svā̱dvīṃ tvā̍ svā̱dunā̍ tī̱vrāṃ tī̱vreṇā̱mṛtā̍ma̱mṛte̍na | madhu̍matī̱ṃ madhu̍matā sṛ̱jāmi̱ sa some̍na |
somo̍'sya̱śvibhyā̍ṃ pacyasva̱ sara̍svatyai pacya̱svendrā̍ya su̱trāmṇe̍ pacyasva
||19.1||parī̱to ṣi̍ñca̱tā su̱ta somo̱ ya u̍tta̱ma ha̱viḥ |
da̱dha̱nvā yo naryo̍ a̱psvantarā su̱ṣāva̱ soma̱madri̍bhiḥ
||19.2||vā̱yoḥ pū̱taḥ pa̱vitre̍ṇa pra̱tyaṅksomo̱ ati̍drutaḥ | indra̍sya̱ yujya̱: sakhā̍
||19.3||pu̱nāti̍ te pari̱sruta soma sūrya̍sya duhi̱tā | vāre̍ṇa̱ śaśva̍tā̱ tanā̍
||19.4||brahma̍ kṣa̱traṃ pa̍vate̱ teja̍ indri̱ya sura̍yā̱ soma̍: su̱ta āsu̍to̱ madā̍ya |
śu̱kreṇa̍ deva de̱vatā̍: pipṛgdhi̱ rase̱nānna̱ṃ yaja̍mānāya dhehi
||19.5||ku̱vida̱ṅga yava̍manto̱ yava̍ṃ ci̱dyathā̱ dāntya̍nupū̱rvaṃ vi̱yūya̍ |
i̱hehai̍ṣāṃ kṛṇuhi̱ bhoja̍nāni̱ ye ba̱rhiṣo̱ nama̍ ukti̱ṃ yaja̍nti |
u̱pa̱yā̱magṛ̍hīto'sya̱śvibhyā̍ṃ tvā̱ sara̍svatyai̱ tvendrā̍ya tvā su̱trāmṇa̍ e̱ṣa te̱ yoni̱steja̍se tvā vī̱ryā̱ya tvā̱ balā̍ya tvā
||19.6||nānā̱ hi vā̍ṃ de̱vahi̍ta sada̍skṛ̱taṃ mā sa sṛ̍kṣāthāṃ para̱me vyo̍man |
surā̱ tvamasi̍ śu̱ṣmiṇī̱ soma̍ e̱ṣa mā mā̍ hisī̱: svāṃ yoni̍māvi̱śantī̍
||19.7||u̱pa̱yā̱magṛ̍hīto̱'syāśvi̍na̱ṃ teja̍: sārasva̱taṃ vī̱rya̱mai̱ndraṃ bala̍m |
e̱ṣa te̱ yoni̱rmodā̍ya tvā ''na̱ndāya̍ tvā̱ maha̍se tvā
||19.8||tejo̍'si̱ tejo̱ mayi̍ dhehi vī̱rya̱masi vī̱ryaṃ mayi̍ dhehi bala̍masi̱ bala̱ṃ mayi̍ dhe̱hyojo̱'syojo̱ mayi̍ dhehi ma̱nyura̍si ma̱nyuṃ mayi̍ dhehi̱ saho̍'si̱ saho̱ mayi̍ dhehi
||19.9||yā vyā̱ghraṃ viṣū̍cikobhau̱ vṛka̍ṃ ca̱ rakṣa̍ti | śye̱naṃ pa̍ta̱triṇa siha semaṃ pā̱tvaha̍saḥ
||19.10||yadā̍pi̱peṣa̍ mā̱tara̍ṃ pu̱traḥ pramu̍dito̱ dhaya̍n | e̱tattada̍gne anṛ̱ṇo bha̍vā̱myaha̍tau pi̱tarau̱ mayā̍ |
sa̱mpṛca̍ stha̱ saṃ mā̍ bha̱dreṇa̍ pṛṅkta vi̱pṛca̍ stha̱ vi mā̍ pā̱pmanā̍ pṛṅkta
||19.11||de̱vā ya̱jñama̍tanvata bheṣa̱jaṃ bhi̱ṣajā̱'śvinā̍ | vā̱cā sara̍svatī bhi̱ṣagindrā̍yendri̱yāṇi̱ dadha̍taḥ
||19.12||dī̱kṣāyai̍ rū̱pa śaṣpā̍ṇi prāya̱ṇīya̍sya̱ tokmā̍ni | kra̱yasya̍ rū̱pa soma̍sya lā̱jāḥ so̍māśavo̱ madhu̍
||19.13||ā̱ti̱thya̱rū̱paṃ māsa̍raṃ mahāvī̱rasya̍ na̱gnahu̍: | rū̱pamu̍pa̱sadā̍me̱tatti̱sro rātrī̱: surā''su̍tā
||19.14||soma̍sya rū̱paṃ krī̱tasya̍ pari̱srutpari̍ ṣicyate | a̱śvibhyā̍ṃ du̱gdhaṃ bhe̍ṣa̱jamindrā̍yai̱ndra sara̍svatyā
||19.15||ā̱sa̱ndī rū̱pa rā̍jāsandyai̱ vedyai̍ ku̱mbhī su̍rā̱dhānī̍ | anta̍ra uttarave̱dyā rū̱paṃ kā̍rota̱ro bhi̱ṣak
||19.16||vedyā̱ vedi̱: samā̍pyate ba̱rhiṣā̍ ba̱rhiri̍ndri̱yam | yūpe̍na̱ yūpa̍ āpyate̱ praṇī̍to a̱gnira̱gninā̍
||19.17||ha̱vi̱rdhāna̱ṃ yada̱śvinā''gnī̍dhra̱ṃ yatsara̍svatī | indrā̍yai̱ndra sada̍skṛ̱taṃ pa̍tnī̱śāla̱ṃ gārha̍patyaḥ
||19.18||prai̱ṣebhi̍: prai̱ṣānā̍pnotyā̱prībhi̍rā̱prīrya̱jñasya̍ | pra̱yā̱jebhi̍ranuyā̱jān va̍ṣaṭkā̱rebhi̱rāhu̍tīḥ
||19.19||pa̱śubhi̍: pa̱śūnā̍pnoti puro̱ḍāśai̍rha̱vīṣyā | chando̍bhiḥ sāmidhe̱nīryā̱jyā̱bhirvaṣaṭkā̱rān
||19.20||dhā̱nāḥ ka̍ra̱mbhaḥ sakta̍vaḥ parīvā̱paḥ payo̱ dadhi̍ | soma̍sya rū̱pa ha̱viṣa̍ ā̱mikṣā̱ vāji̍na̱ṃ madhu̍
||19.21||dhā̱nānā rū̱paṃ kuva̍laṃ parīvā̱pasya̍ go̱dhūmā̍: | saktū̍nā rū̱paṃ bada̍ramupa̱vākā̍: kara̱mbhasya̍
||19.22||paya̍so rū̱paṃ yadyavā̍ da̱dhno rū̱paṃ ka̱rkandhū̍ni | soma̍sya rū̱paṃ vāji̍na sau̱myasya̍ rū̱pamā̱mikṣā̍
||19.23||ā śrā̍va̱yeti̍ sto̱triyā̍: pratyāśrā̱vo anu̍rūpaḥ | yajeti̍ dhāyyārū̱paṃ pra̍gā̱thā ye̍yajāma̱hāḥ
||19.24||a̱rdha̱ – ṛ̱cairu̱kthānā rū̱paṃ pa̱dairā̍pnoti ni̱vida̍: | pra̱ṇa̱vai: śa̱strāṇā rū̱paṃ paya̍sā̱ soma̍ āpyate
||19.25||a̱śvibhyā̍ṃ prātaḥ sava̱namindre̍ṇai̱ndraṃ mādhya̍ṃndinam | vai̱śva̱de̱va sara̍svatyā tṛ̱tīya̍mā̱pta sava̍nam
||19.26||vā̱ya̱vyai̱rvāya̱vyā̱nyāpnoti̱ sate̍na droṇakala̱śam | ku̱mbhībhyā̍mambhṛ̱ṇau su̱te sthā̱lībhi̍ sthā̱līrā̍pnoti
||19.27||yaju̍rbhirāpyante̱ grahā̱ grahai̱ stomā̍śca̱ viṣṭu̍tīḥ | chando̍bhirukthāśa̱strāṇi̱ sāmnā̍vabhṛ̱tha ā̍pyate
||19.28||iḍā̍bhirbha̱kṣānā̍pnoti sūktavā̱kenā̱śiṣa̍: | śa̱ṃyunā̍ patnīsaṃyā̱jāntsa̍miṣṭaya̱juṣā̍ sasthām
||19.29||vra̱tena̍ dī̱kṣāmā̍pnoti dī̱kṣayā̍''pnoti̱ dakṣi̍ṇām | dakṣi̍ṇā śra̱ddhāmā̍pnoti śra̱ddhayā̍ sa̱tyamā̍pyate
||19.30||e̱tāva̍drū̱paṃ ya̱jñasya̱ yadde̱vairbrahma̍ṇā kṛ̱tam | tade̱tatsarva̍māpnoti ya̱jñe sau̍trāma̱ṇī su̱te
||19.31||surā̍vantaṃ barhi̱ṣada su̱vīra̍ṃ ya̱jña hi̍nvanti mahi̱ṣā namo̍bhiḥ |
dadhā̍nā̱: soma̍ṃ di̱vi de̱vatā̍su̱ made̱mendra̱m̐ yaja̍mānāḥ sva̱rkāḥ
||19.32||yaste̱ rasa̱: sambhṛ̍ta̱ oṣa̍dhīṣu̱ soma̍sya̱ śuṣma̱: sura̍yā su̱tasya̍ | tena̍ jinva̱ yaja̍māna̱ṃ made̍na̱ sara̍svatīma̱śvinā̱vindra̍ma̱gnim
||19.33||yama̱śvinā̱ namu̍cerāsu̱rādadhi̱ sara̍sva̱tyasu̍nodindri̱yāya̍ |
i̱maṃ ta śu̱kraṃ madhu̍manta̱mindu soma rājā̍nami̱ha bha̍kṣayāmi
||19.34||yadatra̍ ri̱pta ra̱sina̍: su̱tasya̱ yadindro̱ api̍ba̱cchacī̍bhiḥ |
a̱haṃ tada̍sya̱ mana̍sā śi̱vena̱ soma rājā̍nami̱ha bha̍kṣayāmi
||19.35||pi̱tṛbhya̍: svadhā̱yibhya̍: sva̱dhā nama̍: pitāma̱hebhya̍: svadhā̱yibhya̍: sva̱dhā nama̱: prapi̍tāmahebhyaḥ svadhā̱yibhya̍: sva̱dhā nama̍: | akṣa̍n pi̱taro 'mī̍madanta pi̱taro 'tī̍tṛpanta pi̱tara̱: pita̍ra̱: śundha̍dhvam
||19.36||pu̱nantu̍ mā pi̱tara̍: so̱myāsa̍: pu̱nantu̍ mā pitāma̱hāḥ pu̱nantu̱ prapi̍tāmahāḥ | pa̱vitre̍ṇa śa̱tāyu̍ṣā |
pu̱nantu̍ mā pitāma̱hāḥ pu̱nantu̱ prapi̍tāmahāḥ | pa̱vitre̍ṇa śa̱tāyu̍ṣā̱ viśva̱māyu̱rvya̱śnavai
||19.37||agna̱ āyū̍ ṣi pavasa̱ ā su̱vorja̱miṣa̍ṃ ca naḥ | ā̱re bā̍dhasva du̱cchunā̍m
||19.38||pu̱nantu̍ mā devaja̱nā̍: pu̱nantu̱ mana̍sā̱ dhiya̍: | pu̱nantu̱ viśvā̍ bhū̱tāni̱ jāta̍vedaḥ punī̱hi mā̍
||19.39||pa̱vitre̍ṇa punīhi mā śu̱kreṇa̍ deva̱ dīdya̍t | agne̱ kratvā̱ kratū̱m̐1 ranu̍
||19.40||yatte̍ pa̱vitra̍ma̱rciṣyagne̱ vita̍tamanta̱rā | brahma̱ tena̍ punātu mā
||19.41||pava̍māna̱: so a̱dya na̍: pa̱vitre̍ṇa̱ vica̍rṣaṇiḥ | yaḥ potā̱ sa pu̍nātu mā
||19.42||u̱bhābhyā̍ṃ deva savitaḥ pa̱vitre̍ṇa sa̱vena̍ ca | māṃ pu̍nīhi vi̱śvata̍:
||19.43||vai̱śva̱de̱vī pu̍na̱tī de̱vyāgā̱dyasyā̍mi̱mā ba̱hvya̱sta̱nvo̍ vī̱tapṛ̍ṣṭhāḥ |
tayā̱ mada̍ntaḥ sadha̱māde̍ṣu va̱ya syā̍ma̱ pata̍yo rayī̱ṇām
||19.44||ye sa̍mā̱nāḥ sama̍nasaḥ pi̱taro̍ yama̱rājye̍ | teṣā̍m̐llo̱kaḥ sva̱dhā namo̍ ya̱jño de̱veṣu̍ kalpatām
||19.45||ye sa̍mā̱nāḥ sama̍naso jī̱vā jī̱veṣu̍ māma̱kāḥ | teṣā śrīrmayi̍ kalpatāma̱smim̐llo̱ke śa̱ta samā̍:
||19.46||dve sṛ̱tī a̍śṛṇavaṃ pitṝ̱ṇāma̱haṃ de̱vānā̍mu̱ta martyā̍nām |
tābhyā̍mi̱daṃ viśva̱meja̱tsame̍ti̱ yada̍nta̱rā pi̱tara̍ṃ mā̱tara̍ṃ ca
||19.47||i̱da ha̱viḥ pra̱jana̍naṃ me astu̱ daśa̍vīra sarva̍gaṇa sva̱staye̍ |
ā̱tma̱sani̍ prajā̱sani̍ paśu̱sani̍ loka̱sanya̍bhaya̱sani̍ |
a̱gniḥ pra̱jāṃ ba̍hu̱lāṃ me̍ karo̱tvanna̱ṃ payo̱ reto̍ a̱smāsu̍ dhatta
||19.48||udī̍ratā̱mava̍ra̱ utparā̍sa̱ unma̍dhya̱māḥ pi̱tara̍: so̱myāsa̍: |
asu̱ṃ ya ī̱yura̍vṛ̱kā ṛ̍ta̱jñāste no̍'vantu pi̱taro̱ have̍ṣu
||19.49||aṅgi̍raso naḥ pi̱taro̱ nava̍gvā̱ atha̍rvāṇo̱ bhṛga̍vaḥ so̱myāsa̍: |
teṣā̍ṃ va̱ya su̍ma̱tau ya̱jñiyā̍nā̱mapi̍ bha̱dre sau̍mana̱se syā̍ma
||19.50||ye na̱: pūrve̍ pi̱tara̍: so̱myāso̍'nūhi̱re so̍mapī̱thaṃ vasi̍ṣṭhāḥ |
tebhi̍rya̱maḥ sa̍rarā̱ṇo ha̱vīṣyu̱śannu̱śadbhi̍: pratikā̱mama̍ttu
||19.51||tva so̍ma̱ pra ci̍kito manī̱ṣā tva raji̍ṣṭha̱manu̍ neṣi̱ panthā̍m |
tava̱ praṇī̍tī pi̱taro̍ na indo de̱veṣu̱ ratna̍mabhajanta̱ dhīrā̍:
||19.52||tvayā̱ hi na̍: pi̱tara̍: soma̱ pūrve̱ karmā̍ṇi ca̱kruḥ pa̍vamāna̱ dhīrā̍: |
va̱nvannavā̍taḥ pari̱dhīm̐1 rapo̍rṇu vī̱rebhi̱raśvai̍rma̱ghavā̍ bhavā naḥ
||19.53||tva so̍ma pi̱tṛbhi̍: saṃvidā̱no'nu̱ dyāvā̍pṛthi̱vī ā ta̍tantha |
tasmai̍ ta indo ha̱viṣā̍ vidhema va̱ya syā̍ma̱ pata̍yo rayī̱ṇām
||19.54||barhi̍ṣadaḥ pitara ū̱tya rvāgi̱mā vo̍ ha̱vyā ca̍kṛmā ju̱ṣadhva̍m |
ta ā ga̱tāva̍sā̱ śanta̍me̱nāthā̍ na̱: śaṃ yora̍ra̱po da̍dhāta
||19.55||ā'haṃ pi̱tṝntsu̍vi̱datrā̍m̐2 avitsi̱ napā̍taṃ ca vi̱krama̍ṇaṃ ca̱ viṣṇo̍: |
ba̱rhi̱ṣado̱ ye sva̱dhayā̍ su̱tasya̱ bhaja̍nta pi̱tvasta i̱hāga̍miṣṭhāḥ
||19.56||upa̍hūtāḥ pi̱tara̍: so̱myāso̍ barhi̱ṣye̱ṣu ni̱dhiṣu̍ pri̱yeṣu̍ |
ta ā ga̍mantu̱ ta i̱ha śru̍va̱ntvadhi̍ bruvantu̱ te̍'vantva̱smān
||19.57||ā ya̍ntu naḥ pi̱tara̍: so̱myāso̍'gniṣvā̱ttāḥ pa̱thibhi̍rdeva̱yānai̍: |
a̱smin ya̱jñe sva̱dhayā̱ mada̱nto'dhi̍ bruvantu̱ te̱'vantva̱smān
||19.58||agni̍ṣvāttāḥ pitara̱ eha ga̍cchata̱ sada̍: – sadaḥ sadata supraṇītayaḥ |
a̱ttā ha̱vīṣi̱ praya̍tāni ba̱rhiṣyathā̍ ra̱yi sarva̍vīraṃ dadhātana
||19.59||ye a̍gniṣvā̱ttā ye ana̍gniṣvāttā̱ madhye̍ di̱vaḥ sva̱dhayā̍ mā̱daya̍nte |
tebhya̍: sva̱rāḍasu̍nītime̱tāṃ ya̍thāva̱śaṃ ta̱nva̱ṃ kalpayāti
||19.60||a̱gni̱ṣvā̱ttānṛ̍tu̱mato̍ havāmahe nārāśase so̍mapī̱thaṃ ya ā̱śuḥ |
te no̱ viprā̍saḥ su̱havā̍ bhavantu va̱ya syā̍ma̱ pata̍yo rayī̱ṇām
||19.61||ācyā̱ jānu̍ dakṣiṇa̱to ni̱ṣadye̱maṃ ya̱jñama̱bhi gṛ̍ṇīta̱ viśve̍ |
mā hisiṣṭa pitara̱: kena̍ cinno̱ yadva̱ āga̍: puru̱ṣatā̱ karā̍ma
||19.62||āsī̍nāso aru̱ṇīnā̍mu̱pasthe̍ ra̱yiṃ dha̍tta dā̱śuṣe̱ martyā̍ya |
pu̱trebhya̍: pitara̱stasya̱ vasva̱: pra ya̍cchata̱ ta i̱horja̍ṃ dadhāta
||19.63||yama̍gne kavyavāhana̱ tvaṃ ci̱nmanya̍se ra̱yim | tanno̍ gī̱rbhiḥ śra̱vāyya̍ṃ deva̱trā pa̍nayā̱ yuja̍m
||19.64||yo a̱gniḥ ka̍vya̱vāha̍naḥ pi̱tṝn yakṣa̍dṛtā̱vṛdha̍: |
predu̍ ha̱vyāni̍ vocati de̱vebhya̍śca pi̱tṛbhya̱ ā
||19.65||tvama̍gna īḍi̱taḥ ka̍vyavāha̱nāvā̍ḍḍha̱vyāni̍ sura̱bhīṇi̍ kṛ̱tvī |
prādā̍: pi̱tṛbhya̍: sva̱dhayā̱ te a̍kṣanna̱ddhi tvaṃ de̍va̱ praya̍tā ha̱vīṣi̍
||19.66||ye ce̱ha pi̱taro̱ ye ca̱ neha yām̐śca̍ vi̱dma yām̐2 u̍ ca̱ na pra̍vi̱dma |
tvaṃ ve̍ttha̱ yati̱ te jā̍tavedaḥ sva̱dhābhi̍rya̱jñam̐ sukṛ̍taṃ juṣasva
||19.67||i̱daṃ pi̱tṛbhyo̱ namo̍ astva̱dya ye pūrvā̍so̱ ya upa̍rāsa ī̱yuḥ |
ye pārthi̍ve̱ raja̱syā niṣa̍ttā̱ ye vā̍ nū̱na su̍vṛ̱janā̍su vi̱kṣu
||19.68||adhā̱ yathā̍ naḥ pi̱tara̱: parā̍saḥ pra̱tnāso̍ agna ṛ̱tamā̍śuṣā̱ṇāḥ |
śucīda̍ya̱n dīdhi̍timuktha̱śāsa̱: kṣāmā̍ bhi̱ndanto̍ aru̱ṇīrapa̍ vran
||19.69||u̱śanta̍stvā̱ ni dhī̍mahyu̱śanta̱: sami̍dhīmahi | u̱śannu̍śa̱ta ā va̍ha pi̱tṝn ha̱viṣe̱ atta̍ve
||19.70||a̱pāṃ phene̍na̱ namu̍ce̱: śira̍ i̱ndroda̍vartayaḥ | viśvā̱ yadaja̍ya̱ spṛdha̍:
||19.71||somo̱ rājā̱mṛta su̱ta ṛ̍jī̱ṣeṇā̍jahānmṛ̱tyum |
ṛ̱tena̍ sa̱tyami̍ndri̱yaṃ vi̱pāna śu̱kramandha̍sa̱ indra̍syendri̱yami̱daṃ payo̱'mṛta̱ṃ madhu̍
||19.72||a̱dbhyaḥ kṣī̱raṃ vya̍piba̱t kruṅṅā̍ṅgira̱so dhi̱yā |
ṛ̱tena̍ sa̱tyami̍ndri̱yaṃ vi̱pāna śu̱kramandha̍sa̱ indra̍syendri̱yami̱daṃ payo̱'mṛta̱ṃ madhu̍
||19.73||soma̍ma̱dbhyo vya̍piba̱cchanda̍sā hasaḥ śu̍ci̱ṣat |
ṛ̱tena̍ sa̱tyami̍ndri̱yaṃ vi̱pāna śu̱kramandha̍sa̱ indra̍syendri̱yami̱daṃ payo̱'mṛta̱ṃ madhu̍
||19.74||annā̍tpari̱sruto̱ rasa̱ṃ brahma̍ṇā̱ vya̍pibat kṣa̱traṃ paya̱: soma̍ṃ pra̱jāpa̍tiḥ |
ṛ̱tena̍ sa̱tyami̍ndri̱yaṃ vi̱pāna śu̱kramandha̍sa̱ indra̍syendri̱yami̱daṃ payo̱'mṛta̱ṃ madhu̍
||19.75||reto̱ mūtra̱ṃ vi ja̍hāti̱ yoni̍ṃ pravi̱śadi̍ndra̱yim | garbho̍ ja̱rāyu̱ṇā''vṛ̍ta̱ ulba̍ṃ jahāti̱ janma̍nā |
ṛ̱tena̍ sa̱tyami̍ndri̱yaṃ vi̱pāna śu̱kramandha̍sa̱ indra̍syendri̱yami̱daṃ payo̱'mṛta̱ṃ madhu̍
||19.76||dṛ̱ṣṭvā rū̱pe vyāka̍rot satyānṛ̱te pra̱jāpa̍tiḥ | aśra̍ddhā̱manṛ̱te'da̍dhācchra̱ddhā sa̱tye pra̱jāpa̍tiḥ |
ṛ̱tena̍ sa̱tyami̍ndri̱yaṃ vi̱pāna śu̱kramandha̍sa̱ indra̍syendri̱yami̱daṃ payo̱'mṛta̱ṃ madhu̍
||19.77||vede̍na rū̱pe vya̍pibat sutāsu̱tau pra̱jāpa̍tiḥ |
ṛ̱tena̍ sa̱tyami̍ndri̱yaṃ vi̱pāna śu̱kramandha̍sa̱ indra̍syendri̱yami̱daṃ payo̱'mṛta̱ṃ madhu̍
||19.78||dṛ̱ṣṭvā pa̍ri̱sruto̱ rasa śu̱kreṇa̍ śu̱kraṃ vya̍pibat paya̱: soma̍ṃ pra̱jāpa̍tiḥ |
ṛ̱tena̍ sa̱tyami̍ndri̱yaṃ vi̱pāna śu̱kramandha̍sa̱ indra̍syendri̱yami̱daṃ payo̱'mṛta̱ṃ madhu̍
||19.79||sīse̍na̱ tantra̱ṃ mana̍sā manī̱ṣiṇa̍ ūrṇāsū̱treṇa̍ ka̱vayo̍ vayanti |
a̱śvinā̍ ya̱jña sa̍vi̱tā sara̍sva̱tīndra̍sya rū̱paṃ varu̍ṇo bhiṣa̱jyan
||19.80||tada̍sya rū̱pama̱mṛta śacī̍bhista̱sro da̍dhurde̱vatā̍: sararā̱ṇāḥ |
lomā̍ni̱ śaṣpai̍rbahu̱dhā na tokma̍bhi̱stvaga̍sya māsama̍bhava̱nna lā̱jāḥ
||19.81||tada̱śvinā̍ bhi̱ṣajā̍ ru̱drava̍rtanī̱ sara̍svatī vayati̱ peśo̱ anta̍ram |
asthi̍ ma̱jjāna̱ṃ māsa̍raiḥ kārota̱reṇa̱ dadha̍to̱ gavā̍ṃ tva̱ci
||19.82||sara̍svatī̱ mana̍sā peśa̱laṃ vasu̱ nāsa̍tyābhyāṃ vayati darśa̱taṃ vapu̍: |
rasa̍ṃ pari̱srutā̱ na rohi̍taṃ na̱gnahu̱rdhīra̱stasa̍ra̱ṃ na vema̍
||19.83||paya̍sā śu̱krama̱mṛta̍ṃ ja̱nitra sura̍yā̱ mūtrā̍jjanayanta̱ reta̍: |
apāma̍tiṃ durma̱tiṃ bādha̍mānā̱ ūva̍dhya̱ṃ vāta sa̱bvaṃ tadā̱rāt
||19.84||indra̍: su̱trāmā̱ hṛda̍yena sa̱tyaṃ pu̍ro̱ḍāśe̍na savi̱tā ja̍jāna |
yakṛ̍t klo̱māna̱ṃ varu̍ṇo bhiṣa̱jyan mata̍sne vāya̱vyairna mi̍nāti pi̱ttam
||19.85||ā̱ntrāṇi̍ sthā̱līrmadhu̱ pinva̍mānā̱ gudā̱: pātrā̍ṇi su̱dughā̱ na dhe̱nuḥ |
śye̱nasya̱ patra̱ṃ na plī̱hā śacī̍bhirāsa̱ndī nābhi̍ru̱dara̱ṃ na mā̱tā
||19.86||ku̱mbho va̍ni̱ṣṭhurja̍ni̱tā śacī̍bhi̱ryasmi̱nnagre̱ yonyā̱ṃ garbho̍ a̱ntaḥ |
plā̱śirvya̍ktaḥ śa̱tadhā̍ra̱ utso̍ du̱he na ku̱mbhī sva̱dhāṃ pi̱tṛbhya̍:
||19.87||mukha sada̍sya̱ śira̱ it sate̍na ji̱hvā pa̱vitra̍ma̱śvinā̱santsara̍svatī |
cappa̱ṃ na pā̱yurbhi̱ṣaga̍sya̱ vālo̍ va̱stirna śepo̱ hara̍sā tara̱svī
||19.88||a̱śvibhyā̱ṃ cakṣu̍ra̱mṛta̱ṃ grahā̍bhyā̱ṃ chāge̍na̱ tejo̍ ha̱viṣā̍ śṛ̱tena̍ |
pakṣmā̍ṇi go̱dhūmai̱: kuva̍lairu̱tāni̱ peśo̱ na śu̱kramasi̍taṃ vasāte
||19.89||avi̱rna me̱ṣo na̱si vī̱ryā̱ya prā̱ṇasya̱ panthā̍ a̱mṛto̱ grahā̍bhyām |
sara̍svatyupa̱vākai̍rvyā̱naṃ nasyā̍ni ba̱rhirbada̍rairjajāna
||19.90||indra̍sya rū̱pamṛ̍ṣa̱bho balā̍ya̱ karṇā̍bhyā śrotra̍ma̱mṛta̱ṃ grahā̍bhyām |
yavā̱ na ba̱rhirbhru̱vi kesa̍rāṇi ka̱rkandhu̍ jajñe̱ madhu̍ sāra̱ghaṃ mukhā̍t
||19.91||ā̱tmannu̱pasthe̱ na vṛka̍sya̱ loma̱ mukhe̱ śmaśrū̍ṇi̱ na vyā̍ghralo̱ma |
keśā̱ na śī̱rṣanyaśa̍se śriyai̱ śikhā̍ sihasya̱ loma̱ tviṣi̍rindri̱yāṇi̍
||19.92||aṅgā̍nyā̱tman bhi̱ṣajā̱ tada̱śvinā̱tmāna̱maṅgai̱: sama̍dhā̱t sara̍svatī |
indra̍sya rū̱pa śa̱tamā̍na̱māyu̍śca̱ndreṇa̱ jyoti̍ra̱mṛta̱ṃ dadhā̍nāḥ
||19.93||sara̍svatī̱ yonyā̱ṃ garbha̍ma̱ntara̱śvibhyā̱ṃ patnī̱ sukṛ̍taṃ bibharti |
a̱pā rase̍na̱ varu̍ṇo̱ na sāmnendra śri̱yai ja̱naya̍nna̱psu rājā̍
||19.94||teja̍: paśū̱nā ha̱viri̍ndri̱yāva̍t pari̱srutā̱ paya̍sā sāra̱ghaṃ madhu̍ |
a̱śvibhyā̍ṃ du̱gdhaṃ bhi̱ṣajā̱ sara̍svatyā sutāsu̱tābhyā̍ma̱mṛta̱: soma̱ indu̍:
||19.95||