34 sukakṣa āṅgirasa: | indra:, 34 indra-ṛbhavaśca | gāyatrī |
udgheda̱bhi śru̱tāma̍ghaṃ vṛṣa̱bhaṃ naryā̍pasam | astā̍rameṣi sūrya
||1||nava̱ yo na̍va̱tiṃ puro̍ bi̱bheda̍ bā̱hvo̍jasā | ahi̍ṃ ca vṛtra̱hāva̍dhīt
||2||sa na̱ indra̍: śi̱vaḥ sakhā'śvā̍va̱dgoma̱dyava̍mat | u̱rudhā̍reva dohate
||3||yada̱dya kacca̍ vṛtrahannu̱dagā̍ a̱bhi sū̍rya | sarva̱ṃ tadi̍ndra te̱ vaśe̍
||4||yadvā̍ pravṛddha satpate̱ na ma̍rā̱ iti̱ manya̍se | u̱to tatsa̱tyamittava̍
||5||ye somā̍saḥ parā̱vati̱ ye a̍rvā̱vati̍ sunvi̱re | sarvā̱m̐stām̐ i̍ndra gacchasi
||6||tamindra̍ṃ vājayāmasi ma̱he vṛ̱trāya̱ hanta̍ve | sa vṛṣā̍ vṛṣa̱bho bhu̍vat
||7||indra̱: sa dāma̍ne kṛ̱ta oji̍ṣṭha̱: sa made̍ hi̱taḥ | dyu̱mnī ślo̱kī sa so̱myaḥ
||8||gi̱rā vajro̱ na sambhṛ̍ta̱: saba̍lo̱ ana̍pacyutaḥ | va̱va̱kṣa ṛ̱ṣvo astṛ̍taḥ
||9||du̱rge ci̍nnaḥ su̱gaṃ kṛ̍dhi gṛṇā̱na i̍ndra girvaṇaḥ | tvaṃ ca̍ maghava̱nvaśa̍:
||10||yasya̍ te̱ nū ci̍dā̱diśa̱ṃ na mi̱nanti̍ sva̱rājya̍m | na de̱vo nādhri̍gu̱rjana̍:
||11||adhā̍ te̱ apra̍tiṣkutaṃ de̱vī śuṣma̍ṃ saparyataḥ | u̱bhe su̍śipra̱ roda̍sī
||12||tvame̱tada̍dhārayaḥ kṛ̱ṣṇāsu̱ rohi̍ṇīṣu ca | paru̍ṣṇīṣu̱ ruśa̱tpaya̍:
||13||vi yadahe̱radha̍ tvi̱ṣo viśve̍ de̱vāso̱ akra̍muḥ | vi̱danmṛ̱gasya̱ tām̐ ama̍:
||14||ādu̍ me niva̱ro bhu̍vadvṛtra̱hādi̍ṣṭa̱ pauṃsya̍m | ajā̍taśatru̱rastṛ̍taḥ
||15||śru̱taṃ vo̍ vṛtra̱hanta̍ma̱ṃ pra śardha̍ṃ carṣaṇī̱nām | ā śu̍ṣe̱ rādha̍se ma̱he
||16||a̱yā dhi̱yā ca̍ gavya̱yā puru̍ṇāma̱npuru̍ṣṭuta | yatsome̍soma̱ ābha̍vaḥ
||17||bo̱dhinma̍nā̱ ida̍stu no vṛtra̱hā bhūryā̍sutiḥ | śṛ̱ṇotu̍ śa̱kra ā̱śiṣa̍m
||18||kayā̱ tvaṃ na̍ ū̱tyā'bhi pra ma̍ndase vṛṣan | kayā̍ sto̱tṛbhya̱ ā bha̍ra
||19||kasya̱ vṛṣā̍ su̱te sacā̍ ni̱yutvā̍nvṛṣa̱bho ra̍ṇat | vṛ̱tra̱hā soma̍pītaye
||20||a̱bhī ṣu ṇa̱stvaṃ ra̱yiṃ ma̍ndasā̱naḥ sa̍ha̱sriṇa̍m | pra̱ya̱ntā bo̍dhi dā̱śuṣe̍
||21||patnī̍vantaḥ su̱tā i̱ma u̱śanto̍ yanti vī̱taye̍ | a̱pāṃ jagmi̍rnicumpu̱ṇaḥ
||22||i̱ṣṭā hotrā̍ asṛkṣa̱tendra̍ṃ vṛ̱dhāso̍ adhva̱re | acchā̍vabhṛ̱thamoja̍sā
||23||i̱ha tyā sa̍dha̱mādyā̱ harī̱ hira̍ṇyakeśyā | vo̱l̤hāma̱bhi prayo̍ hi̱tam
||24||tubhya̱ṃ somā̍: su̱tā i̱me stī̱rṇaṃ ba̱rhirvi̍bhāvaso | sto̱tṛbhya̱ indra̱mā va̍ha
||25||ā te̱ dakṣa̱ṃ vi ro̍ca̱nā dadha̱dratnā̱ vi dā̱śuṣe̍ | sto̱tṛbhya̱ indra̍marcata
||26||ā te̍ dadhāmīndri̱yamu̱kthā viśvā̍ śatakrato | sto̱tṛbhya̍ indra mṛl̤aya
||27||bha̱drambha̍draṃ na̱ ā bha̱reṣa̱mūrja̍ṃ śatakrato | yadi̍ndra mṛ̱l̤ayā̍si naḥ
||28||sa no̱ viśvā̱nyā bha̍ra suvi̱tāni̍ śatakrato | yadi̍ndra mṛ̱l̤ayā̍si naḥ
||29||tvāmidvṛ̍trahantama su̱tāva̍nto havāmahe | yadi̍ndra mṛ̱l̤ayā̍si naḥ
||30||upa̍ no̱ hari̍bhiḥ su̱taṃ yā̱hi ma̍dānāṃ pate | upa̍ no̱ hari̍bhiḥ su̱tam
||31||dvi̱tā yo vṛ̍tra̱hanta̍mo vi̱da indra̍: śa̱takra̍tuḥ | upa̍ no̱ hari̍bhiḥ su̱tam
||32||tvaṃ hi vṛ̍trahanneṣāṃ pā̱tā somā̍nā̱masi̍ | upa̍ no̱ hari̍bhiḥ su̱tam
||33||indra̍ i̱ṣe da̍dātu na ṛbhu̱kṣaṇa̍mṛ̱bhuṃ ra̱yim | vā̱jī da̍dātu vā̱jina̍m
||34||