vasudhārātīrthamāhātmyavarṇanam
skaṃda uvāca
karādvigalitaṃ yatra kapālaṃ te maheśvara ||
tasya tīrthasya māhātmyaṃ kṛpayā vada me pitaḥ
||1||कराद्विगलितं यत्र कपालं ते महेश्वर ॥
तस्य तीर्थस्य माहात्म्यं कृपया वद मे पितः
śiva uvāca
atiguhyamidaṃ tīrthaṃ surāsuranamaskṛtam ||
brahmahā'pi naro yatra snānamātreṇa śuddhyati
||2||अतिगुह्यमिदं तीर्थं सुरासुरनमस्कृतम् ॥
ब्रह्महाऽपि नरो यत्र स्नानमात्रेण शुद्ध्यति
paṃca tīrthāni tiṣṭhaṃti kapāle pāpamocane ||
tatra snānaṃ tapo dānaṃ sarvamakṣayamiṣyate
||3||पंच तीर्थानि तिष्ठंति कपाले पापमोचने ॥
तत्र स्नानं तपो दानं सर्वमक्षयमिष्यते
piṃḍaṃ vidhāya vidhivannarakāttārayetpitṝn ||
pitṛtīrthamidaṃ proktaṃ gayāto'ṣṭaguṇādhikam
||4||पिंडं विधाय विधिवन्नरकात्तारयेत्पितॄन् ॥
पितृतीर्थमिदं प्रोक्तं गयातोऽष्टगुणाधिकम्
tilatarppaṇato yāṃti pitaraḥ svargamuttamam
||5||तिलतर्प्पणतो यांति पितरः स्वर्गमुत्तमम्
ahorātraṃ sthiro bhūtvā japaniṣṭhaḥ samāhitaḥ ||
tasyeṣṭasiddhirmahatī tatkṣaṇādeva jāyate
||6||अहोरात्रं स्थिरो भूत्वा जपनिष्ठः समाहितः ॥
तस्येष्टसिद्धिर्महती तत्क्षणादेव जायते
pāralaukikakarmāṇi sarvāṇyavyāhatāni ca ||
kapālamocane tīrthe nādhikaṃ pitṛkarmaṇi
||7||पारलौकिककर्माणि सर्वाण्यव्याहतानि च ॥
कपालमोचने तीर्थे नाधिकं पितृकर्मणि
skaṃda uvāca
kutra vā brahmatīrthaṃ vai phalaṃ vā kīdṛśaṃ bhavet ||
ke vā tatra vasaṃtīha kṛpayā vada me pitaḥ
||8||कुत्र वा ब्रह्मतीर्थं वै फलं वा कीदृशं भवेत् ॥
के वा तत्र वसंतीह कृपया वद मे पितः
śiva uvāca
ekadā viṣṇunābhyambhoruhasthasya prajāpateḥ ||
vedānmukhāṃbujāddhṛtvā jagmaturmadhukaiṭabhau
||9||एकदा विष्णुनाभ्यम्भोरुहस्थस्य प्रजापतेः ॥
वेदान्मुखांबुजाद्धृत्वा जग्मतुर्मधुकैटभौ
tato hyutthāya śayanātsisṛkṣurabjasaṃbhavaḥ ||
sraṣṭuṃ vinā'gamaṃ loke na śaśāka hṛtasmṛtiḥ
||10||ततो ह्युत्थाय शयनात्सिसृक्षुरब्जसंभवः ॥
स्रष्टुं विनाऽगमं लोके न शशाक हृतस्मृतिः
tadā badarikāmetya hariṇā pratipālitām ||
tuṣṭāva praṇato bhūtvā bhagavaṃtaṃ sanātanam
||11||तदा बदरिकामेत्य हरिणा प्रतिपालिताम् ॥
तुष्टाव प्रणतो भूत्वा भगवंतं सनातनम्
tataḥ kuṃḍātsamudbhūto hayaśīrṣo nijāyudhaḥ ||
pītāṃbaradharaḥ śuklaścaturbāhuḥ sudṛptadṛk
||12||ततः कुंडात्समुद्भूतो हयशीर्षो निजायुधः ॥
पीतांबरधरः शुक्लश्चतुर्बाहुः सुदृप्तदृक्
atyadbhutaḥ prakaṭakaṭhoralocanaścalacchaṭāvicchuritameghaḍaṃbaraḥ ||
svatejasā hatanikhilaprabhākulaḥ kṛpānvito druhiṇapuraḥsaro'bhavat
||13||अत्यद्भुतः प्रकटकठोरलोचनश्चलच्छटाविच्छुरितमेघडंबरः ॥
स्वतेजसा हतनिखिलप्रभाकुलः कृपान्वितो द्रुहिणपुरःसरोऽभवत्
nirīkṣya taṃ vidhirapi vismayākulaḥ praṇamya ca stutimakarotprasannadṛk
||14||निरीक्ष्य तं विधिरपि विस्मयाकुलः प्रणम्य च स्तुतिमकरोत्प्रसन्नदृक्
brahmovāca
namaḥ kamalanābhāya namaste kamalāśraya ||
namaste kamalāvāsaviśālavanamāline
||15||नमः कमलनाभाय नमस्ते कमलाश्रय ॥
नमस्ते कमलावासविशालवनमालिने
namo vijñānabhātrāya guhāvāsa nivāsine ||
hṛṣīkeśāya śāṃtāya tubhyaṃ bhagavate namaḥ
||16||नमो विज्ञानभात्राय गुहावास निवासिने ॥
हृषीकेशाय शांताय तुभ्यं भगवते नमः
svabhaktarakṣaṇakṛte dhṛtadehāya śārṅgiṇe ||
anaṃtakleśanāśāya gadine brahmaṇe namaḥ
||17||स्वभक्तरक्षणकृते धृतदेहाय शार्ङ्गिणे ॥
अनंतक्लेशनाशाय गदिने ब्रह्मणे नमः
saṃsāravividhāsāranivṛttikṛtakarmaṇe ||
rakṣitre sarvajaṃtūnāṃ viṣṇave jiṣṇave namaḥ
||18||संसारविविधासारनिवृत्तिकृतकर्मणे ॥
रक्षित्रे सर्वजंतूनां विष्णवे जिष्णवे नमः
namo viśvaṃbharāśeṣanivṛttaguṇavṛttaye ||
surāsuravarastaṃbhanivṛttisthitikīrtaye
||19||नमो विश्वंभराशेषनिवृत्तगुणवृत्तये ॥
सुरासुरवरस्तंभनिवृत्तिस्थितिकीर्तये
itīritaḥ surapatinā maheśvaro hṛdisthito'khilavidaśeṣakarmabhiḥ ||
tato'ntaraṃ sapadi gato nibadhya tau suradruhau kila nijaghāna līlayā
||20||इतीरितः सुरपतिना महेश्वरो हृदिस्थितोऽखिलविदशेषकर्मभिः ॥
ततोऽन्तरं सपदि गतो निबध्य तौ सुरद्रुहौ किल निजघान लीलया
tato nigamamādāya brahmaṇoṃ'tikamāyayau ||
dattvā svanigamaṃ tasmai svastho'bhūtsa samīḍitaḥ
||21||ततो निगममादाय ब्रह्मणोंऽतिकमाययौ ॥
दत्त्वा स्वनिगमं तस्मै स्वस्थोऽभूत्स समीडितः
tataḥ prabhṛti tattīrthaṃ brahmaṇā prakaṭīkṛtam ||
brahmakuṃḍamiti khyātaṃ triṣu lokeṣu viśrutam
||22||ततः प्रभृति तत्तीर्थं ब्रह्मणा प्रकटीकृतम् ॥
ब्रह्मकुंडमिति ख्यातं त्रिषु लोकेषु विश्रुतम्
yasya darśanamātreṇa mahāpātakino janāḥ ||
vimuktakilbiṣāḥ sadyo brahmalokaṃ vrajaṃti te
||23||यस्य दर्शनमात्रेण महापातकिनो जनाः ॥
विमुक्तकिल्बिषाः सद्यो ब्रह्मलोकं व्रजंति ते
snānaṃ kurvaṃti ye lokā vratacaryāmathāpi vā ||
brahmalokamatikramya viṣṇulokaṃ vrajaṃti te
||24||स्नानं कुर्वंति ये लोका व्रतचर्यामथापि वा ॥
ब्रह्मलोकमतिक्रम्य विष्णुलोकं व्रजंति ते
skaṃda uvāca
tataḥ kimakaroddhātā labdhvā vedāñjanārddanāt ||
etadanyacca sarvaṃ me kṛpayā vada sāṃpratam
||25||ततः किमकरोद्धाता लब्ध्वा वेदाञ्जनार्द्दनात् ॥
एतदन्यच्च सर्वं मे कृपया वद सांप्रतम्
mahādeva uvāca
caturṇāmapi vedānāṃ dṛṣṭvā badarikāśramam ||
matirna jāyate gaṃtuṃ brahmaṇā saha putraka
||26||चतुर्णामपि वेदानां दृष्ट्वा बदरिकाश्रमम् ॥
मतिर्न जायते गंतुं ब्रह्मणा सह पुत्रक
tatastu vikalaṃ dṛṣṭvā brahmāṇaṃ janavāsinaḥ ||
siddhāstu vidhivatstutvā praṇipatyedamabruvan
||27||ततस्तु विकलं दृष्ट्वा ब्रह्माणं जनवासिनः ॥
सिद्धास्तु विधिवत्स्तुत्वा प्रणिपत्येदमब्रुवन्
siddhā ūcuḥ
ājñā bhagavataḥ kāryā sarvaiḥ sthāvarajaṃgamaiḥ ||
bhagavānsarvajaṃtūnāṃ karttā hartā pitā guruḥ
||28||आज्ञा भगवतः कार्या सर्वैः स्थावरजंगमैः ॥
भगवान्सर्वजंतूनां कर्त्ता हर्ता पिता गुरुः
sthitirbrahmāṃtike vaśca hariṇaivānukalpitā ||
nivṛttirvartate caiṣā tathāpyetannirāmayam
||29||स्थितिर्ब्रह्मांतिके वश्च हरिणैवानुकल्पिता ॥
निवृत्तिर्वर्तते चैषा तथाप्येतन्निरामयम्
ekāṃte dravarūpeṇa mūrtirvo'trāvatiṣṭhatām ||
dvitīyā brahmaṇā sārddhaṃ brahmalokaṃ vrajetpunaḥ
||30||एकांते द्रवरूपेण मूर्तिर्वोऽत्रावतिष्ठताम् ॥
द्वितीया ब्रह्मणा सार्द्धं ब्रह्मलोकं व्रजेत्पुनः
tataḥ sahṛdayā vedā dvaidhīkṛtātmarūpakāḥ ||
brahmaṇā brahmalokaṃ te yayuḥ sārddhaṃ praharṣitāḥ
||31||ततः सहृदया वेदा द्वैधीकृतात्मरूपकाः ॥
ब्रह्मणा ब्रह्मलोकं ते ययुः सार्द्धं प्रहर्षिताः
tatastrilokaṃ vidhivatsasarja caturānanaḥ ||
dravarūpeṣu vedeṣu snānadānatapaḥkriyāḥ ||
kṛtā viccheditā na syuryāvadābhūtasaṃplavam
||32||ततस्त्रिलोकं विधिवत्ससर्ज चतुराननः ॥
द्रवरूपेषु वेदेषु स्नानदानतपःक्रियाः ॥
कृता विच्छेदिता न स्युर्यावदाभूतसंप्लवम्
phalamuddiśya kurvaṃti upavāsatrayaṃ narāḥ ||
caturṇāmapi vedānāṃ vyākhyātāro na saṃśayaḥ
||33||फलमुद्दिश्य कुर्वंति उपवासत्रयं नराः ॥
चतुर्णामपि वेदानां व्याख्यातारो न संशयः
anukrameṇa tiṣṭhaṃti vedāścatvāra eva ca ||
ṛgyajuḥsāmātharvākhyā bhagavatpārśvavartinaḥ
||34||अनुक्रमेण तिष्ठंति वेदाश्चत्वार एव च ॥
ऋग्यजुःसामाथर्वाख्या भगवत्पार्श्ववर्तिनः
ye puṇyavaṃto'kaluṣā vedavedāṃgapāragāḥ ||
te vedaghoṣaṃ viralāḥ śṛṇvaṃtyapi kalau yuge
||35||ये पुण्यवंतोऽकलुषा वेदवेदांगपारगाः ॥
ते वेदघोषं विरलाः शृण्वंत्यपि कलौ युगे
caturṇāmapi vedānāmudagasti sarasvatī ||
japtātha sā nṛṇāṃ haṃti jaḍatāṃ jalarūpiṇī
||36||चतुर्णामपि वेदानामुदगस्ति सरस्वती ॥
जप्ताथ सा नृणां हंति जडतां जलरूपिणी
sarasvatyā jale sthitvā japaṃ kṛtvā samāhitaḥ ||
manostasya na vicchedaḥ kadācidapi jāyate
||37||सरस्वत्या जले स्थित्वा जपं कृत्वा समाहितः ॥
मनोस्तस्य न विच्छेदः कदाचिदपि जायते
vedavyāso'pi bhagavānyatprasādādudāradhīḥ ||
purāṇasaṃhitārthajño'bhavadatra na saṃśayaḥ
||38||वेदव्यासोऽपि भगवान्यत्प्रसादादुदारधीः ॥
पुराणसंहितार्थज्ञोऽभवदत्र न संशयः
trayāṇāmapi lokānāṃ hitāya jagatāṃ patiḥ ||
sthāpayāmāsa vidhinā vāṇīṃ vāgvibhavapradām
||39||त्रयाणामपि लोकानां हिताय जगतां पतिः ॥
स्थापयामास विधिना वाणीं वाग्विभवप्रदाम्
darśanasparśanasnānapūjāstutyabhivandanaiḥ ||
sarasvatyā na vicchedaḥ kule tasya kadācana
||40||दर्शनस्पर्शनस्नानपूजास्तुत्यभिवन्दनैः ॥
सरस्वत्या न विच्छेदः कुले तस्य कदाचन
mantrasiddhirviśeṣeṇa sarasvatyāstaṭe nṛṇām ||
japatāmaciraṇaiva jāyate nātra saṃśayaḥ
||41||मन्त्रसिद्धिर्विशेषेण सरस्वत्यास्तटे नृणाम् ॥
जपतामचिरणैव जायते नात्र संशयः
bahunā kimihoktena vāṇī vāgvibhavapradā ||
dravarūpadharā nṛṇāṃ darśanātpūtirujjvalā
||42||बहुना किमिहोक्तेन वाणी वाग्विभवप्रदा ॥
द्रवरूपधरा नृणां दर्शनात्पूतिरुज्ज्वला
tato'rvāgdakṣiṇe bhāge dravadhāreti viśrutam ||
tīrthamiṃdrapadaṃ yatra tapaścakre puraṃdaraḥ
||43||ततोऽर्वाग्दक्षिणे भागे द्रवधारेति विश्रुतम् ॥
तीर्थमिंद्रपदं यत्र तपश्चक्रे पुरंदरः
sudāruṇaṃ tapaḥ kṛtvā paritoṣya janārddanam ||
padamaiṃdraṃ samālebhe surāsuranamaskṛtam
||44||सुदारुणं तपः कृत्वा परितोष्य जनार्द्दनम् ॥
पदमैंद्रं समालेभे सुरासुरनमस्कृतम्
tapo dānaṃ japo homo vratāni niyamā yamāḥ ||
tatrānantaguṇaṃ proktaṃ tattīrthamatidurlabham
||45||तपो दानं जपो होमो व्रतानि नियमा यमाः ॥
तत्रानन्तगुणं प्रोक्तं तत्तीर्थमतिदुर्लभम्
pratimāse trayodaśyāṃ śuklāyāṃ haritoṣaṇe ||
snātvā sutīrthe sutrāmācchandaṃ copetya saṃgataḥ
||46||प्रतिमासे त्रयोदश्यां शुक्लायां हरितोषणे ॥
स्नात्वा सुतीर्थे सुत्रामाच्छन्दं चोपेत्य संगतः
upavāsadvayaṃ kṛtvā pūjayitvā janārddanam ||
sarvapāpavinirmuktaḥ śakraloke mahīyate
||47||उपवासद्वयं कृत्वा पूजयित्वा जनार्द्दनम् ॥
सर्वपापविनिर्मुक्तः शक्रलोके महीयते
tatraiva mānasodbhedaḥ sarvapāpapraṇāśanaḥ ||
durlabhaḥ sarvajaṃtūnāṃ yatra te syurmaharṣayaḥ
||48||तत्रैव मानसोद्भेदः सर्वपापप्रणाशनः ॥
दुर्लभः सर्वजंतूनां यत्र ते स्युर्महर्षयः
mānasaṃ cidacidgranthimudgrathnaṃti ca sarvataḥ ||
mānasodbheva ityākhyā ṛṣibhiḥ parigīyate
||49||मानसं चिदचिद्ग्रन्थिमुद्ग्रथ्नंति च सर्वतः ॥
मानसोद्भेव इत्याख्या ऋषिभिः परिगीयते
bhiṃdaṃti hṛdayagraṃthīśchiṃdanti bahusaṃśayam ||
karmāṇi kṣapayantyasmānmānasodbheda ityabhūt
||50||भिंदंति हृदयग्रंथीश्छिंदन्ति बहुसंशयम् ॥
कर्माणि क्षपयन्त्यस्मान्मानसोद्भेद इत्यभूत्
yadi bhāgyavaśādatra biṃdumātraṃ labhennaraḥ ||
tatkṣaṇānmuktimāpnoti kimatastvadhikaṃ bhavet
||51||यदि भाग्यवशादत्र बिंदुमात्रं लभेन्नरः ॥
तत्क्षणान्मुक्तिमाप्नोति किमतस्त्वधिकं भवेत्
giridarīnilaye nivasatyamī ṛṣigaṇāḥ phalamūlajalāśanāḥ ||
jitamanoviṣayāḥ śitabuddhayaḥ kalibhayādiva pāpabhayākulāḥ
||52||गिरिदरीनिलये निवसत्यमी ऋषिगणाः फलमूलजलाशनाः ॥
जितमनोविषयाः शितबुद्धयः कलिभयादिव पापभयाकुलाः
phalasamīraṇagahvaranirjharāśramabharādupalabdhapaṭottamāḥ ||
triṣavaṇakramanirjitadurjayendriyaparākramaṇā munayastvamī
||53||फलसमीरणगह्वरनिर्झराश्रमभरादुपलब्धपटोत्तमाः ॥
त्रिषवणक्रमनिर्जितदुर्जयेन्द्रियपराक्रमणा मुनयस्त्वमी
sādhanāni bahūnyeva kāyakleśakarāṇyaho ||
sulabhaṃ sādhanaṃ loke mānasodbhedadarśanam
||54||साधनानि बहून्येव कायक्लेशकराण्यहो ॥
सुलभं साधनं लोके मानसोद्भेददर्शनम्
yasmindine jalaṃ caitallabhate puṇyavāñjanaḥ ||
bhavati vyāsasadṛśo yamapitṛsamaḥ kramāt
||55||यस्मिन्दिने जलं चैतल्लभते पुण्यवाञ्जनः ॥
भवति व्याससदृशो यमपितृसमः क्रमात्
kāmyatīrthamidaṃ nṝṇāṃ kāmanāvaśakṛtpunaḥ ||
akāmatastu muktiḥ syādubhayoreṣa niścayaḥ
||56||काम्यतीर्थमिदं नॄणां कामनावशकृत्पुनः ॥
अकामतस्तु मुक्तिः स्यादुभयोरेष निश्चयः
yadi kaścitpramādena kāmanāṃ kurute naraḥ ||
phalaṃ bhuktvā punarmuktirbhavatyeva na saṃśayaḥ
||57||यदि कश्चित्प्रमादेन कामनां कुरुते नरः ॥
फलं भुक्त्वा पुनर्मुक्तिर्भवत्येव न संशयः
maharādiṣu lokeṣu bhuktvā bhogānyathepsitān ||
bhoge bhukte punaryāti kāmanāvaśato janaḥ
||58||महरादिषु लोकेषु भुक्त्वा भोगान्यथेप्सितान् ॥
भोगे भुक्ते पुनर्याति कामनावशतो जनः
puruṣārthasamāvāptyai yatanīyaṃ manīṣibhiḥ ||
mānasodbhedane tīrthe nāpetyatreti me matiḥ
||59||पुरुषार्थसमावाप्त्यै यतनीयं मनीषिभिः ॥
मानसोद्भेदने तीर्थे नापेत्यत्रेति मे मतिः
mānasodbhedanātpratyagdiśi sarvamanoharam ||
vasudhāreti vikhyātaṃ tīrthaṃ trailokyadurlabham
||60||मानसोद्भेदनात्प्रत्यग्दिशि सर्वमनोहरम् ॥
वसुधारेति विख्यातं तीर्थं त्रैलोक्यदुर्लभम्
trilokyāṃ sarvatīrthebhyaḥ śreṣṭho badarikāśramaḥ ||
śrutvā tannāradātsarve vasavaḥ samupāgatāḥ
||61||त्रिलोक्यां सर्वतीर्थेभ्यः श्रेष्ठो बदरिकाश्रमः ॥
श्रुत्वा तन्नारदात्सर्वे वसवः समुपागताः
triṃśadvarṣasahasrāṇi tapaḥ paramadāruṇam ||
dalāṃbuprāśanāścakrustataḥ siddhimupāyayuḥ
||62||त्रिंशद्वर्षसहस्राणि तपः परमदारुणम् ॥
दलांबुप्राशनाश्चक्रुस्ततः सिद्धिमुपाययुः
bhagavaddarśanātprāptānaṃdanirvṛttaviklamāḥ ||
hṛdayānandasaṃdohapraphullitamukhāṃbujāḥ
||63||भगवद्दर्शनात्प्राप्तानंदनिर्वृत्तविक्लमाः ॥
हृदयानन्दसंदोहप्रफुल्लितमुखांबुजाः
dṛṣṭvā nārāyaṇaṃ devaṃ varaṃ labdhvā manoramam ||
haribhaktisukhaiśvaryyaṃ paraṃ labdhvā mudaṃ yayuḥ
||64||दृष्ट्वा नारायणं देवं वरं लब्ध्वा मनोरमम् ॥
हरिभक्तिसुखैश्वर्य्यं परं लब्ध्वा मुदं ययुः
atra snātvā jalaṃ pītvā pūjayitvā janārddanam ||
iha loke sukhaṃ bhuktvā yātyaṃte paramaṃ padam
||65||अत्र स्नात्वा जलं पीत्वा पूजयित्वा जनार्द्दनम् ॥
इह लोके सुखं भुक्त्वा यात्यंते परमं पदम्
atra puṇyavatāṃ jyotirdṛśyate jalamadhyataḥ ||
yaddṛṣṭvā na punarbhūyo garbhavāsaṃ prapadyate
||66||अत्र पुण्यवतां ज्योतिर्दृश्यते जलमध्यतः ॥
यद्दृष्ट्वा न पुनर्भूयो गर्भवासं प्रपद्यते
ye'śuddhapitṛjāḥ pāpāḥ pāṣaṃḍamativṛttayaḥ ||
na teṣāṃ śirasi prāyaḥ pataṃtyāpaḥ kadācana
||67||येऽशुद्धपितृजाः पापाः पाषंडमतिवृत्तयः ॥
न तेषां शिरसि प्रायः पतंत्यापः कदाचन
dinatrayaṃ śucirbhūtvā pūjayitvā janārdanam ||
upoṣya bhagavadbhaktyā siddhānpaśyaṃti sādhavaḥ
||68||दिनत्रयं शुचिर्भूत्वा पूजयित्वा जनार्दनम् ॥
उपोष्य भगवद्भक्त्या सिद्धान्पश्यंति साधवः
ye tatra capalāstathyaṃ na vadaṃti ca lolupāḥ ||
parihāsaparadravyaparastrīkapaṭāgrahāḥ
||69||ये तत्र चपलास्तथ्यं न वदंति च लोलुपाः ॥
परिहासपरद्रव्यपरस्त्रीकपटाग्रहाः
malacailāvṛtā'śāṃtā'śucayastyaktasatkriyāḥ ||
teṣāṃ malinacittānāṃ phalamatra na jāyate
||70||मलचैलावृताऽशांताऽशुचयस्त्यक्तसत्क्रियाः ॥
तेषां मलिनचित्तानां फलमत्र न जायते
ye tatra sādhakāḥ śāṃtā viralā vidhivartmagāḥ ||
teṣāṃ japastapohomo dānavratajapakriyāḥ
||71||ये तत्र साधकाः शांता विरला विधिवर्त्मगाः ॥
तेषां जपस्तपोहोमो दानव्रतजपक्रियाः
kriyamāṇā yathāśaktyā hyakṣayyaphaladāyakāḥ
||72||क्रियमाणा यथाशक्त्या ह्यक्षय्यफलदायकाः
yatkiṃcicchubhakarmāṇi kriyamāṇāni dehinām ||
mahadādiphalaṃ dadyurniḥśreyasamanuttamam
||73||यत्किंचिच्छुभकर्माणि क्रियमाणानि देहिनाम् ॥
महदादिफलं दद्युर्निःश्रेयसमनुत्तमम्
śrāvaṇīyamiha kiṃ phalādhikaṃ yatra yāṃti vibudhāḥ phalārthinaḥ ||
pūjitādanu hareḥ priyārthinaḥ svargamārganiratāḥ pramodinaḥ
||74||श्रावणीयमिह किं फलाधिकं यत्र यांति विबुधाः फलार्थिनः ॥
पूजितादनु हरेः प्रियार्थिनः स्वर्गमार्गनिरताः प्रमोदिनः
yatra saṃti na ca vighnakāriṇaḥ karmaṇāṃ haribhayātsusidhyati ||
nirviśaṃti ca phalaṃ vivekinaḥ karmamārganiratāḥ sudehinaḥ
||75||यत्र संति न च विघ्नकारिणः कर्मणां हरिभयात्सुसिध्यति ॥
निर्विशंति च फलं विवेकिनः कर्ममार्गनिरताः सुदेहिनः
ye paṭhaṃtyatha ca pāṭhayaṃtyaho puṇyatīrthaviṣayaṃ prakāśitam ||
bhaktibhāvasamalaṃkṛtāśca te saṃprayānti harimaṃdiraṃ śubham
||76||ये पठंत्यथ च पाठयंत्यहो पुण्यतीर्थविषयं प्रकाशितम् ॥
भक्तिभावसमलंकृताश्च ते संप्रयान्ति हरिमंदिरं शुभम्
iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe badarikāśramamāhātmye śivakārttikeyasaṃvāde vasudhārātīrthamāhātmyavarṇanaṃnāma ṣaṣṭho'dhyāyaḥ || 6 ||
śiva uvāca