a̱syājarā̍so da̱māma̱ritrā̍ a̱rcaddhū̍māso a̱gnaya̍: pāva̱kāḥ |
śvi̱tī̱caya̍: śvā̱trāso̍ bhura̱ṇyavo̍ vana̱rṣado̍ vā̱yavo̱ na somā̍:
||33.1||hara̍yo dhū̱make̍tavo̱ vāta̍jūtā̱ upa̱ dyavi̍ | yata̍nte̱ vṛtha̍ga̱gnaya̍:
||33.2||yajā̍ no mi̱trāvaru̍ṇā̱ yajā̍ de̱vām̐2 ṛ̱taṃ bṛ̱hat |
agne̱ yakṣi̱ svaṃ dama̍m
||33.3||yu̱kṣvā hi de̍va̱hūta̍mā̱m̐2 aśvā̍m̐2 agne ra̱thīri̍va | ni hotā̍ pū̱rvyaḥ sa̍daḥ
||33.4||dve virū̍pe carata̱: svarthe̍ a̱nyā'nyā̍ va̱tsamupa̍ dhāpayete |
hari̍ra̱nyasyā̱ṃ bhava̍ti sva̱dhāvā̍ñchu̱kro a̱nyasyā̍ṃ dadṛśe su̱varcā̍:
||33.5||a̱yami̱ha pra̍tha̱mo dhā̍yi dhā̱tṛbhi̱rhotā̱ yaji̍ṣṭho adhva̱reṣvīḍya̍: |
yamapna̍vāno̱ bhṛga̍vo viruru̱curvane̍ṣu ci̱traṃ vi̱bhva̱ṃ vi̱śe-vi̍śe
||33.6||trīṇi̍ śa̱tā trī sa̱hasrā̍ṇya̱gniṃ triśacca̍ de̱vā nava̍ cāsaparyan |
aukṣa̍n ghṛ̱tairastṛ̍ṇan ba̱rhira̍smā̱ ādiddhotā̍ra̱ṃ nya̱sādayanta
||33.7||mū̱rdhāna̍ṃ di̱vo a̍ra̱tiṃ pṛ̍thi̱vyā vai̍śvāna̱ramṛ̱ta ā jā̱tama̱gnim |
ka̱vi sa̱mrāja̱mati̍thi̱ṃ janā̍nāmā̱sannā pātra̍ṃ janayanta de̱vāḥ
||33.8||a̱gnirvṛ̱trāṇi̍ jaṅghanaddraviṇa̱syurvi̍pa̱nyayā̍ | sami̍ddhaḥ śu̱kra āhu̍taḥ
||33.9||viśve̍bhiḥ so̱myaṃ madhvagna̱ indre̍ṇa vā̱yunā̍ | pibā̍ mi̱trasya̱ dhāma̍bhiḥ
||33.10||ā yadi̱ṣe nṛ̱pati̱ṃ teja̱ āna̱ṭ śuci̱ reto̱ niṣi̍kta̱ṃ dyaura̱bhīke̍ |
a̱gniḥ śardha̍manava̱dyaṃ yuvā̍na svā̱dhya̱ṃ janayat sū̱daya̍cca
||33.11||agne̱ śardha̍ maha̱te sau̍bhagāya̱ tava̍ dyu̱mnānyu̍tta̱māni̍ santu |
saṃ jā̍spa̱tya su̱yama̱mā kṛ̍ṇuṣva śatrūya̱tāma̱bhi ti̍ṣṭhā̱ mahāsi
||33.12||tvā hi ma̱ndrata̍mamarkaśo̱kairva̍vṛ̱mahe̱ mahi̍ na̱: śroṣya̍gne |
indra̱ṃ na tvā̱ śava̍sā de̱vatā̍ vā̱yuṃ pṛ̍ṇanti̱ rādha̍sā̱ nṛta̍māḥ
||33.13||tve a̍gne svāhuta pri̱yāsa̍: santu sū̱raya̍: |
ya̱ntāro̱ ye ma̱ghavā̍no̱ janā̍nāmū̱rvān daya̍nta̱ gonā̍m
||33.14||śru̱dhi śru̍tkarṇa̱ vahni̍bhirde̱vaira̍gne sa̱yāva̍bhiḥ |
ā sī̍dantu ba̱rhiṣi̍ mi̱tro a̍rya̱mā prā̍ta̱ryāvā̍ṇo adhva̱ram
||33.15||viśve̍ṣā̱madi̍tirya̱jñiyā̍nā̱ṃ viśve̍ṣā̱mati̍thi̱rmānu̍ṣāṇām |
a̱gnirde̱vānā̱mava̍ āvṛṇā̱naḥ su̍mṛḍī̱ko bha̍vatu jā̱tave̍dāḥ
||33.16||ma̱ho a̱gneḥ sa̍midhā̱nasya̱ śarma̱ṇyanā̍gā mi̱tre varu̍ṇe sva̱staye̍ |
śreṣṭhe̍ syāma savi̱tuḥ savī̍mani̱ tadde̱vānā̱mavo̍ a̱dyā vṛ̍ṇīmahe
||33.17||āpa̍ścitpipyu sta̱ryo na gāvo̱ nakṣa̍nnṛ̱taṃ ja̍ri̱tāra̍sta indra |
yā̱hi vā̱yurna ni̱yuto̍ no̱ acchā̱ tva hi dhī̱bhirdaya̍se̱ vi vājā̍n
||33.18||gāva̱ upā̍vatāva̱taṃ ma̱hī ya̱jñasya̍ ra̱psudā̍ | u̱bhā karṇā̍ hira̱ṇyayā̍
||33.19||yada̱dya sūra̱ udi̱te'nā̍gā mi̱tro a̍rya̱mā |
su̱vāti̍ savi̱tā bhaga̍:
||33.20||ā su̱te si̍ñcata̱ śriya roda̍syorabhi̱śriya̍m | ra̱sā da̍dhīta vṛṣa̱bham ||taṃ pra̱tnathā̱ 'yaṃ ve̱na:
||33.21||ā̱tiṣṭha̍nta̱ṃ pari̱ viśve̍ abhūṣa̱ñchriyo̱ vasā̍naścarati̱ svaro̍ciḥ |
ma̱hattadvṛṣṇo̱ asu̍rasya̱ nāmā vi̱śvarū̍po a̱mṛtā̍ni tasthau
||33.22||pra vo̍ ma̱he manda̍mānā̱yāndha̱so'rcā̍ vi̱śvāna̍rāya viśvā̱bhuve̍ |
indra̍sya̱ yasya̱ suma̍kha saho̱ mahi̱ śravo̍ nṛ̱mṇaṃ ca̱ roda̍sī sapa̱ryata̍:
||33.23||bṛ̱hannidi̱dhma e̍ṣā̱ṃ bhūri̍ śa̱staṃ pṛ̱thuḥ svaru̍: | yeṣā̱mindro̱ yuvā̱ sakhā̍
||33.24||indrehi̱ matsyandha̍so̱ viśve̍bhiḥ soma̱parva̍bhiḥ |
ma̱hām̐2 a̍bhi̱ṣṭiroja̍sā
||33.25||indro̍ vṛ̱trama̍vṛṇo̱cchardha̍nīti̱: pra mā̱yinā̍maminā̱dvarpa̍ṇītiḥ |
aha̱n vyasamu̱śadha̱gvane̍ṣvā̱virdhenā̍ akṛṇodrā̱myāṇā̍m
||33.26||kuta̱stvami̍ndra̱ māhi̍na̱: sanneko̍ yāsi satpate̱ kiṃ ta̍ i̱tthā |
saṃ pṛ̍cchase samarā̱ṇaḥ śu̍bhā̱nairvo̱cestanno̍ harivo̱ yatte̍ a̱sme |
ma̱hām̐2 indro̱ ya oja̍sā ka̱dā ca̱na sta̱rīra̍si ka̱dā ca̱na pra yu̍cchasi
||33.27||ā tatta̍ indrā̱yava̍: panantā̱bhi ya ū̱rvaṃ goma̍nta̱ṃ titṛ̍tsān |
sa̱kṛ̱tsvaṃ ye pu̍rupu̱trāṃ ma̱hī sa̱hasra̍dhārāṃ bṛha̱tīṃ dudu̍kṣan
||33.28||i̱māṃ te̱ dhiya̱ṃ pra bha̍re ma̱ho ma̱hīma̱sya sto̱tre dhi̱ṣaṇā̱ yatta̍ āna̱je |
tamu̍tsa̱ve ca̍ prasa̱ve ca̍ sāsa̱himindra̍ṃ de̱vāsa̱: śava̍sāmada̱nnanu̍
||33.29||vi̱bhrāḍ bṛ̱hatpi̍batu so̱myaṃ madhvāyu̱rdadha̍dya̱jñapa̍tā̱vavi̍hrutam |
vāta̍jūto̱ yo a̍bhi̱rakṣa̍ti̱ tmanā̍ pra̱jāḥ pu̍poṣa puru̱dhā vi rā̍jati
||33.30||udu̱ tyaṃ jā̱tave̍dasaṃ de̱vaṃ va̍hanti ke̱tava̍: | dṛ̱śe viśvā̍ya̱ sūrya̍m
||33.31||yenā̍ pāvaka̱ cakṣa̍sā bhura̱ṇyanta̱ṃ janā̱m̐2 anu̍ | tvaṃ va̍ruṇa̱ paśya̍si
||33.32||daivyā̍vadhvaryū̱ ā ga̍ta rathe̍na̱ sūrya̍tvacā | madhvā̍ ya̱jña sama̍ñjāthe |
taṃ pra̱tnathā̱ 'yaṃ ve̱naści̱traṃ de̱vānā̍m
||33.33||ā na̱ iḍā̍bhirvi̱dathe̍ suśa̱sti vi̱śvāna̍raḥ savi̱tā de̱va e̍tu |
api̱ yathā̍ yuvāno̱ matsa̍thā no̱ viśva̱ṃ jaga̍dabhipi̱tve ma̍nī̱ṣā
||33.34||yada̱dya kacca̍ vṛtrahannu̱dagā̍ a̱bhi sū̍rya | sarva̱ṃ tadi̍ndra te̱ vaśe̍
||33.35||ta̱raṇi̍rvi̱śvada̍rśato jyoti̱ṣkṛda̍si sūrya | viśva̱mā bhā̍si roca̱nam
||33.36||tatsūrya̍sya deva̱tvaṃ tanma̍hi̱tvaṃ ma̱dhyā karto̱rvita̍ta saṃ ja̍bhāra |
ya̱dedayu̍kta ha̱rita̍: sa̱dhasthā̱dādrātrī̱ vāsa̍stanute si̱masmai̍
||33.37||tanmi̱trasya̱ varu̍ṇasyābhi̱cakṣe̱ sūryo̍ rū̱paṃ kṛ̍ṇute̱ dyoru̱pasthe̍ |
a̱na̱ntama̱nyadruśa̍dasya̱ pāja̍: kṛ̱ṣṇama̱nyaddha̱rita̱: saṃ bha̍ranti
||33.38||baṇma̱hām̐2 a̍si sūrya̱ baḍā̍ditya ma̱hām̐2 a̍si |
ma̱haste̍ sa̱to ma̍hi̱mā pa̍nasyate̱'ddhā de̍va ma̱hām̐2 a̍si
||33.39||baṭ sū̍rya̱ śrava̍sā ma̱hām̐2 a̍si sa̱trā de̍va ma̱hām̐2 a̍si |
ma̱hnā de̱vānā̍masu̱rya̱: pu̱rohi̍to vi̱bhu jyoti̱radā̍bhyam
||33.40||śrāya̍nta iva̱ sūrya̱ṃ viśvedindra̍sya bhakṣata |
vasū̍ni jā̱te jana̍māna̱ oja̍sā̱ prati̍ bhā̱gaṃ na dī̍dhima
||33.41||a̱dyā de̍vā̱ udi̍tā̱ sūrya̍sya̱ niraha̍saḥ pipṛ̱tā nira̍va̱dyāt |
tanno̍ mi̱tro varu̍ṇo māmahantā̱madi̍ti̱: sindhu̍: pṛthi̱vī u̱ta dyau:
||33.42||ā kṛ̱ṣṇena̱ raja̍sā̱ varta̍māno nive̱śaya̍nna̱mṛta̱ṃ martya̍ṃ ca |
hi̱ra̱ṇyaye̍na savi̱tā rathe̱nā de̱vo yā̍ti̱ bhuva̍nāni̱ paśya̍n
||33.43||pra vā̍vṛje supra̱yā ba̱rhire̍ṣā̱mā vi̱śpatī̍va̱ vvīri̍ṭa iyāte |
vi̱śāma̱ktoru̱ṣasa̍: pū̱rvahū̍tau vā̱yuḥ pū̱ṣā sva̱staye̍ ni̱yutvā̍n
||33.44||i̱ndra̱vā̱yū bṛha̱spati̍ṃ mi̱trāgniṃ pū̱ṣaṇaṃ bhaga̍m | ā̱di̱tyān māru̍taṃ ga̱ṇam
||33.45||varu̍ṇaḥ prāvi̱tā bhu̍vanmi̱tro viśvā̍bhirū̱tibhi̍: | kara̍tāṃ naḥ su̱rādha̍saḥ
||33.46||adhi̍ na indraiṣā̱ṃ viṣṇo̍ sajā̱tyā̱nām | i̱tā maru̍to̱ aśvi̍nā |
taṃ pra̱tnathā̱ 'yaṃ ve̱no ye de̍vāsa̱ ā na̱ iḍā̍bhi̱rviśve̍bhiḥ so̱myaṃ madhvomā̍saścarṣaṇīdhṛtaḥ
||33.47||agna̱ indra̱ varu̍ṇa̱ mitra̱ devā̱: śardha̱: pra ya̍nta̱ māru̍to̱ta vi̍ṣṇo |
u̱bhā nāsa̍tyā ru̱dro adha̱ gnāḥ pū̱ṣā bhaga̱: sara̍svatī juṣanta
||33.48||i̱ndrā̱gnī mi̱trāvaru̱ṇādi̍ti sva̍: pṛthi̱vīṃ dyāṃ ma̱ruta̱: parva̍tām̐2 a̱paḥ |
hu̱ve viṣṇu̍ṃ pū̱ṣaṇa̱ṃ brahma̍ṇa̱spati̱ṃ bhaga̱ṃ nu śasa savi̱tāra̍mū̱taye̍
||33.49||a̱sme ru̱drā me̱hanā̱ parva̍tāso vṛtra̱hatye̱ bhara̍hūtau sa̱joṣā̍: |
yaḥ śasa̍te stuva̱te dhāyi̍ pa̱jra indra̍jyeṣṭhā a̱smām̐2 a̍vantu de̱vāḥ
||33.50||a̱rvāñco̍ a̱dyā bha̍vatā yajatrā̱ ā vo̱ hārdi̱ bhaya̍māno vyayeyam |
trādhva̍ṃ no devā ni̱juro̱ vṛka̍sya̱ trādhva̍ṃ ka̱rtāda̍va̱pado̍ yajatrāḥ
||33.51||viśve̍ a̱dya ma̱ruto̱ viśva̍ ū̱tī viśve̍ bhavantva̱gnaya̱: sami̍ddhāḥ |
viśve̍ no de̱vā ava̱sā ga̍mantu̱ viśva̍mastu̱ dravi̍ṇa̱ṃ vājo̍ a̱sme
||33.52||viśve̍ devāḥ śṛṇu̱tema hava̍ṃ me̱ ye a̱ntari̍kṣe̱ ya upa̱ dyavi̱ ṣṭha |
ye a̍gniji̱hvā u̱ta vā̱ yaja̍trā ā̱sadyā̱sminba̱rhiṣi̍ mādayadhvam
||33.53||de̱vebhyo̱ hi pra̍tha̱maṃ ya̱jñiye̍bhyo'mṛta̱tva su̱vasi̍ bhā̱gamu̍tta̱mam |
ādiddā̱māna savita̱rvyū̱rṇuṣe'nūcī̱nā jī̍vi̱tā mānu̍ṣebhyaḥ
||33.54||pra vā̱yumacchā̍ bṛha̱tī ma̍nī̱ṣā bṛ̱hadra̍yiṃ vi̱śvavā̍ra ratha̱prām |
dyu̱tadyā̍mā ni̱yuta̱: patya̍mānaḥ ka̱viḥ ka̱vimi̍yakṣasi prayajyo
||33.55||indra̍vāyū i̱me su̱tā upa̱ prayo̍bhi̱rā ga̍tam | inda̍vo vāmu̱śanti̱ hi
||33.56||mi̱tra hu̍ve pū̱tada̍kṣa̱ṃ varu̍ṇaṃ ca ri̱śāda̍sam | dhiya̍ṃ ghṛ̱tācī sādha̍ntā
||33.57||dasrā̍ yu̱vāka̍vaḥ su̱tā nāsa̍tyā vṛ̱ktaba̍rhiṣaḥ | ā yā̍ta rudravartanī || taṃ pra̱tnathā̱ 'yaṃ ve̱naḥ
||33.58||8 ||
vi̱dadyadī̍ sa̱ramā̍ ru̱gṇamadre̱rmahi̱ pātha̍: pū̱rvya sa̱dhrya̱kkaḥ |
agra̍ṃ nayatsu̱padyakṣa̍rāṇā̱macchā̱ rava̍ṃ pratha̱mā jā̍na̱tī gā̍t
||33.59||na̱hi spaśa̱mavi̍danna̱nyama̱smādvai̍śvāna̱rātpu̍ra e̱tāra̍ma̱gneḥ |
eme̍namavṛdhanna̱mṛtā̱ ama̍rtyaṃ vaiśvāna̱raṃ kṣai̍trajityāya de̱vāḥ
||33.60||u̱grā vi̍gha̱ninā̱ mṛdha̍ indrā̱gnī ha̍vāmahe | tā no̍ mṛḍāta ī̱dṛśe̍
||33.61||upā̍smai gāyatā nara̱: pava̍mānā̱yenda̍ve | a̱bhi de̱vām̐2 iya̍kṣate
||33.62||ye tvā̍'hi̱hatye̍ maghava̱nnava̍rdha̱nye śā̍mba̱re ha̍rivo̱ ye gavi̍ṣṭau |
ye tvā̍ nū̱nama̍nu̱mada̍nti̱ viprā̱: pibe̍ndra̱ soma saga̍ṇo ma̱rudbhi̍:
||33.63||jani̍ṣṭhā u̱graḥ saha̍se tu̱rāya̍ ma̱ndra oji̍ṣṭho bahu̱lābhi̍mānaḥ |
ava̍rdha̱nnindra̍ṃ ma̱ruta̍ści̱datra̍ mā̱tā yadvī̱raṃ da̱dhana̱ddhani̍ṣṭhā
||33.64||ā tū na̍ indra vṛtrahanna̱smāka̍ma̱rdhamā ga̍hi | ma̱hānma̱hībhi̍rū̱tibhi̍:
||33.65||tvami̍ndra̱ pratū̍rtiṣva̱bhi viśvā̍ asi̱ spṛdha̍: |
a̱śa̱sti̱hā ja̍ni̱tā vi̍śva̱tūra̍si̱ tvaṃ tū̍rya taruṣya̱taḥ
||33.66||anu̍ te̱ śuṣma̍ṃ tu̱raya̍ntamīyatuḥ kṣo̱ṇī śiśu̱ṃ na mā̱tarā̍ |
viśvā̍ste̱ spṛdha̍: śnathayanta ma̱nyave̍ vṛ̱traṃ yadi̍ndra̱ tūrva̍si
||33.67||ya̱jño de̱vānā̱ṃ pratye̍ti su̱mnamādi̍tyāso̱ bhava̍tā mṛḍa̱yanta̍: |
ā vo̱'rvācī̍ suma̱tirva̍vṛtyādaho̍ści̱dyā va̍rivo̱vitta̱rāsa̍t
||33.68||ada̍bdhebhiḥ savitaḥ pā̱yubhi̱ṣṭva śi̱vebhi̍ra̱dya pari̍ pāhi no̱ gaya̍m |
hira̍ṇyajihvaḥ suvi̱tāya̱ navya̍se̱ rakṣā̱ māki̍rno a̱ghaśasa īśata
||33.69||pra vī̍ra̱yā śuca̍yo dadrire vāmadhva̱ryubhi̱rmadhu̍mantaḥ su̱tāsa̍: |
vaha̍ vāyo ni̱yuto̍ yā̱hyacchā̱ pibā̍ su̱tasyāndha̍so̱ madā̍ya
||33.70||gāva̱ upā̍vatāva̱taṃ ma̱hī ya̱jñasya̍ ra̱psudā̍ | u̱bhā karṇā̍ hira̱ṇyayā̍
||33.71||kāvya̍yorā̱jāne̍ṣu̱ kratvā̱ dakṣa̍sya duro̱ṇe | ri̱śāda̍sā sa̱dhastha̱ ā
||33.72||dai̍vyāvadhvaryū̱ ā ga̍ta rathe̍na̱ sūrya̍tvacā | madhvā̍ ya̱jña sama̍ñjāthe |
taṃ pra̱tnathā̱ 'yaṃ ve̱naḥ
||33.73||ti̱ra̱ścīno̱ vita̍to ra̱śmire̍ṣāma̱dhaḥ svi̍dā̱sī3du̱pari̍ svidāsī3t |
re̱to̱dhā ā̍sanmahi̱māna̍ āsantsva̱dhā a̱vastā̱tpraya̍tiḥ pa̱rastā̍t
||33.74||ā roda̍sī apṛṇa̱dā sva̍rma̱hajjā̱taṃ yade̍nama̱paso̱ adhā̍rayan |
so a̍dhva̱rāya̱ pari̍ ṇīyate ka̱viratyo̱ na vāja̍sātaye̱ cano̍hitaḥ
||33.75||u̱kthebhi̍rvṛtra̱hanta̍mā̱ yā ma̍ndā̱nā ci̱dā gi̱rā | ā̱ṅgū̱ṣairā̱vivā̍sataḥ
||33.76||upa̍ naḥ sū̱navo̱ gira̍: śṛ̱ṇvantva̱mṛta̍sya̱ ye | su̱mṛ̱ḍī̱kā bha̍vantu naḥ
||33.77||brahmā̍ṇi me ma̱taya̱: śa su̱tāsa̱: śuṣma̍ iyarti̱ prabhṛ̍to me̱ adri̍: |
ā śā̍sate̱ prati̍ haryantyu̱kthemā harī̍ vahata̱stā no̱ accha̍
||33.78||anu̍tta̱mā te̍ maghava̱nnaki̱rnu na tvāvā̍m̐2 asti de̱vatā̱ vidā̍naḥ |
na jāya̍māno̱ naśa̍te̱ na jā̱to yāni̍ kari̱ṣyā kṛ̍ṇu̱hi pra̍vṛddha
||33.79||tadidā̍sa̱ bhuva̍neṣu̱ jyeṣṭha̱ṃ yato̍ ja̱jña u̱grastve̱ṣanṛ̍mṇaḥ |
sa̱dyo ja̍jñā̱no ni ri̍ṇāti̱ śatrū̱nanu̱ yaṃ viśve̱ mada̱ntyūmā̍:
||33.80||i̱mā u̍ tvā purūvaso̱ giro̍ vardhantu̱ yā mama̍ |
pā̱va̱kava̍rṇā̱: śuca̍yo vipa̱ścito̱'bhi stomai̍ranūṣata
||33.81||yasyā̱yaṃ viśva̱ āryo̱ dāsa̍: śevadhi̱pā a̱riḥ |
ti̱raści̍da̱rye ru̱śame̱ pavī̍ravi̱ tubhyetso a̍jyate ra̱yiḥ
||33.82||a̱ya sa̱hasra̱mṛṣi̍bhi̱: saha̍skṛtaḥ samu̱dra i̍va paprathe |
sa̱tyaḥ so a̍sya mahi̱mā gṛ̍ṇe̱ śavo̍ ya̱jñeṣu̍ vipra̱rājye̍
||33.83||ada̍bdhebhiḥ savitaḥ pā̱yubhi̱ṣṭva śi̱vebhi̍ra̱dya pari̍ pāhi no̱ gaya̍m |
hira̍ṇyajihvaḥ suvi̱tāya̱ navya̍se̱ rakṣā̱ māki̍rno a̱ghaśasa īśata
||33.84||ā no̍ ya̱jñaṃ di̍vi̱spṛśa̱ṃ vāyo̍ yā̱hi su̱manma̍bhiḥ |
a̱ntaḥ pa̱vitra̍ u̱pari̍ śrīṇā̱no'ya śu̱kro a̍yāmi te
||33.85||i̱ndra̱vā̱yū su̍sa̱ndṛśā̍ su̱have̱ha ha̍vāmahe |
yathā̍ na̱: sarva̱ ijjano̍'namī̱vaḥ sa̱ṅgame̍ su̱manā̱ asa̍t
||33.86||ṛdha̍gi̱tthā sa martya̍: śaśa̱me de̱vatā̍taye |
yo nū̱naṃ mi̱trāvaru̍ṇāva̱bhiṣṭa̍ya āca̱kre ha̱vyadā̍taye
||33.87||ā yā̍ta̱mupa̍ bhūṣata̱ṃ madhva̍: pibatamaśvinā |
du̱gdhaṃ payo̍ vṛṣaṇā jenyāvasū̱ mā no̍ mardhiṣṭa̱mā ga̍tam
||33.88||praitu̱ brahma̍ṇa̱spati̱: pra de̱vye̱tu sū̱nṛtā̍ | acchā̍ vī̱raṃ narya̍ṃ pa̱ṅktirā̍dhasaṃ de̱vā ya̱jñaṃ na̍yantu naḥ
||33.89||ca̱ndramā̍ a̱psvantarā su̍pa̱rṇo dhā̍vate di̱vi |
ra̱yiṃ pi̱śaṅga̍ṃ bahu̱laṃ pu̍ru̱spṛha hari̍reti̱ kani̍kradat
||33.90||de̱vaṃ-de̍va̱ṃ vo'va̍se de̱vaṃ-de̍vama̱bhiṣṭa̍ye | de̱vaṃ-de̍va huvema̱ vāja̍sātaye gṛ̱ṇanto̍ de̱vyā dhi̱yā
||33.91||di̱vi pṛ̱ṣṭo a̍rocatā̱gnirvai̍śvāna̱ro bṛ̱han |
kṣmayā̍ vṛdhā̱na oja̍sā̱ cano̍hito̱ jyoti̍ṣā bādhate̱ tama̍:
||33.92||indrā̍gnī a̱pādi̱yaṃ pūrvāgā̍t pa̱dvatī̍bhyaḥ |
hi̱tvī śiro̍ ji̱hvayā̱ vāva̍da̱ccara̍ttriśatpa̱dā nya̍kramīt
||33.93||de̱vāso̱ hi ṣmā̱ mana̍ve̱ sama̍nyavo̱ viśve̍ sā̱ka sarā̍tayaḥ |
te no̍ a̱dya te a̍pa̱raṃ tu̱ce tu no̱ bhava̍ntu varivo̱vida̍:
||33.94||apā̍dhamada̱bhiśa̍stīraśasti̱hāthendro̍ dyu̱mnyābha̍vat |
da̱vāsta̍ indra sa̱khyāya̍ yemire̱ bṛha̍dbhāno̱ maru̍dgaṇa
||33.95||pra va̱ indrā̍ya bṛha̱te maru̍to̱ brahmā̍rcata |
vṛ̱tra ha̍nati vṛtra̱hā śa̱takra̍tu̱rvajre̍ṇa śa̱tapa̍rvaṇā
||33.96||a̱syedindro̍ vāvṛdhe̱ vṛṣṇya śavo̱ made̍ su̱tasya̱ viṣṇa̍vi |
a̱dyā tama̍sya mahi̱māna̍mā̱yavo'nu̍ ṣṭuvanti pū̱rvathā̍ |
i̱mā u̍ tvā yasyā̱yama̱ya sa̱hasra̍mū̱rdhva ū̱ ṣu ṇa̍:
||33.97||