaḥ pātu kabandhāriḥ stanau gīrvāṇavanditaḥ |
pārśvo kulapatiḥ pātu kukṣimikṣvākunandanaḥ ||
||8||sugrīveśaḥ kaṭī pātu sakthinī hanumatprabhuḥ |
ūrū raghūttamaḥ pātu rakṣaḥkulavināśakṛt ||
||9||jānunī setukṛt pātu jaṅghe daśamukhāntakaḥ |
pādau vibhīṣaṇaśrīdaḥ pātu rāmo'khilaṃ vapuḥ ||
||10||etāṃ rāmabalopetāṃ rakṣāṃ yaḥ sukṛtī paṭhet |
sa cirāyuḥ sukhī putrī vijayī vinayī bhavet ||
||11||pātālabhūtalavyomacāriṇaśchadmacāriṇaḥ |
na draṣṭumapi śaktāste rakṣitaṃ rāmanāmabhiḥ ||
||12||rāmeti rāmabhadreti rāmacandreti vā smaran |
naro na lipyate pāpairbhuktiṃ muktiṃ ca vindati ||
||13||jagajaitraikamantreṇa rāmanāmnā'bhirakṣitam |
yaḥ kaṇṭhe dhārayettasya karasthāḥ sarvasiddhayaḥ ||
||14||vajrapañjaranāmedaṃ yo rāmakavacaṃ smaret |
avyāhatājñaḥ sarvatra labhate jayamaṅgalam ||
||15||ādiṣṭavān yathā svapne rāmarakṣāmimāṃ haraḥ |
tathā likhitavān prātaḥ prabuddho budhakauśikaḥ ||
||16||ārāmaḥ kalpavṛkṣāṇāṃ virāmaḥ sakalāpadām |
abhirāmastrilokānāṃ rāmaḥ śrīmān sa naḥ prabhuḥ ||
||17||taruṇau rūpasampannau sukumārau mahābalau |
puṇḍarīkaviśālākṣau cīrakṛṣṇājināmbarau ||
||18||phalamūlāśanau dāntau tāpasau brahmacāriṇau |
putrau daśarathasyaitau bhrātarau rāmalakṣmaṇau ||
||19||śaraṇyau sarvasattvānāṃ śreṣṭhau sarvadhanuṣmatām |
rakṣaḥ kulanihantārau trāyetāṃ no raghūttamau ||
||20||āttasajjadhanuṣāviṣuspṛśau akṣayāśuganiṣaṅgasaṅginau |
rakṣaṇāya mama rāmalakṣmaṇau agrataḥ pathi sadaiva gacchatām ||
||21||sannaddhaḥ kavacī khaḍgī cāpabāṇadharo yuvā |
yacchanmanoratho'smākaṃ rāmaḥ pātu salakṣmaṇaḥ ||
||22||rāmo dāśarathiḥ śūro lakṣmaṇānucaro balī |
kākutsthaḥ puruṣaḥ pūrṇaḥ kausalyeyo raghūttamaḥ ||
||23||vedāntavedyo yajñeśaḥ purāṇapuruṣottamaḥ |
jānakīvallabhaḥ śrīmān aprameyaparākramaḥ ||
||24||ityetāni japannityaṃ madbhaktaḥ śraddhayānvitaḥ |
aśvamedhādhikaṃ puṇyaṃ samprāpnoti na saṃśayaḥ ||
||25||rāmaṃ dūrvādalaśyāmaṃ padmākṣaṃ pītavāsasam |
stuvanti nāmabhirdivyairna te saṃsāriṇo naraḥ ||
||26||rāmaṃ lakṣmaṇapūrvajaṃ raghuvaraṃ sītāpatiṃ sundaraṃ
kākutsthaṃ karuṇārṇavaṃ guṇanidhiṃ viprapriyaṃ dhārmikam |
rājendraṃ satyasandhaṃ daśarathatanayaṃ śyāmalaṃ śāntamūrtiṃ
vande lokābhirāmaṃ raghukulatilakaṃ rāghavaṃ rāvaṇārim ||
||27||rāmāya rāmabhadrāya rāmacandrāya vedhase |
raghunāthāya nāthāya sītāyāḥ pataye namaḥ ||
||28||śrīrāma rāma raghunandana rāma rāma
śrīrāma rāma bharatāgraja rāma rāma |
śrīrāma rāma raṇakarkaśa rāma rāma
śrīrāma rāma śaraṇaṃ bhava rāma rāma ||
||29||śrīrāmacandracaraṇau manasā smarāmi
śrīrāmacandracaraṇau vacasā gṛhṇāmi |
śrīrāmacandracaraṇau śirasā namāmi
śrīrāmacandracaraṇau śaraṇaṃ prapadye ||
||30||mātā rāmo matpitā rāmacandraḥ
svāmī rāmo matsakhā rāmacandraḥ |
sarvasvaṃ me rāmacandro dayāluḥ
nānyaṃ jāne naiva jāne na jāne ||
||31||dakṣiṇe lakṣmaṇo yasya vāme tu janakātmajā |
purato mārutiryasya taṃ vande raghunandanam ||
||32||lokābhirāmaṃ raṇaraṅgadhīraṃ rājīvanetraṃ raghuvaṃśanātham |
kāruṇyarūpaṃ karuṇākaraṃ taṃ śrīrāmacandraṃ śaraṇaṃ prapadye ||
||33||manojavaṃ mārutatulyavegaṃ jitendriyaṃ buddhimatāṃ variṣṭham |
vātātmajaṃ vānarayūthamukhyaṃ śrīrāmadūtaṃ śaraṇaṃ prapadye ||
||34||kūjantaṃ rāma rāmeti madhuraṃ madhurākṣaram |
āruhya kavitāśākhāṃ vande vālmīkikokilam ||
||35||āpadām apahartāraṃ dātāraṃ sarvasampadām |
lokābhirāmaṃ śrīrāmaṃ bhūyo bhūyo namāmyaham ||
||36||bharjanaṃ bhavabījānām arjanaṃ sukhasampadām |
tarjanaṃ yamadūtānāṃ rāma rāmeti garjanam ||
||37||rāmo rājamaṇiḥ sadā vijayate rāmaṃ rameśaṃ bhaje
rāmeṇābhihatā niśācaracamū rāmāya tasmai namaḥ |
rāmānnāsti parāyaṇaṃ parataraṃ rāmasya dāso'smyahaṃ
rāme cittalayaḥ sadā bhavatu me bho rāma māmuddhara ||
||38||rāma rāmeti rāmeti rame rāme manorame |
sahasranāma tattulyaṃ rāmanāma varānane ||
||39||maṅgalaṃ kosalendrāya mahanīyaguṇātmane |
cakravartitanūjāya sārvabhaumāya maṅgalam ||
||40||iti śrībudhakauśikaviracitaṃ śrīrāmarakṣāstotraṃ sampūrṇam