Vājasaneyi Madhyandina Saṃhitā — Chapter 30 (22 mantras)

Vājasaneyi Madhyandina Saṃhitā — Chapter 30

deva̍ savita̱: pra su̍va ya̱jñaṃ pra su̍va ya̱jñapa̍ti̱ṃ bhagā̍ya |

---

Mantras

Mantra	First Words
1	divyo gandharva
2	tatsaviturvareṇya bhargo
3	viśvāni deva
4	vibhaktāra havāmahe
5	brahmaṇe brāhmaṇa
6	nṛttāya sūta
7	tapase kaulāla
8	nadībhya pauñjiṣṭhamṛkṣīkābhyo
9	sandhaye jāra
10	utsādebhya kubja
11	armebhyo hastipa
12	bhāyai dārvāhāra
13	ṛtaye stenahṛdaya
14	manyave’yastāpa krodhāya
15	yamāya yamasūmatharvabhyo’vatokā
16	sarobhyo dhaivaramupasthāvarābhyo
17	bībhatsāyai paulkasa
18	akṣarājāya kitava
19	pratiśrutkāyā artana
20	narmāya puścalū
21	agnaye pīvāna
22	athaitānaṣṭau virūpānā

---

Mantra 1 {#mantra-1}

Adhyāya: 30 | Mantra: 1

di̱vyo ga̍ndha̱rvaḥ ke̍tu̱pūḥ keta̍ṃ naḥ punātu vā̱caspati̱rvāja̍ṃ naḥ svadatu

---

Mantra 2 {#mantra-2}

Adhyāya: 30 | Mantra: 2

tatsa̍vi̱turvare̍ṇya̱ṃ bhargo̍ de̱vasya̍ dhīmahi | dhiyo̱ yo na̍: praco̱dayāt

---

Mantra 3 {#mantra-3}

Adhyāya: 30 | Mantra: 3

viśvā̍ni deva savitarduri̱tāni̱ parā̍ suva | yadbha̱draṃ tanna̱ ā su̍va

---

Mantra 4 {#mantra-4}

Adhyāya: 30 | Mantra: 4

vi̱bha̱ktāra havāmahe̱ vaso̍ści̱trasya̱ rādha̍saḥ | sa̱vi̱tāra̍ṃ nṛ̱cakṣa̍sam

---

Mantra 5 {#mantra-5}

Adhyāya: 30 | Mantra: 5

brahma̍ṇe brāhma̱ṇaṃ kṣa̱trāya̍ rāja̱nya̱ṃ ma̱rudbhyo̱ vaiśya̱ṃ tapa̍se śū̱draṃ tama̍se̱ taska̍raṃ nāra̱kāya̍ vīra̱haṇa̍ṃ pā̱pmane̍ klī̱bamā̍kra̱yāyā̍ ayo̱gūṃ kāmā̍ya pum̐śca̱lūmati̍kruṣṭāya māga̱dham

---

Mantra 6 {#mantra-6}

Adhyāya: 30 | Mantra: 6

nṛ̱ttāya̍ sū̱taṃ gī̱tāya̍ śailū̱ṣaṃ dharmā̍ya sabhāca̱raṃ na̱riṣṭhā̍yai bhīma̱laṃ na̱rmāya̍ re̱bha hasā̍ya̱ kāri̍māna̱ndāya̍ strīṣa̱khaṃ pra̱made̍ kumārīpu̱traṃ me̱dhāyai̍ rathakā̱raṃ dhai̍ryāya̱ takṣā̍ṇam

---

Mantra 7 {#mantra-7}

Adhyāya: 30 | Mantra: 7

tapa̍se kaulā̱laṃ mā̱yāyai̍ ka̱rmāra rū̱pāya̍ maṇikā̱ra śu̱bhe va̱pa śa̍ra̱vyā̱yā iṣukā̱ra he̱tyai dha̍nuṣkā̱raṃ karma̍ṇe jyākā̱raṃ di̱ṣṭāya̍ rajjusa̱rjaṃ mṛ̱tyave̍ mṛga̱yumanta̍kāya śva̱nina̍m

---

Mantra 8 {#mantra-8}

Adhyāya: 30 | Mantra: 8

na̱dībhya̍: pauñji̱ṣṭhamṛ̱kṣīkā̍bhyo̱ naiṣādaṃ puruṣavyā̱ghrāya̍ du̱rmada̍ṃ gandharvāpsa̱robhyo̱ vrātya̍ṃ pra̱yugbhya̱ unma̍tta sarpadevaja̱nebhyo’pra̍tipada̱maye̍bhyaḥ kita̱vamī̱ryatā̍yā̱ aki̍tavaṃ piśā̱cebhyo̍ bidalakā̱rīṃ yā̍tu̱dhāne̍bhyaḥ kaṇṭakīkā̱rīm

---

Mantra 9 {#mantra-9}

Adhyāya: 30 | Mantra: 9

sa̱ndhaye̍ jā̱raṃ ge̱hāyo̍papa̱timārtyai̱ pari̍vitta̱ṃ nirṛ̍tyai parivividā̱namarā̍ddhyā edidhiṣuḥ pa̱tiṃ niṣkṛ̍tyai peśaskā̱rī sa̱ṃjñānā̍ya smarakā̱rīṃ pra̍kā̱modyā̍yopa̱sada̱ṃ varṇā̍yānu̱rudha̱ṃ balā̍yopa̱dām

---

Mantra 10 {#mantra-10}

Adhyāya: 30 | Mantra: 10

u̱tsā̱debhya̍: ku̱bjaṃ pra̱mude̍ vāma̱naṃ dvā̱rbhyaḥ srā̱ma svapnā̍yā̱ndhamadha̍rmāya badhi̱raṃ pa̱vitrā̍ya bhi̱ṣaja̍ṃ pra̱jñānā̍ya nakṣatrada̱rśamā̍śi̱kṣāyai̍ pra̱śnina̍mupaśi̱kṣāyā̍ abhipra̱śnina̍ṃ ma̱ryādā̍yai praśnavivā̱kam

---

Mantra 11 {#mantra-11}

Adhyāya: 30 | Mantra: 11

arme̍bhyo hasti̱paṃ ja̱vāyā̍śva̱paṃ puṣṭyai̍ gopā̱laṃ vī̱ryā̱yāvipā̱laṃ teja̍se’japā̱lamirā̍yai kī̱nāśa̍ṃ kī̱lālā̍ya surākā̱raṃ bha̱drāya̍ gṛha̱pa śreya̍se vitta̱dhamādhya̍kṣyāyānukṣa̱tāra̍m

---

Mantra 12 {#mantra-12}

Adhyāya: 30 | Mantra: 12

bhāyai̍ dārvā̱hāra̍ṃ pra̱bhāyā̍ agnye̱dhaṃ bra̱dhnasya̍ vi̱ṣṭapā̍yābhiṣe̱ktāra̱ṃ varṣi̍ṣṭhāya̱ nākā̍ya parive̱ṣṭāra̍ṃ devalo̱kāya̍ peśi̱tāra̍ṃ manuṣyalo̱kāya̍ prakari̱tāra sarve̍bhyo lo̱kebhya̍ upase̱ktāra̱mava̍ ṛtyai va̱dhāyo̍pamanthi̱tāra̱ṃ medhā̍ya vāsaḥ palpū̱līṃ pra̍kā̱māya̍ rajayi̱trīm

---

Mantra 13 {#mantra-13}

Adhyāya: 30 | Mantra: 13

ṛ̱taye̍ ste̱nahṛ̍dayaṃ vaira̍hatyāya̱ piśu̍na̱ṃ vivi̍ktyai kṣa̱ttāra̱maupa̍draṣṭryāyānukṣa̱ttāra̱ṃ balā̍yānuca̱raṃ bhū̱mne pa̍riṣka̱ndaṃ pri̱yāya̍ priyavā̱dina̱ mari̍ṣṭyā aśvasā̱da sva̱rgā̍ya lo̱kāya̍ bhāgadu̱ghaṃ varṣi̍ṣṭhāya̱ nākā̍ya parive̱ṣṭāra̍m

---

Mantra 14 {#mantra-14}

Adhyāya: 30 | Mantra: 14

ma̱nyave̍’yastā̱paṃ krodhā̍ya nisa̱raṃ yogā̍ya yo̱ktāra śokā̍yābhisa̱rtāra̱ṃ kṣemā̍ya vimo̱ktāra̍mutkūlanikū̱lebhya̍stri̱ṣṭhina̱ṃ vapu̍ṣe mānaskṛ̱ta śīlā̍yāñjanīkā̱rīṃ nirṛ̍tyai kośakā̱rīṃ ya̱māyā̱sūm

---

Mantra 15 {#mantra-15}

Adhyāya: 30 | Mantra: 15

ya̱māya̍ yama̱sūmatha̍rva̱bhyo’va̍tokā saṃvatsa̱rāya̍ paryā̱yiṇī̍ṃ parivatsa̱rāyāvi̍jātāmidāvatsa̱rāyā̱tītva̍rīmidvatsa̱rāyā̍ti̱ṣkadva̍rīṃ vatsa̱rāya̱ vija̍rjarā saṃvatsa̱rāya̱ pali̍knīmṛ̱bhubhyo̍’jinasa̱ndha sā̱dhyebhya̍ścarma̱mnam

---

Mantra 16 {#mantra-16}

Adhyāya: 30 | Mantra: 16

saro̍bhyo dhaiva̱ramu̍pa̱sthāva̍rābhyo̱ dāśa̍ṃ vaiśa̱ntābhyo̍ bai̱ndaṃ na̍ḍva̱lābhyaḥ śauṣka̍laṃ pā̱rāya̍ mārgā̱rama̍vā̱rāya̍ kai̱varta̍ṃ tī̱rthebhya̍ ā̱ndaṃ viṣa̍mebhyo mainā̱la svane̍bhya̱: parṇa̍ka̱ṃ guhā̍bhya̱: kirā̍ta sānu̍bhyo̱ jambha̍ka̱ṃ parva̍tebhyaḥ kimpūru̱ṣam

---

Mantra 17 {#mantra-17}

Adhyāya: 30 | Mantra: 17

bī̱bha̱tsāyai̍ paulka̱saṃ varṇā̍ya hiraṇyakā̱raṃ tu̱lāyai̍ vāṇi̱jaṃ pa̍ścādo̱ṣāya̍ glā̱vina̱ṃ viśve̍bhyo bhū̱tebhya̍: sidhma̱laṃ bhūtyai̍ jāgara̱ṇamabhū̍tyai svapa̱namārtyai̍ janavā̱dina̱ṃ vyṛ̱rddhyā apaga̱lbha saśa̱rāya̍ pra̱cchida̍m

---

Mantra 18 {#mantra-18}

Adhyāya: 30 | Mantra: 18

a̱kṣa̱rā̱jāya̍ kita̱vaṃ kṛ̱tāyā̍dinavada̱rśaṃ tretā̍yai ka̱lpina̍ṃ dvā̱parā̍yādhika̱lpina̍māska̱ndāya̍ sabhāsthā̱ṇuṃ mṛ̱tyave̍ govya̱cchamanta̍kāya goghā̱taṃ kṣu̱dhe yo gāṃ vi̍kṛ̱ntanta̱ṃ bhikṣa̍māṇa upa̱tiṣṭha̍ti duṣkṛ̱tāya̱ cara̍kācāryaṃ pā̱pmane̍ saila̱gam

---

Mantra 19 {#mantra-19}

Adhyāya: 30 | Mantra: 19

pra̱ti̱śrutkā̍yā arta̱naṃ ghoṣā̍ya bha̱ṣamantā̍ya bahuvā̱dina̍mana̱ntāya̱ mūka śabdā̍yāḍambarāghā̱taṃ maha̍se vīṇāvā̱daṃ krośā̍ya tūṇava̱dhmama̍varaspa̱rāya̍ śaṅkha̱dhmaṃ vanā̍ya vana̱pama̱nyato̍raṇyāya dāva̱pam

---

Mantra 20 {#mantra-20}

Adhyāya: 30 | Mantra: 20

na̱rmāya̍ pum̐śca̱lū hasā̍ya̱ kāri̱ṃ yāda̍se śāba̱lyāṃ grā̍ma̱ṇyaṃ gaṇa̍kamabhi̱krośa̍ka̱ṃ tānmaha̍se vīṇāvā̱daṃ pā̍ṇi̱ghnaṃ tū̍ṇava̱dhmaṃ tānnṛ̱ttāyā̍na̱ndāya̍ tala̱vam

---

Mantra 21 {#mantra-21}

Adhyāya: 30 | Mantra: 21

a̱gnaye̱ pīvā̍naṃ pṛthi̱vyai pī̍ṭhasa̱rpiṇa̍ṃ vā̱yave̍ cāṇḍā̱lama̱ntari̍kṣāya vaśana̱rtina̍ṃ di̱ve kha̍la̱ti sūryā̍ya harya̱kṣaṃ nakṣa̍trebhyaḥ kirmi̱raṃ ca̱ndrama̍se ki̱lāsa̱mahne̍ śu̱klaṃ pi̍ṅgā̱kṣa rātryai̍ kṛ̱ṣṇaṃ pi̍ṅgā̱kṣam

---

Mantra 22 {#mantra-22}

Adhyāya: 30 | Mantra: 22

athai̱tāna̱ṣṭau virū̍pā̱nā la̍bha̱te’ti̍dīrgha̱ṃ cāti̍hrasva̱ṃ cāti̍sthūla̱ṃ cāti̍kṛśa̱ṃ cāti̍śukla̱ṃ cāti̍kṛṣṇa̱ṃ cāti̍kulva̱ṃ cāti̍lomaśaṃ ca | aśū̍drā̱ abrā̍hmaṇā̱ste prā̍jāpa̱tyāḥ | mā̱ga̱dhaḥ pu̍m̐śca̱lī ki̍ta̱vaḥ klī̱bo’śū̍drā̱ abrā̍hmaṇā̱ste prā̍jāpa̱tyāḥ

---