rudragītam
maitreya uvāca
(anuṣṭup) vijitāśvo'dhirājāsīt pṛthuputraḥ pṛthuśravāḥ .
yavīyobhyo'dadātkāṣṭhā bhrātṛbhyo bhrātṛvatsalaḥ
||1||(अनुष्टुप्) विजिताश्वोऽधिराजासीत् पृथुपुत्रः पृथुश्रवाः ।
यवीयोभ्योऽददात्काष्ठा भ्रातृभ्यो भ्रातृवत्सलः
haryakṣāyādiśatprācīṃ dhūmrakeśāya dakṣiṇām .
pratīcīṃ vṛkasaṃjñāya turyāṃ draviṇase vibhuḥ
||2||हर्यक्षायादिशत्प्राचीं धूम्रकेशाय दक्षिणाम् ।
प्रतीचीं वृकसंज्ञाय तुर्यां द्रविणसे विभुः
antardhānagatiṃ śakrāt labdhvāntardhānasaṃjñitaḥ .
apatyatrayamādhatta śikhaṇḍinyāṃ susammatam
||3||अन्तर्धानगतिं शक्रात् लब्ध्वान्तर्धानसंज्ञितः ।
अपत्यत्रयमाधत्त शिखण्डिन्यां सुसम्मतम्
pāvakaḥ pavamānaśca śucirityagnayaḥ purā .
vasiṣṭhaśāpāt utpannāḥ punaryogagatiṃ gatāḥ
||4||पावकः पवमानश्च शुचिरित्यग्नयः पुरा ।
वसिष्ठशापात् उत्पन्नाः पुनर्योगगतिं गताः
antardhāno nabhasvatyāṃ havirdhānamavindata .
ya indraṃ aśvahartāraṃ vidvānapi na jaghnivān
||5||अन्तर्धानो नभस्वत्यां हविर्धानमविन्दत ।
य इन्द्रं अश्वहर्तारं विद्वानपि न जघ्निवान्
rājñāṃ vṛttiṃ karādāna daṇḍaśulkādidāruṇām .
manyamāno dīrghasatra vyājena visasarja ha
||6||राज्ञां वृत्तिं करादान दण्डशुल्कादिदारुणाम् ।
मन्यमानो दीर्घसत्र व्याजेन विससर्ज ह
tatrāpi haṃsaṃ puruṣaṃ paramātmānamātmadṛk .
yajan tallokatāmāpa kuśalena samādhinā
||7||तत्रापि हंसं पुरुषं परमात्मानमात्मदृक् ।
यजन् तल्लोकतामाप कुशलेन समाधिना
havirdhānād havirdhānī vidurāsūta ṣaṭ sutān .
barhiṣadaṃ gayaṃ śuklaṃ kṛṣṇaṃ satyaṃ jitavratam
||8||हविर्धानाद् हविर्धानी विदुरासूत षट् सुतान् ।
बर्हिषदं गयं शुक्लं कृष्णं सत्यं जितव्रतम्
barhiṣat sumahābhāgo hāvirdhāniḥ prajāpatiḥ .
kriyākāṇḍeṣu niṣṇāto yogeṣu ca kurūdvaha
||9||बर्हिषत् सुमहाभागो हाविर्धानिः प्रजापतिः ।
क्रियाकाण्डेषु निष्णातो योगेषु च कुरूद्वह
yasyedaṃ devayajanaṃ anu yajñaṃ vitanvataḥ .
prācīnāgraiḥ kuśairāsīd āstṛtaṃ vasudhātalam
||10||यस्येदं देवयजनं अनु यज्ञं वितन्वतः ।
प्राचीनाग्रैः कुशैरासीद् आस्तृतं वसुधातलम्
sāmudrīṃ devadevoktāṃ upayeme śatadrutim .
yāṃ vīkṣya cārusarvāṅgīṃ kiśorīṃ suṣṭhvalaṅkṛtām
||11||सामुद्रीं देवदेवोक्तां उपयेमे शतद्रुतिम् ।
यां वीक्ष्य चारुसर्वाङ्गीं किशोरीं सुष्ठ्वलङ्कृताम्
parikramantīṃ udvāhe cakame'gniḥ śukīmiva
||11||परिक्रमन्तीं उद्वाहे चकमेऽग्निः शुकीमिव
vibudhāsuragandharva munisiddhanaroragāḥ .
vijitāḥ sūryayā dikṣu kvaṇayantyaiva nūpuraiḥ
||12||विबुधासुरगन्धर्व मुनिसिद्धनरोरगाः ।
विजिताः सूर्यया दिक्षु क्वणयन्त्यैव नूपुरैः
prācīnabarhiṣaḥ putrāḥ śatadrutyāṃ daśābhavan .
tulyanāmavratāḥ sarve dharmasnātāḥ pracetasaḥ
||13||प्राचीनबर्हिषः पुत्राः शतद्रुत्यां दशाभवन् ।
तुल्यनामव्रताः सर्वे धर्मस्नाताः प्रचेतसः
pitrā''diṣṭāḥ prajāsarge tapase'rṇavamāviśan .
daśavarṣasahasrāṇi tapasā''rcan tapaspatim
||14||पित्राऽऽदिष्टाः प्रजासर्गे तपसेऽर्णवमाविशन् ।
दशवर्षसहस्राणि तपसाऽऽर्चन् तपस्पतिम्
yaduktaṃ pathi dṛṣṭena giriśena prasīdatā .
taddhyāyanto japantaśca pūjayantaśca saṃyatāḥ
||15||यदुक्तं पथि दृष्टेन गिरिशेन प्रसीदता ।
तद्ध्यायन्तो जपन्तश्च पूजयन्तश्च संयताः
vidura uvāca
pracetasāṃ giritreṇa yathā''sītpathi saṅgamaḥ .
yadutāha haraḥ prītaḥ tanno brahman vadārthavat
||16||प्रचेतसां गिरित्रेण यथाऽऽसीत्पथि सङ्गमः ।
यदुताह हरः प्रीतः तन्नो ब्रह्मन् वदार्थवत्
saṅgamaḥ khalu viprarṣe śiveneha śarīriṇām .
durlabho munayo dadhyuḥ asaṅgādyamabhīpsitam
||17||सङ्गमः खलु विप्रर्षे शिवेनेह शरीरिणाम् ।
दुर्लभो मुनयो दध्युः असङ्गाद्यमभीप्सितम्
ātmārāmo'pi yastvasya lokakalpasya rādhase .
śaktyā yukto vicarati ghorayā bhagavān bhavaḥ
||18||आत्मारामोऽपि यस्त्वस्य लोककल्पस्य राधसे ।
शक्त्या युक्तो विचरति घोरया भगवान् भवः
maitreya uvāca
pracetasaḥ piturvākyaṃ śirasā''dāya sādhavaḥ .
diśaṃ pratīcīṃ prayayuḥ tapasyādṛtacetasaḥ
||19||प्रचेतसः पितुर्वाक्यं शिरसाऽऽदाय साधवः ।
दिशं प्रतीचीं प्रययुः तपस्यादृतचेतसः
sasamudraṃ upa vistīrṇaṃ apaśyan sumahatsaraḥ .
mahanmana iva svacchaṃ prasannasalilāśayam
||20||ससमुद्रं उप विस्तीर्णं अपश्यन् सुमहत्सरः ।
महन्मन इव स्वच्छं प्रसन्नसलिलाशयम्
nīlaraktotpalāmbhoja kahlārendīvarākaram .
haṃsasārasacakrāhva kāraṇḍavanikūjitam
||21||नीलरक्तोत्पलाम्भोज कह्लारेन्दीवराकरम् ।
हंससारसचक्राह्व कारण्डवनिकूजितम्
mattabhramarasausvarya hṛṣṭaromalatāṅghripam .
padmakośarajo dikṣu vikṣipatpavanotsavam
||22||मत्तभ्रमरसौस्वर्य हृष्टरोमलताङ्घ्रिपम् ।
पद्मकोशरजो दिक्षु विक्षिपत्पवनोत्सवम्
tatra gāndharvamākarṇya divyamārgamanoharam .
visismyū rājaputrāste mṛdaṅgapaṇavādyanu
||23||तत्र गान्धर्वमाकर्ण्य दिव्यमार्गमनोहरम् ।
विसिस्म्यू राजपुत्रास्ते मृदङ्गपणवाद्यनु
tarhyeva sarasastasmān niṣkrāmantaṃ sahānugam .
upagīyamānamamara pravaraṃ vibudhānugaiḥ
||24||तर्ह्येव सरसस्तस्मान् निष्क्रामन्तं सहानुगम् ।
उपगीयमानममर प्रवरं विबुधानुगैः
taptahemanikāyābhaṃ śitikaṇṭhaṃ trilocanam .
prasādasumukhaṃ vīkṣya praṇemurjātakautukāḥ
||25||तप्तहेमनिकायाभं शितिकण्ठं त्रिलोचनम् ।
प्रसादसुमुखं वीक्ष्य प्रणेमुर्जातकौतुकाः
sa tānprapannārtiharo bhagavān dharmavatsalaḥ .
dharmajñān śīlasampannān prītaḥ prītānuvāca ha
||26||स तान्प्रपन्नार्तिहरो भगवान् धर्मवत्सलः ।
धर्मज्ञान् शीलसम्पन्नान् प्रीतः प्रीतानुवाच ह
śrīrudra uvāca
yūyaṃ vediṣadaḥ putrā viditaṃ vaścikīrṣitam .
anugrahāya bhadraṃ va evaṃ me darśanaṃ kṛtam
||27||यूयं वेदिषदः पुत्रा विदितं वश्चिकीर्षितम् ।
अनुग्रहाय भद्रं व एवं मे दर्शनं कृतम्
yaḥ paraṃ raṃhasaḥ sākṣāt triguṇāt jīvasaṃjñitāt .
bhagavantaṃ vāsudevaṃ prapannaḥ sa priyo hi me
||28||यः परं रंहसः साक्षात् त्रिगुणात् जीवसंज्ञितात् ।
भगवन्तं वासुदेवं प्रपन्नः स प्रियो हि मे
svadharmaniṣṭhaḥ śatajanmabhiḥ pumān viriñcatāmeti tataḥ paraṃ hi mām .
avyākṛtaṃ bhāgavato'tha vaiṣṇavaṃ padaṃ yathāhaṃ vibudhāḥ kalātyaye
||29||स्वधर्मनिष्ठः शतजन्मभिः पुमान् विरिञ्चतामेति ततः परं हि माम् ।
अव्याकृतं भागवतोऽथ वैष्णवं पदं यथाहं विबुधाः कलात्यये
(anuṣṭup) atha bhāgavatā yūyaṃ priyāḥ stha bhagavān yathā .
na madbhāgavatānāṃ ca preyānanyo'sti karhicit
||30||(अनुष्टुप्) अथ भागवता यूयं प्रियाः स्थ भगवान् यथा ।
न मद्भागवतानां च प्रेयानन्योऽस्ति कर्हिचित्
idaṃ viviktaṃ japtavyaṃ pavitraṃ maṅgalaṃ param .
niḥśreyasakaraṃ cāpi śrūyatāṃ tadvadāmi vaḥ
||31||इदं विविक्तं जप्तव्यं पवित्रं मङ्गलं परम् ।
निःश्रेयसकरं चापि श्रूयतां तद्वदामि वः
maitreya uvāca
ityanukrośahṛdayo bhagavānāha tāñchivaḥ .
baddhāñjalīnrājaputrān nārāyaṇaparo vacaḥ
||32||इत्यनुक्रोशहृदयो भगवानाह ताञ्छिवः ।
बद्धाञ्जलीन्राजपुत्रान् नारायणपरो वचः
śrīrudra uvāca
jitaṃ te ātmaviddhurya svastaye svastirastu me .
bhavatārādhasā rāddhaṃ sarvasmā ātmane namaḥ
||33||जितं ते आत्मविद्धुर्य स्वस्तये स्वस्तिरस्तु मे ।
भवताराधसा राद्धं सर्वस्मा आत्मने नमः
namaḥ paṅkajanābhāya bhūtasūkṣmendriyātmane .
vāsudevāya śāntāya kūṭasthāya svarociṣe
||34||नमः पङ्कजनाभाय भूतसूक्ष्मेन्द्रियात्मने ।
वासुदेवाय शान्ताय कूटस्थाय स्वरोचिषे
saṅkarṣaṇāya sūkṣmāya durantāyāntakāya ca .
namo viśvaprabodhāya pradyumnāyāntarātmane
||35||सङ्कर्षणाय सूक्ष्माय दुरन्तायान्तकाय च ।
नमो विश्वप्रबोधाय प्रद्युम्नायान्तरात्मने
namo namo'niruddhāya hṛṣīkeśendriyātmane .
namaḥ paramahaṃsāya pūrṇāya nibhṛtātmane
||36||नमो नमोऽनिरुद्धाय हृषीकेशेन्द्रियात्मने ।
नमः परमहंसाय पूर्णाय निभृतात्मने
svargāpavargadvārāya nityaṃ śuciṣade namaḥ .
namo hiraṇyavīryāya cāturhotrāya tantave
||37||स्वर्गापवर्गद्वाराय नित्यं शुचिषदे नमः ।
नमो हिरण्यवीर्याय चातुर्होत्राय तन्तवे
nama ūrja iṣe trayyāḥ pataye yajñaretase .
tṛptidāya ca jīvānāṃ namaḥ sarvarasātmane
||38||नम ऊर्ज इषे त्रय्याः पतये यज्ञरेतसे ।
तृप्तिदाय च जीवानां नमः सर्वरसात्मने
sarvasattvātmadehāya viśeṣāya sthavīyase .
namastrailokyapālāya saha ojobalāya ca
||39||सर्वसत्त्वात्मदेहाय विशेषाय स्थवीयसे ।
नमस्त्रैलोक्यपालाय सह ओजोबलाय च
arthaliṅgāya nabhase namo'ntarbahirātmane .
namaḥ puṇyāya lokāya amuṣmai bhūrivarcase
||40||अर्थलिङ्गाय नभसे नमोऽन्तर्बहिरात्मने ।
नमः पुण्याय लोकाय अमुष्मै भूरिवर्चसे
pravṛttāya nivṛttāya pitṛdevāya karmaṇe .
namo'dharmavipākāya mṛtyave duḥkhadāya ca
||41||प्रवृत्ताय निवृत्ताय पितृदेवाय कर्मणे ।
नमोऽधर्मविपाकाय मृत्यवे दुःखदाय च
namaste āśiṣāmīśa manave kāraṇātmane .
namo dharmāya bṛhate kṛṣṇāyākuṇṭhamedhase .
puruṣāya purāṇāya sāṅkhyayogeśvarāya ca
||42||नमस्ते आशिषामीश मनवे कारणात्मने ।
नमो धर्माय बृहते कृष्णायाकुण्ठमेधसे ।
पुरुषाय पुराणाय साङ्ख्ययोगेश्वराय च
śaktitrayasametāya mīḍhuṣe'haṅkṛtātmane .
cetaākūtirūpāya namo vāco vibhūtaye
||43||शक्तित्रयसमेताय मीढुषेऽहङ्कृतात्मने ।
चेतआकूतिरूपाय नमो वाचो विभूतये
darśanaṃ no didṛkṣūṇāṃ dehi bhāgavatārcitam .
rūpaṃ priyatamaṃ svānāṃ sarvendriyaguṇāñjanam
||44||दर्शनं नो दिदृक्षूणां देहि भागवतार्चितम् ।
रूपं प्रियतमं स्वानां सर्वेन्द्रियगुणाञ्जनम्
snigdhaprāvṛḍghanaśyāmaṃ sarvasaundaryasaṅgraham .
cārvāyatacaturbāhuṃ sujātarucirānanam
||45||स्निग्धप्रावृड्घनश्यामं सर्वसौन्दर्यसङ्ग्रहम् ।
चार्वायतचतुर्बाहुं सुजातरुचिराननम्
padmakośapalāśākṣaṃ sundarabhru sunāsikam .
sudvijaṃ sukapolāsyaṃ samakarṇavibhūṣaṇam
||46||पद्मकोशपलाशाक्षं सुन्दरभ्रु सुनासिकम् ।
सुद्विजं सुकपोलास्यं समकर्णविभूषणम्
prītiprahasitāpāṅgaṃ alakai rūpaśobhitam .
lasatpaṅkajakiñjalka dukūlaṃ mṛṣṭakuṇḍalam
||47||प्रीतिप्रहसितापाङ्गं अलकै रूपशोभितम् ।
लसत्पङ्कजकिञ्जल्क दुकूलं मृष्टकुण्डलम्
sphuratkirīṭavalaya hāranūpuramekhalam .
śaṅkhacakragadāpadma mālāmaṇyuttamarddhimat
||48||स्फुरत्किरीटवलय हारनूपुरमेखलम् ।
शङ्खचक्रगदापद्म मालामण्युत्तमर्द्धिमत्
siṃhaskandhatviṣo bibhrat saubhaga grīvakaustubham .
śriyānapāyinyā kṣipta nikaṣāśmorasollasat
||49||सिंहस्कन्धत्विषो बिभ्रत् सौभग ग्रीवकौस्तुभम् ।
श्रियानपायिन्या क्षिप्त निकषाश्मोरसोल्लसत्
pūrarecakasaṃvigna valivalgudalodaram .
pratisaṅkrāmayad viśvaṃ nābhyāvartagabhīrayā
||50||पूररेचकसंविग्न वलिवल्गुदलोदरम् ।
प्रतिसङ्क्रामयद् विश्वं नाभ्यावर्तगभीरया
śyāmaśroṇyadhirociṣṇu dukūlasvarṇamekhalam .
samacārvaṅghrijaṅghoru nimnajānusudarśanam
||51||श्यामश्रोण्यधिरोचिष्णु दुकूलस्वर्णमेखलम् ।
समचार्वङ्घ्रिजङ्घोरु निम्नजानुसुदर्शनम्
padā śaratpadmapalāśarociṣā nakhadyubhirno'ntaraghaṃ vidhunvatā .
pradarśaya svīyamapāstasādhvasaṃ padaṃ guro mārgagurustamojuṣām
||52||पदा शरत्पद्मपलाशरोचिषा नखद्युभिर्नोऽन्तरघं विधुन्वता ।
प्रदर्शय स्वीयमपास्तसाध्वसं पदं गुरो मार्गगुरुस्तमोजुषाम्
(anuṣṭup) etad rūpamanudhyeyaṃ ātmaśuddhimabhīpsatām .
yadbhaktiyogo'bhayadaḥ svadharmamanutiṣṭhatām
||53||(अनुष्टुप्) एतद् रूपमनुध्येयं आत्मशुद्धिमभीप्सताम् ।
यद्भक्तियोगोऽभयदः स्वधर्ममनुतिष्ठताम्
bhavān bhaktimatā labhyo durlabhaḥ sarvadehinām .
svārājyasyāpyabhimata ekāntenātmavidgatiḥ
||54||भवान् भक्तिमता लभ्यो दुर्लभः सर्वदेहिनाम् ।
स्वाराज्यस्याप्यभिमत एकान्तेनात्मविद्गतिः
taṃ durārādhyamārādhya satāmapi durāpayā .
ekāntabhaktyā ko vāñchet pādamūlaṃ vinā bahiḥ
||55||तं दुराराध्यमाराध्य सतामपि दुरापया ।
एकान्तभक्त्या को वाञ्छेत् पादमूलं विना बहिः
yatra nirviṣṭamaraṇaṃ kṛtānto nābhimanyate .
viśvaṃ vidhvaṃsayan vīrya śauryavisphūrjitabhruvā
||56||यत्र निर्विष्टमरणं कृतान्तो नाभिमन्यते ।
विश्वं विध्वंसयन् वीर्य शौर्यविस्फूर्जितभ्रुवा
kṣaṇārdhenāpi tulaye na svargaṃ nāpunarbhavam .
bhagavat saṅgisaṅgasya martyānāṃ kimutāśiṣaḥ
||57||क्षणार्धेनापि तुलये न स्वर्गं नापुनर्भवम् ।
भगवत् सङ्गिसङ्गस्य मर्त्यानां किमुताशिषः
athānaghāṅghrestava kīrtitīrthayoḥ antarbahiḥsnānavidhūtapāpmanām .
bhūteṣvanukrośasusattvaśīlināṃ syātsaṅgamo'nugraha eṣa nastava
||58||अथानघाङ्घ्रेस्तव कीर्तितीर्थयोः अन्तर्बहिःस्नानविधूतपाप्मनाम् ।
भूतेष्वनुक्रोशसुसत्त्वशीलिनां स्यात्सङ्गमोऽनुग्रह एष नस्तव
na yasya cittaṃ bahirarthavibhramaṃ tamoguhāyāṃ ca viśuddhamāviśat .
yadbhaktiyogānugṛhītamañjasā munirvicaṣṭe nanu tatra te gatim
||59||न यस्य चित्तं बहिरर्थविभ्रमं तमोगुहायां च विशुद्धमाविशत् ।
यद्भक्तियोगानुगृहीतमञ्जसा मुनिर्विचष्टे ननु तत्र ते गतिम्
(anuṣṭup) yatredaṃ vyajyate viśvaṃ viśvasmin avabhāti yat .
tattvaṃ brahma paraṃ jyotiḥ ākāśamiva vistṛtam
||60||(अनुष्टुप्) यत्रेदं व्यज्यते विश्वं विश्वस्मिन् अवभाति यत् ।
तत्त्वं ब्रह्म परं ज्योतिः आकाशमिव विस्तृतम्
yo māyayedaṃ pururūpayāsṛjad bibharti bhūyaḥ kṣapayatyavikriyaḥ .
yadbhedabuddhiḥ sadivātmaduḥsthayā tvamātmatantraṃ bhagavanpratīmahi
||61||यो माययेदं पुरुरूपयासृजद् बिभर्ति भूयः क्षपयत्यविक्रियः ।
यद्भेदबुद्धिः सदिवात्मदुःस्थया त्वमात्मतन्त्रं भगवन्प्रतीमहि
kriyākalāpairidameva yoginaḥ śraddhānvitāḥ sādhu yajanti siddhaye .
bhūtendriyāntaḥkaraṇopalakṣitaṃ vede ca tantre ca te eva kovidāḥ
||62||क्रियाकलापैरिदमेव योगिनः श्रद्धान्विताः साधु यजन्ति सिद्धये ।
भूतेन्द्रियान्तःकरणोपलक्षितं वेदे च तन्त्रे च ते एव कोविदाः
tvameka ādyaḥ puruṣaḥ suptaśaktiḥ tayā rajaḥsattvatamo vibhidyate .
mahānahaṃ khaṃ marudagnivārdharāḥ surarṣayo bhūtagaṇā idaṃ yataḥ
||63||त्वमेक आद्यः पुरुषः सुप्तशक्तिः तया रजःसत्त्वतमो विभिद्यते ।
महानहं खं मरुदग्निवार्धराः सुरर्षयो भूतगणा इदं यतः
sṛṣṭaṃ svaśaktyedamanupraviṣṭaḥ caturvidhaṃ puramātmāṃśakena .
atho vidustaṃ puruṣaṃ santamantaḥ bhuṅkte hṛṣīkairmadhu sāraghaṃ yaḥ
||64||सृष्टं स्वशक्त्येदमनुप्रविष्टः चतुर्विधं पुरमात्मांशकेन ।
अथो विदुस्तं पुरुषं सन्तमन्तः भुङ्क्ते हृषीकैर्मधु सारघं यः
sa eṣa lokānaticaṇḍavego vikarṣasi tvaṃ khalu kālayānaḥ .
bhūtāni bhūtairanumeyatattvo ghanāvalīrvāyurivāviṣahyaḥ
||65||स एष लोकानतिचण्डवेगो विकर्षसि त्वं खलु कालयानः ।
भूतानि भूतैरनुमेयतत्त्वो घनावलीर्वायुरिवाविषह्यः
pramattamuccairiti kṛtyacintayā pravṛddhalobhaṃ viṣayeṣu lālasam .
tvamapramattaḥ sahasābhipadyase kṣullelihāno'hirivākhumantakaḥ
||66||प्रमत्तमुच्चैरिति कृत्यचिन्तया प्रवृद्धलोभं विषयेषु लालसम् ।
त्वमप्रमत्तः सहसाभिपद्यसे क्षुल्लेलिहानोऽहिरिवाखुमन्तकः
kastvatpadābjaṃ vijahāti paṇḍito yaste'vamānavyayamānaketanaḥ .
viśaṅkayāsmadgururarcati sma yad vinopapattiṃ manavaścaturdaśa
||67||कस्त्वत्पदाब्जं विजहाति पण्डितो यस्तेऽवमानव्ययमानकेतनः ।
विशङ्कयास्मद्गुरुरर्चति स्म यद् विनोपपत्तिं मनवश्चतुर्दश
(anuṣṭup) atha tvamasi no brahman paramātman vipaścitām .
viśvaṃ rudrabhayadhvastaṃ akutaścidbhayā gatiḥ
||68||(अनुष्टुप्) अथ त्वमसि नो ब्रह्मन् परमात्मन् विपश्चिताम् ।
विश्वं रुद्रभयध्वस्तं अकुतश्चिद्भया गतिः
idaṃ japata bhadraṃ vo viśuddhā nṛpanandanāḥ .
svadharmamanutiṣṭhanto bhagavati arpitāśayāḥ
||69||इदं जपत भद्रं वो विशुद्धा नृपनन्दनाः ।
स्वधर्ममनुतिष्ठन्तो भगवति अर्पिताशयाः
tamevātmānamātmasthaṃ sarvabhūteṣvavasthitam .
pūjayadhvaṃ gṛṇantaśca dhyāyantaścāsakṛddharim
||70||तमेवात्मानमात्मस्थं सर्वभूतेष्ववस्थितम् ।
पूजयध्वं गृणन्तश्च ध्यायन्तश्चासकृद्धरिम्
yogādeśamupāsādya dhārayanto munivratāḥ .
samāhitadhiyaḥ sarva etadabhyasatādṛtāḥ
||71||योगादेशमुपासाद्य धारयन्तो मुनिव्रताः ।
समाहितधियः सर्व एतदभ्यसतादृताः
idamāha purāsmākaṃ bhagavānviśvasṛkpatiḥ .
bhṛgvādīnāṃ ātmajānāṃ sisṛkṣuḥ saṃsisṛkṣatām
||72||इदमाह पुरास्माकं भगवान्विश्वसृक्पतिः ।
भृग्वादीनां आत्मजानां सिसृक्षुः संसिसृक्षताम्
te vayaṃ noditāḥ sarve prajāsarge prajeśvarāḥ .
anena dhvastatamasaḥ sisṛkṣmo vividhāḥ prajāḥ
||73||ते वयं नोदिताः सर्वे प्रजासर्गे प्रजेश्वराः ।
अनेन ध्वस्ततमसः सिसृक्ष्मो विविधाः प्रजाः
athedaṃ nityadā yukto japan avahitaḥ pumān .
acirāt śreya āpnoti vāsudevaparāyaṇaḥ
||74||अथेदं नित्यदा युक्तो जपन् अवहितः पुमान् ।
अचिरात् श्रेय आप्नोति वासुदेवपरायणः
śreyasāmiha sarveṣāṃ jñānaṃ niḥśreyasaṃ param .
sukhaṃ tarati duṣpāraṃ jñānanaurvyasanārṇavam
||75||श्रेयसामिह सर्वेषां ज्ञानं निःश्रेयसं परम् ।
सुखं तरति दुष्पारं ज्ञाननौर्व्यसनार्णवम्
ya imaṃ śraddhayā yukto madgītaṃ bhagavatstavam .
adhīyāno durārādhyaṃ hariṃ ārādhayatyasau
||76||य इमं श्रद्धया युक्तो मद्गीतं भगवत्स्तवम् ।
अधीयानो दुराराध्यं हरिं आराधयत्यसौ
vindate puruṣo'muṣmād yadyad icchatyasatvaram .
madgītagītātsuprītāt śreyasāmekavallabhāt
||77||विन्दते पुरुषोऽमुष्माद् यद्यद् इच्छत्यसत्वरम् ।
मद्गीतगीतात्सुप्रीतात् श्रेयसामेकवल्लभात्
idaṃ yaḥ kalya utthāya prāñjaliḥ śraddhayānvitaḥ .
śṛṇuyāt śrāvayenmartyo mucyate karmabandhanaiḥ
||78||इदं यः कल्य उत्थाय प्राञ्जलिः श्रद्धयान्वितः ।
शृणुयात् श्रावयेन्मर्त्यो मुच्यते कर्मबन्धनैः
gītaṃ mayedaṃ naradevanandanāḥ parasya puṃsaḥ paramātmanaḥ stavam .
japanta ekāgradhiyastapo mahat caradhvamante tata āpsyathepsitam
||79||गीतं मयेदं नरदेवनन्दनाः परस्य पुंसः परमात्मनः स्तवम् ।
जपन्त एकाग्रधियस्तपो महत् चरध्वमन्ते तत आप्स्यथेप्सितम्
iti śrīmadbhāgavate mahāpurāṇe pāramahaṃsyāṃ saṃhitāyāṃ caturthaskandhe rudragītaṃ nāma caturviṃśo'dhyāyaḥ .. 24 ..