Vājasaneyi Madhyandina Saṃhitā — Chapter 20 (90 mantras)

Vājasaneyi Madhyandina Saṃhitā — Chapter 20

---

Mantras

Mantra	First Words
1	kṣatrasya yonirasi
2	ni ṣasāda
3	devasya tvā
4	ko’si katamo’si
5	śiro me
6	jihvā me
7	bāhū me
8	pṛṣṭhīrme rāṣṭramudaramasau
9	nābhirme citta
10	prati kṣatre
11	0
12	prathamā dvitīyairdvitīyāstṛtīyaistṛtīyā
13	lomāni prayatirmama
14	yaddevā devaheḍana
15	yadi divā
16	yadi jāgradyadi
17	yadgrāme yadaraṇye
18	yadāpo aghnyā
19	samudre te
20	drupadādiva mumucāna
21	udvaya tamasaspari
22	apo adyānvacāriṣa
23	edho’syedhiṣīmahi samidasi
24	abhyā dadhāmi
25	yatra brahma
26	yatrendraśca vāyuśca
27	aśunā te
28	siñcanti pari
29	dhānāvanta karambhiṇamapūpavantamukthinam
30	bṛhadindrāya gāyata
31	adhvaryo adribhi
32	yo bhūtānāmadhipatiryasmillokā
33	upayāmagṛhīto’syaśvibhyā tvā
34	prāṇapā me
35	aśvinakṛtasya te
36	samiddha indra
37	narāśasa prati
38	īḍito devairharivā2
39	juṣāṇo barhirharivān
40	indra dura
41	uṣāsānaktā bṛhatī
42	daivyā mimānā
43	tisro devīrhaviṣā
44	tvaṣṭā dadhacchuṣmamindrāya
45	vanaspatiravasṛṣṭo na
46	stokānāmindu prati
47	ā yātvindro’vasa
48	ā na
49	ā na
50	trātāramindramavitāramindra have
51	indra sutrāmā
52	tasya vaya
53	ā mandrairindra
54	evedindra vṛṣaṇa
55	samiddho agniraśvinā
56	tanūpā bhiṣajā
57	indrāyendu sarasvatī
58	ājuhvānā sarasvatīndrāyendriyāṇi
59	aśvinā namuce
60	kavaṣyo na
61	uṣāsānaktamaśvinā divendra
62	pāta no
63	tisrastredhā sarasvatyaśvinā
64	aśvinā bheṣaja
65	ṛtuthendro vanaspati
66	gobhirna somamaśvinā
67	aśvinā havirindriya
68	yamaśvinā sarasvatī
69	tamindra paśava
70	ya indra
71	savitā varuṇo
72	varuṇa kṣatramindriya
73	aśvinā gobhirindriyamaśvebhirvīrya
74	tā nāsatyā
75	tā bhiṣajā
76	yuva surāmamaśvinā
77	putramiva pitarāvaśvinobhendrāvathu
78	yasminnaśvāsa ṛṣabhāsa
79	ahāvyagne havirāsye
80	aśvinā tejasā
81	gomadū ṣu
82	na yatparo
83	tā na
84	pāvakā na
85	codayitrī sūnṛtānā
86	maho arṇa
87	indrā yāhi
88	indrā yāhi
89	indrā yāhi
90	aśvinā pibatā

---

Mantra 1 {#mantra-1}

Adhyāya: 20 | Mantra: 1

kṣa̱trasya̱ yoni̍rasi kṣa̱trasya̱ nābhi̍rasi | mā tvā̍ hisī̱nmā mā̍ hisīḥ

---

Mantra 2 {#mantra-2}

Adhyāya: 20 | Mantra: 2

ni ṣa̍sāda ghṛ̱tavra̍to̱ varu̍ṇaḥ pa̱styāsvā | sāmrā̍jyāya su̱kratu̍: | mṛ̱tyoḥ pā̍hi vi̱dyotpā̍hi

---

Mantra 3 {#mantra-3}

Adhyāya: 20 | Mantra: 3

de̱vasya̍ tvā savi̱tuḥ pra̍sa̱ve’śvino̍rbā̱hubhyā̍ṃ pū̱ṣṇo hastā̍bhyām | a̱śvinorbhaiṣa̍jyena̱ teja̍se brahmavarca̱sāyā̱bhi ṣi̍ñcāmi̱ sara̍svatyai̱ bhaiṣa̍jyena vī̱ryā̱yā̱nnādyā̍yā̱bhi ṣi̍ñcā̱mīndra̍syendri̱yeṇa̱ balā̍ya śriyai̱ yaśa̍se̱’bhi ṣi̍ñcāmi

---

Mantra 4 {#mantra-4}

Adhyāya: 20 | Mantra: 4

ko̍’si kata̱mo̱’si̱ kasmai̍ tvā̱ kāya̍ tvā | suślo̍ka̱ suma̍ṅgala̱ satya̍rājan

---

Mantra 5 {#mantra-5}

Adhyāya: 20 | Mantra: 5

śiro̍ me̱ śrīryaśo̱ mukha̱ṃ tviṣi̱: keśā̍śca̱ śmaśrū̍ṇi | rājā̍ me prā̱ṇo a̱mṛta sa̱mrāṭ cakṣu̍rvi̱rāṭ śrotra̍m

---

Mantra 6 {#mantra-6}

Adhyāya: 20 | Mantra: 6

ji̱hvā me̍ bha̱draṃ vāṅmaho̱ mano̍ ma̱nyuḥ sva̱rāḍ bhāma̍: | modā̍: pramo̱dā a̱ṅgulī̱raṅgā̍ni mi̱traṃ me̱ saha̍:

---

Mantra 7 {#mantra-7}

Adhyāya: 20 | Mantra: 7

bā̱hū me̱ bala̍mindri̱ya hastau̍ me̱ karma̍ vī̱rya̱m | ā̱tmā kṣa̱tramuro̱ mama̍

---

Mantra 8 {#mantra-8}

Adhyāya: 20 | Mantra: 8

pṛ̱ṣṭhīrme̍ rā̱ṣṭramu̱dara̱masau̍ grī̱vāśca̱ śroṇī̍ | ū̱rū a̍ra̱tnī jānu̍nī̱ viśo̱ me’ṅgā̍ni sa̱rvata̍:

---

Mantra 9 {#mantra-9}

Adhyāya: 20 | Mantra: 9

nābhi̍rme ci̱ttaṃ vi̱jñāna̍ṃ pā̱yurme’pa̍citirbha̱sat | ā̱na̱nda̱na̱ndāvā̱ṇḍau me̱ bhaga̱: saubhā̍gya̱ṃ pasa̍: | jaṅghā̍bhyāṃ pa̱dbhyāṃ dharmo̍’smi vi̱śi rājā̱ prati̍ṣṭhitaḥ

---

Mantra 10 {#mantra-10}

Adhyāya: 20 | Mantra: 10

prati̍ kṣa̱tre prati̍ tiṣṭhāmi rā̱ṣṭre pratyaśve̍ṣu̱ prati̍ tiṣṭhāmi̱ goṣu̍ | pratyaṅge̍ṣu̱ prati̍ tiṣṭhāmyā̱tman prati̍ prā̱ṇeṣu̱ prati̍ tiṣṭhāmi pu̱ṣṭe prati̱ dyāvā̍pṛthi̱vyoḥ prati̍ tiṣṭhāmi ya̱jñe

---

Mantra 11 {#mantra-11}

Adhyāya: 20 | Mantra: 11

0|| tra̱yā de̱vā ekā̍daśa trayastriśāḥ su̱rādha̍saḥ | bṛha̱spati̍purohitā de̱vasya̍ savi̱tuḥ sa̱ve | de̱vā de̱vaira̍vantu mā

---

Mantra 12 {#mantra-12}

Adhyāya: 20 | Mantra: 12

pra̱tha̱mā dvi̱tīyai̍rdvi̱tīyā̍stṛ̱tīyai̍stṛ̱tīyā̍: sa̱tyena̍ sa̱tyaṃ ya̱jñena̍ ya̱jño yaju̍rbhi̱ryajūṣi̱ sāma̍bhi̱: sāmā̍nyṛ̱gbhirṛca̍: puro’nuvā̱kyā̱bhiḥ puro’nuvā̱kyā̱ yā̱jyā̱bhiryā̱jyā̱ vaṣaṭkā̱rairva̍ṣaṭkā̱rā āhu̍tibhi̱rāhu̍tayo me̱ kāmā̱ntsama̍rdhayantu̱ bhūḥ svāhā̍

---

Mantra 13 {#mantra-13}

Adhyāya: 20 | Mantra: 13

lomā̍ni̱ praya̍ti̱rmama̱ tvaṅma̱ āna̍ti̱rāga̍tiḥ | māsaṃ ma̱ upa̍nati̱rvasvasthi̍ ma̱jjā ma̱ āna̍tiḥ

---

Mantra 14 {#mantra-14}

Adhyāya: 20 | Mantra: 14

yadde̍vā deva̱heḍa̍na̱ṃ devā̍saścakṛ̱mā va̱yam | a̱gnirmā̱ tasmā̱dena̍so̱ viśvā̍nmuñca̱tvaha̍saḥ

---

Mantra 15 {#mantra-15}

Adhyāya: 20 | Mantra: 15

yadi̱ divā̱ yadi̱ nakta̱menāsi cakṛ̱mā va̱yam | vā̱yurmā̱ tasmā̱dena̍so̱ viśvā̍nmuñca̱tvaha̍saḥ

---

Mantra 16 {#mantra-16}

Adhyāya: 20 | Mantra: 16

yadi̱ jāgra̱dyadi̱ svapna̱ enāsi cakṛ̱mā va̱yam | sūryo̍ mā̱ tasmā̱dena̍so̱ viśvā̍nmuñca̱tvaha̍saḥ

---

Mantra 17 {#mantra-17}

Adhyāya: 20 | Mantra: 17

yadgrāme̱ yadara̍ṇye̱ yatsa̱bhāyā̱ṃ yadi̍ndri̱ye | yacchū̱dre yadarye̱ yadena̍ścakṛ̱mā va̱yaṃ yadeka̱syādhi̱ dharma̍ṇi̱ tasyā̍va̱yaja̍namasi

---

Mantra 18 {#mantra-18}

Adhyāya: 20 | Mantra: 18

yadāpo̍ a̱ghnyā iti̱ varu̱ṇeti̱ śapā̍mahe̱ tato̍ varuṇa no muñca | ava̍bhṛtha nicumpuṇa nice̱rura̍si nicumpu̱ṇaḥ | ava̍ de̱vairde̱vakṛ̍ta̱meno̍’ya̱kṣyava̱ martyai̱rmartya̍kṛtaṃ puru̱rāvṇo̍ deva ri̱ṣaspā̍hi

---

Mantra 19 {#mantra-19}

Adhyāya: 20 | Mantra: 19

sa̍mu̱dre te̱ hṛda̍yama̱psvantaḥ saṃ tvā̍ viśa̱ntvoṣa̍dhīru̱tāpa̍: | su̱mi̱tri̱yā na̱ āpa̱ oṣa̍dhayaḥ santu durmitri̱yāstasmai̍ santu̱ yo’smāndveṣṭi̱ yaṃ ca̍ va̱yaṃ dvi̱ṣmaḥ

---

Mantra 20 {#mantra-20}

Adhyāya: 20 | Mantra: 20

dru̱pa̱dādi̍va mumucā̱naḥ svi̱nnaḥ snā̱to malā̍diva | pū̱taṃ pa̱vitre̍ṇe̱vājya̱māpa̍: śundhantu maina̍saḥ

---

Mantra 21 {#mantra-21}

Adhyāya: 20 | Mantra: 21

udva̱yaṃ tama̍sa̱spari̱ sva: paśya̍nta̱ utta̍ram | de̱vaṃ de̍va̱trā sūrya̱maga̍nma̱ jyoti̍rutta̱mam

---

Mantra 22 {#mantra-22}

Adhyāya: 20 | Mantra: 22

a̱po a̱dyānva̍cāriṣa rase̍na̱ sama̍sṛkṣmahi | paya̍svānagna̱ ā’ga̍ma̱ṃ taṃ mā̱ sa sṛ̍ja̱ varca̍sā pra̱jayā̍ ca̱ dhane̍na ca

---

Mantra 23 {#mantra-23}

Adhyāya: 20 | Mantra: 23

edho̍’syedhiṣī̱mahi̍ sa̱mida̍si̱ tejo̍’si̱ tejo̱ mayi̍ dhehi | sa̱māva̍varti pṛthi̱vī samu̱ṣāḥ samu̱ sūrya̍: | samu̱ viśva̍mi̱daṃ jaga̍t | vai̱śvā̱na̱rajyo̍tirbhūyāsaṃ vi̱bhūn kāmā̱n vya̱śnavai̱ bhūḥ svāhā̍

---

Mantra 24 {#mantra-24}

Adhyāya: 20 | Mantra: 24

a̱bhyā da̍dhāmi sa̱midha̱magne̍ vratapate̱ tvayi̍ | vra̱taṃ ca̍ śra̱ddhāṃ copai̍mī̱ndhe tvā̍ dīkṣi̱to a̱ham

---

Mantra 25 {#mantra-25}

Adhyāya: 20 | Mantra: 25

yatra̱ brahma̍ ca kṣa̱traṃ ca̍ sa̱myañco̱ cara̍taḥ sa̱ha | tam̐llo̱kaṃ puṇya̱ṃ prajñe̍ṣa̱ṃ yatra̍ de̱vāḥ sa̱hāgninā̍

---

Mantra 26 {#mantra-26}

Adhyāya: 20 | Mantra: 26

yatrendra̍śca vā̱yuśca̍ sa̱myañco̱ cara̍taḥ sa̱ha | tam̐llo̱kaṃ puṇya̱ṃ prajñe̍ṣa̱ṃ yatra̍ se̱dirna vi̱dyate̍

---

Mantra 27 {#mantra-27}

Adhyāya: 20 | Mantra: 27

aśunā̍ te aśuḥ pṛ̍cyatā̱ṃ paru̍ṣā̱ paru̍: | ga̱ndhaste̱ soma̍mavatu̱ madā̍ya̱ raso̱ acyu̍taḥ

---

Mantra 28 {#mantra-28}

Adhyāya: 20 | Mantra: 28

si̱ñcanti̱ pari̍ ṣiñca̱ntyutsi̍ñcanti pu̱nanti̍ ca | surā̍yai ba̱bhrvai̱ made̍ ki̱ntvo va̍dati ki̱ntvaḥ

---

Mantra 29 {#mantra-29}

Adhyāya: 20 | Mantra: 29

dhā̱nāva̍ntaṃ kara̱mbhiṇa̍mapū̱pava̍ntamu̱kthina̍m | indra̍ prā̱tarju̍ṣasva naḥ

---

Mantra 30 {#mantra-30}

Adhyāya: 20 | Mantra: 30

bṛ̱hadindrā̍ya gāyata̱ maru̍to vṛtra̱hanta̍mam | yena̱ jyoti̱raja̍nayannṛtā̱vṛdho̍ de̱vaṃ de̱vāya̱ jāgṛ̍vi

---

Mantra 31 {#mantra-31}

Adhyāya: 20 | Mantra: 31

adhva̍ryo̱ adri̍bhiḥ su̱ta soma̍ṃ pa̱vitra̱ ā na̍ya | pu̱nā̱hīndrā̍ya̱ pāta̍ve

---

Mantra 32 {#mantra-32}

Adhyāya: 20 | Mantra: 32

yo bhū̱tānā̱madhi̍pati̱ryasmi̍m̐llo̱kā adhi̍ śri̱tāḥ | ya īśe̍ maha̱to ma̱hām̐stena̍ gṛhṇāmi̱ tvāma̱haṃ mayi̍ gṛhṇāmi̱ tvāma̱ham

---

Mantra 33 {#mantra-33}

Adhyāya: 20 | Mantra: 33

u̱pa̱yā̱magṛ̍hīto’sya̱śvibhyā̍ṃ tvā̱ sara̍svatyai̱ tvendrā̍ya tvā su̱trāmṇa̍ e̱ṣa te̱ yoni̍ra̱śvibhyā̍ṃ tvā̱ sara̍svatyai̱ tvendrā̍ya tvā su̱trāmṇe̍

---

Mantra 34 {#mantra-34}

Adhyāya: 20 | Mantra: 34

prā̱ṇa̱pā me̍ apāna̱pāśca̍kṣu̱ṣpāḥ śro̍tra̱pāśca̍ me | vāco̍ me vi̱śvabhe̍ṣajo̱ mana̍so’si vi̱lāya̍kaḥ

---

Mantra 35 {#mantra-35}

Adhyāya: 20 | Mantra: 35

a̱śvina̍kṛtasya te̱ sara̍svatikṛta̱syendre̍ṇa su̱trāmṇā̍ kṛ̱tasya̍ | upa̍hūta̱ upa̍hūtasya bhakṣayāmi

---

Mantra 36 {#mantra-36}

Adhyāya: 20 | Mantra: 36

sami̍ddha̱ indra̍ u̱ṣasā̱manī̍ke puro̱rucā̍ pūrva̱kṛdvā̍vṛdhā̱naḥ | tri̱bhirde̱vaistriśatā̱ vajra̍bāhurja̱ghāna̍ vṛ̱traṃ vi duro̍ vavāra

---

Mantra 37 {#mantra-37}

Adhyāya: 20 | Mantra: 37

narā̱śasa̱: prati̱ śūro̱ mimā̍na̱stanū̱napā̱tprati̍ ya̱jñasya̱ dhāma̍ | gobhi̍rva̱pāvā̱n madhu̍nā sama̱ñjan hira̍ṇyaiśca̱ndrī ya̍jati̱ prace̍tāḥ

---

Mantra 38 {#mantra-38}

Adhyāya: 20 | Mantra: 38

ī̱ḍi̱to de̱vairhari̍vām̐2 abhi̱ṣṭirā̱juhvā̍no ha̱viṣā̱ śardha̍mānaḥ | pu̱ra̱nda̱ro go̍ta̱bhidvajra̍bāhu̱rā yā̍tu ya̱jñamupa̍ no juṣā̱ṇaḥ

---

Mantra 39 {#mantra-39}

Adhyāya: 20 | Mantra: 39

ju̱ṣā̱ṇo ba̱rhirhari̍vān na̱ indra̍: prā̱cīna sīdat pra̱diśā̍ pṛthi̱vyāḥ | u̱ru̱prathā̱: pratha̍māna syo̱namā̍di̱tyaira̱ktaṃ vasu̍bhiḥ sa̱joṣā̍:

---

Mantra 40 {#mantra-40}

Adhyāya: 20 | Mantra: 40

indra̱ṃ dura̍: kava̱ṣyo dhāva̍mānā̱ vṛṣā̍ṇaṃ yantu̱ jana̍yaḥ su̱patnī̍: | dvāro̍ de̱vīra̱bhito̱ vi śra̍yantā su̱vīrā̍ vī̱raṃ pratha̍mānā̱ maho̍bhiḥ

---

Mantra 41 {#mantra-41}

Adhyāya: 20 | Mantra: 41

u̱ṣāsā̱naktā̍ bṛha̱tī bṛ̱hanta̱ṃ paya̍svatī su̱dughe̱ śūra̱mindra̍m | tantu̍ṃ ta̱taṃ peśa̍sā sa̱ṃvaya̍ntī de̱vānā̍ṃ de̱vaṃ ya̍jataḥ suru̱kme

---

Mantra 42 {#mantra-42}

Adhyāya: 20 | Mantra: 42

daivyā̱ mimā̍nā̱ manu̍ṣaḥ puru̱trā hotā̍rā̱vindra̍ṃ pratha̱mā su̱vācā̍ | mū̱rdhan ya̱jñasya̱ madhu̍nā̱ dadhā̍nā prā̱cīna̱ṃ jyoti̍rha̱viṣā̍ vṛdhātaḥ

---

Mantra 43 {#mantra-43}

Adhyāya: 20 | Mantra: 43

ti̱sro de̱vīrha̱viṣā̱ vardha̍mānā̱ indra̍ṃ juṣā̱ṇā jana̍yo̱ na patnī̍: | acchi̍nna̱ṃ tantu̱ṃ paya̍sā̱ sara̍sva̱tīḍā̍ de̱vī bhāra̍tī vi̱śvatū̍rtiḥ

---

Mantra 44 {#mantra-44}

Adhyāya: 20 | Mantra: 44

tvaṣṭā̱ dadha̱cchuṣma̱mindrā̍ya̱ vṛṣṇe’pā̱ko’ci̍ṣṭurya̱śase̍ pu̱rūṇi̍ | vṛṣā̱ yaja̱nvṛṣa̍ṇa̱ṃ bhūri̍retā mū̱rdhan ya̱jñasya̱ sama̍naktu de̱vān

---

Mantra 45 {#mantra-45}

Adhyāya: 20 | Mantra: 45

vana̱spati̱rava̍sṛṣṭo̱ na pāśai̱stmanyā̍ sama̱ñjañcha̍mi̱tā na de̱vaḥ | indra̍sya ha̱vyairja̱ṭhara̍ṃ pṛṇā̱naḥ svadā̍ti ya̱jñaṃ madhu̍nā ghṛ̱tena̍

---

Mantra 46 {#mantra-46}

Adhyāya: 20 | Mantra: 46

sto̱kānā̱mindu̱ṃ prati̱ śūra̱ indro̍ vṛṣā̱yamā̍ṇo vṛṣa̱bhastu̍rā̱ṣāṭ | ghṛ̱ta̱pruṣā̱ mana̍sā̱ moda̍mānā̱: svāhā̍ de̱vā a̱mṛtā̍ mādayantām

---

Mantra 47 {#mantra-47}

Adhyāya: 20 | Mantra: 47

ā yā̱tvindro’va̍sa̱ upa̍ na i̱ha stu̱taḥ sa̍dha̱mada̍stu̱ śūra̍: | vā̱vṛ̱dhā̱nastavi̍ṣī̱ryasya̍ pū̱rvīrdyaurna kṣa̱trama̱bhibhū̍ti̱ puṣyā̍t

---

Mantra 48 {#mantra-48}

Adhyāya: 20 | Mantra: 48

ā na̱ indro̍ dū̱rādā na̍ ā̱sāda̍bhiṣṭi̱kṛdava̍se yāsadu̱graḥ | oji̍ṣṭhebhirnṛ̱pati̱rvajra̍bāhuḥ sa̱ṅge sa̱matsu̍ tu̱rvaṇi̍: pṛta̱nyūn

---

Mantra 49 {#mantra-49}

Adhyāya: 20 | Mantra: 49

ā na̱ indro̱ hari̍bhiryā̱tvacchā̍rvācī̱no’va̍se̱ rādha̍se ca | tiṣṭhā̍ti va̱jrī ma̱ghavā̍ vira̱pśīmaṃ ya̱jñamanu̍ no̱ vāja̍sātau

---

Mantra 50 {#mantra-50}

Adhyāya: 20 | Mantra: 50

trā̱tāra̱mindra̍mavi̱tāra̱mindra have̍ – have su̱hava śūra̱mindra̍m | hvayā̍mi śa̱kraṃ pu̍ruhū̱tamindra sva̱sti no̍ ma̱ghavā̍ dhā̱tvindra̍:

---

Mantra 51 {#mantra-51}

Adhyāya: 20 | Mantra: 51

indra̍: su̱trāmā̱ svavā̱m̐2 avo̍bhiḥ sumṛḍī̱ko bha̍vatu vi̱śvave̍dāḥ | bādha̍tā̱ṃ dveṣo̱ abha̍yaṃ kṛṇotu su̱vīrya̍sya̱ pata̍yaḥ syāma

---

Mantra 52 {#mantra-52}

Adhyāya: 20 | Mantra: 52

tasya̍ va̱ya su̍ma̱tau ya̱jñiya̱syāpi̍ bha̱dre sau̍mana̱se syā̍ma | sa su̱trāmā̱ svavā̱m̐2 indro̍ a̱sme ā̱rācci̱d dveṣa̍: sanu̱taryu̍yotu

---

Mantra 53 {#mantra-53}

Adhyāya: 20 | Mantra: 53

ā ma̱ndrairi̍ndra̱ hari̍bhiryā̱hi ma̱yūra̍romabhiḥ | mā tvā̱ ke ci̱nni ya̍ma̱n viṃ nā pā̱śino’ti̱ dhanve̍va̱ tām̐2 i̍hi

---

Mantra 54 {#mantra-54}

Adhyāya: 20 | Mantra: 54

e̱vedindra̱ṃ vṛṣa̍ṇa̱ṃ vajra̍bāhu̱ṃ vasi̍ṣṭhāso a̱bhya̱rcantya̱rkaiḥ | sa na̍ stu̱to vī̱rava̍ddhātu̱ goma̍dyū̱yaṃ pā̍ta sva̱stibhi̱: sadā̍ naḥ

---

Mantra 55 {#mantra-55}

Adhyāya: 20 | Mantra: 55

sami̍ddho a̱gnira̍śvinā ta̱pto gha̱rmo vi̱rāṭ su̱taḥ | du̱he dhe̱nuḥ sara̍svatī̱ soma śu̱krami̱hendri̱yam

---

Mantra 56 {#mantra-56}

Adhyāya: 20 | Mantra: 56

ta̱nū̱pā bhi̱ṣajā̍ su̱te’śvino̱bhā sara̍svatī | madhvā̱ rajāsīndri̱yamindrā̍ya pa̱thibhi̍rvahān

---

Mantra 57 {#mantra-57}

Adhyāya: 20 | Mantra: 57

indrā̱yendu sara̍svatī̱ narā̱śase̍na na̱gnahu̍m | adhā̍tāma̱śvinā̱ madhu̍ bheṣa̱jaṃ bhi̱ṣajā̍ su̱te

---

Mantra 58 {#mantra-58}

Adhyāya: 20 | Mantra: 58

ā̱juhvā̍nā̱ sara̍sva̱tīndrā̍yendri̱yāṇi̍ vī̱rya̱m | iḍā̍bhira̱śvinā̱viṣa samūrja sa ra̱yiṃ da̍dhuḥ

---

Mantra 59 {#mantra-59}

Adhyāya: 20 | Mantra: 59

a̱śvinā̱ namu̍ceḥ su̱ta soma śu̱kraṃ pa̍ri̱srutā̍ | sara̍svatī̱ tamā ‘bha̍radba̱rhiṣendrā̍ya̱ pāta̍ve

---

Mantra 60 {#mantra-60}

Adhyāya: 20 | Mantra: 60

ka̱va̱ṣyo na̱ vyaca̍svatīra̱śvibhyā̱ṃ na duro̱ diśa̍: | indro̱ na roda̍sī u̱bhe du̱he kā̱māntsara̍svatī

---

Mantra 61 {#mantra-61}

Adhyāya: 20 | Mantra: 61

u̱ṣāsā̱nakta̍maśvinā̱ divendra̍ sā̱yami̍ndriyaiḥ | sa̱ñjā̱nā̱ne su̱peśa̍sā̱ sama̍ñjāte̱ sara̍svatyā

---

Mantra 62 {#mantra-62}

Adhyāya: 20 | Mantra: 62

pā̱taṃ no̍ aśvinā̱ divā̍ pā̱hi nakta sarasvati | daivyā̍ hotārā bhiṣajā pā̱tamindra sacā̍ su̱te

---

Mantra 63 {#mantra-63}

Adhyāya: 20 | Mantra: 63

ti̱srastre̱dhā sara̍svatya̱śvinā̱ bhāra̱tīḍā̍ | tī̱vraṃ pa̍ri̱srutā̱ soma̱mindrā̍ya suṣuvu̱rmada̍m

---

Mantra 64 {#mantra-64}

Adhyāya: 20 | Mantra: 64

a̱śvinā̍ bheṣa̱jaṃ madhu̍ bheṣa̱jaṃ na̱: sara̍svatī | indre̱ tvaṣṭā̱ yaśa̱: śriya rū̱pa-rū̍pamadhuḥ su̱te

---

Mantra 65 {#mantra-65}

Adhyāya: 20 | Mantra: 65

ṛ̱tu̱thendro̱ vana̱spati̍: śaśamā̱naḥ pa̍ri̱srutā̍ | kī̱lāla̍ma̱śvibhyā̱ṃ madhu̍ du̱he dhe̱nuḥ sara̍svatī

---

Mantra 66 {#mantra-66}

Adhyāya: 20 | Mantra: 66

gobhi̱rna soma̍maśvinā̱ māsa̍reṇa pari̱srutā̍ | sama̍dhāta sara̍svatyā̱ svāhendre̍ su̱taṃ madhu̍

---

Mantra 67 {#mantra-67}

Adhyāya: 20 | Mantra: 67

a̱śvinā̍ ha̱viri̍ndri̱yaṃ namu̍cerdhi̱yā sara̍svatī | ā śu̱kramā̍su̱rādvasu̍ ma̱ghamindrā̍ya jabhrire

---

Mantra 68 {#mantra-68}

Adhyāya: 20 | Mantra: 68

yama̱śvinā̱ sara̍svatī ha̱viṣendra̱mava̍rdhayan | sa bi̍bheda va̱laṃ ma̱ghaṃ namu̍cāvāsu̱re sacā̍

---

Mantra 69 {#mantra-69}

Adhyāya: 20 | Mantra: 69

tamindra̍ṃ pa̱śava̱: sacā̱śvino̱bhā sara̍svatī | dadhā̍nā a̱bhya̱nūṣata ha̱viṣā̍ ya̱jña i̍ndri̱yaiḥ

---

Mantra 70 {#mantra-70}

Adhyāya: 20 | Mantra: 70

ya indra̍ indri̱yaṃ da̱dhuḥ sa̍vi̱tā varu̍ṇo̱ bhaga̍: | sa su̱trāmā̍ ha̱viṣpa̍ti̱ryaja̍mānāya saścata

---

Mantra 71 {#mantra-71}

Adhyāya: 20 | Mantra: 71

sa̱vi̱tā varu̍ṇo dadha̱dyaja̍mānāya dā̱śuṣe̍ | āda̍tta̱ namu̍ce̱rvasu̍ su̱trāmā̱ bala̍mindri̱yam

---

Mantra 72 {#mantra-72}

Adhyāya: 20 | Mantra: 72

varu̍ṇaḥ kṣa̱trami̍ndri̱yaṃ bhage̍na savi̱tā śriya̍m | su̱trāmā̱ yaśa̍sā̱ bala̱ṃ dadhā̍nā ya̱jñamā̍śata

---

Mantra 73 {#mantra-73}

Adhyāya: 20 | Mantra: 73

a̱śvinā̱ gobhi̍rindri̱yamaśve̍bhirvī̱ryaṃ bala̍m | ha̱viṣendra sara̍svatī̱ yaja̍mānamavardhayan

---

Mantra 74 {#mantra-74}

Adhyāya: 20 | Mantra: 74

tā nāsa̍tyā su̱peśa̍sā̱ hira̍ṇyavartanī̱ narā̍ | sara̍svatī ha̱viṣma̱tīndra̱ karma̍su no’vata

---

Mantra 75 {#mantra-75}

Adhyāya: 20 | Mantra: 75

tā bhi̱ṣajā̍ su̱karma̍ṇā̱ sā su̱dughā̱ sara̍svatī | sa vṛ̍tra̱hā śa̱takra̍tu̱rindrā̍ya dadhurindri̱yam

---

Mantra 76 {#mantra-76}

Adhyāya: 20 | Mantra: 76

yu̱va su̱rāma̍maśvinā̱ namu̍cāvāsu̱re sacā̍ | vi̱pi̱pā̱nāḥ sara̍sva̱tīndra̱ṃ karma̍svāvata

---

Mantra 77 {#mantra-77}

Adhyāya: 20 | Mantra: 77

pu̱trami̍va pi̱tarā̍va̱śvino̱bhendrā̱vathu̱: kāvyai̍rdasanā̍bhiḥ |yatsu̱rāma̱ṃ vyapi̍ba̱: śacī̍bhi̱: sara̍svatī tvā maghavannabhiṣṇak

---

Mantra 78 {#mantra-78}

Adhyāya: 20 | Mantra: 78

yasmi̱nnaśvā̍sa ṛṣa̱bhāsa̍ u̱kṣaṇo̍ va̱śā me̱ṣā a̍vasṛ̱ṣṭāsa̱ āhu̍tāḥ | kī̱lā̱la̱pe soma̍pṛṣṭhāya ve̱dhase̍ hṛ̱dā ma̱tiṃ ja̍naya̱ cāru̍ma̱gnaye̍

---

Mantra 79 {#mantra-79}

Adhyāya: 20 | Mantra: 79

ahā̍vyagne ha̱virā̱sye̱ te sru̱cī̱va ghṛ̱taṃ ca̱mvī̱va̱ soma̍: | vā̱ja̱sani ra̱yima̱sme su̱vīra̍ṃ praśa̱staṃ dhe̍hi ya̱śasa̍ṃ bṛ̱hanta̍m

---

Mantra 80 {#mantra-80}

Adhyāya: 20 | Mantra: 80

a̱śvinā̱ teja̍sā̱ cakṣu̍: prā̱ṇena̱ sara̍svatī vī̱rya̱m | vā̱cendro̱ bale̱nendrā̍ya dadhurindri̱yam

---

Mantra 81 {#mantra-81}

Adhyāya: 20 | Mantra: 81

goma̍dū̱ ṣu ṇā̍satyā̱śvā̍vadyātamaśvinā | va̱rtī ru̍drā nṛ̱pāyya̍m

---

Mantra 82 {#mantra-82}

Adhyāya: 20 | Mantra: 82

na yatparo̱ nānta̍ra āda̱dharṣa̍dvṛṣaṇvasū | du̱:śaso̱ martyo̍ ri̱puḥ

---

Mantra 83 {#mantra-83}

Adhyāya: 20 | Mantra: 83

tā na̱ ā vo̍ḍhamaśvinā ra̱yiṃ pi̱śaṅga̍saṃdṛśam | dhiṣṇyā̍ varivo̱vida̍m

---

Mantra 84 {#mantra-84}

Adhyāya: 20 | Mantra: 84

pā̱va̱kā na̱: sara̍svatī̱ vāje̍bhirvā̱jinī̍vatī | ya̱jñaṃ va̍ṣṭu dhi̱yāva̍suḥ

---

Mantra 85 {#mantra-85}

Adhyāya: 20 | Mantra: 85

co̱da̱yi̱trī sū̱nṛtā̍nā̱ṃ ceta̍ntī sumatī̱nām | ya̱jñaṃ da̍dhe̱ sara̍svatī

---

Mantra 86 {#mantra-86}

Adhyāya: 20 | Mantra: 86

ma̱ho arṇa̱: sara̍svatī̱ pra ce̍tayati ke̱tunā̍ | dhiyo̱ viśvā̱ vi rā̍jati

---

Mantra 87 {#mantra-87}

Adhyāya: 20 | Mantra: 87

indrā yā̍hi citrabhāno su̱tā i̱me tvā̱yava̍: | aṇvī̍bhi̱stanā̍ pū̱tāsa̍:

---

Mantra 88 {#mantra-88}

Adhyāya: 20 | Mantra: 88

indrā yā̍hi dhi̱yeṣi̱to vipra̍jūtaḥ su̱tāva̍taḥ | upa̱ brahmā̍ṇi vā̱ghata̍:

---

Mantra 89 {#mantra-89}

Adhyāya: 20 | Mantra: 89

indrā yā̍hi̱ tūtu̍jāna̱ upa̱ brahmā̍ṇi harivaḥ | su̱te da̍dhiṣva na̱ścana̍:

---

Mantra 90 {#mantra-90}

Adhyāya: 20 | Mantra: 90

a̱śvinā̍ pibatā̱ṃ madhu̱ sara̍svatyā sa̱joṣa̍sā | indra̍: su̱trāmā̍ vṛtra̱hā ju̱ṣantā so̱myaṃ madhu̍

---