prathamakāṇḍe dvitīyaḥ prapāṭhakaḥ
prathamakāṇḍe dvitīyaḥ prapāṭhakaḥ
tasya te pavitrapate pavitreṇa yasmai kaṃ pune tañ śakeyam
||1.2.1||ākūtyai prayuje agnaye svāhā medhāyai manase agnaye svāhā dīkṣāyai tapase agnaye svāhā sarasvatyai pūṣṇe agnaye svāhā ||
āpo devīr bṛhatīr viśvaśambhuvo dyāvāpṛthivī uro antarikṣa |
bṛhaspatir no haviṣā vṛdhātu || svāhā ||
viśvo devasya netur marto vurīta sakhyam |
viśvo rāya iṣudhyati dyumnaṃ vṛṇīta puṣyase || svāhā ||
ṛksāmayoḥ śilpe sthas te vām ārabha ā modṛcaḥ pātaṃ viṣṇoḥ śarmāsi śarma me yacha namas te astu mā mā hiṃsīḥ ||
imāṃ dhiyaṃ śikṣamāṇasya deva kratuṃ dakṣaṃ varuṇa saṃśiśādhi |
yayāti viśvā duritā tarema sutarmāṇam adhi nāvaṃ ruheyam ||
sūryāgnī dyāvāpṛthivī uro antarikṣāpa oṣadhayā upa mā dīkṣāyāṃ dīkṣāpatayo hvayadhvaṃ deva savitas tvaṃ dīkṣāyā dīkṣāpatir asītthaṃ mā santaṃ pāhy ūrg asy āṅgirasy ūrṇamradā ūrjaṃ mayi dhehīndrasya yonir asi gopāya mā namas te astu mā mā hiṃsīḥ ||
kṛṣiṃ susasyām utkṛṣe supippalā oṣadhīs kṛdhi |
viṣāṇe viṣyaitaṃ granthiṃ yad asya guṣpitaṃ hṛdi mano yad asya guṣpitam ||
bṛhann asi vānaspatyaḥ sudyumno dyumnaṃ yajamānāya dhehi nakṣatrāṇāṃ mātīkāśāt pāhi ||
ā vo devāsa īmahe vāmaṃ prayaty adhvare |
yad vo devāsa āguri yajñiyāso havāmahe ||
svāhā yajñaṃ manasaḥ svāhā divaḥ svāhā pṛthivyāḥ svāhoror antarikṣāt svāhā vātāt parigṛhṇāmi svāhā
||1.2.2||nakṣatrāṇāṃ sakāśān mā yauṣaṃ vrataṃ carata ||
daivīṃ dhiyaṃ manāmahe sumṛḍīkām abhiṣṭaye |
varcodhāṃ yajñavāhasaṃ sutīrthā no asad vaśe ||
ye devā manujātā manoyujaḥ sudakṣā dakṣapitaras te no 'vantu te naḥ pāntu tebhyaḥ svāhā ||
śivāḥ pītā bhavata yūyam āpo asmākaṃ yonā udare suśevāḥ |
irāvatīr anamīvā anāgasaḥ śivā no bhavata jīvase ||
kāmo haviṣāṃ mandiṣṭho 'gne tvaṃ su jāgṛhi vayaṃ su mandiṣīmahi |
gopāya naḥ svastaye prabudhe naḥ punas kṛdhi ||
punar manaḥ punar āyur nā āgāt punaḥ prāṇaḥ punar ākūtam āgāt |
vaiśvānaro 'dabdhas tanūpā apabādhatāṃ duritāni viśvā ||
tvam agne vratapā asi deva ā martyeṣv ā |
tvaṃ yajñeṣv īḍyo vratam asmāsu dhāraya ||
pūṣā sanīnāṃ somo rādhasāṃ mā pṛṇan pūrtyā virādhiṣṭa mā vayam āyuṣā varcasā ca rāsveyat somā bhūyo bhara devaḥ savitā vasor vasudāvā vāyur gopās tvaṣṭādhipatiḥ puṣā pratigrahītā devīr āpo apāṃ napād ya ūrmir haviṣya indriyāvān madintamas taṃ vo mā kramiṣaṃ yāḥ paśūnām ṛṣabhe vācas tāḥ sūryo agre śukro agre tāḥ prahiṇomi yathābhāgaṃ vo atra śivā naḥ punar āyantu vāco vāyave tvā varuṇāya tvā rudrāya tvā nirṛtyai tvendrāya tvā marudbhyas tvā
||1.2.3||iyaṃ te śukra tanūr idaṃ varcas tayā sambhava bhrājaṃ gacha jūr asi dhṛtā manasā juṣṭā viṣṇave tasyās te satyasavasaḥ prasave tanvo yantram aśīya svāhā śukram asi candram asy amṛtam asi vaiśvadevam asi cid asi manāsi dhīr asi dakṣiṇāsi yajñiyāsi kṣatriyāsy aditir asy ubhayataḥśīrṣṇī sā naḥ suprācī supratīcī bhava mitras tvā padi badhnātu pūṣādhvanaḥ pātv indrāyādhyakṣāyānu tvā mātā manyatām anu pitānu bhrātā sagarbhyo 'nu sakhā sayūthyaḥ sā devi devam achehīndrāya somaṃ rudras tvāvartayatu svasti somasakhā punar ehi vasvy asi rudrāsy aditir asy ādityāsi candrāsi rudrāsi bṛhaspatiṣ ṭvā sumne ramṇātu rudro vasubhir ācake pṛthivyās tvā mūrdhann ājigharmi yajñiyā iḍāyās pade ghṛtavati svāhāsme ramasvāsme te rāyas tava rāyas tavatava rāyo mā rāyaspoṣeṇa viyauṣma tvaṣṭrimantas tvā sapema
||1.2.4||sūryasya cakṣur āruham agner akṣṇaḥ kanīnikām |
yad etaśebhir īyase bhrājamāno vipaścitā ||
api panthām aganmahi svastigām anehasam |
yena viśvāḥ pari dviṣo vṛṇakti vindate vasu ||
āsmāko 'si śukras te grahaḥ svāhā tvā vicidbhyaḥ ||
abhi tyaṃ devaṃ savitāramoṇyoḥ kavikratum arcāmi satyasavasaṃ ratnadhām abhi priyaṃ matim |
ūrdhvā yasyāmatir bhā adidyutat savīmani hiraṇyapāṇir amimīta sukratuḥ kṛpā svaḥ ||
prajābhyas tvā prajās tvānuprāṇantu prajāḥ pāhi śukraṃ te śukra śukreṇa candraṃ candreṇāmṛtam amṛtena krīṇāmi deva soma śakma yat te gor asme te candrāṇi tapasas tanūr asi prajāpater varṇaḥ sahasrapoṣaṃ puṣyantī parameṇa paśunā krīyasvāsme te bandhuḥ suvāṅ nabhrāḍ aṅghāre bambhāre 'star ahasta kṛśāna ete vaḥ somakrayaṇās tān rakṣadhvaṃ mā vo dabhan duścakṣā vo māvakśat
||1.2.5||somakrayaṇās : fn correcturen und conjecturen zu dem ganzen Werk|
svajā asi svabhūr asy asme karmaṇe jāta ṛtena tvā gṛhṇāmy ṛtena naḥ pāhi mitro nā ehi sumitradhaḥ saha rāyaspoṣeṇendrasyorum āviśa dakṣiṇam uśann uśantaṃ syonaḥ syonam ||
ud āyuṣā svāyuṣod oṣadhīnāṃ rasena |
ut parjanyasya dhāmnodasthām amṛtaṃ anu ||
urv antarikṣaṃ vīhy adityāḥ sadā āsīda ||
astabhnād dyām ṛṣabho antarikṣam amimīta varimāṇaṃ pṛthivyāḥ |
āsīdad viśvā bhuvanāni samrāḍ viśvet tāni varuṇasya vratāni ||
vaneṣu vy antarikṣaṃ tatāna vājam arvatsu payo aghnyāsu |
hṛtsu kratuṃ varuṇaṃ dikṣv agniṃ divi sūryam adadhāt somam adrau ||
dhūr asi dhvara dhvarantaṃ yo asmān dhvarād yaṃ vayaṃ dhvarāma taṃ dhvara ||
vāruṇam asi varuṇas tvottabhnātu varuṇasya skambho 'si ||
pracyavasva bhuvanaspate viśvāny abhi dhāmāni |
mā tvā paripariṇo mā paripanthino mā tvā vṛkā aghāyavo vidan ||
śyeno bhūtvā parāpata yajamānasya no gṛhe saṃskṛtam |
devebhyaḥ sutyāyai ||
namo mitrasya varuṇasya cakṣase maho devāya tad ṛtaṃ saparyata |
dūredṛśe devajātāya ketave divas putrāya sūryāya śaṃsata ||
vāruṇam asi varuṇas tvottabhnātu varuṇasya skambhasarjanam asi ||
vicṛtto varuṇasya pāśaḥ pratyasto varuṇasya pāśo namo varuṇasya pāśāyāgnes tanūr asi viṣṇave tvā somasya tanūr asi viṣṇave tvātither ātithyam asi viṣṇave tvāgnaye tvā rāyaspoṣade viṣṇave tvā śyenāya tvā somabhṛte viṣṇave tvā vāruṇam asi varuṇo 'si dhṛtavrato varuṇasya ṛtasadanam āsīda varuṇāya tvā
||1.2.6||agner janitram asi vṛṣaṇau stha urvaśy asy āyur asi purūravā asi gāyatram asi triṣṭub asi jagad asi ||
bhavataṃ naḥ samanasau samokasau sacetasā arepasau ||
mā yajñaṃ hiṃsiṣṭaṃ mā yajñapatiṃ jātavedasau śivau bhavatam adya naḥ ||
agnā agniś carati praviṣṭā ṛṣīṇāṃ putro adhirāja eṣaḥ ||
tasmai vidhema haviṣā vayaṃ mā devānāṃ yūyupāma bhāgadheyam ||
āpataye tvā gṛhṇāmi paripataye tvā gṛhṇāmi tanūnaptre śakmane śakvarāya śakmanā ojiṣṭhāyānādhṛṣṭam asy anādhṛṣyaṃ devānām ojaḥ || abhiśastipā anabhiśastenyam ||
anu ma idaṃ vrataṃ vratapatir manyatām anu dīkṣāṃ dīkṣāpatir añjasā satyam upāgāṃ suvite mā dhā agne vratapate yā mama tanūr eṣā sā tvayy agne vratapate yā tava tanūr iyaṃ sā mayi saha nau vratapate vratinor vratāny aṃśuraṃśuṣ ṭe deva somāpyāyatām indrāyaikadhanavida ā tvam indrāya pyāyasvā tubhyam indraḥ pyāyatām āpyāyaya sakhīnt sanyā medhayā svasti te deva soma sutyām aśīya svasty udṛcam eṣṭā rāyā eṣṭā vāmāni preṣe bhagāya ṛtam ṛtavādibhyo namo dive namaḥ pṛthivyai ||
yā te agne 'yāśayā tanūr varṣiṣṭhā gahenaṣṭhā |
tveṣaṃ vaco apāvadhīr ugraṃ vaco apāvadhīḥ || svāhā ||
yā te agne rajāśayā yā te agne harāśayā yā te agne rudriyā tanūs tayā naḥ pāhi tasyai te svāhā
||1.2.7||taptāyanī me 'si vittāyanī me 'sy avatān mā nāthitam avatād vyathitam agne aṅgiro yo 'syāṃ pṛthivyām adhy asy āyunā nāmnehi vasavas tvā harantu gāyatreṇa chandasā vitsva yajñapater yat te 'nādhṛṣṭaṃ dhāmānādhṛṣyaṃ tena tvādadhe 'gne aṅgiro yo dvitīyasyāṃ pṛthivyām adhy asy āyunā nāmnehi rudrās tvā harantu traiṣṭubhena chandasā vitsva yajñapater yat te 'nādhṛṣṭaṃ dhāmānādhṛṣyaṃ tena tvādadhe 'gne aṅgiro yas tṛtīyasyāṃ pṛthivyām adhy asy āyunā nāmnehy ādityās tvā harantu jāgatena chandasā vitsva yajñapater yat te 'nādhṛṣṭaṃ dhāmānādhṛṣyaṃ tena tvādadhe vider agne nabho nāma yat te siṃhīr asi mahiṣīr asi devebhyaḥ śundhasva devebhyaḥ śumbhasvendraghoṣās tvā purastād vasubhiḥ pāntu pitaras tvā manojavā dakṣiṇataḥ pāntu rudrās tvā pracetasaḥ paścāt pāntu viśvakarmā tvādityair uttarāt pātu siṃhīr asi sapatnasāhī svāhā siṃhīr asi rāyaspoṣavaniḥ svāhā siṃhīr asi suprajāvaniḥ svāhā siṃhīr asy ādityavaniḥ sajātavaniḥ svāhā siṃhīr asy āvaha devān devāyate yajamānāya svāhā bhūtebhyas tvā viśvāyur asi pṛthivīṃ dṛmha dhruvakṣitir asy antarikṣaṃ dṛṃhācyutakṣid asi divaṃ dṛṃhāgner bhasmāsy agneḥ purīṣam asy agneḥ kulāyam asi ||
vibhrāḍ bṛhat pibatu somyaṃ madhv āyur dadhad yajñapatā avihrutam |
vātajūto yo abhirakṣati tmanā prajāḥ piparti bahudhā virājati
||1.2.8||devaśrutau deveṣv āghoṣethām ||
yuñjate mana uta yuñjate dhiyo viprā viprasya bṛhato vipaścitaḥ |
vi hotrā dadhe vayunāvid ekā in mahī devasya savituḥ pariṣṭutiḥ ||
apa janyaṃ bhayaṃ nuda mā cakrā āvṛtsata |
gṛhaṃ somasya gachataṃ gachad indrasya niṣkṛtam ||
idaṃ viṣṇur vicakrame tredhā nidadhe padā |
samūḍham asya pāṃsure ||
irāvatī dhenumatī hi bhūtaṃ sūyavasinī manave yaśasye |
vyaṣkabhnā rodasī viṣṇa ete dādhartha pṛthivīm abhito mayūkhaiḥ ||
suvāg āvada deva duryaṃ ariṣyann ariṣyataḥ ||
ā no vīro jāyatāṃ karmaṇyo 'bhiśastipā anabhiśastenyaḥ |
yaṃ bahavo 'nujīvān yo bahūnām asad vaśī ||
vaiṣṇavam asi viṣṇus tvottabhnātu ||
divo viṣṇa uta vā pṛthivyā uror vā viṣṇo bṛhato antarikṣāt |
hastau pṛṇasva bahubhir vasavyair ā prayacha dakṣiṇād ota savyāt ||
viṣṇor nu kaṃ vīryāṇi pravocaṃ yaḥ pārthivāni vimame rajāṃsi |
yo askabhāyad uttaraṃ sadhasthaṃ vicakramāṇas tredhorugāyaḥ ||
viṣṇoḥ pṛṣṭham asi viṣṇo rarāṭam asi viṣṇoḥ śipre stho viṣṇoḥ syūr asi viṣṇor dhruvo 'si vaiṣṇavam asi viṣṇave tvā ||
pra tad viṣṇuḥ stavate vīryeṇa mṛgo na bhīmaḥ kucaro giriṣṭhāḥ |
yasyoruṣu triṣu vikramaṇeṣv adhikṣiyanti bhuvanāni viśvā
||1.2.9||devasya tvā savituḥ prasave 'śvinor bāhubhyāṃ pūṣṇo hastābhyām ādade 'bhrir asi nārir asīdam ahaṃ rakṣaso grīvā apikṛntāmīdam ahaṃ yo me samāno yo 'samāno 'rātīyati tasya grīvā apikṛntāmi bṛhann asi bṛhadrāyā bṛhatīm indrāya vācaṃ vada rakṣohaṇaṃ valagahanaṃ vaiṣṇavīṃ samrāḍ asi sapatnahedam ahaṃ tān valagān udvapāmi yān me samāno yān asamāno nicakhāna ye kulphadaghne nirasto valagaḥ svarāḍ asy abhimātihedam ahaṃ tān valagān udvapāmi yān me sajāto yān asajāto nicakhāna ye jānudaghne nirasto valago virāḍ asi rakṣohedam ahaṃ tān valagān udvapāmi yān me sabandhur yān asabandhur nicakhāna ye nābhidaghne nirasto valagaḥ satrarāḍ asy aśastihedam ahaṃ tān valagān udvapāmi yān me bhrātṛvyo yān abhrātṛvyo nicakhāna ye aṃsadaghne nirasto valagaḥ sarvarāḍ asy arātīyato hantedam ahaṃ tān valagān udvapāmi yān me sajanyo yān asajanyo nicakhāna ye śīrṣadaghne nirasto valagaḥ ||
sammṛśa imān āyuṣe varcase ca devānāṃ nidhir asi dveṣoyavanaḥ |
yuyodhy asmad dveṣāṃsi yāni kāni ca cakṛma ||
devānām idaṃ nihitaṃ yad asty athābhāhi pradiśaś catasraḥ |
kṛṇvāno anyaṃ adharānt sapatnān
||1.2.10||pṛthivyai tvāntarikṣāya tvā dive tvā śundhantāṃ lokāḥ pitṛṣadanā yavo 'si yavaya dveṣo asmad yavayārātiṃ pitṛṣadanaṃ tvā lokam avastṛṇāmi ||
uñśrayasva vanaspate sajūr devena barhiṣā |
nitānas tvā māruto nihantu mitrāvaruṇau dhruveṇa dharmaṇā ||
brahmavaniṃ tvā kṣatravaniṃ paryūhāmi brahma dṛmha kṣatraṃ dṛmha rāyaspoṣaṃ dṛmha prajāṃ dṛmha sajātān asmai yajamānāya dṛmha ||
ghṛtena dyāvāpṛthivī āpṛṇa viśvajanasya chāyāsi ||
pari tvā girvaṇo gira imā bhavantu viśvataḥ |
vṛddhāyum anu vṛddhayo juṣṭā bhavantu juṣṭayaḥ ||
indrāya tvendrasya syūr asīndrasya dhruvo 'sy aindram asīndrāya tvā rakṣoghno vo valagaghnaḥ prokṣāmi vaiṣṇavān rakṣohaṇaṃ tvā valagahanam avasiñcāmi vaiṣṇavaṃ rakṣohaṇaṃ tvā valagahanam avastṛṇāmi vaiṣṇavaṃ rakṣoghnī vāṃ valagaghnī upadadhāmi vaiṣṇavī rakṣoghnī vāṃ valagaghnī paryūhāmi vaiṣṇavī rakṣohaṇaṃ tvā valagahanam āstṛṇāmi vaiṣṇavam
||1.2.11||vibhūr asi pravāhaṇo vahnir asi havyavāhanaḥ śvātro 'si pracetās tutho 'si viśvavedā avasyur asi duvasvān aṅghārir asi bambhārir uśig asi kaviḥ śundhyur asi mārjālīyaḥ samrāḍ asi kṛśānuḥ pariṣadyo 'sy āstavyo nabho 'si pratakvāsammṛṣṭo 'si havyasūdanaḥ sagaro 'si viśvavedā ṛtadhāmāsi svarjyotiḥ samudro 'si viśvavyacā ajo 'sy ekapād ahir asi budhnyaḥ kavyo 'si kavyavāhano raudreṇānīkena pāhi māgne pipṛhi mā namas te astu mā mā hiṃsīḥ
||1.2.12||tvaṃ soma tanūkṛdbhyo dveṣobhyo 'nyakṛtebhyaḥ |
uru yantāsi varūtham || svāhā ||
juṣāṇo aptur ājyasya vetu || svāhā ||
agne naya supathā rāye asmān viśvāni deva vayunāni vidvān |
yuyodhy asmaj juhurāṇam eno bhūyiṣṭhāṃ te namauktiṃ vidhema ||
uru viṣṇo vikramasvoru kṣayāya nas kṛdhi |
ghṛtaṃ ghṛtavane piba prapra yajñapatiṃ tira || svāhā ||
evā vandasva varuṇaṃ bṛhantaṃ namasyā dhīram amṛtasya gopām |
sa naḥ śarma trivarūthaṃ viyaṃsat pātaṃ no dyāvāpṛthivī upasthe ||
urv antarikṣaṃ vīhy adityāḥ sadā āsīda deva savitar eṣa te somas taṃ rakṣasva mā tvā dabhan duścakṣās te māvakśad etat tvaṃ deva soma devān upāvṛtedam ahaṃ manuṣyānt saha rāyaspoṣeṇa prajayā copāvarte namo devebhyaḥ svadhā pitṛbhyo nir varuṇasya pāśād amukṣi svar abhivyakśaṃ jyotir vaiśvānaram agne vratapate yā tava tanūr mayy abhūd eṣā sā tvayy agne vratapate yā mama tanūs tvayy abhūd iyaṃ sā mayi punar nau vratapate vratinor vratāni yathāyathaṃ nau vratapate vratinor vratāni vi vratāni sṛjāvahai
||1.2.13||upāvṛta : fn ⟨ upāvṛtas
upāvṛta : fn correcturen und conjecturen zu dem ganzen Werk: lies upāvṛtta statt upāvṛta
upāvṛta : fn cf| 3|9|1:113|14: upāvṛtā iti| avṛtas sg2 aorist
aty anyān agāṃ nānyān upāgām arvāk tvā parebhyaḥ paro 'varebhyo 'vidaṃ taṃ tvā juṣāmahe devayajyāyai juṣṭaṃ viṣṇave viṣṇave tvā ||
uru viṣṇo vikramasvoru kṣayāya nas kṛdhi |
ghṛtaṃ ghṛtavane piba prapra yajñapatiṃ tira || svāhā ||
oṣadhe trāyasvainaṃ svadhite mainaṃ hiṃsīḥ |
yā te śivatamā tanūs tayainam upaspṛśa ||
yaṃ tvām ayaṃ svadhitis tigmatejāḥ praṇināya mahate saubhagāya |
divam agreṇa mā hiṃsīr antarikṣaṃ madhyena pṛthivyā sambhava bhrājaṃ gacha |
vanaspate śatavalśo viroha sahasravalśā vi vayaṃ ruhema ||
pṛthivyai tvāntarikṣāya tvā dive tvā śundhantāṃ lokāḥ pitṛṣadanā yavo 'si yavaya dveṣo asmad yavayārātiṃ pitṛṣadanaṃ tvā lokam avastṛṇāmi ||
svāveśo 'sy agregā netπṇām adhi tvā sthāsyati tasya vitsva ||
ghṛtena dyāvāpṛthivī āpṛṇa devas tvā savitā madhvānaktu ||
indrasya caṣālam asi supippalā oṣadhīs kṛdhi divam agreṇottabhānāntarikṣaṃ madhyenāpṛṇa pṛthivīm upareṇa dṛmha ||
tā te dhāmāny uśmasi gamadhyai gāvo yatra bhūriśṛṅgā ayāsaḥ |
atrāha tad urugāyasya viṣṇoḥ paramaṃ padam avabhāti bhūri ||
viṣṇoḥ karmāṇi paśyata yato vratāni paspaśe |
indrasya yujyaḥ sakhā ||
brahmavaniṃ tvā kṣatravaniṃ paryūhāmi brahma dṛmha kṣatraṃ dṛmha rāyaspoṣaṃ dṛmha prajāṃ dṛmha sajātān asmai yajamānāya dṛmha ||
tad viṣṇoḥ paramaṃ padaṃ śacyā paśyanti sūrayaḥ |
divīva cakṣur ātatam ||
parivīr asi pari tvā daivīr viśo vyayantāṃ parīmaṃ yajamānaṃ manuṣyāḥ saha rāyaspoṣeṇa prajayā ca vyayantāṃ divaḥ sānūpeṣa divaṃ te dhūmo gachatv antarikṣaṃ jyotiḥ pṛthivīṃ bhasma svāhā
||1.2.14||iṣe tvopāvīr asy upo devān daivīr viśaḥ prāgur vahnaya uśijo bṛhaspate dhārayā vasūni havyā te svadaṃ deva tvaṣṭar vasu raṇe revatī ramadhvaṃ devasya tvā savituḥ prasave 'śvinor bāhubhyāṃ pūṣṇo hastābhyām ādada ṛtasya tvā devahaviḥ pāśena pratimuñcāmy amuṣmai tvā juṣṭaṃ dharṣā mānuṣā adbhyas tvauṣadhībhyo juṣṭaṃ prokṣāmy anu tvā mātā manyatām anu pitānu bhrātā sagarbhyo 'nu sakhā sayūthyo 'numānāvaha devān devāyate yajamānāyāpāṃ perur asi svāttaṃ sad dhavir āpo devīḥ svadantu saṃ te vāyur vātena gachatāṃ saṃ yajatrair aṅgāni saṃ yajñapatir āśiṣā ghṛtenāktau paśūṃs trāyethām ||
mānuṣās : fn p: mānuṣaḥ
ye badhyamānam anu badhyamānā anvaikṣanta manasā cakṣuṣā ca |
agniṣ ṭaṃ agre pramumoktu devaḥ prajāpatiḥ prajayā saṃrarāṇaḥ ||
ṭaṃ : fn p: tān|
revati predhā yajñapatim āviśoro antarikṣa sajūr devena vātena ||
tmanāsya haviṣo yaja sam asya tanvā bhava |
varṣīyo varṣīyaso yajñaṃ yajñapatau dhāḥ ||
svarvid asi svar vittvā svar ihi svar mahyaṃ svaḥ paśubhyo lokavid asi lokaṃ vittvā lokam ihi lokaṃ mahyaṃ lokaṃ paśubhyo nāthavid asi nāthaṃ vittvā nātham ihi nāthaṃ mahyaṃ nāthaṃ paśubhyo gātuvid asi gātuṃ vittvā gātum ihi gātuṃ mahyaṃ gātuṃ paśubhyaḥ ||
na vā etan mriyase nota riṣyasi devaṃ id eṣi pathibhiḥ śivebhiḥ |
yatra yanti sukṛto nāpi duṣkṛtas tatra tvā devaḥ savitā dadhātu ||
śamitāra upetana yajñaṃ devebhir anvitam |
pāśāt paśuṃ pramuñcata bandhād yajñapatiṃ pari ||
aditiḥ pāśān pramumoktv etān paśoḥ pāśān paśupater adhi |
yo no dveṣṭy adharaḥ sa padyatāṃ tasmin pāśān pratimuñcāma etān
||1.2.15||etān : fn correcturen und conjecturen zu dem ganzen Werk|
namas ta ātānānarvā prehi yajamānāya ghṛtasya kulyām anu saha rāyaspoṣeṇa devīr āpaḥ śuddhā yūyaṃ devān yuyudhvaṃ śuddhā vayaṃ supariviṣṭāḥ pariveṣṭāro vo bhūyāsma vācam asya mā hiṃsīḥ prāṇam asya mā hiṃsīś cakṣur asya mā hiṃsīḥ śrotram asya mā hiṃsīr yat te krūraṃ yad āsthitaṃ tad etena śundhasva devebhyaḥ śumbhasva gātrāṇy asya mā hiṃsīś caritrān asya mā hiṃsīr nābhim asya mā hiṃsīr meḍhram asya mā hiṃsīḥ pāyum asya mā hiṃsīḥ śam adbhyaḥ ||
oṣadhe trāyasvainaṃ svadhite mainaṃ hiṃsīḥ |
yā te śivatamā tanūs tayainam upaspṛśa ||
pṛthivyai tvā rakṣasāṃ bhāgo 'sīdam ahaṃ rakṣo 'vabādha idam ahaṃ rakṣo 'dhamaṃ tamo nayāmīṣe tvorje tvā devebhyaḥ śundhasva devebhyaḥ śumbhasva ||
ghṛtena dyāvāpṛthivī prorṇuvātām amuṣmai tvā juṣṭaṃ namaḥ sūryasya sandṛśe ||
urv antarikṣaṃ vīhi pratyuṣṭaṃ rakṣaḥ pratyuṣṭārātir vāyoḥ stokānāṃ prayutā dveṣāṃsi svāhordhvanabhasaṃ mārutaṃ devaṃ gachatam
||1.2.16||dveṣāṃsi : fn cf| 3|10|1:131|2
svāhordhvanabhasaṃ : fn cf| 3|10|1:131|2
juṣṭaṃ devebhyo havyaṃ ghṛtāvad amuṣmai tvā juṣṭaṃ reḍ asy agniṣ ṭvā śrīṇātv āpas tvā samariṇvan vātasya tvā dhrājyai pūṣṇo raṃhyā ūṣmaṇo 'vyathiṣe 'pām oṣadhīnāṃ raso ghṛtaṃ ghṛtapāvānaḥ pibata vasāṃ vasāpāvānaḥ pibatāntarikṣasya havir asi svāhā tvā vātāya diśaḥ pradiśa ādiśo vidiśa uddiśo diśa aindraḥ prāṇo aṅge aṅge nidīdhyad aindro 'pāno aṅge aṅge nibobhuvad aindro vyāno aṅge aṅge vibobhuvat ||
deva tvaṣṭar bhūri te sat sametu salakṣma yad viṣurūpaṃ babhūva |
devatrā yantam avase sakhāyo anu tvā mātā pitaro madantu
||1.2.17||samudraṃ gacha svāhāntarikṣaṃ gacha svāhā devaṃ savitāraṃ gacha svāhāhorātre gacha svāhā mitrāvaruṇau gacha svāhā dyāvāpṛthivī gacha svāhā chandāṃsi gacha svāhā somaṃ gacha svāhā yajñaṃ gacha svāhā divyaṃ nabho gacha svāhāgniṃ vaiśvānaraṃ gacha svāhā mano hārdiṃ yachauṣadhībhyas tvā ||
dhāmnodhāmno rājann ito varuṇa no muñca yad āpo aghnyā varuṇeti śapāmahai |
tato varuṇa no muñca ||
ud uttamaṃ varuṇa pāśam asmad avādhamaṃ vi madhyamaṃ śrathāya |
athā vayam āditya vrate tavānāgaso aditaye syāma ||
sumitrā nā āpā oṣadhayaḥ santu durmitrās tasmai santu |
yo asmān dveṣṭi yaṃ ca vayaṃ dviṣmaḥ
||1.2.18||