athāhaṃ saṃpravakṣyāmi sarvadharmottamottamam
sūta uvāca
athāhaṃ saṃpravakṣyāmi sarvadharmottamottamam ||
umāmaheśvaraṃ nāma vrataṃ sarvārthasiddhidam
||1||अथाहं संप्रवक्ष्यामि सर्वधर्मोत्तमोत्तमम् ॥
उमामहेश्वरं नाम व्रतं सर्वार्थसिद्धिदम्
ānartta saṃbhavaḥ kaścinnāmnā vedaratho dvijaḥ ||
kalatraputrasaṃpanno vidvānuttamavaṃśajaḥ
||2||आनर्त्त संभवः कश्चिन्नाम्ना वेदरथो द्विजः ॥
कलत्रपुत्रसंपन्नो विद्वानुत्तमवंशजः
tasyaivaṃ vartamānasya brāhmaṇasya gṛhāśrame ||
babhūva śāradānāma kanyā kamalalocanā
||3||तस्यैवं वर्तमानस्य ब्राह्मणस्य गृहाश्रमे ॥
बभूव शारदानाम कन्या कमललोचना
tāṃ rūpalakṣaṇopetāṃ bālāṃ dvādaśahāyanām ||
yayāce padmanābhākhyo mṛtadāraśca sa dvijaḥ
||4||तां रूपलक्षणोपेतां बालां द्वादशहायनाम् ॥
ययाचे पद्मनाभाख्यो मृतदारश्च स द्विजः
mahādhanasya śāṃtasya sadā rājasakhasya ca ||
yāñcābhaṃgabhayāttasya tāṃ kanyāṃ pradadau pitā
||5||महाधनस्य शांतस्य सदा राजसखस्य च ॥
याञ्चाभंगभयात्तस्य तां कन्यां प्रददौ पिता
madhyaṃdine kṛtodvāhaḥ sa vipraḥ śvaśurālaye ||
saṃdhyāmupāsituṃ sāyaṃ sarastaṭamupāyayau
||6||मध्यंदिने कृतोद्वाहः स विप्रः श्वशुरालये ॥
संध्यामुपासितुं सायं सरस्तटमुपाययौ
upāsya saṃdhyāṃ vidhivatpratyāgacchattamovṛte ||
mārge daṣṭo bhujaṃgena mamāra nijakarmaṇā
||7||उपास्य संध्यां विधिवत्प्रत्यागच्छत्तमोवृते ॥
मार्गे दष्टो भुजंगेन ममार निजकर्मणा
tasminmṛte kṛtodvāhe sahasā tasya bāṃdhavāḥ ||
cukruśuḥ śokasaṃtaptau śvaśurāvasya kanyakā
||8||तस्मिन्मृते कृतोद्वाहे सहसा तस्य बांधवाः ॥
चुक्रुशुः शोकसंतप्तौ श्वशुरावस्य कन्यका
nirhṛtya taṃ baṃdhujanā jagmuḥ svaṃ svaṃ niveśanam ||
śāradā prāptavaidhavyā piturevālaye sthitā
||9||निर्हृत्य तं बंधुजना जग्मुः स्वं स्वं निवेशनम् ॥
शारदा प्राप्तवैधव्या पितुरेवालये स्थिता
bhūtācchādanabhojyena bhartrā virahitā satī ||
nināya katicinmāsānsā bālā pitṛmaṃdire
||10||भूताच्छादनभोज्येन भर्त्रा विरहिता सती ॥
निनाय कतिचिन्मासान्सा बाला पितृमंदिरे
ekadā naidhruvo nāma kaścidvṛddhataro muniḥ ||
andhaḥ śiṣyakaragrāhī tanmaṃdiramupāyayau
||11||एकदा नैध्रुवो नाम कश्चिद्वृद्धतरो मुनिः ॥
अन्धः शिष्यकरग्राही तन्मंदिरमुपाययौ
tasminvṛddhe gṛhaṃ prāpte kvāpi yāteṣu baṃdhuṣu ||
sākṣādivātmano daivaṃ sā bālā samupāgamat
||12||तस्मिन्वृद्धे गृहं प्राप्ते क्वापि यातेषु बंधुषु ॥
साक्षादिवात्मनो दैवं सा बाला समुपागमत्
svāgataṃ te mahābhāga pīṭhesminnupaviśyatām ||
namaste munināthāya priyaṃ te karavāṇi kim
||13||स्वागतं ते महाभाग पीठेस्मिन्नुपविश्यताम् ॥
नमस्ते मुनिनाथाय प्रियं ते करवाणि किम्
ityuktvā bhaktimāsthāya kṛtvā pādāvanejanam ||
vījayitvā pariśrāṃtaṃ taṃ muniṃ paryatoṣayat
||14||इत्युक्त्वा भक्तिमास्थाय कृत्वा पादावनेजनम् ॥
वीजयित्वा परिश्रांतं तं मुनिं पर्यतोषयत्
śrāṃtaṃ pīṭhe samāveśya kṛtvābhyaṃgaṃ svapāṇinā ||
kṛtasnānaṃ ca vidhivatkṛtadevārcanaṃ munim
||15||श्रांतं पीठे समावेश्य कृत्वाभ्यंगं स्वपाणिना ॥
कृतस्नानं च विधिवत्कृतदेवार्चनं मुनिम्
sukhāsanopaviṣṭaṃ taṃ dhūpamālyānulepanaiḥ ||
arcayitvā varānnena bhojayāmāsa sādaram
||16||सुखासनोपविष्टं तं धूपमाल्यानुलेपनैः ॥
अर्चयित्वा वरान्नेन भोजयामास सादरम्
bhuktvā ca samyakchanakaistṛptaścānaṃdanirbharaḥ ||
cakārāṃdhamunistasyai suprītaḥ paramāśiṣam
||17||भुक्त्वा च सम्यक्छनकैस्तृप्तश्चानंदनिर्भरः ॥
चकारांधमुनिस्तस्यै सुप्रीतः परमाशिषम्
vihṛtya bhartrā sahasā ca tena labdhvā sutaṃ sarvaguṇairvariṣṭham ||
kīrtiṃ ca loke mahatīmavāpya prasādayogyā bhava devatānām
||18||विहृत्य भर्त्रा सहसा च तेन लब्ध्वा सुतं सर्वगुणैर्वरिष्ठम् ॥
कीर्तिं च लोके महतीमवाप्य प्रसादयोग्या भव देवतानाम्
ityabhivyāhṛtaṃ tena muninā gatacakṣuṣā ||
niśamya vismitā bālā pratyuvāca kṛtāṃjaliḥ
||19||इत्यभिव्याहृतं तेन मुनिना गतचक्षुषा ॥
निशम्य विस्मिता बाला प्रत्युवाच कृतांजलिः
brahmaṃstvadvacanaṃ satyaṃ kadācinna mṛṣā bhavet ||
tadetanmaṃdabhāgyāyāḥ kathametatphaliṣyati
||20||ब्रह्मंस्त्वद्वचनं सत्यं कदाचिन्न मृषा भवेत् ॥
तदेतन्मंदभाग्यायाः कथमेतत्फलिष्यति
śilāgryāmiva sadvṛṣṭiḥ śunakyāmiva satkriyā ||
viphalā maṃdabhāgyāyāmāśīrbrahmavidāmapi
||21||शिलाग्र्यामिव सद्वृष्टिः शुनक्यामिव सत्क्रिया ॥
विफला मंदभाग्यायामाशीर्ब्रह्मविदामपि
saiṣāhaṃ vidhavā brahmanduṣkarmaphalabhāginī ||
tvadāśīrvacanasyāsya kathaṃ yāsyāmi pātratām
||22||सैषाहं विधवा ब्रह्मन्दुष्कर्मफलभागिनी ॥
त्वदाशीर्वचनस्यास्य कथं यास्यामि पात्रताम्
muniruvāca
tvāmanālakṣya yatproktamaṃdhenāpi mayā'dhunā ||
tadetatsādhayiṣyāmi kuru macchāsanaṃ śubhe
||23||त्वामनालक्ष्य यत्प्रोक्तमंधेनापि मयाऽधुना ॥
तदेतत्साधयिष्यामि कुरु मच्छासनं शुभे
umāmaheśvaraṃ nāma vrataṃ yadi cariṣyasi ||
tena vratānubhāvena sadyaḥ śreyo'nubhokṣyase
||24||उमामहेश्वरं नाम व्रतं यदि चरिष्यसि ॥
तेन व्रतानुभावेन सद्यः श्रेयोऽनुभोक्ष्यसे
śāradovāca
tvayopadiṣṭaṃ yatnena cariṣyāmyapi duścaram ||
tadvrataṃ brūhi me brahmanvidhānaṃ vada vistarāt
||25||त्वयोपदिष्टं यत्नेन चरिष्याम्यपि दुश्चरम् ॥
तद्व्रतं ब्रूहि मे ब्रह्मन्विधानं वद विस्तरात्
muniruvāca
caitre vā mārgaśīrṣe vā śuklapakṣe śubhe dine ||
vratāraṃbhaṃ prakurvīta yathāvadgurvanujñayā
||26||चैत्रे वा मार्गशीर्षे वा शुक्लपक्षे शुभे दिने ॥
व्रतारंभं प्रकुर्वीत यथावद्गुर्वनुज्ञया
aṣṭamyāṃ ca caturdaśyāmubhayorapi parvaṇoḥ ||
saṃkalpaṃ vidhivatkṛtvā prātaḥsnānaṃ samācaret
||27||अष्टम्यां च चतुर्दश्यामुभयोरपि पर्वणोः ॥
संकल्पं विधिवत्कृत्वा प्रातःस्नानं समाचरेत्
santarpya pitṛdevādīngatvā svabhavanaṃ prati ||
maṃḍapaṃ racayeddivyaṃ vitānādyairalaṃkṛtam
||28||सन्तर्प्य पितृदेवादीन्गत्वा स्वभवनं प्रति ॥
मंडपं रचयेद्दिव्यं वितानाद्यैरलंकृतम्
phalapallavapuṣpādyaistoraṇaiśca samanvitam ||
paṃcavarṇaiśca tanmadhye rajobhiḥ padmamuddharet
||29||फलपल्लवपुष्पाद्यैस्तोरणैश्च समन्वितम् ॥
पंचवर्णैश्च तन्मध्ये रजोभिः पद्ममुद्धरेत्
caturdaśadalairbāhye dvāviṃśadbhistadaṃtare ||
tadaṃtaraṃ ṣoḍaśabhiraṣṭabhiśca tadaṃtare
||30||चतुर्दशदलैर्बाह्ये द्वाविंशद्भिस्तदंतरे ॥
तदंतरं षोडशभिरष्टभिश्च तदंतरे
evaṃ padmaṃ samuddhatya paṃcavarṇairmanoramam ||
caturasraṃ tataḥ kuryādaṃtarvartulamuttamam
||31||एवं पद्मं समुद्धत्य पंचवर्णैर्मनोरमम् ॥
चतुरस्रं ततः कुर्यादंतर्वर्तुलमुत्तमम्
vrīhitaṃḍularāśiṃ ca tanmadhye ca sakūrcakam ||
kūrcopari susaṃsthāpya kalaśaṃ vāripūritam
||32||व्रीहितंडुलराशिं च तन्मध्ये च सकूर्चकम् ॥
कूर्चोपरि सुसंस्थाप्य कलशं वारिपूरितम्
kalaśopari vinyasya vastraṃ varṇasamanvitam ||
tasyopariṣṭātsauvarṇyau pratime śivayoḥ śubhe ||
nidhāya pūjayedbhaktyā yathāvibhavavistaram
||33||कलशोपरि विन्यस्य वस्त्रं वर्णसमन्वितम् ॥
तस्योपरिष्टात्सौवर्ण्यौ प्रतिमे शिवयोः शुभे ॥
निधाय पूजयेद्भक्त्या यथाविभवविस्तरम्
paṃcāmṛtaistu saṃsnāpya tathā śuddhodakena ca ||
rudraikādaśakaṃ japtvā paṃcākṣaraśatāṣṭakam
||34||पंचामृतैस्तु संस्नाप्य तथा शुद्धोदकेन च ॥
रुद्रैकादशकं जप्त्वा पंचाक्षरशताष्टकम्
abhimaṃtrya punaḥ sthāpya pīṭhaṃ madhye tathārcayet ||
svayaṃ śuddhāsanāsīno dhautaśuklāṃbaraḥ sudhīḥ
||35||अभिमंत्र्य पुनः स्थाप्य पीठं मध्ये तथार्चयेत् ॥
स्वयं शुद्धासनासीनो धौतशुक्लांबरः सुधीः
pīṭhamāmaṃtrya maṃtreṇa prāṇāyāmānsamācaret ||
saṃkalpaṃ pravadettatra śivāgre vihitāṃjaliḥ
||36||पीठमामंत्र्य मंत्रेण प्राणायामान्समाचरेत् ॥
संकल्पं प्रवदेत्तत्र शिवाग्रे विहितांजलिः
yāni pāpāni ghorāṇi janmāṃtaraśateṣu me ||
teṣāṃ sarvavināśāya śivapūjāṃ samārabhe
||37||यानि पापानि घोराणि जन्मांतरशतेषु मे ॥
तेषां सर्वविनाशाय शिवपूजां समारभे
saubhāgyavijayārogyadharmaiśvaryābhivṛddhaye ||
svargāpavargasiddhyarthaṃ kariṣye śivapūjanam
||38||सौभाग्यविजयारोग्यधर्मैश्वर्याभिवृद्धये ॥
स्वर्गापवर्गसिद्ध्यर्थं करिष्ये शिवपूजनम्
iti saṃkalpamuccārya yathāvatsusamāhitaḥ ||
aṃganyāsaṃ tataḥ kṛtvā dhyāyedīśaṃ ca pārvatīm
||39||इति संकल्पमुच्चार्य यथावत्सुसमाहितः ॥
अंगन्यासं ततः कृत्वा ध्यायेदीशं च पार्वतीम्
kuṃdeṃdudhavalākāraṃ nāgābharaṇabhūṣitam ||
varadābhayahastaṃ ca bibhrāṇaṃ paraśuṃ mṛgam
||40||कुंदेंदुधवलाकारं नागाभरणभूषितम् ॥
वरदाभयहस्तं च बिभ्राणं परशुं मृगम्
sūryakoṭipratīkāśaṃ jagadānaṃdakāraṇam ||
jāhnavījalasaṃparkāddīrghapiṃgajaṭādharam
||41||सूर्यकोटिप्रतीकाशं जगदानंदकारणम् ॥
जाह्नवीजलसंपर्काद्दीर्घपिंगजटाधरम्
urageṃdraphaṇodbhūtamahāmukuṭamaṃḍitam ||
śītāṃśukhaṃḍavilasatkoṭīrāṃgadabhūṣaṇam
||42||उरगेंद्रफणोद्भूतमहामुकुटमंडितम् ॥
शीतांशुखंडविलसत्कोटीरांगदभूषणम्
unmīladbhālanayanaṃ tathā sūryeṃdulocanam ||
nīlakaṃṭhaṃ caturbāhuṃ gajeṃdrājinavāsasam
||43||उन्मीलद्भालनयनं तथा सूर्येंदुलोचनम् ॥
नीलकंठं चतुर्बाहुं गजेंद्राजिनवाससम्
ratnasiṃhāsanārūḍhaṃ nāgābharaṇabhūṣitam ||
devīṃ ca divyavasanāṃ bālasūryāyutadyutim
||44||रत्नसिंहासनारूढं नागाभरणभूषितम् ॥
देवीं च दिव्यवसनां बालसूर्यायुतद्युतिम्
bālaveṣāṃ ca tanvaṃgīṃ bālaśītāṃśuśekharām ||
pāśāṃkuśavarābhītiṃ bibhratīṃ ca caturbhujām
||45||बालवेषां च तन्वंगीं बालशीतांशुशेखराम् ॥
पाशांकुशवराभीतिं बिभ्रतीं च चतुर्भुजाम्
prasādasumukhīmaṃbāṃ līlārasavihāriṇīm ||
lasatkurabakāśokapunnāganavacaṃpakaiḥ
||46||प्रसादसुमुखीमंबां लीलारसविहारिणीम् ॥
लसत्कुरबकाशोकपुन्नागनवचंपकैः
kṛtāvataṃsāmutphullamallikotkalitālakām ||
kāṃcīkalāpaparyastajaghanābhogaśālinīm
||47||कृतावतंसामुत्फुल्लमल्लिकोत्कलितालकाम् ॥
कांचीकलापपर्यस्तजघनाभोगशालिनीम्
udārakiṃkiṇīśreṇīnūpurāḍhyapadadvayām ||
gaṃḍamaṃḍalasaṃsaktaratnakuṃḍalaśobhitām
||48||उदारकिंकिणीश्रेणीनूपुराढ्यपदद्वयाम् ॥
गंडमंडलसंसक्तरत्नकुंडलशोभिताम्
biṃbādharānuraktāṃśulasaddaśana kuḍmalām ||
mahārharatnagreveyatārahāravirājitām
||49||बिंबाधरानुरक्तांशुलसद्दशन कुड्मलाम् ॥
महार्हरत्नग्रेवेयतारहारविराजिताम्
navamāṇikyarucirakaṃkaṇāṃgadamudrikām ||
raktāṃśukaparīdhānāṃ ratnamālyānulepanām
||50||नवमाणिक्यरुचिरकंकणांगदमुद्रिकाम् ॥
रक्तांशुकपरीधानां रत्नमाल्यानुलेपनाम्
udyatpīnakucadvaṃdvaniṃditāṃbhojakuḍmalām ||
līlālolāsitāpāṃgīṃ bhaktānugrahadāyinīm
||51||उद्यत्पीनकुचद्वंद्वनिंदितांभोजकुड्मलाम् ॥
लीलालोलासितापांगीं भक्तानुग्रहदायिनीम्
evaṃ dhyātvā tu hṛtpadme jagataḥ pitarau śivau ||
japtvā tadātmakaṃ maṃtraṃ tadaṃte bahirarcayet
||52||एवं ध्यात्वा तु हृत्पद्मे जगतः पितरौ शिवौ ॥
जप्त्वा तदात्मकं मंत्रं तदंते बहिरर्चयेत्
āvāhya pratimāyugme kalpayedāsanādikam ||
arghyaṃ ca dadyācchivayormaṃtreṇānena maṃtravit
||53||आवाह्य प्रतिमायुग्मे कल्पयेदासनादिकम् ॥
अर्घ्यं च दद्याच्छिवयोर्मंत्रेणानेन मंत्रवित्
namaste pārvatīnātha trailokyavaradarṣabha ||
tryaṃbakeśa mahādeva gṛhāṇārghyaṃ namo'stu te
||54||नमस्ते पार्वतीनाथ त्रैलोक्यवरदर्षभ ॥
त्र्यंबकेश महादेव गृहाणार्घ्यं नमोऽस्तु ते
namaste devadeveśi prapannabhayahāriṇi ||
aṃbike varade devi gṛhāṇārghyaṃ śivapriye
||55||नमस्ते देवदेवेशि प्रपन्नभयहारिणि ॥
अंबिके वरदे देवि गृहाणार्घ्यं शिवप्रिये
iti trivāramuccārya dadyādarghyaṃ samāhitaḥ ||
gandhapuṣpākṣatānsamyagdhūpadīpānprakalpayet
||56||इति त्रिवारमुच्चार्य दद्यादर्घ्यं समाहितः ॥
गन्धपुष्पाक्षतान्सम्यग्धूपदीपान्प्रकल्पयेत्
naivedyaṃ pāyasānnena ghṛtāktaṃ parikalpayet ||
juhuyānmūlamaṃtreṇa haviraṣṭottaraṃ śatam
||57||नैवेद्यं पायसान्नेन घृताक्तं परिकल्पयेत् ॥
जुहुयान्मूलमंत्रेण हविरष्टोत्तरं शतम्
tata udvāsya naivedyaṃ dhūpanīrājanādikam ||
kṛtvā nivedya tāṃbūlaṃ namaskuryātsamāhitaḥ
||58||तत उद्वास्य नैवेद्यं धूपनीराजनादिकम् ॥
कृत्वा निवेद्य तांबूलं नमस्कुर्यात्समाहितः
athābhyarcyopacāreṇa bhojayedvipradaṃpatī
||59||अथाभ्यर्च्योपचारेण भोजयेद्विप्रदंपती
evaṃ sāyaṃtanīṃ pūjāṃ kṛtvā viprānumoditaḥ ||
bhuṃjīta vāgyato rātrau haviṣyaṃ kṣīrabhāvitam
||60||एवं सायंतनीं पूजां कृत्वा विप्रानुमोदितः ॥
भुंजीत वाग्यतो रात्रौ हविष्यं क्षीरभावितम्
evaṃ saṃvatsaraṃ kuryādvrataṃ pakṣadvaye budhaḥ ||
tataḥ saṃvatsare pūrṇe vratodyāpanamācaret
||61||एवं संवत्सरं कुर्याद्व्रतं पक्षद्वये बुधः ॥
ततः संवत्सरे पूर्णे व्रतोद्यापनमाचरेत्
śatarudrābhijaptena snāpayetpratime jalaiḥ ||
āgamoktena mantreṇa saṃpūjya girijāśivau
||62||शतरुद्राभिजप्तेन स्नापयेत्प्रतिमे जलैः ॥
आगमोक्तेन मन्त्रेण संपूज्य गिरिजाशिवौ
savastraṃ sasuvarṇa ca kalaśaṃ prati mānvitam ||
dattvācāryāya mahate sadācāraratāya ca ||
brāhmaṇānbhojayedbhaktyā yathāśaktyābhipūjya ca
||63||सवस्त्रं ससुवर्ण च कलशं प्रति मान्वितम् ॥
दत्त्वाचार्याय महते सदाचाररताय च ॥
ब्राह्मणान्भोजयेद्भक्त्या यथाशक्त्याभिपूज्य च
dadyācca dakṣiṇāṃ tebhyo gohiraṇyāṃbarādikam ||
bhuṃjīta tadanujñātaḥ saheṣṭajanabaṃdhubhiḥ
||64||दद्याच्च दक्षिणां तेभ्यो गोहिरण्यांबरादिकम् ॥
भुंजीत तदनुज्ञातः सहेष्टजनबंधुभिः
evaṃ yaḥ kurute bhaktyā vrataṃ trailokyaviśrutam ||
triḥsaptakulamuddhṛtya bhuktvā bhogānyathepsi tān
||65||एवं यः कुरुते भक्त्या व्रतं त्रैलोक्यविश्रुतम् ॥
त्रिःसप्तकुलमुद्धृत्य भुक्त्वा भोगान्यथेप्सि तान्
indrādilokapālānāṃ sthāneṣu ramate dhuvam ||
brahmaloke ca ramate viṣṇuloke ca śāśvate
||66||इन्द्रादिलोकपालानां स्थानेषु रमते धुवम् ॥
ब्रह्मलोके च रमते विष्णुलोके च शाश्वते
śivalokamatha prāpya tatra kalpaśataṃ punaḥ ||
bhuktvā bhogānsuvipulāñchivameva prapadyate
||67||शिवलोकमथ प्राप्य तत्र कल्पशतं पुनः ॥
भुक्त्वा भोगान्सुविपुलाञ्छिवमेव प्रपद्यते
mahāvratamidaṃ proktaṃ tvamapi śraddhayā cara ||
atyaṃtadurlabhaṃ vāpi lapsyase ca manoratham
||68||महाव्रतमिदं प्रोक्तं त्वमपि श्रद्धया चर ॥
अत्यंतदुर्लभं वापि लप्स्यसे च मनोरथम्
ityādiṣṭā munīṃdreṇa sā bālā muditā bhṛśam ||
pratyagrahītsuviśrabdhā tadvākyaṃ sumanoharam
||69||इत्यादिष्टा मुनींद्रेण सा बाला मुदिता भृशम् ॥
प्रत्यग्रहीत्सुविश्रब्धा तद्वाक्यं सुमनोहरम्
atha tasyāḥ samāyātāḥ pitṛmātṛ sahodarāḥ ||
taṃ muniṃ sukhamāsīnaṃ dadṛśuḥ kṛtabhojanam
||70||अथ तस्याः समायाताः पितृमातृ सहोदराः ॥
तं मुनिं सुखमासीनं ददृशुः कृतभोजनम्
sahasāgatya te sarve namaścakrurmahātmane ||
prasīda naḥ prasīdeti gṛṇataḥ paryapūja yan
||71||सहसागत्य ते सर्वे नमश्चक्रुर्महात्मने ॥
प्रसीद नः प्रसीदेति गृणतः पर्यपूज यन्
śrutvā ca te tayā sādhvyā pūjitaṃ paramaṃ munim ||
anugrahavataṃ tasyai śrutvā harṣaṃ paraṃ yayuḥ
||72||श्रुत्वा च ते तया साध्व्या पूजितं परमं मुनिम् ॥
अनुग्रहवतं तस्यै श्रुत्वा हर्षं परं ययुः
te kṛtāṃjalayaḥ sarve tamūcurmuni puṃgavam
||73||ते कृतांजलयः सर्वे तमूचुर्मुनि पुंगवम्
adya dhanyā vayaṃ sarve tavāgamanamātrataḥ ||
pāvitaṃ naḥ kulaṃ sarvaṃ gṛhaṃ ca saphalīkṛtam
||74||अद्य धन्या वयं सर्वे तवागमनमात्रतः ॥
पावितं नः कुलं सर्वं गृहं च सफलीकृतम्
iyaṃ ca śāradā nāma kanyā vaidhavyamāgatā ||
kenāpi karmayogena durvilaṃghyena bhūyasā
||75||इयं च शारदा नाम कन्या वैधव्यमागता ॥
केनापि कर्मयोगेन दुर्विलंघ्येन भूयसा
saiṣādya tava pādābjaṃ prapannā śaraṇaṃ satī ||
imāṃ samuddharāsahyātsughorādduḥkha sāgarāt
||76||सैषाद्य तव पादाब्जं प्रपन्ना शरणं सती ॥
इमां समुद्धरासह्यात्सुघोराद्दुःख सागरात्
tvayāpi tāvadatraiva sthātavyaṃ no gṛhāṃtike ||
asmadgṛhamaṭhe'pyasminsnānapūjājapocite
||77||त्वयापि तावदत्रैव स्थातव्यं नो गृहांतिके ॥
अस्मद्गृहमठेऽप्यस्मिन्स्नानपूजाजपोचिते
eṣā bālāpi bhagavankurvaṃtī tvatpadārcanam ||
vrataṃ tvatsannidhāveva cariṣyati mahāmune
||78||एषा बालापि भगवन्कुर्वंती त्वत्पदार्चनम् ॥
व्रतं त्वत्सन्निधावेव चरिष्यति महामुने
yāvatsamāptimāyāti vratamasyāstvadaṃtike ||
uṣitvā tāvadatraiva kṛtārthānkuru no guro
||79||यावत्समाप्तिमायाति व्रतमस्यास्त्वदंतिके ॥
उषित्वा तावदत्रैव कृतार्थान्कुरु नो गुरो
evamabhyarthitaḥ sarvaistasyā bhrātṛjanādibhiḥ ||
tatheti sa muniśreṣṭhastatrovāsa maṭhe śubhe
||80||एवमभ्यर्थितः सर्वैस्तस्या भ्रातृजनादिभिः ॥
तथेति स मुनिश्रेष्ठस्तत्रोवास मठे शुभे
sāpi tenopadiṣṭena mārgeṇa girijāśivau ||
arcayaṃtī vrataṃ samyakcacāra vimalā satī
||81||सापि तेनोपदिष्टेन मार्गेण गिरिजाशिवौ ॥
अर्चयंती व्रतं सम्यक्चचार विमला सती
iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmottarakhaṇḍe umāmaheśvaravratācaraṇaṃ nāmāṣṭādaśo'dhyāyaḥ || 18 ||