48 vatsa: kāṇva | indra:, 46 -48 tirindira: pārśavya: | gāyatrī |
ma̱hām̐ indro̱ ya oja̍sā pa̱rjanyo̍ vṛṣṭi̱mām̐ i̍va | stomai̍rva̱tsasya̍ vāvṛdhe
||1||pra̱jāmṛ̱tasya̱ pipra̍ta̱: pra yadbhara̍nta̱ vahna̍yaḥ | viprā̍ ṛ̱tasya̱ vāha̍sā
||2||kaṇvā̱ indra̱ṃ yadakra̍ta̱ stomai̍rya̱jñasya̱ sādha̍nam | jā̱mi bru̍vata̱ āyu̍dham
||3||sama̍sya ma̱nyave̱ viśo̱ viśvā̍ namanta kṛ̱ṣṭaya̍: | sa̱mu̱drāye̍va̱ sindha̍vaḥ
||4||oja̱stada̍sya titviṣa u̱bhe yatsa̱mava̍rtayat | indra̱ścarme̍va̱ roda̍sī
||5||vi ci̍dvṛ̱trasya̱ dodha̍to̱ vajre̍ṇa śa̱tapa̍rvaṇā | śiro̍ bibheda vṛ̱ṣṇinā̍
||6||i̱mā a̱bhi pra ṇo̍numo vi̱pāmagre̍ṣu dhī̱taya̍: | a̱gneḥ śo̱cirna di̱dyuta̍:
||7||guhā̍ sa̱tīrupa̱ tmanā̱ pra yacchoca̍nta dhī̱taya̍: | kaṇvā̍ ṛ̱tasya̱ dhāra̍yā
||8||pra tami̍ndra naśīmahi ra̱yiṃ goma̍ntama̱śvina̍m | pra brahma̍ pū̱rvaci̍ttaye
||9||a̱hamiddhi pi̱tuṣpari̍ me̱dhāmṛ̱tasya̍ ja̱grabha̍ | a̱haṃ sūrya̍ ivājani
||10||a̱haṃ pra̱tnena̱ manma̍nā̱ gira̍: śumbhāmi kaṇva̱vat | yenendra̱: śuṣma̱midda̱dhe
||11||ye tvāmi̍ndra̱ na tu̍ṣṭu̱vuṝṣa̍yo̱ ye ca̍ tuṣṭu̱vuḥ | mamedva̍rdhasva̱ suṣṭu̍taḥ
||12||yada̍sya ma̱nyuradhva̍nī̱dvi vṛ̱traṃ pa̍rva̱śo ru̱jan | a̱paḥ sa̍mu̱dramaira̍yat
||13||ni śuṣṇa̍ indra dharṇa̱siṃ vajra̍ṃ jaghantha̱ dasya̍vi | vṛṣā̱ hyu̍gra śṛṇvi̱ṣe
||14||na dyāva̱ indra̱moja̍sā̱ nāntari̍kṣāṇi va̱jriṇa̍m | na vi̍vyacanta̱ bhūma̍yaḥ
||15||yasta̍ indra ma̱hīra̱paḥ sta̍bhū̱yamā̍na̱ āśa̍yat | ni taṃ padyā̍su śiśnathaḥ
||16||ya i̱me roda̍sī ma̱hī sa̍mī̱cī sa̱maja̍grabhīt | tamo̍bhirindra̱ taṃ gu̍haḥ
||17||ya i̍ndra̱ yata̍yastvā̱ bhṛga̍vo̱ ye ca̍ tuṣṭu̱vuḥ | mamedu̍gra śrudhī̱ hava̍m
||18||i̱māsta̍ indra̱ pṛśna̍yo ghṛ̱taṃ du̍hata ā̱śira̍m | e̱nāmṛ̱tasya̍ pi̱pyuṣī̍:
||19||yā i̍ndra pra̱sva̍stvā̱''sā garbha̱maca̍kriran | pari̱ dharme̍va̱ sūrya̍m
||20||tvāmiccha̍vasaspate̱ kaṇvā̍ u̱kthena̍ vāvṛdhuḥ | tvāṃ su̱tāsa̱ inda̍vaḥ
||21||tavedi̍ndra̱ praṇī̍tiṣū̱ta praśa̍stiradrivaḥ | ya̱jño vi̍tanta̱sāyya̍:
||22||ā na̍ indra ma̱hīmiṣa̱ṃ pura̱ṃ na da̍rṣi̱ goma̍tīm | u̱ta pra̱jāṃ su̱vīrya̍m
||23||u̱ta tyadā̱śvaśvya̱ṃ yadi̍ndra̱ nāhu̍ṣī̱ṣvā | agre̍ vi̱kṣu pra̱dīda̍yat
||24||a̱bhi vra̱jaṃ na ta̍tniṣe̱ sūra̍ upā̱kaca̍kṣasam | yadi̍ndra mṛ̱l̤ayā̍si naḥ
||25||yada̱ṅga ta̍viṣī̱yasa̱ indra̍ pra̱rāja̍si kṣi̱tīḥ | ma̱hām̐ a̍pā̱ra oja̍sā
||26||taṃ tvā̍ ha̱viṣma̍tī̱rviśa̱ upa̍ bruvata ū̱taye̍ | u̱ru̱jraya̍sa̱mindu̍bhiḥ
||27||u̱pa̱hva̱re gi̍rī̱ṇāṃ sa̍ṃga̱the ca̍ na̱dīnā̍m | dhi̱yā vipro̍ ajāyata
||28||ata̍: samu̱dramu̱dvata̍ściki̱tvām̐ ava̍ paśyati | yato̍ vipā̱na eja̍ti
||29||āditpra̱tnasya̱ reta̍so̱ jyoti̍ṣpaśyanti vāsa̱ram | pa̱ro yadi̱dhyate̍ di̱vā
||30||kaṇvā̍sa indra te ma̱tiṃ viśve̍ vardhanti̱ pauṃsya̍m | u̱to śa̍viṣṭha̱ vṛṣṇya̍m
||31||i̱māṃ ma̍ indra suṣṭu̱tiṃ ju̱ṣasva̱ pra su māma̍va | u̱ta pra va̍rdhayā ma̱tim
||32||u̱ta bra̍hma̱ṇyā va̱yaṃ tubhya̍ṃ pravṛddha vajrivaḥ | viprā̍ atakṣma jī̱vase̍
||33||a̱bhi kaṇvā̍ anūṣa̱tā''po̱ na pra̱vatā̍ ya̱tīḥ | indra̱ṃ vana̍nvatī ma̱tiḥ
||34||indra̍mu̱kthāni̍ vāvṛdhuḥ samu̱drami̍va̱ sindha̍vaḥ | anu̍ttamanyuma̱jara̍m
||35||ā no̍ yāhi parā̱vato̱ hari̍bhyāṃ harya̱tābhyā̍m | i̱mami̍ndra su̱taṃ pi̍ba
||36||tvāmidvṛ̍trahantama̱ janā̍so vṛ̱ktaba̍rhiṣaḥ | hava̍nte̱ vāja̍sātaye
||37||anu̍ tvā̱ roda̍sī u̱bhe ca̱kraṃ na va̱rtyeta̍śam | anu̍ suvā̱nāsa̱ inda̍vaḥ
||38||manda̍svā̱ su sva̍rṇara u̱tendra̍ śarya̱ṇāva̍ti | matsvā̱ viva̍svato ma̱tī
||39||vā̱vṛ̱dhā̱na upa̱ dyavi̱ vṛṣā̍ va̱jrya̍roravīt | vṛ̱tra̱hā so̍ma̱pāta̍maḥ
||40||ṛṣi̱rhi pū̍rva̱jā asyeka̱ īśā̍na̱ oja̍sā | indra̍ coṣkū̱yase̱ vasu̍
||41||a̱smāka̍ṃ tvā su̱tām̐ upa̍ vī̱tapṛ̍ṣṭhā a̱bhi praya̍: | śa̱taṃ va̍hantu̱ hara̍yaḥ
||42||i̱māṃ su pū̱rvyāṃ dhiya̱ṃ madho̍rghṛ̱tasya̍ pi̱pyuṣī̍m | kaṇvā̍ u̱kthena̍ vāvṛdhuḥ
||43||indra̱midvima̍hīnā̱ṃ medhe̍ vṛṇīta̱ martya̍: | indra̍ṃ sani̱ṣyurū̱taye̍
||44||a̱rvāñca̍ṃ tvā puruṣṭuta pri̱yame̍dhastutā̱ harī̍ | so̱ma̱peyā̍ya vakṣataḥ
||45||śa̱tama̱haṃ ti̱rindi̍re sa̱hasra̱ṃ parśā̱vā da̍de | rādhā̍ṃsi̱ yādvā̍nām
||46||trīṇi̍ śa̱tānyarva̍tāṃ sa̱hasrā̱ daśa̱ gonā̍m | da̱duṣpa̱jrāya̱ sāmne̍
||47||udā̍naṭ kaku̱ho diva̱muṣṭrā̍ñcatu̱ryujo̱ dada̍t | śrava̍sā̱ yādva̱ṃ jana̍m
||48||