शुक्लयजुः काण्वसंहिता — द्वाविंशोऽध्यायः (75 मन्त्राः)

शुक्लयजुः काण्वसंहिता — द्वाविंशोऽध्यायः

द्वाविंशोऽध्यायः

---

मन्त्राः

मन्त्र	प्रथम पद
1	यद्देवा देवहेळन
2	यदि दिवा
3	यदि जाग्रद्यदि
4	यद् ग्रामे
5	द्रुपदादिव मुमुचान
6	उद्वय तमसस्परि
7	अपो अद्यान्वचारिष
8	समाववर्ति पृथिवी
9	अभ्या दधामि
10	यत्र ब्रह्म
11	यत्रेन्द्रश्च वायुश्च
12	अशुना ते
13	सिञ्चन्ति परिषिञ्चन्त्युत्सिञ्चन्ति
14	धानावन्त करम्भिणमपूपवन्तमुक्थिनम्
15	बृहदिन्द्राय गायत
16	अध्वर्यो अद्रिभि
17	यो भूतानामधिपतिर्यस्मिल्लोका
18	उपयामगृहीतोऽस्यश्विभ्या त्वा
19	प्राणपा मे
20	अश्विनकृतस्य ते
21	समिद्ध इन्द्र
22	नराशस प्रति
23	ईळितो देवैर्हरिवा२
24	जुषाणो बर्हिर्हरिवान्न
25	इन्द्र दुर
26	उषासानक्ता बृहती
27	दैव्या मिमाना
28	तिस्रो देवीर्हविषा
29	त्वष्टा दधच्छुष्ममिन्द्राय
30	वनस्पतिरवसृष्टो न
31	स्तोकानामिन्दु प्रति
32	आ यात्विन्द्रोवस
33	आ न
34	आ न
35	त्रातारमिन्द्रमवितारमिन्द्र हवेहवे
36	इन्द्र सुत्रामा
37	तस्य वय
38	आ मन्द्रैरिन्द्र
39	एवेदिन्द्र वृषण
40	समिद्धो अग्निरश्विना
41	तनूपा भिषजा
42	इन्द्रायेन्दु सरस्वती
43	आजुह्वाना सरस्वतीन्द्रायेन्द्रियाणि
44	अश्विना नमुचे
45	कवष्यो न
46	उषासानक्तमश्विना दिवेन्द्र
47	पात नो
48	तिस्रस्त्रेधा सरस्वत्यश्विना
49	अश्विना भेषज
50	ऋतुथेन्द्रो वनस्पति
51	गोभिर्न सोममश्विना
52	अश्विना हविरिन्द्रिय
53	यमश्विना सरस्वती
54	तमिन्द्र पशव
55	य इन्द्र
56	सविता वरुणो
57	वरुण क्षत्रमिन्द्रिय
58	अश्विना गोभिरिन्द्रियमश्वेभिर्वीर्य
59	ता नासत्या
60	ता भिषजा
61	युव सुराममश्विना
62	पुत्रमिव पितरा
63	यस्मिन्नश्वास ऋषभास
64	अहाव्यग्ने हविरास्ये
65	अश्विना तेजसा
66	गोमदू षु
67	न यत्परो
68	ता न
69	पावका न
70	चोदयित्री सूनृताना
71	महो अर्ण
72	इन्द्रा याहि
73	इन्द्रा याहि
74	इन्द्रा याहि
75	अश्विना पिबता

---

मन्त्र 1 {#mantra-1}

अध्याय: 22 | मन्त्र: 1

यद्दे॑वा देव॒हेळ॑नं॒ देवा॑सश्चकृ॒मा व॒यम् । अ॒ग्निर्मा॒ तस्मा॒देन॑सो॒ विश्वा॑न्मुञ्च॒त्वह॑सः

---

मन्त्र 2 {#mantra-2}

अध्याय: 22 | मन्त्र: 2

यदि॒ दिवा॒ यदि॒ नक्त॒मेना॑सि चकृ॒मा व॒यम् । वा॒युर्मा॒ तस्मा॒देन॑सो॒ विश्वा॑न्मुञ्च॒त्वह॑सः

---

मन्त्र 3 {#mantra-3}

अध्याय: 22 | मन्त्र: 3

यदि॒ जाग्र॒द्यदि॒ स्वप्न॒ एना॑सि चकृ॒मा व॒यम् । सूर्यो॑ मा॒ तस्मा॒देन॑सो॒ विश्वा॑न्मुञ्च॒त्वह॑सः

---

मन्त्र 4 {#mantra-4}

अध्याय: 22 | मन्त्र: 4

यद् ग्रामे॒ यदर॑ण्ये॒ यत्स॒भायां॒ यदि॑न्द्रि॒ये । यच्छू॒द्रे यदर्ये॒ यदेन॑श्चकृ॒मा व॒यम् । यदेक॒स्याधि॒ धर्म॑णि॒ तस्या॑व॒यज॑नमसि । यदापो॑ अ॒घ्न्या इति॒ वरु॒णेति॒ शपा॑महे॒ ततो॑ वरुण नो मुञ्च । अव॑भृथ निचुम्पुण निचे॒रुर॑सि निचुम्पु॒णः । अव॑देवैर्दे॒वकृ॑त॒मेनो॑ऽय॒क्ष्यव॒ मर्त्यै॒र्मर्त्य॑कृतं पुरु॒राव्णो॑ देव रि॒षस्पा॑हि । स॒मु॒द्रे ते॒ हृद॑यम॒प्स्व॒न्तः सं त्वा॑ विश॒न्त्वोष॑धीरु॒तापः॑ । सु॒मि॒त्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ । यो॒ऽस्मान्द्वेष्टि॒ यं च॑ व॒यं द्वि॒ष्मः

---

मन्त्र 5 {#mantra-5}

अध्याय: 22 | मन्त्र: 5

द्रु॒प॒दादि॑व मुमुचा॒नः स्वि॒न्नः स्ना॒तो मला॑दिव । पू॒तं प॒वित्रे॑णे॒वाज्य॒मापः॑ शुन्धन्तु॒ मैन॑सः

---

मन्त्र 6 {#mantra-6}

अध्याय: 22 | मन्त्र: 6

उद्व॒यं तम॑स॒स्परि॒ स्वः॒ पश्य॑न्त॒ उत्त॑रम् । दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम्

---

मन्त्र 7 {#mantra-7}

अध्याय: 22 | मन्त्र: 7

अ॒पो अ॒द्यान्व॑चारिष॒ रसे॑न॒ सम॑सृक्ष्महि । पय॑स्वानग्न॒ आग॑मं॒ तं मा॒ स सृ॑ज॒ वर्च॑सा प्र॒जया॑ च॒ धने॑न च । एधो॑ऽस्येधिषी॒महि॑ स॒मिद॑सि॒ तेजो॑ऽसि॒ तेजो॒ मयि॑ धेहि

---

मन्त्र 8 {#mantra-8}

अध्याय: 22 | मन्त्र: 8

स॒माव॑वर्ति पृथि॒वी समु॒षाः समु॒ सूर्यः॑ । समु॒ विश्व॑मि॒दं जग॑त् । वै॒श्वा॒न॒रज्यो॑तिर्भूयासं वि॒भून्कामा॒न्व्य॑श्नवै॒ भूः स्वाहा॑

---

मन्त्र 9 {#mantra-9}

अध्याय: 22 | मन्त्र: 9

अ॒भ्या द॑धामि स॒मिध॒मग्ने॑ व्रतपते॒ त्वयि॑ । व्र॒तं च॑ श्र॒द्धां चोपै॑मी॒न्धे त्वा॑ दीक्षि॒तो अ॒हम्

---

मन्त्र 10 {#mantra-10}

अध्याय: 22 | मन्त्र: 10

यत्र॒ ब्रह्म॑ च क्ष॒त्रं च॑ स॒म्यञ्चौ॒ चर॑तः स॒ह । तं लो॒कं पुण्यं॒ प्रज्ञे॑षं॒ यत्र॑ दे॒वाः स॒हाग्निना॑

---

मन्त्र 11 {#mantra-11}

अध्याय: 22 | मन्त्र: 11

यत्रेन्द्र॑श्च वा॒युश्च॑ स॒म्यञ्चौ॒ चर॑तः स॒ह । तं लो॒कं पुण्यं॒ प्रज्ञे॑षं॒ यत्र॑ से॒दिर्न वि॒द्यते॑

---

मन्त्र 12 {#mantra-12}

अध्याय: 22 | मन्त्र: 12

अ॒शुना॑ ते अ॒शुः पृ॑च्यतां॒ परु॑षा॒ परुः॑ । ग॒न्धस्ते॒ सोम॑मवतु॒ मदा॑य॒ रसो॒ अच्यु॑तः

---

मन्त्र 13 {#mantra-13}

अध्याय: 22 | मन्त्र: 13

सि॒ञ्चन्ति॒ परि॑षिञ्च॒न्त्युत्सि॑ञ्चन्ति पु॒नन्ति॑ च । सुरा॑यै ब॒भ्र्वै मदे॑ किं॒त्वो व॑दति कि॒न्त्वः

---

मन्त्र 14 {#mantra-14}

अध्याय: 22 | मन्त्र: 14

धा॒नाव॑न्तं कर॒म्भिण॑मपू॒पव॑न्तमु॒क्थिन॑म् । इन्द्र॑ प्रा॒तर्जु॑षस्व नः

---

मन्त्र 15 {#mantra-15}

अध्याय: 22 | मन्त्र: 15

बृ॒हदिन्द्रा॑य गायत॒ मरु॑तो वृत्र॒हन्त॑मम् । येन॒ ज्योति॒रज॑नयन्नृता॒वृधो॑ दे॒वं दे॒वाय॒ जागृ॑वि

---

मन्त्र 16 {#mantra-16}

अध्याय: 22 | मन्त्र: 16

अध्व॑र्यो॒ अद्रि॑भिः सु॒त सोमं॑ प॒वित्र॒ आ न॑य । पु॒नी॒हीन्द्रा॑य॒ पात॑वे

---

मन्त्र 17 {#mantra-17}

अध्याय: 22 | मन्त्र: 17

यो भू॒ताना॒मधि॑पति॒र्यस्मिँ॑ल्लो॒का अधि॑ श्रि॒ताः । य ईशे॑ मह॒तो म॒हास्तेन॑ गृह्णामि॒ त्वाम॒हं मयि॑ गृह्णामि॒ त्वाम॒हम्

---

मन्त्र 18 {#mantra-18}

अध्याय: 22 | मन्त्र: 18

उ॒प॒या॒मगृ॑हीतोऽस्य॒श्विभ्यां॑ त्वा॒ सर॑स्वत्यै॒ त्वेन्द्रा॑य त्वा सु॒त्राम्णे॑ । ए॒ष ते॒ योनि॑र॒श्विभ्यां॑ त्वा॒ सर॑स्वत्यै॒ त्वेन्द्रा॑य त्वा सु॒त्राम्णे॑

---

मन्त्र 19 {#mantra-19}

अध्याय: 22 | मन्त्र: 19

प्रा॒ण॒पा मे॑ अपान॒पाश्च॑क्षु॒ष्पाः श्रो॑त्र॒पाश्च॑ मे । वा॒चो मे॑ वि॒श्वभे॑षजो॒ मन॑सोऽसि वि॒लाय॑कः

---

मन्त्र 20 {#mantra-20}

अध्याय: 22 | मन्त्र: 20

अ॒श्विन॑कृतस्य ते॒ सर॑स्वतिकृत॒स्येन्द्रे॑ण सु॒त्राम्णा॑ कृ॒तस्य॑ । उप॑हूत॒ उप॑हूतस्य भक्षयामि

---

मन्त्र 21 {#mantra-21}

अध्याय: 22 | मन्त्र: 21

समि॑द्ध॒ इन्द्र॑ उ॒षसा॒मनी॑के पुरो॒रुचा॑ पूर्व॒कृद्वा॑वृधा॒नः । त्रि॒भिर्दे॒वैस्त्रि॒शता॒ वज्र॑बाहुर्ज॒घान॑ वृ॒त्रं वि दुरो॑ ववार

---

मन्त्र 22 {#mantra-22}

अध्याय: 22 | मन्त्र: 22

नरा॒शसः॒ प्रति॒ शूरो॒ मिमा॑न॒स्तनू॒नपा॒त्प्रति॑ य॒ज्ञस्य॒ धाम॑ । गोभि॑र्व॒पावा॒न्मधु॑ना सम॒ञ्जन् हिर॑ण्यैश्च॒न्द्री य॑जति॒ प्रचे॑ताः

---

मन्त्र 23 {#mantra-23}

अध्याय: 22 | मन्त्र: 23

ई॒ळि॒तो देवै॒र्हरि॑वाँ२ अभि॒ष्टिरा॒जुह्वा॑नो ह॒विषा॒ शर्ध॑मानः । पु॒रन्द॒रो गो॑त्र॒भिद्वज्र॑बाहु॒रा या॑तु य॒ज्ञमुप॑ नो जुषा॒णः

---

मन्त्र 24 {#mantra-24}

अध्याय: 22 | मन्त्र: 24

जु॒षा॒णो ब॒र्हिर्हरि॑वान्न॒ इन्द्रः॑ प्रा॒चीन॑ सीदत्प्र॒दिशा॑ पृथि॒व्याः । उ॒रु॒प्रथाः॒ प्रथ॑मान स्यो॒नमा॑दि॒त्यैर॒क्तं वसु॑भिः स॒जोषाः॑

---

मन्त्र 25 {#mantra-25}

अध्याय: 22 | मन्त्र: 25

इन्द्रं॒ दुरः॑ कव॒ष्यो॒ धाव॑माना॒ वृषा॑णं यन्तु॒ जन॑यः सु॒पत्नीः॑ । द्वारो॑ दे॒वीर॒भितो॒ वि श्र॑यन्ता सु॒वीरा॑ वी॒रं प्रथ॑माना॒ महो॑भिः

---

मन्त्र 26 {#mantra-26}

अध्याय: 22 | मन्त्र: 26

उ॒षासा॒नक्ता॑ बृह॒ती बृ॒हन्तं॒ पय॑स्वती सु॒दुघे॒ शूर॒मिन्द्र॑म् । तन्तुं॑ त॒तं पेश॑सा सं॒वय॑न्ती दे॒वानां॑ दे॒वं य॑जतः सुरु॒क्मे

---

मन्त्र 27 {#mantra-27}

अध्याय: 22 | मन्त्र: 27

दै॑व्या॒ मिमा॑ना॒ मनु॑षः पुरु॒त्रा होता॑रा॒ इन्द्रं॑ प्रथ॒मा सु॒वाचा॑ । मू॒र्धन्य॒ज्ञस्य॒ मधु॑ना॒ दधा॑ना प्रा॒चीनं॒ ज्योति॑र्ह॒विषा॑ वृधातः

---

मन्त्र 28 {#mantra-28}

अध्याय: 22 | मन्त्र: 28

ति॒स्रो दे॒वीर्ह॒विषा॒ वर्ध॑माना॒ इन्द्रं॑ जुषा॒णा जन॑यो॒ न पत्नीः॑ । अच्छि॑न्नं॒ तन्तुं॒ पय॑सा॒ सर॑स्व॒तीळा॑ दे॒वी भार॑ती वि॒श्वतू॑र्तिः

---

मन्त्र 29 {#mantra-29}

अध्याय: 22 | मन्त्र: 29

त्वष्टा॒ दध॒च्छुष्म॒मिन्द्रा॑य॒ वृष्णेऽपा॒कोचि॑ष्टुर्य॒शसे॑ पु॒रूणि॑ । वृषा॒ यज॒न्वृष॑णं॒ भूरि॑रेता मू॒र्धन्य॒ज्ञस्य॒ सम॑नक्तु दे॒वान्

---

मन्त्र 30 {#mantra-30}

अध्याय: 22 | मन्त्र: 30

वन॒स्पति॒रव॑सृष्टो॒ न पाशै॒स्त्मन्या॑ सम॒ञ्जञ्छ॑मि॒ता न दे॒वः । इन्द्र॑स्य हव्यैर्ज॒ठरं॑ पृणा॒नः स्वदा॑ति य॒ज्ञं मधु॑ना घृ॒तेन॑

---

मन्त्र 31 {#mantra-31}

अध्याय: 22 | मन्त्र: 31

स्तो॒काना॒मिन्दुं॒ प्रति॒ शूर॒ इन्द्रो॑ वृषा॒यमा॑णो वृष॒भस्तु॑रा॒षाट् । घृ॒त॒प्रुषा॒ मन॑सा॒ मोद॑मानाः॒ स्वाहा॑ दे॒वा अ॒मृता॑ मादयन्ताम्

---

मन्त्र 32 {#mantra-32}

अध्याय: 22 | मन्त्र: 32

आ या॒त्विन्द्रोव॑स॒ उप॑ न इ॒ह स्तु॒तः स॑ध॒माद॑स्तु॒ शूरः॑ । वा॒वृ॒धा॒नस्तवि॑षी॒र्यस्य॑ पू॒र्वीर्द्यौर्न क्ष॒त्रम॒भिभू॑ति॒ पुष्या॑त्

---

मन्त्र 33 {#mantra-33}

अध्याय: 22 | मन्त्र: 33

आ न॒ इन्द्रो॑ दू॒रादा न॑ आ॒साद॑भिष्टि॒कृदव॑से यासदु॒ग्रः । ओजि॑ष्ठेभिर्नृ॒पति॒र्वज्र॑बाहुः सं॒गे स॒मत्सु॑ तु॒र्वणिः॑ पृत॒न्यून्

---

मन्त्र 34 {#mantra-34}

अध्याय: 22 | मन्त्र: 34

आ न॒ इन्द्रो॒ हरि॑भिर्या॒त्वच्छा॑र्वाची॒नोऽव॑से॒ राध॑से च । तिष्ठा॑ति व॒ज्री म॒घवा॑ विर॒प्शीमं य॒ज्ञमनु॑ नो॒ वाज॑सातौ

---

मन्त्र 35 {#mantra-35}

अध्याय: 22 | मन्त्र: 35

त्रा॒तार॒मिन्द्र॑मवि॒तार॒मिन्द्र॒ हवे॑हवे सु॒हव॒ शूर॒मिन्द्र॑म् । ह्वया॑मि श॒क्रं पु॑रुहू॒तमिन्द्र॑ स्व॒स्ति नो॑ म॒घवा॑ धा॒त्विन्द्रः॑

---

मन्त्र 36 {#mantra-36}

अध्याय: 22 | मन्त्र: 36

इन्द्रः॑ सु॒त्रामा॒ स्ववाँ॒२ अवो॑भिः सुमृळी॒को भ॑वतु वि॒श्ववे॑दाः । बाध॑तां॒ द्वेषो॒ अभ॑यं कृणोतु सु॒वीर्य॑स्य॒ पत॑यः स्याम

---

मन्त्र 37 {#mantra-37}

अध्याय: 22 | मन्त्र: 37

तस्य॑ व॒य सु॑म॒तौ य॒ज्ञिय॒स्यापि॑ भ॒द्रे सौ॑मन॒से स्या॑म । स सु॒त्रामा॒ स्ववाँ॒२ इन्द्रो॑ अ॒स्मे आ॒राच्चि॒द् द्वेषः॑ सनु॒तर्यु॑योतु

---

मन्त्र 38 {#mantra-38}

अध्याय: 22 | मन्त्र: 38

आ म॒न्द्रैरि॑न्द्र॒ हरि॑भिर्या॒हि म॒यूर॑रोमभिः । मा त्वा॒ के चि॒न्नि य॑म॒न्विं ना पा॒शिनोति॒ धन्वे॑व॒ ताँ२ इ॑हि

---

मन्त्र 39 {#mantra-39}

अध्याय: 22 | मन्त्र: 39

ए॒वेदिन्द्रं॒ वृष॑णं॒ वज्र॑बाहुं॒ वसि॑ष्ठासो अ॒भ्य॑र्चन्त्य॒र्कैः । स न॑ स्तु॒तो वी॒रव॑द्धातु॒ गोम॑द्यू॒यं पा॑त स्व॒स्तिभिः॒ सदा॑ नः

---

मन्त्र 40 {#mantra-40}

अध्याय: 22 | मन्त्र: 40

समि॑द्धो अ॒ग्निर॑श्विना त॒प्तो घ॒र्मो वि॒राट् सु॒तः । दु॒हे धे॒नुः सर॑स्वती॒ सोम॑ शु॒क्रमि॒हेन्द्रि॒यम्

---

मन्त्र 41 {#mantra-41}

अध्याय: 22 | मन्त्र: 41

त॒नू॒पा भि॒षजा॑ सु॒ते॒ऽस्विनो॒भा सर॑स्वती । मध्वा॒ रजा॑सीन्द्रि॒यमिन्द्रा॑य प॒थिभि॑र्वहान्

---

मन्त्र 42 {#mantra-42}

अध्याय: 22 | मन्त्र: 42

इन्द्रा॒येन्दु॒ सर॑स्वती॒ नरा॒शसे॑न न॒ग्नहु॑म् । अधा॑ताम॒श्विना॒ मधु॑ भेष॒जं भि॒षजा॑ सु॒ते

---

मन्त्र 43 {#mantra-43}

अध्याय: 22 | मन्त्र: 43

आ॒जुह्वा॑ना॒ सर॑स्व॒तीन्द्रा॑येन्द्रि॒याणि॑ वी॒र्य॑म् । इळा॑भिर॒श्विना॒ इष॒ समूर्ज॒ स र॒यिं द॑धुः

---

मन्त्र 44 {#mantra-44}

अध्याय: 22 | मन्त्र: 44

अ॒श्विना॒ नमु॑चेः सु॒त सोम॑ शु॒क्रं प॑रि॒स्रुता॑ । सर॑स्वती॒ तमा भ॑रद्ब॒र्हिषेन्द्रा॑य॒ पात॑वे

---

मन्त्र 45 {#mantra-45}

अध्याय: 22 | मन्त्र: 45

क॒व॒ष्यो॑ न॒ व्यच॑स्वतीर॒श्विभ्यां॒ न दुरो॒ दिशः॑ । इन्द्रो॒ न रोद॑सी उ॒भे दु॒हे कामा॒न्त्सर॑स्वती

---

मन्त्र 46 {#mantra-46}

अध्याय: 22 | मन्त्र: 46

उ॒षासा॒नक्त॑मश्विना॒ दिवेन्द्र॑ सा॒यमि॑न्द्रियैः । सं॒जा॒ना॒ने सु॒पेश॑सा॒ सम॑ञ्जाते॒ सर॑स्वत्या

---

मन्त्र 47 {#mantra-47}

अध्याय: 22 | मन्त्र: 47

पा॒तं नो॑ अश्विना॒ दिवा॑ पा॒हि नक्त॑ सरस्वति । दैव्या॑ होतारा भिषजा पा॒तामिन्द्र॒ सचा॑ सु॒ते

---

मन्त्र 48 {#mantra-48}

अध्याय: 22 | मन्त्र: 48

ति॒स्रस्त्रे॒धा सर॑स्वत्य॒श्विना॒ भार॒तीळा॑ । ती॒व्रं प॑रि॒स्रुता॒ सोम॒मिन्द्रा॑य सुषुवु॒र्मद॑म्

---

मन्त्र 49 {#mantra-49}

अध्याय: 22 | मन्त्र: 49

अ॒श्विना॑ भेष॒जं मधु॑ भेष॒जं नः॒ सर॑स्वती । इन्द्रे॒ त्वष्टा॒ यशः॒ श्रिय॑ रू॒परू॑पमधुः सु॒ते

---

मन्त्र 50 {#mantra-50}

अध्याय: 22 | मन्त्र: 50

ऋ॒तु॒थेन्द्रो॒ वन॒स्पतिः॑ शशमा॒नः प॑रि॒स्रुता॑ । की॒लाल॑म॒श्विभ्यां॒ मधु॑ दु॒हे धे॒नुः सर॑स्वती

---

मन्त्र 51 {#mantra-51}

अध्याय: 22 | मन्त्र: 51

गोभि॒र्न सोम॑मश्विना॒ मास॑रेण परि॒स्रुता॑ । सम॑धात॒ सर॑स्वत्या॒ स्वाहेन्द्रे॑ सु॒तं मधु॑

---

मन्त्र 52 {#mantra-52}

अध्याय: 22 | मन्त्र: 52

अ॒श्विना॑ ह॒विरि॑न्द्रि॒यं नमु॑चेर्धि॒या सर॑स्वती । आ शु॒क्रमा॑सु॒राद्वसु॑ म॒घमिन्द्रा॑य जभ्रिरे

---

मन्त्र 53 {#mantra-53}

अध्याय: 22 | मन्त्र: 53

यम॒श्विना॒ सर॑स्वती ह॒विषेन्द्र॒मव॑र्धयन् । स बि॑भेद व॒लं म॒घं नमु॑चा आसु॒रे सचा॑

---

मन्त्र 54 {#mantra-54}

अध्याय: 22 | मन्त्र: 54

तमिन्द्रं॑ प॒शवः॒ सचा॒श्विनो॒भा सर॑स्वती । दधा॑ना अ॒भ्य॑नूषत ह॒विषा॑ य॒ज्ञ इ॑न्द्रि॒यैः

---

मन्त्र 55 {#mantra-55}

अध्याय: 22 | मन्त्र: 55

य इन्द्र॑ इन्द्रि॒यं द॒धुः स॑वि॒ता वरु॑णो॒ भगः॑ । स सु॒त्रामा॑ ह॒विष्प॑ति॒र्यज॑मानाय सश्चत

---

मन्त्र 56 {#mantra-56}

अध्याय: 22 | मन्त्र: 56

स॒वि॒ता वरु॑णो॒ दध॒द्यज॑मानाय दा॒शुषे॑ । आद॑त्त॒ नमु॑चे॒र्वसु॑ सु॒त्रामा॒ बल॑मिन्द्रि॒यम्

---

मन्त्र 57 {#mantra-57}

अध्याय: 22 | मन्त्र: 57

वरु॑णः क्ष॒त्रमि॑न्द्रि॒यं भगे॑न सवि॒ता श्रिय॑म् । सु॒त्रामा॒ यश॑सा॒ बलं॒ दधा॑ना य॒ज्ञमा॑शत

---

मन्त्र 58 {#mantra-58}

अध्याय: 22 | मन्त्र: 58

अ॒श्विना॒ गोभि॑रिन्द्रि॒यमश्वे॑भिर्वी॒र्यं॒ बल॑म् । ह॒विषेन्द्र॒ सर॑स्वती॒ यज॑मानमवर्धयन्

---

मन्त्र 59 {#mantra-59}

अध्याय: 22 | मन्त्र: 59

ता नास॑त्या सु॒पेश॑सा॒ हिर॑ण्यवर्तनी॒ नरा॑ । सर॑स्वती ह॒विष्म॒तीन्द्र॒ कर्म॑सु नोऽवत

---

मन्त्र 60 {#mantra-60}

अध्याय: 22 | मन्त्र: 60

ता भि॒षजा॑ सु॒कर्म॑णा॒ सा सु॒दुघा॒ सर॑स्वती । स वृ॑त्र॒हा श॒तक्र॑तु॒रिन्द्रा॑य दधुरिन्द्रि॒यम्

---

मन्त्र 61 {#mantra-61}

अध्याय: 22 | मन्त्र: 61

यु॒व सु॒राम॑मश्विना॒ नमु॑चा आसु॒रे सचा॑ । वि॒पि॒पा॒नाः सर॑स्व॒तीन्द्रं॒ कर्म॑स्वावत

---

मन्त्र 62 {#mantra-62}

अध्याय: 22 | मन्त्र: 62

पु॒त्रमि॑व पि॒तरा॑ अ॒श्विनो॒भेन्द्रा॒वथुः॒ काव्यै॑र्द॒सना॑भिः । यत्सु॒रामं॒ व्यपि॑बः॒ शची॑भिः॒ सर॑स्वती त्वा मघवन्नभिष्णक्

---

मन्त्र 63 {#mantra-63}

अध्याय: 22 | मन्त्र: 63

यस्मि॒न्नश्वा॑स ऋष॒भास॑ उ॒क्षणो॑ व॒शा मे॒षा अ॑वसृ॒ष्टास॒ आहु॑ताः । की॒ला॒ल॒पे सोम॑पृष्ठाय वे॒धसे॑ हृ॒दा म॒तिं ज॑नये॒ चारु॑म॒ग्नये॑

---

मन्त्र 64 {#mantra-64}

अध्याय: 22 | मन्त्र: 64

अहा॑व्यग्ने ह॒विरा॒स्ये॑ ते स्रु॒ची॑व घृ॒तं च॒म्वी॑व॒ सोमः॑ । वा॒ज॒सनि॑ र॒यिम॒स्मे सु॒वीरं॑ प्रश॒स्तं धे॑हि य॒शसं॑ बृ॒हन्त॑म्

---

मन्त्र 65 {#mantra-65}

अध्याय: 22 | मन्त्र: 65

अ॒श्विना॒ तेज॑सा॒ चक्षुः॑ प्रा॒णेन॒ सर॑स्वती वी॒र्य॑म् । वा॒चेन्द्रो॒ बले॒नेन्द्रा॑य दधुरिन्द्रि॒यम्

---

मन्त्र 66 {#mantra-66}

अध्याय: 22 | मन्त्र: 66

गोम॑दू॒ षु णा॑स॒त्याश्वा॑वद्यातमश्विना । व॒र्ती रु॑द्रा नृ॒पाय्य॑म्

---

मन्त्र 67 {#mantra-67}

अध्याय: 22 | मन्त्र: 67

न यत्परो॒ नान्त॑र आद॒धर्ष॑द्वृषण्वसू । दुः॒शसो॒ मर्त्यो॑ रि॒पुः

---

मन्त्र 68 {#mantra-68}

अध्याय: 22 | मन्त्र: 68

ता न॒ आ वो॑ळहमश्विना र॒यिं पि॒शङ्ग॑ संदृशम् । धिष्ण्या॑ वरिवो॒विद॑म्

---

मन्त्र 69 {#mantra-69}

अध्याय: 22 | मन्त्र: 69

पा॒व॒का नः॒ सर॑स्वती॒ वाजे॑भिर्वा॒जिनी॑वती । य॒ज्ञं व॑ष्टु धि॒याव॑सुः

---

मन्त्र 70 {#mantra-70}

अध्याय: 22 | मन्त्र: 70

चो॒द॒यि॒त्री सू॒नृता॑नां॒ चेत॑न्ती सुमती॒नाम् । य॒ज्ञं द॑धे॒ सर॑स्वती

---

मन्त्र 71 {#mantra-71}

अध्याय: 22 | मन्त्र: 71

म॒हो अर्णः॒ सर॑स्वती॒ प्र चे॑तयति के॒तुना॑ । धियो॒ विश्वा॒ वि रा॑जति

---

मन्त्र 72 {#mantra-72}

अध्याय: 22 | मन्त्र: 72

इन्द्रा या॑हि चित्रभानो सु॒ता इ॒मे त्वा॒यवः॑ । अण्वी॑भि॒स्तना॑ पू॒तासः॑

---

मन्त्र 73 {#mantra-73}

अध्याय: 22 | मन्त्र: 73

इन्द्रा या॑हि धि॒येषि॒तो विप्र॑जूतः सु॒ताव॑तः । उप॒ ब्रह्मा॑णि वा॒घतः॑

---

मन्त्र 74 {#mantra-74}

अध्याय: 22 | मन्त्र: 74

इन्द्रा या॑हि॒ तूतु॑जान॒ उप॒ ब्रह्मा॑णि हरिवः । सु॒ते द॑धिष्व न॒श्चनः॑

---

मन्त्र 75 {#mantra-75}

अध्याय: 22 | मन्त्र: 75

अ॒श्विना॑ पिबतां॒ मधु॒ सर॑स्वत्या स॒जोष॑सा । इन्द्रः॑ सु॒त्रामा॑ वृत्र॒हा जु॒षन्ता॑ सो॒म्यं मधु॑

---