18 sobhari: kāṇva:| indra: 17 -18 citra: | pragātha: = (viṣamā kakup , samā satobṛhatī ) |
va̱yamu̱ tvāma̍pūrvya sthū̱raṃ na kacci̱dbhara̍nto'va̱syava̍: | vāje̍ ci̱traṃ ha̍vāmahe
||1||upa̍ tvā̱ karma̍nnū̱taye̱ sa no̱ yuvo̱graśca̍krāma̱ yo dhṛ̱ṣat | tvāmiddhya̍vi̱tāra̍ṃ vavṛ̱mahe̱ sakhā̍ya indra sāna̱sim
||2||ā yā̍hī̱ma inda̱vo'śva̍pate̱ gopa̍ta̱ urva̍rāpate | soma̍ṃ somapate piba
||3||va̱yaṃ hi tvā̱ bandhu̍mantamaba̱ndhavo̱ viprā̍sa indra yemi̱ma |
yā te̱ dhāmā̍ni vṛṣabha̱ tebhi̱rā ga̍hi̱ viśve̍bhi̱: soma̍pītaye
||4||sīda̍ntaste̱ vayo̍ yathā̱ gośrī̍te̱ madhau̍ madi̱re vi̱vakṣa̍ṇe | a̱bhi tvāmi̍ndra nonumaḥ
||5||acchā̍ ca tvai̱nā nama̍sā̱ vadā̍masi̱ kiṃ muhu̍ści̱dvi dī̍dhayaḥ |
santi̱ kāmā̍so harivo da̱diṣṭvaṃ smo va̱yaṃ santi̍ no̱ dhiya̍:
||6||nūtnā̱ idi̍ndra te va̱yamū̱tī a̍bhūma na̱hi nū te̍ adrivaḥ | vi̱dmā pu̱rā parī̍ṇasaḥ
||7||vi̱dmā sa̍khi̱tvamu̱ta śū̍ra bho̱jya1mā te̱ tā va̍jrinnīmahe |
u̱to sa̍masmi̱nnā śi̍śīhi no vaso̱ vāje̍ suśipra̱ goma̍ti
||8||yo na̍ i̱dami̍daṃ pu̱rā pra vasya̍ āni̱nāya̱ tamu̍ vaḥ stuṣe | sakhā̍ya̱ indra̍mū̱taye̍
||9||harya̍śva̱ṃ satpa̍tiṃ carṣaṇī̱saha̱ṃ sa hi ṣmā̱ yo ama̍ndata |
ā tu na̱: sa va̍yati̱ gavya̱maśvya̍ṃ sto̱tṛbhyo̍ ma̱ghavā̍ śa̱tam
||10||tvayā̍ ha svidyu̱jā va̱yaṃ prati̍ śva̱santa̍ṃ vṛṣabha bruvīmahi | sa̱ṃsthe jana̍sya̱ goma̍taḥ
||11||jaye̍ma kā̱re pu̍ruhūta kā̱riṇo̱'bhi ti̍ṣṭhema dū̱ḍhya̍: | nṛbhi̍rvṛ̱traṃ ha̱nyāma̍ śūśu̱yāma̱ cā've̍rindra̱ pra ṇo̱ dhiya̍:
||12||a̱bhrā̱tṛ̱vyo a̱nā tvamanā̍pirindra ja̱nuṣā̍ sa̱nāda̍si | yu̱dhedā̍pi̱tvami̍cchase
||13||nakī̍ re̱vanta̍ṃ sa̱khyāya̍ vindase̱ pīya̍nti te surā̱śva̍: | ya̱dā kṛ̱ṇoṣi̍ nada̱nuṃ samū̍ha̱syāditpi̱teva̍ hūyase
||14||mā te̍ amā̱juro̍ yathā mū̱rāsa̍ indra sa̱khye tvāva̍taḥ | ni ṣa̍dāma̱ sacā̍ su̱te
||15||mā te̍ godatra̱ nira̍rāma̱ rādha̍sa̱ indra̱ mā te̍ gṛhāmahi | dṛ̱l̤hā ci̍da̱ryaḥ pra mṛ̍śā̱bhyā bha̍ra̱ na te̍ dā̱māna̍ ā̱dabhe̍
||16||indro̍ vā̱ ghediya̍nma̱ghaṃ sara̍svatī vā su̱bhagā̍ da̱dirvasu̍ | tvaṃ vā̍ citra dā̱śuṣe̍
||17||citra̱ idrājā̍ rāja̱kā ida̍nya̱ke ya̱ke sara̍svatī̱manu̍ | pa̱rjanya̍ iva ta̱tana̱ddhi vṛ̱ṣṭyā sa̱hasra̍ma̱yutā̱ dada̍t
||18||