19 medhyātithi : kāṇva:| indra: | bṛhatī , 16-18 gāyatrī , 19 anuṣṭup |
va̱yaṃ gha̍ tvā su̱tāva̍nta̱ āpo̱ na vṛ̱ktaba̍rhiṣaḥ | pa̱vitra̍sya pra̱srava̍ṇeṣu vṛtraha̱npari̍ sto̱tāra̍ āsate
||1||svara̍nti tvā su̱te naro̱ vaso̍ nire̱ka u̱kthina̍: | ka̱dā su̱taṃ tṛ̍ṣā̱ṇa oka̱ ā ga̍ma̱ indra̍ sva̱bdīva̱ vaṃsa̍gaḥ
||2||kaṇve̍bhirdhṛṣṇa̱vā dhṛ̱ṣadvāja̍ṃ darṣi saha̱sriṇa̍m | pi̱śaṅga̍rūpaṃ maghavanvicarṣaṇe ma̱kṣū goma̍ntamīmahe
||3||pā̱hi gāyāndha̍so̱ mada̱ indrā̍ya medhyātithe | yaḥ sammi̍ślo̱ haryo̱ryaḥ su̱te sacā̍ va̱jrī ratho̍ hira̱ṇyaya̍:
||4||yaḥ su̍ṣa̱vyaḥ su̱dakṣi̍ṇa i̱no yaḥ su̱kratu̍rgṛ̱ṇe | ya ā̍ka̱raḥ sa̱hasrā̱ yaḥ śa̱tāma̍gha̱ indro̱ yaḥ pū̱rbhidā̍ri̱taḥ
||5||yo dhṛ̍ṣi̱to yo'vṛ̍to̱ yo asti̱ śmaśru̍ṣu śri̱taḥ | vibhū̍tadyumna̱ścyava̍naḥ puruṣṭu̱taḥ kratvā̱ gauri̍va śāki̱naḥ
||6||ka ī̍ṃ veda su̱te sacā̱ piba̍nta̱ṃ kadvayo̍ dadhe | a̱yaṃ yaḥ puro̍ vibhi̱nattyoja̍sā mandā̱naḥ śi̱pryandha̍saḥ
||7||dā̱nā mṛ̱go na vā̍ra̱ṇaḥ pu̍ru̱trā ca̱ratha̍ṃ dadhe | naki̍ṣṭvā̱ ni ya̍ma̱dā su̱te ga̍mo ma̱hām̐śca̍ra̱syoja̍sā
||8||ya u̱graḥ sannani̍ṣṭṛtaḥ sthi̱ro raṇā̍ya̱ saṃskṛ̍taḥ | yadi̍ sto̱turma̱ghavā̍ śṛ̱ṇava̱ddhava̱ṃ nendro̍ yoṣa̱tyā ga̍mat
||9||sa̱tyami̱tthā vṛṣeda̍si̱ vṛṣa̍jūti̱rno'vṛ̍taḥ | vṛṣā̱ hyu̍gra śṛṇvi̱ṣe pa̍rā̱vati̱ vṛṣo̍ arvā̱vati̍ śru̱taḥ
||10||vṛṣa̍ṇaste a̱bhīśa̍vo̱ vṛṣā̱ kaśā̍ hira̱ṇyayī̍ | vṛṣā̱ ratho̍ maghava̱nvṛṣa̍ṇā̱ harī̱ vṛṣā̱ tvaṃ śa̍takrato
||11||vṛṣā̱ sotā̍ sunotu te̱ vṛṣa̍nnṛjīpi̱nnā bha̍ra | vṛṣā̍ dadhanve̱ vṛṣa̍ṇaṃ na̱dīṣvā tubhya̍ṃ sthātarharīṇām
||12||endra̍ yāhi pī̱taye̱ madhu̍ śaviṣṭha so̱myam | nāyamacchā̍ ma̱ghavā̍ śṛ̱ṇava̱dgiro̱ brahmo̱kthā ca̍ su̱kratu̍:
||13||vaha̍ntu tvā rathe̱ṣṭhāmā hara̍yo ratha̱yuja̍: | ti̱raści̍da̱ryaṃ sava̍nāni vṛtrahanna̱nyeṣā̱ṃ yā śa̍takrato
||14||a̱smāka̍ma̱dyānta̍ma̱ṃ stoma̍ṃ dhiṣva mahāmaha | a̱smāka̍ṃ te̱ sava̍nā santu̱ śaṃta̍mā̱ madā̍ya dyukṣa somapāḥ
||15||na̱hi ṣastava̱ no mama̍ śā̱stre a̱nyasya̱ raṇya̍ti | yo a̱smānvī̱ra āna̍yat
||16||indra̍ścidghā̱ tada̍bravītstri̱yā a̍śā̱syaṃ mana̍: | u̱to aha̱ kratu̍ṃ ra̱ghum
||17||saptī̍ cidghā mada̱cyutā̍ mithu̱nā va̍hato̱ ratha̍m | e̱veddhūrvṛṣṇa̱ utta̍rā
||18||a̱dhaḥ pa̍śyasva̱ mopari̍ saṃta̱rāṃ pā̍da̱kau ha̍ra | mā te̍ kaśapla̱kau dṛ̍śa̱ntstrī hi bra̱hmā ba̱bhūvi̍tha
||19||