i̱maṃ me̍ varuṇa śru̱dhī hava̍ma̱dyā ca̍ mṛḍaya | tvāma̍sva̱syurā ca̍ke
||21.1||tattvā̍ yāmi̱ brahma̍ṇā̱ vanda̍māna̱stadā śā̍ste̱ yaja̍māno ha̱virbhi̍: |
ahe̍ḍamāno varuṇe̱ha bo̱dhyuru̍śasa̱ mā na̱ āyu̱: pra mo̍ṣīḥ
||21.2||tvaṃ no̍ agne̱ varu̍ṇasya vi̱dvān de̱vasya̱ heḍo va̍ yāsisīṣṭhāḥ |
yaji̍ṣṭho̱ vahni̍tama̱: śośu̍cāno̱ viśvā̱ dveṣāsi̱ pra mu̍mugdhya̱smat
||21.3||sa tvaṃ no̍ agne'va̱mo bha̍vo̱tī nedi̍ṣṭho a̱syā u̱ṣaso̱ vyu̱ṣṭau |
ava̍ yakṣva no̱ varu̍ṇa rarā̍ṇo vī̱hi mṛ̍ḍī̱ka su̱havo̍ na edhi
||21.4||ma̱hīmū̱ ṣu mā̱tara suvra̱tānā̍mṛ̱tasya̱ patnī̱mava̍se huvema |
tu̱vi̱kṣa̱trāma̱jara̍ntīmurū̱cī su̱śarmā̍ṇa̱madi̍ti su̱praṇī̍tim
||21.5||su̱trāmā̍ṇaṃ pṛthi̱vīṃ dyāma̍ne̱hasa su̱śarmā̍ṇa̱madi̍ti su̱praṇī̍tim |
daivī̱ṃ nāva svari̱trāmanā̍gasa̱masra̍vantī̱mā ru̍hemā sva̱staye̍
||21.6||su̱nāva̱mā ru̍heya̱masra̍vantī̱manā̍gasam | śa̱tāri̍trā sva̱staye̍
||21.7||ā no̍ mitrāvaruṇā ghṛtai̱rgavyū̍timukṣatam | madhvā̱ rajāsi sukratū
||21.8||pra bā̱havā̍ sisṛtaṃ jī̱vase̍ na̱ ā no̱ gavyū̍timukṣataṃ ghṛ̱tena̍ |
ā mā̱ jane̍ śravayataṃ yuvānā śru̱taṃ me̍ mitrāvaruṇā̱ have̱mā
||21.9||śaṃ no̍ bhavantu vā̱jino̱ have̍ṣu de̱vatā̍tā mi̱tadra̍vaḥ sva̱rkāḥ |
ja̱mbhaya̱nto'hi̱ṃ vṛka rakṣāsi̱ sane̍mya̱smadyu̍yava̱nnamī̍vāḥ
||21.10||vāje̍-vāje'vata vājino no̱ dhane̍ṣu viprā amṛtā ṛtajñāḥ |
a̱sya madhva̍: pibata mā̱daya̍dhvaṃ tṛ̱ptā yā̍ta pa̱thibhi̍rdeva̱yānai̍:
||21.11||sami̍ddho a̱gniḥ sa̱midhā̱ susa̍middho̱ vare̍ṇyaḥ |
gā̱ya̱trī chanda̍ indri̱yaṃ tryavirgau̱rvayo̍ dadhuḥ
||21.12||tanū̱napā̱cchuci̍vratastanū̱pāśca̱ sara̍svatī |
u̱ṣṇihā̱ chanda̍ indri̱yaṃ di̍tya̱vāḍgaurvayo̍ dadhuḥ
||21.13||iḍā̍bhira̱gnirīḍya̱: somo̍ de̱vo ama̍rtyaḥ | a̱nu̱ṣṭupchanda̍ indri̱yaṃ pañcā̍virgau̱rvayo̍ dadhuḥ
||21.14||su̱ba̱rhira̱gniḥ pū̍ṣa̱ṇvāntstī̱rṇaba̍rhi̱rama̍rtyaḥ | bṛ̱ha̱tī chanda̍ indri̱yaṃ tri̍va̱tso gaurvayo̍ dadhuḥ
||21.15||duro̍ de̱vīrdiśo̍ ma̱hīrbra̱hmā de̱vo bṛha̱spati̍: |
pa̱ṅktiśchanda̍ i̱hendri̱yaṃ tu̍rya̱vāḍgau̱rvayo̍ dadhuḥ
||21.16||u̱ṣe ya̱hvī su̱peśa̍sā̱ viśve̍ de̱vā ama̍rtyāḥ |
tri̱ṣṭupchanda̍ i̱hendri̱yaṃ pa̍ṣṭha̱vāḍgau̱rvayo̍ dadhuḥ
||21.17||daivyā̱ hotā̍rā bhi̱ṣajendre̍ṇa sa̱yujā̍ yu̱jā |
jaga̍tī̱ chanda̍ indri̱yama̍na̱ḍvāngau̱rvayo̍ dadhuḥ
||21.18||ti̱sra iḍā̱ sara̍svatī̱ bhāra̍tī ma̱ruto̱ viśa̍: |
vi̱rāṭ chanda̍ i̱hendri̱yaṃ dhe̱nurgaurna vayo̍ dadhuḥ
||21.19||tvaṣṭā̍ tu̱rīpo̱ adbhu̍ta indrā̱gnī pu̍ṣṭi̱vardha̍nā |
dvipa̍dā̱ chanda̍ indri̱yamu̱kṣā gau̱rna vayo̍ dadhuḥ
||21.20||śa̱mi̱tā no̱ vana̱spati̍: savi̱tā pra̍su̱van bhaga̍m |
ka̱kupchanda̍ i̱hendri̱yaṃ va̱śā ve̱hadvayo̍ dadhuḥ
||21.21||svāhā̍ ya̱jñaṃ varu̍ṇaḥ sukṣa̱tro bhe̍ṣa̱jaṃ ka̍rat |
ati̍cchandā indri̱yaṃ bṛ̱hadṛ̍ṣa̱bho gaurvayo̍ dadhuḥ
||21.22||va̱sa̱ntena̍ ṛ̱tunā̍ de̱vā vasa̍vavastri̱vṛtā̍ stu̱tāḥ |
ra̱tha̱nta̱reṇa̱ teja̍sā ha̱virindre̱ vayo̍ dadhuḥ
||21.23||grī̱ṣmeṇa̍ ṛ̱tunā̍ de̱vā ru̱drāḥ pa̍ñcada̱śe stu̱tāḥ |
bṛ̱ha̱tā yaśa̍sā̱ bala ha̱virindre̱ vayo̍ dadhuḥ
||21.24||va̱rṣābhi̍rṛ̱tunā̍''di̱tyā stome̍ saptada̱śe stu̱tāḥ |
vai̱rū̱peṇa̍ vi̱śauja̍sā ha̱virindre̱ vayo̍ dadhuḥ
||21.25||śā̱ra̱dena̍ ṛ̱tunā̍ de̱vā e̍kaviśa ṛ̱bhava̍ stu̱tāḥ |
vai̱rā̱jena̍ śri̱yā śriya ha̱virindre̱ vayo̍ dadhuḥ
||21.26||he̱ma̱ntena̍ ṛ̱tunā̍ de̱vāstri̍ṇa̱ve ma̱ruta̍ stu̱tāḥ |
bale̍na̱ śakva̍rī̱: saho̍ ha̱virindre̱ vayo̍ dadhuḥ
||21.27||śai̱śi̱reṇa̍ ṛ̱tunā̍ de̱vāstra̍yastriśe'mṛtā̍ stu̱tāḥ |
sa̱tyena̍ re̱vatī̍: kṣa̱tra ha̱virindre̱ vayo̍ dadhuḥ
||21.28||hotā̍ yakṣatsa̱midhā̱'gnimi̱ḍaspa̱de'śvinendra sara̍svatīma̱jo dhū̱mro na go̱dhūmai̱: kuva̍lairbheṣa̱jaṃ madhu̱ śaṣpai̱rna teja̍ indri̱yaṃ paya̱: soma̍: pari̱srutā̍ ghṛ̱taṃ madhu̱ vyantvājya̍sya̱ hota̍ryaja
||21.29||hotā̍ yakṣa̱ttanū̱napā̱tsara̍svatī̱mavi̍rme̱ṣo na bhe̍ṣa̱jaṃ pa̱thā madhu̍matā̱ bhara̍nna̱śvinendrā̍ya vī̱ryaṃ bada̍rairupa̱vākā̍bhirbheṣa̱jaṃ tokma̍bhi̱: paya̱: soma̍: pari̱srutā̍ ghṛ̱taṃ madhu̱ vyantvājya̍sya̱ hota̱ryaja̍
||21.30||hotā̍ yakṣa̱nnarā̱śasa̱ṃ na na̱gnahu̱ṃ pati sura̍yā bheṣa̱jaṃ me̱ṣaḥ sara̍svatī bhi̱ṣagratho̱ na ca̱ndrayaśvino̍rva̱pā indra̍sya vī̱ryaṃ bada̍rairupa̱vākā̍bhirbheṣa̱jaṃ tokma̍bhi̱: paya̱: soma̍: pari̱srutā̍ ghṛ̱taṃ madhu̱ vyantvājya̍sya̱ hota̱ryaja̍
||21.31||hotā̍ yakṣadi̱ḍeḍi̱ta ā̱juhvā̍na̱: sara̍svatī̱mindra̱ṃ bale̍na va̱rdhaya̍nnṛṣa̱bheṇa̱ gave̍ndri̱yama̱śvinendrā̍ya bheṣa̱jaṃ yavai̍ rka̱rkandhu̍bhi̱rmadhu̍ lājai̱rna māsa̍ra̱ṃ paya̱: soma̍: pari̱srutā̍ ghṛ̱taṃ madhu̱ vyantvājya̍sya̱ hota̱ryaja̍
||21.32||hotā̍ yakṣadba̱rhirūrṇa̍mmradā bhi̱ṣaṅnāsa̍tyā bhi̱ṣajā̱'śvinā'śvā̱ śiśu̍matī bhi̱ṣagdhe̱nuḥ sara̍svatī bhi̱ṣagdu̱ha indrā̍ya bheṣa̱jaṃ paya̱: soma̍: pari̱srutā̍ ghṛ̱taṃ madhu̱ vyantvājya̍sya̱ hota̍ryaja
||21.33||3 ||
hotā̍ yakṣa̱dduro̱ diśa̍: kava̱ṣyo na vyaca̍svatīra̱śvibhyā̱ṃ na duro̱ diśa̱ indro̱ na roda̍sī̱ dughe̍ du̱he dhe̱nuḥ sara̍svatya̱śvinendrā̍ya bheṣa̱ja śu̱kraṃ na jyoti̍rindri̱yaṃ paya̱: soma̍: pari̱srutā̍ ghṛ̱taṃ madhu̱ vyantvājya̍sya̱ hota̱ryaja̍
||21.34||hotā̍ yakṣatsu̱peśa̍so̱ṣe nakta̱ṃ divā̱'śvinā̱ sama̍ñjāte̱ sara̍svatyā̱ tviṣi̱mindre̱ na bhe̍ṣa̱ja śye̱no na raja̍sā hṛ̱dā śri̱yā na māsa̍ra̱ṃ paya̱: soma̍: pari̱srutā̍ ghṛ̱taṃ madhu̱ vyantvājya̍sya̱ hota̱ryaja̍
||21.35||hotā̍ yakṣa̱ddaivyā̱ hotā̍rā bhi̱ṣajā̱'śvinendra̱ṃ na jāgṛ̍vi̱ divā̱ nakta̱ṃ na bhe̍ṣa̱jai: śūṣa sara̍svatī bhi̱ṣak sīse̍na duha indri̱yaṃ paya̱: soma̍: pari̱srutā̍ ghṛ̱taṃ madhu̱ vyantvājya̍sya̱ hota̱ryaja̍
||21.36||hotā̍ yakṣatti̱sro de̱vīrna bhe̍ṣa̱jaṃ traya̍stri̱dhāta̍vo̱'paso̍ rū̱pamindre̍ hira̱ṇyaya̍ma̱śvineḍā̱ na bhāra̍tī vā̱cā sara̍svatī̱ maha̱ indrā̍ya duha indri̱yaṃ paya̱: soma̍: pari̱srutā̍ ghṛ̱taṃ madhu̱ vyantvājya̍sya̱ hota̱ryaja̍
||21.37||hotā̍ yakṣat su̱rera̍samṛṣa̱bhaṃ naryā̍pasa̱ṃ tvaṣṭā̍ra̱mindra̍ma̱śvinā̍ bhi̱ṣaja̱ṃ na sara̍svatī̱mojo̱ na jū̱tiri̍ndri̱yaṃ vṛko̱ na ra̍bha̱so bhi̱ṣag yaśa̱: sura̍yā bheṣa̱ja śri̱yā na māsa̍ra̱ṃ paya̱: soma̍: pari̱srutā̍ ghṛ̱taṃ madhu̱ vyantvājya̍sya̱ hota̱ryaja̍
||21.38||hotā̍ yakṣa̱dvana̱spati śami̱tāra śa̱takra̍tuṃ bhī̱maṃ na ma̱nyu rājā̍naṃ vyā̱ghraṃ nama̍sā̱'śvinā̱ bhāma sara̍svatī bhi̱ṣagindrā̍ya duha indri̱yaṃ paya̱: soma̍: pari̱srutā̍ ghṛ̱taṃ madhu̱ vyantvājya̍sya̱ hota̱ryaja̍
||21.39||hotā̍ yakṣada̱gni svāhā''jya̍sya sto̱kānā svāhā̱ meda̍sā̱ṃ pṛtha̱k svāhā̱ chāga̍ma̱śvibhyā svāhā̍ me̱ṣa sara̍svatyai̱ svāha̍ ṛṣa̱bhamindrā̍ya sihāya̱ saha̍sa indri̱ya svāhā̱'gniṃ na bhe̍ṣa̱ja svāhā̱ soma̍mindri̱ya svāhendra su̱trāmā̍ṇa savi̱tāra̱ṃ varu̍ṇaṃ bhi̱ṣajā̱ṃ pati svāhā̱ vana̱spati̍ṃ pri̱yaṃ pātho̱ na bhe̍ṣa̱ja svāhā̍ de̱vā ā̍jya̱pā ju̍ṣā̱ṇo a̱gnirbhe̍ṣa̱jaṃ paya̱: soma̍: pari̱srutā̍ ghṛ̱taṃ madhu̱ vyantvājya̍sya̱ hota̱ryaja̍
||21.40||hotā̍ yakṣada̱śvinau̱ chāga̍sya va̱pāyā̱ meda̍so ju̱ṣetā ha̱virhota̱ryaja̍ |
hotā̍ yakṣa̱tsara̍svatīṃ me̱ṣasya̍ va̱pāyā̱ meda̍so ju̱ṣatā ha̱virhota̱ryaja̍ |
hotā̍ yakṣa̱dindra̍mṛṣa̱bhasya̍ va̱pāyā̱ meda̍so ju̱ṣatā ha̱virhota̱ryaja̍
||21.41||hotā̍ yakṣada̱śvinau̱ sara̍svatī̱mindra su̱trāmā̍ṇami̱me somā̍: su̱rāmā̍ṇa̱śchāgai̱rna me̱ṣairṛ̍ṣabhaiḥ su̱tāḥ śaṣpai̱rna tokma̍bhirlā̱jairmaha̍svanto̱ madā̱ māsa̍reṇa̱ pari̍ṣkṛtāḥ śu̱krāḥ paya̍svanto̱'mṛtā̱: prasthi̍tā vo madhu̱ścuta̱stāna̱śvinā̱ sara̍sva̱tīndra̍: su̱trāmā̍ vṛtra̱hā ju̱ṣantā so̱myaṃ madhu̱ piba̍ntu̱ vyantu̱ hota̱ryaja̍
||21.42||hotā̍ yakṣada̱śvinau̱ chāga̍sya ha̱viṣa̱ āttā̍ma̱dya ma̍dhya̱to meda̱ udbhṛ̍taṃ pu̱rā dveṣo̍bhyaḥ pu̱rā pau̍ruṣeyyā gṛ̱bho ghastā̍ṃ nū̱naṃ ghā̱se a̍jrāṇā̱ṃ yava̍saprathamānā su̱matkṣa̍rāṇā śataru̱driyā̍ṇāmagniṣvā̱ttānā̱ṃ pīvo̍pavasānāṃ pārśva̱taḥ śro̍ṇi̱taḥ śi̍tāma̱ta u̍tsāda̱to'ṅgā̍daṅgā̱dava̍ttānā̱ṃ kara̍ta e̱vāśvinā̍ ju̱ṣetā ha̱virhota̱ryaja̍
||21.43||hotā̍ yakṣa̱t sara̍svatīṃ me̱ṣasya̍ ha̱viṣa̱ āva̍yada̱dya ma̍dhya̱to meda̱ udbhṛ̍taṃ pu̱rā dveṣo̍bhyaḥ pu̱rā pau̍ruṣeyyā gṛ̱bho ghasa̍nnū̱naṃ ghā̱se a̍jrāṇā̱ṃ yava̍saprathamānā su̱matkṣa̍rāṇā śataru̱driyā̍ṇāmagniṣvā̱ttānā̱ṃ pīvo̍pavasanānāṃ pārśva̱taḥ śro̍ṇi̱taḥ śi̍tāma̱ta u̍tsāda̱to'ṅgā̍daṅgā̱dava̍ttānā̱ṃ kara̍de̱va sara̍svatī ju̱ṣatā ha̱virhota̱ryaja̍
||21.44||hotā̍ yakṣa̱dindra̍mṛṣa̱bhasya̍ ha̱viṣa̱ āva̍yada̱dya ma̍dhya̱to meda̱ udbhṛ̍taṃ pu̱rā dveṣo̍bhyaḥ pu̱rā pau̍ruṣeyyā gṛ̱bho ghasa̍nnū̱naṃ ghā̱se a̍jrāṇā̱ṃ yava̍saprathamānā su̱matkṣa̍rāṇā śataru̱driyā̍ṇāmagniṣvā̱ttānā̱ṃ pīvo̍pavasānānāṃ pārśva̱taḥ śro̍ṇi̱taḥ śi̍tāma̱ta u̍tsāda̱to'ṅgā̍daṅgā̱dava̍ttānā̱ṃ kara̍de̱vamindro̍ ju̱ṣatā ha̱virhota̱ryaja̍
||21.45||hotā̍ yakṣa̱dvana̱spati̍ma̱bhi hi pi̱ṣṭata̍mayā̱ rabhi̍ṣṭhayā raśa̱nayādhi̍ta | yatrā̱śvino̱śchāga̍sya ha̱viṣa̍: pri̱yā dhāmā̍ni̱ yatra̱ sara̍svatyā me̱ṣasya̍ ha̱viṣa̍: pri̱yā dhāmā̍ni̱ yatrendra̍sya ṛṣa̱bhasya̍ ha̱viṣa̍: pri̱yā dhāmā̍ni̱ yatrā̱gneḥ pri̱yā dhāmā̍ni̱ yatra̱ soma̍sya pri̱yā dhāmā̍ni̱ yatrendra̍sya su̱trāmṇa̍: pri̱yā dhāmā̍ni̱ yatra̍ savi̱tuḥ pri̱yā dhāmā̍ni̱ yatra̱ varu̍ṇasya pri̱yā dhāmā̍ni̱ yatra̱ vana̱spate̍: pri̱yā pāthāsi̱ yatra̍ de̱vānā̍mājya̱pānā̍ṃ pri̱yā dhāmā̍ni̱ yatrā̱gnerhotu̍: pri̱yā dhāmā̍ni̱ tatrai̱tānpra̱stutye̍vopa̱stutye̍vo̱pāva̍srakṣa̱drabhī̍yasa iva kṛ̱tvī kara̍de̱vaṃ de̱vo vana̱spati̍rju̱ṣatā ha̱virhota̱ryaja̍
||21.46||hotā̍ yakṣada̱gni svi̍ṣṭa̱kṛta̱mayā̍ḍa̱gnira̱śvino̱śchāga̍sya ha̱viṣa̍: pri̱yā dhāmā̱nyayā̱ṭ sara̍svatyā me̱ṣasya̍ ha̱viṣa̍: pri̱yā dhāmā̱nyayā̱ḍindra̍sya ṛṣa̱bhasya̍ ha̱viṣa̍: pri̱yā dhāmā̱nyayā̍ḍa̱gneḥ pri̱yā dhāmā̱nyayā̱ṭ soma̍sya pri̱yā dhāmā̱nyayā̱ḍindra̍sya su̱trāmṇa̍: pri̱yā dhāmā̱nyayā̍ṭ savi̱tuḥ pri̱yā dhāmā̱nyayā̱ḍ varu̍ṇasya pri̱yā dhāmā̱nyayā̱ḍ vana̱spate̍: pri̱yā pāthāsyayā̍ḍ de̱vānā̍mājya̱pānā̍ṃ pri̱yā dhāmā̍ni̱ yakṣa̍da̱gnerhotu̍: pri̱yā dhāmā̍ni̱ yakṣa̱t svaṃ ma̍hi̱māna̱māya̍jatā̱mejyā̱ iṣa̍: kṛ̱ṇotu̱ so a̍dhva̱rā jā̱tave̍dā ju̱ṣatā ha̱virhota̱ryaja̍
||21.47||de̱vaṃ ba̱rhiḥ sara̍svatī sude̱vamindre̍ a̱śvinā̍ |
tejo̱ na cakṣu̍ra̱kṣyo̱rba̱rhiṣā̍ dadhurindri̱yaṃ va̍su̱vane̍ vasu̱dheya̍sya vyantu̱ yaja̍
||21.48||de̱vīrdvāro̍ a̱śvinā̍ bhi̱ṣajendre̱ sara̍svatī |
prā̱ṇaṃ na vī̱rya̱ṃ na̱si dvāro̍ dadhurindri̱yaṃ va̍su̱vane̍ vasu̱dheya̍sya vyantu̱ yaja̍
||21.49||de̱vī u̱ṣāsā̍va̱śvinā̍ su̱trāmendre̱ sara̍svatī |
bala̱ṃ na vāca̍mā̱sya̱ u̱ṣābhyā̍ṃ dadhurindri̱yaṃ va̍su̱vane̍ vasu̱dheya̍sya vyantu̱ yaja̍
||21.50||de̱vī joṣṭrī̱ sara̍svatya̱śvinendra̍mavardhayan |
śrotra̱ṃ na karṇa̍yo̱ryaśo̱ joṣṭrī̍bhyāṃ dadhurindri̱yaṃ va̍su̱vane̍ vasu̱dheya̍sya vyantu̱ yaja̍
||21.51||de̱vī ū̱rjāhu̍tī̱ dughe̍ su̱dughendre̱ sara̍svatya̱śvinā̍ bhi̱ṣajā̍'vataḥ |
śu̱kraṃ na jyoti̱ stana̍yo̱rāhu̍tī dhatta indri̱yaṃ va̍su̱vane̍ vasu̱dheya̍sya vyantu̱ yaja̍
||21.52||de̱vā de̱vānā̍ṃ bhi̱ṣajā̱ hotā̍rā̱vindra̍ma̱śvinā̍ |
va̱ṣa̱ṭkā̱rai̱: sara̍svatī̱ tviṣi̱ṃ na hṛda̍ye ma̱ti hotṛ̍bhyāṃ dadhurindri̱yaṃ va̍su̱vane̍ vasu̱dheya̍sya vyantu̱ yaja̍
||21.53||de̱vīsti̱srasti̱sro de̱vīra̱śvineḍā̱ sara̍svatī |
śūṣa̱ṃ na madhye̱ nābhyā̱mindrā̍ya dadhurindri̱yaṃ va̍su̱vane̍ vasu̱dheya̍sya vyantu̱ yaja̍
||21.54||de̱va indro̱ narā̱śasa̍strivarū̱thaḥ sara̍svatya̱śvibhyā̍mīyate̱ ratha̍: |
reto̱ na rū̱pama̱mṛta̍ṃ ja̱nitra̱mindrā̍ya̱ tvaṣṭā̱ dadha̍dindri̱yāṇi̍ vasu̱vane̍ vasu̱dheya̍sya vyantu̱ yaja̍
||21.55||de̱vo de̱vairvana̱spati̱rhira̍ṇyaparṇo a̱śvibhyā sara̍svatyā supippa̱la indrā̍ya pacyate̱ madhu̍ |
ojo̱ na jū̱tirṛ̍ṣa̱bho na bhāma̱ṃ vana̱spati̍rno̱ dadha̍dindri̱yāṇi̍ vasu̱vane̍ vasu̱dheya̍sya vyantu̱ yaja̍
||21.56||de̱vaṃ ba̱rhirvāri̍tīnāmadhva̱re stī̱rṇama̱śvibhyā̱mūrṇa̍mradā̱: sara̍svatyā syo̱nami̍ndra te̱ sada̍: |
ī̱śāyai̍ ma̱nyu rājā̍naṃ ba̱rhiṣā̍ dadhurindri̱yaṃ va̍su̱vane̍ vasu̱dheya̍sya vyantu̱ yaja̍
||21.57||de̱vo a̱gniḥ svi̍ṣṭa̱kṛdde̱vānya̍kṣadyathāya̱tha hotā̍rā̱vindra̍ma̱śvinā̍ vā̱cā vāca sara̍svatīma̱gni soma sviṣṭa̱kṛt svi̍ṣṭa̱ indra̍: su̱trāmā̍ savi̱tā varu̍ṇo bhi̱ṣagi̱ṣṭo de̱vo vana̱spati̱: svi̱ṣṭā de̱vā ā̍jya̱pāḥ svi̍ṣṭo a̱gnira̱gninā̱ hotā̍ ho̱tre svi̍ṣṭa̱kṛdyaśo̱ na dadha̍dindri̱yamūrja̱mapa̍citi sva̱dhāṃ va̍su̱vane̍ vasu̱dheya̍sya vyantu̱ yaja̍
||21.58||a̱gnima̱dya hotā̍ramavṛṇītā̱yaṃ yaja̍māna̱: paca̱n paktī̱: paca̍n puro̱ḍāśā̍n ba̱dhnanna̱śvibhyā̱ṃ chāga sara̍svatyai me̱ṣamindrā̍ya ṛṣa̱bha su̱nvanna̱śvibhyā sara̍svatyā̱ indrā̍ya su̱trāmṇe̍ surāso̱mān
||21.59||sū̱pa̱sthā a̱dya de̱vo vana̱spati̍rabhavada̱śvibhyā̱ṃ chāge̍na̱ sara̍svatyai me̱ṣeṇendrā̍ya ṛṣa̱bheṇākṣa̱m̐stān me̍da̱staḥ prati̍ paca̱tāgṛ̍bhīṣa̱tāvī̍vṛdhanta puro̱ḍāśai̱rapu̍ra̱śvinā̱ sara̍sva̱tīndra̍: su̱trāmā̍ surāso̱mān
||21.60||tvāma̱dya ṛ̍ṣa ārṣeya ṛṣīṇāṃ napādavṛṇītā̱yaṃ yaja̍māno ba̱hubhya̱ ā saṅga̍tebhya e̱ṣa me̍ de̱veṣu̱ vasu̱ vāryāya̍kṣyata̱ iti̱ tā yā de̱vā de̍va̱ dānā̱nyadu̱stānya̍smā̱ ā ca̱ śāsvā ca̍ gurasveṣi̱taśca̍ hota̱rasi̍ bhadra̱vācyā̍ya̱ preṣi̍to̱ mānu̍ṣaḥ sūktavā̱kāya̍ sū̱ktā brū̍hi
||21.61||