saptamakāṇḍe caturthaḥ praśnaḥ 4
1 bṛha̱spati̍rakāmayata̱ śranme̍ de̱vā dadhī̍ra̱ngacche̍yaṃ puro̱dhāmiti̱
sa e̱taṃ ca̍turvigͫśatirā̱trama̍paśya̱ttamāha̍ra̱ttenā̍yajata̱
tato̱ vai tasmai̱ śradde̱vā ada̍dha̱tāga̍cchatpuro̱dhāṃ ya e̱vaṃ
vi̱dvāgͫsa̍ścaturvigͫśatirā̱tramāsa̍te̱ śrade̎bhyo manu̱ṣyā̍
dadhate̱ gaccha̍nti puro̱dhāṃ jyoti̱rgaurāyu̱riti̍ trya̱hā bha̍vantī̱yaṃ vāva
jyoti̍ra̱ntari̍kṣa̱ṃ gaura̱sāvāyu̍
2 ri̱māne̱va lo̱kāna̱bhyāro̍hantyabhipū̱rvaṃ trya̱hā bha̍vantyabhipū̱rvame̱va
su̍va̱rgaṃ lo̱kama̱bhyāro̍ha̱ntyasa̍ttra̱ṃ vā e̱tadyada̍cchando̱maṃ
yaccha̍ndo̱mā bhava̍nti̱ tena̍ sa̱ttraṃ de̱vatā̍ e̱va pṛ̱ṣṭhairava̍
ruṃdhate pa̱śūñcha̍ndo̱mairojo̱ vai vī̱rya̍ṃ pṛ̱ṣṭhāni̍ pa̱śava̍śchando̱mā
oja̍sye̱va vī̱rye̍ pa̱śuṣu̱ prati̍ tiṣṭhanti bṛhadrathaṃta̱rābhyā̎ṃ yantī̱yaṃ
vāva ra̍thaṃta̱rama̱sau bṛ̱hadā̱bhyāme̱va
3 ya̱ntyatho̍ a̱nayo̍re̱va prati̍ tiṣṭhantye̱tevai ya̱jñasyā̎ñja̱sāya̍nī
sru̱tī tābhyā̍me̱va su̍va̱rgaṃ lo̱kaṃ ya̍nti caturvigͫśatirā̱tro bha̍vati̱
catu̍rvigͫśatirardhamā̱sāḥ sa̍ṃvathsa̱raḥ sa̍ṃvathsa̱raḥ su̍va̱rgo lo̱kaḥ
sa̍ṃvathsa̱ra e̱va su̍va̱rge lo̱ke prati̍ tiṣṭha̱ntyatho̱ catu̍rvigͫśatyakṣarā
gāya̱trī gā̍ya̱trī bra̍hmavarca̱saṃ gā̍yatri̱yaiva bra̍hmavarca̱samava̍
ruṃdhate'tirā̱trāva̱bhito̍ bhavato brahmavarca̱sasya̱ pari̍gṛhītyai
||7.4.1||a̱sāvāyu̍rā̱bhyāme̱va paṃca̍ catvārigͫśacca
||7.4.1||4 yathā̱ vai ma̍nu̱ṣyā̍ e̱vaṃ de̱vā agra̍ āsa̱nte̍'kāmaya̱ntāva̍rtiṃ pā̱pmāna̍ṃ
mṛ̱tyuma̍pa̱hatya̱ daivīgͫ̍ sa̱g̱ͫsada̍ṃ gacche̱meti̱ ta e̱taṃ
ca̍turvigͫśatirā̱trama̍paśya̱ntamāha̍ra̱ntenā̍yajanta̱ tato̱ vai te'va̍rtiṃ
pā̱pmāna̍ṃ mṛ̱tyuma̍pa̱hatya̱ daivīgͫ̍ sa̱g̱ͫ sada̍magaccha̱ṉ, ya e̱vaṃ
vi̱dvāgͫsa̍ścaturvigͫśati rā̱tramāsa̱te'va̍rtime̱va pā̱pmāna̍mapa̱hatya̱
śriya̍ṃ gacchanti̱ śrīrhi ma̍nu̱ṣya̍sya̱
5 daivī̍ sa̱g̱ͫsajjyoti̍ratirā̱tro bha̍vati suva̱rgasya̍ lo̱kasyānu̍khyātyai̱
pṛṣṭhya̍ḥ ṣaḍa̱ho bha̍vati̱ ṣaḍvā ṛ̱tava̍ḥ saṃvathsa̱rastaṃ māsā̍
ardhamā̱sā ṛ̱tava̍ḥ pra̱viśya̱ daivīgͫ̍ sa̱g̱ͫsada̍magaccha̱ṉ ya
e̱vaṃ vi̱dvāgͫsa̍ścaturvigͫśatirā̱tramāsa̍te saṃvathsa̱rame̱va pra̱viśya̱
vasya̍sīgͫ sa̱g̱ͫsada̍ṃ gacchanti̱ traya̍strayastri̱g̱ͫśā a̱vastā̎dbhavanti̱
traya̍strayastri̱g̱ͫśāḥ pa̱rastā̎ttrayastri̱g̱ͫśaire̱vobha̱yato'va̍rtiṃ
pā̱pmāna̍mapa̱hatya̱ daivīgͫ̍ sa̱g̱ͫsada̍ṃ madhya̱to
6 ga̍cchanti pṛ̱ṣṭhāni̱ hi daivī̍ sa̱g̱ͫsajjā̱mi vā e̱tatku̍rvanti̱
yattraya̍strayastri̱g̱ͫśā a̱nvañco̱ madhye'ni̍rukto bhavati̱ tenājā̎myū̱rdhvāni̍
pṛ̱ṣṭhāni̍ bhavantyū̱rdhvāścha̍ndo̱mā u̱bhābhyāgͫ̍ rū̱pābhyāgͫ̍ suva̱rgaṃ
lo̱kaṃ ya̱ntyasa̍ttra̱ṃ vā e̱tadyada̍cchando̱maṃ yaccha̍ndo̱mā bhava̍nti̱
tena̍ sa̱ttraṃ de̱vatā̍ e̱va pṛ̱ṣṭhairava̍ ruṃdhate pa̱śūñcha̍ndo̱mairojo̱
vai vī̱rya̍ṃ pṛ̱ṣṭhāni̍ pa̱śava̍
7 śchando̱mā oja̍sye̱va vī̱rye̍ pa̱śuṣu̱ prati̍ tiṣṭhanti̱
traya̍strayastri̱g̱ͫśā a̱vastā̎dbhavanti̱ traya̍strayastri̱g̱ͫśāḥ
pa̱rastā̱nmadhye̍ pṛ̱ṣṭhānyuro̱ vai tra̍yastri̱g̱ͫśā ā̱tmā pṛ̱ṣṭhānyā̱tmana̍
e̱va tadyaja̍mānā̱ḥ śarma̍ nahya̱nte'nā̎rtyai bṛhadrathaṃta̱rābhyā̎ṃ yantī̱yaṃ
vāva ra̍thaṃta̱rama̱sau bṛ̱hadā̱bhyāme̱va ya̱ntyatho̍ a̱nayo̍re̱va prati̍
tiṣṭhantye̱te vai ya̱jñasyā̎ñja̱sāya̍nī sru̱tī tābhyā̍me̱va
8 su̍va̱rgaṃ lo̱kaṃ ya̍nti̱ parā̎ñco̱ vā e̱te su̍va̱rgaṃ lo̱kama̱bhyāro̍hanti̱
ye pa̍rā̱cīnā̍ni pṛ̱ṣṭhānyu̍pa̱yanti̍ pra̱tyaṅkhṣa̍ḍa̱ho bha̍vati
pra̱tyava̍rūḍhyā̱ atho̱ prati̍ṣṭhityā u̱bhayo̎rlo̱kayor̍ ṛ̱ddhvotti̍ṣṭhanti
tri̱vṛto'dhi̍ tri̱vṛta̱mupa̍ yanti̱ stomā̍nā̱g̱ͫ saṃ pa̍ttyai prabha̱vāya̱
jyoti̍ragniṣṭo̱mo bha̍vatya̱yaṃ vāva sa kṣayo̱'smāde̱va tena̱ kṣayā̱nna ya̍nti
caturvigͫśatirā̱tro bha̍vati̱ catu̍rvigͫśatirardhamā̱sāḥ sa̍ṃvathsa̱raḥ
sa̍ṃvathsa̱raḥ su̍va̱rgo lo̱kaḥ sa̍ṃvathsa̱ra e̱va su̍va̱rge lo̱ke prati̍
tiṣṭha̱ntyatho̱ catu̍vigͫśatyakṣarā gāya̱trī gā̍ya̱trī bra̍hmavarca̱saṃ
gā̍yatri̱yaiva bra̍hmavarca̱samava̍ ruṃdhate'ti rā̱trāva̱bhito̍ bhavato
brahmavarca̱sasya̱ pari̍gṛhītyai
||7.4.2||ma̱nu̱ṣya̍sya madhya̱taḥ
pa̱śava̱stābhyā̍me̱va sa̍ṃvathsa̱raścatu̍rvigͫśatiśca
||7.4.2||9 ṛ̱kṣā vā i̱yama̍lo̱makā̍sī̱thsākā̍maya̱tauṣa̍dhībhi̱rvana̱spati̍bhi̱ḥ
pra jā̍ye̱yeti̱ saitāstri̱g̱ͫśata̱g̱ͫ rātrī̍rapaśya̱ttato̱ vā
i̱yamoṣa̍dhībhi̱rvana̱spati̍bhi̱ḥ prājā̍yata̱ ye pra̱jākā̍māḥ pa̱śukā̍mā̱ḥ
syusta e̱tā ā̍sīra̱npraiva jā̍yante pra̱jayā̍ pa̱śubhi̍ri̱yaṃ vā a̍kṣudhya̱thsaitāṃ
vi̱rāja̍mapaśya̱t tāmā̱tmandhi̱tvānnādya̱mavā̍ru̱ṃdhauṣa̍dhī̱
10 rvana̱spatī̎npra̱jāṃ pa̱śūntenā̍'vardhata̱ sā je̱māna̍ṃ mahi̱māna̍magaccha̱dya
e̱vaṃ vi̱dvāgͫsa̍ e̱tā āsa̍te vi̱rāja̍me̱vātmandhi̱tvānnādya̱mava̍ ruṃdhate̱
vardha̍nte pra̱jayā̍ pa̱śubhi̍rje̱māna̍ṃ mahi̱māna̍ṃ gacchanti̱ jyoti̍ratirā̱tro
bha̍vati suva̱rgasya̍ lo̱kasyānu̍khyātyai̱ pṛṣṭhya̍ḥ ṣaḍa̱ho bha̍vati̱
ṣaḍvā ṛ̱tava̱ḥ ṣaṭpṛ̱ṣṭhāni̍ pṛ̱ṣṭhaire̱vartūna̱nvāro̍hantyṛ̱tubhi̍ḥ
saṃvathsa̱raṃ te sa̍ṃvathsa̱ra e̱va
11 prati̍ tiṣṭhanti trayastri̱g̱ͫśāttra̍yastri̱g̱ͫśamupa̍ yanti ya̱jñasya̱
saṃta̍tyā̱ atho̎ pra̱jāpa̍ti̱rvai tra̍yastri̱g̱ͫśaḥ pra̱jāpa̍time̱vāra̍bhante̱
prati̍ṣṭhityai triṇa̱vo bha̍vati̱ viji̍tyā ekavi̱g̱ͫśo bha̍vati̱ prati̍ṣṭhityā̱
atho̱ ruca̍me̱vātmanda̍dhate tri̱vṛda̍gni̱ṣṭudbha̍vati pā̱pmāna̍me̱va tena̱
nirda̍ha̱nte'tho̱ tejo̱ vai tri̱vṛtteja̍ e̱vātmanda̍dhate pañcada̱śa i̍ndrasto̱mo
bha̍vatīndri̱yame̱vāva̍
12 ruṃdhate saptada̱śo bha̍vatya̱nnādya̱syāva̍ruddhyā̱ atho̱ praiva tena̍
jāyanta ekavi̱g̱ͫśo bha̍vati̱ prati̍ṣṭhityā̱ atho̱ ruca̍me̱vātmanda̍dhate
caturvi̱g̱ͫśo bha̍vati̱ catu̍rvigͫśatirardhamā̱sāḥ sa̍ṃvathsa̱raḥ
sa̍ṃvathsa̱raḥ su̍va̱rgo lo̱kaḥ sa̍ṃvathsa̱ra e̱va su̍va̱rge lo̱ke prati̍
tiṣṭha̱ntyatho̍ e̱ṣa vai vi̍ṣū̱vān, vi̍ṣū̱vanto̍ bhavanti̱ ya e̱vaṃ vi̱dvāgͫsa̍
e̱tā āsa̍te caturvi̱g̱ͫśātpṛ̱ṣṭhānyupa̍ yanti saṃvathsa̱ra e̱va pra̍ti̱ṣṭhāya̍
13 de̱vatā̍ a̱bhyāro̍hanti trayastri̱g̱ͫśāttra̍yastri̱g̱ͫśamupa̍ yanti̱
traya̍strigͫśa̱dvai de̱vatā̍ de̱vatā̎sve̱va prati̍ tiṣṭhanti triṇa̱vo bha̍vatī̱me
vai lo̱kāstri̍ṇa̱va e̱ṣve̍va lo̱keṣu̱ prati̍ tiṣṭhanti̱ dvāve̍kavi̱g̱ͫśau
bha̍vata̱ḥ prati̍ṣṭhityā̱ atho̱ ruca̍me̱vātmanda̍dhate ba̱hava̍ḥ ṣoḍa̱śino̍
bhavanti̱ tasmā̎dba̱hava̍ḥ pra̱jāsu̱ vṛṣā̍ṇo̱ yade̱te stomā̱ vyati̍ṣaktā̱
bhava̍nti̱ tasmā̍di̱yamoṣa̍dhībhi̱rvana̱spati̍bhi̱rvyati̍ṣaktā̱
14 vyati̍ṣajyante pra̱jayā̍ pa̱śubhi̱rya e̱vaṃ vi̱dvāgͫsa̍ e̱tā
āsa̱te'klṛ̍ptā̱ vā e̱te su̍va̱rgaṃ lo̱kaṃ ya̍ntyuccāva̱cān hi stomā̍nupa̱yanti̱
yade̱ta ū̱rdhvāḥ klṛ̱ptāḥ stomā̱ bhava̍nti klṛ̱ptā e̱va su̍va̱rgaṃ lo̱kaṃ
ya̍ntyu̱bhayo̍rebhyo lo̱kayo̎ḥ kalpate tri̱g̱ͫśade̱tāstri̱g̱ͫśada̍kṣarā
vi̱rāḍanna̍ṃ vi̱rāḍvi̱rājai̱vānnādya̱mava̍ ruṃdhate'tirā̱trāva̱bhito̍
bhavato̱'nnādya̍sya̱ pari̍gṛhītyai
||7.4.3||oṣa̍dhīḥ saṃvathsa̱ra e̱vāva̍
prati̱ṣṭhāya̱ vyati̍ṣa̱ktaikā̱nna pa̍ṃcā̱śacca̍
||7.4.3||15 pra̱jāpa̍tiḥ suva̱rgaṃ lo̱kamai̱ttaṃ de̱vā yena̍ yena̱ chaṃda̱sānu̱
prāyu̍ñjata̱ tena̱ nāpnu̍va̱nta e̱tā dvātrigͫ̍śata̱g̱ͫ
rātrī̍rapaśya̱ndvātrigͫ̍śadakṣarānu̱ṣṭugānu̍ṣṭubhaḥ pra̱jāpa̍ti̱ḥ
svenai̱va chaṃda̍sā pra̱jāpa̍timā̱ptvābhyā̱ruhya̍ suva̱rgaṃ
lo̱kamā̍ya̱ṉ ya e̱vaṃ vi̱dvāgͫsa̍ e̱tā āsa̍te̱ dvātrigͫ̍śade̱tā
dvātrigͫ̍śadakṣarānu̱ṣṭugānu̍ṣṭubhaḥ pra̱jāpa̍ti̱ḥ svenai̱va chaṃda̍sā
pra̱jāpa̍timā̱ptvā śriya̍ṃ gacchanti̱
16 śrīrhi ma̍nu̱ṣya̍sya suva̱rgo lo̱ko dvātrigͫ̍śade̱tā
dvātrigͫ̍śadakṣarānu̱ṣṭugvāga̍nu̱ṣṭupsarvā̍me̱va vāca̍māpnuvanti̱ sarve̍
vā̱co va̍di̱tāro̍ bhavanti̱ sarve̱ hi śriya̱ṃ gaccha̍nti̱ jyoti̱rgaurāyu̱riti̍
trya̱hā bha̍vantī̱yaṃ vāva jyoti̍ra̱ntari̍kṣa̱ṃ gaura̱sāvāyu̍ri̱māne̱va
lo̱kāna̱bhyāro̍hantyabhipū̱rvaṃ trya̱hā bha̍vantyabhipū̱rvame̱va su̍va̱rgaṃ
lo̱kama̱bhyāro̍hanti bṛhadrathaṃta̱rābhyā̎ṃ yantī̱
17 yaṃ vāva ra̍thaṃta̱rama̱sau bṛ̱hadā̱bhyāme̱va ya̱ntyatho̍ a̱nayo̍re̱va
prati̍ tiṣṭhantye̱te vai ya̱jñasyā̎ñja̱sāya̍nī sru̱tī tābhyā̍me̱va su̍va̱rgaṃ
lo̱kaṃ ya̍nti̱ parā̎ñco̱ vā e̱te su̍va̱rgaṃ lo̱kama̱bhyāro̍hanti̱ ye
parā̍castrya̱hānu̍pa̱yanti̍ pra̱tyaṅtrya̱ho bha̍vati pra̱tyava̍rūḍhyā̱ atho̱
prati̍ṣṭhityā u̱bhayo̎rlo̱kayor̍ ṛ̱ddhvotti̍ṣṭhanti̱ dvātrigͫ̍śade̱tāstāsā̱ṃ
yāstri̱g̱ͫśattri̱g̱ͫśada̍kṣarā vi̱rāḍanna̍ṃ vi̱rāḍvi̱rājai̱vānnādya̱mava̍
ruṃdhate̱ ye dve a̍horā̱tre e̱va te u̱bhābhyāgͫ̍ rū̱pābhyāgͫ̍ suva̱rgaṃ lo̱kaṃ
ya̍ntyatirā̱trāva̱bhito̍ bhavata̱ḥ pari̍gṛhītyai
||7.4.4||ga̱ccha̱nti̱ ya̱nti̱
tri̱g̱ͫśada̍kṣarā̱ dvāvigͫ̍śatiśca
||7.4.4||18 dve vāva de̍vasa̱ttre dvā̍daśā̱haścai̱va tra̍yastrigͫśada̱haśca̱
ya e̱vaṃ vi̱dvāgͫsa̍strayastrigͫśada̱hamāsa̍te sā̱kṣāde̱va de̱vatā̍
a̱bhyāro̍hanti̱ yathā̱ khalu̱ vai śreyā̍na̱bhyārū̍ḍhaḥ kā̱maya̍te̱ tathā̍
karoti̱ yadya̍va̱vidhya̍ti̱ pāpī̍yānbhavati̱ yadi̱ nāva̱vidhya̍ti sa̱dṛṅya
e̱vaṃ vi̱dvāgͫsa̍strayastrigͫśada̱hamāsa̍te̱ vi pā̱pmanā̱ bhrātṛ̍vye̱ṇā
va̍rtante'ha̱rbhājo̱ vā e̱tā de̱vā agra̱ āha̍ra̱
19 nnaha̱reko'bha̍ja̱tāha̱reka̱stābhi̱rvai te pra̱bāhu̍gārdhnuva̱ṉ ya e̱vaṃ
vi̱dvāgͫsa̍strayastrigͫśada̱hamāsa̍te̱ sarva̍ e̱va pra̱bāhu̍gṛdhnuvanti̱
sarve̱ grāma̍ṇīya̱ṃ prāpnu̍vanti pañcā̱hā bha̍vanti̱ pañca̱ vā ṛ̱tava̍ḥ
saṃvathsa̱ra ṛ̱tuṣve̱va sa̍ṃvathsa̱re prati̍ tiṣṭha̱ntyatho̱ pañcā̎kṣarā
pa̱ṅktiḥ pāṅkto̍ ya̱jño ya̱jñame̱vāva̍ ruṃdhate̱ trīṇyā̎śvi̱nāni̍ bhavanti̱
traya̍ i̱me lo̱kā e̱
20 ṣve̍va lo̱keṣu̱ prati̍ tiṣṭha̱ntyatho̱ trīṇi̱ vai ya̱jñasye̎ndri̱yāṇi̱
tānye̱vāva̍ ruṃdhate viśva̱jidbha̍vatya̱nnādya̱syāva̍ruddhyai̱ sarva̍pṛṣṭho bhavati̱
sarva̍syā̱bhiji̍tyai̱ vāgvai dvā̍daśā̱ho yatpu̱rastā̎ddvādaśā̱hamu̍pe̱yuranā̎ptā̱ṃ
vāca̱mupe̍yurupa̱dāsu̍kaiṣā̱ṃ vāksyā̍du̱pari̍ṣṭāddvādaśā̱hamupa̍ yantyā̱ptāme̱va
vāca̱mupa̍ yanti̱ tasmā̍du̱pari̍ṣṭādvā̱cā va̍dāmo'vānta̱raṃ
21 vai da̍śarā̱treṇa̍ pra̱jāpa̍tiḥ pra̱jā a̍sṛjata̱ yadda̍śarā̱tro
bhava̍ti pra̱jā e̱va tadyaja̍mānāḥ sṛjanta e̱tāgͫ ha̱ vā u̍da̱ṅkaḥ
śau̎lbāya̱naḥ sa̱ttrasyarddhi̍muvāca̱ yadda̍śarā̱tro yadda̍śarā̱tro
bhava̍ti sa̱ttrasya̍rddhyā̱ atho̱ yade̱va pūrve̱ṣvaha̍ssu̱ vilo̍ma
kri̱yate̱ tasyai̱vaiṣā śānti̍rdvyanī̱kā vā e̱tā rātra̍yo̱ yaja̍mānā
viśva̱jithsa̱hāti̍rā̱treṇa̱ pūrvā̱ḥ ṣoḍa̍śa sa̱hāti̍rā̱treṇotta̍rā̱ḥ
ṣoḍa̍śa̱ ya e̱vaṃ vi̱dvāgͫsa̍strayastrigͫśada̱hamāsa̍ta̱ aiṣā̎ṃ
dvyanī̱kā pra̱jā jā̍yate'tirā̱trāva̱bhito̍ bhavata̱ḥ pari̍gṛhītyai
||7.4.5||a̱ha̱ra̱nne̱ṣva̍vānta̱ragͫ ṣoḍa̍śa sa̱ha sa̱ptada̍śa ca
||7.4.5||22 ā̱di̱tyā a̍kāmayanta suva̱rgaṃ lo̱kami̍yā̱meti̱ te su̍va̱rgaṃ
lo̱kaṃ na prājā̍na̱nna su̍va̱rgaṃ lo̱kamā̍ya̱nta e̱tagͫ
ṣa̍ṭtrigͫśadrā̱trama̍paśya̱ntamāha̍ra̱ntenā̍yajanta̱ tato̱ vai te
su̍va̱rgaṃ lo̱kaṃ prājā̍nanthsuva̱rgaṃ lo̱kamā̍ya̱ṉ, ya e̱vaṃ vi̱dvāgͫsa̍ḥ
ṣaṭtrigͫśadrā̱tramāsa̍te suva̱rgame̱va lo̱kaṃ pra jā̍nanti suva̱rgaṃ lo̱kaṃ
ya̍nti̱ jyoti̍ratirā̱tro
23 bha̍vati̱ jyoti̍re̱va pu̱rastā̎ddadhate suva̱rgasya̍ lo̱kasyānu̍khyātyai ṣaḍa̱hā
bha̍vanti̱ ṣaḍvā ṛ̱tava̍ ṛ̱tuṣve̱va prati̍ tiṣṭhanti ca̱tvāro̍ bhavanti̱
cata̍sro̱ diśo̍ di̱kṣve̍va prati̍ tiṣṭha̱ntyasa̍ttra̱ṃ vā e̱tadyada̍chando̱maṃ
yaccha̍ndo̱mā bhava̍nti̱ tena̍ sa̱ttraṃ de̱vatā̍ e̱va pṛ̱ṣṭhairava̍ ruṃdhate
pa̱śūñcha̍ndo̱mairojo̱ vai vī̱rya̍ṃ pṛ̱ṣṭhāni̍ pa̱śava̍śchando̱mā oja̍sye̱va
24 vī̱rye̍ pa̱śuṣu̱ prati̍ tiṣṭhanti ṣaṭtrigͫśadrā̱tro bha̍vati̱
ṣaṭtrigͫ̍śadakṣarā bṛha̱tī bārha̍tāḥ pa̱śavo̍ bṛha̱tyaiva pa̱śūnava̍
ruṃdhate bṛha̱tī chaṃda̍sā̱g̱ svārā̎jyamāśnutāśnu̱vate̱ svārā̎jya̱ṃ
ya e̱vaṃ vi̱dvāgͫsa̍ḥ ṣaṭtrigͫśadrā̱tramāsa̍te suva̱rgame̱va lo̱kaṃ
ya̍ntyatirā̱trāva̱bhito̍ bhavataḥ suva̱rgasya̍ lo̱kasya̱ pari̍gṛhītyai
||7.4.6||a̱ti̱rā̱tra oja̍sye̱va ṣaṭ trigͫ̍śacca
||7.4.6||25 vasi̍ṣṭho ha̱tapu̍tro'kāmayata vi̱ndeya̍ pra̱jāma̱bhi sau̍dā̱sānbha̍veya̱miti̱
sa e̱tame̍kasmānna pañcā̱śama̍paśya̱ttamāha̍ra̱ttenā̍yajata̱ tato̱ vai so'vi̍ndata
pra̱jāma̱bhi sau̍dā̱sāna̍bhava̱dya e̱vaṃ vi̱dvāgͫsa̍ ekasmānna pañcā̱śamāsa̍te
vi̱ndante̎ pra̱jāma̱bhi bhrātṛ̍vyānbhavanti̱ traya̍stri̱vṛto̎'gniṣṭo̱mā
bha̍vanti̱ vajra̍syai̱va mukha̱g̱ͫ sa2gͫ śya̍nti̱ daśa̍ pañcada̱śā
bha̍vanti pañcada̱śo vajro̱
26 vajra̍me̱va bhrātṛ̍vyebhya̱ḥ pra ha̍ranti ṣoḍaśi̱madda̍śa̱mamaha̍rbhavati̱
vajra̍ e̱va vī̱rya̍ṃ dadhati̱ dvāda̍śa saptada̱śā bha̍vantya̱nnādya̱syāva̍ruddhyā̱
atho̱ praiva tairjā̍yante̱ pṛṣṭhya̍ḥ ṣaḍa̱ho bha̍vati̱ ṣaḍvā ṛ̱tava̱ḥ
ṣaṭpṛ̱ṣṭhāni̍ pṛ̱ṣṭhaire̱vartūna̱nvāro̍hantyṛ̱tubhi̍ḥ saṃvathsa̱raṃ
te sa̍ṃvathsa̱ra e̱va prati̍ tiṣṭhanti̱ dvāda̍śaikavi̱g̱ͫśā bha̍vanti̱
prati̍ṣṭhityā̱ atho̱ ruca̍me̱vātma
27 nda̍dhate ba̱hava̍ḥ ṣoḍa̱śino̍ bhavanti̱ viji̍tyai̱ ṣaḍā̎śvi̱nāni̍
bhavanti̱ ṣaḍvā ṛ̱tava̍ ṛ̱tuṣve̱va prati̍ tiṣṭhantyūnātiri̱ktā vā e̱tā
rātra̍ya ū̱nāstadyadeka̍syai̱ na pa̍ñcā̱śadati̍riktā̱stadyadbhūya̍sīra̱ṣṭā
ca̍tvārigͫśata ū̱nācca̱ khalu̱ vā ati̍riktācca pra̱jāpa̍ti̱ḥ prājā̍yata̱
ye pra̱jākā̍māḥ pa̱śukā̍mā̱ḥ syusta e̱tā ā̍sīra̱npraiva jā̍yante pra̱jayā̍
pa̱śubhi̍rvairā̱jo vā e̱ṣa ya̱jño yade̍kasmānnapañcā̱śo ya e̱vaṃ
vi̱dvāgͫsa̍ ekasmānnapañcā̱śamāsa̍te vi̱rāja̍me̱va ga̍cchantyannā̱dā
bha̍vantyatirā̱trāva̱bhito̍ bhavato̱'nnādya̍sya̱ pari̍gṛhītyai
||7.4.7||vajra̍
ā̱tmanpra̱jayā̱ dvāvigͫ̍śatiśca
||7.4.7||28 sa̱ṃva̱thsa̱rāya̍ dīkṣi̱ṣyamā̍ṇā ekāṣṭa̱kāyā̎ṃ dīkṣeranne̱ṣā vai
sa̍ṃvathsa̱rasya̱ patnī̱ yade̍kāṣṭa̱kaitasyā̱ṃ vā e̱ṣa e̱tāgͫ rātri̍ṃ vasati
sā̱kṣāde̱va sa̍ṃvathsa̱ramā̱rabhya̍ dīkṣanta̱ ārta̱ṃ vā e̱te sa̍ṃvathsa̱rasyā̱bhi
dī̎kṣante̱ ya e̍kāṣṭa̱kāyā̱ṃ dīkṣa̱nte'nta̍nāmānāvṛ̱tū bha̍vato̱ vya̍sta̱ṃ vā
e̱te sa̍ṃvathsa̱rasyā̱bhi dī̎kṣante̱ ya e̍kāṣṭa̱kāyā̱ṃ dīkṣa̱nte'nta̍nāmānāvṛ̱tū
bha̍vataḥ phalgunīpūrṇamā̱se dī̎kṣera̱nmukha̱ṃ vā e̱tath
29 sa̍ṃvathsa̱rasya̱ yatpha̍lgunīpūrṇamā̱so mu̍kha̱ta e̱va sa̍ṃvathsa̱ramā̱rabhya̍
dīkṣante̱ tasyaikai̱va ni̱ryā yathsāṃ me̎ghye viṣū̱vānthsa̱ṃ padya̍te citrāpūrṇamā̱se
dī̎kṣera̱nmukha̱ṃ vā e̱tathsa̍ṃvathsa̱rasya̱ yacci̍trāpūrṇamā̱so mu̍kha̱ta e̱va
sa̍ṃvathsa̱ramā̱rabhya̍ dīkṣante̱ tasya̱ na kāca̱na ni̱ryā bha̍vati catura̱he
pu̱rastā̎tpaurṇamā̱syai dī̎kṣera̱nteṣā̍mekāṣṭa̱kāyā̎ṃ kra̱yaḥ saṃ pa̍dyate̱
tenai̍kāṣṭa̱kāṃ na cha̱ṃbaṭku̍rvanti̱ teṣā̎ṃ
30 pūrvapa̱kṣe su̱tyā saṃ pa̍dyate pūrvapa̱kṣaṃ māsā̍ a̱bhi saṃ
pa̍dyante̱ te pū̎rvapa̱kṣa utti̍ṣṭhanti̱ tānu̱ttiṣṭha̍ta̱ oṣa̍dhayo̱
vana̱spata̱yo'nūtti̍ṣṭhanti̱ tānka̍lyā̱ṇī kī̱rtiranūtti̍ṣṭha̱tyarā̎thsuri̱me
yaja̍mānā̱ iti̱ tadanu̱ sarve̍ rādhnuvanti
||7.4.8||e̱taccha̱ṃbaṭku̍rvanti̱
teṣā̱ṃ catu̍strigͫśacca
||7.4.8||31 su̱va̱rgaṃ vā e̱te lo̱kaṃ ya̍nti̱ ye sa̱ttramu̍pa̱yantya̱bhīndha̍ta
e̱va dī̱kṣābhi̍rā̱tmānagg̍ śrapayanta upa̱sadbhi̱rdvābhyā̱ṃ lomāva̍ dyanti̱
dvābhyā̱ṃ tvaca̱ṃ dvābhyā̱masṛ̱ddvābhyā̎ṃ mā̱g̱ͫsaṃ dvābhyā̱masthi̱ dvābhyā̎ṃ
ma̱jjāna̍mā̱tmada̍kṣiṇa̱ṃ vai sa̱ttramā̱tmāna̍me̱va dakṣi̍ṇāṃ nī̱tvā su̍va̱rgaṃ
lo̱kaṃ ya̍nti̱ śikhā̱manu̱ pra va̍panta̱ ṛddhyā̱ atho̱ raghī̍yāgͫsaḥ suva̱rgaṃ
lo̱kama̍yā̱meti̍
||7.4.9||su̱va̱rgaṃ pa̍ṃcā̱śat
||7.4.9||32 bra̱hma̱vā̱dino̍ vadantyatirā̱traḥ pa̍ra̱mo ya̍jñakratū̱nāṃ
kasmā̱ttaṃ pra̍tha̱mamupa̍ ya̱ntītye̱tadvā a̍gniṣṭo̱maṃ pra̍tha̱mamupa̍
ya̱ntyatho̱kthya̍matha̍ ṣoḍa̱śina̱mathā̍tirā̱trama̍nupū̱rvame̱vaitadya̍jña
kra̱tūnu̱petya̱ tānā̱labhya̍ pari̱gṛhya̱ soma̍me̱vaitatpiba̍nta āsate̱ jyoti̍ṣṭomaṃ
pratha̱mamupa̍ yanti̱ jyoti̍ṣṭomo̱ vai stomā̍nā̱ṃ mukha̍ṃ mukha̱ta e̱va stomā̱n
pra yu̍ñjate̱ te
33 sa2gͫstu̍tā vi̱rāja̍ma̱bhi saṃ pa̍dyante̱ dve carcā̱vati̍
ricyete̱ eka̍yā̱ gaurati̍rikta̱ eka̱yāyu̍rū̱naḥ su̍va̱rgo vai lo̱ko
jyoti̱rūrgvi̱rāṭthsu̍va̱rgame̱va tena̍ lo̱kaṃ ya̍nti rathaṃta̱raṃ divā̱ bhava̍ti
rathaṃta̱raṃ nakta̱mityā̍hurbrahmavā̱dina̱ḥ kena̱ tadajā̱mīti̍ saubha̱raṃ
tṛ̍tīyasava̱ne bra̍hmasā̱maṃ bṛ̱hattanma̍dhya̱to da̍dhati̱ vidhṛ̍tyai̱
tenājā̍mi
||7.4.10||ta ekā̱nna pa̍ṃcā̱śacca̍
||7.4.10||34 jyoti̍ṣṭomaṃ pratha̱mamupa̍ yantya̱sminne̱va tena̍ lo̱ke prati̍ tiṣṭhanti̱
goṣṭo̍maṃ dvi̱tīya̱mupa̍ yantya̱ntari̍kṣa e̱va tena̱ prati̍ tiṣṭha̱ntyāyu̍ṣṭomaṃ
tṛ̱tīya̱mupa̍ yantya̱muṣmi̍nne̱va tena̍ lo̱ke prati̍ tiṣṭhantī̱yaṃ vāva
jyoti̍ra̱ntari̍kṣa̱ṃ gaura̱sāvāyu̱ryade̱tānthstomā̍nupa̱yantye̱ṣve̍va tallo̱keṣu̍
sa̱ttriṇa̍ḥ prati̱tiṣṭha̍nto yanti̱ te sa2gͫstu̍tā vi̱rāja̍
35 ma̱bhi saṃ pa̍dyante̱ dve carcā̱vati̍ ricyete̱ eka̍yā̱ gaurati̍rikta̱
eka̱yāyu̍rū̱naḥ su̍va̱rgo vai lo̱ko jyoti̱rūrgvi̱rāḍūrja̍me̱vāva̍ ruṃdhate̱
te na kṣu̱dhārti̱mārccha̱ntyakṣo̍dhukā bhavanti̱ kṣuthsa̍ṃbādhā iva̱
hi sa̱ttriṇo̎'gniṣṭo̱māva̱bhita̍ḥ pra̱dhītāvu̱kthyā̍ madhye̱ nabhya̱ṃ
tattade̱tatpa̍ri̱yadde̍vaca̱kraṃ yade̱tena̍
36 ṣaḍa̱hena̱ yanti̍ devaca̱krame̱va sa̱māro̍ha̱ntyari̍ṣṭyai̱ te
sva̱sti sama̍śnuvate ṣaḍa̱hena̍ yanti̱ ṣaḍvā ṛ̱tava̍ ṛ̱tuṣve̱va prati̍
tiṣṭhantyubha̱yato̎ jyotiṣā yantyubha̱yata̍ e̱va su̍va̱rge lo̱ke pra̍ti̱tiṣṭha̍nto
yanti̱ dvau ṣa̍ḍa̱hau bha̍vata̱stāni̱ dvāda̱śāhā̍ni̱ saṃ pa̍dyante dvāda̱śo
vai puru̍ṣo̱ dve sa̱kthyau̎ dvau bā̱hū ā̱tmā ca̱ śira̍śca ca̱tvāryaṅgā̍ni̱
stanau̎ dvāda̱śau
37 tatpuru̍ṣa̱manu̍ pa̱ryāva̍rtante̱ traya̍ḥ ṣaḍa̱hā bha̍vanti̱
tānya̱ṣṭāda̱śāhā̍ni̱ saṃ pa̍dyante̱ navā̱nyāni̱ navā̱nyāni̱ nava̱ vai
puru̍ṣe prā̱ṇāstatprā̱ṇānanu̍ pa̱ryāva̍rtante ca̱tvāra̍ḥ ṣaḍa̱hā bha̍vanti̱
tāni̱ catu̍rvigͫśati̱rahā̍ni̱ saṃ pa̍dyante̱ catu̍rvigͫśatirardhamā̱sāḥ
sa̍ṃvathsa̱rastathsa̍ṃvathsa̱ramanu̍ pa̱ryāva̍rta̱nte'pra̍tiṣṭhitaḥ saṃvathsa̱ra
iti̱ khalu̱ vā ā̍hu̱rvarṣī̍yānprati̱ṣṭhāyā̱ itye̱tāva̱dvai sa̍ṃvathsa̱rasya̱
brāhma̍ṇa̱ṃ yāva̍nmā̱so mā̱simā̎sye̱va pra̍ti̱tiṣṭha̍nto yanti
||7.4.11||vi̱rāja̍me̱tena̍ dvāda̱śāve̱tāva̱dvā a̱ṣṭau ca̍
||7.4.11||38 me̱ṣastvā̍ paca̱taira̍vatu̱ lohi̍tagrīva̱śchāgai̎ḥ śalma̱lirvṛddhyā̍ pa̱rṇo
brahma̍ṇā pla̱kṣo medhe̍na nya̱grodha̍ścama̱sairu̍du̱ṃbara̍ ū̱rjā gā̍ya̱trī
chando̍bhistri̱vṛthstomai̱rava̍ntī̱ḥ sthāva̍ntīstvāvantu pri̱yaṃ tvā̎ pri̱yāṇā̱ṃ
varṣi̍ṣṭha̱māpyā̍nāṃ nidhī̱nāṃ tvā̍ nidhi̱patigͫ̍ havāmahe vaso mama
||7.4.12||me̱ṣaḥ ṣaṭ trigͫ̍śat
||7.4.12||39 kūpyā̎bhya̱ḥ svāhā̱ kūlyā̎bhya̱ḥ svāhā̍ vika̱ryā̎bhya̱ḥ svāhā̍'va̱ṭyā̎bhya̱ḥ
svāhā̱ khanyā̎bhya̱ḥ svāhā̱ hradyā̎bhya̱ḥ svāhā̱ sūdyā̎bhya̱ḥ svāhā̍ sara̱syā̎bhya̱ḥ
svāhā̍ vaiśa̱ntībhya̱ḥ svāhā̍ palva̱lyā̎bhya̱ḥ svāhā̱ varṣyā̎bhya̱ḥ
svāhā̍'va̱ṟṣyābhya̱ḥ svāhā̎ hrā̱dunī̎bhya̱ḥ svāhā̱ pṛṣvā̎bhya̱ḥ
svāhā̱ syanda̍mānābhya̱ḥ svāhā̎ sthāva̱rābhya̱ḥ svāhā̍ nāde̱yībhya̱ḥ svāhā̍
saindha̱vībhya̱ḥ svāhā̍ samu̱driyā̎bhya̱ḥ svāhā̱ sarvā̎bhya̱ḥ svāhā̎
||7.4.13||kūpyā̎bhyaścatvāri̱g̱ͫśat
||7.4.13||40 a̱dbhyaḥ svāhā̱ vaha̍ntībhya̱ḥ svāhā̍ pari̱vaha̍ntībhya̱ḥ svāhā̍ sama̱ntaṃ
vaha̍ntībhya̱ḥ svāhā̱ śīghra̱ṃ vaha̍ntībhya̱ḥ svāhā̱ śībha̱ṃ vaha̍ntībhya̱ḥ
svāho̱graṃ vaha̍ntībhya̱ḥ svāhā̍ bhī̱maṃ vaha̍ntībhya̱ḥ svāhā'ṃbho̎bhya̱ḥ svāhā̱
nabho̎bhya̱ḥ svāhā̱ maho̎bhya̱ḥ svāhā̱ sarva̍smai̱ svāhā̎
||7.4.14||a̱dbhya
ekā̱nna tri̱g̱ͫśat
||7.4.14||41 yo arva̍nta̱ṃ jighāgͫ̍sati̱ tama̱bhya̍mīti̱ varu̍ṇaḥ | pa̱ro marta̍ḥ pa̱raḥ
śvā || a̱haṃ ca̱ tvaṃ ca̍ vṛtraha̱nthsaṃ ba̍bhūva sa̱nibhya̱ ā | a̱rā̱tī̱vā
ci̍dadri̱vo'nu̍ nau śūra magͫsatai bha̱drā indra̍sya rā̱taya̍ḥ || a̱bhi kratve̎ndra
bhū̱radha̱ jmanna te̍ vivyaṅmahi̱māna̱g̱ͫ rajāgͫ̍si | svenā̱ hi vṛ̱tragͫ
śava̍sā ja̱ghantha̱ na śatru̱ranta̍ṃ vividadyu̱dhā te̎
||7.4.15||vi̱vi̱da̱
dve ca̍
||7.4.15||42 namo̱ rājñe̱ namo̱ varu̍ṇāya̱ namo'śvā̍ya̱ nama̍ḥ pra̱jāpa̍taye̱
namo'dhi̍pata̱ye'dhi̍patira̱syadhi̍patiṃ mā ku̱rvadhi̍patira̱haṃ pra̱jānā̎ṃ
bhūyāsa̱ṃ māṃ dhe̍hi̱ mayi̍ dhehyu̱pākṛ̍tāya̱ svāhāla̍bdhāya̱ svāhā̍ hu̱tāya̱
svāhā̎
||7.4.16||nama̱ ekā̱nna tri̱g̱ͫśat
||7.4.16||43 ma̱yo̱bhūrvāto̍ a̱bhi vā̍tū̱srā ūrja̍svatī̱roṣa̍dhī̱rā ri̍śantām |
pīva̍svatīrjī̱vadha̍nyāḥ pibantvava̱sāya̍ pa̱dvate̍ rudra mṛḍa || yāḥ sarū̍pā̱
virū̍pā̱ eka̍rūpā̱ yāsā̍ma̱gniriṣṭyā̱ nāmā̍ni̱ veda̍ | yā aṃgi̍rasa̱stapa̍se̱ha
ca̱krustābhya̍ḥ parjanya̱ mahi̱ śarma̍ yaccha || yā de̱veṣu̍ ta̱nuva̱maira̍yanta̱
yāsā̱g̱ͫ somo̱ viśvā̍ rū̱pāṇi̱ veda̍ | tā a̱smabhya̱ṃ paya̍sā̱ pinva̍mānāḥ
pra̱jāva̍tīrindra
44 go̱ṣṭhe ri̍rīhi || pra̱jāpa̍ti̱rmahya̍me̱tā rarā̍ṇo̱ viśvai̎rde̱vaiḥ
pi̱tṛbhi̍ḥ saṃvidā̱naḥ | śi̱vāḥ sa̱tīrupa̍ no go̱ṣṭhamāka̱stāsā̎ṃ va̱yaṃ
pra̱jayā̱ sagͫ sa̍dema || i̱ha dhṛti̱ḥ svāhe̱ha vidhṛ̍ti̱ḥ svāhe̱ha ranti̱ḥ
svāhe̱ha rama̍ti̱ḥ svāhā̍ ma̱hī mū̱ṣu su̱trāmā̍ṇam
||7.4.17||i̱ndrā̱ṣṭā
trigͫ̍śacca
||7.4.17||45 ki2gͫ svi̍dāsītpū̱rvaci̍tti̱ḥ ki2gͫ svi̍dāsīdbṛ̱hadvaya̍ḥ | ki2gͫ
svi̍dāsītpiśaṃgi̱lā ki2gͫ svi̍dāsītpilippi̱lā || dyaurā̍sītpū̱rvaci̍tti̱raśva̍
āsīdbṛ̱hadvaya̍ḥ | rātri̍rāsītpiśaṃgi̱lāvi̍rāsītpilippi̱lā || kaḥ svi̍dekā̱kī
ca̍rati̱ ka u̍ svijjāyate̱ puna̍ḥ | ki2gͫ svi̍ddhi̱masya̍ bheṣa̱jaṃ ki2gͫ
svi̍dā̱vapa̍naṃ ma̱hat || sūrya̍ ekā̱kī ca̍rati
46 ca̱ndramā̍ jāyate̱ puna̍ḥ | a̱gnirhi̱masya̍ bheṣa̱jaṃ bhūmi̍rā̱vapa̍naṃ ma̱hat ||
pṛ̱cchāmi̍ tvā̱ para̱manta̍ṃ pṛthi̱vyāḥ pṛ̱cchāmi̍ tvā̱ bhuva̍nasya̱ nābhi̎m
| pṛ̱cchāmi̍ tvā̱ vṛṣṇo̱ aśva̍sya̱ reta̍ḥ pṛ̱cchāmi̍ vā̱caḥ pa̍ra̱maṃ
vyo̍ma || vedi̍māhu̱ḥ para̱manta̍ṃ pṛthi̱vyā ya̱jñamā̍hu̱rbhuva̍nasya̱ nābhi̎m |
soma̍māhu̱rvṛṣṇo̱ aśva̍sya̱ reto̱ brahmai̱va vā̱caḥ pa̍ra̱maṃ vyo̍ma
||7.4.18||sūrya̍ ekā̱kī ca̍rati̱ ṣaṭ ca̍tvārigͫśacca
||7.4.18||47 ambe̱ aṃbā̱lyaṃbi̍ke̱ na mā̍ nayati̱ kaśca̱na | sa̱ sastya̍śva̱kaḥ ||
subha̍ge̱ kāṃpī̍lavāsini suva̱rge lo̱ke saṃ prorṇvā̍thām | āhama̍jāni garbha̱dhamā
tvama̍jāsi garbha̱dham | tau sa̱ha ca̱tura̍ḥ pa̱daḥ saṃ pra sā̍rayāvahai | vṛṣā̍
vāgͫ reto̱dhā reto̍ dadhā̱tūthsa̱kthyo̎rgṛ̱daṃ dhe̎hya̱ṃjimuda̍ṃji̱manva̍ja |
yaḥ strī̱ṇāṃ jī̍va̱bhoja̍no̱ ya ā̍sāṃ
48 bila̱dhāva̍naḥ | pri̱yaḥ strī̱ṇāma̍pī̱cya̍ḥ | ya ā̍sāṃ kṛ̱ṣṇe lakṣma̍ṇi̱
sardi̍gṛdiṃ pa̱rāva̍dhīt || ambe̱ aṃbā̱lyaṃbi̍ke̱ na mā̍ yabhati̱ kaśca̱na |
sa̱sastya̍śva̱kaḥ || ū̱rdhvāme̍nā̱mucchra̍yatādveṇubhā̱raṃ gi̱rāvi̍va | athā̎syā̱
madhya̍medhatāgͫ śī̱te vāte̍ pu̱nanni̍va || ambe̱ aṃbā̱lyaṃbi̍ke̱ na mā̍ yabhati̱
kaśca̱na | sa̱sastya̍śva̱kaḥ || yaddha̍ri̱ṇī yava̱matti̱ na
49 pu̱ṣṭaṃ pa̱śu ma̍nyate | śū̱drā yadarya̍jārā̱ na poṣā̍ya dhanāyati || ambe̱
aṃbā̱lyaṃbi̍ke̱ na mā̍ yabhati̱ kaśca̱na | sa̱sastya̍śva̱kaḥ || i̱yaṃ ya̱kā
śa̍kunti̱kāhala̱miti̱ sarpa̍ti | āha̍taṃ ga̱bhe paso̱ ni ja̍lgulīti̱ dhāṇi̍kā ||
ambe̱ aṃbā̱lyaṃbi̍ke̱ na mā̍ yabhati̱ kaśca̱na | sa̱sastya̍śva̱kaḥ || mā̱tā ca̍
te pi̱tā ca̱ te'gra̍ṃ vṛ̱kṣasya̍ rohataḥ |
50 pra su̍lā̱mīti̍ te pi̱tā ga̱bhe mu̱ṣṭima̍tagͫsayat || da̱dhi̱krāvṇṇo̍ akāriṣaṃ
ji̱ṣṇoraśva̍sya vā̱jina̍ḥ | su̱ra̱bhi no̱ mukhā̍ kara̱tpraṇa̱ āyūgͫ̍ṣi tāriṣat
|| āpo̱ hiṣṭhā ma̍yo̱bhuva̱stā na̍ ū̱rje da̍dhātana | ma̱he raṇā̍ya̱ cakṣa̍se ||
yo va̍ḥ śi̱vata̍mo̱ rasa̱stasya̍ bhājayate̱ha na̍ḥ | u̱śa̱tīri̍va mā̱tara̍ḥ ||
tasmā̱ ara̍ṃ gamāma vo̱ yasya̱ kṣayā̍ya̱ jinva̍tha | āpo̍ ja̱naya̍thā ca naḥ
||7.4.19||ā̱sā̱matti̱ na ro̍hato̱ jinva̍tha ca̱tvāri̍ ca
||7.4.19||51 bhūrbhuva̱ḥsuva̱rvasa̍vastvā'ñjantu gāya̱treṇa̱ chaṃda̍sā ru̱drāsstvā̎ñjantu̱
traiṣṭu̍bhena̱ chaṃda̍sādi̱tyāstvā̎ñjantu̱ jāga̍tena̱ chaṃda̍sā̱ yadvāto̍
a̱po aga̍ma̱dindra̍sya ta̱nuva̍ṃ pri̱yām | e̱ta2gͫ sto̍tare̱tena̍ pa̱thā
puna̱raśva̱mā va̍rtayāsi naḥ || lājī 3 ñchācī 3 n, yaśo̍ ma̱mā 4 m | ya̱vyāyai̍
ga̱vyāyā̍ e̱tadde̍vā̱ anna̍mattai̱tadanna̍maddhi prajāpate || yu̱ñjanti̍
bra̱dhnama̍ru̱ṣaṃ cara̍nta̱ṃ pari̍ ta̱sthuṣa̍ḥ | roca̍nte roca̱nā di̱vi ||
yu̱ñjantya̍sya̱ kāmyā̱ harī̱ vipa̍kṣasā̱ rathe̎ | śoṇā̍ dhṛ̱ṣṇū nṛ̱vāha̍sā
|| ke̱tuṃ kṛ̱ṇvanna̍ke̱tave̱ peśo̍ maryā ape̱śase̎ | samu̱ṣadbhi̍rajāyathāḥ
||7.4.20||bra̱dhnaṃ paṃca̍ vigͫśatiśca
||7.4.20||52 prā̱ṇāya̱ svāhā̎ vyā̱nāya̱ svāhā̍pā̱nāya̱ svāhā̱ snāva̍bhya̱ḥ svāhā̍
saṃtā̱nebhya̱ḥ svāhā̱ pari̍saṃtānebhya̱ḥ svāhā̱ parva̍bhya̱ḥ svāhā̍ sa̱ṃdhāne̎bhya̱ḥ
svāhā̱ śarī̍rebhya̱ḥ svāhā̍ ya̱jñāya̱ svāhā̱ dakṣi̍ṇābhya̱ḥ svāhā̍ suva̱rgāya̱
svāhā̍ lo̱kāya̱ svāhā̱ sarva̍smai̱ svāhā̎
||7.4.21||prā̱ṇāyā̱ṣṭāvigͫ̍śatiḥ
||7.4.21||53 si̱tāya̱ svāhāsi̍tāya̱ svāhā̱bhihi̍tāya̱ svāhāna̍bhihitāya̱ svāhā̍ yu̱ktāya̱
svāhāyu̍ktāya̱ svāhā̱ suyu̍ktāya̱ svāhodyu̍ktāya̱ svāhā̱ vimu̍ktāya̱ svāhā̱
pramu̍ktāya̱ svāhā̱ vañca̍te̱ svāhā̍ pari̱vañca̍te̱ svāhā̍ sa̱ṃvañca̍te̱
svāhā̍nu̱vañca̍te̱ svāho̱dvañca̍te̱ svāhā̍ ya̱te svāhā̱ dhāva̍te̱ svāhā̱
tiṣṭha̍te̱ svāhā̱ sarva̍smai̱ svāhā̎
||7.4.22||si̱tāyā̱ṣṭā trigͫ̍śat
||7.4.22||