yatrodyataḥ kṣititaloddharaṇāya bibhrat
brahmovāca
yatrodyataḥ kṣititaloddharaṇāya bibhrat .
krauḍīṃ tanuṃ sakalayajñamayīmanantaḥ .
antarmahārṇava upāgatamādidaityaṃ .
taṃ daṃṣṭrayā'drimiva vajradharo dadāra
||1||यत्रोद्यतः क्षितितलोद्धरणाय बिभ्रत् ।
क्रौडीं तनुं सकलयज्ञमयीमनन्तः ।
अन्तर्महार्णव उपागतमादिदैत्यं ।
तं दंष्ट्रयाऽद्रिमिव वज्रधरो ददार
jāto rucerajanayat suyamān suyajña .
ākūtisūnuḥ amarān atha dakṣiṇāyām .
lokatrayasya mahatīṃ aharad yadārtiṃ .
svāyambhuvena manunā harirityanūktaḥ
||2||जातो रुचेरजनयत् सुयमान् सुयज्ञ ।
आकूतिसूनुः अमरान् अथ दक्षिणायाम् ।
लोकत्रयस्य महतीं अहरद् यदार्तिं ।
स्वायम्भुवेन मनुना हरिरित्यनूक्तः
jajñe ca kardamagṛhe dvija devahūtyāṃ .
strībhiḥ samaṃ navabhirātmagatiṃ svamātre .
ūce yayā'tmaśamalaṃ guṇasaṅgapaṅkam .
asmin vidhūya kapilasya gatiṃ prapede
||3||जज्ञे च कर्दमगृहे द्विज देवहूत्यां ।
स्त्रीभिः समं नवभिरात्मगतिं स्वमात्रे ।
ऊचे ययाऽत्मशमलं गुणसङ्गपङ्कम् ।
अस्मिन् विधूय कपिलस्य गतिं प्रपेदे
atreḥ apatyamabhikāṅkṣata āha tuṣṭo .
datto mayāhamiti yad bhagavān sa dattaḥ .
yat pādapaṅkajaparāga pavitradehā .
yogarddhimāpurubhayīṃ yaduhaihayādyāḥ
||4||अत्रेः अपत्यमभिकाङ्क्षत आह तुष्टो ।
दत्तो मयाहमिति यद् भगवान् स दत्तः ।
यत् पादपङ्कजपराग पवित्रदेहा ।
योगर्द्धिमापुरुभयीं यदुहैहयाद्याः
taptaṃ tapo vividhalokasisṛkṣayā me .
ādau sanāt svatapasaḥ sa catuḥsano'bhūt .
prākkalpa saṃplavavinaṣṭamiha ātmatattvaṃ .
samyag jagāda munayo yadacakṣatātman
||5||तप्तं तपो विविधलोकसिसृक्षया मे ।
आदौ सनात् स्वतपसः स चतुःसनोऽभूत् ।
प्राक्कल्प संप्लवविनष्टमिह आत्मतत्त्वं ।
सम्यग् जगाद मुनयो यदचक्षतात्मन्
dharmasya dakṣaduhitaryajaniṣṭa mūrtyāṃ .
nārāyaṇo nara iti svatapaḥ prabhāvaḥ .
dṛṣṭvātmano bhagavato niyamāvalopaṃ .
devyastvanaṅgapṛtanā ghaṭituṃ na śekuḥ
||6||धर्मस्य दक्षदुहितर्यजनिष्ट मूर्त्यां ।
नारायणो नर इति स्वतपः प्रभावः ।
दृष्ट्वात्मनो भगवतो नियमावलोपं ।
देव्यस्त्वनङ्गपृतना घटितुं न शेकुः
kāmaṃ dahanti kṛtino nanu roṣadṛṣṭyā .
roṣaṃ dahantamuta te na dahantyasahyam .
so'yaṃ yadantaramalaṃ praviśan bibheti .
kāmaḥ kathaṃ nu punarasya manaḥ śrayeta
||7||कामं दहन्ति कृतिनो ननु रोषदृष्ट्या ।
रोषं दहन्तमुत ते न दहन्त्यसह्यम् ।
सोऽयं यदन्तरमलं प्रविशन् बिभेति ।
कामः कथं नु पुनरस्य मनः श्रयेत
viddhaḥ sapatnyuditapatribhiranti rājño .
bālo'pi sannupagatastapase vanāni .
tasmā adād dhruvagatiṃ gṛṇate prasanno .
divyāḥ stuvanti munayo yaduparyadhastāt
||8||विद्धः सपत्न्युदितपत्रिभिरन्ति राज्ञो ।
बालोऽपि सन्नुपगतस्तपसे वनानि ।
तस्मा अदाद् ध्रुवगतिं गृणते प्रसन्नो ।
दिव्याः स्तुवन्ति मुनयो यदुपर्यधस्तात्
yadvenamutpathagataṃ dvijavākyavajra .
niṣpluṣṭapauruṣabhagaṃ niraye patantam .
trātvā'rthito jagati putrapadaṃ ca lebhe .
dugdhā vasūni vasudhā sakalāni yena
||9||यद्वेनमुत्पथगतं द्विजवाक्यवज्र ।
निष्प्लुष्टपौरुषभगं निरये पतन्तम् ।
त्रात्वाऽर्थितो जगति पुत्रपदं च लेभे ।
दुग्धा वसूनि वसुधा सकलानि येन
nābherasāvṛṣabha āsa sudevisūnuḥ .
yo vai cacāra samadṛg jaḍayogacaryām .
yatpāramahaṃsyamṛṣayaḥ padamāmananti .
svasthaḥ praśāntakaraṇaḥ parimuktasaṅgaḥ
||10||नाभेरसावृषभ आस सुदेविसूनुः ।
यो वै चचार समदृग् जडयोगचर्याम् ।
यत्पारमहंस्यमृषयः पदमामनन्ति ।
स्वस्थः प्रशान्तकरणः परिमुक्तसङ्गः
satre mamā'sa bhagavān hayaśīrṣa eva .
sākṣāt sa yajñapuruṣaḥ tapanīyavarṇaḥ .
chandomayo makhamayo'khiladevatātmā .
vāco babhūvuruśatīḥ śvasato'sya nastaḥ
||11||सत्रे ममाऽस भगवान् हयशीर्ष एव ।
साक्षात् स यज्ञपुरुषः तपनीयवर्णः ।
छन्दोमयो मखमयोऽखिलदेवतात्मा ।
वाचो बभूवुरुशतीः श्वसतोऽस्य नस्तः
matsyo yugāntasamaye manunopalabdhaḥ .
kṣoṇīmayo nikhilajīvanikāyaketaḥ .
visraṃsitānurubhaye salile mukhānme .
ādāya tatra vijahāra ha vedamārgān
||12||मत्स्यो युगान्तसमये मनुनोपलब्धः ।
क्षोणीमयो निखिलजीवनिकायकेतः ।
विस्रंसितानुरुभये सलिले मुखान्मे ।
आदाय तत्र विजहार ह वेदमार्गान्
kṣīrodadhāvamaradānavayūthapānām .
unmathnatāmamṛtalabdhaya ādidevaḥ .
pṛṣṭhena kacchapavapurvidadhāra gotraṃ .
nidrākṣaṇo'driparivartakaṣāṇakaṇḍūḥ
||13||क्षीरोदधावमरदानवयूथपानाम् ।
उन्मथ्नताममृतलब्धय आदिदेवः ।
पृष्ठेन कच्छपवपुर्विदधार गोत्रं ।
निद्राक्षणोऽद्रिपरिवर्तकषाणकण्डूः
traiviṣṭaporubhayahā sa nṛsiṃharūpaṃ .
kṛtvā bhramad bhrukuṭidaṃṣṭrakarālavaktram .
daityendramāśu gadayā'bhipatantamārāt .
ūrau nipātya vidadāra nakhaiḥ sphurantam
||14||त्रैविष्टपोरुभयहा स नृसिंहरूपं ।
कृत्वा भ्रमद् भ्रुकुटिदंष्ट्रकरालवक्त्रम् ।
दैत्येन्द्रमाशु गदयाऽभिपतन्तमारात् ।
ऊरौ निपात्य विददार नखैः स्फुरन्तम्
antaḥ sarasyurubalena pade gṛhīto .
grāheṇa yūthapatirambujahasta ārtaḥ .
āhedamādipuruṣākhilalokanātha .
tīrthaśravaḥ śravaṇamaṅgalanāmadheya
||15||अन्तः सरस्युरुबलेन पदे गृहीतो ।
ग्राहेण यूथपतिरम्बुजहस्त आर्तः ।
आहेदमादिपुरुषाखिललोकनाथ ।
तीर्थश्रवः श्रवणमङ्गलनामधेय
śrutvā haristamaraṇārthinamaprameyaḥ .
cakrāyudhaḥ patagarājabhujādhirūḍhaḥ .
cakreṇa nakravadanaṃ vinipādya tasmād .
dhaste pragṛhya bhagavān kṛpayojjahāra
||16||श्रुत्वा हरिस्तमरणार्थिनमप्रमेयः ।
चक्रायुधः पतगराजभुजाधिरूढः ।
चक्रेण नक्रवदनं विनिपाद्य तस्माद् ।
धस्ते प्रगृह्य भगवान् कृपयोज्जहार
jyāyān guṇairavarajo'pyaditeḥ sutānāṃ .
lokān vicakrama imān yadathādhiyajñaḥ .
kṣmāṃ vāmanena jagṛhe tripadacchalena .
yācñāmṛte pathi caran prabhubhirna cālyaḥ
||17||ज्यायान् गुणैरवरजोऽप्यदितेः सुतानां ।
लोकान् विचक्रम इमान् यदथाधियज्ञः ।
क्ष्मां वामनेन जगृहे त्रिपदच्छलेन ।
याच्ञामृते पथि चरन् प्रभुभिर्न चाल्यः
nārtho balerayamurukramapādaśaucam .
āpaḥ śikhādhṛtavato vibudhādhipatyam .
yo vai pratiśrutamṛte na cikīrṣadanyad .
ātmānamaṅga śirasā haraye'bhimene
||18||नार्थो बलेरयमुरुक्रमपादशौचम् ।
आपः शिखाधृतवतो विबुधाधिपत्यम् ।
यो वै प्रतिश्रुतमृते न चिकीर्षदन्यद् ।
आत्मानमङ्ग शिरसा हरयेऽभिमेने
tubhyaṃ ca nārada bhṛśaṃ bhagavānvivṛddha .
bhāvena sādhu parituṣṭa uvāca yogam .
jñānaṃ ca bhāgavatamātmasatattvadīpaṃ .
yadvāsudevaśaraṇā vidurañjasaiva
||19||तुभ्यं च नारद भृशं भगवान्विवृद्ध ।
भावेन साधु परितुष्ट उवाच योगम् ।
ज्ञानं च भागवतमात्मसतत्त्वदीपं ।
यद्वासुदेवशरणा विदुरञ्जसैव
cakraṃ ca dikṣvavihataṃ daśasu svatejo .
manvantareṣu manuvaṃśadharo bibharti .
duṣṭeṣu rājasu damaṃ vyadadhātsvakīrtiṃ .
satye tripṛṣṭha uśatīṃ prathayaṃścaritraiḥ
||20||चक्रं च दिक्ष्वविहतं दशसु स्वतेजो ।
मन्वन्तरेषु मनुवंशधरो बिभर्ति ।
दुष्टेषु राजसु दमं व्यदधात्स्वकीर्तिं ।
सत्ये त्रिपृष्ठ उशतीं प्रथयंश्चरित्रैः
dhanvantariśca bhagavān svayameva kīrtiḥ .
nāmnā nṛṇāṃ pururujāṃ ruja āśu hanti .
yajñe ca bhāgamamṛtāyuravāvacandha .
āyuśca vedamanuśāstyavatīrya loke
||21||धन्वन्तरिश्च भगवान् स्वयमेव कीर्तिः ।
नाम्ना नृणां पुरुरुजां रुज आशु हन्ति ।
यज्ञे च भागममृतायुरवावचन्ध ।
आयुश्च वेदमनुशास्त्यवतीर्य लोके
kṣatraṃ kṣayāya vidhinopabhṛtaṃ mahātmā .
brahmadhrugujjhitapathaṃ narakārtilipsu .
uddhantyasāvavanikaṇṭakamugravīryaḥ .
triḥsaptakṛtva urudhāraparaśvadhena
||22||क्षत्रं क्षयाय विधिनोपभृतं महात्मा ।
ब्रह्मध्रुगुज्झितपथं नरकार्तिलिप्सु ।
उद्धन्त्यसाववनिकण्टकमुग्रवीर्यः ।
त्रिःसप्तकृत्व उरुधारपरश्वधेन
asmatprasādasumukhaḥ kalayā kaleśa .
ikṣvākuvaṃśa avatīrya gurornideśe .
tiṣṭhan vanaṃ sadayitānuja āviveśa .
yasmin virudhya daśakandhara ārtimārcchat
||23||अस्मत्प्रसादसुमुखः कलया कलेश ।
इक्ष्वाकुवंश अवतीर्य गुरोर्निदेशे ।
तिष्ठन् वनं सदयितानुज आविवेश ।
यस्मिन् विरुध्य दशकन्धर आर्तिमार्च्छत्
yasmā adādudadhirūḍhabhayāṅgavepo .
mārgaṃ sapadyaripuraṃ haravad didhakṣoḥ .
dūre suhṛnmathitaroṣa suśoṇadṛṣṭyā .
tātapyamānamakaroraganakracakraḥ
||24||यस्मा अदादुदधिरूढभयाङ्गवेपो ।
मार्गं सपद्यरिपुरं हरवद् दिधक्षोः ।
दूरे सुहृन्मथितरोष सुशोणदृष्ट्या ।
तातप्यमानमकरोरगनक्रचक्रः
vakṣaḥsthalasparśarugṇamahendravāha .
dantairviḍambitakakubjuṣa ūḍhahāsam .
sadyo'subhiḥ saha vineṣyati dārahartuḥ .
visphūrjitairdhanuṣa uccarato'dhi sainye
||25||वक्षःस्थलस्पर्शरुग्णमहेन्द्रवाह ।
दन्तैर्विडम्बितककुब्जुष ऊढहासम् ।
सद्योऽसुभिः सह विनेष्यति दारहर्तुः ।
विस्फूर्जितैर्धनुष उच्चरतोऽधि सैन्ये
bhūmeḥ suretaravarūthavimarditāyāḥ .
kleśavyayāya kalayā sitakṛṣṇakeśaḥ .
jātaḥ kariṣyati janānupalakṣyamārgaḥ .
karmāṇi cā''tmamahimopanibandhanāni
||26||भूमेः सुरेतरवरूथविमर्दितायाः ।
क्लेशव्ययाय कलया सितकृष्णकेशः ।
जातः करिष्यति जनानुपलक्ष्यमार्गः ।
कर्माणि चाऽऽत्ममहिमोपनिबन्धनानि
tokena jīvaharaṇaṃ yadulūkikāyāḥ .
traimāsikasya ca padā śakaṭo'pavṛttaḥ .
yad riṅgatāntaragatena divispṛśorvā .
unmūlanaṃ tvitarathā'rjunayorna bhāvyam
||27||तोकेन जीवहरणं यदुलूकिकायाः ।
त्रैमासिकस्य च पदा शकटोऽपवृत्तः ।
यद् रिङ्गतान्तरगतेन दिविस्पृशोर्वा ।
उन्मूलनं त्वितरथाऽर्जुनयोर्न भाव्यम्
yadvai vraje vrajapaśūn viṣatoyapītān .
pālāṃstvajīva yadanugrahadṛṣṭivṛṣṭyā .
tacchuddhaye'tiviṣavīrya vilolajihvam .
uccāṭayiṣyaduragaṃ viharan hradinyām
||28||यद्वै व्रजे व्रजपशून् विषतोयपीतान् ।
पालांस्त्वजीव यदनुग्रहदृष्टिवृष्ट्या ।
तच्छुद्धयेऽतिविषवीर्य विलोलजिह्वम् ।
उच्चाटयिष्यदुरगं विहरन् ह्रदिन्याम्
tatkarma divyamiva yanniśi niḥśayānaṃ .
dāvāgninā śucivane paridahyamāne .
unneṣyati vrajamato'vasitāntakālaṃ .
netre pidhāpya sabalo'nadhigamyavīryaḥ
||29||तत्कर्म दिव्यमिव यन्निशि निःशयानं ।
दावाग्निना शुचिवने परिदह्यमाने ।
उन्नेष्यति व्रजमतोऽवसितान्तकालं ।
नेत्रे पिधाप्य सबलोऽनधिगम्यवीर्यः
gṛhṇīta yad yadupabandhamamuṣya mātā .
śulbaṃ sutasya na tu tat tadamuṣya māti .
yajjṛmbhato'sya vadane bhuvanāni gopī .
saṃvīkṣya śaṃkitamanāḥ pratibodhitā''sīt
||30||गृह्णीत यद् यदुपबन्धममुष्य माता ।
शुल्बं सुतस्य न तु तत् तदमुष्य माति ।
यज्जृम्भतोऽस्य वदने भुवनानि गोपी ।
संवीक्ष्य शंकितमनाः प्रतिबोधिताऽऽसीत्
nandaṃ ca mokṣyati bhayād varuṇasya pāśāt .
gopān bileṣu pihitān mayasūnunā ca .
ahnyāpṛtaṃ niśi śayānamatiśrameṇa .
lokaṃ vikuṇṭha mupaneṣyati gokulaṃ sma
||31||नन्दं च मोक्ष्यति भयाद् वरुणस्य पाशात् ।
गोपान् बिलेषु पिहितान् मयसूनुना च ।
अह्न्यापृतं निशि शयानमतिश्रमेण ।
लोकं विकुण्ठ मुपनेष्यति गोकुलं स्म
gopairmakhe pratihate vrajaviplavāya .
deve'bhivarṣati paśūn kṛpayā rirakṣuḥ .
dhartocchilīndhramiva saptadināni sapta .
varṣo mahīdhramanaghaikakare salīlam
||32||गोपैर्मखे प्रतिहते व्रजविप्लवाय ।
देवेऽभिवर्षति पशून् कृपया रिरक्षुः ।
धर्तोच्छिलीन्ध्रमिव सप्तदिनानि सप्त ।
वर्षो महीध्रमनघैककरे सलीलम्
krīḍan vane niśi niśākararaśmigauryāṃ .
rāsonmukhaḥ kalapadāyatamūrcchitena .
uddīpitasmararujāṃ vrajabhṛdvadhūnāṃ .
harturhariṣyati śiro dhanadānugasya
||33||क्रीडन् वने निशि निशाकररश्मिगौर्यां ।
रासोन्मुखः कलपदायतमूर्च्छितेन ।
उद्दीपितस्मररुजां व्रजभृद्वधूनां ।
हर्तुर्हरिष्यति शिरो धनदानुगस्य
ye ca pralambakharadardurakeśyariṣṭa .
mallebhakaṃsayavanāḥ kapipauṇḍrakādyāḥ .
anye ca śālvakujabalvaladantavakra .
saptokṣaśambaravidūratha rukmimukhyāḥ
||34||ये च प्रलम्बखरदर्दुरकेश्यरिष्ट ।
मल्लेभकंसयवनाः कपिपौण्ड्रकाद्याः ।
अन्ये च शाल्वकुजबल्वलदन्तवक्र ।
सप्तोक्षशम्बरविदूरथ रुक्मिमुख्याः
ye vā mṛdhe samitiśālina āttacāpāḥ .
kāmbojamatsyakurukaikayasṛñjayādyāḥ .
yāsyantyadarśanamalaṃ balapārthabhīma .
vyājāhvayena hariṇā nilayaṃ tadīyam
||35||ये वा मृधे समितिशालिन आत्तचापाः ।
काम्बोजमत्स्यकुरुकैकयसृञ्जयाद्याः ।
यास्यन्त्यदर्शनमलं बलपार्थभीम ।
व्याजाह्वयेन हरिणा निलयं तदीयम्
kālena mīlitadhiyāmavamṛśya nṝṇāṃ .
stokāyuṣāṃ svanigamo bata dūrapāraḥ .
āvirhitastvanuyugaṃ sa hi satyavatyāṃ .
vedadrumaṃ viṭapaśo vibhajiṣyati sma
||36||कालेन मीलितधियामवमृश्य नॄणां ।
स्तोकायुषां स्वनिगमो बत दूरपारः ।
आविर्हितस्त्वनुयुगं स हि सत्यवत्यां ।
वेदद्रुमं विटपशो विभजिष्यति स्म
devadviṣāṃ nigamavartmani niṣṭhitānāṃ .
pūrbhirmayena vihitābhiradṛśyatūrbhiḥ .
lokān ghnatāṃ mativimohamatipralobhaṃ .
veṣaṃ vidhāya bahu bhāṣyata aupadharmyam
||37||देवद्विषां निगमवर्त्मनि निष्ठितानां ।
पूर्भिर्मयेन विहिताभिरदृश्यतूर्भिः ।
लोकान् घ्नतां मतिविमोहमतिप्रलोभं ।
वेषं विधाय बहु भाष्यत औपधर्म्यम्
yarhyālayeṣvapi satāṃ na hareḥ kathāḥ syuḥ .
pāṣaṇḍino dvijajanā vṛṣalā nṛdevāḥ .
svāhā svadhā vaṣaḍiti sma giro na yatra .
śāstā bhaviṣyati kalerbhagavān yugānte
||38||यर्ह्यालयेष्वपि सतां न हरेः कथाः स्युः ।
पाषण्डिनो द्विजजना वृषला नृदेवाः ।
स्वाहा स्वधा वषडिति स्म गिरो न यत्र ।
शास्ता भविष्यति कलेर्भगवान् युगान्ते
sarge tapo'hamṛṣayo nava ye prajeśāḥ .
sthāne ca dharmamakhamanvamarāvanīśāḥ .
ante tvadharmaharamanyuvaśāsurādyā .
māyāvibhūtaya imāḥ puruśaktibhājaḥ
||39||सर्गे तपोऽहमृषयो नव ये प्रजेशाः ।
स्थाने च धर्ममखमन्वमरावनीशाः ।
अन्ते त्वधर्महरमन्युवशासुराद्या ।
मायाविभूतय इमाः पुरुशक्तिभाजः
viṣṇornu vīryagaṇanāṃ katamo'rhatīha .
yaḥ pārthivānyapi kavirvimame rajāṃsi .
caskambha yaḥ svarahasāskhalatā tripṛṣṭhaṃ .
yasmāt trisāmyasadanād urukampayānam
||40||विष्णोर्नु वीर्यगणनां कतमोऽर्हतीह ।
यः पार्थिवान्यपि कविर्विममे रजांसि ।
चस्कम्भ यः स्वरहसास्खलता त्रिपृष्ठं ।
यस्मात् त्रिसाम्यसदनाद् उरुकम्पयानम्
nāntaṃ vidāmyahamamī munayo'grajāste .
māyābalasya puruṣasya kuto'pare ye .
gāyan guṇān daśaśatānana ādidevaḥ .
śeṣo'dhunāpi samavasyati nāsya pāram
||41||नान्तं विदाम्यहममी मुनयोऽग्रजास्ते ।
मायाबलस्य पुरुषस्य कुतोऽपरे ये ।
गायन् गुणान् दशशतानन आदिदेवः ।
शेषोऽधुनापि समवस्यति नास्य पारम्
yeṣāṃ sa eṣa bhagavān dayayedanantaḥ .
sarvātmanā'śritapado yadi nirvyalīkam .
te dustarāmatitaranti ca devamāyāṃ .
naiṣāṃ mamāhamiti dhīḥ śvaśṛgālabhakṣye
||42||येषां स एष भगवान् दययेदनन्तः ।
सर्वात्मनाऽश्रितपदो यदि निर्व्यलीकम् ।
ते दुस्तरामतितरन्ति च देवमायां ।
नैषां ममाहमिति धीः श्वशृगालभक्ष्ये
vedāhamaṅga paramasya hi yogamāyāṃ .
yūyaṃ bhavaśca bhagavānatha daityavaryaḥ .
patnī manoḥ sa ca manuśca tadātmajāśca .
prācīnabarhi ṛbhuraṅga uta dhruvaśca
||43||वेदाहमङ्ग परमस्य हि योगमायां ।
यूयं भवश्च भगवानथ दैत्यवर्यः ।
पत्नी मनोः स च मनुश्च तदात्मजाश्च ।
प्राचीनबर्हि ऋभुरङ्ग उत ध्रुवश्च
ikṣvākurailamucukundavidehagādhi .
raghvambarīṣasagarā gayanāhuṣādyāḥ .
māndhātralarkaśatadhanvanurantidevā .
devavrato baliramūrttarayo dilīpaḥ
||44||इक्ष्वाकुरैलमुचुकुन्दविदेहगाधि ।
रघ्वम्बरीषसगरा गयनाहुषाद्याः ।
मान्धात्रलर्कशतधन्वनुरन्तिदेवा ।
देवव्रतो बलिरमूर्त्तरयो दिलीपः
saubharyutaṅkaśibidevalapippalāda .
sārasvatoddhavaparāśarabhūriṣeṇāḥ .
ye'nye vibhīṣaṇahanūmadupendradatta .
pārthārṣṭiṣeṇaviduraśrutadeva varyāḥ
||45||सौभर्युतङ्कशिबिदेवलपिप्पलाद ।
सारस्वतोद्धवपराशरभूरिषेणाः ।
येऽन्ये विभीषणहनूमदुपेन्द्रदत्त ।
पार्थार्ष्टिषेणविदुरश्रुतदेव वर्याः
te vai vidantyatitaranti ca devamāyāṃ .
strīśūdrahūṇaśabarā api pāpajīvāḥ .
yadyadbhutakrama parāyaṇaśīlaśikṣāḥ .
tiryagjanā api kimu śrutadhāraṇā ye
||46||ते वै विदन्त्यतितरन्ति च देवमायां ।
स्त्रीशूद्रहूणशबरा अपि पापजीवाः ।
यद्यद्भुतक्रम परायणशीलशिक्षाः ।
तिर्यग्जना अपि किमु श्रुतधारणा ये
śaśvat praśāntamabhayaṃ pratibodhamātraṃ .
śuddhaṃ samaṃ sadasataḥ paramātmatattvam .
śabdo na yatra purukārakavān kriyārtho .
māyā paraityabhimukhe ca vilajjamānā
||47||शश्वत् प्रशान्तमभयं प्रतिबोधमात्रं ।
शुद्धं समं सदसतः परमात्मतत्त्वम् ।
शब्दो न यत्र पुरुकारकवान् क्रियार्थो ।
माया परैत्यभिमुखे च विलज्जमाना
tadvai padaṃ bhagavataḥ paramasya puṃso .
brahmeti yadvidurajasrasukhaṃ viśokam .
sadhryaṅ niyamya yatayo yamakartahetiṃ .
jahyuḥ svarāḍiva nipānakhanitramindraḥ
||48||तद्वै पदं भगवतः परमस्य पुंसो ।
ब्रह्मेति यद्विदुरजस्रसुखं विशोकम् ।
सध्र्यङ् नियम्य यतयो यमकर्तहेतिं ।
जह्युः स्वराडिव निपानखनित्रमिन्द्रः
sa śreyasāmapi vibhurbhagavān yato'sya .
bhāvasvabhāvavihitasya sataḥ prasiddhiḥ .
dehe svadhātuvigame'nuviśīryamāṇe .
vyomeva tatra puruṣo na viśīryate'jaḥ
||49||स श्रेयसामपि विभुर्भगवान् यतोऽस्य ।
भावस्वभावविहितस्य सतः प्रसिद्धिः ।
देहे स्वधातुविगमेऽनुविशीर्यमाणे ।
व्योमेव तत्र पुरुषो न विशीर्यतेऽजः
(anuṣṭup) so'yaṃ te'bhihitastāta bhagavān viśvabhāvanaḥ .
samāsena harernānyad anyasmāt sadasacca yat
||50||(अनुष्टुप्) सोऽयं तेऽभिहितस्तात भगवान् विश्वभावनः ।
समासेन हरेर्नान्यद् अन्यस्मात् सदसच्च यत्
idaṃ bhāgavataṃ nāma yanme bhagavatoditam .
saṅgraho'yaṃ vibhūtīnāṃ tvametad vipulī kuru
||51||इदं भागवतं नाम यन्मे भगवतोदितम् ।
सङ्ग्रहोऽयं विभूतीनां त्वमेतद् विपुली कुरु
rājovāca
yathā harau bhagavati nṛṇāṃ bhaktirbhaviṣyati .
sarvātmanyakhilādhāre iti saṅkalpya varṇaya
||52||यथा हरौ भगवति नृणां भक्तिर्भविष्यति ।
सर्वात्मन्यखिलाधारे इति सङ्कल्प्य वर्णय
māyāṃ varṇayato'muṣya īśvarasyānumodataḥ .
śṛṇvataḥ śraddhayā nityaṃ māyayā''tmā na muhyati
||53||मायां वर्णयतोऽमुष्य ईश्वरस्यानुमोदतः ।
शृण्वतः श्रद्धया नित्यं माययाऽऽत्मा न मुह्यति
iti śrīmadbhāgavate mahāpurāṇe pāramahaṃsyāṃ saṃhitāyāṃ dvitīyaskaṃdhe saptamo'dhyāyaḥ .. 7 ..
fr:Le Bhâgavata Purâna/Livre II/Chapitre 7