Vājasaneyi Madhyandina Saṃhitā — Chapter 1 (31 mantras)

Vājasaneyi Madhyandina Saṃhitā — Chapter 1

---

Mantras

Mantra	First Words
1	iṣe tvorje
2	vaso pavitramasi
3	vaso pavitramasi
4	sā viśvāyu
5	agne vratapate
6	kastvā yunakti
7	pratyuṣṭa rakṣa
8	dhūrasi dhūrva
9	viṣṇustvā kramatāmuru
10	devasya tvā
11	bhūtāya tvā
12	pavitre stho
13	yuṣmā indro’vṛṇīta
14	śarmāsyavadhūta rakṣo’vadhūtā
15	agnestanūrasi vāco
16	kukkuṭo’si madhujihva
17	dhṛṣṭirasyapā’gne agnimāmāda
18	agne brahma
19	śarmāsyavadhūta rakṣo’vadhūtā
20	dhānyamasi dhinuhi
21	devasya tvā
22	janayatyai tvā
23	mā bhermā
24	devasya tvā
25	pṛthivi devayajanyoṣadhyāste
26	apāraru pṛthivyai
27	gāyatreṇa tvā
28	purā krūrasya
29	pratyuṣṭa rakṣa
30	adityai rāsnāsi
31	savitustvā prasava

---

Mantra 1 {#mantra-1}

Adhyāya: 1 | Mantra: 1

i̱ṣe tvo̱rje tvā̍ vā̱yava̍ stha de̱vo va̍: savi̱tā prārpa̍yatu̱ śreṣṭha̍tamāya̱ karma̍ṇa̱ āpyā̍yadhva maghnyā̱ indrā̍ya bhā̱gaṃ pra̱jāva̍tīranamī̱vā a̍ya̱kṣmā mā va̍ ste̱na ī̍śata̱ māghaśaso dhru̱vā a̱smin gopa̍tau syāta ba̱hvīryaja̍mānasya pa̱śūnpā̍hi

---

Mantra 2 {#mantra-2}

Adhyāya: 1 | Mantra: 2

vaso̍: pa̱vitra̍masi̱ dyau̍rasi pṛthi̱vya̱si māta̱riśva̍no gha̱rmo̱’si vi̱śvadhā̍ asi | para̱meṇa̱ dhāmnā̱ dṛha̍sva̱ mā hvā̱rmā te̍ ya̱jñapa̍tirhvārṣīt

---

Mantra 3 {#mantra-3}

Adhyāya: 1 | Mantra: 3

vaso̍: pa̱vitra̍masi śa̱tadhā̍ra̱ṃ vaso̍: pa̱vitra̍masi sa̱hasra̍dhāram | de̱vastvā̍ savi̱tā pu̍nātu̱ vaso̍: pa̱vitre̍ṇa śa̱tadhā̍reṇa su̱pvā kāma̍dhukṣaḥ

---

Mantra 4 {#mantra-4}

Adhyāya: 1 | Mantra: 4

sā vi̱śvāyu̱: sā vi̱śvaka̍rmā̱ sā vi̱śvadhā̍yāḥ | indra̍sya tvā bhā̱ga some̱nāta̍nacmi̱ viṣṇo̍ ha̱vya ra̍kṣa

---

Mantra 5 {#mantra-5}

Adhyāya: 1 | Mantra: 5

agne̍ vratapate vra̱taṃ ca̍riṣyāmi̱ taccha̍keya̱ṃ tanme̍ rādhyatām | i̱dama̱hamanṛ̍tātsa̱tyamupai̍mi

---

Mantra 6 {#mantra-6}

Adhyāya: 1 | Mantra: 6

kastvā̍ yunakti̱ sa tvā̍ yunakti̱ kasmai̍ tvā yunakti̱ tasmai̍ tvā yunakti | karma̍ṇe vā̱ṃ veṣā̍ya vām

---

Mantra 7 {#mantra-7}

Adhyāya: 1 | Mantra: 7

pratyu̍ṣṭa rakṣa̱: pratyu̍ṣṭā̱ arā̍tayo̱ niṣṭa̍pta rakṣo̱ niṣṭa̍ptā̱ arā̍tayaḥ | u̱rvantari̍kṣa̱manve̍mi

---

Mantra 8 {#mantra-8}

Adhyāya: 1 | Mantra: 8

dhūra̍si̱ dhūrva̱ dhūrva̍nta̱ṃ dhūrva̱ taṃ yo̱’smāndhūrva̍ti̱ taṃ dhū̍rva̱ yaṃ va̱yaṃ dhūrvā̍maḥ | de̱vānā̍masi̱ vahni̍tama sasni̍tama̱ṃ papri̍tama̱ṃ juṣṭa̍tamaṃ deva̱hūta̍mam

---

Mantra 9 {#mantra-9}

Adhyāya: 1 | Mantra: 9

viṣṇu̍stvā kramatā¬mu̱ru vātā̱yāpa̍hata rakṣo̱ yaccha̍ntā̱ṃ pañca̍

---

Mantra 10 {#mantra-10}

Adhyāya: 1 | Mantra: 10

de̱vasya̍ tvā savi̱tuḥ pra̍sa̱ve’śvino̍rbā̱hubhyā̍ṃ pū̱ṣṇo hastā̍bhyām | a̱gnaye̱ juṣṭa̍ṃ gṛhṇāmya̱gnīṣomā̍bhyā̱ṃ juṣṭa̍ṃ gṛhṇāmi

---

Mantra 11 {#mantra-11}

Adhyāya: 1 | Mantra: 11

bhū̱tāya̍ tvā̱ nārā̍taye sva̱rabhi̱vikhye̍ṣa̱ṃ dṛha̍ntā̱ṃ duryā̍: pṛthi̱vyāmu̱rvantari̍kṣa̱manve̍mi pṛthi̱vyāstvā̱ nābhau̍ sādayā̱myadi̍tyā u̱pasthe’gne̍ ha̱vya ra̍kṣa

---

Mantra 12 {#mantra-12}

Adhyāya: 1 | Mantra: 12

pa̱vitre̍ stho vaiṣṇa̱vyau̱ savi̱turva̍: prasa̱va utpu̍nā̱myacchi̍dreṇa pa̱vitre̍ṇa̱ sūrya̍sya ra̱śmibhi̍: | devī̍rāpo agreguvo agrepu̱vo’gra̍ i̱mama̱dya ya̱jñaṃ na̍ya̱tāgre̍ ya̱jñapa̍ti su̱dhātu̍ṃ ya̱jñapa̍tiṃ deva̱yuva̍m

---

Mantra 13 {#mantra-13}

Adhyāya: 1 | Mantra: 13

yu̱ṣmā indro̍’vṛṇīta vṛtra̱tūrye̍ yū̱yamindra̍mavṛṇīdhvaṃ vṛtra̱tūrye̱ prokṣi̍tā stha | a̱gnaye̍ tvā̱ juṣṭa̱ṃ prokṣā̍mya̱gnīṣomā̍bhyāṃ tvā̱ juṣṭa̱ṃ prokṣā̍mi | daivyā̍ya̱ karma̍ṇe śundhadhvaṃ devaya̱jyāyai̱ yadvo’śu̍ddhāḥ parāja̱ghnuri̱daṃ va̱stacchu̍ndhāmi

---

Mantra 14 {#mantra-14}

Adhyāya: 1 | Mantra: 14

śarmā̱syava̍dhūta rakṣo’va̍dhūtā̱ arā̍ta̱yo ‘di̍tyā̱stvaga̍si̱ prati̱ tvādi̍tirvettu |adri̍rasi vānaspa̱tyo grāvā̍’si pṛ̱thubu̍dhna̱: prati̱ tvā’di̍tyā̱stvagve̍ttu

---

Mantra 15 {#mantra-15}

Adhyāya: 1 | Mantra: 15

a̱gnesta̱nūra̍si vā̱co vi̱sarja̍naṃ de̱vavī̍taye tvā gṛhṇāmi bṛ̱hadgrā̍vā’si vānaspa̱tyaḥ sa i̱daṃ de̱vebhyo̍ ha̱viḥ śa̍mīṣva su̱śami̍ śamīṣva | havi̍ṣkṛ̱dehi̱ havi̍ṣkṛ̱dehi̍

---

Mantra 16 {#mantra-16}

Adhyāya: 1 | Mantra: 16

ku̱kku̱ṭo̱’si̱ madhu̍jihva̱ iṣa̱mūrja̱māva̍da̱ tvayā̍ va̱ya sa̍ṃdhā̱ta sa̍ṃdhātaṃ jeṣma va̱rṣavṛ̍ddhamasi̱ prati̍ tvā va̱rṣavṛ̍ddhaṃ vettu̱ parā̍pūta rakṣa̱: parā̍pūtā̱ arā̍ta̱yo ‘pa̍hata rakṣo̍ vā̱yurvo̱ vivi̍naktu de̱vo va̍: savi̱tā hira̍ṇyapāṇi̱: prati̍gṛbhṇā̱tvacchi̍dreṇa pā̱ṇinā̍

---

Mantra 17 {#mantra-17}

Adhyāya: 1 | Mantra: 17

dhṛṣṭi̍ra̱syapā̍’gne a̱gnimā̱māda̍ṃ jahi̱ niṣkra̱vyāda se̱dhā de̍va̱yaja̍ṃ vaha | dhru̱vama̍si pṛthi̱vīṃ dṛha brahma̱vani̍ tvā kṣatra̱vani̍ sajāta̱vanyupa̍dadhāmi̱ bhātṛ̍vyasya va̱dhāya̍

---

Mantra 18 {#mantra-18}

Adhyāya: 1 | Mantra: 18

agne̱ brahma̍ gṛbhṇīṣva dha̱ruṇa̍masya̱ntari̍kṣaṃ dṛha brahma̱vani̍ tvā kṣatra̱vani̍ sajāta̱vanyupa̍dadhāmi̱ bhrātṛ̍vyasya ba̱dhāya̍ | dha̱rtrama̍si̱ diva̍ṃ dṛha brahma̱vani̍ tvā kṣatra̱vani̍ sajāta̱vanyupa̍dadhāmi̱ bhrātṛ̍vyasya ba̱dhāya̍ | viśvā̍bhya̱stvāśā̍bhya̱ upa̍dadhāmi̱ cita̍ sthordhva̱cito̱ bhṛgū̍ṇā̱maṅgi̍rasā̱ṃ tapa̍sā tapyadhvam

---

Mantra 19 {#mantra-19}

Adhyāya: 1 | Mantra: 19

śarmā̱syava̍dhūta rakṣo’va̍dhūtā̱ arā̍ta̱yo’di̍tyā̱stvaga̍si̱ prati̱ tvā’di̍tirvettu | dhi̱ṣaṇā̍’si parva̱tī prati̱ tvā’di̍tyā̱stvagve̍ttu di̱vaska̍mbha̱nīra̍si dhi̱ṣaṇā̍’si pārvate̱yī prati̍ tvā parva̱tī ve̍ttu

---

Mantra 20 {#mantra-20}

Adhyāya: 1 | Mantra: 20

dhā̱nya̱masi dhinu̱hi de̱vān prā̱ṇāya̍ tvo dā̱nāya̍ tvā vyā̱nāya̍ tvā | dī̱rghāmanu̱ prasi̍ti̱māyu̍ṣe dhāṃ de̱vo va̍: savi̱tā hira̍ṇyapāṇi̱: prati̍gṛbhṇā̱tvacchi̍dreṇa pā̱ṇinā̱ cakṣu̍ṣe tvā ma̱hīnā̱ṃ payo̍’si

---

Mantra 21 {#mantra-21}

Adhyāya: 1 | Mantra: 21

de̱vasya̍ tvā savi̱tuḥ pra̍sa̱ve’śvino̍rbā̱hubhyā̍ṃ pū̱ṣṇo hastā̍bhyām | saṃ va̍pāmi̱ samāpa̱ oṣa̍dhībhi̱: samoṣa̍dhayo̱ rase̍na | sa re̱vatī̱rjaga̍tībhiḥ pṛcyantā saṃ madhu̍matī̱rmadhu̍matībhiḥ pṛcyantām

---

Mantra 22 {#mantra-22}

Adhyāya: 1 | Mantra: 22

jana̍yatyai tvā̱ saṃyau̍mī̱dama̱gneri̱dama̱gnīṣoma̍yori̱ṣe tvā̍ gha̱rmo̱’si vi̱śvāyurastvā̍ savi̱tā śra̍payatu̱ varṣi̱ṣṭhe’dhi̱ nāke̍

---

Mantra 23 {#mantra-23}

Adhyāya: 1 | Mantra: 23

mā bhe̱rmā saṃvi̍kthā̱ ata̍merurya̱jño’ta̍meru̱ryaja̍mānasya pra̱jā bhū̍yāt tri̱tāya̍ tvā dvi̱tāya̍ tvaika̱tāya̍ tvā

---

Mantra 24 {#mantra-24}

Adhyāya: 1 | Mantra: 24

de̱vasya̍ tvā savi̱tuḥ pra̍sa̱ve’śvino̍rbā̱hubhyā̍ṃ pū̱ṣṇo hastā̍bhyām | āda̍de’dhvara̱kṛta̍ṃ de̱vebhya̱ indra̍sya bā̱hura̍si̱ dakṣi̍ṇaḥ sa̱hasra̍bhṛṣṭiḥ śa̱tate̍jā vā̱yura̍si ti̱gmate̍jā dviṣa̱to va̱dhaḥ

---

Mantra 25 {#mantra-25}

Adhyāya: 1 | Mantra: 25

pṛthi̍vi devayaja̱nyoṣa̍dhyāste̱ mūla̱ṃ mā hisiṣaṃ vra̱jaṃ ga̍ccha go̱ṣṭhāna̱ṃ varṣa̍tu te̱ dyauba̍dhā̱na de̍va savitaḥ para̱masyā̍ṃ pṛthi̱vyā śa̱tena̱ pāśai̱ryo’smāndveṣṭi̱ yaṃ ca̍ va̱yaṃ dvi̱ṣmastamato̱ mā mau̍k

---

Mantra 26 {#mantra-26}

Adhyāya: 1 | Mantra: 26

apā̱raru̍ṃ pṛthi̱vyai de̍va̱yaja̍nādvadhyāsaṃ vra̱jaṃ ga̍ccha go̱ṣṭhāna̱ṃ varṣa̍tu te̱ dyaurba̍dhā̱na de̍va savitaḥ para̱masyā̍ṃ pṛthi̱vyā śa̱tena̱ pāśai̱ryo’smāndveṣṭi̱ yaṃ ca̍ va̱yaṃ dvi̱ṣmastamato̱ mā mau̍k | ara̍ro̱ diva̱ṃ mā pa̍pto dra̱psaste̱ dyāṃ mā ska̍n vra̱jaṃ ga̍ccha go̱ṣṭhāna̱ṃ varṣa̍tu te̱ dyaurba̍dhā̱na de̍va savitaḥ para̱masyā̍ṃ pṛthi̱vyā śa̱tena̱ pāśai̱ryo’smāndveṣṭi̱ yaṃ ca̍ va̱yaṃ dvi̱ṣmastamato̱ mā mau̍k

---

Mantra 27 {#mantra-27}

Adhyāya: 1 | Mantra: 27

gā̱ya̱treṇa̍ tvā̱ chanda̍sā̱ pari̍gṛhṇāmi̱ trai̍ṣṭubhena tvā̱ chanda̍sā̱ pari̍gṛhṇāmi̱ jāga̍tena tvā̱ chanda̍sā̱ pari̍gṛhṇāmi | su̱kṣmā cāsi̍ śi̱vā cā̍si syo̱nā cāsi̍ su̱ṣadā̍ cā̱syūrja̍svatī̱ cāsi̱ paya̍svatī ca

---

Mantra 28 {#mantra-28}

Adhyāya: 1 | Mantra: 28

pu̱rā krū̱rasya̍ vi̱sṛpo̍ virapśinnudā̱dāya̍ pṛthi̱vīṃ jī̱vadā̍num | yāmairayam̐śca̱ndrama̍si sva̱dhābhi̱stāmu̱ dhīrā̍so anu̱diśya̍ yajante | prokṣa̍ṇī̱rāsā̍daya dvi̍ṣa̱to ba̱dho̱’si

---

Mantra 29 {#mantra-29}

Adhyāya: 1 | Mantra: 29

pratyu̍ṣṭa rakṣa̱: pratyu̍ṣṭā̱ arā̍tayo niṣṭa̍pta rakṣo̱ niṣṭa̍ptā̱ arā̍tayaḥ | ani̍śito’si sapatna̱kṣidvā̱jina̍ṃ tvā vāje̱dhyāyai̱ sammā̍rjmi | pratyu̍ṣṭa rakṣa̱: pratyu̍ṣṭā̱ arā̍tayo̱ niṣṭa̍pta rakṣo̱ niṣṭa̍ptā̱ arā̍tayaḥ | ani̍śitā’si sapatna̱kṣidvā̱jinī̍ṃ tvā vāje̱dhyāyai̱ sammā̍rjmi

---

Mantra 30 {#mantra-30}

Adhyāya: 1 | Mantra: 30

adi̍tyai̱ rāsnā̍si viṣṇo̍rve̱ṣpo̱’syū̱rje tvā ‘da̍bdhena tvā̱ cakṣu̱ṣāva̍paśyāmi | a̱gnerji̱hvāsi̍ su̱hūrde̱vebhyo̱ dhāmne̍ dhāmne me bhava̱ yaju̍ṣe yajuṣe

---

Mantra 31 {#mantra-31}

Adhyāya: 1 | Mantra: 31

sa̱vi̱tustvā̍ prasa̱va utpu̍nā̱myacchi̍dreṇa pa̱vitre̍ṇa̱ sūrya̍sya ra̱śmibhi̍: | sa̱vi̱turva̍: prasa̱va utpu̍nā̱myacchi̍dreṇa pa̱vitre̍ṇa̱ sūrya̍sya ra̱śmibhi̍: | tejo̍’si śu̱krama̍sya̱mṛta̍masi dhāma̱ nāmā̍si pri̱yaṃ de̱vānā̱manā̍dhṛṣṭaṃ deva̱yaja̍namasi

---