7 arcanānā ātreyaḥ| mitrāvaruṇau| anuṣṭup, 7 paṅktiḥ|
varu̍ṇaṃ vo ri̱śāda̍samṛ̱cā mi̱traṃ ha̍vāmahe | pari̍ vra̱jeva̍ bā̱hvorja̍ga̱nvāṃsā̱ sva̍rṇaram
||1||tā bā̱havā̍ suce̱tunā̱ pra ya̍ntamasmā̱ arca̍te | śeva̱ṃ hi jā̱rya̍ṃ vā̱ṃ viśvā̍su̱ kṣāsu̱ jogu̍ve
||2||yannū̱nama̱śyāṃ gati̍ṃ mi̱trasya̍ yāyāṃ pa̱thā | asya̍ pri̱yasya̱ śarma̱ṇyahi̍ṃsānasya saścire
||3||yu̱vābhyā̍ṃ mitrāvaruṇopa̱maṃ dhe̍yāmṛ̱cā | yaddha̱ kṣaye̍ ma̱ghonā̍ṃ stotṝ̱ṇāṃ ca̍ spū̱rdhase̍
||4||ā no̍ mitra sudī̱tibhi̱rvaru̍ṇaśca sa̱dhastha̱ ā | sve kṣaye̍ ma̱ghonā̱ṃ sakhī̍nāṃ ca vṛ̱dhase̍
||5||yu̱vaṃ no̱ yeṣu̍ varuṇa kṣa̱traṃ bṛ̱hacca̍ bibhṛ̱thaḥ | u̱ru ṇo̱ vāja̍sātaye kṛ̱taṃ rā̱ye sva̱staye̍
||6||u̱cchantyā̍ṃ me yaja̱tā de̱vakṣa̍tre̱ ruśa̍dgavi |
su̱taṃ soma̱ṃ na ha̱stibhi̱rā pa̱ḍbhirdhā̍vataṃ narā̱ bibhra̍tāvarca̱nāna̍sam
||7||