10 śyāvāśva ātreyaḥ| marutaḥ| jagatī, 10 triṣṭup |
praya̍jyavo ma̱ruto̱ bhrāja̍dṛṣṭayo bṛ̱had vayo̍ dadhire ru̱kmava̍kṣasaḥ |
īya̍nte̱ aśvai̍: su̱yame̍bhirā̱śubhi̱: śubha̍ṃ yā̱tāmanu̱ rathā̍ avṛtsata
||1||sva̱yaṃ da̍dhidhve̱ tavi̍ṣī̱ṃ yathā̍ vi̱da bṛ̱hanma̍hānta urvi̱yā vi rā̍jatha |
u̱tāntari̍kṣaṃ mamire̱ vyoja̍sā̱ śubha̍ṃ yā̱tāmanu̱ rathā̍ avṛtsata
||2||sā̱kaṃ jā̱tāḥ su̱bhva̍: sā̱kamu̍kṣi̱tāḥ śri̱ye ci̱dā pra̍ta̱raṃ vā̍vṛdhu̱rnara̍: |
vi̱ro̱kiṇa̱: sūrya̍syeva ra̱śmaya̱: śubha̍ṃ yā̱tāmanu̱ rathā̍ avṛtsata
||3||ā̱bhū̱ṣeṇya̍ṃ vo maruto mahitva̱naṃ di̍dṛ̱kṣeṇya̱ṃ sūrya̍syeva̱ cakṣa̍ṇam |
u̱to a̱smām̐ a̍mṛta̱tve da̍dhātana̱ śubha̍ṃ yā̱tāmanu̱ rathā̍ avṛtsata
||4||udī̍rayathā marutaḥ samudra̱to yū̱yaṃ vṛ̱ṣṭiṃ va̍rṣayathā purīṣiṇaḥ |
na vo̍ dasrā̱ upa̍ dasyanti dhe̱nava̱: śubha̍ṃ yā̱tāmanu̱ rathā̍ avṛtsata
||5||yadaśvā̍n dhū̱rṣu pṛṣa̍tī̱rayu̍gdhvaṃ hira̱ṇyayā̱n pratyatkā̱m̐ amu̍gdhvam |
viśvā̱ it spṛdho̍ maruto̱ vya̍syatha̱ śubha̍ṃ yā̱tāmanu̱ rathā̍ avṛtsata
||6||na parva̍tā̱ na na̱dyo̍ varanta vo̱ yatrāci̍dhvaṃ maruto̱ gaccha̱thedu̱ tat |
u̱ta dyāvā̍pṛthi̱vī yā̍thanā̱ pari̱ śubha̍ṃ yā̱tāmanu̱ rathā̍ avṛtsata
||7||yat pū̱rvyaṃ ma̍ruto̱ yacca̱ nūta̍na̱ṃ yadu̱dyate̍ vasavo̱ yacca̍ śa̱syate̍ |
viśva̍sya̱ tasya̍ bhavathā̱ nave̍dasa̱: śubha̍ṃ yā̱tāmanu̱ rathā̍ avṛtsata
||8||mṛ̱l̤ata̍ no maruto̱ mā va̍dhiṣṭanā̱'smabhya̱ṃ śarma̍ bahu̱laṃ vi ya̍ntana |
adhi̍ sto̱trasya̍ sa̱khyasya̍ gātana̱ śubha̍ṃ yā̱tāmanu̱ rathā̍ avṛtsata
||9||yū̱yama̱smān na̍yata̱ vasyo̱ acchā̱ nira̍ṃha̱tibhyo̍ maruto gṛṇā̱nāḥ |
ju̱ṣadhva̍ṃ no ha̱vyadā̍tiṃ yajatrā va̱yaṃ syā̍ma̱ pata̍yo rayī̱ṇām
||10||