paramparā
kamalākuca-cūcuka-kuṅkumato niyatāruṇitātula-nīlatano |
kamalāyatalocana lokapate vijayī bhava veṅkaṭaśailapate ||
||1||sacaturmukha-ṣaṇmukha-pañcamukha-pramukhākhiladaivatamaulimaṇe |
śaraṇāgatavatsala sāranidhe paripālaya māṃ vṛṣaśailapate ||
||2||ativelatayā tava durviṣahairanuvelakṛtairaparādhaśataiḥ |
bharitaṃ tvaritaṃ vṛṣaśailapate parayā kṛpayā paripāhi hare ||
||3||adhiveṅkaṭaśailamudāramate janatābhimatādhikadānaratāt |
paradevatayā gaditānnigamaiḥ kamalādayitānna paraṃ kalaye ||
||4||kalaveṇuravāvaśagopavadhū śatakoṭivṛtātsmarakoṭisamāt |
prativallavikābhimatātsukhadād vasudevasutānna paraṃ kalaye ||
||5||abhirāmaguṇākara dāśarathe jagadekadhanurdhara dhīramate |
raghunāyaka rāma rameśa vibho varado bhava deva dayājaladhe ||
||6||avanītanayā-kamanīyakaraṃ rajanīkaracārumukhāmburuham |
rajanīcararājatamomihiraṃ mahanīyamahaṃ raghurāma maye ||
||7||sumukhaṃ suhṛdaṃ sulabhaṃ sukhadaṃ svanujaṃ ca sukhāyamamoghaśaram |
apahāya raghūdvahamanyamahaṃ na kathañcana kañcana jātu bhaje ||
||8||vinā veṅkaṭeśaṃ na nātho na nāthaḥ
sadā veṅkaṭeśaṃ smarāmi smarāmi |
hare veṅkaṭeśa prasīda prasīda
priyaṃ veṅkaṭeśa prayaccha prayaccha ||
||9||ahaṃ dūrataste padāmbhojayugma
praṇāmecchayā''gatya sevāṃ karomi |
sakṛtsevayā nityasevāphalaṃ tvaṃ
prayaccha prayaccha prabho veṅkaṭeśa ||
||10||ajñāninā mayā doṣānaśeṣān vihitān hare |
kṣamasva tvaṃ kṣamasva tvaṃ śeṣaśaila-śikhāmaṇe ||
||11||iti śrī-veṅkaṭeśa-stotraṃ sampūrṇam