26 sobhari: kāṇva:| maruta: | pragātha:= ( viṣamā kakup , samā satobṛhatī ), 14 sato virāṭ |
ā ga̍ntā̱ mā ri̍ṣaṇyata̱ prasthā̍vāno̱ māpa̍ sthātā samanyavaḥ | sthi̱rā ci̍nnamayiṣṇavaḥ
||1||vī̱l̤u̱pa̱vibhi̍rmaruta ṛbhukṣaṇa̱ ā ru̍drāsaḥ sudī̱tibhi̍: | i̱ṣā no̍ a̱dyā ga̍tā puruspṛho ya̱jñamā so̍bharī̱yava̍:
||2||vi̱dmā hi ru̱driyā̍ṇā̱ṃ śuṣma̍mu̱graṃ ma̱rutā̱ṃ śimī̍vatām | viṣṇo̍re̱ṣasya̍ mī̱l̤huṣā̍m
||3||vi dvī̱pāni̱ pāpa̍ta̱ntiṣṭha̍ddu̱cchuno̱bhe yu̍janta̱ roda̍sī | pra dhanvā̍nyairata śubhrakhādayo̱ yadeja̍tha svabhānavaḥ
||4||acyu̍tā cidvo̱ ajma̱nnā nāna̍dati̱ parva̍tāso̱ vana̱spati̍: | bhūmi̱ryāme̍ṣu rejate
||5||amā̍ya vo maruto̱ yāta̍ve̱ dyaurjihī̍ta̱ utta̍rā bṛ̱hat | yatrā̱ naro̱ dedi̍śate ta̱nūṣvā tvakṣā̍ṃsi bā̱hvo̍jasaḥ
||6||sva̱dhāmanu̱ śriya̱ṃ naro̱ mahi̍ tve̱ṣā ama̍vanto̱ vṛṣa̍psavaḥ | vaha̍nte̱ ahru̍tapsavaḥ
||7||gobhi̍rvā̱ṇo a̍jyate̱ sobha̍rīṇā̱ṃ rathe̱ kośe̍ hira̱ṇyaye̍ | goba̍ndhavaḥ sujā̱tāsa̍ i̱ṣe bhu̱je ma̱hānto̍ na̱: spara̍se̱ nu
||8||prati̍ vo vṛṣadañjayo̱ vṛṣṇe̱ śardhā̍ya̱ māru̍tāya bharadhvam | ha̱vyā vṛṣa̍prayāvṇe
||9||vṛ̱ṣa̱ṇa̱śvena̍ maruto̱ vṛṣa̍psunā̱ rathe̍na̱ vṛṣa̍nābhinā | ā śye̱nāso̱ na pa̱kṣiṇo̱ vṛthā̍ naro ha̱vyā no̍ vī̱taye̍ gata
||10||sa̱mā̱nama̱ñjye̍ṣā̱ṃ vi bhrā̍jante ru̱kmāso̱ adhi̍ bā̱huṣu̍ | davi̍dyutatyṛ̱ṣṭaya̍:
||11||ta u̱grāso̱ vṛṣa̍ṇa u̱grabā̍havo̱ naki̍ṣṭa̱nūṣu̍ yetire | sthi̱rā dhanvā̱nyāyu̍dhā̱ rathe̍ṣu̱ vo'nī̍ke̱ṣvadhi̱ śriya̍:
||12||yeṣā̱marṇo̱ na sa̱pratho̱ nāma̍ tve̱ṣaṃ śaśva̍tā̱meka̱midbhu̱je | vayo̱ na pitrya̱ṃ saha̍:
||13||tānva̍ndasva ma̱ruta̱stām̐ upa̍ stuhi̱ teṣā̱ṃ hi dhunī̍nām | a̱rāṇā̱ṃ na ca̍ra̱mastade̍ṣāṃ dā̱nā ma̱hnā tade̍ṣām
||14||su̱bhaga̱: sa va̍ ū̱tiṣvāsa̱ pūrvā̍su maruto̱ vyu̍ṣṭiṣu | yo vā̍ nū̱namu̱tāsa̍ti
||15||yasya̍ vā yū̱yaṃ prati̍ vā̱jino̍ nara̱ ā ha̱vyā vī̱taye̍ ga̱tha |
a̱bhi ṣa dyu̱mnairu̱ta vāja̍sātibhiḥ su̱mnā vo̍ dhūtayo naśat
||16||yathā̍ ru̱drasya̍ sū̱navo̍ di̱vo vaśa̱ntyasu̍rasya ve̱dhasa̍: | yuvā̍na̱statheda̍sat
||17||ye cārha̍nti ma̱ruta̍: su̱dāna̍va̱: smanmī̱l̤huṣa̱ścara̍nti̱ ye | ata̍ści̱dā na̱ upa̱ vasya̍sā hṛ̱dā yuvā̍na̱ ā va̍vṛdhvam
||18||yūna̍ ū̱ ṣu navi̍ṣṭhayā̱ vṛṣṇa̍: pāva̱kām̐ a̱bhi so̍bhare gi̱rā | gāya̱ gā i̍va̱ carkṛ̍ṣat
||19||sā̱hā ye santi̍ muṣṭi̱heva̱ havyo̱ viśvā̍su pṛ̱tsu hotṛ̍ṣu |
vṛṣṇa̍śca̱ndrānna su̱śrava̍stamāngi̱rā vanda̍sva ma̱ruto̱ aha̍
||20||gāva̍ścidghā samanyavaḥ sajā̱tye̍na maruta̱: saba̍ndhavaḥ | ri̱ha̱te ka̱kubho̍ mi̱thaḥ
||21||marta̍ścidvo nṛtavo rukmavakṣasa̱ upa̍ bhrātṛ̱tvamāya̍ti |
adhi̍ no gāta maruta̱: sadā̱ hi va̍ āpi̱tvamasti̱ nidhru̍vi
||22||maru̍to̱ māru̍tasya na̱ ā bhe̍ṣa̱jasya̍ vahatā sudānavaḥ | yū̱yaṃ sa̍khāyaḥ saptayaḥ
||23||yābhi̱: sindhu̱mava̍tha̱ yābhi̱stūrva̍tha̱ yābhi̍rdaśa̱syathā̱ krivi̍m |
mayo̍ no bhūto̱tibhi̍rmayobhuvaḥ śi̱vābhi̍rasacadviṣaḥ
||24||yatsindhau̱ yadasi̍knyā̱ṃ yatsa̍mu̱dreṣu̍ marutaḥ subarhiṣaḥ | yatparva̍teṣu bheṣa̱jam
||25||viśva̱ṃ paśya̍nto bibhṛthā ta̱nūṣvā tenā̍ no̱ adhi̍ vocata | kṣa̱mā rapo̍ maruta̱ ātu̍rasya na̱ iṣka̍rtā̱ vihru̍ta̱ṃ puna̍:
||26||