अनुवाक 1
अ॒ग्नेः कृत्ति॑काः।
शु॒क्रं प॒रस्ता॒ज्ज्योति॑र॒वस्ता᳚त्।
प्र॒जाप॑ते रोहि॒णी।
आपः॑ प॒रस्ता॒दोष॑धयो॒ऽवस्ता᳚त्।
सोम॑स्येन्व॒का वित॑तानि।
प॒रस्ता॒द्वय॑न्तो॒ऽवस्ता᳚त्।
रु॒द्रस्य॑ बा॒हू।
मृ॒ग॒यवः॑ प॒रस्ता᳚द्विक्षा॒रो॑ऽवस्ता᳚त्।
अदि॑त्यै॒ पुन॑र्वसू।
वातः॑ प॒रस्ता॑दा॒र्द्रम॒वस्ता᳚त्॥१॥
बृह॒स्पते᳚स्ति॒ष्यः॑।
जुह्व॑तः प॒रस्ता॒द्यज॑माना अ॒वस्ता᳚त्।
स॒र्पाणा॑माश्रे॒षाः।
अ॒भ्या॒गच्छ॑न्तः प॒रस्ता॑दभ्या॒नृत्य॑न्तो॒ऽवस्ता᳚त्।
पि॒तृ॒णां म॒घाः।
रु॒दन्तः॑ प॒रस्ता॑दपभ्र॒ꣳ॒शो॑ऽवस्ता᳚त्।
अ॒र्य॒म्णः पूर्वे॒ फल्गु॑नी।
जा॒या प॒रस्ता॑दृष॒भो॑ऽवस्ता᳚त्।
भग॒स्योत्त॑रे।
व॒ह॒तवः॑ प॒रस्ता॒द्वह॑माना अ॒वस्ता᳚त्॥२॥
दे॒वस्य॑ सवि॒तुर्हस्तः॑।
प्र॒स॒वः प॒रस्ता᳚थ्स॒निर॒वस्ता᳚त्।
इन्द्र॑स्य चि॒त्रा।
ऋ॒तं प॒रस्ता᳚थ्स॒त्यम॒वस्ता᳚त्।
वा॒योर्निष्ट्या᳚ व्र॒ततिः॑।
प॒रस्ता॒दसि॑द्धिर॒वस्ता᳚त्।
इ॒न्द्रा॒ग्नि॒योर्विशा॑खे।
यु॒गानि॑ प॒रस्ता᳚त्कृ॒षमा॑णा अ॒वस्ता᳚त्।
मि॒त्रस्या॑नूरा॒धाः।
अ॒भ्या॒रोह॑त्प॒रस्ता॑द॒भ्यारू॑ढम॒वस्ता᳚त्॥३॥
इन्द्र॑स्य रोहि॒णी।
शृ॒णत्प॒रस्ता᳚त्प्रतिशृ॒णद॒वस्ता᳚त्।
निर्ऋ॑त्यै मूल॒वर्ह॑णी।
प्र॒ति॒भ॒ञ्जन्तः॑ प॒रस्ता᳚त्प्रतिशृ॒णन्तो॒ऽवस्ता᳚त्।
अ॒पां पूर्वा॑ अषा॒ढाः।
वर्चः॑ प॒रस्ता॒थ्समि॑तिर॒वस्ता᳚त्।
विश्वे॑षां दे॒वाना॒मुत्त॑राः।
अ॒भि॒जय॑त्प॒रस्ता॑द॒भिजि॑तम॒वस्ता᳚त्।
विष्णोः᳚ श्रो॒णा पृ॒च्छमा॑नाः।
प॒रस्ता॒त्पन्था॑ अ॒वस्ता᳚त्॥४॥
वसू॑ना॒ꣴ॒ श्रवि॑ष्ठाः।
भू॒तं प॒रस्ता॒द्भूति॑र॒वस्ता᳚त्।
इन्द्र॑स्य श॒तभि॑षक्।
वि॒श्वव्य॑चाः प॒रस्ता᳚द्वि॒श्वक्षि॑तिर॒वस्ता᳚त्।
अ॒जस्यैक॑पदः॒ पूर्वे᳚ प्रोष्ठप॒दाः।
वै॒श्वा॒न॒रं प॒रस्ता᳚द्वैश्वावस॒वम॒वस्ता᳚त्।
अहे᳚र्बु॒ध्निय॒स्योत्त॑रे।
अ॒भि॒षि॒ञ्चन्तः॑ प॒रस्ता॑दभिषु॒ण्वन्तो॒ऽवस्ता᳚त्।
पू॒ष्णो रे॒वती᳚।
गावः॑ प॒रस्ता᳚द्व॒थ्सा अ॒वस्ता᳚त्।
अ॒श्विनो॑रश्व॒युजौ᳚।
ग्रामः॑ प॒रस्ता॒थ्सेना॒ऽवस्ता᳚त्।
य॒मस्या॑प॒भर॑णीः।
अ॒प॒कर्ष॑न्तः प॒रस्ता॑दप॒वह॑न्तो॒ऽवस्ता᳚त्।
पू॒र्णा प॒श्चाद्यत्ते॑ दे॒वा अद॑धुः॥५॥
अनुवाक 2
यत्पुण्यं॒ नक्ष॑त्रम्।
तद्बट्कु॑र्वीतोपव्यु॒षम्।
य॒दा वै सूर्य॑ उ॒देति॑।
अथ॒ नक्ष॑त्रं॒ नैति॑।
याव॑ति॒ तत्र॒ सूर्यो॒ गच्छे᳚त्।
यत्र॑ जघ॒न्यं॑ पश्ये᳚त्।
ताव॑ति कुर्वीत यत्का॒री स्यात्।
पु॒ण्या॒ह ए॒व कु॑रुते।
ए॒वꣳ ह॒ वै य॒ज्ञेषुं॑ च श॒तद्यु॑म्नं च मा॒थ्स्यो नि॑रवसाय॒यां च॑कार॥६॥
यो वै न॑क्ष॒त्रियं॑ प्र॒जाप॑तिं॒ वेद॑।
उ॒भयो॑रेनं लो॒कयो᳚र्विदुः।
हस्त॑ ए॒वास्य॒ हस्तः॑।
चि॒त्रा शिरः॑।
निष्ट्या॒ हृद॑यम्।
ऊ॒रू विशा॑खे।
प्र॒ति॒ष्ठाऽनू॑रा॒धाः।
ए॒ष वै न॑क्ष॒त्रियः॑ प्र॒जाप॑तिः।
य ए॒वं वेद॑।
उ॒भयो॑रेनं लो॒कयो᳚र्विदुः॥७॥
अ॒स्मिꣴश्चा॒मुष्मिꣴ॑श्च।
यां का॒मये॑त दुहि॒तरं॑ प्रि॒या स्या॒दिति॑।
तां निष्ट्या॑यां दद्यात्।
प्रि॒यैव भ॑वति।
नेव॒ तु पुन॒राग॑च्छति।
अ॒भि॒जिन्नाम॒ नक्ष॑त्रम्।
उ॒परि॑ष्टादषा॒ढाना᳚म्।
अ॒वस्ता᳚च्छ्रो॒णायै᳚।
दे॒वा॒सु॒राः संय॑त्ता आसन्।
ते दे॒वास्तस्मि॒न्नक्ष॑त्रे॒ऽभ्य॑जयन्॥८॥
यद॒भ्यज॑यन्।
तद॑भि॒जितो॑ऽभिजि॒त्त्वम्।
यं का॒मये॑तानपज॒य्यं ज॑ये॒दिति॑।
तमे॒तस्मि॒न्नक्ष॑त्रे यातयेत्।
अ॒न॒प॒ज॒य्यमे॒व ज॑यति।
पा॒पप॑राजितमिव॒ तु।
प्र॒जाप॑तिः प॒शून॑सृजत।
ते नक्ष॑त्रं नक्षत्र॒मुपा॑तिष्ठन्त।
ते स॒माव॑न्त ए॒वाभ॑वन्।
ते रे॒वती॒मुपा॑तिष्ठन्त॥९॥
ते रे॒वत्यां॒ प्राभ॑वन्।
तस्मा᳚द्रे॒वत्यां᳚ पशू॒नां कु॑र्वीत।
यत्किं चा᳚र्वा॒चीन॒ꣳ॒ सोमा᳚त्।
प्रैव भ॑वन्ति।
स॒लि॒लं वा इ॒दम॑न्त॒रासी᳚त्।
यदत॑रन्।
तत्तार॑काणां तारक॒त्वम्।
यो वा इ॒ह यज॑ते।
अ॒मुꣳ स लो॒कं न॑क्षते।
तन्नक्ष॑त्राणां नक्षत्र॒त्वम्॥१०॥
दे॒व॒गृ॒हा वै नक्ष॑त्राणि।
य ए॒वं वेद॑।
गृ॒ह्ये॑व भ॑वति।
यानि॒ वा इ॒मानि॑ पृथि॒व्याश्चि॒त्राणि॑।
तानि॒ नक्ष॑त्राणि।
तस्मा॑दश्ली॒लना॑मꣴश्चि॒त्रे।
नाव॑स्ये॒न्न य॑जेत।
यथा॑ पापा॒हे कु॑रु॒ते।
ता॒दृगे॒व तत्।
दे॒व॒न॒क्ष॒त्राणि॒ वा अ॒न्यानि॑॥११॥
य॒म॒न॒क्ष॒त्राण्य॒न्यानि॑।
कृत्ति॑काः प्रथ॒मम्।
विशा॑खे उत्त॒मम्।
तानि॑ देवनक्ष॒त्राणि॑।
अ॒नू॒रा॒धाः प्र॑थ॒मम्।
अ॒प॒भर॑णीरुत्त॒मम्।
तानि॑ यमनक्ष॒त्राणि॑।
यानि॑ देवनक्ष॒त्राणि॑।
तानि॒ दक्षि॑णेन॒ परि॑यन्ति।
यानि॑ यमनक्ष॒त्राणि॑॥१२॥
तान्युत्त॑रेण।
अन्वे॑षामरा॒थ्स्मेति॑।
तद॑नूरा॒धाः।
ज्ये॒ष्ठमे॑षामवधि॒ष्मेति॑।
तज्ज्ये᳚ष्ठ॒घ्नी।
मूल॑मेषामवृक्षा॒मेति॑।
तन्मू॑ल॒वर्ह॑णी।
यन्नास॑हन्त।
तद॑षा॒ढाः।
यदश्लो॑णत्॥१३॥
तच्छ्रो॒णा।
यदशृ॑णोत्।
तच्छ्रवि॑ष्ठाः।
यच्छ॒तमभि॑षज्यन्।
तच्छ॒तभि॑षक्।
प्रो॒ष्ठ॒प॒देषूद॑यच्छन्त।
रे॒वत्या॑मरवन्त।
अ॒श्व॒युजो॑रयुञ्जत।
अ॒प॒भर॑णी॒ष्वपा॑वहन्।
तानि॒ वा ए॒तानि॑ यमनक्ष॒त्राणि॑।
यान्ये॒व दे॑वनक्ष॒त्राणि॑।
तेषु॑ कुर्वीत यत्का॒री स्यात्।
पु॒ण्या॒ह ए॒व कु॑रुते॥१४॥
अनुवाक 3
दे॒वस्य॑ सवि॒तुः प्रा॒तः प्र॑स॒वः प्रा॒णः।
वरु॑णस्य सा॒यमा॑स॒वो॑ऽपा॒नः।
यत्प्र॑ती॒चीनं॑ प्रात॒स्तना᳚त्।
प्रा॒चीनꣳ॑ सङ्ग॒वात्।
ततो॑ दे॒वा अ॑ग्निष्टो॒मं निर॑मिमत।
तत्तदात्त॑वीर्यं निर्मा॒र्गः।
मि॒त्रस्य॑ सङ्ग॒वः।
तत्पुण्यं॑ तेज॒स्व्यहः॑।
तस्मा॒त्तर्हि॑ प॒शवः॑ स॒माय॑न्ति।
यत्प्र॑ती॒चीनꣳ॑ सङ्ग॒वात्॥१५॥
प्रा॒चीनं॑ म॒ध्यं दि॑नात्।
ततो॑ दे॒वा उ॒क्थ्यं॑ निर॑मिमत।
तत्तदात्त॑वीर्यं निर्मा॒र्गः।
बृह॒स्पते᳚र्म॒ध्यं दि॑नः।
तत्पुण्यं॑ तेज॒स्व्यहः॑।
तस्मा॒त्तर्हि॒ तेक्ष्णि॑ष्ठं तपति।
यत्प्र॑ती॒चीनं॑ म॒ध्यं दि॑नात्।
प्रा॒चीन॑मपरा॒ह्णात्।
ततो॑ दे॒वाः षो॑ड॒शिनं॒ निर॑मिमत।
तत्तदात्त॑वीर्यं निर्मा॒र्गः॥१६॥
भग॑स्यापरा॒ह्णः।
तत्पुण्यं॑ तेज॒स्व्यहः॑।
तस्मा॑दपरा॒ह्णे कु॑मा॒र्यो॑ भग॑मि॒च्छमा॑नाश्चरन्ति।
यत्प्र॑ती॒चीन॑मपरा॒ह्णात्।
प्रा॒चीनꣳ॑ सा॒यात्।
ततो॑ दे॒वा अ॑तिरा॒त्रं निर॑मिमत।
तत्तदात्त॑वीर्यं निर्मा॒र्गः।
वरु॑णस्य सा॒यम्।
तत्पुण्यं॑ तेज॒स्व्यहः॑।
तस्मा॒त्तर्हि॒ नानृ॑तं वदेत्॥१७॥
ब्रा॒ह्म॒णो वा अ॑ष्टावि॒ꣳ॒शो नक्ष॑त्राणाम्।
स॒मा॒नस्याह्नः॒ पञ्च॒ पुण्या॑नि॒ नक्ष॑त्राणि।
च॒त्वार्य॑श्ली॒लानि॑।
तानि॒ नव॑।
यच्च॑ प॒रस्ता॒न्नक्ष॑त्राणां॒ यच्चा॒वस्ता᳚त्।
तान्येका॑दश।
ब्रा॒ह्म॒णो द्वा॑द॒शः।
य ए॒वं वि॒द्वान्थ्सं॑वथ्स॒रं व्र॒तं चर॑ति।
सं॒व॒थ्स॒रेणै॒वास्य॑ व्र॒तं गु॒प्तं भ॑वति।
स॒मा॒नस्याह्नः॒ पञ्च॒ पुण्या॑नि॒ नक्ष॑त्राणि।
च॒त्वार्य॑श्ली॒लानि॑।
तानि॒ नव॑।
आ॒ग्ने॒यी रात्रिः॑।
ऐ॒न्द्रमहः॑।
तान्येका॑दश।
आ॒दि॒त्यो द्वा॑द॒शः।
य ए॒वं वि॒द्वान्थ्सं॑वथ्स॒रं व्र॒तं चर॑ति।
सं॒व॒थ्स॒रेणै॒वास्य॑ व्र॒तं गु॒प्तं भ॑वति॥१८॥
अनुवाक 4
ब्र॒ह्म॒वा॒दिनो॑ वदन्ति।
कति॒ पात्रा॑णि य॒ज्ञं व॑ह॒न्तीति॑।
त्रयो॑द॒शेति॑ ब्रूयात्।
स यद्ब्रू॒यात्।
कस्तानि॒ निर॑मिमी॒तेति॑।
प्र॒जाप॑ति॒रिति॑ ब्रूयात्।
स यद्ब्रू॒यात्।
कुत॒स्तानि॒ निर॑मिमी॒तेति॑।
आ॒त्मन॒ इति॑।
प्रा॒णा॒पा॒नाभ्या॑मे॒वोपाꣴ॑श्वन्तर्या॒मौ निर॑मिमीत॥१९॥
व्या॒नादु॑पाꣳशु॒सव॑नम्।
वा॒च ऐ᳚न्द्रवाय॒वम्।
द॒क्ष॒क्र॒तुभ्यां᳚ मैत्रावरु॒णम्।
श्रोत्रा॑दाश्वि॒नम्।
चक्षु॑षः शु॒क्राम॒न्थिनौ᳚।
आ॒त्मन॑ आग्रय॒णम्।
अङ्गे᳚भ्य उ॒क्थ्यम्᳚।
आयु॑षो ध्रु॒वम्।
प्र॒ति॒ष्ठाया॑ ऋतुपा॒त्रे।
य॒ज्ञं वाव तं प्र॒जाप॑ति॒र्निर॑मिमीत।
स निर्मि॑तो॒ नाद्ध्रि॑यत॒ सम॑व्लीयत।
स ए॒तान्प्र॒जाप॑तिरपिवा॒पान॑पश्यत्।
तां निर॑वपत्।
तैर्वै स य॒ज्ञमप्य॑वपत्।
यद॑पिवा॒पा भव॑न्ति।
य॒ज्ञस्य॒ धृत्या॒ असं॑व्लयाय॥२०॥
अनुवाक 5
ऋ॒तमे॒व प॑रमे॒ष्ठि।
ऋ॒तं नात्ये॑ति॒ किञ्च॒न।
ऋ॒ते स॑मु॒द्र आहि॑तः।
ऋ॒ते भूमि॑रि॒यꣴश्रि॒ता।
अ॒ग्निस्ति॒ग्मेन॑ शो॒चिषा᳚।
तप॒ आक्रा᳚न्तमु॒ष्णिहा᳚।
शिर॒स्तप॒स्याहि॑तम्।
वै॒श्वा॒न॒रस्य॒ तेज॑सा।
ऋ॒तेना᳚स्य॒ नि व॑र्तये।
स॒त्येन॒ परि॑ वर्तये।
तप॑सा॒ऽस्यानु॑ वर्तये।
शि॒वेना॒स्योप॑ वर्तये।
श॒ग्मेना᳚स्या॒भि व॑र्तये।
तदृ॒तं तथ्स॒त्यम्।
तद्व्र॒तं तच्छ॑केयम्।
तेन॑ शकेयं॒ तेन॑ राध्यासम्॥२१॥
यद्घ॒र्मः प॒र्यव॑र्तयत्।
अन्ता᳚न्पृथि॒व्या दि॒वः।
अ॒ग्निरीशा॑न॒ ओज॑सा।
वरु॑णो धी॒तिभिः॑ स॒ह।
इन्द्रो॑ म॒रुद्भिः॒ सखि॑भिः स॒ह।
अ॒ग्निस्ति॒ग्मेन॑ शो॒चिषा᳚।
तप॒ आक्रा᳚न्तमु॒ष्णिहा᳚।
शिर॒स्तप॒स्याहि॑तम्।
वै॒श्वा॒न॒रस्य॒ तेज॑सा।
ऋ॒तेना᳚स्य॒ नि व॑र्तये।
स॒त्येन॒ परि॑ वर्तये।
तप॑सा॒ऽस्यानु॑ वर्तये।
शि॒वेना॒स्योप॑ वर्तये।
श॒ग्मेना᳚स्या॒भि व॑र्तये।
तदृ॒तं तथ्स॒त्यम्।
तद्व्र॒तं तच्छ॑केयम्।
तेन॑ शकेयं॒ तेन॑ राध्यासम्॥२२॥
यो अ॒स्याः पृ॑थि॒व्यास्त्व॒चि।
नि॒व॒र्तय॒त्योष॑धीः।
अ॒ग्निरीशा॑न॒ ओज॑सा।
वरु॑णो धी॒तिभिः॑ स॒ह।
इन्द्रो॑ म॒रुद्भिः॒ सखि॑भिः स॒ह।
अ॒ग्निस्ति॒ग्मेन॑ शो॒चिषा᳚।
तप॒ आक्रा᳚न्तमु॒ष्णिहा᳚।
शिर॒स्तप॒स्याहि॑तम्।
वै॒श्वा॒न॒रस्य॒ तेज॑सा।
ऋ॒तेना᳚स्य॒ नि व॑र्तये।
स॒त्येन॒ परि॑ वर्तये।
तप॑सा॒ऽस्यानु॑ वर्तये।
शि॒वेना॒स्योप॑ वर्तये।
श॒ग्मेना᳚स्या॒भि व॑र्तये।
तदृ॒तं तथ्स॒त्यम्।
तद्व्र॒तं तच्छ॑केयम्।
तेन॑ शकेयं॒ तेन॑ राध्यासम्॥२३॥
एकं॒ मास॒मुद॑सृजत्।
प॒र॒मे॒ष्ठी प्र॒जाभ्यः॑।
तेना᳚भ्यो॒ मह॒ आव॑हत्।
अ॒मृतं॒ मर्त्या᳚भ्यः।
प्र॒जामनु॒ प्र जा॑यसे।
तदु॑ ते मर्त्या॒मृतम्᳚।
येन॒ मासा॑ अर्धमा॒साः।
ऋ॒तवः॑ परिवथ्स॒राः।
येन॒ ते ते᳚ प्रजापते।
ई॒जा॒नस्य॒ न्यव॑र्तयन्।
तेना॒हम॒स्य ब्रह्म॑णा।
निव॑र्तयामि जी॒वसे᳚।
अ॒ग्निस्ति॒ग्मेन॑ शो॒चिषा᳚।
तप॒ आक्रा᳚न्तमु॒ष्णिहा᳚।
शिर॒स्तप॒स्याहि॑तम्।
वै॒श्वा॒न॒रस्य॒ तेज॑सा।
ऋ॒तेना᳚स्य॒ नि व॑र्तये।
स॒त्येन॒ परि॑ वर्तये।
तप॑सा॒ऽस्यानु॑ वर्तये।
शि॒वेना॒स्योप॑ वर्तये।
श॒ग्मेना᳚स्या॒भि व॑र्तये।
तदृ॒तं तथ्स॒त्यम्।
तद्व्र॒तं तच्छ॑केयम्।
तेन॑ शकेयं॒ तेन॑ राध्यासम्॥२४॥
अनुवाक 6
दे॒वा वै यद्य॒ज्ञेऽकु॑र्वत।
तदसु॑रा अकुर्वत।
तेऽसु॑रा ऊ॒र्ध्वं पृ॒ष्ठेभ्यो॒ नाप॑श्यन्।
ते केशा॒नग्रे॑ऽवपन्त।
अथ॒ श्मश्रू॑णि।
अथो॑पप॒क्षौ।
तत॒स्तेऽवा᳚ञ्च आयन्।
परा॑ऽभवन्।
यस्यै॒वं वप॑न्ति।
अवा॑ङेति॥२५॥
अथो॒ परै॒व भ॑वति।
अथ॑ दे॒वा ऊ॒र्ध्वं पृ॒ष्ठेभ्यो॑ऽपश्यन्।
त उ॑पप॒क्षावग्रे॑ऽवपन्त।
अथ॒ श्मश्रू॑णि।
अथ॒ केशान्॑।
तत॒स्ते॑ऽभवन्।
सु॒व॒र्गं लो॒कमा॑यन्।
यस्यै॒वं वप॑न्ति।
भव॑त्या॒त्मना᳚।
अथो॑ सुव॒र्गं लो॒कमे॑ति॥२६॥
अथै॒तन्मनु॑र्व॒प्त्रे मि॑थु॒नम॑पश्यत्।
स श्मश्रू॒ण्यग्रे॑ऽवपत।
अथो॑पप॒क्षौ।
अथ॒ केशान्॑।
ततो॒ वै स प्राजा॑यत प्र॒जया॑ प॒शुभिः॑।
यस्यै॒वं वप॑न्ति।
प्र प्र॒जया॑ प॒शुभि॑र्मिथु॒नैर्जा॑यते।
दे॒वा॒सु॒राः संय॑त्ता आसन्।
ते सं॑वथ्स॒रे व्याय॑च्छन्त।
तान्दे॒वाश्चा॑तुर्मा॒स्यैरे॒वाभि प्रायु॑ञ्जत॥२७॥
वै॒श्व॒दे॒वेन॑ च॒तुरो॑ मा॒सो॑ऽवृञ्ज॒तेन्द्र॑राजानः।
ताञ्छी॒र्॒षं नि चाव॑र्तयन्त॒ परि॑ च।
व॒रु॒ण॒प्र॒घा॒सैश्च॒तुरो॑ मा॒सो॑ऽवृञ्जत॒ वरु॑णराजानः।
ताञ्छी॒र्॒षं नि चाव॑र्तयन्त॒ परि॑ च।
सा॒क॒मे॒धैश्च॒तुरो॑ मा॒सो॑ऽवृञ्जत॒ सोम॑राजानः।
ताञ्छी॒र्॒षं नि चाव॑र्तयन्त॒ परि॑ च।
या सं॑वथ्स॒र उ॑पजी॒वाऽऽसी᳚त्।
तामे॑षामवृञ्जत।
ततो॑ दे॒वा अभ॑वन्।
पराऽसु॑राः॥२८॥
य ए॒वं वि॒द्वाꣴश्चा॑तुर्मा॒स्यैर्यज॑ते।
भ्रातृ॑व्यस्यै॒व मा॒सो वृ॒क्त्वा।
शी॒र्॒षं नि च॑ व॒र्तय॑ते॒ परि॑ च।
यैषा सं॑वथ्स॒र उ॑पजी॒वा।
वृ॒ङ्क्ते तां भ्रातृ॑व्यस्य।
क्षु॒धाऽस्य॒ भ्रातृ॑व्यः॒ परा॑ भवति।
लो॒हि॒ता॒य॒सेन॒ नि व॑र्तयते।
यद्वा इ॒माम॒ग्निर्ऋ॒तावाग॑ते निव॒र्तय॑ति।
ए॒तदे॒वैनाꣳ॑ रू॒पं कृ॒त्वा निव॑र्तयति।
सा ततः॒ श्वश्वो॒ भूय॑सी॒ भव॑न्त्येति॥२९॥
प्र जा॑यते।
य ए॒वं वि॒द्वाँल्लो॑हिताय॒सेन॑ निव॒र्तय॑ते।
ए॒तदे॒व रू॒पं कृ॒त्वा नि व॑र्तयते।
स ततः॒ श्वश्वो॒ भूया॒न्भव॑न्नेति।
प्रैव जा॑यते।
त्रे॒ण्या श॑ल॒ल्या नि व॑र्तयेत।
त्रीणि॑ त्रीणि॒ वै दे॒वाना॑मृ॒द्धानि॑।
त्रीणि॒ छन्दाꣳ॑सि।
त्रीणि॒ सव॑नानि।
त्रय॑ इ॒मे लो॒काः॥३०॥
ऋ॒ध्यामे॒व तद्वी॒र्य॑ ए॒षु लो॒केषु॒ प्रति॑ तिष्ठति।
यच्चा॑तुर्मास्यया॒ज्या᳚त्मनो॒ नाव॒द्येत्।
दे॒वेभ्य॒ आवृ॑श्च्येत।
च॒तृ॒षु च॑तृषु॒ मासे॑षु॒ नि व॑र्तयेत।
प॒रोक्ष॑मे॒व तद्दे॒वेभ्य॑ आ॒त्मनोऽव॑द्य॒त्यना᳚व्रस्काय।
दे॒वानां॒ वा ए॒ष आनी॑तः।
यश्चा॑तुर्मास्यया॒जी।
य ए॒वं वि॒द्वान्नि च॑ व॒र्तय॑ते॒ परि॑ च।
दे॒वता॑ ए॒वाप्ये॑ति।
नास्य॑ रु॒द्रः प्र॒जां प॒शून॒भि म॑न्यते॥३१॥
अनुवाक 7
आयु॑षः प्रा॒णꣳ सन्त॑नु।
प्रा॒णाद॑पा॒नꣳ सन्त॑नु।
अ॒पा॒नाद्व्या॒नꣳ सन्त॑नु।
व्या॒नाच्चक्षुः॒ सन्त॑नु।
चक्षु॑षः॒ श्रोत्र॒ꣳ॒ सन्त॑नु।
श्रोत्रा॒न्मनः॒ सन्त॑नु।
मन॑सो॒ वाच॒ꣳ॒ सन्त॑नु।
वा॒च आ॒त्मान॒ꣳ॒ सन्त॑नु।
आ॒त्मनः॑ पृथि॒वीꣳ सन्त॑नु।
पृ॒थि॒व्या अ॒न्तरि॑क्ष॒ꣳ॒ सन्त॑नु।
अ॒न्तरि॑क्षा॒द्दिव॒ꣳ॒ सन्त॑नु।
दिवः॒ सुवः॒ सन्त॑नु॥३२॥
अनुवाक 8
इन्द्रो॑ दधी॒चो अ॒स्थभिः॑।
वृ॒त्राण्यप्र॑तिष्कुतः।
ज॒घान॑ नव॒तीर्नव॑।
इ॒च्छन्नश्व॑स्य॒ यच्छिरः॑।
पर्व॑ते॒ष्वप॑श्रितम्।
तद्वि॑दच्छर्य॒णाव॑ति।
अत्राह॒ गोरम॑न्वत।
नाम॒ त्वष्टु॑रपी॒च्यम्᳚।
इ॒त्था च॒न्द्रम॑सो गृ॒हे।
इन्द्र॒मिद्गा॒थिनो॑ बृ॒हत्॥३३॥
इन्द्र॑म॒र्केभि॑र॒र्किणः॑।
इन्द्रं॒ वाणी॑रनूषत।
इन्द्र॒ इद्धर्योः॒ सचा᳚।
सम्मि॑श्ल॒ आव॑चो॒ युजा᳚।
इन्द्रो॑ व॒ज्री हि॑र॒ण्ययः॑।
इन्द्रो॑ दी॒र्घाय॒ चक्ष॑से।
आ सूर्यꣳ॑ रोहयद्दि॒वि।
वि गोभि॒रद्रि॑मैरयत्।
इन्द्र॒ वाजे॑षु नो अव।
स॒हस्र॑प्रधनेषु च॥३४॥
उ॒ग्र उ॒ग्राभि॑रू॒तिभिः॑।
तमिन्द्रं॑ वाजयामसि।
म॒हे वृ॒त्राय॒ हन्त॑वे।
स वृषा॑ वृष॒भो भु॑वत्।
इन्द्रः॒ स दाम॑ने कृ॒तः।
ओजि॑ष्ठः॒ स बले॑ हि॒तः।
द्यु॒म्नी श्लो॒की स सौ॒म्यः॑।
गि॒रा वज्रो॒ न सम्भृ॑तः।
सब॑लो॒ अन॑पच्युतः।
व॒व॒क्षुरु॒ग्रो अस्तृ॑तः॥३५॥
अनुवाक 9
दे॒वा॒सु॒राः संय॑त्ता आसन्।
स प्र॒जाप॑ति॒रिन्द्रं॑ ज्ये॒ष्ठं पु॒त्रमप॒ न्य॑धत्त।
नेदे॑न॒मसु॑रा॒ बली॑याꣳसोऽहन॒न्निति॑।
प्र॒ह्रादो॑ ह॒ वै का॑याध॒वः।
वि॒रोच॑न॒ꣴ॒ स्वं पु॒त्रमप॒ न्य॑धत्त।
नेदे॑नं दे॒वा अ॑हन॒न्निति॑।
ते दे॒वाः प्र॒जाप॑तिमुपस॒मेत्यो॑चुः।
नारा॒जक॑स्य यु॒द्धम॑स्ति।
इन्द्र॒मन्वि॑च्छा॒मेति॑।
तं य॑ज्ञक्र॒तुभि॒रन्वै᳚च्छन्॥३६॥
तं य॑ज्ञक्र॒तुभि॒र्नान्व॑विन्दन्।
तमिष्टि॑भि॒रन्वै᳚च्छन्।
तमिष्टि॑भि॒रन्व॑विन्दन्।
तदिष्टी॑नामिष्टि॒त्वम्।
एष्ट॑यो ह॒ वै नाम॑।
ता इष्ट॑य॒ इत्याच॑क्षते प॒रोक्षे॑ण।
प॒रोक्ष॑प्रिया इव॒ हि दे॒वाः।
तस्मा॑ ए॒तमा᳚ग्नावैष्ण॒वमेका॑दशकपालं दीक्ष॒णीयं॒ निर॑वपन्।
तद॑प॒द्रुत्या॑तन्वत।
तान्प॑त्नीसंया॒जान्त॒ उपा॑नयन्॥३७॥
ते तद॑न्तमे॒व कृ॒त्वोद॑द्रवन्।
ते प्रा॑य॒णीय॑म॒भि स॒मारो॑हन्।
तद॑प॒द्रुत्या॑तन्वत।
ताञ्छ॒य्य्वँ॑न्त॒ उपा॑नयन्।
ते तद॑न्तमे॒व कृ॒त्वोद॑द्रवन्।
त आ॑ति॒थ्यम॒भि स॒मारो॑हन्।
तद॑प॒द्रुत्या॑तन्वत।
तानिडा᳚न्त॒ उपा॑नयन्।
ते तद॑न्तमे॒व कृ॒त्वोद॑द्रवन्।
तस्मा॑दे॒ता ए॒तद॑न्ता॒ इष्ट॑यः॒ सन्ति॑ष्ठन्ते॥३८॥
ए॒वꣳ हि दे॒वा अकु॑र्वत।
इति॑ दे॒वा अ॑कुर्वत।
इत्यु॒ वै म॑नु॒ष्याः᳚ कुर्वते।
ते दे॒वा ऊ॑चुः।
यद्वा इ॒दमु॒च्चैर्य॒ज्ञेन॒ चरा॑म।
तन्नोऽसु॑राः पा॒प्माऽनु॑विन्दन्ति।
उ॒पा॒ꣳ॒शू॑प॒सदा॑ चराम।
तथा॒ नोऽसु॑राः पा॒प्मा नानु॑वेथ्स्य॒न्तीति॑।
त उ॑पा॒ꣳ॒शू॑प॒सद॑मतन्वत।
ति॒स्र ए॒व सा॑मिधे॒नीर॒नूच्य॑॥३९॥
स्रु॒वेणा॑ऽऽघा॒रमा॒घार्य॑।
ति॒स्रः परा॑ची॒राहु॑तीर्हु॒त्वा।
स्रु॒वेणो॑प॒सदं॑ जुह॒वां च॑क्रुः।
उ॒ग्रं वचो॒ अपा॑वधीन्त्वे॒षं वचो॒ अपा॑वधी॒ꣴ॒ स्वाहेति॑।
अ॒श॒न॒या॒पि॒पा॒से ह॒ वा उ॒ग्रं वचः॑।
एन॑श्च॒ वैर॑हत्यं च त्वे॒षं वचः॑।
ए॒तꣳ ह॒ वाव तच्च॑तुर्धाविहि॒तं पा॒प्मानं॑ दे॒वा अप॑जघ्निरे।
तथो॑ ए॒वैतदे॑वं॒विद्यज॑मानः।
ति॒स्र ए॒व सा॑मिधे॒नीर॒नूच्य॑।
स्रु॒वेणा॑ऽऽघा॒रमा॒घार्य॑॥४०॥
ति॒स्रः परा॑ची॒राहु॑तीर्हु॒त्वा।
स्रु॒वेणो॑प॒सदं॑ जुहोति।
उ॒ग्रं वचो॒ अपा॑वधीन्त्वे॒षं वचो॒ अपा॑वधी॒ꣴ॒ स्वाहेति॑।
अ॒श॒न॒या॒पि॒पा॒से ह॒ वा उ॒ग्रं वचः॑।
एन॑श्च॒ वैर॑हत्यं च त्वे॒षं वचः॑।
ए॒तमे॒व तच्च॑तुर्धाविहि॒तं पा॒प्मानं॒ यज॑मा॒नोऽप॑ हते।
ते॑ऽभि॒नीयै॒वाहः॑ प॒शुमाऽल॑भन्त।
अह्न॑ ए॒व तद्दे॒वा अव॑र्तिं पा॒प्मानं॑ मृ॒त्युमप॑जघ्निरे।
तेना॑भि॒नीये॑व॒ रात्रेः॒ प्राच॑रन्।
रात्रि॑या ए॒व तद्दे॒वा अव॑र्तिं पा॒प्मानं॑ मृ॒त्युमप॑जघ्निरे॥४१॥
तस्मा॑दभि॒नीयै॒वाहः॑ प॒शुमा ल॑भेत।
अह्न॑ ए॒व तद्यज॑मा॒नोऽव॑र्तिं पा॒प्मानं॒ भ्रातृ॑व्या॒नप॑ नुदते।
तेना॑भि॒नीये॑व॒ रात्रेः॒ प्रच॑रेत्।
रात्रि॑या ए॒व तद्यज॑मा॒नोऽव॑र्तिं पा॒प्मानं॒ भ्रातृ॑व्या॒नप॑ नुदते।
स ए॒ष उ॑पवस॒थीयेऽहं॑ द्विदेव॒त्यः॑ प॒शुरा ल॑भ्यते।
द्व॒यं वा अ॒स्मिँल्लो॒के यज॑मानः।
अस्थि॑ च मा॒ꣳ॒सं च॑।
अस्थि॑ चै॒व तेन॑ मा॒ꣳ॒सं च॒ यज॑मानः॒ सꣴस्कु॑रुते।
ता वा ए॒ताः पञ्च॑ दे॒वताः᳚।
अ॒ग्नीषोमा॑व॒ग्निर्मि॒त्रावरु॑णौ॥४२॥
प॒ञ्च॒प॒ञ्ची वै यज॑मानः।
त्वङ्मा॒ꣳ॒सꣴ स्नावाऽस्थि॑ म॒ज्जा।
ए॒तमे॒व तत्प॑ञ्चधाविहि॒तमा॒त्मानं॑ वरुणपा॒शान्मु॑ञ्चति।
भे॒ष॒जता॑यै निर्वरुण॒त्वाय॑।
तꣳ स॒प्तभि॒श्छन्दो॑भिः प्रा॒तर॑ह्वयन्।
तस्मा᳚थ्स॒प्त च॑तुरुत्त॒राणि॒ छन्दाꣳ॑सि प्रातरनुवा॒केऽनू᳚च्यन्ते।
तमे॒तयो॑पस॒मेत्योपा॑सीदन्।
उपा᳚स्मै गायता नर॒ इति॑।
तस्मा॑दे॒तया॑ बहिष्पवमा॒न उ॑प॒सद्यः॑॥४३॥
अनुवाक 10
स स॑मु॒द्र उ॑त्तर॒तः प्राज्व॑लद्भूम्य॒न्तेन॑।
ए॒ष वाव स स॑मु॒द्रः।
यच्चात्वा॑लः।
ए॒ष उ॑वे॒व स भू᳚म्य॒न्तः।
यद्वे᳚द्य॒न्तः।
तदे॒तत्त्रि॑श॒लं त्रि॑पूरु॒षम्।
तस्मा॒त्तं त्रि॑वित॒स्तं ख॑नन्ति।
स सु॑वर्णरज॒ताभ्यां᳚ कु॒शीभ्यां॒ परि॑गृहीत आसीत्।
तं यद॒स्या अध्य॒जन॑यन्।
तस्मा॑दादि॒त्यः॥४४॥
अथ॒ यथ्सु॑वर्णरज॒ताभ्यां᳚ कु॒शीभ्यां॒ परि॑गृहीत॒ आसी᳚त्।
साऽस्य॑ कौशि॒कता᳚।
तं त्रि॒वृता॒ऽभि प्रास्तु॑वत।
तं त्रि॒वृताऽऽद॑दत।
तं त्रि॒वृताऽह॑रन्।
याव॑ती त्रि॒वृतो॒ मात्रा᳚।
तं प॑ञ्चद॒शेना॒भि प्रास्तु॑वत।
तं प॑ञ्चद॒शेनाऽऽद॑दत।
तं प॑ञ्चद॒शेनाऽऽह॑रन्।
याव॑ती पञ्चद॒शस्य॒ मात्रा᳚॥४५॥
तꣳ स॑प्तद॒शेना॒भि प्रास्तु॑वत।
तꣳ स॑प्तद॒शेनाऽऽद॑दत।
तꣳ स॑प्तद॒शेनाऽऽह॑रन्।
याव॑ती सप्तद॒शस्य॒ मात्रा᳚।
तस्य॑ सप्तद॒शेन॑ ह्रि॒यमा॑णस्य॒ तेजो॒ हरो॑ऽपतत्।
तमे॑कवि॒ꣳ॒शेना॒भि प्रास्तु॑वत।
तमे॑कवि॒ꣳ॒शेनाऽऽद॑दत।
तमे॑कवि॒ꣳ॒शेनाऽऽह॑रन्।
याव॑त्येकवि॒ꣳ॒शस्य॒ मात्रा᳚।
ते यत्त्रि॒वृता᳚ स्तु॒वते᳚॥४६॥
त्रि॒वृतै॒व तद्यज॑मान॒माद॑दते।
तं त्रि॒वृतै॒व ह॑रन्ति।
याव॑ती त्रि॒वृतो॒ मात्रा᳚।
अ॒ग्निर्वै त्रि॒वृत्।
याव॒द्वा अ॒ग्नेर्दह॑तो धू॒म उ॒देत्यानु॒ व्येति॑।
ताव॑ती त्रि॒वृतो॒ मात्रा᳚।
अ॒ग्नेरे॒वैनं॒ तत्।
मात्रा॒ꣳ॒ सायु॑ज्यꣳ सलो॒कतां᳚ गमयन्ति।
अथ॒ यत्प॑ञ्चद॒शेन॑ स्तु॒वते᳚।
प॒ञ्च॒द॒शेनै॒व तद्यज॑मान॒माद॑दते॥४७॥
तं प॑ञ्चद॒शेनै॒व ह॑रन्ति।
याव॑ती पञ्चद॒शस्य॒ मात्रा᳚।
च॒न्द्रमा॒ वै प॑ञ्चद॒शः।
ए॒ष हि प॑ञ्चद॒श्याम॑पक्षी॒यते᳚।
प॒ञ्च॒द॒श्यामा॑पू॒र्यते᳚।
च॒न्द्रम॑स ए॒वैनं॒ तत्।
मात्रा॒ꣳ॒ सायु॑ज्यꣳ सलो॒कतां᳚ गमयन्ति।
अथ॒ यथ्स॑प्तद॒शेन॑ स्तु॒वते᳚।
स॒प्त॒द॒शेनै॒व तद्यज॑मान॒माद॑दते।
तꣳ स॑प्तद॒शेनै॒व ह॑रन्ति॥४८॥
याव॑ती सप्तद॒शस्य॒ मात्रा᳚।
प्र॒जाप॑ति॒र्वै स॑प्तद॒शः।
प्र॒जाप॑तेरे॒वैनं॒ तत्।
मात्रा॒ꣳ॒ सायु॑ज्यꣳ सलो॒कतां᳚ गमयन्ति।
अथ॒ यदे॑कवि॒ꣳ॒शेन॑ स्तु॒वते᳚।
ए॒क॒वि॒ꣳ॒शेनै॒व तद्यज॑मान॒माद॑दते।
तमे॑कवि॒ꣳ॒शेनै॒व ह॑रन्ति।
याव॑त्येकवि॒ꣳ॒शस्य॒ मात्रा᳚।
अ॒सौ वा आ॑दि॒त्य ए॑कवि॒ꣳ॒शः।
आ॒दि॒त्यस्यै॒वैनं॒ तत्॥४९॥
मात्रा॒ꣳ॒ सायु॑ज्यꣳ सलो॒कतां᳚ गमयन्ति।
ते कु॒श्यौ᳚।
व्य॑घ्नन्।
ते अ॑होरा॒त्रे अ॑भवताम्।
अह॑रे॒व सु॒वर्णा॑ऽभवत्।
र॒ज॒ता रात्रिः॑।
स यदा॑दि॒त्य उ॒देति॑।
ए॒तामे॒व तथ्सु॒वर्णां᳚ कु॒शीमनु॒ समे॑ति।
अथ॒ यद॑स्त॒मेति॑।
ए॒तामे॒व तद्र॑ज॒तां कु॒शीमनु॒संवि॑शति।
प्र॒ह्रादो॑ ह॒ वै का॑याध॒वः।
वि॒रोच॑न॒ꣴ॒ स्वं पु॒त्रमुदा᳚स्यत्।
स प्र॑द॒रो॑ऽभवत्।
तस्मा᳚त्प्रद॒रादु॑द॒कं नाचा॑मेत्॥५०॥
अनुवाक 11
ये वै च॒त्वारः॒ स्तोमाः᳚।
कृ॒तं तत्।
अथ॒ ये पञ्च॑।
कलिः॒ सः।
तस्मा॒च्चतु॑ष्टोमः।
तच्चतु॑ष्टोमस्य चतुष्टोम॒त्वम्।
तदा॑हुः।
क॒त॒मानि॒ तानि॒ ज्योतीꣳ॑षि।
य ए॒तस्य॒ स्तोमा॒ इति॑।
त्रि॒वृत्प॑ञ्चद॒शः स॑प्तद॒श ए॑कवि॒ꣳ॒शः॥५१॥
ए॒तानि॒ वाव तानि॒ ज्योतीꣳ॑षि।
य ए॒तस्य॒ स्तोमाः᳚।
सो᳚ऽब्रवीत्।
स॒प्त॒द॒शेन॑ ह्रि॒यमा॑णो॒ व्य॑लेशिषि।
भि॒षज्य॑त॒ मेति॑।
तम॒श्विनौ॑ धा॒नाभि॑रभिषज्यताम्।
पू॒षा क॑र॒म्भेण॑।
भार॑ती परिवा॒पेण॑।
मि॒त्रावरु॑णौ पय॒स्य॑या।
तदा॑हुः॥५२॥
यद॒श्विभ्यां᳚ धा॒नाः।
पू॒ष्णः क॑र॒म्भः।
भार॑त्यै परिवा॒पः।
मि॒त्रावरु॑णयोः पय॒स्याऽथ॑।
कस्मा॑दे॒तेषाꣳ॑ ह॒विषा॒मिन्द्र॑मे॒व य॑ज॒न्तीति॑।
ए॒ता ह्ये॑नं दे॒वता॒ इति॑ ब्रूयात्।
ए॒तैर्ह॒विर्भि॒रभि॑षज्य॒ꣴ॒स्तस्मा॒दिति॑।
तं वस॑वो॒ऽष्टाक॑पालेन प्रातः सव॒ने॑ऽभिषज्यन्।
रु॒द्रा एका॑दशकपालेन॒ माध्यं॑ दिने॒ सव॑ने।
विश्वे॑ दे॒वा द्वाद॑शकपालेन तृतीयसव॒ने॥५३॥
स यद॒ष्टाक॑पालान्प्रातः सव॒ने कु॒र्यात्।
एका॑दशकपाला॒न्माध्यं॑ दिने॒ सव॑ने।
द्वाद॑शकपालाꣴस्तृतीयसव॒ने।
विलो॑म॒ तद्य॒ज्ञस्य॑ क्रियेत।
एका॑दशकपालाने॒व प्रा॑तः सव॒ने कु॑र्यात्।
एका॑दशकपाला॒न्माध्यं॑ दिने॒ सव॑ने।
एका॑दशकपालाꣴस्तृतीयसव॒ने।
य॒ज्ञस्य॑ सलोम॒त्वाय॑।
तदा॑हुः।
यद्वसू॑नां प्रातः सव॒नम्।
रु॒द्राणां॒ माध्यं॑ दिन॒ꣳ॒ सव॑नम्।
विश्वे॑षां दे॒वानां᳚ तृतीयसव॒नम्।
अथ॒ कस्मा॑दे॒तेषाꣳ॑ ह॒विषा॒मिन्द्र॑मे॒व य॑ज॒न्तीति॑।
ए॒ता ह्ये॑नं दे॒वता॒ इति॑ ब्रूयात्।
ए॒तैर्ह॒विर्भि॒रभि॑षज्य॒ꣴ॒स्तस्मा॒दिति॑॥५४॥
अनुवाक 12
तस्यावा॑चोऽवपा॒दाद॑बिभयुः।
तमे॒तेषु॑ स॒प्तसु॒ छन्दः॑ स्वश्रयन्।
यदश्र॑यन्।
तच्छ्रा॑य॒न्तीय॑स्य श्रायन्तीय॒त्वम्।
यदवा॑रयन्।
तद्वा॑रव॒न्तीय॑स्य वारवन्तीय॒त्वम्।
तस्यावा॑च ए॒वाव॑पा॒दाद॑बिभयुः।
तस्मा॑ ए॒तानि॑ स॒प्त च॑तुरुत्त॒राणि॒ छन्दा॒ꣴ॒स्युपा॑दधुः।
तेषा॒मति॒ त्रीण्य॑रिच्यन्त।
न त्रीण्युद॑भवन्॥५५॥
स बृ॑ह॒तीमे॒वास्पृ॑शत्।
द्वाभ्या॑म॒क्षरा᳚भ्याम्।
अ॒हो॒रा॒त्राभ्या॑मे॒व।
तदा॑हुः।
क॒त॒मा सा दे॒वाक्ष॑रा बृह॒ती।
यस्यां॒ तत्प्र॒त्यति॑ष्ठत्।
द्वाद॑श पौर्णमा॒स्यः॑।
द्वाद॒शाष्ट॑काः।
द्वाद॑शामावा॒स्याः᳚।
ए॒षा वाव सा दे॒वाक्ष॑रा बृह॒ती॥५६॥
यस्यां॒ तत्प्र॒त्यति॑ष्ठ॒दिति॑।
यानि॑ च॒ छन्दाꣴ॑स्य॒त्यरि॑च्यन्त।
यानि॑ च॒ नोदभ॑वन्।
तानि॒ निर्वी᳚र्याणि ही॒नान्य॑मन्यन्त।
साऽब्र॑वीद्बृह॒ती।
मामे॒व भू॒त्वा।
मामुप॒ सꣴश्र॑य॒तेति॑।
च॒तुर्भि॑र॒क्षरै॑रनु॒ष्टुग्बृ॑ह॒तीं नोद॑भवत्।
च॒तुर्भि॑र॒क्षरैः᳚ प॒ङ्क्तिर्बृ॑ह॒तीमत्य॑रिच्यत।
तस्या॑मे॒तानि॑ च॒त्वार्य॒क्षरा᳚ण्यप॒च्छिद्या॑दधात्॥५७॥
ते बृ॑ह॒ती ए॒व भू॒त्वा।
बृ॒ह॒तीमुप॒ सम॑श्रयताम्।
अ॒ष्टा॒भिर॒क्षरै॑रु॒ष्णिग्बृ॑ह॒तीं नोद॑भवत्।
अ॒ष्टा॒भिर॒क्षरै᳚स्त्रि॒ष्टुग्बृ॑ह॒तीमत्य॑रिच्यत।
तस्या॑मे॒तान्य॒ष्टाव॒क्षरा᳚ण्यप॒च्छिद्या॑दधात्।
ते बृ॑ह॒ती ए॒व भू॒त्वा।
बृ॒ह॒तीमुप॒ सम॑श्रयताम्।
द्वा॒द॒शभि॑र॒क्षरै᳚र्गाय॒त्री बृ॑ह॒तीं नोद॑भवत्।
द्वा॒द॒शभि॑र॒क्षरै॒र्जग॑ती बृह॒तीमत्य॑रिच्यत।
तस्या॑मे॒तानि॒ द्वाद॑शा॒क्षरा᳚ण्यप॒च्छिद्या॑दधात्॥५८॥
ते बृ॑ह॒ती ए॒व भू॒त्वा।
बृ॒ह॒तीमुप॒ सम॑श्रयताम्।
सो᳚ऽब्रवीत्प्र॒जाप॑तिः।
छन्दाꣳ॑सि॒ रथो॑ मे भवत।
यु॒ष्माभि॑र॒हमे॒तमध्वा॑न॒मनु॒ सञ्च॑रा॒णीति॑।
तस्य॑ गाय॒त्री च॒ जग॑ती च प॒क्षाव॑भवताम्।
उ॒ष्णिक्च॑ त्रि॒ष्टुप्च॒ प्रष्ट्यौ᳚।
अ॒नु॒ष्टुप्च॑ प॒ङ्क्तिश्च॒ धुर्यौ᳚।
बृ॒ह॒त्ये॑वोद्धिर॑भवत्।
स ए॒तं छ॑न्दोर॒थमा॒स्थाय॑।
ए॒तमध्वा॑न॒मनु॒ सम॑चरत्।
ए॒तꣳ ह॒ वै छ॑न्दोर॒थमा॒स्थाय॑।
ए॒तमध्वा॑न॒मनु॒ सञ्च॑रति।
येनै॒ष ए॒तथ्स॒ञ्चर॑ति।
य ए॒वं वि॒द्वान्थ्सोमे॑न॒ यज॑ते।
य उ॑ चैनमे॒वं वेद॑॥५९॥