Mṛtyuñjayamānasapūjāstotram — Stotrāṇi

kailāse kamanīyaratnakhacite kalpadrumūle sthitaṃ

karpūrasphaṭikendusundaratanuṃ kātyāyanīsevitam .

gaṅgātuṅgataraṅgarañjitajaṭābhāraṃ kṛpāsāgaraṃ

kaṇṭhālaṅkṛtaśeṣabhūṣaṇamamuṃ mṛtyuñjayaṃ bhāvaye ..

||1||

āgatya mṛtyuñjaya candramaule

vyāghrājinālaṅkṛta śūlapāṇe .

svabhaktasaṃrakṣaṇakāmadheno

prasīda viśveśvara pārvatīśa ..

||2||

bhāsvanmauktikatoraṇe marakatastambhāyutālaṅkṛte

saudhe dhūpasuvāsite maṇimaye māṇikyadīpāñcite .

brahmendrāmarayogipuṅgavagaṇairyukte ca kalpadrumaiḥ

śrīmṛtyuñjaya susthiro bhava vibho māṇikyasiṃhāsane ..

||3||

mandāramallīkaravīramādhavī-

punnāganīlotpalacampakānvitaiḥ .

karpūrapāṭīrasuvāsitairjalaiḥ

ādhatsva mṛtyuñjaya pādyamuttamam ..

||4||

sugandhapuṣpaprakaraiḥ suvāsitaiḥ

viyannadīśītalavāribhiḥ śubhaiḥ .

trilokanāthārtiharārghyamādarāt

gṛhāṇa mṛtyuñjaya sarvavandita ..

||5||

himāmbuvāsitaistoyaiḥ śītalairatipāvanaiḥ .

mṛtyuñjaya mahādeva śuddhācamanamācara ..

||6||

guḍadadhisahitaṃ madhuprakīrṇaṃ

sughṛtasamanvitadhenudugdhayuktam .

śubhakara madhuparkamāhara tvaṃ

trinayana mṛtyuhara trilokavandya ..

||7||

pañcāstraśānta pañcāsya pañcapātakasaṃhara .

pañcāmṛtasnānamidaṃ kuru mṛtyuñjaya prabho ..

||8||

jagattrayīkhyāta samastatīrtha-

samāhṛtaiḥ kalmaṣahāribhiśca .

snānaṃ sutoyaiḥ samudācara tvaṃ

mṛtyuñjayānantaguṇābhirāma ..

||9||

ānītenātiśubhreṇa kauśeyenāmaradrumāt .

mārjayāmi jaṭābhāraṃ śiva mṛtyuñjaya prabho ..

||10||

nānāhemavicitrāṇi cīracīnāmbarāṇi ca .

vividhāni ca divyāni mṛtyuñjaya sudhāraya ..

||11||

viśuddhamuktāphalajālaramyaṃ

manoharaṃ kāñcanahemasūtram .

yajñopavītaṃ paramaṃ pavitram

ādhatsva mṛtyuñjaya bhaktigamya ..

||12||

śrīgandhaṃ ghanasārakuṅkumayutaṃ kastūrikāpūritaṃ

kāleyena himāmbunā viracitaṃ mandārasaṃvāsitam .

divyaṃ devamanoharaṃ maṇimaye pātre samāropitaṃ

sarvāṅgeṣu vilepayāmi satataṃ mṛtyuñjaya śrīvibho ..

||13||

akṣatairdhavalairdivyaiḥ samyaktilasamanvitaiḥ .

mṛtyuñjaya mahādeva pūjayāmi vṛṣadhvaja ..

||14||

campakapaṅkajakuravaka-

kundaiḥ karavīramallikākusumaiḥ .

vistāraya nijamakuṭaṃ

mṛtyuñjaya puṇḍarīkanayanāpta ..

||15||

māṇikyapādukādvandve maunihṛtpadmamandire .

pādau satpadmasadṛśau mṛtyuñjaya niveśaya ..

||16||

māṇikyakeyūrakirīṭahāraiḥ

kāñcīmaṇisthāpitakuṇḍalaiśca .

mañjīramukhyābharaṇairmanojñaiḥ

aṅgāni mṛtyuñjaya bhūṣayāmi ..

||17||

gajavadanaskandadhṛte-

nātisvacchena cāmarayugena .

galadalakānanapadmaṃ

mṛtyuñjaya bhāvayāmi hṛtpadme ..

||18||

muktātapatraṃ śaśikoṭiśubhraṃ

śubhapradaṃ kāñcanadaṇḍayuktam .

māṇikyasaṃsthāpitahemakumbhaṃ

sureśa mṛtyuñjaya te'rpayāmi ..

||19||

maṇimukure niṣpaṭale

trijagadgāḍhāndhakārasaptāśve .

kandarpakoṭisadṛśaṃ

mṛtyuñjaya paśya vadanamātmīyam ..

||20||

karpūracūrṇaṃ kapilājyapūtaṃ

dāsyāmi kāleyasamanvitaṃ ca .

samudbhavaṃ pāvanagandhadhūpitaṃ

mṛtyuñjayāṅgaṃ parikalpayāmi ..

||21||

vartitrayopetamakhaṇḍadīptyā

tamoharaṃ bāhyamathāntaraṃ ca .

sājyaṃ samastāmaravargahṛdyaṃ

sureśa mṛtyuñjaya vaṃśadīpam ..

||22||

rājānnaṃ madhurānvitaṃ ca mṛdulaṃ māṇikyapātre sthitaṃ

hiṅgūjīrakasanmarīcimilitaiḥ śākairanekaiḥ śubhaiḥ .

śākaṃ samyagapūpasūpasahitaṃ sadyoghṛtenāplutaṃ

śrīmṛtyuñjaya pārvatīpriya vibho sāpośanaṃ bhujyatām ..

||23||

kūśmāṇḍavārtākapaṭolikānāṃ

phalāni ramyāṇi ca kāravallyāḥ .

supākayuktāni sasaurabhāṇi

śrīkaṇṭha mṛtyuñjaya bhakṣayeśa ..

||24||

śītalaṃ madhuraṃ svacchaṃ pāvanaṃ vāsitaṃ laghu .

madhye svīkuru pānīyaṃ śiva mṛtyuñjaya prabho ..

||25||

śarkarāmilitaṃ snigdhaṃ dugdhānnaṃ goghṛtānvitam .

kadalīphalasammiśraṃ bhujyatāṃ mṛtyusaṃhara ..

||26||

kevalamatimādhuryaṃ

dugdhaiḥ snigdhaiśca śarkarāmilitaiḥ .

elāmarīcamilitaṃ

mṛtyuñjaya deva bhuṅkṣva paramānnam ..

||27||

rambhācūtakapitthakaṇṭakaphalairdrākṣārasasvādumat-

kharjūrairmadhurekṣukhaṇḍaśakalaiḥ sannārikelāmbubhiḥ .

karpūreṇa suvāsitairguḍajalairmādhuryayuktairvibho

śrīmṛtyuñjaya pūraya tribhuvanādhāraṃ viśālodaram ..

||28||

manojñarambhāvanakhaṇḍakhaṇḍitān

rucipradān sarṣapajīrakāṃśca .

sasaurabhān saindhavasevitāṃśca

gṛhāṇa mṛtyuñjaya lokavandya ..

||29||

hiṅgūjīrakasahitaṃ

vimalāmalakaṃ kapitthamatimadhuram .

bisakhaṇḍām̐llavaṇayutān

mṛtyuñjaya te'rpayāmi jagadīśa ..

||30||

elāśuṇṭhīsahitaṃ

dadhyannaṃ cāruhemapātrastham .

amṛtapratinidhimāḍhyaṃ

mṛtyuñjaya bhujyatāṃ trilokeśa ..

||31||

jambīranīrāñcitaśṛṅgaberaṃ

manoharānamlaśalāṭukhaṇḍān .

mṛdūpadaṃśān sahasopabhuṅkṣva

mṛtyuñjaya śrīkaruṇāsamudra ..

||32||

nāgararāmaṭhayuktaṃ

sulalitajambīranīrasampūrṇam .

mathitaṃ saindhavasahitaṃ

piba hara mṛtyuñjaya kratudhvaṃsin ..

||33||

mandārahemāmbujagandhayuktaiḥ

mandākinīnirmalapuṇyatoyaiḥ .

gṛhāṇa mṛtyuñjaya pūrṇakāma

śrīmatparāpośanamabhrakeśa ..

||34||

gaganadhunīvimalajalaiḥ

mṛtyuñjaya padmarāgapātragataiḥ .

mṛgamadacandanapūrṇaiḥ

prakṣālaya cāru hastapadayugmam ..

||35||

punnāgamallikākundavāsitairjāhnavījalaiḥ .

mṛtyuñjaya mahādeva punarācamanaṃ kuru ..

||36||

mauktikacūrṇasametaiḥ

mṛgamadaghanasāravāsitaiḥ pūgaiḥ .

parṇaiḥ svarṇasamānaiḥ

mṛtyuñjaya te'rpayāmi tāmbūlam ..

||37||

nīrājanaṃ nirmaladīptimadbhiḥ

dīpāṅkurairujjvalamucchritaiśca .

ghaṇṭāninādena samarpayāmi

mṛtyuñjayāya tripurāntakāya ..

||38||

viriñcimukhyāmaravṛndavandite

sarojamatsyāṅkitacakracihnite .

dadāmi mṛtyuñjaya pādapaṅkaje

phaṇīndrabhūṣe punararghyamīśvara ..

||39||

punnāganīlotpalakundajātī-

mandāramallīkaravīrapaṅkajaiḥ .

puṣpāñjaliṃ bilvadalaistulasyā

mṛtyuñjayāṅghrau viniveśayāmi ..

||40||

pade pade sarvatamonikṛntanaṃ

pade pade sarvaśubhapradāyakam .

pradakṣiṇaṃ bhaktiyutena cetasā

karomi mṛtyuñjaya rakṣa rakṣa mām ..

||41||

namo gaurīśāya sphaṭikadhavalāṅgāya ca namo

namo lokeśāya stutavibudhalokāya ca namaḥ .

namaḥ śrīkaṇṭhāya kṣapitapuradaityāya ca namo

namaḥ phālākṣāya smaramadavināśāya ca namaḥ ..

||42||

saṃsāre janitāparogasahite tāpatrayākrandite

nityaṃ putrakalatravittavilasatpāśairnibaddhaṃ dṛḍham .

garvāndhaṃ bahupāpavargasahitaṃ kāruṇyadṛṣṭyā vibho

śrīmṛtyuñjaya pārvatīpriya sadā māṃ pāhi sarveśvara ..

||43||

saudhe ratnamaye navotpaladalākīrṇe ca talpāntare

kauśeyena manohareṇa dhavalenācchādite sarvaśaḥ .

karpūrāñcitadīpadīptimilite ramyopadhānadvaye

pārvatyāḥ karapadmalālitapadaṃ mṛtyuñjayaṃ bhāvaye ..

||44||

catuścatvāriṃśadvilasadupacārairabhimataiḥ

manaḥpadme bhaktyā bahirapi ca pūjāṃ śubhakarīm .

karoti pratyūṣe niśi divasamadhye'pi ca pumān

prayāti śrīmṛtyuñjayapadamanekādbhutapadam ..

||45||

prātarliṅgamumāpateraharahaḥ sandarśanāt svargadaṃ

madhyāhne hayamedhatulyaphaladaṃ sāyantane mokṣadam .

bhānorastamaye pradoṣasamaye pañcākṣarārādhanaṃ

tatkālatrayatulyamiṣṭaphaladaṃ sadyo'navadyaṃ dṛḍham ..

||46||