शुक्लयजुः माध्यन्दिनसंहिता — त्रयस्त्रिंशोऽध्यायः (97 मन्त्राः)

शुक्लयजुः माध्यन्दिनसंहिता — त्रयस्त्रिंशोऽध्यायः

अ॒स्याजरा॑सो द॒माम॒रित्रा॑ अ॒र्चद्धू॑मासो अ॒ग्नय॑: पाव॒काः ।

---

मन्त्राः

मन्त्र	प्रथम पद
1	श्वितीचय श्वात्रासो
2	हरयो धूमकेतवो
3	यजा नो
4	युक्ष्वा हि
5	द्वे विरूपे
6	अयमिह प्रथमो
7	त्रीणि शता
8	मूर्धान दिवो
9	अग्निर्वृत्राणि जङ्घनद्द्रविणस्युर्विपन्यया
10	विश्वेभि सोम्य
11	आ यदिषे
12	अग्ने शर्ध
13	त्वा हि
14	त्वे अग्ने
15	श्रुधि श्रुत्कर्ण
16	विश्वेषामदितिर्यज्ञियाना विश्वेषामतिथिर्मानुषाणाम्
17	महो अग्ने
18	आपश्चित्पिप्यु स्तर्यो
19	गाव उपावतावत
20	यदद्य सूर
21	आ सुते
22	आतिष्ठन्त परि
23	प्र वो
24	बृहन्निदिध्म एषा
25	इन्द्रेहि मत्स्यन्धसो
26	इन्द्रो वृत्रमवृणोच्छर्धनीति
27	कुतस्त्वमिन्द्र माहिन
28	आ तत्त
29	इमा ते
30	विभ्राड् बृहत्पिबतु
31	उदु त्य
32	येना पावक
33	दैव्यावध्वर्यू आ
34	आ न
35	यदद्य कच्च
36	तरणिर्विश्वदर्शतो ज्योतिष्कृदसि
37	तत्सूर्यस्य देवत्व
38	तन्मित्रस्य वरुणस्याभिचक्षे
39	बण्महा२ असि
40	बट् सूर्य
41	श्रायन्त इव
42	अद्या देवा
43	आ कृष्णेन
44	प्र वावृजे
45	इन्द्रवायू बृहस्पति
46	वरुण प्राविता
47	अधि न
48	अग्न इन्द्र
49	इन्द्राग्नी मित्रावरुणादिति
50	अस्मे रुद्रा
51	अर्वाञ्चो अद्या
52	विश्वे अद्य
53	विश्वे देवा
54	देवेभ्यो हि
55	प्र वायुमच्छा
56	इन्द्रवायू इमे
57	मित्र हुवे
58	दस्रा युवाकव
59	८
60	नहि स्पशमविदन्नन्यमस्माद्वैश्वानरात्पुर
61	उग्रा विघनिना
62	उपास्मै गायता
63	ये त्वाऽहिहत्ये
64	जनिष्ठा उग्र
65	आ तू
66	त्वमिन्द्र प्रतूर्तिष्वभि
67	अनु ते
68	यज्ञो देवाना
69	अदब्धेभि सवित
70	प्र वीरया
71	गाव उपावतावत
72	काव्ययोराजानेषु क्रत्वा
73	दैव्यावध्वर्यू आ
74	तिरश्चीनो विततो
75	आ रोदसी
76	उक्थेभिर्वृत्रहन्तमा या
77	उप न
78	ब्रह्माणि मे
79	अनुत्तमा ते
80	तदिदास भुवनेषु
81	इमा उ
82	यस्याय विश्व
83	अय सहस्रमृषिभि
84	अदब्धेभि सवित
85	आ नो
86	इन्द्रवायू सुसन्दृशा
87	ऋधगित्था स
88	आ यातमुप
89	प्रैतु ब्रह्मणस्पति
90	चन्द्रमा अप्स्वन्तरा
91	देवदेव वोऽवसे
92	दिवि पृष्टो
93	इन्द्राग्नी अपादिय
94	देवासो हि
95	अपाधमदभिशस्तीरशस्तिहाथेन्द्रो द्युम्न्याभवत्
96	प्र व
97	अस्येदिन्द्रो वावृधे

---

मन्त्र 1 {#mantra-1}

अध्याय: 33 | मन्त्र: 1

श्वि॒ती॒चय॑: श्वा॒त्रासो॑ भुर॒ण्यवो॑ वन॒र्षदो॑ वा॒यवो॒ न सोमा॑:

---

मन्त्र 2 {#mantra-2}

अध्याय: 33 | मन्त्र: 2

हर॑यो धू॒मके॑तवो॒ वात॑जूता॒ उप॒ द्यवि॑ । यत॑न्ते॒ वृथ॑ग॒ग्नय॑:

---

मन्त्र 3 {#mantra-3}

अध्याय: 33 | मन्त्र: 3

यजा॑ नो मि॒त्रावरु॑णा॒ यजा॑ दे॒वाँ२ ऋ॒तं बृ॒हत् । अग्ने॒ यक्षि॒ स्वं दम॑म्

---

मन्त्र 4 {#mantra-4}

अध्याय: 33 | मन्त्र: 4

यु॒क्ष्वा हि दे॑व॒हूत॑माँ॒२ अश्वाँ॑२ अग्ने र॒थीरि॑व । नि होता॑ पू॒र्व्यः स॑दः

---

मन्त्र 5 {#mantra-5}

अध्याय: 33 | मन्त्र: 5

द्वे विरू॑पे चरत॒: स्वर्थे॑ अ॒न्याऽन्या॑ व॒त्समुप॑ धापयेते । हरि॑र॒न्यस्यां॒ भव॑ति स्व॒धावा॑ञ्छु॒क्रो अ॒न्यस्यां॑ ददृशे सु॒वर्चा॑:

---

मन्त्र 6 {#mantra-6}

अध्याय: 33 | मन्त्र: 6

अ॒यमि॒ह प्र॑थ॒मो धा॑यि धा॒तृभि॒र्होता॒ यजि॑ष्ठो अध्व॒रेष्वीड्य॑: । यमप्न॑वानो॒ भृग॑वो विरुरु॒चुर्वने॑षु चि॒त्रं वि॒भ्वं॒ वि॒शे-वि॑शे

---

मन्त्र 7 {#mantra-7}

अध्याय: 33 | मन्त्र: 7

त्रीणि॑ श॒ता त्री स॒हस्रा॑ण्य॒ग्निं त्रि॒ᳪशच्च॑ दे॒वा नव॑ चासपर्यन् । औक्ष॑न् घृ॒तैरस्तृ॑णन् ब॒र्हिर॑स्मा॒ आदिद्धोता॑रं॒ न्य॒सादयन्त

---

मन्त्र 8 {#mantra-8}

अध्याय: 33 | मन्त्र: 8

मू॒र्धानं॑ दि॒वो अ॑र॒तिं पृ॑थि॒व्या वै॑श्वान॒रमृ॒त आ जा॒तम॒ग्निम् । क॒विᳪ स॒म्राज॒मति॑थिं॒ जना॑नामा॒सन्ना पात्रं॑ जनयन्त दे॒वाः

---

मन्त्र 9 {#mantra-9}

अध्याय: 33 | मन्त्र: 9

अ॒ग्निर्वृ॒त्राणि॑ जङ्घनद्द्रविण॒स्युर्वि॑प॒न्यया॑ । समि॑द्धः शु॒क्र आहु॑तः

---

मन्त्र 10 {#mantra-10}

अध्याय: 33 | मन्त्र: 10

विश्वे॑भिः सो॒म्यं मध्वग्न॒ इन्द्रे॑ण वा॒युना॑ । पिबा॑ मि॒त्रस्य॒ धाम॑भिः

---

मन्त्र 11 {#mantra-11}

अध्याय: 33 | मन्त्र: 11

आ यदि॒षे नृ॒पतिं॒ तेज॒ आन॒ट् शुचि॒ रेतो॒ निषि॑क्तं॒ द्यौर॒भीके॑ । अ॒ग्निः शर्ध॑मनव॒द्यं युवा॑नᳪ स्वा॒ध्यं॒ जनयत् सू॒दय॑च्च

---

मन्त्र 12 {#mantra-12}

अध्याय: 33 | मन्त्र: 12

अग्ने॒ शर्ध॑ मह॒ते सौ॑भगाय॒ तव॑ द्यु॒म्नान्यु॑त्त॒मानि॑ सन्तु । सं जा॑स्प॒त्यᳪ सु॒यम॒मा कृ॑णुष्व शत्रूय॒ताम॒भि ति॑ष्ठा॒ महा॑ᳪसि

---

मन्त्र 13 {#mantra-13}

अध्याय: 33 | मन्त्र: 13

त्वाᳪ हि म॒न्द्रत॑ममर्कशो॒कैर्व॑वृ॒महे॒ महि॑ न॒: श्रोष्य॑ग्ने । इन्द्रं॒ न त्वा॒ शव॑सा दे॒वता॑ वा॒युं पृ॑णन्ति॒ राध॑सा॒ नृत॑माः

---

मन्त्र 14 {#mantra-14}

अध्याय: 33 | मन्त्र: 14

त्वे अ॑ग्ने स्वाहुत प्रि॒यास॑: सन्तु सू॒रय॑: । य॒न्तारो॒ ये म॒घवा॑नो॒ जना॑नामू॒र्वान् दय॑न्त॒ गोना॑म्

---

मन्त्र 15 {#mantra-15}

अध्याय: 33 | मन्त्र: 15

श्रु॒धि श्रु॑त्कर्ण॒ वह्नि॑भिर्दे॒वैर॑ग्ने स॒याव॑भिः । आ सी॑दन्तु ब॒र्हिषि॑ मि॒त्रो अ॑र्य॒मा प्रा॑त॒र्यावा॑णो अध्व॒रम्

---

मन्त्र 16 {#mantra-16}

अध्याय: 33 | मन्त्र: 16

विश्वे॑षा॒मदि॑तिर्य॒ज्ञिया॑नां॒ विश्वे॑षा॒मति॑थि॒र्मानु॑षाणाम् । अ॒ग्निर्दे॒वाना॒मव॑ आवृणा॒नः सु॑मृडी॒को भ॑वतु जा॒तवे॑दाः

---

मन्त्र 17 {#mantra-17}

अध्याय: 33 | मन्त्र: 17

म॒हो अ॒ग्नेः स॑मिधा॒नस्य॒ शर्म॒ण्यना॑गा मि॒त्रे वरु॑णे स्व॒स्तये॑ । श्रेष्ठे॑ स्याम सवि॒तुः सवी॑मनि॒ तद्दे॒वाना॒मवो॑ अ॒द्या वृ॑णीमहे

---

मन्त्र 18 {#mantra-18}

अध्याय: 33 | मन्त्र: 18

आप॑श्चित्पिप्यु स्त॒र्यो न गावो॒ नक्ष॑न्नृ॒तं ज॑रि॒तार॑स्त इन्द्र । या॒हि वा॒युर्न नि॒युतो॑ नो॒ अच्छा॒ त्वᳪ हि धी॒भिर्दय॑से॒ वि वाजा॑न्

---

मन्त्र 19 {#mantra-19}

अध्याय: 33 | मन्त्र: 19

गाव॒ उपा॑वताव॒तं म॒ही य॒ज्ञस्य॑ र॒प्सुदा॑ । उ॒भा कर्णा॑ हिर॒ण्यया॑

---

मन्त्र 20 {#mantra-20}

अध्याय: 33 | मन्त्र: 20

यद॒द्य सूर॒ उदि॒तेऽना॑गा मि॒त्रो अ॑र्य॒मा । सु॒वाति॑ सवि॒ता भग॑:

---

मन्त्र 21 {#mantra-21}

अध्याय: 33 | मन्त्र: 21

आ सु॒ते सि॑ञ्चत॒ श्रिय॒ᳪ रोद॑स्योरभि॒श्रिय॑म् । र॒सा द॑धीत वृष॒भम् ।।तं प्र॒त्नथा॒ ऽयं वे॒न:

---

मन्त्र 22 {#mantra-22}

अध्याय: 33 | मन्त्र: 22

आ॒तिष्ठ॑न्तं॒ परि॒ विश्वे॑ अभूष॒ञ्छ्रियो॒ वसा॑नश्चरति॒ स्वरो॑चिः । म॒हत्तद्वृष्णो॒ असु॑रस्य॒ नामा वि॒श्वरू॑पो अ॒मृता॑नि तस्थौ

---

मन्त्र 23 {#mantra-23}

अध्याय: 33 | मन्त्र: 23

प्र वो॑ म॒हे मन्द॑माना॒यान्ध॒सोऽर्चा॑ वि॒श्वान॑राय विश्वा॒भुवे॑ । इन्द्र॑स्य॒ यस्य॒ सुम॑ख॒ᳪ सहो॒ महि॒ श्रवो॑ नृ॒म्णं च॒ रोद॑सी सप॒र्यत॑:

---

मन्त्र 24 {#mantra-24}

अध्याय: 33 | मन्त्र: 24

बृ॒हन्निदि॒ध्म ए॑षां॒ भूरि॑ श॒स्तं पृ॒थुः स्वरु॑: । येषा॒मिन्द्रो॒ युवा॒ सखा॑

---

मन्त्र 25 {#mantra-25}

अध्याय: 33 | मन्त्र: 25

इन्द्रेहि॒ मत्स्यन्ध॑सो॒ विश्वे॑भिः सोम॒पर्व॑भिः । म॒हाँ२ अ॑भि॒ष्टिरोज॑सा

---

मन्त्र 26 {#mantra-26}

अध्याय: 33 | मन्त्र: 26

इन्द्रो॑ वृ॒त्रम॑वृणो॒च्छर्ध॑नीति॒: प्र मा॒यिना॑ममिना॒द्वर्प॑णीतिः । अह॒न् व्य॒ᳪसमु॒शध॒ग्वने॑ष्वा॒विर्धेना॑ अकृणोद्रा॒म्याणा॑म्

---

मन्त्र 27 {#mantra-27}

अध्याय: 33 | मन्त्र: 27

कुत॒स्त्वमि॑न्द्र॒ माहि॑न॒: सन्नेको॑ यासि सत्पते॒ किं त॑ इ॒त्था । सं पृ॑च्छसे समरा॒णः शु॑भा॒नैर्वो॒चेस्तन्नो॑ हरिवो॒ यत्ते॑ अ॒स्मे । म॒हाँ२ इन्द्रो॒ य ओज॑सा क॒दा च॒न स्त॒रीर॑सि क॒दा च॒न प्र यु॑च्छसि

---

मन्त्र 28 {#mantra-28}

अध्याय: 33 | मन्त्र: 28

आ तत्त॑ इन्द्रा॒यव॑: पनन्ता॒भि य ऊ॒र्वं गोम॑न्तं॒ तितृ॑त्सान् । स॒कृ॒त्स्वं ये पु॑रुपु॒त्रां म॒हीᳪ स॒हस्र॑धारां बृह॒तीं दुदु॑क्षन्

---

मन्त्र 29 {#mantra-29}

अध्याय: 33 | मन्त्र: 29

इ॒मां ते॒ धियं॒ प्र भ॑रे म॒हो म॒हीम॒स्य स्तो॒त्रे धि॒षणा॒ यत्त॑ आन॒जे । तमु॑त्स॒वे च॑ प्रस॒वे च॑ सास॒हिमिन्द्रं॑ दे॒वास॒: शव॑सामद॒न्ननु॑

---

मन्त्र 30 {#mantra-30}

अध्याय: 33 | मन्त्र: 30

वि॒भ्राड् बृ॒हत्पि॑बतु सो॒म्यं मध्वायु॒र्दध॑द्य॒ज्ञप॑ता॒ववि॑ह्रुतम् । वात॑जूतो॒ यो अ॑भि॒रक्ष॑ति॒ त्मना॑ प्र॒जाः पु॑पोष पुरु॒धा वि रा॑जति

---

मन्त्र 31 {#mantra-31}

अध्याय: 33 | मन्त्र: 31

उदु॒ त्यं जा॒तवे॑दसं दे॒वं व॑हन्ति के॒तव॑: । दृ॒शे विश्वा॑य॒ सूर्य॑म्

---

मन्त्र 32 {#mantra-32}

अध्याय: 33 | मन्त्र: 32

येना॑ पावक॒ चक्ष॑सा भुर॒ण्यन्तं॒ जनाँ॒२ अनु॑ । त्वं व॑रुण॒ पश्य॑सि

---

मन्त्र 33 {#mantra-33}

अध्याय: 33 | मन्त्र: 33

दैव्या॑वध्वर्यू॒ आ ग॑त॒ᳪ रथे॑न॒ सूर्य॑त्वचा । मध्वा॑ य॒ज्ञᳪ सम॑ञ्जाथे । तं प्र॒त्नथा॒ ऽयं वे॒नश्चि॒त्रं दे॒वाना॑म्

---

मन्त्र 34 {#mantra-34}

अध्याय: 33 | मन्त्र: 34

आ न॒ इडा॑भिर्वि॒दथे॑ सुश॒स्ति वि॒श्वान॑रः सवि॒ता दे॒व ए॑तु । अपि॒ यथा॑ युवानो॒ मत्स॑था नो॒ विश्वं॒ जग॑दभिपि॒त्वे म॑नी॒षा

---

मन्त्र 35 {#mantra-35}

अध्याय: 33 | मन्त्र: 35

यद॒द्य कच्च॑ वृत्रहन्नु॒दगा॑ अ॒भि सू॑र्य । सर्वं॒ तदि॑न्द्र ते॒ वशे॑

---

मन्त्र 36 {#mantra-36}

अध्याय: 33 | मन्त्र: 36

त॒रणि॑र्वि॒श्वद॑र्शतो ज्योति॒ष्कृद॑सि सूर्य । विश्व॒मा भा॑सि रोच॒नम्

---

मन्त्र 37 {#mantra-37}

अध्याय: 33 | मन्त्र: 37

तत्सूर्य॑स्य देव॒त्वं तन्म॑हि॒त्वं म॒ध्या कर्तो॒र्वित॑त॒ᳪ सं ज॑भार । य॒देदयु॑क्त ह॒रित॑: स॒धस्था॒दाद्रात्री॒ वास॑स्तनुते सि॒मस्मै॑

---

मन्त्र 38 {#mantra-38}

अध्याय: 33 | मन्त्र: 38

तन्मि॒त्रस्य॒ वरु॑णस्याभि॒चक्षे॒ सूर्यो॑ रू॒पं कृ॑णुते॒ द्योरु॒पस्थे॑ । अ॒न॒न्तम॒न्यद्रुश॑दस्य॒ पाज॑: कृ॒ष्णम॒न्यद्ध॒रित॒: सं भ॑रन्ति

---

मन्त्र 39 {#mantra-39}

अध्याय: 33 | मन्त्र: 39

बण्म॒हाँ२ अ॑सि सूर्य॒ बडा॑दित्य म॒हाँ२ अ॑सि । म॒हस्ते॑ स॒तो म॑हि॒मा प॑नस्यते॒ऽद्धा दे॑व म॒हाँ२ अ॑सि

---

मन्त्र 40 {#mantra-40}

अध्याय: 33 | मन्त्र: 40

बट् सू॑र्य॒ श्रव॑सा म॒हाँ२ अ॑सि स॒त्रा दे॑व म॒हाँ२ अ॑सि । म॒ह्ना दे॒वाना॑मसु॒र्य॒: पु॒रोहि॑तो वि॒भु ज्योति॒रदा॑भ्यम्

---

मन्त्र 41 {#mantra-41}

अध्याय: 33 | मन्त्र: 41

श्राय॑न्त इव॒ सूर्यं॒ विश्वेदिन्द्र॑स्य भक्षत । वसू॑नि जा॒ते जन॑मान॒ ओज॑सा॒ प्रति॑ भा॒गं न दी॑धिम

---

मन्त्र 42 {#mantra-42}

अध्याय: 33 | मन्त्र: 42

अ॒द्या दे॑वा॒ उदि॑ता॒ सूर्य॑स्य॒ निरᳪह॑सः पिपृ॒ता निर॑व॒द्यात् । तन्नो॑ मि॒त्रो वरु॑णो मामहन्ता॒मदि॑ति॒: सिन्धु॑: पृथि॒वी उ॒त द्यौ:

---

मन्त्र 43 {#mantra-43}

अध्याय: 33 | मन्त्र: 43

आ कृ॒ष्णेन॒ रज॑सा॒ वर्त॑मानो निवे॒शय॑न्न॒मृतं॒ मर्त्यं॑ च । हि॒र॒ण्यये॑न सवि॒ता रथे॒ना दे॒वो या॑ति॒ भुव॑नानि॒ पश्य॑न्

---

मन्त्र 44 {#mantra-44}

अध्याय: 33 | मन्त्र: 44

प्र वा॑वृजे सुप्र॒या ब॒र्हिरे॑षा॒मा वि॒श्पती॑व॒ व्वीरि॑ट इयाते । वि॒शाम॒क्तोरु॒षस॑: पू॒र्वहू॑तौ वा॒युः पू॒षा स्व॒स्तये॑ नि॒युत्वा॑न्

---

मन्त्र 45 {#mantra-45}

अध्याय: 33 | मन्त्र: 45

इ॒न्द्र॒वा॒यू बृह॒स्पतिं॑ मि॒त्राग्निं पू॒षणं भग॑म् । आ॒दि॒त्यान् मारु॑तं ग॒णम्

---

मन्त्र 46 {#mantra-46}

अध्याय: 33 | मन्त्र: 46

वरु॑णः प्रावि॒ता भु॑वन्मि॒त्रो विश्वा॑भिरू॒तिभि॑: । कर॑तां नः सु॒राध॑सः

---

मन्त्र 47 {#mantra-47}

अध्याय: 33 | मन्त्र: 47

अधि॑ न इन्द्रैषां॒ विष्णो॑ सजा॒त्या॒नाम् । इ॒ता मरु॑तो॒ अश्वि॑ना । तं प्र॒त्नथा॒ ऽयं वे॒नो ये दे॑वास॒ आ न॒ इडा॑भि॒र्विश्वे॑भिः सो॒म्यं मध्वोमा॑सश्चर्षणीधृतः

---

मन्त्र 48 {#mantra-48}

अध्याय: 33 | मन्त्र: 48

अग्न॒ इन्द्र॒ वरु॑ण॒ मित्र॒ देवा॒: शर्ध॒: प्र य॑न्त॒ मारु॑तो॒त वि॑ष्णो । उ॒भा नास॑त्या रु॒द्रो अध॒ ग्नाः पू॒षा भग॒: सर॑स्वती जुषन्त

---

मन्त्र 49 {#mantra-49}

अध्याय: 33 | मन्त्र: 49

इ॒न्द्रा॒ग्नी मि॒त्रावरु॒णादि॑ति॒ᳪ स्व॑: पृथि॒वीं द्यां म॒रुत॒: पर्व॑ताँ२ अ॒पः । हु॒वे विष्णुं॑ पू॒षणं॒ ब्रह्म॑ण॒स्पतिं॒ भगं॒ नु शᳪस॑ᳪ सवि॒तार॑मू॒तये॑

---

मन्त्र 50 {#mantra-50}

अध्याय: 33 | मन्त्र: 50

अ॒स्मे रु॒द्रा मे॒हना॒ पर्व॑तासो वृत्र॒हत्ये॒ भर॑हूतौ स॒जोषा॑: । यः शᳪस॑ते स्तुव॒ते धायि॑ प॒ज्र इन्द्र॑ज्येष्ठा अ॒स्माँ२ अ॑वन्तु दे॒वाः

---

मन्त्र 51 {#mantra-51}

अध्याय: 33 | मन्त्र: 51

अ॒र्वाञ्चो॑ अ॒द्या भ॑वता यजत्रा॒ आ वो॒ हार्दि॒ भय॑मानो व्ययेयम् । त्राध्वं॑ नो देवा नि॒जुरो॒ वृक॑स्य॒ त्राध्वं॑ क॒र्ताद॑व॒पदो॑ यजत्राः

---

मन्त्र 52 {#mantra-52}

अध्याय: 33 | मन्त्र: 52

विश्वे॑ अ॒द्य म॒रुतो॒ विश्व॑ ऊ॒ती विश्वे॑ भवन्त्व॒ग्नय॒: समि॑द्धाः । विश्वे॑ नो दे॒वा अव॒सा ग॑मन्तु॒ विश्व॑मस्तु॒ द्रवि॑णं॒ वाजो॑ अ॒स्मे

---

मन्त्र 53 {#mantra-53}

अध्याय: 33 | मन्त्र: 53

विश्वे॑ देवाः शृणु॒तेमᳪ हवं॑ मे॒ ये अ॒न्तरि॑क्षे॒ य उप॒ द्यवि॒ ष्ठ । ये अ॑ग्निजि॒ह्वा उ॒त वा॒ यज॑त्रा आ॒सद्या॒स्मिन्ब॒र्हिषि॑ मादयध्वम्

---

मन्त्र 54 {#mantra-54}

अध्याय: 33 | मन्त्र: 54

दे॒वेभ्यो॒ हि प्र॑थ॒मं य॒ज्ञिये॑भ्योऽमृत॒त्वᳪ सु॒वसि॑ भा॒गमु॑त्त॒मम् । आदिद्दा॒मान॑ᳪ सवित॒र्व्यू॒र्णुषेऽनूची॒ना जी॑वि॒ता मानु॑षेभ्यः

---

मन्त्र 55 {#mantra-55}

अध्याय: 33 | मन्त्र: 55

प्र वा॒युमच्छा॑ बृह॒ती म॑नी॒षा बृ॒हद्र॑यिं वि॒श्ववा॑रᳪ रथ॒प्राम् । द्यु॒तद्या॑मा नि॒युत॒: पत्य॑मानः क॒विः क॒विमि॑यक्षसि प्रयज्यो

---

मन्त्र 56 {#mantra-56}

अध्याय: 33 | मन्त्र: 56

इन्द्र॑वायू इ॒मे सु॒ता उप॒ प्रयो॑भि॒रा ग॑तम् । इन्द॑वो वामु॒शन्ति॒ हि

---

मन्त्र 57 {#mantra-57}

अध्याय: 33 | मन्त्र: 57

मि॒त्रᳪ हु॑वे पू॒तद॑क्षं॒ वरु॑णं च रि॒शाद॑सम् । धियं॑ घृ॒ताची॒ᳪ साध॑न्ता

---

मन्त्र 58 {#mantra-58}

अध्याय: 33 | मन्त्र: 58

दस्रा॑ यु॒वाक॑वः सु॒ता नास॑त्या वृ॒क्तब॑र्हिषः । आ या॑तᳪ रुद्रवर्तनी ।। तं प्र॒त्नथा॒ ऽयं वे॒नः

---

मन्त्र 59 {#mantra-59}

अध्याय: 33 | मन्त्र: 59

८ ।। वि॒दद्यदी॑ स॒रमा॑ रु॒ग्णमद्रे॒र्महि॒ पाथ॑: पू॒र्व्यᳪ स॒ध्र्य॒क्कः । अग्रं॑ नयत्सु॒पद्यक्ष॑राणा॒मच्छा॒ रवं॑ प्रथ॒मा जा॑न॒ती गा॑त्

---

मन्त्र 60 {#mantra-60}

अध्याय: 33 | मन्त्र: 60

न॒हि स्पश॒मवि॑दन्न॒न्यम॒स्माद्वै॑श्वान॒रात्पु॑र ए॒तार॑म॒ग्नेः । एमे॑नमवृधन्न॒मृता॒ अम॑र्त्यं वैश्वान॒रं क्षै॑त्रजित्याय दे॒वाः

---

मन्त्र 61 {#mantra-61}

अध्याय: 33 | मन्त्र: 61

उ॒ग्रा वि॑घ॒निना॒ मृध॑ इन्द्रा॒ग्नी ह॑वामहे । ता नो॑ मृडात ई॒दृशे॑

---

मन्त्र 62 {#mantra-62}

अध्याय: 33 | मन्त्र: 62

उपा॑स्मै गायता नर॒: पव॑माना॒येन्द॑वे । अ॒भि दे॒वाँ२ इय॑क्षते

---

मन्त्र 63 {#mantra-63}

अध्याय: 33 | मन्त्र: 63

ये त्वा॑ऽहि॒हत्ये॑ मघव॒न्नव॑र्ध॒न्ये शा॑म्ब॒रे ह॑रिवो॒ ये गवि॑ष्टौ । ये त्वा॑ नू॒नम॑नु॒मद॑न्ति॒ विप्रा॒: पिबे॑न्द्र॒ सोम॒ᳪ सग॑णो म॒रुद्भि॑:

---

मन्त्र 64 {#mantra-64}

अध्याय: 33 | मन्त्र: 64

जनि॑ष्ठा उ॒ग्रः सह॑से तु॒राय॑ म॒न्द्र ओजि॑ष्ठो बहु॒लाभि॑मानः । अव॑र्ध॒न्निन्द्रं॑ म॒रुत॑श्चि॒दत्र॑ मा॒ता यद्वी॒रं द॒धन॒द्धनि॑ष्ठा

---

मन्त्र 65 {#mantra-65}

अध्याय: 33 | मन्त्र: 65

आ तू न॑ इन्द्र वृत्रहन्न॒स्माक॑म॒र्धमा ग॑हि । म॒हान्म॒हीभि॑रू॒तिभि॑:

---

मन्त्र 66 {#mantra-66}

अध्याय: 33 | मन्त्र: 66

त्वमि॑न्द्र॒ प्रतू॑र्तिष्व॒भि विश्वा॑ असि॒ स्पृध॑: । अ॒श॒स्ति॒हा ज॑नि॒ता वि॑श्व॒तूर॑सि॒ त्वं तू॑र्य तरुष्य॒तः

---

मन्त्र 67 {#mantra-67}

अध्याय: 33 | मन्त्र: 67

अनु॑ ते॒ शुष्मं॑ तु॒रय॑न्तमीयतुः क्षो॒णी शिशुं॒ न मा॒तरा॑ । विश्वा॑स्ते॒ स्पृध॑: श्नथयन्त म॒न्यवे॑ वृ॒त्रं यदि॑न्द्र॒ तूर्व॑सि

---

मन्त्र 68 {#mantra-68}

अध्याय: 33 | मन्त्र: 68

य॒ज्ञो दे॒वानां॒ प्रत्ये॑ति सु॒म्नमादि॑त्यासो॒ भव॑ता मृड॒यन्त॑: । आ वो॒ऽर्वाची॑ सुम॒तिर्व॑वृत्याद॒ᳪहो॑श्चि॒द्या व॑रिवो॒वित्त॒रास॑त्

---

मन्त्र 69 {#mantra-69}

अध्याय: 33 | मन्त्र: 69

अद॑ब्धेभिः सवितः पा॒युभि॒ष्ट्वᳪ शि॒वेभि॑र॒द्य परि॑ पाहि नो॒ गय॑म् । हिर॑ण्यजिह्वः सुवि॒ताय॒ नव्य॑से॒ रक्षा॒ माकि॑र्नो अ॒घश॑ᳪस ईशत

---

मन्त्र 70 {#mantra-70}

अध्याय: 33 | मन्त्र: 70

प्र वी॑र॒या शुच॑यो दद्रिरे वामध्व॒र्युभि॒र्मधु॑मन्तः सु॒तास॑: । वह॑ वायो नि॒युतो॑ या॒ह्यच्छा॒ पिबा॑ सु॒तस्यान्ध॑सो॒ मदा॑य

---

मन्त्र 71 {#mantra-71}

अध्याय: 33 | मन्त्र: 71

गाव॒ उपा॑वताव॒तं म॒ही य॒ज्ञस्य॑ र॒प्सुदा॑ । उ॒भा कर्णा॑ हिर॒ण्यया॑

---

मन्त्र 72 {#mantra-72}

अध्याय: 33 | मन्त्र: 72

काव्य॑योरा॒जाने॑षु॒ क्रत्वा॒ दक्ष॑स्य दुरो॒णे । रि॒शाद॑सा स॒धस्थ॒ आ

---

मन्त्र 73 {#mantra-73}

अध्याय: 33 | मन्त्र: 73

दै॑व्यावध्वर्यू॒ आ ग॑त॒ᳪ रथे॑न॒ सूर्य॑त्वचा । मध्वा॑ य॒ज्ञᳪ सम॑ञ्जाथे । तं प्र॒त्नथा॒ ऽयं वे॒नः

---

मन्त्र 74 {#mantra-74}

अध्याय: 33 | मन्त्र: 74

ति॒र॒श्चीनो॒ वित॑तो र॒श्मिरे॑षाम॒धः स्वि॑दा॒सी३दु॒परि॑ स्विदासी३त् । रे॒तो॒धा आ॑सन्महि॒मान॑ आसन्त्स्व॒धा अ॒वस्ता॒त्प्रय॑तिः प॒रस्ता॑त्

---

मन्त्र 75 {#mantra-75}

अध्याय: 33 | मन्त्र: 75

आ रोद॑सी अपृण॒दा स्व॑र्म॒हज्जा॒तं यदे॑नम॒पसो॒ अधा॑रयन् । सो अ॑ध्व॒राय॒ परि॑ णीयते क॒विरत्यो॒ न वाज॑सातये॒ चनो॑हितः

---

मन्त्र 76 {#mantra-76}

अध्याय: 33 | मन्त्र: 76

उ॒क्थेभि॑र्वृत्र॒हन्त॑मा॒ या म॑न्दा॒ना चि॒दा गि॒रा । आ॒ङ्गू॒षैरा॒विवा॑सतः

---

मन्त्र 77 {#mantra-77}

अध्याय: 33 | मन्त्र: 77

उप॑ नः सू॒नवो॒ गिर॑: शृ॒ण्वन्त्व॒मृत॑स्य॒ ये । सु॒मृ॒डी॒का भ॑वन्तु नः

---

मन्त्र 78 {#mantra-78}

अध्याय: 33 | मन्त्र: 78

ब्रह्मा॑णि मे म॒तय॒: शᳪ सु॒तास॒: शुष्म॑ इयर्ति॒ प्रभृ॑तो मे॒ अद्रि॑: । आ शा॑सते॒ प्रति॑ हर्यन्त्यु॒क्थेमा हरी॑ वहत॒स्ता नो॒ अच्छ॑

---

मन्त्र 79 {#mantra-79}

अध्याय: 33 | मन्त्र: 79

अनु॑त्त॒मा ते॑ मघव॒न्नकि॒र्नु न त्वावाँ॑२ अस्ति दे॒वता॒ विदा॑नः । न जाय॑मानो॒ नश॑ते॒ न जा॒तो यानि॑ करि॒ष्या कृ॑णु॒हि प्र॑वृद्ध

---

मन्त्र 80 {#mantra-80}

अध्याय: 33 | मन्त्र: 80

तदिदा॑स॒ भुव॑नेषु॒ ज्येष्ठं॒ यतो॑ ज॒ज्ञ उ॒ग्रस्त्वे॒षनृ॑म्णः । स॒द्यो ज॑ज्ञा॒नो नि रि॑णाति॒ शत्रू॒ननु॒ यं विश्वे॒ मद॒न्त्यूमा॑:

---

मन्त्र 81 {#mantra-81}

अध्याय: 33 | मन्त्र: 81

इ॒मा उ॑ त्वा पुरूवसो॒ गिरो॑ वर्धन्तु॒ या मम॑ । पा॒व॒कव॑र्णा॒: शुच॑यो विप॒श्चितो॒ऽभि स्तोमै॑रनूषत

---

मन्त्र 82 {#mantra-82}

अध्याय: 33 | मन्त्र: 82

यस्या॒यं विश्व॒ आर्यो॒ दास॑: शेवधि॒पा अ॒रिः । ति॒रश्चि॑द॒र्ये रु॒शमे॒ पवी॑रवि॒ तुभ्येत्सो अ॑ज्यते र॒यिः

---

मन्त्र 83 {#mantra-83}

अध्याय: 33 | मन्त्र: 83

अ॒यᳪ स॒हस्र॒मृषि॑भि॒: सह॑स्कृतः समु॒द्र इ॑व पप्रथे । स॒त्यः सो अ॑स्य महि॒मा गृ॑णे॒ शवो॑ य॒ज्ञेषु॑ विप्र॒राज्ये॑

---

मन्त्र 84 {#mantra-84}

अध्याय: 33 | मन्त्र: 84

अद॑ब्धेभिः सवितः पा॒युभि॒ष्ट्वᳪ शि॒वेभि॑र॒द्य परि॑ पाहि नो॒ गय॑म् । हिर॑ण्यजिह्वः सुवि॒ताय॒ नव्य॑से॒ रक्षा॒ माकि॑र्नो अ॒घश॑ᳪस ईशत

---

मन्त्र 85 {#mantra-85}

अध्याय: 33 | मन्त्र: 85

आ नो॑ य॒ज्ञं दि॑वि॒स्पृशं॒ वायो॑ या॒हि सु॒मन्म॑भिः । अ॒न्तः प॒वित्र॑ उ॒परि॑ श्रीणा॒नोऽयᳪ शु॒क्रो अ॑यामि ते

---

मन्त्र 86 {#mantra-86}

अध्याय: 33 | मन्त्र: 86

इ॒न्द्र॒वा॒यू सु॑स॒न्दृशा॑ सु॒हवे॒ह ह॑वामहे । यथा॑ न॒: सर्व॒ इज्जनो॑ऽनमी॒वः स॒ङ्गमे॑ सु॒मना॒ अस॑त्

---

मन्त्र 87 {#mantra-87}

अध्याय: 33 | मन्त्र: 87

ऋध॑गि॒त्था स मर्त्य॑: शश॒मे दे॒वता॑तये । यो नू॒नं मि॒त्रावरु॑णाव॒भिष्ट॑य आच॒क्रे ह॒व्यदा॑तये

---

मन्त्र 88 {#mantra-88}

अध्याय: 33 | मन्त्र: 88

आ या॑त॒मुप॑ भूषतं॒ मध्व॑: पिबतमश्विना । दु॒ग्धं पयो॑ वृषणा जेन्यावसू॒ मा नो॑ मर्धिष्ट॒मा ग॑तम्

---

मन्त्र 89 {#mantra-89}

अध्याय: 33 | मन्त्र: 89

प्रैतु॒ ब्रह्म॑ण॒स्पति॒: प्र दे॒व्ये॒तु सू॒नृता॑ । अच्छा॑ वी॒रं नर्यं॑ प॒ङ्क्तिरा॑धसं दे॒वा य॒ज्ञं न॑यन्तु नः

---

मन्त्र 90 {#mantra-90}

अध्याय: 33 | मन्त्र: 90

च॒न्द्रमा॑ अ॒प्स्वन्तरा सु॑प॒र्णो धा॑वते दि॒वि । र॒यिं पि॒शङ्गं॑ बहु॒लं पु॑रु॒स्पृह॒ᳪ हरि॑रेति॒ कनि॑क्रदत्

---

मन्त्र 91 {#mantra-91}

अध्याय: 33 | मन्त्र: 91

दे॒वं-दे॑वं॒ वोऽव॑से दे॒वं-दे॑वम॒भिष्ट॑ये । दे॒वं-दे॑वᳪ हुवेम॒ वाज॑सातये गृ॒णन्तो॑ दे॒व्या धि॒या

---

मन्त्र 92 {#mantra-92}

अध्याय: 33 | मन्त्र: 92

दि॒वि पृ॒ष्टो अ॑रोचता॒ग्निर्वै॑श्वान॒रो बृ॒हन् । क्ष्मया॑ वृधा॒न ओज॑सा॒ चनो॑हितो॒ ज्योति॑षा बाधते॒ तम॑:

---

मन्त्र 93 {#mantra-93}

अध्याय: 33 | मन्त्र: 93

इन्द्रा॑ग्नी अ॒पादि॒यं पूर्वागा॑त् प॒द्वती॑भ्यः । हि॒त्वी शिरो॑ जि॒ह्वया॒ वाव॑द॒च्चर॑त्त्रि॒ᳪशत्प॒दा न्य॑क्रमीत्

---

मन्त्र 94 {#mantra-94}

अध्याय: 33 | मन्त्र: 94

दे॒वासो॒ हि ष्मा॒ मन॑वे॒ सम॑न्यवो॒ विश्वे॑ सा॒कᳪ सरा॑तयः । ते नो॑ अ॒द्य ते अ॑प॒रं तु॒चे तु नो॒ भव॑न्तु वरिवो॒विद॑:

---

मन्त्र 95 {#mantra-95}

अध्याय: 33 | मन्त्र: 95

अपा॑धमद॒भिश॑स्तीरशस्ति॒हाथेन्द्रो॑ द्यु॒म्न्याभ॑वत् । द॒वास्त॑ इन्द्र स॒ख्याय॑ येमिरे॒ बृह॑द्भानो॒ मरु॑द्गण

---

मन्त्र 96 {#mantra-96}

अध्याय: 33 | मन्त्र: 96

प्र व॒ इन्द्रा॑य बृह॒ते मरु॑तो॒ ब्रह्मा॑र्चत । वृ॒त्रᳪ ह॑नति वृत्र॒हा श॒तक्र॑तु॒र्वज्रे॑ण श॒तप॑र्वणा

---

मन्त्र 97 {#mantra-97}

अध्याय: 33 | मन्त्र: 97

अ॒स्येदिन्द्रो॑ वावृधे॒ वृष्ण्य॒ᳪ शवो॒ मदे॑ सु॒तस्य॒ विष्ण॑वि । अ॒द्या तम॑स्य महि॒मान॑मा॒यवोऽनु॑ ष्टुवन्ति पू॒र्वथा॑ । इ॒मा उ॑ त्वा यस्या॒यम॒यᳪ स॒हस्र॑मू॒र्ध्व ऊ॒ षु ण॑:

---