medhyātithi: kāṇva: | indra:, 21 -24 kaurayāṇa: pākasthāmā | pragātha : = ( viṣamā bṛhatī, samā satobṛhatī ), 21 anuṣṭup , 22 -23 gāyatrī, 24 bṛhatī |
pibā̍ su̱tasya̍ ra̱sino̱ matsvā̍ na indra̱ goma̍taḥ | ā̱pirno̍ bodhi sadha̱mādyo̍ vṛ̱dhe̱3'smām̐ a̍vantu te̱ dhiya̍:
||1||bhū̱yāma̍ te suma̱tau vā̱jino̍ va̱yaṃ mā na̍: stara̱bhimā̍taye | a̱smāñci̱trābhi̍ravatāda̱bhiṣṭi̍bhi̱rā na̍: su̱mneṣu̍ yāmaya
||2||i̱mā u̍ tvā purūvaso̱ giro̍ vardhantu̱ yā mama̍ | pā̱va̱kava̍rṇā̱: śuca̍yo vipa̱ścito̱'bhi stomai̍ranūṣata
||3||a̱yaṃ sa̱hasra̱mṛṣi̍bhi̱: saha̍skṛtaḥ samu̱dra i̍va paprathe | sa̱tyaḥ so a̍sya mahi̱mā gṛ̍ṇe̱ śavo̍ ya̱jñeṣu̍ vipra̱rājye̍
||4||indra̱midde̱vatā̍taya̱ indra̍ṃ praya̱tya̍dhva̱re | indra̍ṃ samī̱ke va̱nino̍ havāmaha̱ indra̱ṃ dhana̍sya sā̱taye̍
||5||indro̍ ma̱hnā roda̍sī papratha̱cchava̱ indra̱: sūrya̍marocayat | indre̍ ha̱ viśvā̱ bhuva̍nāni yemira̱ indre̍ suvā̱nāsa̱ inda̍vaḥ
||6||a̱bhi tvā̍ pū̱rvapī̍taya̱ indra̱ stome̍bhirā̱yava̍: | sa̱mī̱cī̱nāsa̍ ṛ̱bhava̱: sama̍svaranru̱drā gṛ̍ṇanta̱ pūrvya̍m
||7||a̱syedindro̍ vāvṛdhe̱ vṛṣṇya̱ṃ śavo̱ made̍ su̱tasya̱ viṣṇa̍vi | a̱dyā tama̍sya mahi̱māna̍mā̱yavo'nu̍ ṣṭuvanti pū̱rvathā̍
||8||tattvā̍ yāmi su̱vīrya̱ṃ tadbrahma̍ pū̱rvaci̍ttaye | yenā̱ yati̍bhyo̱ bhṛga̍ve̱ dhane̍ hi̱te yena̱ praska̍ṇva̱māvi̍tha
||9||yenā̍ samu̱dramasṛ̍jo ma̱hīra̱pastadi̍ndra̱ vṛṣṇi̍ te̱ śava̍: | sa̱dyaḥ so a̍sya mahi̱mā na sa̱ṃnaśe̱ yaṃ kṣo̱ṇīra̍nucakra̱de
||10||śa̱gdhī na̍ indra̱ yattvā̍ ra̱yiṃ yāmi̍ su̱vīrya̍m | śa̱gdhi vājā̍ya pratha̱maṃ siṣā̍sate śa̱gdhi stomā̍ya pūrvya
||11||śa̱gdhī no̍ a̱sya yaddha̍ pau̱ramāvi̍tha̱ dhiya̍ indra̱ siṣā̍sataḥ |
śa̱gdhi yathā̱ ruśa̍ma̱ṃ śyāva̍ka̱ṃ kṛpa̱mindra̱ prāva̱: sva̍rṇaram
||12||kannavyo̍ ata̱sīnā̍ṃ tu̱ro gṛ̍ṇīta̱ martya̍: | na̱hī nva̍sya mahi̱māna̍mindri̱yaṃ sva̍rgṛ̱ṇanta̍ āna̱śuḥ
||13||kadu̍ stu̱vanta̍ ṛtayanta de̱vata̱ ṛṣi̱: ko vipra̍ ohate |
ka̱dā hava̍ṃ maghavannindra sunva̱taḥ kadu̍ stuva̱ta ā ga̍maḥ
||14||udu̱ tye madhu̍mattamā̱ gira̱: stomā̍sa īrate | sa̱trā̱jito̍ dhana̱sā akṣi̍totayo vāja̱yanto̱ rathā̍ iva
||15||kaṇvā̍ iva̱ bhṛga̍va̱: sūryā̍ iva̱ viśva̱middhī̱tamā̍naśuḥ | indra̱ṃ stome̍bhirma̱haya̍nta ā̱yava̍: pri̱yame̍dhāso asvaran
||16||yu̱kṣvā hi vṛ̍trahantama̱ harī̍ indra parā̱vata̍: | a̱rvā̱cī̱no ma̍ghava̱ntsoma̍pītaya u̱gra ṛ̱ṣvebhi̱rā ga̍hi
||17||i̱me hi te̍ kā̱ravo̍ vāva̱śurdhi̱yā viprā̍so me̱dhasā̍taye | sa tvaṃ no̍ maghavannindra girvaṇo ve̱no na śṛ̍ṇudhī̱ hava̍m
||18||niri̍ndra bṛha̱tībhyo̍ vṛ̱traṃ dhanu̍bhyo asphuraḥ | nirarbu̍dasya̱ mṛga̍yasya mā̱yino̱ niḥ parva̍tasya̱ gā ā̍jaḥ
||19||nira̱gnayo̍ rurucu̱rniru̱ sūryo̱ niḥ soma̍ indri̱yo rasa̍: | nira̱ntari̍kṣādadhamo ma̱hāmahi̍ṃ kṛ̱ṣe tadi̍ndra̱ pauṃsya̍m
||20||yaṃ me̱ durindro̍ ma̱ruta̱: pāka̍sthāmā̱ kaura̍yāṇaḥ | viśve̍ṣā̱ṃ tmanā̱ śobhi̍ṣṭha̱mupe̍va di̱vi dhāva̍mānam
||21||rohi̍taṃ me̱ pāka̍sthāmā su̱dhura̍ṃ kakṣya̱prām | adā̍drā̱yo vi̱bodha̍nam
||22||yasmā̍ a̱nye daśa̱ prati̱ dhura̱ṃ vaha̍nti̱ vahna̍yaḥ | asta̱ṃ vayo̱ na tugrya̍m
||23||ā̱tmā pi̱tusta̱nūrvāsa̍ ojo̱dā a̱bhyañja̍nam |
tu̱rīya̱midrohi̍tasya̱ pāka̍sthāmānaṃ bho̱jaṃ dā̱tāra̍mabravam
||24||