ape̱to ya̍ntu pa̱ṇayo'su̍mnā devapī̱yava̍: | a̱sya lo̱kaḥ su̱tāva̍taḥ |
dyubhi̱raho̍bhira̱ktubhi̱rvya̱ktaṃ ya̱mo da̍dātvava̱sāna̍masmai
||35.1||द्युभि॒रहो॑भिर॒क्तुभि॒र्व्य॒क्तं य॒मो द॑दात्वव॒सान॑मस्मै
sa̱vi̱tā te̱ śarī̍rebhyaḥ pṛthi̱vyām̐llo̱kami̍cchatu | tasmai̍ yujyantāmu̱sriyā̍:
||35.2||स॒वि॒ता ते॒ शरी॑रेभ्यः पृथि॒व्याँल्लो॒कमि॑च्छतु । तस्मै॑ युज्यन्तामु॒स्रिया॑:
vā̱yuḥ pu̍nātu sa̍vi̱tā pu̍nātva̱gnerbhrāja̍sā̱ sūrya̍sya̱ varca̍sā | vi mu̍cyantāmu̱sriyā̍:
||35.3||वा॒युः पु॑नातु स॑वि॒ता पु॑नात्व॒ग्नेर्भ्राज॑सा॒ सूर्य॑स्य॒ वर्च॑सा । वि मु॑च्यन्तामु॒स्रिया॑:
a̱śva̱tthe vo̍ ni̱ṣada̍naṃ pa̱rṇe vo̍ vasa̱tiṣkṛ̱tā |
go̱bhāja̱ itkilā̍satha̱ yatsa̱nava̍tha̱ pūru̍ṣam
||35.4||अ॒श्व॒त्थे वो॑ नि॒षद॑नं प॒र्णे वो॑ वस॒तिष्कृ॒ता ।
गो॒भाज॒ इत्किला॑सथ॒ यत्स॒नव॑थ॒ पूरु॑षम्
sa̱vi̱tā te̱ śarī̍rāṇi mā̱turu̱pastha̱ ā va̍patu | tasmai̍ pṛthivi̱ śaṃ bha̍va
||35.5||स॒वि॒ता ते॒ शरी॑राणि मा॒तुरु॒पस्थ॒ आ व॑पतु । तस्मै॑ पृथिवि॒ शं भ॑व
pra̱jāpa̍tau tvā de̱vatā̍yā̱mupo̍dake lo̱ke ni da̍dhāmyasau | apa̍ na̱: śośu̍cada̱gham
||35.6||प्र॒जाप॑तौ त्वा दे॒वता॑या॒मुपो॑दके लो॒के नि द॑धाम्यसौ । अप॑ न॒: शोशु॑चद॒घम्
para̍ṃ mṛtyo̱ anu̱ pare̍hi̱ panthā̱ṃ yaste̍ a̱nya ita̍ro deva̱yānā̍t |
cakṣu̍ṣmate śṛṇva̱te te̍ bravīmi̱ mā na̍: pra̱jā rī̍riṣo̱ mota vī̱rān
||35.7||परं॑ मृत्यो॒ अनु॒ परे॑हि॒ पन्थां॒ यस्ते॑ अ॒न्य इत॑रो देव॒याना॑त् ।
चक्षु॑ष्मते शृण्व॒ते ते॑ ब्रवीमि॒ मा न॑: प्र॒जाᳪ री॑रिषो॒ मोत वी॒रान्
śaṃ vāta̱: śa hi te̱ ghṛṇi̱: śaṃ te̍ bhava̱ntviṣṭa̍kāḥ |
śaṃ te̍ bhavantva̱gnaya̱: pārthi̍vāso̱ mā tvā̱'bhi śū̍śucan
||35.8||शं वात॒: शᳪ हि ते॒ घृणि॒: शं ते॑ भव॒न्त्विष्ट॑काः ।
शं ते॑ भवन्त्व॒ग्नय॒: पार्थि॑वासो॒ मा त्वा॒ऽभि शू॑शुचन्
kalpa̍ntāṃ te̱ diśa̱stubhya̱māpa̍: śi̱vata̍mā̱stubhya̍ṃ bhavantu̱ sindha̍vaḥ |
a̱ntari̍kṣa śi̱vaṃ tubhya̱ṃ kalpa̍ntāṃ te̱ diśa̱: sarvā̍:
||35.9||कल्प॑न्तां ते॒ दिश॒स्तुभ्य॒माप॑: शि॒वत॑मा॒स्तुभ्यं॑ भवन्तु॒ सिन्ध॑वः ।
अ॒न्तरि॑क्षᳪ शि॒वं तुभ्यं॒ कल्प॑न्तां ते॒ दिश॒: सर्वा॑:
aśma̍nvatī rīyate̱ sa ra̍bhadhva̱mutti̍ṣṭhata̱ pra ta̍ratā̱ sakhā̍yaḥ |
atrā̍ jahī̱mo'śi̍vā̱ ye asa̍ñchi̱vānva̱yamutta̍remā̱bhi vājā̍n
||35.10||अश्म॑न्वती रीयते॒ सᳪ र॑भध्व॒मुत्ति॑ष्ठत॒ प्र त॑रता॒ सखा॑यः ।
अत्रा॑ जही॒मोऽशि॑वा॒ ये अस॑ञ्छि॒वान्व॒यमुत्त॑रेमा॒भि वाजा॑न्
apā̱ghamapa̱ kilvi̍ṣa̱mapa̍ kṛ̱tyāmapo̱ rapa̍: | apā̍mārga̱ tvama̱smadapa̍ du̱:ṣvapnya suva
||35.11||अपा॒घमप॒ किल्वि॑ष॒मप॑ कृ॒त्यामपो॒ रप॑: । अपा॑मार्ग॒ त्वम॒स्मदप॑ दु॒:ष्वप्न्य॑ᳪ सुव
su̱mi̱tri̱yā na̱ āpa̱ oṣa̍dhayaḥ santu durmitri̱yāstasmai̍ santu̱ yo'smāndveṣṭi̱ yaṃ ca̍ va̱yaṃ dvi̱ṣmaḥ
||35.12||सु॒मि॒त्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ योऽस्मान्द्वेष्टि॒ यं च॑ व॒यं द्वि॒ष्मः
a̱na̱ḍvāha̍ma̱nvāra̍bhāmahe̱ saura̍bheya sva̱staye̍ | sa na̱ indra̍ iva de̱vebhyo̱ vahni̍: sa̱ntāra̍ṇo bhava
||35.13||अ॒न॒ड्वाह॑म॒न्वार॑भामहे॒ सौर॑भेयᳪ स्व॒स्तये॑ । स न॒ इन्द्र॑ इव दे॒वेभ्यो॒ वह्नि॑: स॒न्तार॑णो भव
udva̱yaṃ tama̍sa̱spari̱ sva: paśya̍nta̱ utta̍ram |
de̱vaṃ de̍va̱trā sūrya̱maga̍nma̱ jyoti̍rutta̱mam
||35.14||उद्व॒यं तम॑स॒स्परि॒ स्व: पश्य॑न्त॒ उत्त॑रम् ।
दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम्
i̱maṃ jī̱vebhya̍: pari̱dhiṃ da̍dhāmi̱ maiṣā̱ṃ nu gā̱dapa̍ro̱ artha̍me̱tam |
śa̱taṃ jī̍vantu śa̱rada̍: purū̱cīra̱ntarmṛ̱tyuṃ da̍dhatā̱ṃ parva̍tena
||35.15||इ॒मं जी॒वेभ्य॑: परि॒धिं द॑धामि॒ मैषां॒ नु गा॒दप॑रो॒ अर्थ॑मे॒तम् ।
श॒तं जी॑वन्तु श॒रद॑: पुरू॒चीर॒न्तर्मृ॒त्युं द॑धतां॒ पर्व॑तेन
agna̱ āyūṣi pavasva̱ ā su̱vorja̱miṣa̍ṃ ca naḥ | ā̱re bā̍dhasva du̱cchunā̍m
||35.16||अग्न॒ आयू॑ᳪषि पवस्व॒ आ सु॒वोर्ज॒मिषं॑ च नः । आ॒रे बा॑धस्व दु॒च्छुना॑म्
āyu̍ṣmānagne ha̱viṣā̍ vṛdhā̱no ghṛ̱tapra̍tīko ghṛ̱tayo̍niredhi |
ghṛ̱taṃ pī̱tvā madhu̱ cāru̱ gavya̍ṃ pi̱teva̍ pu̱trama̱bhi ra̍kṣatādi̱māntsvāhā̍
||35.17||आयु॑ष्मानग्ने ह॒विषा॑ वृधा॒नो घृ॒तप्र॑तीको घृ॒तयो॑निरेधि ।
घृ॒तं पी॒त्वा मधु॒ चारु॒ गव्यं॑ पि॒तेव॑ पु॒त्रम॒भि र॑क्षतादि॒मान्त्स्वाहा॑
parī̱me gāma̍neṣata̱ parya̱gnima̍hṛṣata | de̱veṣva̍krata̱ śrava̱: ka i̱mām̐2 ā da̍dharṣati
||35.18||परी॒मे गाम॑नेषत॒ पर्य॒ग्निम॑हृषत । दे॒वेष्व॑क्रत॒ श्रव॒: क इ॒माँ२ आ द॑धर्षति
kra̱vyāda̍ma̱gniṃ pra hi̍ṇomi dū̱raṃ ya̍ma̱rājya̍ṃ gacchatu ripravā̱haḥ |
ihai̱vāyamita̍ro jā̱tave̍dā de̱vebhyo̍ ha̱vyaṃ va̍hatu prajā̱nan
||35.19||क्र॒व्याद॑म॒ग्निं प्र हि॑णोमि दू॒रं य॑म॒राज्यं॑ गच्छतु रिप्रवा॒हः ।
इहै॒वायमित॑रो जा॒तवे॑दा दे॒वेभ्यो॑ ह॒व्यं व॑हतु प्रजा॒नन्
vaha̍ va̱pāṃ jā̍tavedaḥ pi̱tṛbhyo̱ yatrai̍nā̱nvettha̱ nihi̍tān parā̱ke |
meda̍saḥ ku̱lyā upa̱ tāntsra̍vantu sa̱tyā e̍ṣāmā̱śiṣa̱: saṃ na̍mantā svāhā̍
||35.20||वह॑ व॒पां जा॑तवेदः पि॒तृभ्यो॒ यत्रै॑ना॒न्वेत्थ॒ निहि॑तान् परा॒के ।
मेद॑सः कु॒ल्या उप॒ तान्त्स्र॑वन्तु स॒त्या ए॑षामा॒शिष॒: सं न॑मन्ता॒ᳪ स्वाहा॑
syo̱nā pṛ̍thivi no bhavānṛkṣa̱rā ni̱veśa̍nī | yacchā̍ na̱: śarma̍ sa̱prathā̍: |
apa̍ na̱: śośu̍cada̱gham
||35.21||स्यो॒ना पृ॑थिवि नो भवानृक्ष॒रा नि॒वेश॑नी । यच्छा॑ न॒: शर्म॑ स॒प्रथा॑: ।
अप॑ न॒: शोशु॑चद॒घम्
a̱smāttvamadhi̍ jā̱to̱'si̱ tvada̱yaṃ jā̍yatā̱ṃ puna̍: | a̱sau sva̱rgāya̍ lo̱kāya̱ svāhā̍
||35.22||अ॒स्मात्त्वमधि॑ जा॒तो॒ऽसि॒ त्वद॒यं जा॑यतां॒ पुन॑: । अ॒सौ स्व॒र्गाय॑ लो॒काय॒ स्वाहा॑