11 vasuśruta ātreyaḥ| agniḥ| triṣṭup|
tvāma̍gne̱ vasu̍pati̱ṃ vasū̍nāma̱bhi pra ma̍nde adhva̱reṣu̍ rājan |
tvayā̱ vāja̍ṃ vāja̱yanto̍ jayemā̱'bhi ṣyā̍ma pṛtsu̱tīrmartyā̍nām
||1||ha̱vya̱vāl̤a̱gnira̱jara̍: pi̱tā no̍ vi̱bhurvi̱bhāvā̍ su̱dṛśī̍ko a̱sme |
su̱gā̱rha̱pa̱tyāḥ samiṣo̍ didīhyasma̱drya1k saṃ mi̍mīhi̱ śravā̍ṃsi
||2||vi̱śāṃ ka̱viṃ vi̱śpati̱ṃ mānu̍ṣīṇā̱ṃ śuci̍ṃ pāva̱kaṃ ghṛ̱tapṛ̍ṣṭhama̱gnim |
ni hotā̍raṃ viśva̱vida̍ṃ dadhidhve̱ sa de̱veṣu̍ vanate̱ vāryā̍ṇi
||3||ju̱ṣasvā̍gna̱ il̤a̍yā sa̱joṣā̱ yata̍māno ra̱śmibhi̱: sūrya̍sya |
ju̱ṣasva̍ naḥ sa̱midha̍ṃ jātaveda̱ ā ca̍ de̱vān ha̍vi̱radyā̍ya vakṣi
||4||juṣṭo̱ damū̍nā̱ ati̍thirduro̱ṇa i̱maṃ no̍ ya̱jñamupa̍ yāhi vi̱dvān |
viśvā̍ agne abhi̱yujo̍ vi̱hatyā̍ śatrūya̱tāmā bha̍rā̱ bhoja̍nāni
||5||va̱dhena̱ dasyu̱ṃ pra hi cā̱taya̍sva̱ vaya̍: kṛṇvā̱nasta̱nve̱3 svāyai̍ |
pipa̍rṣi̱ yat sa̍hasasputra de̱vān tso a̍gne pāhi nṛtama̱ vāje̍ a̱smān
||6||va̱yaṃ te̍ agna u̱kthairvi̍dhema va̱yaṃ ha̱vyaiḥ pā̍vaka bhadraśoce |
a̱sme ra̱yiṃ vi̱śvavā̍ra̱ṃ sami̍nvā̱sme viśvā̍ni̱ dravi̍ṇāni dhehi
||7||a̱smāka̍magne adhva̱raṃ ju̍ṣasva̱ saha̍saḥ sūno triṣadhastha ha̱vyam |
va̱yaṃ de̱veṣu̍ su̱kṛta̍: syāma̱ śarma̍ṇā nastri̱varū̍thena pāhi
||8||viśvā̍ni no du̱rgahā̍ jātaveda̱: sindhu̱ṃ na nā̱vā du̍ri̱tāti̍ parṣi |
agne̍ atri̱vannama̍sā gṛṇā̱no̱3'smāka̍ṃ bodhyavi̱tā ta̱nūnā̍m
||9||yastvā̍ hṛ̱dā kī̱riṇā̱ manya̍mā̱no'ma̍rtya̱ṃ martyo̱ joha̍vīmi |
jāta̍vedo̱ yaśo̍ a̱smāsu̍ dhehi pra̱jābhi̍ragne amṛta̱tvama̍śyām
||10||yasmai̱ tvaṃ su̱kṛte̍ jātaveda u lo̱kama̍gne kṛ̱ṇava̍: syo̱nam |
a̱śvina̱ṃ sa pu̱triṇa̍ṃ vī̱rava̍nta̱ṃ goma̍ntaṃ ra̱yiṃ na̍śate sva̱sti
||11||