शुक्लयजुः काण्वसंहिता — षोडशोऽध्यायः (85 मन्त्राः)

शुक्लयजुः काण्वसंहिता — षोडशोऽध्यायः

अथ षोडशोऽध्यायः

---

मन्त्राः

मन्त्र	प्रथम पद
1	अग्ने जातान्प्रणुदा
2	सहसा जातान्प्रणुदा
3	अग्ने पुरीषमस्यप्सो
4	एवश्छन्दो वरिवश्छन्द
5	सिन्धुश्छन्द समुद्रश्छन्द
6	अक्षरपङ्क्तिश्छन्द पदपङ्क्तिश्छन्दो
7	बृहच्छन्दो रथन्तर
8	एवश्छन्दो वरिवश्छन्दो
9	रश्मिना सत्याय
10	प्रतिधिना पृथिव्या
11	उशिजा वसुभ्यो
12	ऐळेनौषधीभिरोषधीर्जिन्वोत्तमेन तनूभिस्तनूर्जिन्व
13	प्रतिपदसि प्रतिपदे
14	त्रिवृदसि त्रिवृते
15	आक्रमोऽस्याक्रमाय त्वा
16	राज्ञ्यसि प्राची
17	त्रिवृत् त्वा
18	ऋषयस्त्वा प्रथमजा
19	विराळसि दक्षिणा
20	पञ्चदशस्त्वा स्तोम
21	ऋषयस्त्वा प्रथमजा
22	सम्राळसि प्रतीची
23	सप्तदशस्त्वा स्तोम
24	ऋषयस्त्वा प्रथमजा
25	स्वराळस्युदीची दिङ्
26	एकविशस्त्वा स्तोम
27	ऋषयस्त्वा प्रथमजा
28	अधिपत्न्यसि बृहती
29	त्रिणवत्रयस्त्रिशौ त्वा
30	ऋषयस्त्वा प्रथमजा
31	अय पुरो
32	तेभ्यो नमो
33	अय दक्षिणा
34	तेभ्यो नमो
35	अय पश्चाद्विश्वव्यचास्तस्य
36	तेभ्यो नमो
37	अयमुत्तरात्सयद्वसुस्तस्य तार्क्ष्यश्चारिष्टनेमिश्च
38	तेभ्यो नमो
39	अयमुपर्यर्वाग्वसुस्तस्य सेनजिच्च
40	तेभ्यो नमो
41	अग्निर्मूर्धा दिव
42	अयमग्नि सहस्रिणो
43	त्वामग्ने पुष्करादध्यथर्वा
44	भुवो यज्ञस्य
45	अबोध्यग्नि समिधा
46	अवोचाम कवये
47	अयमिह प्रथमो
48	जनस्य गोपा
49	त्वामग्ने अङ्गिरसो
50	सखाय स
51	ससमिद्युवसे वृषन्नग्ने
52	त्वामग्ने हविष्मन्तो
53	त्वा चित्रश्रवस्तम
54	एना वो
55	विश्वस्य दूतममृत
56	स दुद्रवत्
57	अग्ने वाजस्य
58	स इधानो
59	क्षपो राजन्नुत
60	भद्रो नो
61	भद्रा उत
62	येना समत्सु
63	अग्नि त
64	सो अग्निर्यो
65	उभे सुश्चन्द्र
66	अग्ने तमद्याश्व
67	अधा ह्यग्ने
68	एभिर्नो अर्कैर्भवा
69	अग्नि होतार
70	अग्ने त्व
71	येन ऋषयस्तपसा
72	त पत्नीभिरनु
73	आ वाचो
74	अयमग्निर्वीरतमो वयोधा
75	सप्रच्यवध्वमुप सप्रयाताग्ने
76	उद्बुध्यस्वाग्ने प्रतिजागृहि
77	येन वहसि
78	अय ते
79	तपश्च तपस्यश्च
80	लोक पृण
81	ता अस्य
82	इन्द्र विश्वा
83	प्रोथदश्वो न
84	आयोष्ट्वा सदने
85	सहस्रस्य प्रमासि

---

मन्त्र 1 {#mantra-1}

अध्याय: 16 | मन्त्र: 1

अग्ने॑ जा॒तान्प्रणु॑दा नः स॒पत्ना॒न्प्रत्यजा॑ताञ्जातवेदो नुदस्व । अधि॑ नो ब्रूहि सु॒मना॒ अहे॑ळस्तव॑ स्याम॒ शर्मस्त्रि॒वरू॑थ उद्भौ

---

मन्त्र 2 {#mantra-2}

अध्याय: 16 | मन्त्र: 2

सह॑सा जा॒तान्प्रणु॑दा नः स॒पत्ना॒न्प्रत्यजा॑तान्नुद जातवेदः । अधि॑ नो ब्रूहि सुमन॒स्यमा॑नो व॒य स्या॑म॒ प्रणु॑दा नः स॒पत्ना॑न् । षो॒ळ॒शी स्तोम॒ ओजो॒ द्रवि॑णं चतुश्चत्वारि॒श स्तोमो॒ वर्चो॒ द्रवि॑णम्

---

मन्त्र 3 {#mantra-3}

अध्याय: 16 | मन्त्र: 3

अ॒ग्नेः पुरी॑षम॒स्यप्सो॒ नाम॒ तां त्वा॒ विश्वे॑ अ॒भिगृ॑णन्तु दे॒वाः । स्तोम॑पृष्ठा घृ॒तव॑ती॒ह सी॑द प्र॒जाव॑द॒स्मे द्रवि॒णाय॑जस्व

---

मन्त्र 4 {#mantra-4}

अध्याय: 16 | मन्त्र: 4

एव॒श्छन्दो॒ वरि॑व॒श्छन्दः॑ श॒म्भूश्छन्दः॑ प॑रि॒भूश्छन्दः॑ । आ॒च्छच्छन्दो॒ मन॒श्छन्दो व्यच॒श्छन्दः॑

---

मन्त्र 5 {#mantra-5}

अध्याय: 16 | मन्त्र: 5

सिन्धु॒श्छन्दः॑ समु॒द्रश्छन्दः॑ सरि॒रं छन्दः॑ । क॒कुप् छन्द॑स्त्रिक॒कुप् छन्दः॑ का॒व्यं छन्दो॑ अङ कु॒पं छन्दः॑

---

मन्त्र 6 {#mantra-6}

अध्याय: 16 | मन्त्र: 6

अ॒क्षर॑पङ्क्ति॒श्छन्दः॑ प॒दप॑ङ्क्ति॒श्छन्दो॑ विष्टा॒रप॑ङ्क्ति॒श्छन्दः॑ क्षु॒रोभ्राज॒श्छन्दः॑ । आ॒च्छच्छन्दः॑ प्र॒च्छच्छन्दः॑ सं॒यच्छन्दो॑ वि॒यच्छन्दः॑

---

मन्त्र 7 {#mantra-7}

अध्याय: 16 | मन्त्र: 7

बृ॒हच्छन्दो॑ रथन्त॒रं छन्दो॑ निका॒यश्छन्दो॑ विव॒धश्छन्दः॑ । गिर॒श्छन्दो॒ भ्रज॒श्छन्दः॑ स॒स्तुप् छन्दो॑ऽनु॒ष्टुप् छन्दः॑

---

मन्त्र 8 {#mantra-8}

अध्याय: 16 | मन्त्र: 8

एव॒श्छन्दो॒ वरि॑व॒श्छन्दो॒ वय॒श्छन्दो॑ वय॒स्कृच्छन्दः॑ । विष्प॑र्धा॒श्छन्दो॑ विशा॒लं छन्द॑श्छ॒दिश्छन्दो॑ दूरोह॒णं छन्दः॑ । त॒न्द्रं छन्दो॑ अङ्का॒ङ्कं छन्दः॑

---

मन्त्र 9 {#mantra-9}

अध्याय: 16 | मन्त्र: 9

र॒श्मिना॑ स॒त्याय॑ स॒त्यं जि॑न्व॒ प्रेति॑ना॒ धर्म॑णा॒ धर्मं॑ जिन्व । अन्वि॑त्या दि॒वा दिवं॑ जिन्व स॒न्धिना॒न्तरि॑क्षेणा॒न्तरि॑क्षं जिन्व

---

मन्त्र 10 {#mantra-10}

अध्याय: 16 | मन्त्र: 10

प्र॒ति॒धिना॑ पृथि॒व्या पृ॑थि॒वीं जि॑न्व विष्ट॒म्भेन॒ वृष्ट्या॒ वृष्टिं॑ जिन्व । प्र॒वयाह्नाह॑र्जिन्वानु॒या रात्र्या॒ रात्रीं॑ जिन्व

---

मन्त्र 11 {#mantra-11}

अध्याय: 16 | मन्त्र: 11

उ॒शिजा॒ वसु॑भ्यो॒ वसू॑ञ्जिन्व प्रके॒तेना॑दि॒त्येभ्य॑ आदि॒त्याञ्जि॑न्व । तन्तु॑ना रा॒यस्पोषे॑ण रा॒यस्पोषं॑ जिन्व सस॒र्पेण॑ श्रु॒ताय॑ श्रु॒तं जि॑न्व

---

मन्त्र 12 {#mantra-12}

अध्याय: 16 | मन्त्र: 12

ऐ॒ळेनौष॑धीभि॒रोष॑धीर्जिन्वोत्त॒मेन॑ त॒नूभि॑स्त॒नूर्जि॑न्व । व॒यो॒धसाधी॑ते॒नाधी॑तं जिन्वाभि॒जिता॒ तेज॑सा॒ तेजो॑ जिन्व

---

मन्त्र 13 {#mantra-13}

अध्याय: 16 | मन्त्र: 13

प्र॒ति॒पद॑सि प्रति॒पदे॑ त्वानु॒पद॑स्यनु॒पदे॑ त्वा । स॒म्पद॑सि स॒म्पदे॑ त्वा॒ तेजो॑ऽसि॒ तेज॑से त्वा

---

मन्त्र 14 {#mantra-14}

अध्याय: 16 | मन्त्र: 14

त्रि॒वृद॑सि त्रि॒वृते॑ त्वा प्र॒वृद॑सि प्र॒वृते॑ त्वा । वि॒वृद॑सि वि॒वृते॑ त्वा स॒वृद॑सि स॒वृते॑ त्वा

---

मन्त्र 15 {#mantra-15}

अध्याय: 16 | मन्त्र: 15

आ॒क्र॒मो॑ऽस्याक्र॒माय॑ त्वा सङ्क्र॒मो॑ऽसि सङ्क्र॒माय॑ त्वा । उ॒त्क्र॒मो॑ऽस्युत्क्र॒माय॒ त्वोत्क्रा॑न्तिर॒स्युत्क्रा॑न्त्यै त्वा । अधि॑पतिनो॒र्जोर्जं॑ जिन्व॒ वेष॑श्रीः क्ष॒त्राय॑ क्ष॒त्रं जि॑न्व

---

मन्त्र 16 {#mantra-16}

अध्याय: 16 | मन्त्र: 16

राज्ञ्य॑सि॒ प्राची॒ दिग्वस॑वस्ते दे॒वा अधि॑पतयः । अ॒ग्निर्हे॑ती॒नां प्र॑तिध॒र्ता

---

मन्त्र 17 {#mantra-17}

अध्याय: 16 | मन्त्र: 17

त्रि॒वृत् त्वा॒ स्तोमः॑ पृथि॒व्या श्र॑य॒त्वाज्य॑मु॒क्थमव्य॑थायै स्तभ्नातु । र॒थ॒न्त॒र साम॒ प्रति॑ष्ठित्या अ॒न्तरि॑क्षे

---

मन्त्र 18 {#mantra-18}

अध्याय: 16 | मन्त्र: 18

ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु । वि॒ध॒र्ता चा॒यमधि॑पतिश्च॒ ते त्वा॒ सर्वे॑ संविदा॒ना नाक॑स्य पृ॒ष्ठे स्व॒र्गे लो॒के यज॑मानं च सादयन्तु

---

मन्त्र 19 {#mantra-19}

अध्याय: 16 | मन्त्र: 19

वि॒राळ॑सि॒ दक्षि॑णा॒ दिग्रु॒द्रास्ते॑ दे॒वा अधि॑पतयः । इन्द्रो॑ हेती॒नां प्र॑तिध॒र्ता

---

मन्त्र 20 {#mantra-20}

अध्याय: 16 | मन्त्र: 20

प॒ञ्च॒द॒शस्त्वा॒ स्तोमः॑ पृथि॒व्या श्र॑यतु॒ प्र उग॑मु॒क्थमव्य॑थायै स्तभ्नातु । बृ॒हत्साम॒ प्रति॑ष्ठित्या अ॒न्तरि॑क्षे

---

मन्त्र 21 {#mantra-21}

अध्याय: 16 | मन्त्र: 21

ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु । वि॒ध॒र्ता चा॒यमधि॑पतिश्च॒ ते त्वा॒ सर्वे॑ संविदांना नाक॑स्य पृ॒ष्ठे स्व॒र्गे लो॒के यज॑मानं च सादयन्तु

---

मन्त्र 22 {#mantra-22}

अध्याय: 16 | मन्त्र: 22

स॒म्राळ॑सि प्र॒तीची॒ दिगा॑दि॒त्यास्ते॑ दे॒वा अधि॑पतयः । वरु॑णो हेती॒नां प्र॑तिध॒र्ता

---

मन्त्र 23 {#mantra-23}

अध्याय: 16 | मन्त्र: 23

स॒प्तद॒शस्त्वा॒ स्तोमः॑ पृथि॒व्या श्र॑यतु मरुत्व॒तीय॑मु॒क्थमव्य॑थायै स्तभ्नातु । वै॒रू॒प साम॒ प्रति॑ष्ठित्या अ॒न्तरि॑क्षे

---

मन्त्र 24 {#mantra-24}

अध्याय: 16 | मन्त्र: 24

ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु । वि॒ध॒र्ता चा॒यमधि॑पतिश्च॒ ते त्वा॒ सर्वे॑ संविदा॒ना नाक॑स्य पृ॒ष्ठे स्व॒र्गे लो॒के यज॑मानं च सादयन्तु

---

मन्त्र 25 {#mantra-25}

अध्याय: 16 | मन्त्र: 25

स्व॒राळ॒स्युदी॑ची॒ दिङ् म॒रुत॑स्ते दे॒वा अधि॑पतयः । सोमो॑ हेती॒नां प्र॑तिध॒र्ता

---

मन्त्र 26 {#mantra-26}

अध्याय: 16 | मन्त्र: 26

ए॒क॒वि॒शस्त्वा॒ स्तोमः॑ पृथि॒व्या श्र॑यतु॒ निष्के॑वल्यमु॒क्थमव्य॑थायै स्तभ्नातु । वै॒रा॒ज साम॒ प्रति॑ष्ठित्या अ॒न्तरि॑क्षे

---

मन्त्र 27 {#mantra-27}

अध्याय: 16 | मन्त्र: 27

ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु । वि॒ध॒र्ता चा॒यमधि॑पतिश्च॒ ते त्वा॒ सर्वे॑ संविदा॒ना नाक॑स्य पृ॒ष्ठे स्व॒र्गे लो॒के यज॑मानं च सादयन्तु

---

मन्त्र 28 {#mantra-28}

अध्याय: 16 | मन्त्र: 28

अधि॑पत्न्यसि बृह॒ती दिग्विश्वे॑ ते दे॒वा अधि॑पतयः । बृह॒स्पति॑र्हेती॒नां प्र॑तिध॒र्ता

---

मन्त्र 29 {#mantra-29}

अध्याय: 16 | मन्त्र: 29

त्रि॒ण॒व॒त्र॒य॒स्त्रि॒शौ त्वा॒ स्तोमौ॑ पृथि॒व्या श्र॑यतां वैश्वदेवाग्निमारु॒ते उ॒क्थे अव्य॑थायै स्तभ्नीताम् । शा॒क्व॒र॒रै॒व॒ते साम॑नी॒ प्रति॑ष्ठित्या अ॒न्तरि॑क्षे

---

मन्त्र 30 {#mantra-30}

अध्याय: 16 | मन्त्र: 30

ऋष॑यस्त्वा प्रथम॒जा दे॒वेषु॑ दि॒वो मात्र॑या वरि॒म्णा प्र॑थन्तु । विध॒र्ता चा॒यमधि॑पतिश्च॒ ते त्वा॒ सर्वे॑ संविदा॒ना नाक॑स्य पृ॒ष्ठे स्व॒र्गे लो॒के यज॑मानं च सादयन्तु

---

मन्त्र 31 {#mantra-31}

अध्याय: 16 | मन्त्र: 31

अ॒यं पु॒रो हरि॑केशः॒ सूर्य॑रश्मि॒स्तस्य॑ रथगृ॒त्सश्च॒ रथौ॑जाश्च सेनानीग्राम॒ण्यौ॑ । पु॒ञ्जि॒क॒स्थ॒ला च॑ क्रतुस्थ॒ला चा॑प्स॒रसौ॑ द॒ङ्क्ष्णवः॑ प॒शवो॑ हे॒तिः पौ॑रुषेयो व॒धः प्रहे॑तिः

---

मन्त्र 32 {#mantra-32}

अध्याय: 16 | मन्त्र: 32

तेभ्यो॒ नमो॑ अस्तु॒ ते नो॑ मृळयन्तु॒ ते नो॑ऽवन्तु । ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः

---

मन्त्र 33 {#mantra-33}

अध्याय: 16 | मन्त्र: 33

अ॒यं द॑क्षि॒णा वि॒श्वक॑र्मा॒ तस्य॑ रथस्व॒नश्च॒ रथे॑चित्रश्च सेनानीग्राम॒ण्यौ॑ । मे॒न॒का च॑ सहज॒न्या चा॑प्स॒रसौ॑ यातु॒धाना॑ हे॒ती रक्षा॑सि॒ प्रहे॑तिः

---

मन्त्र 34 {#mantra-34}

अध्याय: 16 | मन्त्र: 34

तेभ्यो॒ नमो॑ अस्तु॒ ते नो॑ मृळयन्तु॒ ते नो॑ऽवन्तु । ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः

---

मन्त्र 35 {#mantra-35}

अध्याय: 16 | मन्त्र: 35

अ॒यं प॒श्चाद्वि॒श्वव्य॑चा॒स्तस्य॒ रथ॑प्रोत॒श्चास॑मरथश्च सेनानीग्राम॒ण्यौ॑ । प्र॒म्लोच॑न्ती चानु॒म्लोच॑न्ती चाप्स॒रसौ॑ व्या॒घ्रा हे॒तिः स॒र्पा प्रहे॑तिः

---

मन्त्र 36 {#mantra-36}

अध्याय: 16 | मन्त्र: 36

तेभ्यो॒ नमो॑ अस्तु॒ ते नो॑ मृळयन्तु॒ ते नो॑ऽवन्तु । ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः

---

मन्त्र 37 {#mantra-37}

अध्याय: 16 | मन्त्र: 37

अ॒यमु॑त्त॒रात्सं॒यद्व॑सु॒स्तस्य॒ तार्क्ष्य॒श्चारि॑ष्टनेमिश्च सेनानीग्राम॒ण्यौ॑ । वि॒श्वाची॑ च घृ॒ताची॑ चाप्स॒रसा॒ आपो॑ हे॒तिर्वातः॒ प्रहे॑तिः

---

मन्त्र 38 {#mantra-38}

अध्याय: 16 | मन्त्र: 38

तेभ्यो॒ नमो॑ अस्तु॒ ते नो॑ मृळयन्तु॒ ते नो॑ऽवन्तु । ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः

---

मन्त्र 39 {#mantra-39}

अध्याय: 16 | मन्त्र: 39

अ॒यमु॒पर्य॒र्वाग्व॑सु॒स्तस्य॑ सेन॒जिच्च॑ सु॒षेण॑श्च सेनानीग्राम॒ण्यौ॑ । उ॒र्वशी॑ च पू॒र्वचि॑त्तिश्चाप्स॒रसा॑ अव॒स्फूर्ज॑न्हे॒तिर्वि॒द्युत्प्रहे॑ति॒

---

मन्त्र 40 {#mantra-40}

अध्याय: 16 | मन्त्र: 40

तेभ्यो॒ नमो॑ अस्तु॒ ते नो॑ मृळयन्तु॒ ते नो॑ऽवन्तु। ते यं द्वि॒ष्मो यश्च॑ नो॒ द्वेष्टि॒ तमे॑षां॒ जम्भे॑ दध्मः

---

मन्त्र 41 {#mantra-41}

अध्याय: 16 | मन्त्र: 41

अ॒ग्निर्मू॒र्धा दि॒वः क॒कुत्पतिः॑ पृथि॒व्या अ॒यम् । अ॒पा रेता॑सि जिन्वति

---

मन्त्र 42 {#mantra-42}

अध्याय: 16 | मन्त्र: 42

अ॒यम॒ग्निः स॑ह॒स्रिणो॒ वाज॑स्य श॒तिन॒स्पतिः॑ । मू॒र्धा क॒वी र॑यी॒णाम्

---

मन्त्र 43 {#mantra-43}

अध्याय: 16 | मन्त्र: 43

त्वाम॑ग्ने॒ पुष्क॑रा॒दध्यथ॑र्वा॒ निर॑मन्थत । मू॒र्ध्नो विश्व॑स्य वा॒घतः॑

---

मन्त्र 44 {#mantra-44}

अध्याय: 16 | मन्त्र: 44

भुवो॑ य॒ज्ञस्य॒ रज॑सश्च ने॒ता यत्रा॑ नि॒युद्भिः॒ सच॑से शि॒वाभिः॑ । दि॒वि मू॒र्धानं॑ दधिषे स्व॒र्षां जि॒ह्वाम॑ग्ने चकृषे हव्य॒वाह॑म्

---

मन्त्र 45 {#mantra-45}

अध्याय: 16 | मन्त्र: 45

अबो॑ध्य॒ग्निः स॒मिधा॒ जना॑नां॒ प्रति॑ धे॒नुमि॑वाय॒तीमु॒षास॑म् । य॒ह्वा इ॑व॒ प्र व॒यामु॒ज्जिहा॑नाः॒ प्र भा॒नवः॑ सिस्रते॒ नाक॒मच्छ॑

---

मन्त्र 46 {#mantra-46}

अध्याय: 16 | मन्त्र: 46

अवो॑चाम क॒वये॒ मेध्या॑य॒ वचो॑ व॒न्दारु॑ वृष॒भाय॒ वृष्णे॑ । गवि॑ष्ठिरो॒ नम॑सा॒ स्तोम॑म॒ग्नौ दि॒वी॑व रु॒क्ममु॑रु॒व्यञ्च॑मश्रेत्

---

मन्त्र 47 {#mantra-47}

अध्याय: 16 | मन्त्र: 47

अ॒यमि॒ह प्र॑थ॒मो धा॑यि धा॒तृभि॒र्होता॒ यजि॑ष्ठो अध्व॒रेष्वीड्यः॑ । यमप्न॑वानो॒ भृग॑वो विरुरु॒चुर्वने॑षु चि॒त्रं वि॒भ्वं॑ वि॒शेवि॑शे

---

मन्त्र 48 {#mantra-48}

अध्याय: 16 | मन्त्र: 48

जन॑स्य गो॒पा अ॑जनिष्ट॒ जागृ॑विर॒ग्निः सु॒दक्षः॑ सुवि॒ताय॒ नव्य॑से । घृ॒तप्र॑तीको बृह॒ता दि॑वि॒स्पृशा॑ द्यु॒मद्वि भा॑ति भर॒तेभ्यः॒ शुचिः॑

---

मन्त्र 49 {#mantra-49}

अध्याय: 16 | मन्त्र: 49

त्वाम॑ग्ने॒ अङ्गि॑रसो॒ गुहा॑ हि॒तमन्व॑विन्दच्छिश्रिया॒णं वने॑वने । स जा॑यसे म॒थ्यमा॑नः॒ सहो॑ म॒हत्त्वामा॑हुः॒ सह॑सस्पु॒त्रम॑ङ्गिरः

---

मन्त्र 50 {#mantra-50}

अध्याय: 16 | मन्त्र: 50

सखा॑यः॒ सं वः॑ स॒म्यञ्च॒मिष॒ स्तोमं॑ चा॒ग्नये॑ । वर्षि॑ष्ठाय क्षिती॒नामू॒र्जो नप्त्रे॒ सह॑स्वते

---

मन्त्र 51 {#mantra-51}

अध्याय: 16 | मन्त्र: 51

सस॒मिद्यु॑वसे वृष॒न्नग्ने॒ विश्वा॑न्य॒र्य आ । इ॒ळस्प॒दे समि॑ध्यसे॒ स नो॒ वसू॒न्या भ॑र

---

मन्त्र 52 {#mantra-52}

अध्याय: 16 | मन्त्र: 52

त्वाम॑ग्ने ह॒विष्म॑न्तो दे॒वं मर्ता॑स ईळते । मन्ये॑ त्वा जा॒तवे॑दस॒ स ह॒व्या व॑क्ष्यानु॒षक्

---

मन्त्र 53 {#mantra-53}

अध्याय: 16 | मन्त्र: 53

त्वां चि॑त्रश्रवस्तम॒ हव॑न्ते वि॒क्षु ज॒न्तवः॑ । शो॒चिष्के॑शं पुरुप्रि॒याग्ने॑ ह॒व्याय॒ वोळह॑वे

---

मन्त्र 54 {#mantra-54}

अध्याय: 16 | मन्त्र: 54

ए॒ना वो॑ अ॒ग्निं नम॑सो॒र्जो नपा॑त॒माहु॑वे । प्रि॒यं चेति॑ष्ठमर॒ति स्व॑ध्व॒रं विश्व॑स्य दू॒तम॒मृत॑म्

---

मन्त्र 55 {#mantra-55}

अध्याय: 16 | मन्त्र: 55

विश्व॑स्य दू॒तम॒मृतं॒ विश्व॑स्य दू॒तम॒मृत॑म् । स यो॑जते अरु॒षा वि॒श्वभो॑जसा॒ स दु॑द्रव॒त्स्वा॑हुतः

---

मन्त्र 56 {#mantra-56}

अध्याय: 16 | मन्त्र: 56

स दु॑द्रव॒त् स्वा॑हुतः॒ स दु॑द्रव॒त् स्वा॑हुतः । सु॒ब्रह्मा॑ य॒ज्ञः सु॒शमी॒ वसू॑नां दे॒व राधो॒ जना॑नाम्

---

मन्त्र 57 {#mantra-57}

अध्याय: 16 | मन्त्र: 57

अग्ने॒ वाज॑स्य॒ गोम॑त॒ ईशा॑नः सहसो यहो । अ॒स्मे धे॑हि जातवेदो॒ महि॒ श्रवः॑

---

मन्त्र 58 {#mantra-58}

अध्याय: 16 | मन्त्र: 58

स इ॑धा॒नो वसु॑ष्क॒विर॒ग्निरी॒डेन्यो॑ गि॒रा । रे॒वद॒स्मभ्यं॑ पुर्वणीक दीदिहि

---

मन्त्र 59 {#mantra-59}

अध्याय: 16 | मन्त्र: 59

क्ष॒पो रा॑जन्नु॒त त्मनाग्ने॒ वस्तो॑रु॒तोषसः॑ । स ति॑ग्मजम्भ र॒क्षसो॑ दह॒ प्रति॑

---

मन्त्र 60 {#mantra-60}

अध्याय: 16 | मन्त्र: 60

भ॒द्रो नो॑ अ॒ग्निराहु॑तो भ॒द्रा रा॒तिः सु॑भग भ॒द्रो अ॑ध्व॒रः । भ॒द्रा उ॒त प्रश॑स्तयः

---

मन्त्र 61 {#mantra-61}

अध्याय: 16 | मन्त्र: 61

भ॒द्रा उ॒त प्रश॑स्तयो भ॒द्रं मनः॑ कृणुष्व वृत्र॒तूर्ये॑ । येना॑ स॒मत्सु॑ सा॒सहः॑

---

मन्त्र 62 {#mantra-62}

अध्याय: 16 | मन्त्र: 62

येना॑ स॒मत्सु॑ सा॒सहोऽव॑ स्थि॒रा त॑नुहि॒ भूरि॒ शर्ध॑ताम् । व॒नेमा॑ ते अ॒भिष्टि॑भिः

---

मन्त्र 63 {#mantra-63}

अध्याय: 16 | मन्त्र: 63

अ॒ग्निं तं म॑न्ये॒ यो वसु॒रस्तं॒ यं यन्ति॑ धे॒नवः॑ । अस्त॒मर्व॑न्त आ॒शवोऽस्तं॒ नित्या॑सो वा॒जिन॒ इष॑ स्तो॒तृभ्य॒ आभ॑र

---

मन्त्र 64 {#mantra-64}

अध्याय: 16 | मन्त्र: 64

सो अ॒ग्निर्यो वसु॑र्गृ॒णे सं यमा॒यन्ति॑ धे॒नवः॑ । समर्व॑न्तो रघु॒द्रुवः॒ स सु॑जा॒तासः॑ सू॒रय॒ इष॑ स्तो॒तृभ्य॒ आभ॑र

---

मन्त्र 65 {#mantra-65}

अध्याय: 16 | मन्त्र: 65

उ॒भे सु॑श्चन्द्र स॒र्पिषो॒ दर्वी॑ श्रीणीष आ॒सनि॑ । उ॒तो न॒ उत्पु॑पूर्या उ॒क्थेषु॑ शवसस्पत॒ इष॑ स्तो॒तृभ्य॒ आभ॑र

---

मन्त्र 66 {#mantra-66}

अध्याय: 16 | मन्त्र: 66

अग्ने॒ तम॒द्याश्वं॒ न स्तोमैः॒ क्रतुं॒ न भ॒द्र हृ॑दि॒स्पृश॑म् । ऋ॒ध्यामा॑ त॒ ओहैः॑

---

मन्त्र 67 {#mantra-67}

अध्याय: 16 | मन्त्र: 67

अधा॒ ह्य॑ग्ने॒ क्रतो॑र्भ॒द्रस्य॒ दक्ष॑स्य सा॒धोः । र॒थीरृ॒तस्य॑ बृह॒तो ब॒भूथ॑

---

मन्त्र 68 {#mantra-68}

अध्याय: 16 | मन्त्र: 68

ए॒भिर्नो॑ अर्कै॒र्भवा॑ नो अ॒र्वाङ् स्व॒र्ण ज्योतिः॑ । अग्ने॒ विश्वे॑भिः सु॒मना॒ अनी॑कैः

---

मन्त्र 69 {#mantra-69}

अध्याय: 16 | मन्त्र: 69

अ॒ग्नि होता॑रं मन्ये॒ दास्व॑न्तं॒ वसु॑ सू॒नु सह॑सो जा॒तवे॑दसं॒ विप्रं॒ न जा॒तवे॑दसम् । य ऊ॒र्ध्वया॑ स्वध्व॒रो दे॒वो दे॒वाच्या॑ कृ॒पा । घृ॒तस्य॒ विभ्रा॑ष्टि॒मनु॑वष्टि शो॒चिषा॒जुह्वा॑नस्य स॒र्पिषः॑

---

मन्त्र 70 {#mantra-70}

अध्याय: 16 | मन्त्र: 70

अग्ने॒ त्वं नो॒ अन्त॑म उ॒त त्रा॒ता शि॒वो भ॑वा वरू॒थ्यः॑ । वसु॑र॒ग्निर्वसु॑श्रवा॒ अच्छा॑ नक्षि द्यु॒मत्त॑म र॒यिन्दाः॑ । तं त्वा॑ शोचिष्ठ दीदिवः सु॒म्नाय॑ नू॒नमी॑महे॒ सखि॑भ्यः

---

मन्त्र 71 {#mantra-71}

अध्याय: 16 | मन्त्र: 71

येन॒ ऋष॑य॒स्तप॑सा स॒त्रमाय॒न्निन्धा॑ना अ॒ग्नि स्व॑रा॒भर॑न्तः । तस्मि॑न्न॒हं निद॑धे॒ नाके॑ अ॒ग्निं यमा॒हुर्मन॑व स्ती॒र्णब॑र्हिषम्

---

मन्त्र 72 {#mantra-72}

अध्याय: 16 | मन्त्र: 72

तं पत्नी॑भि॒रनु॑ गच्छेम देवाः पुत्रै॒र्भ्रातृ॑भिरु॒त वा॒ हिर॑ण्यैः । नाकं॑ गृभ्णा॒नाः सु॑कृ॒तस्य॑ लो॒के तृ॒तीये॑ पृ॒ष्ठे अधि॑रोच॒ने दि॒वः

---

मन्त्र 73 {#mantra-73}

अध्याय: 16 | मन्त्र: 73

आ वा॒चो मध्य॑मरुहद्भुर॒ण्युर॒यम॒ग्निः सत्प॑ति॒श्चेकि॑तानः । पृ॒ष्ठे पृ॑थि॒व्या निहि॑तो॒ दवि॑द्युतदधस्प॒दं कृ॑णुतां॒ ये पृ॑त॒न्यवः॑

---

मन्त्र 74 {#mantra-74}

अध्याय: 16 | मन्त्र: 74

अ॒यम॒ग्निर्वी॒रत॑मो वयो॒धाः स॑ह॒स्रियो॑ द्योतता॒मप्र॑युच्छन् । वि॒भ्राज॑मानः सरि॒रस्य॒ मध्य॒ उप॒ प्रया॑हि दि॒व्यानि॒ धाम॑

---

मन्त्र 75 {#mantra-75}

अध्याय: 16 | मन्त्र: 75

सं॒प्रच्य॑वध्व॒मुप॑ सं॒प्रया॒ताग्ने प॒थो दे॑व॒याना॑न् कृणुध्वम् । पुनः॑ कृण्वा॒ना पि॒तरा॒ युवा॑ना॒न्वाता॑सी॒त् त्वयि॒ तन्तु॑मे॒तम्

---

मन्त्र 76 {#mantra-76}

अध्याय: 16 | मन्त्र: 76

उद्बु॑ध्यस्वाग्ने॒ प्रति॑जागृहि॒ त्वमि॑ष्टापू॒र्ते स सृ॑जेथाम॒यं च॑ । अ॒स्मिन्त्स॒धस्थे॒ अध्युत्त॑रस्मि॒न् विश्वे॑ देवा॒ यज॑मानाश्च सीदत

---

मन्त्र 77 {#mantra-77}

अध्याय: 16 | मन्त्र: 77

येन॒ वह॑सि स॒हस्रं॒ येना॑ग्ने सर्ववेद॒सम् । तेने॒मं य॒ज्ञं नो॑ नय॒ स्व॑र्दे॒वेषु॒ गन्त॑वे

---

मन्त्र 78 {#mantra-78}

अध्याय: 16 | मन्त्र: 78

अ॒यं ते॒ योनि॑रृ॒त्वियो॒ यतो॑ जा॒तो अरो॑चथाः । तं जा॒नन्न॑ग्न आरो॒हाथा॑ नो वर्धया र॒यिम्

---

मन्त्र 79 {#mantra-79}

अध्याय: 16 | मन्त्र: 79

तप॑श्च तप॒स्य॑श्च शैशि॒रा ऋ॒तू अ॒ग्नेर॑न्तः श्ले॒षो॑ऽसि॒ । कल्पे॑तां॒ द्यावा॑पृथि॒वी कल्प॑न्ता॒माप॒ ओष॑धयः॒ कल्प॑न्ताम॒ग्नयः॒ पृथ॒ङ् मम॒ ज्यैष्ठ्या॑य॒ सव्र॑ताः । ये अ॒ग्नयः॒ सम॑नसोऽन्त॒रा द्यावा॑पृथि॒वी इ॒मे । शै॒शि॒रा ऋ॒तू अ॑भि॒कल्प॑माना॒ इन्द्र॑मिव दे॒वा अ॑भि॒संवि॑शन्तु॒ तया॑ दे॒वत॑याङ्गिर॒स्वद् ध्रु॒वे सी॑दतम् । प॒रमे॒ष्ठी त्वा॑ सादयतु दि॒वस्पृ॒ष्ठे ज्योति॑ष्मतीम् । विश्व॑स्मै प्रा॒णाया॑पा॒नाय॑ व्या॒नाया॒ विश्वं॒ ज्योति॑र्यच्छ। सूर्य॒स्तेऽधि॑पति॒स्तया॑ दे॒वत॑याङ्गिर॒स्वद् ध्रु॒वा सी॑द

---

मन्त्र 80 {#mantra-80}

अध्याय: 16 | मन्त्र: 80

लो॒कं पृ॑ण छि॒द्रं पृ॒णाथो॑ सीद ध्रु॒वा त्वम् । इ॒न्द्रा॒ग्नी त्वा॒ बृह॒स्पति॑र॒स्मिन् योना॑ असीषदन्

---

मन्त्र 81 {#mantra-81}

अध्याय: 16 | मन्त्र: 81

ता अ॑स्य॒ सूद॑दोहसः॒ सोम॑ श्रीणन्ति॒ पृश्न॑यः । जन्म॑न्दे॒वानां॒ विश॑स्त्रि॒ष्वारो॑च॒ने दि॒वः

---

मन्त्र 82 {#mantra-82}

अध्याय: 16 | मन्त्र: 82

इन्द्रं॒ विश्वा॑ अवीवृधन्त्समु॒द्रव्य॑चसं॒ गिरः॑ । र॒थीत॑म र॒थीनां॒ वाजा॑ना॒ सत्प॑तिं॒ पति॑म्

---

मन्त्र 83 {#mantra-83}

अध्याय: 16 | मन्त्र: 83

प्रोथ॒दश्वो॒ न यव॑सेऽवि॒ष्यन्य॒दा म॒हः सं॒वर॑णा॒द्व्यस्था॑त् । आद॑स्य॒ वातो॒ अनु॑वाति शो॒चिरध॑ स्म ते॒ व्रज॑नं कृ॒ष्णम॑स्ति

---

मन्त्र 84 {#mantra-84}

अध्याय: 16 | मन्त्र: 84

आ॒योष्ट्वा॒ सद॑ने सादया॒म्यव॑तश्छा॒याया समु॒द्रस्य॒ हृद॑ये । र॒श्मी॒वतीं॒ भास्व॑ती॒मा या द्यां भास्यापृ॑थि॒वीमोर्व॒न्तरि॑क्षम् । प॒र॒मे॒ष्ठी त्वा॑ सादयतु दि॒वस्पृ॒ष्ठे व्यच॑स्वतीं॒ प्रथ॑स्वती॒म् । दिवं॑ यच्छ॒ दिवं॑ दृह॒ दिवं॒ मा हि॑सीः । विश्व॑स्मै प्रा॒णाया॑पा॒नाय॑ व्या॒नायो॑दा॒नाय॑ प्रति॒ष्ठायै॑ च॒रित्रा॑य । सूर्य॑स्त्वा॒भिपा॑तु म॒ह्या स्व॒स्त्या छ॒र्दिषा॒ शंत॑मेन॒ तया॑ दे॒वत॑याङ्गिर॒स्वद् ध्रु॒वे सी॑दतम्

---

मन्त्र 85 {#mantra-85}

अध्याय: 16 | मन्त्र: 85

स॒हस्र॑स्य प्र॒मासि॑ स॒हस्र॑स्य प्रति॒मासि॑ स॒हस्र॑स्यो॒न्मासि॑ सा॒ह॒स्रो॑ऽसि स॒हस्रा॑य त्वा

---