kṣatravṛddharajirambhānenāṃ vaṃśavarṇanam
śrīśuka uvāca
yaḥ purūravasaḥ putra āyuḥ tasyābhavan sutāḥ .
nahuṣaḥ kṣatravṛddhaśca rajī raṃbhaśca vīryavān
||1||यः पुरूरवसः पुत्र आयुः तस्याभवन् सुताः ।
नहुषः क्षत्रवृद्धश्च रजी रंभश्च वीर्यवान्
anenā iti rājendra śṛṇu kṣatravṛdho'nvayam .
kṣatravṛddhasutasyāsan suhotrasyātmajāstrayaḥ
||2||अनेना इति राजेन्द्र शृणु क्षत्रवृधोऽन्वयम् ।
क्षत्रवृद्धसुतस्यासन् सुहोत्रस्यात्मजास्त्रयः
kāśyaḥ kuśo gṛtsamada iti gṛtsamadādabhūt .
śunakaḥ śaunako yasya bahvṛcapravaro muniḥ
||3||काश्यः कुशो गृत्समद इति गृत्समदादभूत् ।
शुनकः शौनको यस्य बह्वृचप्रवरो मुनिः
kāśyasya kāśiḥ tatputro rāṣṭro dīrghatamaḥpitā .
dhanvantarirdairghatama āyurvedapravartakaḥ
||4||काश्यस्य काशिः तत्पुत्रो राष्ट्रो दीर्घतमःपिता ।
धन्वन्तरिर्दैर्घतम आयुर्वेदप्रवर्तकः
yajñabhug vāsudevāṃśaḥ smṛtamātrārtināśanaḥ .
tatputraḥ ketumānasya jajñe bhīmarathastataḥ
||5||यज्ञभुग् वासुदेवांशः स्मृतमात्रार्तिनाशनः ।
तत्पुत्रः केतुमानस्य जज्ञे भीमरथस्ततः
divodāso dyumāṃstasmāt pratardana iti smṛtaḥ .
sa eva śatrujid vatsa ṛtadhvaja itīritaḥ .
tathā kuvalayāśveti prokto'larkādayastataḥ
||6||दिवोदासो द्युमांस्तस्मात् प्रतर्दन इति स्मृतः ।
स एव शत्रुजिद् वत्स ऋतध्वज इतीरितः ।
तथा कुवलयाश्वेति प्रोक्तोऽलर्कादयस्ततः
ṣaṣṭi varṣasahasrāṇi ṣaṣṭi varṣaśatāni ca .
nālarkād aparo rājan medinīṃ bubhuje yuvā
||7||षष्टि वर्षसहस्राणि षष्टि वर्षशतानि च ।
नालर्काद् अपरो राजन् मेदिनीं बुभुजे युवा
alarkāt santatistasmāt sunītho'tha niketanaḥ .
dharmaketuḥ sutastasmāt satyaketurajāyata
||8||अलर्कात् सन्ततिस्तस्मात् सुनीथोऽथ निकेतनः ।
धर्मकेतुः सुतस्तस्मात् सत्यकेतुरजायत
dhṛṣṭaketuḥ sutastasmāt sukumāraḥ kṣitīśvaraḥ .
vītihotro'sya bhargo'to bhārgabhūmirabhūnnṛpa
||9||धृष्टकेतुः सुतस्तस्मात् सुकुमारः क्षितीश्वरः ।
वीतिहोत्रोऽस्य भर्गोऽतो भार्गभूमिरभून्नृप
itīme kāśayo bhūpāḥ kṣatravṛddhānvayāyinaḥ .
rambhasya rabhasaḥ putro gambhīraścākriyastataḥ
||10||इतीमे काशयो भूपाः क्षत्रवृद्धान्वयायिनः ।
रम्भस्य रभसः पुत्रो गम्भीरश्चाक्रियस्ततः
tasya kṣetre brahma jajñe śrṛṇu vaṃśamanenasaḥ .
śuddhastataḥ śucistasmāt trikakud dharmasārathiḥ
||11||तस्य क्षेत्रे ब्रह्म जज्ञे श्रृणु वंशमनेनसः ।
शुद्धस्ततः शुचिस्तस्मात् त्रिककुद् धर्मसारथिः
tataḥ śāntarajo jajñe kṛtakṛtyaḥ sa ātmavān .
rajeḥ pañcaśatānyāsan putrāṇāṃ amitaujasām
||12||ततः शान्तरजो जज्ञे कृतकृत्यः स आत्मवान् ।
रजेः पञ्चशतान्यासन् पुत्राणां अमितौजसाम्
devairabhyarthito daityān hatvendrāyādadād divam .
indrastasmai punardattvā gṛhītvā caraṇau rajeḥ
||13||देवैरभ्यर्थितो दैत्यान् हत्वेन्द्रायाददाद् दिवम् ।
इन्द्रस्तस्मै पुनर्दत्त्वा गृहीत्वा चरणौ रजेः
ātmānamarpayāmāsa prahrādādyariśaṃkitaḥ .
pitari uparate putrā yācamānāya no daduḥ
||14||आत्मानमर्पयामास प्रह्रादाद्यरिशंकितः ।
पितरि उपरते पुत्रा याचमानाय नो ददुः
triviṣṭapaṃ mahendrāya yajñabhāgān samādaduḥ .
guruṇā hūyamāne'gnau balabhit tanayān rajeḥ
||15||त्रिविष्टपं महेन्द्राय यज्ञभागान् समाददुः ।
गुरुणा हूयमानेऽग्नौ बलभित् तनयान् रजेः
avadhīd bhraṃśitān mārgān na kaścit avaśeṣitaḥ .
kuśāt pratiḥ kṣātravṛddhāt saṃjayastatsuto jayaḥ
||16||अवधीद् भ्रंशितान् मार्गान् न कश्चित् अवशेषितः ।
कुशात् प्रतिः क्षात्रवृद्धात् संजयस्तत्सुतो जयः
tataḥ kṛtaḥ kṛtasyāpi jajñe haryavano nṛpaḥ .
sahadevastato hīno jayasenastu tatsutaḥ
||17||ततः कृतः कृतस्यापि जज्ञे हर्यवनो नृपः ।
सहदेवस्ततो हीनो जयसेनस्तु तत्सुतः
saṅkṛtistasya ca jayaḥ kṣatradharmā mahārathaḥ .
kṣatravṛddhānvayā bhūpā ime śrṛṇu vaṃśaṃ ca nāhuṣāt
||18||सङ्कृतिस्तस्य च जयः क्षत्रधर्मा महारथः ।
क्षत्रवृद्धान्वया भूपा इमे श्रृणु वंशं च नाहुषात्
iti śrīmadbhāgavate mahāpurāṇe pāramahaṃsyāṃ saṃhitāyāṃ navamaskandhe saptadaśo'dhyāyaḥ .. 17 ..
hariḥ oṃ tatsat śrīkṛṣṇārpaṇamastu