शुक्लयजुः माध्यन्दिनसंहिता — द्वादशोऽध्यायः (117 मन्त्राः)

शुक्लयजुः माध्यन्दिनसंहिता — द्वादशोऽध्यायः

दृ॒शा॒नो रु॒क्म उ॒र्व्या व्य॑द्यौद् दु॒र्मर्ष॒मायु॑: श्रि॒ये रु॑चा॒नः ।

---

मन्त्राः

मन्त्र	प्रथम पद
1	अग्निरमृतो अभवद्वयोभिर्यदेन
2	नक्तोषासा समनसा
3	विश्वा रूपाणि
4	सुपर्णोऽसि गरुत्मास्त्रिवृत्ते
5	विष्णो क्रमोऽसि
6	अक्रन्ददग्नि स्तनयन्निव
7	अग्नेऽभ्यावर्तिन्नभि मा
8	अग्ने अङ्गिर
9	पुनरूर्जा नि
10	सह रय्या
11	आ त्वाऽहार्षमन्तरभूर्ध्रुवस्तिष्ठाविचाचलि
12	उदुत्तम वरुण
13	अग्रे बृहन्नुषसामूर्ध्वो
14	हस शुचिषद्वसुरन्तरिक्षसद्धोता
15	सीद त्व
16	अन्तरग्ने रुचा
17	शिवो भूत्वा
18	दिवस्परि प्रथम
19	विद्मा ते
20	समुद्रे त्वा
21	अक्रन्ददग्नि स्तनयन्निव
22	श्रीणामुदारो धरुणो
23	विश्वस्य केतुर्भुवनस्य
24	उशिक्पावको अरति
25	दृशानो रुक्म
26	यस्ते अद्य
27	आ त
28	त्वामग्ने यजमाना
29	अस्ताव्यग्निर्नरा सुशेवो
30	समिधाऽग्नि दुवस्यत
31	उदु त्वा
32	प्रेदग्ने ज्योतिष्मान्
33	अक्रन्ददग्नि स्तनयन्निव
34	प्रप्रायमग्निर्भरतस्य शृण्वे
35	आपो देवी
36	अप्स्वग्ने सधिष्टव
37	गर्भो अस्योषधीना
38	प्रसद्य भस्मना
39	पुनरासद्य सदनमपश्च
40	पुनरूर्जा नि
41	सह रय्या
42	बोधा मे
43	स बोधि
44	पुनस्त्वाऽऽदित्या रुद्रा
45	अपेत वीत
46	सज्ञानमसि कामधरण
47	अय सो
48	अग्ने यत्ते
49	अग्ने दिवो
50	पुरीष्यासो अग्नय
51	इडामग्ने पुरुदस
52	अय ते
53	चिदसि तया
54	लोक पृण
55	ता अस्य
56	इन्द्र विश्वा
57	समित स
58	स वा
59	अग्ने त्व
60	भवत न
61	मातेव पुत्र
62	असुन्वन्तमयजमानमिच्छ स्तेनस्येत्यामन्विहि
63	नम सु
64	यस्यास्ते घोर
65	य ते
66	निवेशन सङ्गमनो
67	सीरा युञ्जन्ति
68	युनक्त सीरा
69	शुन सु
70	घृतेन सीता
71	लाङ्गल पवीरवत्सुशेव
72	काम कामदुघे
73	वि मुच्यध्वमघ्न्या
74	सजूरब्दो अयवोभि
75	या ओषधी
76	शत वो
77	ओषधी प्रति
78	ओषधीरिति मातरस्तद्वो
79	अश्वत्थे वो
80	यत्रौषधी समग्मत
81	अश्वावती सोमावतीमूर्जयन्तीमुदोजसम्
82	उच्छुष्मा ओषधीना
83	इष्कृतिर्नाम वो
84	अति विश्वा
85	यदिमा वाजयन्नहमोषधीर्हस्त
86	यस्यौषधी प्रसर्पथाङ्गमङ्ग
87	साक यक्ष्म
88	अन्या वो
89	या फलिनीर्या
90	मुञ्चन्तु मा
91	अवपतन्तीरवदन्दिव ओषधयस्परि
92	या ओषधी
93	या ओषधी
94	याश्चेदमुपशृण्वन्ति याश्च
95	मा वो
96	ओषधय समवदन्त
97	नाशयित्री बलासस्यार्शस
98	त्वा गन्धर्वा
99	सहस्व मे
100	दीर्घायुस्त ओषधे
101	त्वमुत्तमास्योषधे तव
102	मा मा
103	अभ्या वर्तस्व
104	अग्ने यत्ते
105	इषमूर्जमहमित आदमृतस्य
106	अग्ने तव
107	पावकवर्चा शुक्रवर्चा
108	ऊर्जो नपाज्जातवेद
109	इरज्यन्नग्ने प्रथयस्व
110	इष्कर्तारमध्वरस्य प्रचेतस
111	ऋतावान महिष
112	आ प्यायस्व
113	स ते
114	आ प्यायस्व
115	आ ते
116	तुभ्य ता
117	अग्नि प्रियेषु

---

मन्त्र 1 {#mantra-1}

अध्याय: 12 | मन्त्र: 1

अ॒ग्निर॒मृतो॑ अभव॒द्वयो॑भि॒र्यदे॑नं॒ द्यौरज॑नयत्सु॒रेता॑:

---

मन्त्र 2 {#mantra-2}

अध्याय: 12 | मन्त्र: 2

नक्तो॒षासा॒ सम॑नसा॒ विरू॑पे धा॒पये॑ते॒ शिशु॒मेक॑ᳪ समी॒ची । द्यावा॒क्षामा॑ रु॒क्मो अ॒न्तर्वि भा॑ति दे॒वा अ॒ग्निं धा॑रयन्द्रविणो॒दाः

---

मन्त्र 3 {#mantra-3}

अध्याय: 12 | मन्त्र: 3

विश्वा॑ रू॒पाणि॒ प्रति॑ मुञ्चते क॒विः प्रासा॑वीद्भ॒द्रं द्वि॒पदे॒ चतु॑ष्पदे । वि नाक॑मख्यत्सवि॒ता वरे॒ण्योऽनु॑ प्र॒याण॑मु॒षसो॒ वि रा॑जति

---

मन्त्र 4 {#mantra-4}

अध्याय: 12 | मन्त्र: 4

सु॒प॒र्णो॒ऽसि ग॒रुत्माँ॑स्त्रि॒वृत्ते॒ शिरो॑ गाय॒त्रं चक्षु॑र्बृहद्रथन्त॒रे पक्षौ । स्तोम॑ आ॒त्मा छन्दा॒ᳪस्यङ्गा॑नि॒ यजूँ॑ᳪषि॒ नाम॑ । साम॑ ते त॒नूर्वा॑मदे॒व्यं य॑ज्ञाय॒ज्ञियं॒ पुच्छं॒ धिष्ण्या॑: श॒पाः । सु॒प॒र्णो॒ऽसि ग॒रुत्मा॒न्दिवं॑ गच्छ॒ स्व॑: पत

---

मन्त्र 5 {#mantra-5}

अध्याय: 12 | मन्त्र: 5

विष्णो॒: क्रमो॑ऽसि सपत्न॒हा गा॑य॒त्रं छन्द॒ आ रो॑ह पृथि॒वीमनु॒ वि क्र॑मस्व॒ विष्णो॒: क्रमो॑ऽस्यभिमाति॒हा त्रै॑ष्टुभं॒ छन्द॒ आ रो॑हा॒न्तरि॑क्ष॒मनु॒ वि क्र॑मस्व विष्णो॒: क्रमो॑ऽस्यरातीय॒तो ह॒न्ता जाग॑तं॒ छन्द॒ आ रो॑ह॒ दिव॒मनु॒ वि क्र॑मस्व विष्णो॒: क्रमो॑ऽसि शत्रूय॒तो ह॒न्ताऽऽनु॑ष्टुभं॒ छन्द॒ आ रो॑ह॒ दिशोऽनु॒ वि क्र॑मस्व

---

मन्त्र 6 {#mantra-6}

अध्याय: 12 | मन्त्र: 6

अक्र॑न्दद॒ग्नि स्त॒नय॑न्निव॒ द्यौ॒: क्षामा॒ रेरि॑हद्वी॒रुध॑: सम॒ञ्जन् । स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्य॒न्तः

---

मन्त्र 7 {#mantra-7}

अध्याय: 12 | मन्त्र: 7

अग्ने॑ऽभ्यावर्तिन्न॒भि मा॒ नि व॑र्त॒स्वायु॑षा॒ वर्च॑सा प्र॒जया॒ धने॑न । स॒न्या मे॒धया॑ र॒य्या पोषे॑ण

---

मन्त्र 8 {#mantra-8}

अध्याय: 12 | मन्त्र: 8

अग्ने॑ अङ्गिरः श॒तं ते॑ सन्त्वा॒वृत॑: स॒हस्रं॑ त उपा॒वृत॑: । अधा॒ पोष॑स्य॒ पोषे॑ण॒ पुन॑र्नो न॒ष्टमा कृ॑धि॒ पुन॑र्नो र॒यिमा कृ॑धि

---

मन्त्र 9 {#mantra-9}

अध्याय: 12 | मन्त्र: 9

पुन॑रू॒र्जा नि व॑र्तस्व॒ पुन॑रग्न इ॒षाऽऽयु॑षा । पुन॑र्नः पा॒ह्यᳪह॑सः

---

मन्त्र 10 {#mantra-10}

अध्याय: 12 | मन्त्र: 10

स॒ह र॒य्या नि व॑र्त॒स्वाग्ने॒ पिन्व॑स्व॒ धार॑या । वि॒श्वप्स्न्या॑ वि॒श्वत॒स्परि॑

---

मन्त्र 11 {#mantra-11}

अध्याय: 12 | मन्त्र: 11

आ त्वा॑ऽहार्षम॒न्तर॑भूर्ध्रु॒वस्ति॒ष्ठावि॑चाचलिः । विश॑स्त्वा॒ सर्वा॑ वाञ्छन्तु॒ मा त्वद्रा॒ष्ट्रमधि॑भ्रशत्

---

मन्त्र 12 {#mantra-12}

अध्याय: 12 | मन्त्र: 12

उदु॑त्त॒मं व॑रुण॒ पाश॑म॒स्मदवा॑ध॒मं वि म॑ध्य॒मᳪ श्र॑थाय । अथा॑ व॒यमा॑दित्य व्र॒ते तवाना॑गसो॒ अदि॑तये स्याम

---

मन्त्र 13 {#mantra-13}

अध्याय: 12 | मन्त्र: 13

अग्रे॑ बृ॒हन्नु॒षसा॑मू॒र्ध्वो अ॑स्थान्निर्जग॒न्वान् तम॑सो॒ ज्योति॒षाऽऽगा॑त् । अ॒ग्निर्भा॒नुना॒ रुश॑ता॒ स्वङ्ग॒ आ जा॒तो विश्वा॒ सद्मा॑न्यप्राः

---

मन्त्र 14 {#mantra-14}

अध्याय: 12 | मन्त्र: 14

ह॒ᳪसः शु॑चि॒षद्वसु॑रन्तरिक्ष॒सद्धोता॑ वेदि॒षदति॑थिर्दूरोण॒सत् । नृ॒षद्व॑र॒सदृ॑त॒सद् व्योम॒सद॒ब्जा गो॒जा ऋ॑त॒जा अ॑द्रि॒जा ऋ॒तं बृ॒हत्

---

मन्त्र 15 {#mantra-15}

अध्याय: 12 | मन्त्र: 15

सीद॒ त्वं मा॒तुर॒स्या उ॒पस्थे॒ विश्वा॑न्यग्ने व॒युना॑नि वि॒द्वान् । मै॑नां॒ तप॑सा॒ मार्चिषा॒ऽभि शो॑चीर॒न्तर॑स्याᳪ शु॒क्रज्यो॑ति॒र्वि भा॑हि

---

मन्त्र 16 {#mantra-16}

अध्याय: 12 | मन्त्र: 16

अ॒न्तर॑ग्ने रु॒चा त्वमु॒खायाः॒ सद॑ने॒ स्वे । तस्या॒स्त्वᳪ हर॑सा॒ तप॒ञ्जात॑वेदः शि॒वो भ॑व

---

मन्त्र 17 {#mantra-17}

अध्याय: 12 | मन्त्र: 17

शि॒वो भू॒त्वा मह्य॑मग्ने॒ अथो॑ सीद शि॒वस्त्वम् । शि॒वा: कृ॒त्वा दिश॒: सर्वा॒: स्वं योनि॑मि॒हास॑दः

---

मन्त्र 18 {#mantra-18}

अध्याय: 12 | मन्त्र: 18

दि॒वस्परि॑ प्रथ॒मं ज॑ज्ञे अ॒ग्निर॒स्मद् द्वि॒तीयं॒ परि॑ जा॒तवे॑दाः । तृ॒तीय॑म॒प्सु नृ॒मणा॒ अज॑स्र॒मिन्धा॑न एनं जरते स्वा॒धीः

---

मन्त्र 19 {#mantra-19}

अध्याय: 12 | मन्त्र: 19

वि॒द्मा ते॑ अग्ने त्रे॒धा त्र॒याणि॑ वि॒द्मा ते॒ धाम॒ विभृ॑ता पुरु॒त्रा । वि॒द्मा ते॒ नाम॑ पर॒मं गुहा॒ यद्वि॒द्मा तमुत्सं॒ यत॑ आज॒गन्थ॑

---

मन्त्र 20 {#mantra-20}

अध्याय: 12 | मन्त्र: 20

स॒मु॒द्रे त्वा॑ नृ॒मणा॑ अ॒प्स्वन्तर्नृ॒चक्षा॑ ईधे दि॒वो अ॑ग्न॒ ऊध॑न् । तृ॒तीये॑ त्वा॒ रज॑सि तस्थि॒वाᳪस॑म॒पामु॒पस्थे॑ महि॒षा अ॑वर्धन्

---

मन्त्र 21 {#mantra-21}

अध्याय: 12 | मन्त्र: 21

अक्र॑न्दद॒ग्नि स्त॒नय॑न्निव॒ द्यौ: क्षामा॒ रेरि॑हद्वी॒रुध॑: सम॒ञ्जन् । स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्य॒न्तः

---

मन्त्र 22 {#mantra-22}

अध्याय: 12 | मन्त्र: 22

श्री॒णामु॑दा॒रो ध॒रुणो॑ रयी॒णां म॑नी॒षाणां॒ प्रार्प॑ण॒: सोम॑गोपाः । वसु॑: सू॒नुः सह॑सो अ॒प्सु राजा॒ वि भा॒त्यग्र॑ उ॒षसा॑मिधा॒नः

---

मन्त्र 23 {#mantra-23}

अध्याय: 12 | मन्त्र: 23

विश्व॑स्य के॒तुर्भुव॑नस्य॒ गर्भ॒ आ रोद॑सी अपृणा॒ज्जाय॑मानः । वी॒डुं चि॒दद्रि॑मभिनत् परा॒यञ्जना॒ यद॒ग्निमय॑जन्त॒ पञ्च॑

---

मन्त्र 24 {#mantra-24}

अध्याय: 12 | मन्त्र: 24

उ॒शिक्पा॑व॒को अ॑र॒तिः सु॑मे॒धा मर्त्ये॑ष्व॒ग्निर॒मृतो॒ नि धा॑यि । इय॑र्ति धू॒मम॑रु॒षं भरि॑भ्र॒दुच्छु॒क्रेण॑ शो॒चिषा॒ द्यामिन॑क्षन्

---

मन्त्र 25 {#mantra-25}

अध्याय: 12 | मन्त्र: 25

दृ॒शा॒नो रु॒क्म उ॒र्व्या व्य॑द्यौद्दु॒र्मर्ष॒मायु॑: श्रि॒ये रु॑चा॒नः । अ॒ग्निर॒मृतो॑ अभव॒द्वयो॑भि॒र्यदे॑नं द्यौरज॑नय॑त्सु॒रेता॑:

---

मन्त्र 26 {#mantra-26}

अध्याय: 12 | मन्त्र: 26

यस्ते॑ अ॒द्य कृ॒णव॑द्भद्रशोचेऽपू॒पं दे॑व घृ॒तव॑न्तमग्ने । प्र तं न॑य प्रत॒रं वस्यो॒ अच्छा॒भि सु॒म्नं दे॒वभ॑क्तं यविष्ठ

---

मन्त्र 27 {#mantra-27}

अध्याय: 12 | मन्त्र: 27

आ तं भ॑ज सौश्रव॒सेष्व॑ग्न उ॒क्थ उ॑क्थ॒ आ भ॑ज श॒स्यमा॑ने । प्रि॒यः सूर्ये॑ प्रि॒यो अ॒ग्ना भ॑वा॒त्युज्जा॒तेन॑ भि॒नद॒दुज्जनि॑त्वैः

---

मन्त्र 28 {#mantra-28}

अध्याय: 12 | मन्त्र: 28

त्वाम॑ग्ने॒ यज॑माना॒ अनु॒ द्यून् विश्वा॒ वसु॑ दधिरे॒ वार्या॑णि । त्वया॑ स॒ह द्रवि॑णमि॒च्छमा॑ना व्र॒जं गोम॑न्तमु॒शिजो॒ वि व॑व्रुः

---

मन्त्र 29 {#mantra-29}

अध्याय: 12 | मन्त्र: 29

अस्ता॑व्य॒ग्निर्न॒राᳪ सु॒शेवो॑ वैश्वान॒र ऋषि॑भि॒: सोम॑गोपाः । अ॒द्वे॒षे द्यावा॑पृथि॒वी हु॑वेम॒ देवा॑ ध॒त्त र॒यिम॒स्मे सु॒वीर॑म्

---

मन्त्र 30 {#mantra-30}

अध्याय: 12 | मन्त्र: 30

स॒मिधा॒ऽग्निं दु॑वस्यत घृ॒तैर्बो॑धय॒ताति॑थिम् । आऽस्मि॑न् हव्या जु॑होतन

---

मन्त्र 31 {#mantra-31}

अध्याय: 12 | मन्त्र: 31

उदु॑ त्वा॒ विश्वे॑ दे॒वा अग्ने॒ भर॑न्तु॒ चित्ति॑भिः । स नो॑ भव शि॒वस्त्वᳪ सु॒प्रती॑को वि॒भाव॑सुः

---

मन्त्र 32 {#mantra-32}

अध्याय: 12 | मन्त्र: 32

प्रेद॑ग्ने॒ ज्योति॑ष्मान् याहि शि॒वेभि॑र॒र्चिभि॒ष्ट्वम् । बृ॒हद्भि॑र्भा॒नुभि॒र्भास॒न्मा हि॑ᳪसीस्त॒न्वा॒ प्र॒जाः

---

मन्त्र 33 {#mantra-33}

अध्याय: 12 | मन्त्र: 33

अक्र॑न्दद॒ग्नि स्त॒नय॑न्निव॒ द्यौ: क्षामा॒ रेरि॑हद्वी॒रुध॑: सम॒ञ्जन् । स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्य॒न्तः

---

मन्त्र 34 {#mantra-34}

अध्याय: 12 | मन्त्र: 34

प्र-प्रा॒यम॒ग्निर्भ॑र॒तस्य॑ शृण्वे॒ वि यत्सूर्यो॒ न रोच॑ते बृ॒हद्भाः । अ॒भि यः पू॒रुं पृत॑नासु त॒स्थौ दी॒दाय दैव्यो॒ अति॑थिः शि॒वो न॑:

---

मन्त्र 35 {#mantra-35}

अध्याय: 12 | मन्त्र: 35

आपो॑ देवी॒: प्रति॑ गृभ्णीत॒ भस्मै॒तत्स्यो॒ने कृ॑णुध्वᳪ सुर॒भा उ॑ लो॒के । तस्मै॑ नमन्तां॒ जन॑यः सु॒पत्नी॑र्मा॒तेव॑ पु॒त्रं बि॑भृता॒प्स्वे॒नत्

---

मन्त्र 36 {#mantra-36}

अध्याय: 12 | मन्त्र: 36

अ॒प्स्व॒ग्ने॒ सधि॒ष्टव॒ सौष॑धी॒रनु॑ रुध्यसे । गर्भे॒ सञ्जा॑यसे॒ पुन॑:

---

मन्त्र 37 {#mantra-37}

अध्याय: 12 | मन्त्र: 37

गर्भो॑ अ॒स्योष॑धीनां॒ गर्भो॒ वन॒स्पती॑नाम् । गर्भो॒ विश्व॑स्य भू॒तस्याग्ने॒ गर्भो॑ अ॒पाम॑सि

---

मन्त्र 38 {#mantra-38}

अध्याय: 12 | मन्त्र: 38

प्र॒सद्य॒ भस्म॑ना॒ योनि॑म॒पश्च॑ पृथि॒वीम॑ग्ने । स॒ᳪसृज्य॑ मा॒तृभि॒ष्ट्वं ज्योति॑ष्मा॒न् पुन॒रा ऽस॑दः

---

मन्त्र 39 {#mantra-39}

अध्याय: 12 | मन्त्र: 39

पुन॑रा॒सद्य॒ सद॑नम॒पश्च॑ पृथि॒वीम॑ग्ने । शेषे॑ मा॒तुर्यथो॒पस्थे॒ऽन्तर॑स्याᳪ शि॒वत॑मः

---

मन्त्र 40 {#mantra-40}

अध्याय: 12 | मन्त्र: 40

पुन॑रू॒र्जा नि व॑र्तस्व॒ पुन॑रग्न इ॒षाऽऽयु॑षा । पुन॑र्नः पा॒ह्यᳪह॑सः

---

मन्त्र 41 {#mantra-41}

अध्याय: 12 | मन्त्र: 41

स॒ह र॒य्या नि व॑र्त॒स्वाग्ने॒ पिन्व॑स्व॒ धार॑या । वि॒श्वप्स्न्या॑ वि॒श्वत॒स्परि॑

---

मन्त्र 42 {#mantra-42}

अध्याय: 12 | मन्त्र: 42

बोधा॑ मे अ॒स्य वच॑सो यविष्ठ॒ मᳪहि॑ष्ठस्य॒ प्रभृ॑तस्य स्वधावः । पीय॑ति त्वो॒ अनु॑ त्वो गृणाति व॒न्दारु॑ष्टे त॒न्वं॒ वन्दे अग्ने

---

मन्त्र 43 {#mantra-43}

अध्याय: 12 | मन्त्र: 43

स बो॑धि सू॒रिर्म॒घवा॒ वसु॑पते॒ वसु॑दावन् । यु॒यो॒ध्यस्मद् द्वेषा॑ᳪसि वि॒श्वक॑र्मणे॒ स्वाहा॑

---

मन्त्र 44 {#mantra-44}

अध्याय: 12 | मन्त्र: 44

पुन॑स्त्वाऽऽदि॒त्या रु॒द्रा वस॑व॒: समि॑न्धतां॒ पुन॑र्ब्र॒ह्माणो॑ वसुनीथ य॒ज्ञैः । घृ॒तेन॒ त्वं त॒न्वं॒ वर्धयस्व स॒त्याः स॑न्तु॒ यज॑मानस्य॒ कामा॑:

---

मन्त्र 45 {#mantra-45}

अध्याय: 12 | मन्त्र: 45

अपे॑त॒ वी॒त॒ वि च॑ सर्प॒तातो॒ येऽत्र॒ स्थ पु॑रा॒णा ये च॒ नूत॑नाः । अदा॑द्य॒मो॒ऽव॒सानं॑ पृथि॒व्या अक्र॑न्नि॒मं पि॒तरो॑ लो॒कम॑स्मै

---

मन्त्र 46 {#mantra-46}

अध्याय: 12 | मन्त्र: 46

सं॒ज्ञान॑मसि काम॒धर॑णं॒ मयि॑ ते काम॒धर॑णं भूयात् । अ॒ग्नेर्भस्मा॑स्य॒ग्नेः पुरी॑षमसि॒ । चित॑ स्थ परि॒चित॑ ऊर्ध्व॒चित॑: श्रयध्वम्

---

मन्त्र 47 {#mantra-47}

अध्याय: 12 | मन्त्र: 47

अ॒यᳪ सो अ॒ग्निर्यस्मि॒न्त्सोम॒मिन्द्र॑: सु॒तं द॒धे ज॒ठरे॑ वावशा॒नः । स॒ह॒स्रियं॒ वाज॒मत्यं॒ न सप्ति॑ᳪ सस॒वान्त्सन्त्स्तू॑यसे जातवेदः

---

मन्त्र 48 {#mantra-48}

अध्याय: 12 | मन्त्र: 48

अग्ने॒ यत्ते॑ दि॒वि वर्च॑: पृथि॒व्यां यदोष॑धीष्व॒प्स्वा य॑जत्र । येना॒न्तरि॑क्षमु॒र्वा॑त॒तन्थ॑ त्वे॒षः स भा॒नुर॑र्ण॒वो नृ॒चक्षा॑:

---

मन्त्र 49 {#mantra-49}

अध्याय: 12 | मन्त्र: 49

अग्ने॑ दि॒वो अर्ण॒मच्छा॑ जिगा॒स्यच्छा॑ दे॒वाँ२ ऊ॑चिषे॒ धिष्ण्या॒ ये । या रो॑च॒ने प॒रस्ता॒त् सूर्य॑स्य॒ याश्चा॒वस्ता॑दुप॒तिष्ठ॑न्त॒ आप॑:

---

मन्त्र 50 {#mantra-50}

अध्याय: 12 | मन्त्र: 50

पु॒री॒ष्या॒सो अ॒ग्नय॑: प्राव॒णेभि॑: स॒जोष॑सः । जु॒षन्तां॑ य॒ज्ञम॒द्रुहो॑ऽनमी॒वा इषो॑ म॒हीः

---

मन्त्र 51 {#mantra-51}

अध्याय: 12 | मन्त्र: 51

इडा॑मग्ने पुरु॒दᳪस॑ᳪ स॒निं गोः श॑श्वत्त॒मᳪ हव॑मानाय साध । स्यान्न॑: सू॒नुस्तन॑यो वि॒जावाग्ने॒ सा ते॑ सुम॒तिर्भू॑त्व॒स्मे

---

मन्त्र 52 {#mantra-52}

अध्याय: 12 | मन्त्र: 52

अ॒यं ते॒ योनि॑रृ॒त्वियो॒ यतो॑ जा॒तो अरो॑चथाः । तं जा॒नन्न॑ग्न॒ आ रो॒हाथा॑ नो वर्धया र॒यिम्

---

मन्त्र 53 {#mantra-53}

अध्याय: 12 | मन्त्र: 53

चिद॑सि॒ तया॑ दे॒वत॑याऽङ्गिर॒स्वद् ध्रु॒वा सी॑द प॑रि॒चिद॑सि॒ तया॑ दे॒वत॑याऽङ्गिर॒स्वद् ध्रु॒वा सी॑द

---

मन्त्र 54 {#mantra-54}

अध्याय: 12 | मन्त्र: 54

लो॒कं पृ॑ण छि॒द्रं पृ॒णाथो॑ सीद ध्रु॒वा त्वम् । इ॒न्द्रा॒ग्नी त्वा॒ बृह॒स्पति॑र॒स्मिन् योना॑वसीषदन्

---

मन्त्र 55 {#mantra-55}

अध्याय: 12 | मन्त्र: 55

ता अ॑स्य॒ सूद॑दोहस॒: सोम॑ श्रीणन्ति॒ पृश्न॑यः । जन्म॑न्दे॒वानां॒ विश॑स्त्रि॒ष्वा रो॑च॒ने दि॒वः

---

मन्त्र 56 {#mantra-56}

अध्याय: 12 | मन्त्र: 56

इन्द्रं॒ विश्वा॑ अवीवृधन्त्समु॒द्रव्य॑चसं॒ गिर॑: । र॒थीत॑मᳪ र॒थीनां॒ वाजा॑ना॒ᳪ सत्प॑तिं॒ पति॑म्

---

मन्त्र 57 {#mantra-57}

अध्याय: 12 | मन्त्र: 57

समि॑तᳪ सं क॑ल्पेथा॒ᳪ संप्रि॑यौ रोचि॒ष्णू सु॑मन॒स्यमा॑नौ । इष॒मूर्ज॑म॒भि सं॒वसा॑नौ

---

मन्त्र 58 {#mantra-58}

अध्याय: 12 | मन्त्र: 58

सं वां॒ मना॑ᳪसि॒ सं व्र॒ता समु॑ चि॒त्तान्याक॑रम् । अग्ने॑ पुरीष्याधि॒पा भ॑व॒ त्वं न॒ इष॒मूर्जं॒ यज॑मानाय धेहि

---

मन्त्र 59 {#mantra-59}

अध्याय: 12 | मन्त्र: 59

अग्ने॒ त्वं पु॑री॒ष्यो॒ रयि॒मान् पु॑ष्टि॒माँ२ अ॑सि । शि॒वाः कृ॒त्वा दिश॒: सर्वा॒: स्वं योनि॑मि॒हाऽस॑दः

---

मन्त्र 60 {#mantra-60}

अध्याय: 12 | मन्त्र: 60

भव॑तं न॒: सम॑नसौ॒ सचे॑तसावरे॒पसौ॑ । मा य॒ज्ञᳪ हि॑ᳪसिष्टं॒ मा य॒ज्ञप॑तिं जातवेदसौ शि॒वौ भ॑वतम॒द्य न॑:

---

मन्त्र 61 {#mantra-61}

अध्याय: 12 | मन्त्र: 61

मा॒तेव॑ पु॒त्रं पृ॑थि॒वी पु॑री॒ष्य॒म॒ग्निᳪ स्वे योना॑वभारु॒खा । तां विश्वै॑र्दे॒वैरृ॒तुभि॑: संविदा॒नः प्र॒जाप॑तिर्वि॒श्वक॑र्मा॒ वि मु॑ञ्चतु

---

मन्त्र 62 {#mantra-62}

अध्याय: 12 | मन्त्र: 62

असु॑न्वन्त॒मय॑जमानमिच्छ स्ते॒नस्ये॒त्यामन्वि॑हि॒ तस्क॑रस्य । अ॒न्यम॒स्मदि॑च्छ॒ सा त॑ इ॒त्या नमो॑ देवि निरृते॒ तुभ्य॑मस्तु

---

मन्त्र 63 {#mantra-63}

अध्याय: 12 | मन्त्र: 63

नम॒: सु ते॑ निरृते तिग्मतेजोऽय॒स्मयं॒ वि चृ॑ता ब॒न्धमे॒तम् । य॒मेन॒ त्वं य॒म्या सं॑विदा॒नोत्त॒मे ना॒के अधि॑ रोहयैनम्

---

मन्त्र 64 {#mantra-64}

अध्याय: 12 | मन्त्र: 64

यस्या॑स्ते घोर आ॒सञ्जु॒होम्ये॒षां ब॒न्धाना॑मव॒सर्ज॑नाय । यां त्वा॒ जनो॒ भूमि॒रिति॑ प्र॒मन्द॑ते॒ निरृ॑तिं त्वा॒ऽहं परि॑वेद वि॒श्वत॑:

---

मन्त्र 65 {#mantra-65}

अध्याय: 12 | मन्त्र: 65

यं ते॑ दे॒वी निरृ॑तिराब॒बन्ध॒ पाशं॑ ग्री॒वास्व॑विचृ॒त्यम् । तं ते॒ वि ष्या॒म्यायु॑षो॒ न मध्या॒दथै॒तं पि॒तुम॑द्धि॒ प्रसू॑तः । नमो॒ भूत्यै॒ येदं च॒कार॑

---

मन्त्र 66 {#mantra-66}

अध्याय: 12 | मन्त्र: 66

नि॒वेश॑नः स॒ङ्गम॑नो॒ वसू॑नां॒ विश्वा॑ रू॒पाऽभि च॑ष्टे॒ शची॑भिः । दे॒व इ॑व सवि॒ता स॒त्यध॒र्मेन्द्रो॒ न त॑स्थौ सम॒रे प॑थी॒नाम्

---

मन्त्र 67 {#mantra-67}

अध्याय: 12 | मन्त्र: 67

सीरा॑ युञ्जन्ति क॒वयो॑ यु॒गा वि त॑न्वते॒ पृथ॑क् । धीरा॑ दे॒वेषु॑ सुम्न॒या

---

मन्त्र 68 {#mantra-68}

अध्याय: 12 | मन्त्र: 68

यु॒नक्त॒ सीरा॒ वि यु॒गा त॑नुध्वं कृ॒ते योनौ॑ वपते॒ह बीज॑म् । गि॒रा च॑ श्रु॒ष्टिः सभ॑रा॒ अस॑न्नो॒ नेदी॑य॒ इत्सृ॒ण्य॒: प॒क्वमेया॑त्

---

मन्त्र 69 {#mantra-69}

अध्याय: 12 | मन्त्र: 69

शु॒नᳪ सु फाला॒ वि कृ॑षन्तु॒ भूमि॑ᳪ शु॒नं की॒नाशा॑ अ॒भि य॑न्तु वा॒हैः । शुना॑सीरा ह॒विषा॒ तोश॑माना सुपिप्प॒ला ओष॑धीः कर्तना॒स्मै

---

मन्त्र 70 {#mantra-70}

अध्याय: 12 | मन्त्र: 70

घृ॒तेन॒ सीता॒ मधु॑ना॒ सम॑ज्यतां॒ विश्वै॑र्दे॒वैरनु॑मता म॒रुद्भि॑: । ऊर्ज॑स्वती॒ पय॑सा॒ पिन्व॑माना॒स्मान्त्सी॑ते॒ पय॑सा॒ऽभ्या व॑वृत्स्व

---

मन्त्र 71 {#mantra-71}

अध्याय: 12 | मन्त्र: 71

लाङ्ग॑लं॒ पवी॑रवत्सु॒शेव॑ᳪ सोम॒पित्स॑रु । तदुद्व॑पति॒ गामविं॑ प्रफ॒र्व्यं॒ च॒ पीव॑रीं प्र॒स्थाव॑द्रथ॒वाह॑णम्

---

मन्त्र 72 {#mantra-72}

अध्याय: 12 | मन्त्र: 72

कामं॑ कामदुघे धुक्ष्व मि॒त्राय॒ वरु॑णाय च । इन्द्रा॑या॒श्विभ्यां॑ पू॒ष्णे प्र॒जाभ्य॒ ओष॑धीभ्यः

---

मन्त्र 73 {#mantra-73}

अध्याय: 12 | मन्त्र: 73

वि मु॑च्यध्वमघ्न्या देवयाना॒ अग॑न्म॒ तम॑सस्पा॒रम॒स्य |ज्योति॑रापाम

---

मन्त्र 74 {#mantra-74}

अध्याय: 12 | मन्त्र: 74

स॒जूरब्दो॒ अय॑वोभिः स॒जूरु॒षा अरु॑णीभिः | स॒जोष॑साव॒श्विना॒ दᳪसो॑भिः स॒जूः सूर॒ एत॑शेन स॒जूर्वै॑श्वान॒र इड॑या घृ॒तेन॒ स्वाहा॑

---

मन्त्र 75 {#mantra-75}

अध्याय: 12 | मन्त्र: 75

या ओष॑धी॒: पूर्वा॑ जा॒ता दे॒वेभ्य॑स्त्रियु॒गं पु॒रा । मनै॒ नु ब॒भ्रूणा॑म॒हᳪ श॒तं धामा॑नि स॒प्त च॑

---

मन्त्र 76 {#mantra-76}

अध्याय: 12 | मन्त्र: 76

श॒तं वो॑ अम्ब॒ धामा॑नि स॒हस्र॑मु॒त वो॒ रुह॑: । अधा॑ शतक्रत्वो यू॒यमि॒मं मे॑ अग॒दं कृ॑त

---

मन्त्र 77 {#mantra-77}

अध्याय: 12 | मन्त्र: 77

ओष॑धी॒: प्रति॑ मोदध्वं॒ पुष्प॑वतीः प्र॒सूव॑रीः । अश्वा॑ इव स॒जित्व॑रीर्वी॒रुध॑: पारयि॒ष्ण्व॒:

---

मन्त्र 78 {#mantra-78}

अध्याय: 12 | मन्त्र: 78

ओष॑धी॒रिति॑ मातर॒स्तद्वो॑ देवी॒रुप॑ ब्रुवे । स॒नेय॒मश्वं॒ गां वास॑ आ॒त्मानं॒ तव॑ पूरुष

---

मन्त्र 79 {#mantra-79}

अध्याय: 12 | मन्त्र: 79

अ॒श्व॒त्थे वो॑ नि॒षद॑नं प॒र्णे वो॑ वस॒तिष्कृ॒ता । गो॒भाज॒ इत्किला॑सथ॒ यत्स॒नव॑थ॒ पूरु॑षम्

---

मन्त्र 80 {#mantra-80}

अध्याय: 12 | मन्त्र: 80

यत्रौ॑षधीः स॒मग्म॑त॒ राजा॑न॒: समि॑ताविव । विप्र॒: स उ॑च्यते भि॒षग्र॑क्षो॒हामी॑व॒चात॑नः

---

मन्त्र 81 {#mantra-81}

अध्याय: 12 | मन्त्र: 81

अ॒श्वा॒व॒तीᳪ सो॑माव॒तीमू॒र्जय॑न्ती॒मुदो॑जसम् । आऽवि॑त्सि॒ सर्वा॒ ओष॑धीर॒स्मा अ॑रि॒ष्टता॑तये

---

मन्त्र 82 {#mantra-82}

अध्याय: 12 | मन्त्र: 82

उच्छुष्मा॒ ओष॑धीनां॒ गावो॑ गो॒ष्ठादि॑वेरते । धन॑ᳪ सनि॒ष्यन्ती॑नामा॒त्मानं॒ तव॑ पूरुष

---

मन्त्र 83 {#mantra-83}

अध्याय: 12 | मन्त्र: 83

इ॒ष्कृ॑ति॒र्नाम॑ वो मा॒ताऽथो॑ यू॒यᳪ स्थ॒ निष्कृ॑तीः । सी॒राः प॑त॒त्रिणी॑ स्थन॒ यदा॒मय॑ति॒ निष्कृ॑थ

---

मन्त्र 84 {#mantra-84}

अध्याय: 12 | मन्त्र: 84

अति॒ विश्वा॑: परि॒ष्ठा स्ते॒न इ॑व व्र॒जम॑क्रमुः । ओष॑धी॒: प्राचु॑च्यवु॒र्यत्किं च॑ त॒न्वो रप॑:

---

मन्त्र 85 {#mantra-85}

अध्याय: 12 | मन्त्र: 85

यदि॒मा वा॒जय॑न्न॒हमोष॑धी॒र्हस्त॑ आद॒धे । आ॒त्मा यक्ष्म॑स्य नश्यति पु॒रा जी॑व॒गृभो॑ यथा

---

मन्त्र 86 {#mantra-86}

अध्याय: 12 | मन्त्र: 86

यस्यौ॑षधीः प्र॒सर्प॒थाङ्ग॑मङ्गं॒ परु॑ष्परुः । ततो॒ यक्ष्मं॒ वि बा॑धध्व उ॒ग्रो म॑ध्यम॒शीरि॑व

---

मन्त्र 87 {#mantra-87}

अध्याय: 12 | मन्त्र: 87

सा॒कं य॑क्ष्म॒ प्र प॑त॒ चाषे॑ण किकिदी॒विना॑ । सा॒कं वात॑स्य॒ ध्राज्या॑ सा॒कं न॑श्य नि॒हाक॑या

---

मन्त्र 88 {#mantra-88}

अध्याय: 12 | मन्त्र: 88

अ॒न्या वो॑ अ॒न्याम॑वत्व॒न्यान्यस्या॒ उपा॑वत । ताः सर्वा॑: संविदा॒ना इ॒दं मे॒ प्राव॑ता॒ वच॑:

---

मन्त्र 89 {#mantra-89}

अध्याय: 12 | मन्त्र: 89

याः फ॒लिनी॒र्या अ॑फ॒ला अ॑पु॒ष्पा याश्च॑ पु॒ष्पिणी॑: । बृह॒स्पति॑प्रसूता॒स्ता नो॑ मुञ्च॒न्त्वᳪह॑सः

---

मन्त्र 90 {#mantra-90}

अध्याय: 12 | मन्त्र: 90

मु॒ञ्चन्तु॑ मा शप॒थ्यादथो॑ वरु॒ण्या॒दु॒त । अथो॑ य॒मस्य॒ पड्वी॑शा॒त्सर्व॑स्माद्देवकिल्बि॒षात्

---

मन्त्र 91 {#mantra-91}

अध्याय: 12 | मन्त्र: 91

अ॒व॒पत॑न्तीरवदन्दि॒व ओष॑धय॒स्परि॑ । यं जी॒वम॒श्नवा॑महै॒ न स रि॑ष्याति॒ पूरु॑षः

---

मन्त्र 92 {#mantra-92}

अध्याय: 12 | मन्त्र: 92

या ओष॑धी॒: सोम॑राज्ञीर्ब॒ह्वीः श॒तवि॑चक्षणाः । तासा॑मसि॒ त्वमु॑त्त॒मारं॒ कामा॑य॒ शᳪ हृ॒दे

---

मन्त्र 93 {#mantra-93}

अध्याय: 12 | मन्त्र: 93

या ओष॑धी॒: सोम॑राज्ञी॒र्विष्ठि॑ताः पृथि॒वीमनु॑ । बृह॒स्पति॑प्रसूता अस्यै॒ संद॑त्त वी॒र्य॒म्

---

मन्त्र 94 {#mantra-94}

अध्याय: 12 | मन्त्र: 94

याश्चे॒दमु॑पशृ॒ण्वन्ति॒ याश्च॑ दू॒रं परा॑गताः । सर्वा॑: सं॒गत्य॑ वीरुधोऽस्यै॒ संद॑त्त वी॒र्य॒म्

---

मन्त्र 95 {#mantra-95}

अध्याय: 12 | मन्त्र: 95

मा वो॑ रिषत् खनि॒ता यस्मै॑ चा॒हं खना॑मि वः । द्वि॒पाच्चतु॑ष्पाद॒स्माक॒ᳪ सर्व॑मस्त्वनातु॒रम्

---

मन्त्र 96 {#mantra-96}

अध्याय: 12 | मन्त्र: 96

ओष॑धय॒: सम॑वदन्त॒ सोमे॑न स॒ह राज्ञा॑ । यस्मै॑ कृ॒णोति॑ ब्राह्म॒णस्तᳪ रा॑जन् पारयामसि

---

मन्त्र 97 {#mantra-97}

अध्याय: 12 | मन्त्र: 97

ना॒श॒यि॒त्री ब॒लास॒स्यार्श॑स उप॒चिता॑मसि । अथो॑ श॒तस्य॒ यक्ष्मा॑णां पाका॒रोर॑सि॒ नाश॑नी

---

मन्त्र 98 {#mantra-98}

अध्याय: 12 | मन्त्र: 98

त्वां ग॑न्ध॒र्वा अ॑खनँ॒स्त्वामिन्द्र॒स्त्वां बृह॒स्पति॑: । त्वामो॑षधे॒ सोमो॒ राजा॑ वि॒द्वान् यक्ष्मा॑दमुच्यत

---

मन्त्र 99 {#mantra-99}

अध्याय: 12 | मन्त्र: 99

सह॑स्व मे॒ अरा॑ती॒: सह॑स्व पृतनाय॒तः । सह॑स्व॒ सर्वं॑ पा॒प्मान॒ᳪ सह॑मानास्योषधे

---

मन्त्र 100 {#mantra-100}

अध्याय: 12 | मन्त्र: 100

दी॒र्घायु॑स्त ओषधे खनि॒ता यस्मै॑ च त्वा॒ खना॑म्य॒हम् । अथो॒ त्वं दी॒र्घायु॑र्भू॒त्वा श॒तव॑ल्शा॒ विरो॑हतात्

---

मन्त्र 101 {#mantra-101}

अध्याय: 12 | मन्त्र: 101

त्वमु॑त्त॒मास्यो॑षधे॒ तव॑ वृ॒क्षा उप॑स्तयः । उप॑स्तिरस्तु॒ सोऽस्माकं॒ यो अ॒स्माँ२ अ॑भि॒दास॑ति

---

मन्त्र 102 {#mantra-102}

अध्याय: 12 | मन्त्र: 102

मा मा॑ हिᳪसीज्जनि॒ता यः पृ॑थि॒व्या यो वा॒ दिव॑ᳪ स॒त्यध॑र्मा॒ व्यान॑ट् । यश्चा॒पश्च॒न्द्राः प्र॑थ॒मो ज॒जान॒ कस्मै॑ दे॒वाय॑ ह॒विषा॑ विधेम

---

मन्त्र 103 {#mantra-103}

अध्याय: 12 | मन्त्र: 103

अ॒भ्या व॑र्तस्व पृथिवि य॒ज्ञेन॒ पय॑सा स॒ह । व॒पां ते॑ अ॒ग्निरि॑षि॒तो अ॑रोहत्

---

मन्त्र 104 {#mantra-104}

अध्याय: 12 | मन्त्र: 104

अग्ने॒ यत्ते॑ शु॒क्रं यच्च॒न्द्रं यत्पू॒तं यच्च॑ य॒ज्ञिय॑म् । तद्दे॒वेभ्यो॑ भरामसि

---

मन्त्र 105 {#mantra-105}

अध्याय: 12 | मन्त्र: 105

इष॒मूर्ज॑म॒हमि॒त आद॑मृ॒तस्य॒ योनिं॑ महि॒षस्य॒ धारा॑म् । आ मा॒ गोषु॑ विश॒त्वा त॒नूषु॒ जहा॑मि से॒दिमनि॑रा॒ममी॑वाम्

---

मन्त्र 106 {#mantra-106}

अध्याय: 12 | मन्त्र: 106

अग्ने॒ तव॒ श्रवो॒ वयो॒ महि॑ भ्राजन्ते अ॒र्चयो॑ विभावसो । बृह॑द्भानो॒ शव॑सा॒ वाज॑मु॒क्थ्यं दधा॑सि दा॒शुषे॑ कवे

---

मन्त्र 107 {#mantra-107}

अध्याय: 12 | मन्त्र: 107

पा॒व॒कव॑र्चाः शु॒क्रव॑र्चा॒ अनू॑नवर्चा॒ उदि॑यर्षि भा॒नुना॑ । पु॒त्रो मा॒तरा॑ वि॒चर॒न्नुपा॑वसि पृ॒णक्षि॒ रोद॑सी उ॒भे

---

मन्त्र 108 {#mantra-108}

अध्याय: 12 | मन्त्र: 108

ऊर्जो॑ नपाज्जातवेदः सुश॒स्तिभि॒र्मन्द॑स्व धी॒तिभि॑र्हि॒तः । त्वे इष॒: सन्द॑धु॒र्भूरि॑वर्पसश्चि॒त्रोत॑यो वा॒मजा॑ताः

---

मन्त्र 109 {#mantra-109}

अध्याय: 12 | मन्त्र: 109

इ॒र॒ज्यन्न॑ग्ने प्रथयस्व ज॒न्तुभि॑र॒स्मे रायो॑ अमर्त्य । स द॑र्श॒तस्य॒ वपु॑षो॒ वि रा॑जसि पृ॒णक्षि॑ सान॒सिं क्रतु॑म्

---

मन्त्र 110 {#mantra-110}

अध्याय: 12 | मन्त्र: 110

इ॒ष्क॒र्तार॑मध्व॒रस्य॒ प्रचे॑तसं॒ क्षय॑न्त॒ᳪ राध॑सो म॒हः । रा॒तिं वा॒मस्य॑ सु॒भगां॑ म॒हीमिषं॒ दधा॑सि सान॒सिᳪ र॒यिम्

---

मन्त्र 111 {#mantra-111}

अध्याय: 12 | मन्त्र: 111

ऋ॒तावा॑नं महि॒षं वि॒श्वद॑र्शतम॒ग्निᳪ सु॒म्नाय॑ दधिरे पु॒रो जना॑: । श्रुत्क॑र्णᳪ स॒प्रथ॑स्तमं त्वा गि॒रा दै॑व्यं॒ मानु॑षा यु॒गा

---

मन्त्र 112 {#mantra-112}

अध्याय: 12 | मन्त्र: 112

आ प्या॑यस्व॒ समे॑तु ते वि॒श्वत॑: सोम॒ वृष्ण्य॑म् । भवा॒ वाज॑स्य सङ्ग॒थे

---

मन्त्र 113 {#mantra-113}

अध्याय: 12 | मन्त्र: 113

सं ते॒ पया॑ᳪसि॒ समु॑ यन्तु॒ वाजा॒: सं वृष्ण्या॑न्यभिमाति॒षाह॑: । आ॒प्याय॑मानो अ॒मृता॑य सोम दि॒वि श्रवा॑ᳪस्युत्त॒मानि॑ धिष्व

---

मन्त्र 114 {#mantra-114}

अध्याय: 12 | मन्त्र: 114

आ प्या॑यस्व मदिन्तम॒ सोम॒ विश्वे॑भिर॒ᳪशुभि॑: । भवा॑ नः स॒प्रथ॑स्तम॒: सखा॑ वृ॒धे

---

मन्त्र 115 {#mantra-115}

अध्याय: 12 | मन्त्र: 115

आ ते॑ व॒त्सो मनो॑ यमत्पर॒माच्चि॑त्स॒धस्था॑त् । अग्ने॒ त्वाङ्का॑मया गि॒रा

---

मन्त्र 116 {#mantra-116}

अध्याय: 12 | मन्त्र: 116

तुभ्यं॒ ता अ॑ङ्गिरस्तम॒ विश्वा॑: सुक्षि॒तय॒: पृथ॑क् । अग्ने॒ कामा॑य येमिरे

---

मन्त्र 117 {#mantra-117}

अध्याय: 12 | मन्त्र: 117

अ॒ग्निः प्रि॒येषु॒ धाम॑सु॒ कामो॑ भू॒तस्य॒ भव्य॑स्य । स॒म्राडेको॒ वि रा॑जति

---