atha ṣoḍaśo'dhyāyaḥ
agne̍ jā̱tānpraṇu̍dā naḥ sa̱patnā̱npratyajā̍tāñjātavedo nudasva |
adhi̍ no brūhi su̱manā̱ ahe̍l̤astava̍ syāma̱ śarmastri̱varū̍tha udbhau
||16.1||saha̍sā jā̱tānpraṇu̍dā naḥ sa̱patnā̱npratyajā̍tānnuda jātavedaḥ |
adhi̍ no brūhi sumana̱syamā̍no va̱ya syā̍ma̱ praṇu̍dā naḥ sa̱patnā̍n |
ṣo̱l̤a̱śī stoma̱ ojo̱ dravi̍ṇaṃ catuścatvāri̱śa stomo̱ varco̱ dravi̍ṇam
||16.2||a̱gneḥ purī̍ṣama̱syapso̱ nāma̱ tāṃ tvā̱ viśve̍ a̱bhigṛ̍ṇantu de̱vāḥ |
stoma̍pṛṣṭhā ghṛ̱tava̍tī̱ha sī̍da pra̱jāva̍da̱sme dravi̱ṇāya̍jasva
||16.3||eva̱śchando̱ vari̍va̱śchanda̍ḥ śa̱mbhūśchanda̍ḥ pa̍ri̱bhūśchanda̍ḥ | ā̱cchacchando̱ mana̱śchando vyaca̱śchanda̍ḥ
||16.4||sindhu̱śchanda̍ḥ samu̱draśchanda̍ḥ sari̱raṃ chanda̍ḥ |
ka̱kup chanda̍strika̱kup chanda̍ḥ kā̱vyaṃ chando̍ aṅa ku̱paṃ chanda̍ḥ
||16.5||a̱kṣara̍paṅkti̱śchanda̍ḥ pa̱dapa̍ṅkti̱śchando̍ viṣṭā̱rapa̍ṅkti̱śchanda̍ḥ kṣu̱robhrāja̱śchanda̍ḥ |
ā̱cchacchanda̍ḥ pra̱cchacchanda̍ḥ sa̱ṃyacchando̍ vi̱yacchanda̍ḥ
||16.6||bṛ̱hacchando̍ rathanta̱raṃ chando̍ nikā̱yaśchando̍ viva̱dhaśchanda̍ḥ |
gira̱śchando̱ bhraja̱śchanda̍ḥ sa̱stup chando̍'nu̱ṣṭup chanda̍ḥ
||16.7||eva̱śchando̱ vari̍va̱śchando̱ vaya̱śchando̍ vaya̱skṛcchanda̍ḥ |
viṣpa̍rdhā̱śchando̍ viśā̱laṃ chanda̍ścha̱diśchando̍ dūroha̱ṇaṃ chanda̍ḥ | ta̱ndraṃ chando̍ aṅkā̱ṅkaṃ chanda̍ḥ
||16.8||ra̱śminā̍ sa̱tyāya̍ sa̱tyaṃ ji̍nva̱ preti̍nā̱ dharma̍ṇā̱ dharma̍ṃ jinva |
anvi̍tyā di̱vā diva̍ṃ jinva sa̱ndhinā̱ntari̍kṣeṇā̱ntari̍kṣaṃ jinva
||16.9||pra̱ti̱dhinā̍ pṛthi̱vyā pṛ̍thi̱vīṃ ji̍nva viṣṭa̱mbhena̱ vṛṣṭyā̱ vṛṣṭi̍ṃ jinva |
pra̱vayāhnāha̍rjinvānu̱yā rātryā̱ rātrī̍ṃ jinva
||16.10||u̱śijā̱ vasu̍bhyo̱ vasū̍ñjinva prake̱tenā̍di̱tyebhya̍ ādi̱tyāñji̍nva |
tantu̍nā rā̱yaspoṣe̍ṇa rā̱yaspoṣa̍ṃ jinva sasa̱rpeṇa̍ śru̱tāya̍ śru̱taṃ ji̍nva
||16.11||ai̱l̤enauṣa̍dhībhi̱roṣa̍dhīrjinvotta̱mena̍ ta̱nūbhi̍sta̱nūrji̍nva |
va̱yo̱dhasādhī̍te̱nādhī̍taṃ jinvābhi̱jitā̱ teja̍sā̱ tejo̍ jinva
||16.12||pra̱ti̱pada̍si prati̱pade̍ tvānu̱pada̍syanu̱pade̍ tvā | sa̱mpada̍si sa̱mpade̍ tvā̱ tejo̍'si̱ teja̍se tvā
||16.13||tri̱vṛda̍si tri̱vṛte̍ tvā pra̱vṛda̍si pra̱vṛte̍ tvā | vi̱vṛda̍si vi̱vṛte̍ tvā sa̱vṛda̍si sa̱vṛte̍ tvā
||16.14||ā̱kra̱mo̍'syākra̱māya̍ tvā saṅkra̱mo̍'si saṅkra̱māya̍ tvā |
u̱tkra̱mo̍'syutkra̱māya̱ tvotkrā̍ntira̱syutkrā̍ntyai tvā |
adhi̍patino̱rjorja̍ṃ jinva̱ veṣa̍śrīḥ kṣa̱trāya̍ kṣa̱traṃ ji̍nva
||16.15||rājñya̍si̱ prācī̱ digvasa̍vaste de̱vā adhi̍patayaḥ | a̱gnirhe̍tī̱nāṃ pra̍tidha̱rtā
||16.16||tri̱vṛt tvā̱ stoma̍ḥ pṛthi̱vyā śra̍ya̱tvājya̍mu̱kthamavya̍thāyai stabhnātu |
ra̱tha̱nta̱ra sāma̱ prati̍ṣṭhityā a̱ntari̍kṣe
||16.17||ṛṣa̍yastvā prathama̱jā de̱veṣu̍ di̱vo mātra̍yā vari̱mṇā pra̍thantu |
vi̱dha̱rtā cā̱yamadhi̍patiśca̱ te tvā̱ sarve̍ saṃvidā̱nā nāka̍sya
pṛ̱ṣṭhe sva̱rge lo̱ke yaja̍mānaṃ ca sādayantu
||16.18||vi̱rāl̤a̍si̱ dakṣi̍ṇā̱ digru̱drāste̍ de̱vā adhi̍patayaḥ | indro̍ hetī̱nāṃ pra̍tidha̱rtā
||16.19||pa̱ñca̱da̱śastvā̱ stoma̍ḥ pṛthi̱vyā śra̍yatu̱ pra uga̍mu̱kthamavya̍thāyai stabhnātu |
bṛ̱hatsāma̱ prati̍ṣṭhityā a̱ntari̍kṣe
||16.20||ṛṣa̍yastvā prathama̱jā de̱veṣu̍ di̱vo mātra̍yā vari̱mṇā pra̍thantu |
vi̱dha̱rtā cā̱yamadhi̍patiśca̱ te tvā̱ sarve̍ saṃvidāṃnā nāka̍sya
pṛ̱ṣṭhe sva̱rge lo̱ke yaja̍mānaṃ ca sādayantu
||16.21||sa̱mrāl̤a̍si pra̱tīcī̱ digā̍di̱tyāste̍ de̱vā adhi̍patayaḥ | varu̍ṇo hetī̱nāṃ pra̍tidha̱rtā
||16.22||sa̱ptada̱śastvā̱ stoma̍ḥ pṛthi̱vyā śra̍yatu marutva̱tīya̍mu̱kthamavya̍thāyai stabhnātu |
vai̱rū̱pa sāma̱ prati̍ṣṭhityā a̱ntari̍kṣe
||16.23||ṛṣa̍yastvā prathama̱jā de̱veṣu̍ di̱vo mātra̍yā vari̱mṇā pra̍thantu |
vi̱dha̱rtā cā̱yamadhi̍patiśca̱ te tvā̱ sarve̍ saṃvidā̱nā nāka̍sya
pṛ̱ṣṭhe sva̱rge lo̱ke yaja̍mānaṃ ca sādayantu
||16.24||sva̱rāl̤a̱syudī̍cī̱ diṅ ma̱ruta̍ste de̱vā adhi̍patayaḥ | somo̍ hetī̱nāṃ pra̍tidha̱rtā
||16.25||e̱ka̱vi̱śastvā̱ stoma̍ḥ pṛthi̱vyā śra̍yatu̱ niṣke̍valyamu̱kthamavya̍thāyai stabhnātu |
vai̱rā̱ja sāma̱ prati̍ṣṭhityā a̱ntari̍kṣe
||16.26||ṛṣa̍yastvā prathama̱jā de̱veṣu̍ di̱vo mātra̍yā vari̱mṇā pra̍thantu |
vi̱dha̱rtā cā̱yamadhi̍patiśca̱ te tvā̱ sarve̍ saṃvidā̱nā nāka̍sya pṛ̱ṣṭhe sva̱rge lo̱ke yaja̍mānaṃ ca sādayantu
||16.27||adhi̍patnyasi bṛha̱tī digviśve̍ te de̱vā adhi̍patayaḥ | bṛha̱spati̍rhetī̱nāṃ pra̍tidha̱rtā
||16.28||tri̱ṇa̱va̱tra̱ya̱stri̱śau tvā̱ stomau̍ pṛthi̱vyā śra̍yatāṃ vaiśvadevāgnimāru̱te u̱kthe avya̍thāyai stabhnītām |
śā̱kva̱ra̱rai̱va̱te sāma̍nī̱ prati̍ṣṭhityā a̱ntari̍kṣe
||16.29||ṛṣa̍yastvā prathama̱jā de̱veṣu̍ di̱vo mātra̍yā vari̱mṇā pra̍thantu |
vidha̱rtā cā̱yamadhi̍patiśca̱ te tvā̱ sarve̍ saṃvidā̱nā nāka̍sya
pṛ̱ṣṭhe sva̱rge lo̱ke yaja̍mānaṃ ca sādayantu
||16.30||a̱yaṃ pu̱ro hari̍keśa̱ḥ sūrya̍raśmi̱stasya̍ rathagṛ̱tsaśca̱ rathau̍jāśca senānīgrāma̱ṇyau̍ |
pu̱ñji̱ka̱stha̱lā ca̍ kratustha̱lā cā̍psa̱rasau̍ da̱ṅkṣṇava̍ḥ pa̱śavo̍ he̱tiḥ pau̍ruṣeyo va̱dhaḥ prahe̍tiḥ
||16.31||tebhyo̱ namo̍ astu̱ te no̍ mṛl̤ayantu̱ te no̍'vantu |
te yaṃ dvi̱ṣmo yaśca̍ no̱ dveṣṭi̱ tame̍ṣā̱ṃ jambhe̍ dadhmaḥ
||16.32||a̱yaṃ da̍kṣi̱ṇā vi̱śvaka̍rmā̱ tasya̍ rathasva̱naśca̱ rathe̍citraśca senānīgrāma̱ṇyau̍ |
me̱na̱kā ca̍ sahaja̱nyā cā̍psa̱rasau̍ yātu̱dhānā̍ he̱tī rakṣā̍si̱ prahe̍tiḥ
||16.33||tebhyo̱ namo̍ astu̱ te no̍ mṛl̤ayantu̱ te no̍'vantu | te yaṃ dvi̱ṣmo yaśca̍ no̱ dveṣṭi̱ tame̍ṣā̱ṃ jambhe̍ dadhmaḥ
||16.34||a̱yaṃ pa̱ścādvi̱śvavya̍cā̱stasya̱ ratha̍prota̱ścāsa̍marathaśca senānīgrāma̱ṇyau̍ |
pra̱mloca̍ntī cānu̱mloca̍ntī cāpsa̱rasau̍ vyā̱ghrā he̱tiḥ sa̱rpā prahe̍tiḥ
||16.35||tebhyo̱ namo̍ astu̱ te no̍ mṛl̤ayantu̱ te no̍'vantu |
te yaṃ dvi̱ṣmo yaśca̍ no̱ dveṣṭi̱ tame̍ṣā̱ṃ jambhe̍ dadhmaḥ
||16.36||a̱yamu̍tta̱rātsa̱ṃyadva̍su̱stasya̱ tārkṣya̱ścāri̍ṣṭanemiśca senānīgrāma̱ṇyau̍ |
vi̱śvācī̍ ca ghṛ̱tācī̍ cāpsa̱rasā̱ āpo̍ he̱tirvāta̱ḥ prahe̍tiḥ
||16.37||tebhyo̱ namo̍ astu̱ te no̍ mṛl̤ayantu̱ te no̍'vantu |
te yaṃ dvi̱ṣmo yaśca̍ no̱ dveṣṭi̱ tame̍ṣā̱ṃ jambhe̍ dadhmaḥ
||16.38||a̱yamu̱parya̱rvāgva̍su̱stasya̍ sena̱jicca̍ su̱ṣeṇa̍śca senānīgrāma̱ṇyau̍ |
u̱rvaśī̍ ca pū̱rvaci̍ttiścāpsa̱rasā̍ ava̱sphūrja̍nhe̱tirvi̱dyutprahe̍ti̱
||16.39||tebhyo̱ namo̍ astu̱ te no̍ mṛl̤ayantu̱ te no̍'vantu|
te yaṃ dvi̱ṣmo yaśca̍ no̱ dveṣṭi̱ tame̍ṣā̱ṃ jambhe̍ dadhmaḥ
||16.40||a̱gnirmū̱rdhā di̱vaḥ ka̱kutpati̍ḥ pṛthi̱vyā a̱yam | a̱pā retā̍si jinvati
||16.41||a̱yama̱gniḥ sa̍ha̱sriṇo̱ vāja̍sya śa̱tina̱spati̍ḥ | mū̱rdhā ka̱vī ra̍yī̱ṇām
||16.42||tvāma̍gne̱ puṣka̍rā̱dadhyatha̍rvā̱ nira̍manthata | mū̱rdhno viśva̍sya vā̱ghata̍ḥ
||16.43||bhuvo̍ ya̱jñasya̱ raja̍saśca ne̱tā yatrā̍ ni̱yudbhi̱ḥ saca̍se śi̱vābhi̍ḥ |
di̱vi mū̱rdhāna̍ṃ dadhiṣe sva̱rṣāṃ ji̱hvāma̍gne cakṛṣe havya̱vāha̍m
||16.44||abo̍dhya̱gniḥ sa̱midhā̱ janā̍nā̱ṃ prati̍ dhe̱numi̍vāya̱tīmu̱ṣāsa̍m |
ya̱hvā i̍va̱ pra va̱yāmu̱jjihā̍nā̱ḥ pra bhā̱nava̍ḥ sisrate̱ nāka̱maccha̍
||16.45||avo̍cāma ka̱vaye̱ medhyā̍ya̱ vaco̍ va̱ndāru̍ vṛṣa̱bhāya̱ vṛṣṇe̍ |
gavi̍ṣṭhiro̱ nama̍sā̱ stoma̍ma̱gnau di̱vī̍va ru̱kmamu̍ru̱vyañca̍maśret
||16.46||a̱yami̱ha pra̍tha̱mo dhā̍yi dhā̱tṛbhi̱rhotā̱ yaji̍ṣṭho adhva̱reṣvīḍya̍ḥ |
yamapna̍vāno̱ bhṛga̍vo viruru̱curvane̍ṣu ci̱traṃ vi̱bhva̍ṃ vi̱śevi̍śe
||16.47||jana̍sya go̱pā a̍janiṣṭa̱ jāgṛ̍vira̱gniḥ su̱dakṣa̍ḥ suvi̱tāya̱ navya̍se |
ghṛ̱tapra̍tīko bṛha̱tā di̍vi̱spṛśā̍ dyu̱madvi bhā̍ti bhara̱tebhya̱ḥ śuci̍ḥ
||16.48||tvāma̍gne̱ aṅgi̍raso̱ guhā̍ hi̱tamanva̍vindacchiśriyā̱ṇaṃ vane̍vane |
sa jā̍yase ma̱thyamā̍na̱ḥ saho̍ ma̱hattvāmā̍hu̱ḥ saha̍saspu̱trama̍ṅgiraḥ
||16.49||sakhā̍ya̱ḥ saṃ va̍ḥ sa̱myañca̱miṣa̱ stoma̍ṃ cā̱gnaye̍ | varṣi̍ṣṭhāya kṣitī̱nāmū̱rjo naptre̱ saha̍svate
||16.50||sasa̱midyu̍vase vṛṣa̱nnagne̱ viśvā̍nya̱rya ā | i̱l̤aspa̱de sami̍dhyase̱ sa no̱ vasū̱nyā bha̍ra
||16.51||tvāma̍gne ha̱viṣma̍nto de̱vaṃ martā̍sa īl̤ate | manye̍ tvā jā̱tave̍dasa̱ sa ha̱vyā va̍kṣyānu̱ṣak
||16.52||tvāṃ ci̍traśravastama̱ hava̍nte vi̱kṣu ja̱ntava̍ḥ | śo̱ciṣke̍śaṃ purupri̱yāgne̍ ha̱vyāya̱ vol̤aha̍ve
||16.53||e̱nā vo̍ a̱gniṃ nama̍so̱rjo napā̍ta̱māhu̍ve | pri̱yaṃ ceti̍ṣṭhamara̱ti sva̍dhva̱raṃ viśva̍sya dū̱tama̱mṛta̍m
||16.54||viśva̍sya dū̱tama̱mṛta̱ṃ viśva̍sya dū̱tama̱mṛta̍m | sa yo̍jate aru̱ṣā vi̱śvabho̍jasā̱ sa du̍drava̱tsvā̍hutaḥ
||16.55||sa du̍drava̱t svā̍huta̱ḥ sa du̍drava̱t svā̍hutaḥ | su̱brahmā̍ ya̱jñaḥ su̱śamī̱ vasū̍nāṃ de̱va rādho̱ janā̍nām
||16.56||agne̱ vāja̍sya̱ goma̍ta̱ īśā̍naḥ sahaso yaho | a̱sme dhe̍hi jātavedo̱ mahi̱ śrava̍ḥ
||16.57||sa i̍dhā̱no vasu̍ṣka̱vira̱gnirī̱ḍenyo̍ gi̱rā | re̱vada̱smabhya̍ṃ purvaṇīka dīdihi
||16.58||kṣa̱po rā̍jannu̱ta tmanāgne̱ vasto̍ru̱toṣasa̍ḥ | sa ti̍gmajambha ra̱kṣaso̍ daha̱ prati̍
||16.59||bha̱dro no̍ a̱gnirāhu̍to bha̱drā rā̱tiḥ su̍bhaga bha̱dro a̍dhva̱raḥ | bha̱drā u̱ta praśa̍stayaḥ
||16.60||bha̱drā u̱ta praśa̍stayo bha̱draṃ mana̍ḥ kṛṇuṣva vṛtra̱tūrye̍ | yenā̍ sa̱matsu̍ sā̱saha̍ḥ
||16.61||yenā̍ sa̱matsu̍ sā̱saho'va̍ sthi̱rā ta̍nuhi̱ bhūri̱ śardha̍tām | va̱nemā̍ te a̱bhiṣṭi̍bhiḥ
||16.62||a̱gniṃ taṃ ma̍nye̱ yo vasu̱rasta̱ṃ yaṃ yanti̍ dhe̱nava̍ḥ |
asta̱marva̍nta ā̱śavo'sta̱ṃ nityā̍so vā̱jina̱ iṣa̍ sto̱tṛbhya̱ ābha̍ra
||16.63||so a̱gniryo vasu̍rgṛ̱ṇe saṃ yamā̱yanti̍ dhe̱nava̍ḥ |
samarva̍nto raghu̱druva̱ḥ sa su̍jā̱tāsa̍ḥ sū̱raya̱ iṣa̍ sto̱tṛbhya̱ ābha̍ra
||16.64||u̱bhe su̍ścandra sa̱rpiṣo̱ darvī̍ śrīṇīṣa ā̱sani̍ |
u̱to na̱ utpu̍pūryā u̱ktheṣu̍ śavasaspata̱ iṣa̍ sto̱tṛbhya̱ ābha̍ra
||16.65||agne̱ tama̱dyāśva̱ṃ na stomai̱ḥ kratu̱ṃ na bha̱dra hṛ̍di̱spṛśa̍m | ṛ̱dhyāmā̍ ta̱ ohai̍ḥ
||16.66||adhā̱ hya̍gne̱ krato̍rbha̱drasya̱ dakṣa̍sya sā̱dhoḥ | ra̱thīrṛ̱tasya̍ bṛha̱to ba̱bhūtha̍
||16.67||e̱bhirno̍ arkai̱rbhavā̍ no a̱rvāṅ sva̱rṇa jyoti̍ḥ | agne̱ viśve̍bhiḥ su̱manā̱ anī̍kaiḥ
||16.68||a̱gni hotā̍raṃ manye̱ dāsva̍nta̱ṃ vasu̍ sū̱nu saha̍so jā̱tave̍dasa̱ṃ vipra̱ṃ na jā̱tave̍dasam |
ya ū̱rdhvayā̍ svadhva̱ro de̱vo de̱vācyā̍ kṛ̱pā |
ghṛ̱tasya̱ vibhrā̍ṣṭi̱manu̍vaṣṭi śo̱ciṣā̱juhvā̍nasya sa̱rpiṣa̍ḥ
||16.69||agne̱ tvaṃ no̱ anta̍ma u̱ta trā̱tā śi̱vo bha̍vā varū̱thya̍ḥ |
vasu̍ra̱gnirvasu̍śravā̱ acchā̍ nakṣi dyu̱matta̍ma ra̱yindā̍ḥ |
taṃ tvā̍ śociṣṭha dīdivaḥ su̱mnāya̍ nū̱namī̍mahe̱ sakhi̍bhyaḥ
||16.70||yena̱ ṛṣa̍ya̱stapa̍sā sa̱tramāya̱nnindhā̍nā a̱gni sva̍rā̱bhara̍ntaḥ |
tasmi̍nna̱haṃ nida̍dhe̱ nāke̍ a̱gniṃ yamā̱hurmana̍va stī̱rṇaba̍rhiṣam
||16.71||taṃ patnī̍bhi̱ranu̍ gacchema devāḥ putrai̱rbhrātṛ̍bhiru̱ta vā̱ hira̍ṇyaiḥ |
nāka̍ṃ gṛbhṇā̱nāḥ su̍kṛ̱tasya̍ lo̱ke tṛ̱tīye̍ pṛ̱ṣṭhe adhi̍roca̱ne di̱vaḥ
||16.72||ā vā̱co madhya̍maruhadbhura̱ṇyura̱yama̱gniḥ satpa̍ti̱śceki̍tānaḥ |
pṛ̱ṣṭhe pṛ̍thi̱vyā nihi̍to̱ davi̍dyutadadhaspa̱daṃ kṛ̍ṇutā̱ṃ ye pṛ̍ta̱nyava̍ḥ
||16.73||a̱yama̱gnirvī̱rata̍mo vayo̱dhāḥ sa̍ha̱sriyo̍ dyotatā̱mapra̍yucchan |
vi̱bhrāja̍mānaḥ sari̱rasya̱ madhya̱ upa̱ prayā̍hi di̱vyāni̱ dhāma̍
||16.74||sa̱ṃpracya̍vadhva̱mupa̍ sa̱ṃprayā̱tāgne pa̱tho de̍va̱yānā̍n kṛṇudhvam |
puna̍ḥ kṛṇvā̱nā pi̱tarā̱ yuvā̍nā̱nvātā̍sī̱t tvayi̱ tantu̍me̱tam
||16.75||udbu̍dhyasvāgne̱ prati̍jāgṛhi̱ tvami̍ṣṭāpū̱rte sa sṛ̍jethāma̱yaṃ ca̍ |
a̱smintsa̱dhasthe̱ adhyutta̍rasmi̱n viśve̍ devā̱ yaja̍mānāśca sīdata
||16.76||yena̱ vaha̍si sa̱hasra̱ṃ yenā̍gne sarvaveda̱sam |
tene̱maṃ ya̱jñaṃ no̍ naya̱ sva̍rde̱veṣu̱ ganta̍ve
||16.77||a̱yaṃ te̱ yoni̍rṛ̱tviyo̱ yato̍ jā̱to aro̍cathāḥ | taṃ jā̱nanna̍gna āro̱hāthā̍ no vardhayā ra̱yim
||16.78||tapa̍śca tapa̱sya̍śca śaiśi̱rā ṛ̱tū a̱gnera̍ntaḥ śle̱ṣo̍'si̱ |
kalpe̍tā̱ṃ dyāvā̍pṛthi̱vī kalpa̍ntā̱māpa̱ oṣa̍dhaya̱ḥ kalpa̍ntāma̱gnaya̱ḥ pṛtha̱ṅ mama̱ jyaiṣṭhyā̍ya̱ savra̍tāḥ |
ye a̱gnaya̱ḥ sama̍naso'nta̱rā dyāvā̍pṛthi̱vī i̱me |
śai̱śi̱rā ṛ̱tū a̍bhi̱kalpa̍mānā̱ indra̍miva de̱vā a̍bhi̱saṃvi̍śantu̱ tayā̍ de̱vata̍yāṅgira̱svad dhru̱ve sī̍datam |
pa̱rame̱ṣṭhī tvā̍ sādayatu di̱vaspṛ̱ṣṭhe jyoti̍ṣmatīm |
viśva̍smai prā̱ṇāyā̍pā̱nāya̍ vyā̱nāyā̱ viśva̱ṃ jyoti̍ryaccha|
sūrya̱ste'dhi̍pati̱stayā̍ de̱vata̍yāṅgira̱svad dhru̱vā sī̍da
||16.79||lo̱kaṃ pṛ̍ṇa chi̱draṃ pṛ̱ṇātho̍ sīda dhru̱vā tvam | i̱ndrā̱gnī tvā̱ bṛha̱spati̍ra̱smin yonā̍ asīṣadan
||16.80||tā a̍sya̱ sūda̍dohasa̱ḥ soma̍ śrīṇanti̱ pṛśna̍yaḥ | janma̍nde̱vānā̱ṃ viśa̍stri̱ṣvāro̍ca̱ne di̱vaḥ
||16.81||indra̱ṃ viśvā̍ avīvṛdhantsamu̱dravya̍casa̱ṃ gira̍ḥ | ra̱thīta̍ma ra̱thīnā̱ṃ vājā̍nā̱ satpa̍ti̱ṃ pati̍m
||16.82||protha̱daśvo̱ na yava̍se'vi̱ṣyanya̱dā ma̱haḥ sa̱ṃvara̍ṇā̱dvyasthā̍t |
āda̍sya̱ vāto̱ anu̍vāti śo̱ciradha̍ sma te̱ vraja̍naṃ kṛ̱ṣṇama̍sti
||16.83||ā̱yoṣṭvā̱ sada̍ne sādayā̱myava̍taśchā̱yāyā samu̱drasya̱ hṛda̍ye |
ra̱śmī̱vatī̱ṃ bhāsva̍tī̱mā yā dyāṃ bhāsyāpṛ̍thi̱vīmorva̱ntari̍kṣam |
pa̱ra̱me̱ṣṭhī tvā̍ sādayatu di̱vaspṛ̱ṣṭhe vyaca̍svatī̱ṃ pratha̍svatī̱m | diva̍ṃ yaccha̱ diva̍ṃ dṛha̱ diva̱ṃ mā hi̍sīḥ |
viśva̍smai prā̱ṇāyā̍pā̱nāya̍ vyā̱nāyo̍dā̱nāya̍ prati̱ṣṭhāyai̍ ca̱ritrā̍ya |
sūrya̍stvā̱bhipā̍tu ma̱hyā sva̱styā cha̱rdiṣā̱ śaṃta̍mena̱ tayā̍ de̱vata̍yāṅgira̱svad dhru̱ve sī̍datam
||16.84||sa̱hasra̍sya pra̱māsi̍ sa̱hasra̍sya prati̱māsi̍ sa̱hasra̍syo̱nmāsi̍ sā̱ha̱sro̍'si sa̱hasrā̍ya tvā
||16.85||